Febrero

Noeca shuj arcataca nunca mana rurashcachu carca. Chaimantami Jehovapi confiashpa Dios mandashca shina ‘tucuita chashnataj rurarca’. Jehová Dios mandashca shina rurashcamantami Noepish paipaj familiapish quishpirirca. Shinallataj Jehová Dios paita ayudachun saquishcamantami alli yaya carca. Juillu tamya manaraj shamui punllacunapica causaica sinchimi carca. Chashnapish paipaj huahuacunata alli huiñachishpami alli ejemplota churarca (Génesis 6:5). Can yaya cashpaca, ¿ima shinataj Noé shina ‘tucuita chashnataj ruraj’ cai tucungui? Jehová Diosta uyai. Cambaj huahuacunata Bibliahuan, publicacioncunahuan, tandanacuicunahuan Jehová Dios yachachichun saqui. Shinapish yaya mamacuna Diosmanta yachachingapaj achcata esforzarijpipish maijan huahuacunaca Diosmanta caruyashcacunami. Huahuacuna Diosmanta caruyajpipish yachachingapaj achcata esforzarij yaya mamacunaca tranquilomi sintiri tucunguichij. Shinallataj ima horapish cambaj churi o ushushi Diosman tigrana esperanzatami chari tucungui. w18.03 pág. 30 párrs. 10, 11

¿Maijanta invitanata munashpapish sinchi ricurishcachu? Tal vez “pinganayanmi o imatapish mana parlai tucunichu, visitanaman shamujcunaca mana cushilla sintiringachu” nishpachari preocuparinchij. O mana cashpaca “ashalla cullquita charishcamanta, shujtaj huauquicuna shina imatapish mana cui tucunichu, huasipish uchilla, huajcha huasimi can” nishpachari preocuparinchij. Pero yuyarishunchij, jatun o alli huasita charinata mana minishtinchijchu. Ashtahuanpish limpio, ima tiyashcapish ordenpi cajpica invitashcacunaca allimi sintiringacuna. Chaimanta ama preocuparinguichu, ashtahuanpish cꞌuyaihuanmi alli chasquina cangui. Huasipi visitajcuna tiyajpica paicuna alli cachunmi atindina canchij (Filipenses 2:4). Achcacunaca paicunapaj causaimantami parlanata munancuna. Chaimantami paicunahuan pasangapaj, uyangapaj tiempota surcuna canchij. Shuj ancianoca: “Congregacionmanta huauquicunata invitashpaca paicuna imata yuyashcata, ima shina sintirishcatami yachai tucuni. Jehová Diostapish ima shina rijsishcatami yachai tucuni” ninmi. Invitashcacunamanta preocuparishcata ricuchishpaca tucuicunami alli pasashun. w18.03 págs. 18, 19 párrs. 15-17

Cunan punllacunapi yaya mamacunaca huahuacuna alli decisioncunata japichunmi ayudasha nincuna. Yangamanta bautizarinata qꞌuipayachishpaca Diospaj ñaupajpica huahuacunaca mana alli ricuri tucunchu (Santiago 4:17). Manaraj bautizarijpimi Jesusta catij tucungapaj, huahuacuna alli prepararishca cashcata yaya mamacunaca seguros casha nincuna. Maijan jovencunaca ñami casi 20 huatacunata charin. Paicunataca huahuamantami Diosmanta yachachishcacuna. Shinallataj tandanacuicunamanpish, huillanamanpishmi ricuncuna. Ña testigo cashca layami purincuna pero manaraj Diosman mingarishpa bautizarishcacunachu. Chaimantami huaquin superintendente de circuito huauquicunaca preocuparishca cancuna. ¿Imamantataj manaraj bautizarishcacuna? Maijancunataca paicunapaj yaya mamami “bautizaringapajca shuyanarajmi cangui” nishcacuna. w18.03 pág. 9 párrs. 1, 2

Jesús shina cangapajca pai ima shina yuyashcata, imata rurashcatami alli yachana canchij. Jesuspajca paipaj Yayahuan alli apanacunami ashtahuan importante carca. Jesús shina cashpaca Diospajmanmi ashtahuan cꞌuchuyashun. Chaimantami Jesús shina yuyangapaj esforzarina canchij. ¿Jesús shina yuyangapajca imatataj rurana canchij? Jesusta catijcunaca milagrocunata rurajta, ima shina yachachijta, shujtajcunata ima shina tratajta, paipaj Yaya yuyashca shina imatapish rurajtami ricurcacuna(Hechos 10:39). Ñucanchijcunaca Jesustaca mana ricui tucunchijchu. Pero Jehová Diosca Mateo, Marcos, Lucas, Juan librocunatami quillcachishca. Chai librocunata liyishpa, cutin cutin yuyashpami Jesús ima shina cashcata, imata yuyashcatapish yachashun. Chashnami Juan 13:15-pi nishcata catishun. Chaipica: “Cancunapish ñuca rurashca shinallataj ruraichij” ninmi. Jesuspaj ejemplota catishpaca pai shinami yuyashun. w18.02 págs. 20, 21 párrs. 15, 16

Adanpaj Evapaj huahuacuna causashca punllamantami Dios rurashcacunata ricushpa, shujtajcuna yachachijpi, tucuipi cazujpi Dios ima shina bendiciajta ricushpa gentecunaca Diosmanta yachashcacuna (Isaías 48:18, QC, 1989). Noeca Dios rurashcacunata ricushpami Dios tiyashcata, cꞌuyaj, llaquij cashcatapish yacharca. Shinallataj ‘huiñaipaj poderyuj’ cashcatapish, pailla Dios cashcatapishmi yachaj chayarca (Romanos 1:20). Noeca Diosta alli rijsishpami paipi tucui shunguta churarca. ¿Noemanca pitaj Diosmanta parlarca? Paipaj familiacunami Diosmanta parlashca canga. Por ejemplo, paipaj yaya Lamecca Diospi tucui shunguhuan crijmi carca. Lamec huacharishca punllacunaca Adán Evapish causacurcarajmi. Shinallataj Matusalenca Noepaj abuelomi carca. Cutin Jaredca tatarabuelomi carca. Jaredca Noé huacharishca punllamanta 366 huatacuna qꞌuipami huañurca (Lucas 3:36, 37). Cai tucui yachashcacunataca Noeca paipaj shungupimi huaquichirca. Chaimantami tucui shunguhuan Diosta sirvishpa causarca (Génesis 6:9). w18.02 pág. 10 párrs. 4, 5

Shuj huauqui, shuj pani o shuj familia imata rimashpa, imata rurashpa llaquichijpica shungupica dimastij nanarishcachari sintirishun. Chashna llaquichijpi mana cungari tucushpaca, ¿paicunahuan pꞌiñarishca saquirishunchu? Mana cashpaca ¿Bibliapaj consejocunata catishpa chai problemacunata utcachu allichishun? Achca tiempo pasachun saquijpica problemata allichinaca sinchimi tucunga. ¿Paihuan alli tucungapajca imatataj rurana cangui? Puntapica, “huauquihuan alajata parlanacungapaj ayudahuai” nishpami Jehová Diosta tucui shunguhuan mañana cangui. Taita Diosca paicunapaj amigocunataca cꞌuyaihuanmi tratan. Chaimantami chai huauquipish Diospaj amigo cashcata yuyarishpa cꞌuyaihuan tratana cangui (Salmo 25:14; Proverbios 15:23; Mateo 7:12; Colosenses 4:6). Diosta mañashca qꞌuipaca imata ninatami alli yuyana cangui. Chai huauqui llaquichisha nishcataca ama yuyangui. Shinallataj “pai chashna cachunca ñucami imata rurashca casha” nishpami yuyana cangui. w18.01 pág. 7 párrs. 15, 16

Achcacunami Pablo parlashca gentecuna shina can. Pero testigo de Jehovacunaca shujtajcunata shungumanta cꞌuyashcatami ricuchincuna. Jesusca, Moisesman cushca tucui leycunamantaca Diostapish shujtajcunatapish cꞌuyana ashtahuan importante cashcatami yachachirca (Mateo 22:38, 39). Shinallataj Jesusca, caishuj chaishuj cꞌuyanacushpami Diosta alli sirvicushcata ricuchingacuna nircami (Juan 13:35). Mateo 5:43, 44-pi nishca shinaca Diosta alli sirvijcunaca paicunata pꞌiñajcunatapishmi cꞌuyancuna. Jesusca shujtajcunata cꞌuyashcamantami Diosmanta huillangapaj tucui pueblocunata purirca. Ñahui mana ricujcunatapish, cojocunatapish, lepra ungüihuan cajcunatapishmi alliyachirca. Shinallataj huañushcacunatami Jesusca causachirca (Lucas 7:22). Shujtajcuna paita pꞌiñajpipish tucuicunata quishpichingapajmi paipaj causaita curca. Chashnami paipaj Yaya cꞌuyashca shinallataj cꞌuyarca. Cunan punllacunapica testigo de Jehovacunaca Jesuspaj ejemplota catishpami shujtajcunaman cꞌuyaita ricuchinchij. w18.01 pág. 30 párrs. 11, 12

Cambaj causaipica llaquicuna, jarcaicunami ricuringa. Por ejemplo, huahuaraj cashpachari bautizarircangui. Pero cunanca ñachari joven cangui. Diosmanta ama caruyangapajca Diospaj ñaupajpi ari nishcatami yuyarina cangui. Bautizarigrishca punllaca ‘ima tucujpipish canllatami cꞌuyasha, tucui can nishcatami cazusha’ nircanguimi. Cambaj yaya o mama Diosmanta caruyajpipish cambaj ari nishcataca mana cungarinachu cangui (Salmo 27:10). Ima llaquicuna, tentacioncuna ricurijpipish “ñuca ari nishcata pajtachingapaj fuerzasta cuhuai” nishpami Diosta mañana cangui. Jehová Diosca paihuan alli apanacuchunmi munan. Pero paihuan alli amigo cangapaj, quishpiringapajpish achcatami esforzarina cangui. Bibliapica: “Cancuna quishpiringapaj manchaihuan, chujchuihuan allita rurana yuyailla caichij” ninmi (Filipenses 2:12, QC, 1989). Jehová Diosmanta ama caruyangapajca sinchitami esforzarina cangui. Yuyari, maijancunaca achca huatacunata Diosta alli sirvishpapish qꞌuipaca paimanta caruyarcacunami. w17.12 págs. 22, 23 párrs. 4, 6, 7

Cunan punllacunapica Jehová Diospaj obrata apoyana oportunidadtami charinchij. Chaita tucui shunguhuan rurajpica ima mana faltachunmi Diosca bendicianga (Malaquías 3:10; Proverbios 11:24, 25). Shinallataj Diospaj ruraicunata apoyashpaca cushillami sintirishun. Bibliapica: “Imatapish cujmi, cushcata japijta yalli cushicun” ninmi (Hechos 20:35). Huahuacunapish mushujcunapish Diospaj obrata apoyai tucuncunami. Chaimantami ñucanchij rimashcahuan, rurashcacunahuan shungumanta cuna alli cashcata yachachina canchij. Chashnami paicunapish achca bendicioncunata chasquingacuna. Tucui ñucanchij ima charishcapish Jehovamantami shamun. Ñucanchij charishcacunata paiman cushpaca paita cꞌuyashcata, agradicishcatapishmi ricuchishun. Diospaj templota rurangapajca israelitacunaca tucui munaihuanmi curcacuna. Chaimantami tucuicuna cushicurcacuna (1 Crónicas 29:9). Israelitacuna shinallataj ñucanchijpish Jehová Diosman shungumanta cushpa catishunchij. Chashnami cushilla sintirishun. w18.01 pág. 20 párrs. 18, 19

Jesús jahua pachapi mandai callarishca qꞌuipami ungidocunaca causarina carca. Pero, ¿jatun llaqui punllacunapi cai Allpapi causacunraj ungidocunahuanca imataj tucunga? Cai ungidocunaca jahua pachaman ringapajca puntaca huañunami cangacuna. Ashtahuanpish paicunaca tucuri trompeta uyarijpica ñahuita sipushpa pascaj shinallami jahua pachapi causaringacuna (1 Corintios 15:51, 52; Mateo 24:31). Chaimantami Bibliapica ‘paicunaca pꞌuyucunapimi jahua pachaman apashca cangacuna’ nin (1 Tesalonicenses 4:13-17). Cunan punllacunapica Diosta achca sirvijcunaca jahua pachapi causanaman ringapajca mana agllashcacunachu cashca. Chaimantami jahua pachapi Jesushuan mandagrinataca mana shuyancuna. Chaipaj randica Jehová Dios llaquichina punllata apamushpa tucui llaquicunata tucuchichunmi shuyancuna. Ima hora canataca ni pi mana yachanchu. Pero Bibliaca chai punlla ña quichquiyamucushcatami ricuchin (1 Tesalonicenses 5:1-3). Tucui llaquicuna tucurishca qꞌuipaca achca gentecunami causaringa. Paicunaca paraíso Allpapimi causangacuna, jucha illaj cana esperanzatapishmi charingacuna. Chashnallataj ñaupa punllacunapi causarijcuna shina ña mana cutin huañungacunachu. w17.12 pág. 13 párrs. 15, 18, 19

Ñucanchij shungupi cꞌuyaita charishpaca pitapish mana envidiashunchu. Bibliaca: “Cꞌuyaita charijca llaquita apajmi, alli shunguyujmi, cꞌuyaita charijca mana shujtajpajta munanchu” ninmi (1 Corintios 13:4). Ñucanchij shungupi ama envidia tiyachunca Jehová Dios shinami cana canchij. Congregacionpica tucuicuna shuj shinalla cashcatami yuyarina canchij. Chashnami shuj huauquita o panita alli nijpica, mana envidiashpa tucuicuna paihuan cushicushun (1 Corintios 12:16-18, 26). Rey Saulpaj churi Jonatanpi yuyashun. Paica Jehová Dios rey cachun Davidta agllajpipish mana pꞌiñarircachu. Ashtahuanpish Davidta llaquishpami tucuipi ayudarca (1 Samuel 23:16-18). ¿Jonatán shina cai tucunchijchu? w17.11 pág. 29 párrs. 10, 11

Diosca Moisesman cushca leytaca ñucanchijpajmi Bibliapi churashca. Dios imamanta chai leycunata cushcata alli intindishpami ñucanchij causaipi imata ruranata yachashun (Mateo 23:23). Moisesman cushca leycunaca Jehová Dios ima shina cashcata, pai ima shina causachun munashcatami ricuchin. Chaimantami Bibliaca ‘ima shina yachanatapish, mana llulla mandashcatapishmi charin’ nin (Romanos 2:20). Miticuna llajtacunamanta yachashpami Jehová munashca shina ancianocunaca juzganata yachai tucuncuna. Ñucanchijpish llaquishpa, cꞌuyaita ricuchinatami yachai tucunchij (Zacarías 7:9). Ñucanchijcunaca ña mana chai leycuna ucupi canchijchu. Pero allita rurana, llaquij canaca Diospajca huiñaipajmi valishca can. Jehová Diosca mana cambiashcachu. Chaimantami ñucanchijpish pai shina llaquij, cashcata ruraj cana canchij. Jehová Diospi miticushpa paita cushilla sirvishpa causashunchij. w17.11 págs. 15, 16, 20 párrs. 2, 3, 18, 19

Tandanacuicunapi shuj conferenciata uyachicushpaca Bibliapi nishcacuna ashtahuan importante cashcatami ricuchina cangui (Juan 7:16). Experienciacunata, ejemplocunata parlashpapish Bibliamantami ashtahuan parlana cangui. Shinallataj versocunata liyinallapaj randica chai versocuna ima nisha nishcatami alli yachachina cangui. Achca versocunallata liyijpica qꞌuipaca manachari yuyaringacuna. Chaimantami versocunata alli agllashpa, alli liyishpa, ejemplocunahuan alli intindichina cangui. Paicunapaj causaipi ima shina pajtachinatapishmi yachachina cangui (Nehemías 8:8). Shuj conferenciata uyachingapajca huauquicunaca imalla ninata yachangapajmi shuj pꞌangata chasquincuna. Quiquin prepararicushpaca yuyaicunata, versocunatapish allimi estudiana cangui. Chai yuyaicunata alli intindingapajca versocunahuanmi chꞌimbapurana cangui. Ashtahuantajca Diostami ‘cambaj nishcacunata alli yachachingapaj ayudahuai’ nishpa mañana cangui (Esdras 7:10). w17.09 pág. 24 párrs. 11, 12

Israelitacunaca 70 huatacunatami prezu shina Babiloniapi causacurcacuna. Pero Jesús manaraj huacharijpi 537 huatapica Babiloniamantami llujshircacuna. Jerusalenpi templota shayachishpa Diosta cutin adorangapaj tigrashcamantami cushilla carcacuna. Shuj huata qꞌuipaca Diospaj huasipaj callari rumicunatami churarcacuna. 16 huatacuna qꞌuipacarin templota shayachinataca ña mana yuyarircacunachu. 520 huatapimi Jehová Diosca Babiloniamanta israelitacunata ima shina llujshichishcata yuyachichun Zacariasta cacharca. Zacarías shutica “Jehovami yuyarishca” nisha ninmi. Israelitacuna Jehová Diosta cungarishca cajpipish paica mana cungarircachu (Zacarías 1:3, 4). Diosca cꞌuyaihuanmi paita cutin adorachun ayudasha nirca. Shinapish tucui shunguhuan adorajllapimi chasquisha nirca. w17.10 págs. 15, 16 párrs. 2, 3

Maijan doctorcunaca: “Cꞌuyaihuan ayudashpaca mana yalli ungushunchu, shujtajcunahuanpish allimi apanacushun” nincunami. Llaquicunahuan cajcunata ayudashpaca ashtahuan cushillami sintirishun. Shinallataj mana ñucanchijlla sintirishunchu, mana alli yuyaicunatapish mana charishunchu. Chashna rurashpami alli causashun. Shujtajcunata cꞌuyaihuan ayudashpaca Dios mandashcatami pajtachishun. Shinami Diospaj ñaupajpi alli ricurishun. Chashnallataj alli cusa, alli huarmi, alli amigocunami cashun. Shujtajcunata ayudajpica ñucanchij minishticushca ratopish chashnallatajmi ayudangacuna (Mateo 5:7; Lucas 6:38). Mana imatapish japingaraicullachu shujtajcunata ayudana canchij. Ashtahuanpish Diospaj ejemplota catingapaj, paita jatunyachingapajmi shujtajcunata llaquishpa ayudana canchij (Proverbios 14:31). w17.09 pág. 14 párrs. 16, 17

Jehová Diosmi Jesustaca rey cachun, sumo sacerdote cachun agllarca. Shinallataj Diosca ‘paipaj huasita’ shayachichunmi agllarca. ¿Ima shinataj caitaca rurarca? Jesusca 1919 huatapimi Babilonia jatun pueblomanta llujshichun Diospaj llajtata ayudarca. Shinallataj Diosta alli sirvijcuna cutin tiyachunmi ayudarca. ‘Alli cazuj alli yuyaiyuj sirvij’ nishca huauquicunatapishmi nombrarca. Paicunatami Diospaj llajtata ñaupajman pushachun mingarca (Mateo 24:45). Jesusca cunancamami Diospaj pueblo alli adorachun, Dios munashca shina causachun ayudacushca (Malaquías 3:1-3). Jesuspish 144 mil ungidocunapish huaranga huatatami cai Allpata mandangacuna. Ungidocunaca reycuna sacerdotecunapishmi canga. Jesuspish ungidocunapish Diosta cazujcunataca jucha illaj cachunmi ayudangacuna. Chai huashaca cai Allpapica alli shungu gentecunallami saquiringacuna. Chaipimi tucuicuna Jehová Diosllata cutin adorangacuna. w17.10 pág. 25 párrs. 15, 16

Mana munaimanta huañuchij runa quishpirisha nishpaca utcami cꞌuchulla miticuna llajtaman rina carca (Josué 20:4). Paipaj causaita quishpichingapajca mana uniyashpami miticuna llajtaman chayana carca. Chaipimi sumo sacerdote huañungacama saquirina carca. Chaita rurashpaca paipaj huasita, trabajota, shujtaj cosascunatapishmi saquina carca. Chai tucuita saquinaca sinchimi cashcanga. Cunan punllacunapica juchata rurashpa arrepintirishpaca Dios cushca tucui ayudatami pajtachina canchij, juchata ruranatapish saquinami canchij. Shinallataj juchapi ama cutin urmangapajmi cuidarina canchij. Ñucanchij juchacunamanta arrepintirishcataca ruraicunahuanmi ricuchina canchij. Chashnami Jehová Dios ñucanchijta perdonashcamanta pagui nishcata ricuchishun (2 Corintios 7:10, 11, NM). w17.11 pág. 12 párrs. 10, 11

Jehová Diosca mana mitsashpa cujcuna cachunmi munan (1 Juan 3:17). Pero ¿ima yuyaihuantaj chaita rurana canchij? Yuyashun. ¿Amigocunallata, ñucanchij ñahuipi alli ricurijcunallatachu ñucanchij huasiman invitanchij? o ¿ñuca imata minishtijpica paicunami ayudanga nishpachu invitanchij? Mana cashpaca ¿manaraj alli rijsishca huauqui panicunatachu ayudanchij? O ¿ñucanchijta mana ayudai tucujpipish paicunata ayudanchijchu? (Lucas 14:12-14). Por ejemplo, shuj huauqui o pani mana alli decidishcamantachari ayudachun minishtin. O ñucanchij huasiman invitajpipish manachari agradicishca canga. Chashna cajpipish 1 Pedro 4:9 ima nishcatami pajtachina canchij. Caita pajtachishpaca shungumanta cꞌuyashcatami ricuchishun. Shinallataj cushillami sintirishun (Hechos 20:35). w17.10 pág. 6 párr. 12

Potifarpaj huarmica, José sumaj ñahui, munananqui huambra cajta ricushpami cutin cutin, ‘shamui ñucahuan dormingui’ nishpa paita inquitasha nirca. Pero Joseca mana urmarcachu. Chaimantami Potifarpaj huarmi ‘cunantajca ñucahuanmi siriringui’ nishpa ropapi japijpica chai rato callpashpa rirca. ¿Josepaj ejemplomantaca imatataj yachanchij? Diosta ama llaquichingapajca tentacioncuna ricurijpica chai ratomi chaimanta anchurina canchij (Proverbios 1:10). Maijancunaca manaraj Diosta rijsishpaca yalli micushpa, ubyashpa, mana cashpaca fumashpalla, drogarishpalla, huainayashpallami causajcuna carca. Chaimantachari huaquincunaca ña bautizarishca cashpapish chai mapa ruraicunapi cutin urmai tucun. Mana alli ruraicunapi ama urmangapajca: “Juchata rurashpaca Diospaj ñaupajpica mana alli ricurishachu” nishpami yuyanaraj canchij. Chaimantami manaraj tentacioncuna ricurijpi imata ruranata alli ricuna canchij (Salmo 26:4, 5; Proverbios 22:3). Ima tentación ricurijpica chai juchata ama rurangapajmi Jehová Diosta mañana canchij. w17.09 pág. 5 párrs. 8, 9

Diosmanta ama caruyangapajca charinallapi mana yuyanachu canchij. Shinallataj Dios munashcata rurangapajmi tiempota surcuna canchij. Abrahamta yuyarishun. Paica Diospaj alli amigomi casha nirca. Chaimantami Diosta cazushpa, Ur llajtata saquishpa carpa huasicunapi causarca (Hebreos 11:8-10). Abrahamca charinallata yuyanapaj randica Diospaj bendicioncuna ashtahuan valishca cashcatami ricurca (Génesis 14:22, 23). Achca huatacuna qꞌuipaca Jesuspishmi shuj joventaca Diospi tucui shunguhuan crichun animarca. Jesusca: ‘Diospaj ñaupajpi alli ricuringapajca, can imalla charishcacunata tucui cꞌatushpa, huajchacunaman cugri. Jahua pachapimi, achcata charingui. Chai qꞌuipa ñucata catingui tigramugri’ nircami (Mateo 19:21). Cai jovenca mana Abraham laya tucui shunguhuan Diospi crircachu. Pero shujtajcunaca Diospimi tucui shunguhuan crircacuna. w17.07 pág. 6 párr. 12

Éufrates jatun yacuta Abraham chꞌimbashca punllamanta paipaj huahua huahuacuna shuj llajta tucungacamaca 430 huatacunami pasarca. Paicunami Dios cusha nishca llajtapi causarcacuna (Éxodo 12:40-42; Gálatas 3:17). Abrahamca Dios cusha nishcacuna manaraj tucui pajtarijpimi huañurca. Pero paica tucui causaipimi Jehová Diospi shunguta churarca. Chaimantami pacienciahuan shuyarca (Hebreos 11:8-12). ¿Paraisopi causarishpaca Abrahamca ima shinashi sintiringa? Bibliapi paipaj causaimanta, paipaj huahua huahuacunamanta parlashcata yachashpaca dimastijmi cushicunga. Shinallataj paipaj huahua huahuacunamanta Jesús nacirishcata yachashpa, Jehová Diospaj munai pajtarichun pai ayudashcata yachashpaca yallitajmi contentaringa. w17.08 pág. 6 párrs. 10, 11

Bibliapica, “mapata rurana” nishpaca mana huainayanallamantachu parlan. Ashtahuanpish shujtaj mana alli ruraicunamantapishmi parlan. Por ejemplo, fumana, mapa parlocunata nishpa asichinaca mapa ruraicunami can (2 Corintios 7:1; Efesios 5:3, 4). Shinallataj ñucanchijlla cashpaca mapa ruraicunapimi urmai tucunchij. Por ejemplo, huainayanata yuyachij librocunata liyina, televisionpi, internetpi o revistacunapi lluchulla cꞌaricuna huarmicuna mapata ruracujta ricunapish mapa ruraicunami can. Cai mapa cosascunata ricushpa, liyishpaca ñucanchij charishcacunata japirishpa mapata ruranapimi urmai tucunchijman. Mapa ruraicunata ricujcunapajca mapa munaicunamanta jarcarinaca sinchimi can. Chai mapa munaicunamanta mana jarcarishpaca cꞌaricunapish huarmicunapish mapata rurana yuyaillachari causancuna. Huaquin yachaj gentecunaca: ‘Chashna mapa ruraicunata ricujcunaca drogarijcuna shina, machajcuna shinami chai viciopi urmancuna’ ninmi. Cai mapacunata ricunaca achcatami llaquichin. Maijancunaca dimastij pingaimi sintirincuna. Mana alli trabajai tucuncunachu. Shinallataj familiapipish llaquitami causancuna. Shujtajcunaca divorciarishcacunami. Cutin shujtajcunaca paicunallatajmi huañusha nishcacuna. w17.08 pág. 17 párrs. 8, 9

Salmo 147-ta escribijca, israelcuna Jerusalenman tigrashcata yuyarishpami cai punllapaj versopi Jehová Diosmanta chashna nirca. Jehová Dios Jerusalenta cuidacushcata yachashpami cushilla sintirirca. Huaquinpica llaquicunahuan cashpaca dimastijmi sustarinchij. Pero Jehová Diosca alli yachaita cushpami ayudan. Chaimantami Salmo 147-ta escribijca cashna nirca: ‘Paimi cai pachamanca paipaj shimita cachan. Paipaj shimica utcami tucuita rin. Paimi rasutapish millmata shina urmachin. Casatapish ushpata shinami urmachin. Paimi rasutaca mirga mirgata urmachin’ nircami. Chai qꞌuipaca cashnami nirca: “Chai chiripica, ¿pitaj ahuantai tucungari? Diosca paipaj shimihuan rimashpaca rasutaca yacuyachinllami” nircami (Salmo 147:15-18). Jehová Diosca tucuitami alli rijsin, achca podertapishmi charin. Chaimantami rasuhuanpish, runduhuanpish imatapish rurai tucun. ¿Manachu ima llaquicunatapish ahuantachun ayudanga? w17.07 pág. 19 párrs. 14, 15

Jehová Dioslla alli Mandaj cashcamantami paita apoyana canchij. Paimi tucuita rurarca. Chaimantami gentecunatapish, angelcunatapish pailla mandana can. Diabloca imata mana rurashcachu. Chaimantami Diabloca mana mandana can. Diablopish, Adanpish Evapish cꞌariyashpami Diosta mana cazurcacuna (Jeremías 10:23). Diosca paicunallataj decidichunmi rurarca. Chaimantami Diosta cazunata o mana cazunata paicunallataj decidi tucurcacuna. Pero paicunallataj decidi tucushpapish ¿Diospaj contra tucunata agllanallachu carca? Mana. Diosca cada uno imata ruranata agllachunmi rurashca. Pero paimanta caruyashpa paipaj contra tucuchunca mana rurashcachu. Diospaj contra tucushpaca mana alli decidishcatami ricuchishun. Ñucanchijca Jehová Dios mandachunmi minishtinchij. w17.06 págs. 21, 22 párrs. 2-4

Achca jarcaicuna tiyajpipish Pabloca Diosmanta huillashpami catirca. Ñucanchijpish Pablo laya huillashpaca Diosmanta huillana achca valishca cashcatami ricuchishun (Hechos 14:19-22). Estados Unidos llajtapica 1930 huatamanta 1944 huatacamaca Diosmanta ama yachachichunmi jarcarcacuna. Shinapish chai huauquicuna panicunaca huillanataca mana saquircacunachu. Huillanata ama jarcachunmi achca cutin tribunalcunaman rircacuna. Shuj juiciota ganashcamantaca, 1943-pica huauqui Nathan Knorrca cashnami nirca: ‘Cai juiciotaca cancunamantami ganashcanchij. Diospaj pueblo sinchita shayarishcamantami ganashcanchij’ nircami. Diosmanta huillanata valorashpaca jarcaicuna tiyajpipish huillashpami catishun. Jehová Diosca Bibliamanta yachachichunmi mingashca. Chai mingashcata valorashpaca mana huillana cashcallamanta huillashunchu. Ashtahuanpish tucui gentecunamanmi Diosmanta cabalta yachachina canchij (2 Timoteo 4:5). w17.06 pág. 12 párrs. 11, 12

Diosta cꞌuyashcamantami paipaj mandashcacunata cazunchij. Llaquicuna tiyajpipish ahuantanchij. Millai ruraicunatapish pꞌiñanchij (Salmo 97:10). Pero Diabloca Diosta ama cꞌuyashpa catichunmi tucuita ruran. Diosta mana rijsij gentecunaca pandatami yuyancuna. Paicunaca Diosta cꞌuyanapaj randica ‘quiquinlla alli canata munajcunami’ can (2 Timoteo 3:2). Shinallataj ‘aicha munaicunata rurashpalla, ñahui ricushca munaicunata rurashpallami causancuna. Achcata charishcamanta jatun tucujcunami’ can (1 Juan 2:16). Apóstol Pabloca ñucanchij munaicunallata rurashpa causajpi ima tucuna cashcatami huillarca. Paica: “Aichapaj munaita yuyanaca huañuimanmi apan” nircami. ¿Imamantataj huañuiman apan nirca? Paicunapaj munaita rurashpalla causajcunaca Diospaj enemigocunami tucun (Romanos 8:6, 7). Cullquita charinallapi yuyajcuna, mapata rurashpalla causajcunaca, achca llaquicunatami apancuna (1 Corintios 6:18; 1 Timoteo 6:9, 10). w17.05 pág. 16 párrs. 5, 6

Shujtaj llajtamanta miticushpa shamuj Testigocunaca, ‘huauquicuna panicunaca ñucamanca cunatajmi can’ nishpa mana yuyanachu can. Ashtahuanpish ayudajpica diosolopagui nishpa chasquinallami can. Chaita rurajpica huauquicuna panicunaca cushillami ayudangacuna. Tiempohuanca shujtaj llajtamanta shamujcunaca paicunallatajmi ima shina mantinirinata ricuna can. Chaita rurashpaca cushilla sintirishpami, shujtajcunahuanpish alli apanacungacuna (2 Tesalonicenses 3:7-9). ¿Paicunata ayudangapajca imata ashtahuan rurai tucunchij? Ayudangapajca mana achca cullquita minishtinchijchu. Ashtahuanpish paicunaca cꞌuyaita ricuchichun, paicunahuan pasachunmi minishtin. ¿Ima shinataj ayudai tucunchij? Paicunamanca carrota ima shina japinata, yanungapaj maipi alli, barato randinatami rijsichi tucunchij. Chashnallataj allpapi o construccionpi trabajachun maipi herramientacunata randinatami rijsichi tucunchij. Ashtahuanca, mushuj congregacionpi paicuna alli sintirichunmi cꞌuyaihuan tratana canchij. Tandanacuicunamanpish pushai tucunchijmi. Chashnallataj chayamushca llajtapi ima shina huillanatami yachachi tucunchij, paicunahuanpish huillanamanmi llujshi tucunchij. w17.05 pág. 6 párrs. 11, 12

Tauca gentecunaca paicuna munashcallatami rurashpa causancuna. Paicunapaj causaipi ima ashtahuan importante cashcata mana yachancunachu (1 Corintios 2:14). Shinallataj ima alli cashcata o ima mana alli cashcataca mana intindincunachu (Hebreos 5:11-14). Ashtahuanpish charinallapimi yuyancuna. Charishca jahuapish ashtahuanmi charisha nincuna (Eclesiastés 5:10). Paicuna laya ama yuyangapajca Bibliata liyinata mana saquinachu canchij. Chashnami charinallapi mana yuyashun. Diablo ama pandachichunca Jesusca Jehová Dios yachachishcacunatami yuyaipi charij carca (Mateo 4:8-10). Charinallapi ama yuyangapajca ñucanchijpish Yayito Jehová Dios nishcacunatami cumplina canchij. Chashnami Jesusta cꞌuyashcata ricuchishun. w17.05 pág. 26 párr. 17