Levítico

16 Jehová Diosca Aaronpaj churicuna huañushca qꞌuipami Moiseshuan parlarca. Aaronpaj churicunaca Jehová Dios mana munashca shina paipajman cꞌuchuyashcamantami huañurcacuna. 2 Jehová Diosca Moisestaca cashnami nirca: “Cambaj huauqui Aaronmanca ama huañungapajca arca tapa chꞌimbapurapi caj Diospajlla ashtahuan chꞌicanyachishca ucumanca* ima horapish ama yaicuchun ningui. Chai ucuca cortina huashapimi can. Ñucaca arca tapa jahuapimi shuj pꞌuyupi ricurisha.

3 Diospajlla ashtahuan chꞌicanyachishca ucuman yaicungapajca Aaronca caitami apana can: juchamanta ofrendata shinaca shuj malta torotami apana can. Rupachishca ofrendata shinaca shuj carnerotami apana can. 4 Paica Diospajlla chꞌicanyachishca lino churanatami churarina can. Paipaj lluchulla aichata tapachingapajpish lino calzoncillocunatami churarina can. Shinallataj lino cinturontami churarina can. Umapipish lino sumaj turbantetami churarina can. Chaicunaca sacerdote churarina churanacunami can. Paica yacuhuan armashpami chaicunataca churarina can.

5 Aaronca israelitacuna juchamanta ofrendata shina cushca ishqui malta chivocunatami japina can. Rupachishca ofrendata shina cushca shuj carnerotapishmi japina can.

6 Aaronca paipaj juchacunamantami shuj torota juchamanta ofrendata shina cuna can. Chaitaca paipaj juchacunatapish, paipaj familiapaj juchacunatapish perdonachunmi Diosman cunga.

7 Chai qꞌuipaca ishqui malta chivocunata japishpami Jehová Diospaj ñaupajpi, tandanacuna carpa huasi yaicunapi churanga. 8 Aaronca ishquindij malta chivocunatami sorteanga: shujca Jehová Diospajmi canga, caishujca Azazelpajmi* canga. 9 Sorteajpi Jehová Diospaj urmashca malta chivotaca Aaronca juchamanta ofrendata shinami cunga. 10 Pero sorteajpi Azazelpaj urmashca caishuj malta chivotaca israelitacunapaj jucha perdonashca cachunmi Jehová Diospaj ñaupajman causajta apana can. Chashnami chai malta chivotaca chaquishca pambaman Azazelpaj cachanga.

11 Aaronca paipaj juchacunamantami shuj torota juchamanta ofrendata shina cuna can. Chaitaca paipaj juchacunatapish, paipaj familiapaj juchacunatapish Dios perdonachunmi cunga. Chai qꞌuipami ofrendata shina cushca torotaca paipaj juchacunamanta huañuchinga.

12 Qꞌuipaca Jehová Diospaj ñaupajpi caj altarmantami rupacuj carbón junda braserillota japinga. Mishquijllata ashnacuj cutashca inciensotapish ishqui maqui jundata japishpami cortina huashaman apanga. 13 Shinallataj inciensotaca Jehová Diospaj ñaupajpimi ninapi shitanga. Chaimi inciensota* rupachishca cushnica Leyta huaquichina arca tapata tapanga. Chashnami paica mana huañunga.

14 Toropaj asha yahuarta japishpami paipaj dedohuan arca tapa chꞌimbapurapi inti llujshin ladoman tsirapanga. Shinallataj asha yahuarta japishpami paipaj dedohuan arca tapa ñaupajpi canchis cutin tsirapanga.

15 Chai qꞌuipaca israelitacunapaj juchacunamanta ofrendata shina cushca malta chivotami huañuchinga. Chai animalpaj yahuartaca cortina huashaman apashpami toropaj yahuarhuan rurashca shinallataj arca tapa ladota, arca tapa ñaupajpi tsirapanga.

16 Aaronca Diospajlla ashtahuan chꞌicanyachishca ucutaca israelitacunapaj mapa ruraicunamanta, mana alli ruraicunamanta, juchacunamantami chuyayachina can. Tandanacuna carpa huasimantapish chaillatatajmi rurana can. Chaica mapa ruraicunata ruracuj israelitacunapaj chaupipimi can.

17 Juchacunata perdonachun Diospajlla ashtahuan chꞌicanyachishca ucupi yahuarta tallingapaj Aarón yaicushca horasmanta llujshingacamaca tandanacuna carpa huasipica pi shujtaj runaca mana canachu can. Chaipimi Aaronca paipaj juchacunatapish, paipaj familiapaj juchacunatapish, tucui israelitacunapaj juchacunatapish perdonachun yahuarta tallinga.

18 Chai qꞌuipami Aaronca Jehová Diospaj ñaupajpi caj altarman llujshinga. Paica altarta chuyayachingapajmi toropaj asha yahuarta, malta chivopaj asha yahuarta altar tucui gachucunapi churanga. 19 Shinallataj asha yahuarta japishpami paipaj dedohuan altar jahuapi canchis cutin tsirapanga. Chashnami altartaca israelitacunapaj mapa ruraicunamanta chuyayachishpa Diospajlla chꞌicanyachinga.

20 Diospajlla ashtahuan chꞌicanyachishca ucutapish, tandanacuna carpa huasitapish, altartapish chuyayachishca qꞌuipami causaj malta chivotapish cunga. 21 Aaronca chai malta chivopaj uma jahuapi paipaj ishqui maquicunata churashpami israelitacunapaj pandarishcacunata, mana allita rurashcacunata, juchacunatapish tucuita huillanga. Chaicunataca malta chivopaj umapimi churanga. Chaimantaca malta chivotaca shuj agllashca runahuanmi chaquishca pambaman cachanga. 22 Malta chivoca israelitacunapaj tucui pandarishcacunata apashpami chaquishca pambaman ringa. Chai runaca malta chivotaca chaquishca pambamanmi cachanga.

23 Chai qꞌuipaca Aaronca tandanacuna carpa huasimanmi yaicunga. Diospajlla ashtahuan chꞌicanyachishca ucuman yaicushpa churarishca lino churanata llujshichishpami chaipi saquinga. 24 Paica Diospajlla chꞌicanyachishca lugarpi armashpami churanata churarina can. Qꞌuipaca chaimanta llujshishpami pai cushca rupachishca ofrendatapish, israelitacuna cushca rupachishca ofrendatapish cunga. Chashnami paipaj juchacunamanta perdonashca canga. Israelitacunapish paicunapaj juchacunamantami perdonashca canga. 25 Altar jahuapica juchamanta cushca ofrendamanta huiratami rupachishpa cushnichinga.

26 Azazelpaj malta chivota cachaj runaca paipaj churanatami tajshana can. Shinallataj yacuhuanmi armana can. Chai qꞌuipami paica carpa huasicuna maipi cashcaman yaicui tucunga.

27 Juchamanta ofrendata shina cushca torotapish, juchamanta ofrendata shina cushca malta chivotapish carpa huasicunamanta canllamanmi apanga (chai animalcunapaj yahuarca juchata perdonachunmi Diospajlla ashtahuan chꞌicanyachishca ucuman apashca carca). Chai animalcunapaj caratapish, aichatapish, majadatapish ninapimi rupachinga. 28 Chaicunata rupachij runaca paipaj churanatami tajshana can. Shinallataj yacuhuanmi armana can. Chai qꞌuipami paica carpa huasicuna maipi cashcaman yaicui tucunga.

29 Cai leytami cancunaca siempre pajtachina canguichij: cancunapish, cancunapurapi causaj shujtaj llajtamanta runapish séptimo quillapaj chunga punllapica humillarinami* canguichij. Ima trabajotapish mana ruranachu canguichij. 30 Chuya saquiringapajmi chai punllaca cancunapaj juchacunamanta perdonashca canguichij. Chashnami Jehová Diospaj ñaupajpica tucui cancunapaj juchacunamanta chuya saquiringuichij. 31 Sábado punllaca cancunapajca samarina jatun punllami can. Chai punllaca humillarinami canguichij. Cai leytaca siempremi pajtachina canguichij.

32 Yayapaj randi agllashca, nombrashca sacerdotemi juchacunata perdonachun sacrificiocunata cunga. Shinallataj paica sacerdote churarina lino churanatami churaringa. 33 Chai sacrificiocunataca Diospajlla ashtahuan chꞌicanyachishca ucumanta, tandanacuna carpa huasimanta, altarmanta, sacerdotecunamanta, tucui israelitacunamantami ruranga. 34 Cai leytaca cancunaca siempremi pajtachina canguichij. Israelitacunapaj tucui juchacuna perdonashca cachunmi huatapica shuj cutin rurana canguichij” nircami.

Aaronca Jehová Dios Moisesman mandashca shinallatajmi rurarca.