1 Juan
4 Cꞌuyashca huauquicuna, cai pachapica achca llulla profetacunami ña ricurishca. Chaimanta Diosmantami shamun nishca tucui laya huillaicunataca* ama crichijchu. Ashtahuanpish chai huillaicuna Diosmanta shamushcata o mana shamushcata alli ricuichij.
2 Chai huillai Diosmanta shamushcataca cashnami yachai tucunguichij: Jesucristoca cai allpamanca shuj runa shinami shamurca nishpa huillajpica chai huillaica Diosmantami shamun. 3 Shinapish Jesucristoca mana shuj runa shina shamurcachu nishpa huillajpica chai huillaica mana Diosmantachu shamun. Chai huillaica anticristomantami shamun. Chai anticristo shamuna cashcatami cancunaca uyarcanguichij. Paica ñami cai pachapi can.
4 Ñuca huahuacunalla, cancunaca Diosmantami shamunguichij. Cancunahuan shuj shinalla caj Diosca cai pachahuan shuj shinalla caj Diablotapish ashtahuan yalli jatunmi. Chaimantami llulla profetacunataca mishashcanguichij. 5 Paicunaca cai pachamantami shamuncuna. Chaimantami cai pachamanta shamushcacunallata parlancuna. Cai pacha gentecunapish paicuna nishcatami uyancuna. 6 Ñucanchijca Diosmantami shamunchij. Diosta rijsijca ñucanchijtaca uyanmi. Diosmanta mana shamujca ñucanchijtaca mana uyanchu. Chashnami mana llulla huillaitapish, llulla huillaitapish ricui tucunchij.
7 Cꞌuyashca huauquicuna, caishuj chaishuj cꞌuyanacushpa catishunchij. Diosmi puntapica cꞌuyarca. Maijanpish cꞌuyajca Diosmantami huacharishca, Diostapish rijsinmi. 8 Maijanpish mana cꞌuyajca Diostaca mana rijsishcachu, Diosca cꞌuyaimi.* 9 Diosca paipaj shujlla Churimanta ñucanchijcuna huiñai causaita charichunmi cai pachaman paita cacharca. Chashnami Diosca ñucanchijmanca cꞌuyaita ricuchirca. 10 Cꞌuyaica caimi: mana ñucanchijchu Diostaca cꞌuyarcanchij. Ashtahuanpish Diosmi ñucanchijtaca cꞌuyarca. Chaimantami paihuan alli tucujta ruraj sacrificio shina cachun paipaj Churitaca ñucanchij juchacunamanta cai pachaman cacharca.
11 Cꞌuyashca huauquicuna, Dios ñucanchijta chashna cꞌuyajpica ñucanchijpishmi caishuj chaishuj cꞌuyaita ricuchinacuna canchij. 12 Diostaca ni pi mana nunca ricushcachu. Caishuj chaishuj cꞌuyaita ricuchinacushpa catijpica Diosca ñucanchijhuanmi catinga. Paipaj tucui cꞌuyaitapishmi ñucanchijman ricuchinga. 13 Chaimantami ñucanchij paihuan shuj shinalla catishcata, paipish ñucanchijhuan shuj shinalla catishcata yachanchij. Paica paipaj espiritutami ñucanchijmanca cushca. 14 Yaya paipaj Churita cai pacha gentecunata quishpichij cachun cachashcataca ñucanchijllatajmi ricushcanchij. Chaitami ñucanchijca huillacunchij. 15 Jesusca Diospaj Churimi can nijhuanmi Diosca shuj shinalla catin. Paipish Dioshuanca shuj shinallami catin. 16 Ñucanchijca Dios cꞌuyashcatami yachaj chayashcanchij, chaitami crishcanchij.
Diosca cꞌuyaimi. Maijanpish cꞌuyaita ricuchishpa catijca Dioshuanmi shuj shinalla catin. Diospish paihuanca shuj shinallami catin. 17 Ñucanchijpish chashna tucui cꞌuyaita ricuchishpami juicio punllapica mana manchashpa* parlai tucushun. Jesucristo ima shina caj shinallatajmi ñucanchijpish cai pachapi canchij. 18 Diosta cꞌuyajca ima manchaita mana charinchu. Ashtahuanpish tucui cꞌuyaita ricuchishpami manchaitaca mishan. Manchaica imata ruranatami jarcan. Maijanpish manchaita charijca mana tucui cꞌuyaita ricuchi tucunchu. 19 Pairaj cꞌuyashcamantami ñucanchijca cꞌuyanchij.
20 Maijanpish “Ñucaca Diostami cꞌuyani” nishpapish paipaj huauquita pꞌiñashpaca llullami. Ñahuihuan ricushca huauquita mana cꞌuyashpaca, ¿ima shinataj mana ricushca Diostacarin cꞌuyangayari? 21 Diosta cꞌuyajca paipaj huauquitapish cꞌuyachun nishca mandashcatami paimantaca chasquishcanchij.