Ezequiel
17 Jehová Diosca cutinllatajmi ñucamanca cai shimicunata nirca: 2 “Runapaj churi, israelitacunamanta mana intindipaj yuyaicunata, shuj chꞌimbapuraitapish parlai. 3 Caita ningui: ‘Tucuita Mandaj Amito Jehová Diosca caitami nin: “Shuj jatun aguilami shamurca. Chai aguilaca jatun suni alascunayuj, tucui laya colorta charij achca plumacunayujmi carca. Chai aguilaca Libanoman shamushpami cedro yura puntata pꞌitirca. 4 Ashtahuan jahuaman huiñashca ramata pꞌitishpami comerciantecunapaj allpaman* aparca. Chai ramataca comerciantecunapaj shuj llajtapimi plantarca. 5 Qꞌuipaca allpamanta muyuta japishpami alli pꞌucuj allpapi tarpurca. Chai muyutaca achca yacu tiyan uripi sauce yurata tarpuj shinami tarpurca. 6 Chai muyu huiñashpaca ramacuna junda uchilla uva yurami tucurca. Ramacunaca yura maipi cashcallapitajmi huiñarca. Sapicunapish yura ucullapitajmi sapiyashpa catirca. Chashnami ramacunayuj uva yura tucurca.
7 Shinallataj shujtaj jatun águila shamujtami ricurcani. Chai aguilaca jatun alascunayuj, jatun plumacunayujmi carca. Chaimi uva yuraca maipi plantashca allpamantaca paipaj sapicunata aguilapajman achca munaihuan caruta chutarca. Águila yacuta regachunpish ramacunatami paipajman chutarca. 8 Uva yuraca ñami alli allpapi, achca yacucuna cꞌuchupi plantashca carca. Chai uva yuraca ramacuna huiñachun, granota pꞌucuchun, sumaj uva yura tucuchunmi chashna plantashca carca” ninmi’ ningui.
9 Cashna ningui: ‘Tucuita Mandaj Amito Jehová Diosca caitami nin: “¿Cai uva yuraca sisangachu? ¿Manachu sapimanta aisashpa shitajpica pꞌucushca granopish ismushpa, retoñocunapish chaquiringa? Chai yuraca librimi chaquiringa. Chaimi sapimanta aisashpa shitangapajca sinchi rigrapish, achca gentecunapish mana minishtiringa. 10 Shujtaj ladopi plantashca cashpapish, ¿chai uva yuraca sisangachu? ¿Manachu inti llujshin ladomanta huaira shamujpica tucui chaquiringa? Maipimi huiñarca chai mirga allpallapitajmi chaquiringa” ninmi’ ningui” nircami.
11 Jehová Diosca cutinllatajmi ñucamanca cai shimicunata nirca: 12 “Mana cazuj gentecunamanca: ‘¿Caicuna ima nisha nishcataca manachu cuentata cunguichij?’ ningui. Paicunamanca cashna ningui: ‘Ricuichij, Babilonia llajtata mandaj reyca Jerusalenman shamushpami reytapish, mandajcunatapish Babiloniaman apashpa rirca. 13 Ashtahuanpish reypaj familiamanta shujta japishpami paihuan shuj ari ninacuita rurashpa paita jurachirca. Chaita rurashca qꞌuipaca chai llajtamanta rijsishca runacunatami apashpa rirca. 14 Chai llajta pingaipi churashca cachun, poderta cutinllataj ama charichunmi chashna rurarca. Pero paihuan ari ninacushcata pajtachijllapimi chai llajtaca tiyashpa catina carca. 15 Pero Judá llajtamanta reyca* Babilonia llajtamanta reypaj* contrami tucurca. Chaimi paica caballocunata, achca soldadocunata cuchun Egipto llajtaman huillajcunata cacharca. ¿Chaita rurajpica tucui imapish allichu llujshinga? ¿Chaita ruraj runaca llaquichinamantaca quishpiringachu? ¿Ari ninacuita mana pajtachishpaca quishpiringachu?’ ningui.
16 ‘“Ñuca causacushca shinallatajmi jurani” ninmi Tucuita Mandaj Amito Jehová Diosca. “Judá llajtamanta reyca Babiloniapimi huañunga. Babiloniapimi paita reyta ruraj reyca causan. Judá llajtamanta reyca pai jurashcatami mana valichirca. Shinallataj pai ari nishcataca mana pajtachircachu. 17 Babilonia llajtamanta soldadocuna allpa montonta churajpi, chai llajta muyundijpi pircacunata shayachijpica faraonpaj tucui soldadocunaca paitaca mana ayudai tucungachu. 18 Paica juramentota rurashcatami mana valichishca. Ari nishcatapish mana pajtachishcachu. Pajtachishami nishca jahua tucui caicunata rurashcamantaca paica manataj quishpiringachu”’.
19 ‘Chaimantami Tucuita Mandaj Amito Jehová Diosca caita nin: “Ñuca causacushca shinallatajmi jurani. Ñuca jurashcata mana valichishcamanta, ari nishcatapish mana pajtachishcamanta ima tucunaca paipaj jahuallapitajmi urmanga. 20 Japina mallata shitashpami paita japishpa Babiloniaman apasha. Pai ñucata mana cazushcamantami chaipi paihuan juiciopi yaicusha. 21 Paipaj achca grupo soldadocunamanta tucui miticushpa purijcunaca espadahuanmi huañuchishca cangacuna. Shinallataj mana huañujcunaca caita chaitami tucui ladocunata cachashca cangacuna. Chashna rurajpimi cancunaca ñuca, Jehová Dios rimashcata yachaj chayanguichij” ninmi’.
22 ‘Tucuita Mandaj Amito Jehová Diosca caitami nin: “Jatun cedro yura puntapi retoñashca ramata pꞌitishpami plantasha. Chai yura ramacunapaj puntapi cunanlla retoñashcata pꞌitishpami ñucallataj yallitaj jatun urcupi plantasha. 23 Israel llajtapi tiyaj shuj jatun urcupimi plantasha. Chai retoñopica ramacunami huiñanga, granopishmi pꞌucunga. Chai retoñoca sumaj cedro yurami tucunga. Chai yura ucupica jahuata volaj tucui laya animalcunami causanga, llandujlla rama ucupimi causanga. 24 Campopi tiyaj tucui yuracunaca ñuca, Jehová Dios jatun yurata yangapi churashcata, uchilla yurataca jatunyachishcatami yachaj chayangacuna. Verdijlla yurata chaquichishcata, chaquishca yurata sisachishcatapishmi yachaj chayangacuna. Ñuca, Jehová Diostajmi chaitaca nishcani, chaitaca rurashcani” ninmi’” nircami.