Enero

Cai Allpapi mana alli ruraicunata Dios tucuchina punllaca ñami quichquiyacun. Mana alli gentecunaca ‘qꞌuihua shinami yallitaj mirashpa’ caticun (Salmo 92:7). Chaimantami Dios mandashcacunata mana cazujcuna ashtahuan tiyan. Pero Pabloca: “Ama huahuacuna shina yuyaichijchu, ashtahuanpish yuyajcuna shina yuyaichij. Ima mana allipajca, huahuacuna shina caichij” nircami (1 Corintios 14:20). ¿Ima shinataj chashna cai tucunchij? Chaitaca cunan yachacushca versopimi yachai tucunchij. Chaipica: ‘Ashtahuanpish Mandaj Dios yuyailla causajcunaca tucuitami yachan’ ninmi. Cai versopi nishca shinaca Diospaj ñaupajpi alli ricuringapaj imata ruranataca allimi yachana canchij. Proverbios 2:7, 9-pipish, ‘paimi allita rurajcunamanca, mana pandachij alli yachaita cun. Pai yachachijpimi cashcata ruraj canatapish, allita ruraj canatapish, mana pandarij canatapish, tucuipi alli canatapish yachangacuna’ ninmi. Noepish, Danielpish, Jobpish Diospaj yachaitami charircacuna (Ezequiel 14:14). Cunan punllapipish Diosta sirvijcunaca Diospaj yachaitami charincuna. Canpish, ¿Diospaj ñaupajpi alli ricuringapaj imata ruranataca allichu yachangui? Chaipajca Diostami alli rijsina cangui. w18.02 págs. 9, 10 párrs. 1-3

Yaya mamacunapish, Bibliamanta yachachijpish, o congregacionmanta shuj huauqui o panipish Bibliamanta yachacujtaca “bautizarinami cangui” nishpa mana obligai tucunchu. Jehovapish mana pita obliganchu (1 Juan 4:8). Obliganapaj randica Bibliamanta yachachicushpaca Diospaj amigo tucuna importante cashcatami yachachina can. Bibliamanta yachacujca Diosta cꞌuyashcamanta, Jesuspaj ejemplota catinata munashpami paillataj bautizarinata munana can (2 Corintios 5:14, 15). ¿Bautizaringapajca mashna huatacunatataj charina can? Bautizaringapajca mana shuj huata tiyanchu. ¿Imamantataj chaita ninchij? Maijancunaca Bibliapi yachashcacunata rato pajtachingapajmi esforzarincuna. Cutin shujtajcunaca ashtahuan tiempotami minishtin. Bautizarina punllaca achcata cushicuna punllami can. Chashna cajpipish chai punllaca Diosman ari nishcata pajtachishpa causangapaj imata ruranatami alli yuyana can. Jesusta catijcunaca ‘ña mana paicunapajlla causanchu, ashtahuanpish paicunamanta huañujpaj, cutin causarijpajmi causancuna’ (2 Corintios 5:15; Mateo 16:24). w18.03 págs. 7, 8 párrs. 14-17

Caishujhuan chaishujhuan chasquinacuj canaca huaquinpica sinchichari can. Chaimantachari huauqui panicunahuan alli pasanata o alli amigocunata charinata pirdishcanchij. Maijan amigocunaca tucui vidapajmi can. Shujtajcunata chasquij cashpaca mana ñucanchijlla sintirishunchu. Shinaca, ¿Caishujhuan chaishujhuan chasquinacunaca imamantataj sinchi cai tucun? Shuj jarcai tiyashcata ricushun. Diosta sirvijcunaca achca ruraicunata charishcamantami achca ocupados canchij. Chaimantami huaquincunapajca alli chasquijcuna cashcata ricuchingapajca mana tiempo tiyaj laya, fuerzapish illaj laya ricurin. Chashna cajpica tiempota surcungapajmi imata ruranata ricuna canchij. Chaipajca, ¿huauqui panicunata invitangapaj o paicuna invitajpipish ringapajca ima cambiocunatataj rurai tucuni? nishpa tapurishunchij. Bibliapica: “Puzachinataca, amataj cungaringuichijchu” ninmi. Huauqui panicunahuan pasangapaj tiempota surcunaca allimi can. Chaimanta mana minishtishca cosascunapi tiempota pirdinapaj randica paicunahuan cangapajmi tiempota surcuna canchij. w18.03 pág. 18 párrs. 13, 14

Cunanca Jesusmanta yachashun. Cai Allpapi gentecunaman huillacushpaca paipaj Yaya shina yuyashcata, ruraj cashcatami ricuchirca. Shinallataj Jehová mandashcacunata cazushpami Diospaj munaita pajtachirca. Caipi nishca shinaca tucuicunamantaca Jesusllami cai Allpapica Diospajllata rurashpa causarca (Juan 8:29; 14:9; 15:10). Por ejemplo, Isaías libropica Jehová Diosmanta parlashpaca paica llaquij cashcatami ricuchin. Cutin, Marcos libropica Jesusca paipaj yaya laya cashcatami ricuchin (Isaías 63:9 Marcos 6:34). Chaimanta: ¿Jesús shinachu shujtajcunata llaquishpa ayudangapaj listo cani? ¿Jesús shinachu Diospaj shimita gentecunaman yachachingapaj esforzarini? nishpa tapurishunchij. Chashna rurashpaca Diospaj espirituta charijcuna cashcatami ricuchishun. w18.02 pág. 20 párr. 12

Tucuri punllacunapi causacushcamantami huahuacunata huiñachinaca sinchi can (2 Timoteo 3:1-5). Huahuacunaca ima alli cashcata o ima mana alli cashcataca mana yachashpa huacharincunachu. Chaimantami alli decidinata yachachun paicunata yachachina can, disciplinana can (Romanos 2:14, 15). Bibliamanta parlaj shuj libropica griego rimaimanta “disciplina” shimitaca “huahuacunata huiñachina” nishpapishmi traduci tucun. Cai shimica huahuacuna jatunyashpa alli runacuna tucuchun huiñachinami can ninmi. Yaya mamacunaca huahuacunataca cꞌuyaihuanmi disciplinana can. Chashna rurajpica cuidashcami sintirincuna. Shinallataj tucui paicuna munashcataca mana rurai tucushcatami intindincuna. Ima mana allita rurashpaca llaquicunata charinata, cutin allita rurashpaca cushilla causana cashcatami intindincuna. Chaimantami yaya mamacunaca huahuacunata huiñachingapajca Jehovapaj ayudata mashcana can. Yuyashun, huahuacunata huiñachinamanta yuyaicunaca tiempohuanca cambianmi. Shinallataj cada culturapimi chꞌican chꞌican yuyaicunata charincuna. Pero Diosta uyaj yaya mamacunaca huahuacunata yachachingapajca gentecunapaj yachaipi mana confiancunachu. Shinallataj, “¿huahuacunataca ima shinataj yachachisha?” nishpa mana dimastij preocuparincunachu. Chaipaj randica Diospimi confiancuna. w18.03 pág. 29 párrs. 8, 9

Joven, ña bautizarishca cashpaca canllatajmi Dioshuan alli apanacungapaj esforzarina cangui. ¿Imamantataj chaita mana cungarina cangui? Joven cashcamantaca jarcaicunata, shujtaj munaicunatachari charingui. Shuj solteraca cashnami nin: “Huahuaraj cashpaca cumpleañoscunapi mana participashpapish mana llaquilla sintirij carcanichu. Pero ña solterayajpica chayarina munaicunamanta jarcarinaca sinchimi can. Juchapi ama urmangapajmi Dios mandashcata cazuna alli cashcata tucui shunguhuan crina cani” ninmi. Ña achca huatacunata charishpa bautizarijcunapishmi jarcaicunata, llaquicunata charin. Por ejemplo, achcacunaca cusa huarmimi can. Paicunapishmi llaquicunata charin. Cutin shujtajcunaca saludmanta o trabajomanta chꞌican chꞌican llaquicunatami chꞌimbapurana can. Jovencuna o jatuncuna cashpapish tucuicunami jarcaicunata, llaquicunata charinchij. Chaimantami Diosmanta ama caruyangapaj esforzarina canchij (Santiago 1:12-14). w17.12 pág. 22 párrs. 4, 5

Davidta yuyarishun. Paitaca achcatami llaquichircacuna. Pero Davidca paita llaquichijcunahuanca mana shungupi pꞌiñarishca saquirircachu. Ashtahuanpish paica cashnami escribirca: “Pꞌiñarinata saqui. Pꞌiñarinata cungari. Ima mana allita ruranataca ama chai yuyailla caichu” (Salmo 37:8). Ñucanchijta llaquichijpica mana pꞌiñarishca saquirinachu canchij. Ashtahuanpish Jehová Dios shinami casha ninchij. Paica, ‘ñucanchij millaita rurashcamantaca, llaquichina shinatajca mana llaquichishcachu’ (Salmo 103:10). Pꞌiñarishca saquirinaca ñucanchij saludpajpish mana alli canchu. Por ejemplo, presión alta, pulmón ungüicuna, hígado ungüicuna o huijsa nanaicunami japi tucun. Shinallataj pꞌiñarishca cashpaca imatapish mana alli yuyashpami rurai callarishun o maipish cachun rimarishun. Cutin, ña colera pasashca qꞌuipaca llaquillami sintirishun. Chaimantami Bibliapica: ‘Cushijlla shunguca, aichamanpish causaitami cun’ nin (Proverbios 14:30). Shuj huauqui o pani ñucanchijta pꞌiñachijpi paicunahuan alli tucungapajca Bibliapi tiyaj consejocunatami catina canchij. w18.01 págs. 6, 7 párrs. 14, 15

Cai versopi nishca shimicunaca David mana huañunata o Seolman mana rinatapish mana nisha ninchu. 1 Reyes 2:1, 10-pica: ‘Davidca yuyajyashpami huañurca. Paipaj pueblollapitajmi paipaj ñaupa yayacunahuan pambashca carca’ ninmi. Shinaca, ¿Salmo 16:10-pica pimantataj parlacun? Apóstol Pedroca shuj conferenciata cushpami cai versopi pimanta parlacushcata intindichirca. Chai conferenciata cushca punllacamaca Jesús huañushpa cutin causarishcapish ñami huaquin semanacuna pasashca carca. Pedroca achca judiocunapaj, mana judiocunapaj ñaupajpimi Salmo 16:10-manta parlarca (Hechos 2:29-32). Chai conferenciapica Pedroca: ‘David huañushca qꞌuipaca pambashcami carca’ nircami. Pedrota uyacujcunaca chaitaca allimi yacharca. Chai qꞌuipaca Pedroca: ‘Davidca, Cristo causarina cashcatami ricurca’ nircami. Pedro chashna nijpica pipish mana imata nircacunachu. Pedroca pai yachachicushcata alli intindichingapajmi Salmo 110:1-mantapish parlarca (Hechos 2:33-35). Pedroca ‘Jesusllataj Mandaj cashcata, Quishpichij Cristo cashcatami’ gentecunaman intindichirca (Hechos 2:36). Tucuicunami Salmo 16:10-pi nishca shimicunaca Jesús causarijpi pajtarishcata intindircacuna. w17.12 págs. 11, 12 párrs. 10-12

Cuerpo Gobernantepi caj huauquicunaca shungumanta cushca cullquita alli utilizangapajmi esforzarincuna (Mateo 24:45). Cai huauquicunaca Diosta mañashpami chai cullquita imapi utilizanata alli ricuncuna (Lucas 14:28). Ñaupa punllacunapica Judea llajtamanta crijcunata ayudangapajmi Pabloca cullquihuan ayudachun mañarca. Chai cullquita chaupijcunataca Pabloca, ‘Diospaj ñaupajpipish gentecunapaj ñaupajpipish honradosmi cana canguichij’ nircami (2 Corintios 8:18-21, QC, 1989). Cunan punllacunapipish Diospaj pueblopica Esdraspaj, Pablopaj ejemplotami catincuna. Chashnami shungumanta cushca cullquitaca imapi gastanata alli ricuncuna (Esdras 8:24-33). Cunan huatacunapica Diospaj pueblopica achca mushuj ruraicunami tiyashca. Chaimantami huaquin cambiocunata rurashcacuna. Chai cambiocunata rurashcamantami cullquitaca ashtahuan alli utilizacuncuna. w18.01 pág. 18 párrs. 12, 13

Cꞌuyajcuna cashpami shujtajcunata perdonashun. Por ejemplo, shuj huauqui o pani ñucanchijta llaquichijpica, ñucanchijpish huaquinpi pandarishcatami yuyarina canchij. Ñucanchij pandarijpipish shujtajcuna perdonashcamantami pagui ninchij (Eclesiastés 7:21, 22). Ashtahuantajca tucuicuna tandalla causangapaj Jesús ayudacushcamantami pagui ninchij. Tucuicunami shuj solo Diosta cꞌuyanchij, alli huillaicunata huillanchij, chai shina llaquicunallatataj chꞌimbapuranchij. Huauqui panicunata cꞌuyashpami imapi pandarijpipish paicunataca perdonanchij. Chashnami tucuicuna tandalla Jehová Diospaj bendicioncunata japinata shuyanchij. Envidioso cashpaca Diospaj bendicionta mana japi pudishunchu. Bibliaca huaquin runacuna envidioso cashpa llaquipi urmashcatami parlan. Por ejemplo, Cainca paipaj huauquitami envidiamanta huañuchirca. Coré, Datán, Abirampish Moisesta envidiashpami paipaj contra tucurcacuna. Rey Saulpish envidiamantami Davidta huañuchisha nirca. w17.11 pág. 29 párrs. 9, 10

Comité judicialpi ayudaj ancianocunaca juchata ruraj arrepintirishcata o mana arrepintirishcataca allimi ricuna can. Chaita ruranaca mana jahuallachu. Chaimantami juchata rurashcamanta ima shina sintirishcata, paipaj shungupi imata yuyashcata ancianocunaca alli ricuna can (Apocalipsis 3:3). Maijanpish juchata rurashca cashpaca Dios perdonachunmi tucui shunguhuan arrepintirina can. Jehová Diospish Jesuspish ñucanchij shungupi ima tiyashcataca tucuitami yachancuna. Pero ancianocunaca ñucanchij shungutaca mana yachai tucuncunachu. Shinashpaca ¿juchata ruraj nij tucushpalla o tucui shunguhuan arrepintiricushcata yachangapajca ancianocunaca imatataj rurana can? (2 Corintios 7:10, 11). Puntapica Diostami alli yuyaita cuhuai nishpa mañana can (1 Reyes 3:9). Qꞌuipaca de verdad arrepintirishcata ricungapajmi Bibliata, publicacioncunata yachana can. Bibliapica maijan runacuna juchata rurashcamanta arrepintirishcata o mana arrepintirishcatami parlan. Chai runacuna ima shina sintirishcata, imata yuyashcata, ima shina comportarishcata ricushpami ancianocunaca yachai tucun. w17.11 pág. 19 párrs. 16, 17

Cunan punllacunapica librocunapi, peliculacunapi, televisionpipish “yaya mamata cazunaca mana minishtirinchu” nincunami. ¿Chaica ciertochu can? Mana. Huahuacuna mana cazujpica tucui familiami llaquilla causancuna. Ñaupa tiempopi ima tucushcata ricushun. Por ejemplo, ñaupa Grecia llajtapica shuj churi paipaj yayata o mamata macajpica paipaj pueblopica imapi mana participai tucurcachu, ima derechotapish mana charircachu. Cutin, Roma llajtapica shuj churi paipaj yayata macajpica huañuchij runata layami castigana carca. Caipi ricushca shinaca yaya mamata mana cazunaca llaquimi can. Chaimantami Ñaupa Testamentopipish, Mushuj Testamentopipish yaya mamataca cazuchun, respetachun mandan (Éxodo 20:12; Efesios 6:1-3). Yaya mamacunaca huahuacunaman tucui minishtishcata cungapajmi achcata esforzarincuna. Chaimantami Jehová Diosca yaya mamata cazuchun, pagui nichun mandan. Caita mana cungarishpaca huahuacunaca siempremi yaya mamata cazusha ningacuna. Shinallataj huahuacunaca paicunapaj yaya mamamantami alli parlana can. Chashnami shujtaj huahuacunapish paicunapaj yaya mamata respetasha ningacuna. w18.01 pág. 29 párrs. 8, 9

Cunan punllacunapica jatun juchapi urmashca cashpaca ancianocunapaj ayudatami mashcana canchij. ¿Imamantataj chaita rurana canchij? Jehová Diosmi juchapi urmashcacunata ayudachun ancianocunata churashca (Santiago 5:14-16). Chashnallataj arrepintirichun, juchata ruranata saquichun, Jehová Dios perdonachunmi ancianocunaca ayudai tucuncuna (Gálatas 6:1; Hebreos 12:11). Ancianocunaca llaquilla cajcunata ayudangapajmi can. Jehová Diosca, ancianocunaca “jatun acapanamanta paca tucuna shinami can” ninmi (Isaías 32:2). Jehová Diosmi ancianocunata churashpa llaquij cashcata ricuchishca. Achca huauqui panicuna imapi pandarishpaca ancianocunahuan parlashpami alli sintirishcacuna. w17.11 pág. 11 párrs. 8, 9

Sinchi cajpipish Jehová Diosta cazunami canchij. Chaimantami congregacionmanta shuj familiata llujshichishca cajpica imamantapish paicunahuan ama parlangapaj cuidadota charina canchij. Por ejemplo, telefonoman cayashpa, mensajecunata cachashpa, cartacunata escribishpa o Internetpi paicunahuan mana parlanacunallachu canchij. Chaipaj randica ama shaicushpa shuyashunchij. Cꞌuyaica “tucuita shuyanllami”. Chaimantami ñucanchij familia Diospajman tigrachun shuyacunchij (1 Corintios 13:7). Congregacionmanta llujshichishca familiaca ñachari paipaj causaipi cambiocunata ruracun. Chashna cajpica pai Bibliata liyishpa, alli yachashpa Diospajman cutirichunmi Diosta mañai tucunchij (Isaías 44:22). Jesusca paita catijcunamanca, tucui runacunamanta yallica ñucatami ashtahuan cꞌuyana canguichij nircami. Familiacuna jarcajpipish paimanta mana caruyanatami Jesusca alli yacharca. ¿Jesusta catishcamanta ñucanchij familiacuna contra tucushcachu? Chashna cajpica Jehová Diospi tucui shunguhuan crishpa paipaj ayudata mashcashunchij (Isaías 41:10, 13). Tucuipi cazujpica Jehovapish Jesuspish cushillami cangacuna. Paicunaca ñucanchijtaca achcatami bendicianga. Caita yachashpaca ¿manachu cushilla sintirinchij? w17.10 pág. 14 párrs. 19-21

Maijancunaca yuyaj cashcamanta o ungushca cashcamantami llaquilla causancuna. Paicuna chashna causacujta ricushpami ñucanchijpish llaquirinchij. Chaimantami tucui llaquicunata Jehová Dios tucuchichun mañanchij. Chai punlla chayamungacamaca minishtijcunatami ayudana canchij. Shuj runaca paipaj mama ima tucushcatami parlarca. Paipaj mamaca yuyaj cashcamantami tucuita cungarijlla carca. Shuj punllaca paipaj churanapimi mapayachishca carca. Mapata pꞌicharicujpimi ishqui panicunaca paita visitanaman chayarca. Chai panicunaca, “¿ayudai tucunchijchu?” nircacunami. Chai yuyaj huarmica, “pinganayanmi pero ayudahuaichij” nircami. Qꞌuipaca mishqui yaquituta ubyashpami parlanacushpa saquirircacuna. Cai huarmipaj churica chaita yachaj chayashpaca: ‘Testigo de Jehovacunaca yachachishca shinallatajmi rurancuna’ nishpami agradicirca. Yuyajcunata, ungushcacunata ayudangapaj esforzarishpaca llaquij cashcatami ricuchishun (Filipenses 2:3, 4). w17.09 págs. 10, 13 párrs. 5, 14

Shujtajcunata ayudashcata ni pi mana yachaj chayajpipish ayudanallami canchij (Mateo 6:1-4). Shinallataj valoranami canchij (Romanos 12:10). Jesusca apostolcunapaj chaquicunata maillashpami paicunata valorashcata ricuchirca (Juan 13:3-5, 12-15). Apostolcunaca espíritu santota chasquishca qꞌuipami Jesús imamanta chaita rurashcata intindircacuna (Juan 13:7). Ñucanchijpish Jesús shinami humildes cana canchij. Shujtajcunatapish valoranami canchij. Chaimanta estudiashca cashpapish, cullquiyujcuna cashpapish o Diospaj pueblopi huaquin asignacioncunata chasquishca cashpapish shujtajcunamanta yalli cashcataca mana yuyanachu canchij (Romanos 12:3). Tal vez maijan huauquita o panitaca allita rurashcamantami felicitangacuna. Pero pai rurashcacuna alli llujshichunca ñucanchijchari ayudarcanchij. Paillata felicitajpipish mana envidianachu canchij. Ashtahuanpish paicunahuanmi cushicuna canchij. w17.10 pág. 5 párrs. 9, 10

Achca huauqui panicunaca Bibliata alli utilizashpami gentecunata ayudashcacuna. Por ejemplo, shuj yuyajlla runaca Huillaj, Rijchari revistacunata liyingapajmi chasquij carca. Shuj cutinca, shuj huauquica cunanlla llujshishca Huillaj revistatami saquinaman rirca. Revistallata saquinapaj randica 2 Corintios 1:3, 4-tami liyirca. Chaipica: ‘Diosca llaquij Yayami, tucuipi cushichij Diosmi’ ninmi. Chai shimicunaca paipaj shungumanmi chayarca. Chaimantami chai runaca ‘cutinllataj liyipai’ nirca. Qꞌuipaca, ‘ñucapish, ñuca huarmipish llaquillami canchij. Bibliamanta yachachishpa ayudachunmi minishtinchij’ nircami. Cai ejemplopi ricushca shinaca Diospaj Shimica gentecunapaj causaita cambiai tucunmi. Chaimantami huillacushpaca Bibliata alli utilizana canchij (Hechos 19:20). w17.09 pág. 23 párrs. 9, 10

Diablo mana cazujpica Jehová Diospish alli angelcunapish pꞌiñarircacunami. Diablo juchachijpipish Diosca yallitaj pꞌiñarinapaj randica alli yuyashpami Diablo llullacushcata ricuchingapaj imata ruranata ricurca (Éxodo 34:6; Job 2:2-6). Diosca tucuicuna arrepintirishpa quishpirichunmi munan. Chaimantami Diablo llulla cashcata ricuchingapaj achca tiempota pasachun saquishca (2 Pedro 3:9, NM). Jehová Dios shinallatajmi imata rurangapaj, imata ningapajpish alli yuyarinaraj canchij. Shinallataj alli decidingapaj, alli parlangapajpish Jehová Diostami “alli yuyaita cuhuai” nishpa mañana canchij (Salmo 141:3). Pꞌiñarishcahuan imatapish rurashpaca ima mana allitachari rurashun. Huaquinpica mana alli yuyashpami imatapish nishcanchij o rurashcanchij, pero qꞌuipataca arrepintirishcanchijmi ¿nachu? (Proverbios 14:29; 15:28; 19:2). w17.09 pág. 4 párrs. 6, 7

¿Sumo sacerdote Josuechu rey cagrirca? Mana. Paica mana Davidpaj huahuacunapuramantachu carca. Paiman coronata cushpaca shamuj punllapi pi sumo sacerdote canata, huiñaipaj mandaj canatami ricuchirca. Paica “Retoñacuj yura” nishcami can. ¿Chaica pitaj can? Bibliapica Jesucristo cashcatami ricuchin (Isaías 11:1). Jesusca sumo sacerdote, reymi can. Paimi Diospaj angelcunata mandacun. Shinallataj Diosta sirvijcuna cai millai mundopi alli causaita charichunmi ayudacun (Jeremías 23:5, 6). Ñallami cai Allpata mandajcunata mishashpa tucuchinga. Chashnami Diosta sirvijcunata cuidanga, Dioslla mandana cashcatapishmi ricuchinga (Apocalipsis 17:12-14; 19:11, 14, 15). Chai punlla chayangacamaca “Retoñacuj yura” o Jesusca achca trabajotami rurana can. w17.10 págs. 24, 25 párrs. 12-14

¿Cambaj churana mapa, jiruta ashnacujta cuentata cushpaca imatataj ruranguiman? ¿Manachu chai rato llujshichinguiman? Ari. Diosca pai millanayachishcata ama rurachun ninmi. Dios millanayachishcatachari ruracunchij. Chaita cuentata cushpaca chai ratomi cambiana canchij. Ñaupa punllacunapica Jesusta catijcunataca Pabloca: ‘Tucui mana alli ruraicunata saquichij’ nircami. Paica huainayana juchacunamantapishmi parlarca (Colosenses 3:5-9). Bibliapica “huainayana” nishpaca shuj cꞌari huarmi manaraj cazarashpa aichapi chayarishpa juchata ruranamantami parlan. Shinallataj huarmipura o cꞌaripura aichapi chayarinamantami parlan. Ñaupa punllacunapica Jesusta catijcuna juchapi ama urmachunmi Pabloca ‘cancunapi tiyaj mana alli munaicunataca tucuita saquichij’ nirca. Huaquinpica mana alli munaicunata saquinaca sinchimi can. Pero sinchi cajpipish huashaman saquingapajmi esforzarina canchij. w17.08 pág. 16 párrs. 5, 6

Ñucanchijca profeta Miqueaspaj punllacunapi shinami causacunchij. Miqueasca rey Acaz mandacui punllacunapimi causarca. Acazca millai runami carca. Gentecunapish ‘millaita rurashpallami’ causacurcacuna (Miqueas 7:1-3). Miqueasca chai mana alli ruraicunata tucuchingapaj imata mana rurai tucushcatami yacharca. Miqueas laya Diospi tucui shunguhuan crishpaca, Jehová Dios pai cusha nishcata pajtachingacamami mana pꞌiñarishpa shuyashun. Caita alli intindingapajca caipi yuyashun. Shuj runataca carcelpimi churashca. Paica mana allita rurashcamantami huañuna can. Huañuna punlla mana chayachun munashpapish paica shuyanami can. Ñucanchijca mana chai runa laya huañuna punllata shuyacunchijchu. Ashtahuanpish Diosca ñucanchijmanca huiñai causaitami cusha nin. Pai agllashca punllapimi chai bendiciontaca cunga. Chaita tucui shunguhuan crishpami mana pꞌiñarishpa shuyanalla canchij. Ashtahuanpish sinchi tucushpami cushilla shuyana canchij (Colosenses 1:11, 12). Ñucanchijcuna pꞌiñarishpa, “¿Diosca ima nishpataj pai nishcata mana utca pajtachin?” nishpa quejarijpica Diosca llaquiringami (Colosenses 3:12). w17.08 págs. 4, 5 párrs. 6, 7

¿Jehová Dios ayudachunca imatataj rurana canchij? Paihuanmi alli apanacuna canchij. Cutin, paihuan alli apanacungapajca alli shungumi cana canchij (Sofonías 2:3). Alli shungucunaca mana alli ruraicunata, llaquicunatapish Jehová allichichunmi shuyancuna. Chashna gentecunatami Diosca cꞌuyan. Salmo 147:6-pica: ‘Diosca millaicunataca pambacama cumurichinmi’ ninmi. Dios ñucanchijta ama saquichunca pai millashcatami millanayachina canchij (Salmo 97:10). Por ejemplo, huainayanamanta, shujtaj mapa ruraicunamantami caruyana canchij. Chaicunapi ama urmangapajca televisionpi, Internetpi o shujtaj ladocunapipish mapa cosascunata mana ricunachu canchij (Salmo 119:37; Mateo 5:28). Chai mapacunamanta anchurinaca sinchichari canga. Pero chaimanta anchuringapaj esforzarishpaca Diospaj ñaupajpi allimi ricurishun. Cai mapa cosascunamanta anchuringapajca Jehová Diospaj ayudatami mashcana canchij. Jehová Diosca ñucanchij mañashcacunata uyangapajmi listo can. w17.07 págs. 18, 19 párrs. 11-13

Shujtajcuna Diosmanta huillachunmi ñucanchij charishcacunahuan ayudai tucunchij. Shujtaj llajtapi sirvinaman mana ri tucushpapish o mana achcata rurai tucushpapish shujtajcunatami ayudai tucunchij. Pobre llajtacunapica achcacunami Diosmanta yachasha nincuna. Shungumanta cullquita cujpica chai llajtacunapi Diosmanta yachachun, publicacioncunata chasquichunmi ayudanchij. Por ejemplo, Congo, Madagascar y Ruanda llajtacunapica Bibliata randinaca caromi can. Chaimantami shuj Bibliata charingapajca shuj semana o shuj quillata trabajana can. Huauqui panicunaca micunata randina o Bibliacunata randinatami agllana carca. Pero shujtaj huauqui panicuna cullquita cushpa ayudashcamantami paicunapish “ima illashcata” charincuna. Chashna ayudashcamantami Bibliacunata shujtaj shimicunapi rurai tucushcanchij. Shinallataj familiapi tucuicuna shuj Bibliata charichunmi cushcanchij. Bibliata yachacujcunamanpish Bibliata cushcanchijmi (2 Corintios 8:13-15). w17.07 pág. 6 párr. 11

¿Jobmanta yachashpaca imatataj intindinchij? Llaquicunata charishpaca Jehová Dios mana ñucanchijhuan pꞌiñarishcatami intindinchij. Ashtahuanpish llaquicunahuan cashpaca Jehová Diosta cꞌuyashcatami ricuchi tucunchij. Llaquicunata ahuantashpaca Diostami cushichishun. Dios cusha nishcacunatapish mana shaicushpami shuyashun (Romanos 5:3-5). Job librota liyishpaca ‘Diosca cꞌuyaj, llaquij’ cashcatami yachanchij (Santiago 5:1, QC, 1989). Jehová Dioslla mandana cashcata ricuchijpica paica bendiciangami. Chaita yachashpami llaquicunata cushicushpa ahuantashun (Colosenses 1:11). Llaquicunahuan cashpaca Jehová Dioslla mandana cashcata ricuchinaca sinchichari canga. Chaimantami ima problemacunata charishpapish Jehová Diosta apoyana cashcata yuyaipi charina canchij. w17.06 pág. 19 párrs. 15, 16

Achca gentecunaca mushuj celularcunata, computadoracunata, shujtaj cosascunatami charisha nincuna. Paicunapajca cullquita charina, achca cosascunata charinallami ashtahuan importante can. Pero Diosta sirvijcunaca ñucanchij causaipi ima ashtahuan importante cashcatami ricuna canchij. Chaimanta, “¿tandanacuicunapaj prepararinapaj randica mushuj carrota o shujtaj mushuj cosascunata charinallapichu yuyashpa purini? ¿Shujtaj cosascunata rurashpalla cainashcamantachu Bibliata ña mana tanto liyini, Diostapish ña mana tanto mañani?” nishpami yuyarina canchij. Achca cosascunata charinallapi yuyashpaca Jesusta cꞌuyanatami saquishun. Chaimanta cai punllapaj versopi Jesús ima nishcata yuyarina canchij. Paica: ‘Ishqui amopajtaca pi mana rurai tucunchu. Taita Diostapish, charinacunatapish ishquipajtaca mana rurai tucunchu’ nircami (Mateo 6:24). Juchayujcuna cashcamantaca ‘aicha munaicunata’ ama rurangapajmi cuidarina canchij. Ashtahuan charinallapi yuyacushpaca aicha munaitami ruracunchij (Efesios 2:3). w17.05 págs. 25, 26 párrs. 15, 16

Juchayujcuna cashcamantaca allpa vasocuna shinami canchij. Pero Diosmanta huillashpaca huiñaitami causashun. Ñucanchijta uyajcunapish huiñaitami causai tucunga. Apóstol Pabloca Diosmanta huillanatami achcata munarca. Chaimantami mana shaicushpa gentecunaman huillarca (Romanos 1:14,15; 2 Timoteo 4:2). Gentecuna jarcasha nijpipish Pabloca Diosmantami huillashpa catirca (1 Tesalonicenses 2:2). ¿Ñucanchijpish ima shinataj Pablo laya cai tucunchij? Diosmanta huillana valishca cashcata ricuchingapajca Pabloca tucui ladocunapimi huillarca. Ñaupa punllapi Jesusta catijcuna shinallatajmi ima horas cajpipish, maipi cashpapish, huasin huasin rishpapish Diosmanta huillanchij (Hechos 5:42; 20:20). Tucui gentecunaman Diosmanta huillangapaj esforzarishunchij. Por ejemplo, pudishpaca precursores auxiliares o precursores regularesmi cai tucunchij. Shinallataj shujtaj shimitami yachai tucunchij o shujtaj ladopi o shujtaj llajtacunapimi sirvinaman ri tucunchij (Hechos 16:9, 10). w17.06 pág. 11 párrs. 8, 9

Millai organizacioncuna tiyashcamantami cai mundopica achca llaquicuna tiyan. Por ejemplo, panda religioncunapica achca gentecunamanmi Diosmanta llullashpa yachachincuna. Shamuj punllacunapi ima tucunatapish llullashpami yachachincuna. Biblia ima nishcatapish mana crinachu canchij nishpami yachachincuna. Cutin mana alli gobiernocunaca shujtaj llajtacunahuan macanacushpami gentecunata llaquichincuna. Pobrecunatapish mana difindiri tucushcamantami llaquichincuna. Ashtahuanpish cullquiraicu imatapish rurashpami ashtahuan charij tucuncuna. Jatun empresacunapish charij canallata munashpami Allpata mapayachishpa catincuna. Pobre gentecunatapish sinchita trabajachishpa, mana alli pagashpami paicunalla charij tucuncuna. Bibliapi huillashca shinaca Dios churashca Mandanata mana apoyashcamantami millai gentecunapish, gobiernocunapish, shujtaj organizacioncunapish tucuchishca cangacuna (Jeremías 25:31-33). w17.04 pág. 12 párrs. 7, 8

Jehová Diosca runacunapaj shunguta ricuj Diosmi can. Chaimantami Acabta perdonarca (Proverbios 17:3). Acab huañushca qꞌuipami Jehová Diosca Acabpaj familiata llaquichisha nirca. Chaita yachashpaca Nabotpaj familiacunapish amigocunapish Diosta cꞌuyashcata o mana cꞌuyashcatami ricuchina carca. Paicuna humildes cashca cashpaca Diosmanta mana caruyashcacunachu canga. Ashtahuanpish Dios siempre allita ruraj cashcata crishpa, paipi tucui shunguta churashpami catishcacuna canga (Deuteronomio 32:3, 4). Nabottapish paipaj huahuacunatapish Dios causachijpica paipaj familiapish amigocunapish achcatami cushicungacuna. Paicunaca Jehová Dios siempre allita ruraj cashcatami ricungacuna (Job 14:14, 15; Juan 5:28, 29). Diosca gentecuna tucui imallata rurashcatami ricuchinga. Allita rurashca cajpipish, millaita rurashca cajpipish, pacallapi imata rurashcatapish ricuchingami. Humildes cashpaca chaitaca tucui shunguhuanmi crishun (Eclesiastés 12:14). Jehová Diosca ñucanchij mana yachashcatapishmi yachan. Chaimantami humildes cashpaca Diosmanta mana caruyashun. w17.04 págs. 22, 23 párrs. 8, 9

Achca testigocunaca paicunapaj llajtapi guerra tiyashcamanta, llaquichisha nishcamantami huasicunata saquishpa rishcacuna. Mana rijsishca llajtapi causanaca sinchimi can. Por ejemplo, mushuj shimita, mushuj costumbrecunatami yachana can. Luzmanta, yacumanta, impuestocunata ima shina paganatapish yachanami can. Leypi nishca shina huahuacunata ima shina huiñachinata, estudiachinatami yachana can. Shujtaj llajtamanta shamuj huauquicuna panicuna chashna llaquicunata charijpica pacienciahuan, respetohuanmi ayudana canchij (Filipenses 2:3, 4). Maijan llajtacunapica autoridadcunaca caru llajtamanta shamuj testigocunataca chai llajtapi causaj testigocunahuan tandanacuchun mana saquincunachu. Autoridadcunaca: ‘Cancunapaj tandanacuicunaman mana ri tucushpapish cai trabajota chasquinatajmi canguichij. Mana cashpaca ña mana ayudashunchu, cancunapaj llajtamanmi cutin cachashun’ nincunami. Chashna nijpimi huaquin testigocunaca manchaimanta ima trabajotapish chasquincuna. Chaimantami paicunahuan tupanacungapaj utca imatapish rurana canchij. Paicunaca ayudachunmi minishtin. Paicunata ayudajpica ashtahuanchari Diospi shunguta churangacuna (Proverbios 12:25). w17.05 pág. 5 párrs. 9, 10

Jesús cai Allpapi cashpaca ‘cai shina causai tucurinapaj’ imalla tucunatami huillarca. Por ejemplo, “achcacunapaj cꞌuyaimi chiriyanga” nircami (Mateo 24:3). Cai shimicunaca primer siglopi causaj judiocunapimi puntaca pajtarirca. Paicunaca Diospaj pueblomi canchij nishpapish paicunapaj cꞌuyaica chiriyashcami carca. Pero Jesusta achca catijcunaca mana chai judiocuna shinachu carca. Paicunaca ‘Jesusmanta punllanta huillanataca’ manataj saquircacunachu. Diostapish, huauqui panicunatapish, Diosta mana rijsij gentecunatapish cꞌuyashcatami ricuchircacuna. Jesusta catijcunaca Diosta ashtahuan cꞌuyashpami catircacuna (Hechos 2:44-47; 5:42). Pero huaquincunaca Diosta cꞌuyanata saquircacunami. Efesopi causaj crijcunataca Jesusca, ‘cancunapaj punta cꞌuyaitami saquishcanguichij’ nircami (Apocalipsis 2:4). ¿Imamantataj Jesusca chashna nirca? Efesopi causaj gentecunaca paicunapaj munaita rurashpallami causacurcacuna. Chaimantami Efesopi causaj crijcunaca paicuna shinallataj causai callarishcacuna canga (Efesios 2:2, 3). w17.05 págs. 15, 16 párrs. 1-3

Jefteca alli mandaj, macanacunatapish mana manchaj runami carca. Cutin Anaca humilde huarmimi carca. Paipaj huasipi tucuita alli charishpa, paipaj cusatapish atindishpami causarca. Jeftepish Anapish Diosta alli adorajcunami carca. Ishquindijmi Diosman cusha nishcata pajtachircacuna. Ñucanchijpish imata ruranata Diosman ari nishpaca Jefteta, Anatami yuyarina canchij. Huaquinpica, Jehová Diostaca, canta ashtahuan sirvingapajmi caita o chaita rurasha ninchij. Shinallataj caitami canman cusha nishpami Diosman ari ninchij. Chashnallataj caita o chaita mana rurashachu nishpami Diosman ari ninchij. Bibliapica imata ruranata Diosman ari ninaca mana pugllaichu can ninmi. Imata ruranatapish shungumantami ari nina canchij. Mana pi obligajllapichu ari nina canchij. Chaimanta Diosman ari nishpaca pajtachinatajmi canchij (Génesis 14:22, 23; Hebreos 6:16, 17). w17.04 pág. 3 párrs. 1, 2