Diciembre

Ñaupa punllacunapica huasipi micunamanmi shujtajcunata casi siempre invitajcuna carca. ¿Imamantataj invitajcuna carca? Paicunahuan alli cangapaj, ashtahuan alli amigocuna tucungapajmi invitajcuna carca (Génesis 18:1-8; Jueces 13:15; Lucas 24:28-30). ¿Ñucanchijcunaca picunatataj invitana canchij? Llaqui punllacuna chayamujpica caishujhuan chaishujhuan ayudanacunatami minishtishun. Chaipica alli amigocunatami charina canchij. Chaimantami alli amigocuna tucungapaj ñucanchij congregacionpi caj huauqui panicunata invitana canchij. Superintendente de circuito huauquicunapish, Bibliamanta yachana chꞌican chꞌican escuelacunaman invitashcacuna huauqui panicunapish pozadata cuchunmi minishtincuna. Cutin, construccionpi ayudaj huauqui panicunapishmi pozadata minishtincuna. Chashnallataj terremoto, acapanacuna o chashna laya llaquicuna tiyajpica huasi illaj, tucui illajmi saquirincuna. Chaimantami maijan familiacunaca huasita allichingacama maipi saquirinata minishtincuna. Yuyarishunchij, jatun, alli huasicunallata charijcunalla pozada cui tucushcataca mana yuyanachu canchij. Tal vez paicunaca ñachari achca cutincuna pozadata cushpa ayudarcacuna. Shinaca uchilla huasi cajpipish, humilde cajpipish ñucanchij huasipi chasquishunchij. w18.03 págs. 16, 17 párrs. 6, 9

¿Ñucanchij ima juchapi urmashpaca ima shinataj jatari tucunchij? Ñucanchijllaca mana chaita rurai tucunchijmanchu. Jehová Dios paipaj espirituta cushpa ayudajllapimi jatari tucunchij (2 Corintios 4:7). Diospaj espiritupaj granoca jarcarij canapishmi can. Jarcarij cashpami ñucanchijllataj disciplinata charijcuna cashcata ricuchinchij. Jarcarijcuna cangapajca Diosta mañana, Bibliata estudiana, estudiashcapi cutin cutin yuyanapishmi canchij. Pero ¿Bibliata estudiana sinchi ricurijpi o estudianata mana munashpaca? Ama llaquirichu. Jehová Dios ayudachun saquijpica paica Bibliata estudiana munaita cushpami ayudanga (1 Pedro 2:2). Puntapica Bibliata estudiangapaj disciplinata charingapaj mañai. Qꞌuipaca can mañashca shina rurai. Callaripica ashalla tiempollatami estudiashpa callari tucungui. Chashna rurajpica asha ashami Bibliata estudianaca jahualla, sumaj ricuringa. Shinallataj Jehová Dios yuyashcacunapi cutin cutin yuyashpaca cushillami sintiringui (1 Timoteo 4:15). w18.03 pág. 28 párrs. 5, 6

Bautizaringapajca Jehová Diosmanta, pai imata munashcatapish, ñucanchijta quishpichingapaj pai imata rurashcatapishmi yachana cangui (1 Timoteo 2:3-6). Caicunata yachashpami Diospi ashtahuan crishpa ima mana allita ruranata saquingui. Shinallataj tucui pai mandashcacunatami cazunata munangui (Hechos 3:19). Shinapish yuyari, ima mana allita rurashpa catijpica Diosman mingarishpa mañajpipish paica mana chasquingachu (1 Corintios 6:9, 10). Bautizaringapajca Diospaj mandashcacunatami cazuna can. Chaita rurashpapish tandanacuicunaman rina, huillanaman llujshina, shujtajcunamanpish Bibliamanta yachachinami can (Hechos 1:8). Cai tucuita ruracushca huashami Diostaca “canllatami tucui vida sirvisha nini” nishpa mañai tucungui. Chai qꞌuipaca tucuicunapaj ñaupajpi bautizaringapajmi ña listo cangui. w18.03 pág. 6 párr. 12

Mariaca Diospaj espirituta charij huarmimi carca. Chaimantami Jehová Diosca Jesuspaj mama tucuchun agllarca. ¿Ima shinataj Diospaj espirituta charij huarmi cashcata yachanchij? Mariaca Zacariasta paipaj huarmi Elisabettapishmi visitanaman rirca. Paicunaca Mariapaj familiami carca. María chayashpaca sumaj shimicunahuanmi Diosta alabarca (Lucas 1:46-55). Mariapaj shimicunaca Diospaj yachaicunata shungupi charishcata, Hebreo quillcashcacunata alli rijsishcatami ricuchin (Génesis 30:13; 1 Samuel 2:1-10; Malaquías 3:12). Mariaca Josehuan cazarashpaca Jesús huacharingacamami mana chayarircacuna. Mana paicunapaj aicha munashcata rurarcacunachu. Ashtahuanpish Diospaj munaita pajtachingapajmi esforzarircacuna (Mateo 1:25). Shinallataj Mariaca Mesiasmanta huillashca profeciacuna Jesuspi ima shina pajtarijtami yachanata munarca. Chaimantami paica Jesús imata rurajta, imata nijta alli ricurca. María shinami Diospaj munaita puntapi churangapaj imata ruranata yuyana canchij. w18.02 pág. 19 párr. 11

¿Ima shinataj Job shina Diospi tucui shunguhuan crishcata, tucuipi cazushcata ricuchi tucunchij? Alli cashpapish, llaquicunahuan cashpapish Jehová Diosta puntapi churashpa causashunchij. Shinallataj paipi tucui shunguta churashpa cazushunchij. Jobca pi llaquichicushcata mana yachashpapish Diosmanta mana caruyarcachu. Pero ñucanchijcunaca Diablo Diosmanta caruyachisha nishcataca allimi yachanchij (2 Corintios 2:11). Shinallataj Job libro tiyashcamantami Dios imamanta llaquicuna tiyachun saquishcata yachai tucushcanchij. Ashtahuanpish ñucanchijcunaca Dios churashca mandanapi Jesús rey cashcatami alli yachanchij (Daniel 7:13, 14). Jesús cai Allpata mandacushpaca tucui llaquicunata tucuchinatapishmi yachanchij. Shuj huauqui o pani yallitaj llaquilla cashpaca Job shinachari mana alli yuyashpa pandata imatapish ninga. Chaipica llaquijcuna cashcatami ricuchina canchij (Eclesiastés 7:7). Paicunata rimanapaj o juchachinapaj randica pai ima shina sintirishcata intindingapaj esforzarishunchij. Chashna rurashpami Jehová Dios shina cꞌuyaj, llaquij cashcataca ricuchishun (Salmo 103:8). w18.02 págs. 7, 8 párrs. 16, 19, 20

Maijancunaca guapo cashcamanta, tucuicuna rijsishca cashcamanta, alli cantaj cashcamanta, achca fuerzata charishcamanta o paicunata alli nishcamantami jatun tucuncuna. Rey Davidca tucuitami charirca. Pero paica humildemi carca. ¿Imamantataj chaita ninchij? Goliatta huañuchishca huashaca Saulca: ‘David, ñuca ushushihuan cazarai tucunguimi’ nircami. Pero Davidca: ‘Jatun mandajpaj yerno cangapajca ñucaca ima mana canichu’ nircami (1 Samuel 18:18). Jehová Diosca tucuita Mandaj cashpapish humildemi can. Caita yachashpami Davidca mana jatun tucurca. Ñucanchijpish David shina humilde cangapajmi esforzarinchij. Jatun tucunapaj randica Colosenses 3:12-pi nishcatami cazunchij. Chaipica: “Shungumanta llaquij canata, cuj canata, mana jatun tucushca canata, manso shungu canata, mana pꞌiñarij canata churarichij” ninmi. Shinallataj cꞌuyaita charishpaca ‘ñucami alli cani nishpa mana jatun tucushunchu’ (1 Corintios 13:4, QC, 1989). Tucuicuna humilde cashcata ricuchijpica shujtajcunapish Diosmanta yachasha ningacunami. w18.01 págs. 28, 29 párrs. 6, 7

¿Shuj Tandanacuna Huasita shayachina cajpica ima shinataj ayudai tucunchij? Shinallataj, ¿shuj jatun tandanacuita rurangapaj o llaqui tiyajpi huauqui panicunata ayudangapajca imatataj rurai tucunchij? Charishca cosascunahuanmi ayudai tucunchij (Hechos 4:34, 35; 1 Corintios 16:2). Ñucanchij cushca cullquica misionerocunata, betelcunapi trabajajcunata, precursor especialcunata, superintendente huauquicunata ayudangapajpishmi valin. Cai tucuri punllacunapica tucuicunami Diospaj obrata rurashpa catichun apoyai tucunchij. Tandanacuicunapimi ñucanchij cullquita cajitacunapi churai tucunchij. Shinallataj jw.org paginaman yaicushpami cullquita cachai tucunchij. Mashna cullquita churashcata o cachashcataca mana piman huillana minishtirinchu. Maipica: “Ñucaca ashallatami cuni. Imapaj mana avanzangachu” nishpachari yuyanchij. Chashna cajpipish yuyari, tucuicuna ashallatapish cushcamantami Diospajta rurashpa cati tucunchij. w18.01 págs. 17, 18 párrs. 10, 11

Quishpiringapajmi bautizarinaca minishtirishca can (Mateo 28:19, 20). Bautizarishpaca Diospaj ñaupajpimi “canllatami cꞌuyasha, tucui can nishcatapish cazusha” nircangui. Diospaj maquipi cambaj causaita mingashcataca mana arrepintirinachu cangui. Diosta mana sirvishpaca Diablopaj maquipimi cangui. Paica can quishpirichunca mana munanchu. Ashtahuanpish Diabloca Diosta mana cazushpa huiñai causaita ama charichunmi munan. Ña bautizarishca cashpaca achca bendiciocunatami charishcangui ¿nachu? Bautizarishca punllamantaca cambaj causaitami Diospaj maquipi churarcangui. Chaimantami, “Diosca ñucahuanmari, mana manchanichu. Runacuna imata ruranataca mana manchanichu” ni tucungui (Salmo 118:6). Diospajman cꞌuchuyana, paipaj ñaupajpi alli ricurinami ashtahuan alli can. w17.12 págs. 21, 22 párrs. 1-3

Huaquinpica shuj huauqui o pani imata nishpa o imata rurashpachari ñucanchijta pꞌiñachinga. Mana cashpaca ñucanchijcunachari paicunata pꞌiñachishun. Chai problemacuna tiyajpica ñucanchijpajca sinchichari canga. Pero Jehová Diosmanta mana caruyanachu canchij. Shinallataj juchayujcuna cashpapish tandallami huauqui panicunahuan Diosta sirvinata yachana canchij. Joseta yuyarishun. Paica Diosta alli sirvijmi carca. Jovenraj cajpica paipaj huauquicunallatajmi envidiamanta esclavota shina cꞌaturcacuna. Chaimi Josetaca Egiptoman aparcacuna (Génesis 37:28). Shinallataj “Potifarpaj huarmitami violasha nicushca” nishpami deganamanta juchachishpa carcelpi churarcacuna. Joseta llaquichicujta ricushpaca Diosca achcatami llaquirishca canga. Chai llaquicunata charichun permitishpapish paitaca mana cungarircachu. Bibliapica “Mandaj Dios paihuan cajpimi, tucui pai imata rurashcapish alli llujshirca” ninmi (Génesis 39:21-23). Caipi ricushca shinaca Diosta alli sirvijcuna cashpapish llaquicunataca charishunmi. w18.01 pág. 6 párrs. 12-14

Achca gentecunami “¿testigo de Jehovacunaca imapitaj cringuichij?” nishpa tapuncuna. Chashna tapujpica, “Jehová Diosmi tucuita rurarca, causaitapish curca” ninchijmi. Chashnallataj “Jesuspimi crinchij. Paimi ñucanchij juchacunamanta huañurca” ninchijmi. O tal vez, “shamuj punllacunapica paraíso Allpapimi huiñaita causashun” nishpachari cutichinchij. Pero, ¿huañushcacuna causarinamantaca parlanchijchu? Ñucanchijcunaca jatun llaqui punllacunapi mana huañushpa cai Allpapi huiñaita causanatachari yuyanchij. Pero chashna yuyashpapish huañushcacuna causarina cashcatami tucui shunguhuan crina canchij. Huañushcacuna causarinata crinaca importantemi can. Jesús mana causarishca cashpaca cunan punllapica mana mandacunmanchu. Chashna cajpica denbaldemi Jesusca ñami mandacun nishpa huillacunchijman (1 Corintios 15:12-19). Ñucanchijca Jesús causarishcataca tucui shunguhuanmi crinchij. Chaimantami huañushcacuna causarinata gentecunaman yachachinchij (Marcos 12:18; Hechos 4:2, 3; 17:32; 23:6-8). w17.12 pág. 9 párrs. 1, 2

Fariseocunaca maijan juchata rurashpa pandarishcallatami ricujcuna carca. Paicunaca shungupi ima shina cajtaca mana ricujcunachu carca. Jesuspaj punllacunapi ima tucushcata ricushun. Jesusca impuestota japij Mateo runapaj huasipimi micunaman rishca carca. Chaimi fariseocunaca Jesusta catijcunataca: “¿Ima nishpataj cancunata Yachachijca impuestota japijcunahuan, juchayujcunahuan micucunchu imamí?” nircacuna. Jesús chaita uyashpaca: ‘Sanocunaca jambijtaca mana mashcanchu, ungushcacunallami mashcancuna. Sacrificiocunataca mana ninichu. Ashtahuanpish llaquij cachunmi munani’ nircami (Mateo 9:9-13). Shinashpaca ¿Jesusca juchata rurashpa causanalla cashcatachu nicurca? Mana. Jesusca juchata rurajcuna arrepintirichunmi munarca. Chaimantami paica, ‘Diospajman cutirichij’ nishpa gentecunaman huillaj carca (Mateo 4:17). Jesusca impuestota cobraj huaquin runacuna, juchayujcuna cambiasha nishcatami cuenta japirca. Mateopaj huasimanca mana micunallaman rishcacunachu carca. Ashtahuanpish Jesús yachachishcata uyangapajmi rishcarcacuna (Marcos 2:15). Casi tucui fariseocunaca mana Jesús shinachu shujtajcunata llaquijcuna carca. w17.11 págs. 15, 19 párrs. 2, 15

Huauqui panicunahuan Diosta tandalla sirvinaca shuj jatun bendicionmi can. Tandanacuicunapimi huauqui panicunahuan Diospaj Shimita yachanchij. Paicunaman cꞌuyaita ricuchishpami Diospaj bendicioncunata japina yuyailla causashun. Shinapish huaquinpica llaquirinacui tiyangami. Chaicunata mana utca allichishpaca resintirishcami saquirishun (1 Pedro 3:8, 9). Resintirishca saquirishpaca Diospaj bendicioncunataca mana japi tucushunchu. Chaimantami Apóstol Pabloca: ‘Dios agllashca jucha illajcuna, pai cꞌuyashcacuna cashcamanta shungumanta llaquij canata, cuj canata, mana jatun tucushca canata, manso shungu canata, mana pꞌiñarij canata churarichij. Maijan caishujta pꞌiñashpa juchachijpica, caishuj chaishuj ahuantanacushpa, ima shinami cancunata Jehová Dios perdonarca, chai shinallataj caishuj chaishuj perdonanacuichij’ nirca (Colosenses 3:12,13). w17.11 pág. 29 párrs. 7, 8

Shuj israelita mana munaimanta pita huañuchishca cashpaca shuj miticuna llajtamanmi callpana carca. Punguman chayashpaca ancianocunamanmi huillana carca. Ancianocunaca paitaca allimi chasquina carcacuna. Qꞌuipaca maipimi runata huañuchishca carca, chai llajtamanmi cachana carcacuna. Chai llajtamanta ancianocunami paita juzgana carca (Números 35:24, 25). Cai ancianocunaca mana munaimanta huañuchishcata alli yachashca qꞌuipaca miticuna llajtaman cutin tigrachunmi saquina carcacuna. Ancianocunaca Diospaj pueblopi ama mapa ruraicuna tiyachunmi ricuna carcacuna. Chaimantami shuj runa mana munaimanta pita huañuchishca cashpaca ancianocunahuan parlana carca. Shinallataj Jehová Dios paita llaquishpa perdonachunmi paicunahuan parlana carca. Bibliamanta shuj yachaj runaca: “Mana munaimanta huañuchij runa ancianocunahuan mana parlajpica paitapishmi huañuchinata pudircacuna” nircami. Huañuchij runa quishpiringapajca ancianocunapaj ayudatami mashcana carca. Paicuna imata nishcatapish pajtachinami carca. Miticuna llajtaman mana yaicushpaca huañushcapaj familiapuramanta shuj cꞌaripaj maquipimi huañui pudirca. w17.11 pág. 11 párrs. 6, 7

Jehová Diosca paipaj angelcunata cachashpami paipaj llajtata ayudacushca (Malaquías 3:6; Hebreos 1:7). 1919 huatamantami ungidocunaca ña mana Babilonia jatun pueblopi prezu shina cashcacuna. Enemigocuna pꞌiñashpa llaquichicujpipish Diospaj llajtaca mirashpami catishca (Apocalipsis 18:4). Ñucanchijta angelcuna cuidacushcamantami panda religión ucupi prezu shina cutin canataca ña mana manchanchij (Salmo 34:7). Ashtahuanpish muyundij Allpapimi Diosta sirvijcunaca cushilla paita sirvishpa catinchij. Jehová Diosmi ñucanchijhuan canga. Jatun llaqui punllacuna chayamujpica Diosta sirvijcunataca angelcunami cuidanga. Cutin, Diosta mana cazujcunataca tucuitami chingachinga (2 Tesalonicenses 1:7, 8). Chaipi yuyashpami alli sintirinchij. w17.10 págs. 23, 24 párrs. 10, 11

Shuj familia juchata rurashcamanta congregacionmanta llujshichijpi, o testigo de Jehová ña mana casha ninichu nishpa paillataj Diosmanta caruyajpica shungu ucupi nanarishcami sintirishun. ¿Chashna tucujpica imatataj rurashun? Diospajta rurashpa catishunchij. Diospi tucui shunguhuan crishpa catingapajca Bibliatami tucui punllacuna liyina canchij. Shinallataj tandanacuicunaman alli prepararishpa rinata, huillanaman llujshinata, Diosta mañanatapish mana cungarinachu canchij (Judas 21). Pero chashna ruracushpapish llaquillaraj sintirishpaca ¿imatataj rurashun? Diospajta rurashpa catishunchij. Chashnami mana tanto llaquirishun. Salmo 73-ta quillcaj runata yuyarishun. Paica yallitaj preocuparishpami llaquilla puricurca. Pero Diospajta rurashpami catirca. Chashnami pandata yuyanata saquishpa alli sintirirca (Salmo 73:16, 17). Cai Salmota quillcaj runa layallataj rurashpami ñucanchijpish alli sintirishun. w17.10 pág. 14 párrs. 17, 18

Diabloca preocuparij shinami Evamanca mishqui shimicunahuan parlarca. Pero mana chashnachu carca. Paipaj shungupica mana allitami yuyacurca (Génesis 3:4, 5). Ahitofel runapish rey Davidpaj amigomi cani nishpami purij carca. Pero paillapi yuyashpami Davidpaj contra tucurca (2 Samuel 15:31). Cunan punllacunaca huaquincunaca Diosmanta yachashca jahuapish paipaj contrami tucushcacuna. Paicunapish shujtajcunapish congregacionpi huauqui panicunatami chꞌicanyachisha nincuna. Chaimantami mishqui shimihuan parlashpa huauqui panicunamanta preocuparishcata yuyachisha nincuna. Pero chai gentecunaca paicunapaj allita mashcangaraicullami ayudaj tucuncuna (Romanos 16:17, 18). Shujtajcunata llaquichingapaj nij tucushpalla cꞌuyaita ricuchinaca mana allichu can. Gentecunatami umai pudinchij, pero Jehová Diostaca mana umai pudinchijchu. Jesusca, ‘nij tucushpalla cꞌuyanimi nijcunaca jatunta llaquichishcami canga’ nircami (Mateo 24:51). Chaimantami, “¿shungumantachu cꞌuyaita ricuchicuni?” nishpa tapurina canchij. w17.10 págs. 4, 5 párrs. 6-8

Huillacushpa Bibliata liyishpaca Jehová Dios gentecunahuan parlachun saquicushca layami can. Ñucanchij yuyaimanta imatapish ninapaj randica Bibliapi shuj versota liyinami ashtahuan alli can (1 Tesalonicenses 2:13). Chaimanta: “¿Gentecunaman huillacushpaca Bibliapi huaquin versocunata liyingapaj esforzaricunichu?” nishpa tapurishunchij. Apostolcuna causashca tiempopi shinami cunanpish achca gentecunaca Bibliapi nishcataca mana intindincuna. Chaimantami Diosmanta huillacushpaca mana versocunata liyishpalla saquirina canchij. Chashna rurajpica gentecunaca manachari intindingacuna. Ashtahuanpish chai versopi huaquin yuyaicunata tigra yuyachishpami alajata yachachina canchij. Chashna rurajpica Diospaj yachachishcacunaca paicunapaj shungumanmi chayanga (Lucas 24:32). w17.09 pág. 23 párrs. 7, 8

Diosca huauqui panicunata, shujtajcunatapish cꞌuyachun ninmi (Juan 13:34, 35). Shujtajcuna llaquicunahuan cajpica ima shina ayudanatami ricuna canchij. Chashnami paicunata llaquishcata ricuchishun. Maijan llajtacunapica terremotocuna, acapanacunami gentecunata llaquichin. Paicunata ayudashpami llaquij cashcata ricuchinchij. Chashna llaquicunapi testigo de Jehovacuna ayudaj cashcataca tucuicunami yachan (1 Pedro 2:17). 2011 huatapimi Japón llajtapica shuj terremoto tiyarca. Chai qꞌuipaca mama cuchamanta yacucuna shamushpami pambashpa tucui librita llaquichirca. Shujtaj ladocunamanta huauqui panicunami chaipi ayudangapaj chayarcacuna. Paicunami Tandanacuna Huasicunata, hermanocunapaj huasicunatapish allichircacuna. Shuj panica huauqui panicuna ima shina ayudajta ricushpami cushilla sintirirca. Chaimantami paica: “Cai tucui llaquicunapica Jehová Dios ñucanchijta cꞌuyashcatami sintircani. Shinallataj turi ñañacuna caishuj chaishuj ayudanacuj cashcatami ricurcani. Tucui ladocunamanta turi ñañacunapish ñucanchijmanta Diosta mañacushcata yachashpami alli sintirircani” nircami. w17.09 pág. 12 párrs. 12, 13

¿Imamantataj mana alli ruraicunamantaca jarcarina canchij? Mana alli ruraicunamanta jarcarishpaca mana achca llaquicunata charishunchu. Ashtahuanpish mana rato pꞌiñarishunchu, shujtajcunahuanpish allimi apanacushun, mana tanto preocuparishpami causashun. Shinallataj tentacioncunapi ama urmangapaj esforzarishpaca Diospaj ñaupajpi allimi ricurishun. Adán Evaca paicuna munashcatami rurarcacuna. Chaimantami llaqui tucurcacuna (Génesis 3:6). Achca gentecunaca Adán Eva shinallataj mana jarcarishcamantami achca llaquicunata charincuna. Gentecunaca juchayuj cashcamanta mana tucuipi jarcari tucunchijchu. Chaitaca Jehová Diosca allimi yachan. Chaimantami shuj cꞌuyaj amigo shina ñucanchijta ayudasha nin (1 Reyes 8:46-50). w17.09 pág. 4 párrs. 3, 4

Ñaupa huatacunapi Sudáfrica llajtapica blancocunahuan yanacunahuan tandanacuchunca autoridadcunaca mana saquijchu carca. Pero domingo 18 de diciembre de 2011 huatapica 78.000 gentecunami Diosmanta yachangapaj Johannesburgo estadiopi tandanacurcacuna. Chai tandanacuimanca Sudafricapi causaj testigocunapish, shujtaj llajtacunamanta testigocunapishmi shamurcacuna. Estadiota cuidajca: “Chashna alli gentecunataca ni maipi mana ricushcanichu, tucuicunami limpio churarishcacuna carca. Estadiotapish limpiotami saquircacuna. Chꞌican chꞌican gentecuna cashpapish tandallami carcacuna” nishpami parlarca. Mana testigo gentecunapish ñucanchijcuna tandalla causaj cashcatami ricuncuna (1 Pedro 5:9). Muyundij Allpapica ¿imamantataj huauquicuna panicunaca mana shujtaj gentecuna laya can? Bibliata yachashcamanta, Jehová Diospaj espíritu ayudajpimi ñaupa causaita saquishpa mushuj causaita callarishcanchij (Colosenses 3:9,  QC, 1989). w17.08 págs. 15, 16 párrs. 2, 3

Bibliapica, Jehová Dios paipaj espíritu santota cujpimi shuyai tucunchij ninmi. Gentecunaca juchayujcunami canchij. Chaimantami Dios mana ayudajpica mana shuyai tucunchijman. Shuyanata yachashpaca Diostapish, shujtajcunatapish cꞌuyashcatami ricuchishun. Cutin, pacienciata mana charishpaca shujtajcunahuan mana alli apanacushunchu (1 Corintios 13:4; Gálatas 5:22). Shuyanata yachashpaca mana pꞌiñarishpa, mana tanto llaquirishpami ima llaquicuna japijpipish ahuantashun (Colosenses 1:11; Santiago 1:3, 4). Pi llaquichijpipish mana chashnallataj llaquichishunchu. Ima problema tiyajpipish Diosmantaca mana caruyashunchu. Shinallataj Bibliapica mana pꞌiñarishpa shuyana cashcatami yachachin. Caitaca Santiago 5:7, 8-pimi yachai tucunchij. w17.08 pág. 4 párr. 4

¿Maiman viajasha nishcanguichu? Manaraj viajashpaca maiman rinatami alli yachana cangui. Ñucanchij causaica viajashpa ricuj shinami can. Chaimantami jovenraj cashpa ñucanchij causaipi imata ruranata alli agllana canchij. Maipica ima ruranata agllanaca sinchimi ricurin. Pero cunan punllapaj versopi Jehová Dios nishcatami yuyarina canchij. Jehová Diosca shamuj punllacunapi imata ruranata alli agllaichij ninmi (Eclesiastés 12:1; Mateo 6:20). Joven, Jehová Diosca cushilla causachunmi munan. Chaimantami tucui ñucanchij minishtishcacunata cai Allpapi churashca. Shinallataj alli causachun munashpami alaja consejocunata cun. Chai consejocunata mana cazusha nijcunataca cashnami nin: ‘Ñuca mana munashcatami agllarcanguichij. Ñucapajta rurajcunaca cushicungacunami, ashtahuanpish cancunaca pingachishcami canguichij. Ñucapajta rurajcunaca, tucui shunguhuan cushicushpami cantangacuna’ ninmi (Isaías 65:12-14). Alli decisioncunata agllashpaca Jehová Diostami cushichinchij (Proverbios 27:11). w17.07 pág. 21 párrs. 1, 2

Cada luzerota alli rijsishca layallatajmi Diosca cada unota alli rijsin. Paica ñucanchij maipi cashcata, ima shina sintirishcata, imata minishtishcatapish allimi yachan. Jehová Diosca cada cual ima shina cashcataca allimi rijsin. Chaimantami ima problemata charijpipish paica ayudai tucun (Salmo 147:5). Llaquicunahuan cashpaca imata mana rurai tucushca shinami sintirinchij. Pero Diosca imata rurai tucushcata o mana rurai tucushcataca allimi yachan. “Ñutu allpamanta ñucanchij cashcatapish yuyaipimi” charin (Salmo 103:14). Juchayuj cashcamantaca cutin cutinmi chaillapitaj pandarinchij. Maipica mana allitachari rimarcanchij o mapa munaitachari charircanchij, mana cashpaca shujtajcunamantachari envidiata charircanchij. Chaimantaca llaquillachari sintirircanchij. Jehová Diosca mana ima juchata ruraj cashpapish, ñucanchij ima shina sintirishcata allimi intindin (Isaías 40:28). ¿Llaquicunahuan cajpi Jehová Dios ima shina ayudashcata ricushcanguichu? (Isaías 41:10, 13). w17.07 págs. 16, 17 párrs. 6-8

Shuj huauquica Sri Lanka llajtapimi allpata, huasita charin. Chaimantami huauqui panicuna chaipi tandanacuchun saquin. Huaquincunamanca pozadatapishmi cun. Chaita rurangapaj cullquita gastana cajpipish paica ashallata charij huauqui panicunatami ayudan. Shujtaj llajtacunapica Diosmanta yachachichun mana saquincunachu. Chaimantami huaquincunaca paicunapaj huasipi huauqui panicuna tandanacuchun saquincuna. Paicuna chashna ayudashcamantami pobrella huauqui panicunapish shuj localta mana arrendashpa gratis tandanacun. Shuj panica Diosmanta huillashpa catingapajmi siempre cullquita cun. Paica: ‘Chashna rurashcamantaca shujtajcuna pꞌiñachijpipish perdonanaca jahuallami can. Mana utca pꞌiñarinichu, ñuca munashca shina imapish mana pajtarijpica tranquilami sintirini. Shujtajcunapaj consejocunatapishmi alli chasquini’ ninmi. w17.07 pág. 5 párrs. 9, 10

Jobca achca llaquicunata imamanta charishcata intindishca cashpapish, huaquinpica, “¿imamantashi yallitaj sufrichun Diosca saquirca?” nishpami tapurishcanga. Chaipica Dios nishcacunatami yuyarishcanga. Chashnami llaquicunata Jehová ricushca shina ricushpa tranquilo sintirishcanga (Salmo 94:19). Job runapaj causaimanta yachashpami llaquicunataca Jehová ricushca shina ricushun. Chashnami alli sintirishun. Job librotaca ‘ñucanchijta yachachingapajmi Diosca quillcachirca. Mana pꞌiñarishpalla, cushilla, shuyana yuyailla canata yachachingapajmi quillcachirca’ (Romanos 15:4). ¿Jobpaj causaimantaca imatataj yachanchij? Ñucanchij llaquicunallapi yuyanapaj randica, tucuita Mandaj Diostami apoyana canchij. Achca llaquicunata charishpapish Mandaj Diosmanta mana caruyashpami paita apoyanchij. w17.06 págs. 17, 18 párrs. 9, 13, 14

Jesusca paipaj catijcuna samarinata minishtishcatami yacharca. Chaimantami achcata huillashca qꞌuipaca Jesusca paita catijcunataca samarishunchij nirca. Samaringapajmi televisionta ricunchij, pugllanchij o shujtaj cosascunata ruranchij. Shinapish chai ruraicuna ñucanchij causaipi ashtahuan importante cachunca mana saquinachu canchij. Ñaupa punllacunapica huaquin gentecunaca ‘micushunchij, ubyashunchij, cayaca huañushunllami’ nishpami yuyajcuna carca (1 Corintios 15:32). Cunan punllapish achca gentecunaca chashnallatajmi yuyancuna. Diversioncunapi mashna tiempota pasacushcata yachangapajca semanapi mashna horascunata huillashcata, tandanacuiman rishcata, Bibliata estudiashcata anotai. Qꞌuipaca mashna horascunata pugllashcata, televisionta ricushcata o shujtaj pugllaicunapi pasashcata anotai. Cai anotashca horascunata chꞌimbapurashca qꞌuipaca ima cambiocunata ruranatami yachangui (Efesios 5:15, 16). w17.05 pág. 24 párrs. 11-13

Jesusca, shuj cꞌatuj runamantami parlarca .Shuj punllaca ashtahuan valishca perlata tarishpami yallitaj cushicurca. Paica, chai perlata randingapajmi tucui charishcacunata cꞌaturca. Cꞌatuj runapajca chai perlaca achca valishcami carca. Dios churashca Mandanaca chai perla shinami can. Ñucanchijpish chai cꞌatuj runa laya valorashpaca, Diospaj Mandanata apoyangapajmi tucuita huashaman saquishun (Marcos 10:28-30). Zaqueomanta parlashun. Paica shujtajcunata shuhuashpami achcata charij tucurca (Lucas 19:1-9). Dios churashca Mandanamanta Jesús yachachicujta uyashpaca chai Mandana achca valishca cashcatami ricurca. Chaimantami chai rato Zaqueoca: “Mandaj Jesús, ñuca charishcacunamanta chaupita imata mana charijcunaman cusha. Maijancunapajta umashpa shuhuashcataca chuscu cutinhuanmi tigrachisha” nircami. Chashnami charinallapi yuyanata saquirca. w17.06 pág. 10 párrs. 3-5

Ayudaj huauqui panicunaca yaya mamata respetachunmi huahuacunata animana can. Chaipajca paicunapaj yaya mamamantami allicunata parlana can. Yaya mamacuna huahuacunata ima shina huiñachijtapish respetanami can. Huahuacunata ayudacushpaca ima mana allicunataca mana ruranachu can. Cashnami testigocunapish shujtaj gentecunapish imata mana ningacuna (1 Pedro 2:12). Yaya mamacuna, shujtajcunata ayudachun mañashpapish cancunami huahuacunaman Diosmanta yachachina canguichij. Shujtaj huauquicuna panicuna cancunapaj familiata ayudajpipish ricuranami canguichij. Yaya mamacuna, Jehová Dios ayudachun mañaichij. Maicama rurai pudishcatapish rurashpa catichij (2 Crónicas 15:7). Cancunallapaj ima allicunata mashcanapaj randica Jehová Diosmanta amataj caruyachun huahuacunata ayudaichij. Diospaj Shimita paicunapaj shungupi charichunpish ayudaichij. ‘Ima horaca Diosta sirvij tucungami’ nishpa shuyaichij. w17.05 pág. 14 párrs. 19, 20

Ishqui millai runacunaca shuj runataca yangamantami juchachirca. Chaimantami paitapish paipaj huahuacunatapish rumicunahuan shitashpa huañuchirca. Chaita ricushpaca, ¿allita ruraj gentecunaca ima shinashi sintirishcanga? Caica mana shuj parlollachu can. Diosta sirvij Nabot runatami chashna llaquichircacuna. Rey Acab causashca punllacunapimi Nabotca causarca (1 Reyes 21:11-13; 2 Reyes 9:26). Acab runaca Nabot charishca allpatami charisha nirca. Chaimantami Nabottaca: ‘Cambaj uva chagrayuj allpata ñucaman cui. Chai allpamantaca ashtahuan alli uva chagrayuj allpatami cusha. Mana cashpaca mashna cullquita nishcatami cusha’ nircami. Pero ¿Nabotca imamantataj paipaj allpataca mana cꞌatusha nirca? Israelitacunaman Dios cushca leycunapica herencia allpataca mana cꞌatunallachu carca (Levítico 25:23; Números 36:7). Nabotca Diostami cazurca. w17.04 págs. 21, 22 párrs. 1, 4

¿Millaicuna tucurijpica picunataj causashpa catinga? Diosca: ‘Alli shungucunami, Dios cusha nishca Allpataca japingacuna. Yallitaj sumaj causaipimi cushicungacuna’ ninmi. Chashnallataj, ‘cashcata rurajcunallami Allpata japingacuna. Tucui causaipimi Allpapi causangacuna’ ninmi (Salmo 37:11, 29, NM). ¿Picunataj cashcata rurajcuna, alli shungucuna can? Alli shungucunaca humilde gentecunami can. Paicunaca humildes cashcamantami Diosmanta yachashpa paita cazuncunapish. Shinallataj Dios munashca shina causasha nishcamantami cashcata rurajcunapish can. Cunan punllacunapica alli gentecunaca ashallami tiyan. Pero Dios cugrij paraisopica alli shungu gentecunalla, cashcata ruraj gentecunallami causanga. Paicunami cai Allpataca shuj sumaj paraisota ruranga. w17.04 pág. 11 párrs. 5, 6

Diosta cꞌuyashpaca ñucanchij huauquicunata panicunatami cꞌuyashun. Llaquipi caj huauquicunata panicunatacarin ashtahuanmi cꞌuyashun (1 Juan 3:17, 18). Por ejemplo, Judeamanta crijcunaca micunata mana charircacunachu. Chaimi Antioquiamanta crijcunaca ayudata cacharcacuna (Hechos 11:28, 29). Pablopish Pedropish, crijcunataca cancunapaj huasipica allimi chasquina canguichij nircami (Romanos 12:13; 1 Pedro 4:9). Visitanaman shamuj huauquicunata panicunataca cushicuihuanmi chasquinchij ¿nachu? Diosta sirvishcamanta llaquichisha nijpi o paicunapaj llajtapi ima llaqui tiyashcamanta miticushpa shamuj huauqui panicunatacarin ashtahuan alli, cꞌuyaihuanmi chasquina canchij. Asha huatacuna huashallami Ucrania llajtapica guerra tiyarca. Chai tiempollapitajmi testigo de Jehovacunata llaquichi callarircacuna. Chaimantami achca testigocunaca huasicunata saquishpa miticushpa rircacuna. Huaquin testigocunatacarin huañuchircacunami. Shujtajcunataca Ucrania, Rusia llajtacunapimi huauqui panicunaca pozadata curcacuna. Ucraniamanta, Rusiamanta testigocunaca guerrapi mana participarcacunachu. Chashnami “mana cai pachapaj” cashcata ricuchircacuna. Ashtahuanpish cushicuihuanmi ‘alli huillaita huillashpa’ catircacuna (Juan 15:19; Hechos 8:4). w17.05 págs. 4, 5 párrs. 6, 7