Enero

Moisesca Egipto llajtata mandajpaj familiapurapimi causaj carca. Paica jiriza runami carca. Shuj punllaca paica shuj runa mana allita ruracushcatami ricurca. Chaimi pꞌiñarishpa chai runata huañuchirca. Moisesca ñuca ruraicunata Diosca chasquingami nishpami yuyashca canga. Pero israelcunata pushangapajca mana manchai illaj canallachu minishtirirca. Ashtahuanpish manso shungu canami minishtirirca. Chaita intindichisha nishpami Jehová Diosca Moisestaca cuarenta huatacunata ayudarca. Shinallataj manso shunguta charingapajca humilde, cazujmi cana carca. Moisesca Dios nishcata uyashcamantami alli pushaj tucurca (Éxodo 2:11, 12; Hechos 7:21-30, 36). ¿Familiata pushajcuna, ancianocunaca Moisesmantaca imatataj yachacunguichij? Shujtajcuna cancunata mana respetajpica ama utca pꞌiñaringuichijchu. Chaipaj randica cancunapish pandarijllacuna cashcata yuyarichij (Eclesiastés 7:9, 20). Ima problemacuna ricurijpipish Jehová mandashca shina ruraichij. Shinallataj sumajta cutichichij (Proverbios 15:1). Chashna cutichishpaca Jehová Diostami cushichinguichij. Cancunapurapish sumajtami causanguichij. Chaita ricushpaca ¿manachu shujtajcunapish cancuna shina manso shungu casha ningacuna? w19.02 págs. 8, 10 párrs. 1, 9, 10

¿Jesusca imamantataj chai gentecunamanta llaquirirca? “Michij illajlla ovejacuna shina” cajtami ricurca. Por ejemplo, chai gentecunamanta huaquincunaca pobrecunami carca. Chaimantami familiata mantiningapaj sinchita trabajana carca. Shujtajcunaca familiatami huañuipi chingachishcacuna carca. Paicuna chai llaquicunata apacushcatami Jesusca cuentata cushcanga. Paipish chashna llaquicunata apashcamantami paicunata alli intindi tucurca. Shinapish chai gentecunata llaquishcamantami Jesusca cushichinata munarca (Isaías 61:1, 2). ¿Jesusmantaca imatataj yachanchij? Cunanpish gentecunaca “michij illajlla ovejacuna” shinami can. Paicunaca achca problemacunatami charin. Chaimantami Diospaj Gobiernomanta alli huillaicunata uyanata minishtincuna. Ñucanchijmi paicunataca ayudai tucunchij (Apocalipsis 14:6). Chaimantami Jesús shina huajchacunata, imata mana charijcunata llaquishpa Diosmanta huillanchij (Salmo 72:13). Shinallataj paicunata llaquishcamantami tucui laya ayudanchij. w19.03 págs. 21, 22 párrs. 6, 7

¿Diostaca imamantataj cꞌuyana canchij? Paica punllantami alli cosascunata ñucanchijman cun. Shinallataj paimanta, paipaj munaimantami yachachin (Juan 8:31,32). Ashtahuancarin huauqui panicuna ñucanchijta ayudachunmi paicunata cushca. Shinallataj ima problemacunata charijpica Diosca siempremi ayudan. Shamuj punllapicarin paica huiñai causaitami cunga (Apocalipsis 21:3, 4). Shinashpaca Jehová Dios ñucanchijta cꞌuyashcata ricuchingapaj pai imallata rurashcata yuyarishunchij. Chaimi paitaca ashtahuan cꞌuyashun. Paita ashtahuan cꞌuyashpaca paipaj shunguta llaquichinatami manchashun. Jehová Diosmanta alli causacushcatami siempre yuyarina canchij. ¿Imamanta? Chaita yuyarishpami paitaca ashtahuan cꞌuyashun. Paipaj mandashcacunatapish shungupimi huaquichishun. Chashnami millai Diablo imata cusha nijpipish Diosta sirvinataca mana saquishun. Ña mil huatacunata causacushcata yuyashunchij. Chai tiempopi ñucanchij bautizarishca punllata yuyarishpaca: “Allitami agllashcani” nishunmi. w19.03 págs. 6, 7 párrs. 14, 19

Familia ucupi tucuicuna pagui ninata yachajpica cushillami causangacuna. Cusa huarmicunapish paicunapura pagui nijcuna cajpica jahuallami perdonaringacuna. Shinallataj tandallami causangacuna. Alli cusaca huarmi ima allicunata rurashcallataca mana ricunchu. Ashtahuanpish ‘jatarishpami paita cushichin’ (Proverbios 31:28). Yachaisapa huarmipish caipi chaipica allitami ruracungui nishpami cusata cushichin. Yaya mamacunaca huahuacuna pagui ninata yachachunca ¿imatataj rurana canguichij? Huahuacunaca cancuna imata nishcata, imata rurashcatami catincuna. Chaimantami huahuacuna cancunapaj ima favorta rurajpica pagui nina canguichij. Shinallataj shujtajcuna huahuacunapaj ima allita rurajpica pagui nichun yachachichij. Ashtahuancarin shungumanta agradicishpaca shujtajcunataca achcatami ayudanguichij nishpa yachachichij. w19.02 pág. 17 párrs. 14, 15

Chashna nishpami Job runaca Satanás llaquichijpipish, Diosta tucui causaipi cazusha nishcata ricuchirca. Ñucanchijpish Job shinami casha ninchij. Millai Diabloca Jobta shinallatajmi ñucanchijtapish juchachin. Paica ‘gentecunaca Diostaca mana tucui shunguhuanchu cꞌuyancuna. Paicunapaj causaita quishpichingapajca Diosta saquingacunallami’ ninmi (Job 2:4, 5; Apocalipsis 12:10). Chaita yachashpaca ¿manachu llaquilla sintirinchij? Caipi yuyai. Jehová Diosca ñucanchijpimi confian. Chaimi Diablo ñucanchijman llaquicunata cuchun saquin. Ashtahuancarin paita tucui shunguhuan cazuj cashcata Satanasman ricuchichunmi munan. Chaipajca Diosca ayudasha ninmi (Hebreos 13:6). Tucuita ruraj Mandaj Dios ñucanchijpi confiashcata yachashpaca ¿manachu cushilla sintirinchij? Ari. Shinaca ¿imamantataj Diosta tucui shunguhuan cazuna canchij? Chaita rurashpami Satanás llulla cashcata ricuchishun. Chashnallataj Yaya Dios alli Mandaj cashcata, paipaj shutitapish difindishcatami ricuchishun. w19.02 pág. 5 párrs. 9, 10

Jesusca paita caticushcamanta gentecuna llaquichina cashcatami apostolcunamanca huillarca. Pero ima problemacuna ricurijpipish pai laya mana manchaj cachunmi animarca (Juan 16:1-4a, 33). Chaimi achca huatacuna qꞌuipapish Jesusta catijcunaca paipaj ejemplota catishpa mana manchaj cashcata ricuchircacuna. Llaquicuna ricurijpipish caishuj chaishujmi ayudarijcuna carca (Hebreos 10:33, 34). Cunan punllacunapish Jesús shinami mana manchaj cashcata ricuchinchij. Maijan huauqui panicunataca paicunapaj crishcacunamantami catirashpa llaquichishcacuna. Huaquincunataca yangamantami carcelpi churashcacuna. Cashna cajpica paicunata ayudangapajmi tucui pudishcata rurana canchij. Por ejemplo, paicunamantaca Diostami mañana canchij. Shinallataj autoridadcunapaj ñaupajpipish ñucanchij crishcacunata difindingapajmi esforzarina canchij (Filipenses 1:14; Hebreos 13:19). Shinallataj mana manchaj cashcata ricuchingapajca huillanatami mana saquina canchij (Hechos 14:3). Contracuna jarcaicunata churajpipish Jesús layallatajmi Diosmanta huillanataca manataj saquishun. w19.01 págs. 22, 23 párrs. 8, 9

¿Alaja comentariocunata cushpa shujtajcunata animachingapajca imatataj rurana canchij? Tandanacuicunapaj alli prepararinami canchij. Ñucanchijcuna huasipi alli prepararishpaca tandanacuicunapi comentariocunata cungapajmi listos cashun (Proverbios 21:5). Tandanacuicunapaj preparacushpaca Jehová Diostami paipaj espíritu santota cuchun mañana canchij (Lucas 11:13; 1 Juan 5:14). Chai huashaca imata yachagrishcatami titulocunapi, fotocunapi, recuadrocunapi ricuna canchij. Shinallataj cada parrafocunata liyishpa, versocunata liyishpami imata yachashcata intindina canchij. Imata yachashcata cutin cutin yuyarishpami tandanacuipi ima comentariota cugrishcataca alli yachashun. Tandanacuicunapaj alli prepararishpaca achcatami beneficiarishun. Comentariocunatapish jahuallami cushun (2 Corintios 9:6). w19.01 págs. 9, 11, 12 párrs. 6, 13-15

Habacuc runa paipaj preocupacioncunata quillcachun Jehová Dios saquishcamantaca ¿imatataj yachacunchij? Ñucanchij preocupacioncunata, dudacunatapish Diosman huillanataca mana manchanachu canchij (Salmo 50:15; 62:8). Habacuc runaca Yaya Diospimi confiarca. Chaimantami paillapi confiashpa dimastij preocuparinapaj randica ima shina sintirishcata Diosman huillarca. Shinami ñucanchijman shuj alli ejemplota saquirca. Mañashcacunata uyaj Jehová Diosca paipi confiashpa ñucanchij preocupacioncunata huillachunmi mañan (Salmo 65:2). Chaita rurajpica Dios ñucanchijta ugllaj shina mañashcacunata cutichijtami ricushun (Salmo 73:23, 24). Ima llaquicunata charijpipish pai ricushca shina ricuchunmi ayudanga. Shinaca Jehová Diosta tucui shunguhuan mañashpaca paipi confiashcatami ricuchicunchij. w18.11 págs. 15-17 párrs. 2, 5, 6

Davidca diferente edadta charijcunahuanmi amigos tucurca. Paipaj alli amigocunapuramanta shujca ¿pitaj carca? Jonatanmi carca. Bibliapica paicunaca sumajtami apanacujcuna carca ninmi. Pero Jonatán, Davidpaj casi 30 huatacunahuan ñaupa cashcataca ¿yacharcanguichu? Chashna jahuapish ¿imamantataj alli apanacujcuna carca? Ishquindijmi Diospi tucui shunguhuan crijcuna carca. Shinallataj caishuj chaishuj respetanacushpami shujtajcunatapish cꞌuyaj, llaquijcuna carca. Diospaj enemigocunahuan macanacungapajpish mana manchajcunachu carca (1 Samuel 13:3; 14:13; 17:48-50; 18:1). Ñucanchijpish David shina, Jonatán shina Diosta cꞌuyajcunahuan, Diospi feta churajcunahuan amigos tucushpaca contentomi sintirishun. Kiera shuti panica achca huatacunatami Diosta sirvishca. Paica: “Tucui laya amigocunatami charini. Huaquincunaca chꞌican laya costumbrecunatami charin” nircami. Canpish Kiera pani laya cashpaca Jehová Dios paipaj Shimihuan, paipaj espíritu santohuan tandalla cachun ayudashcatami alli ricungui. w18.12 págs. 23, 24 párrs. 11-13

¿Huainayana shimica imatataj nisha nin? Manaraj cazarashpa huainayana, cazarashca jahua shujtaj cꞌarihuan o huarmihuan huainayana, cullquita charina raiculla huainayana, cꞌaripura huarmipura huainayana, animalcunahuan huainayanami can. Por ejemplo, shuj cazado cꞌari shujtajhuan huainayajpica huarmica divorciarinata o mana divorciarinatami decidi tucun. Shujtajhuan huainayajpica mana culpata charij cusa o huarmica divorciarinapaj obligado cashcataca Jesusca mana nircachu. Por ejemplo, cusa shujtajhuan huainayashca cajpipish huarmica paihuan causashpa catinatami decidi tucun. ¿Imamanta? Paita tucui shunguhuan cꞌuyashcamantachari perdonanata munanga. Shinallataj paicunapaj matrimoniopi mejorangapajchari achca esfuerzota rurasha ninga. Cutin huarmi divorciarishpa, mana tigra cazarashpaca huaquin problemacunami tiyanga. Por ejemplo, ¿ima shinataj pailla mantiniringa? ¿Ima shinataj cusahuan chayarina munaitapish pajtachinga? ¿Sololla sintirishpaca ima shinataj causanga? O ¿huahuacunata charishpaca? (1 Corintios 7:14). Mana culpata charij cusa o huarmi divorciarishpaca cai llaquicunata chꞌimbapurana cashcatami ricunchij. w18.12 pág. 12 párrs. 10, 11

Mana alli ruraicunata Yaya Diosca pꞌiñanmi (Isaías 61:8). Juchayujcuna cashcamantami allita ruranaca sinchi can. Chaitaca Diosca allimi yachan. Chashna jahuapish paica millaita ruranataca pꞌiñaichigari ninmi. Shinallataj imamanta millai ruraicunata Dios pꞌiñashcata yuyarishpaca pai shinami yuyai callarishun. Mana alli cosascunatapish ñucanchij yuyaimantaca utcami anchuchishun. Huaquin ruraicunataca Bibliapica mana tucuita huillanchu. Pero Dios shina yuyashpaca chai cosascuna mana alli cashcatami yachashun. Por ejemplo, cunan tiempopica shuj bailemi rijsishca can. Chai bailetaca lap dancing nishpami rijsincuna. Huaquincunaca cai baileca mana huainayana cashcatachu ricuchin, chaimantami alli can nincuna. Pero ¿Jehová Diosca chashnachu ricun? Paica tucui millai cosascunataca pꞌiñanmi. Chaitaca mana cungarinachu canchij. Chaimanta, juchapi urmachij cosascunamanta jarcarinata, Yaya Dios pꞌiñashca cosascunata millanatapishmi yachana canchij (Romanos 12:9). w18.11 pág. 29 párrs. 11, 12

Cai versopi nishcaca apóstol Pablopaj importante cashcamantami paica cai versota quimsa cutin nirca (Romanos 1:17; Gálatas 3:11; Hebreos 10:38). Ima llaquicunata, problemacunata charishpapish Diospi feta churashpa, paimanta ama caruyashunchij. Chaimi pai nishcacuna shamuj punllapi pajtarishcata ricushun. Diosca llaquicunapi ama yallitaj yuyaichijchu. Shamuj punlla sumaj esperanza tiyagrishcapi yuyaichij ninmi. Tucuri punllapi causajcunaca Habacuc libromantaca achcatami yachai tucunchij. Diosca paita cazujcunaman, paipi confiajcunamanca huiñai causaitami cusha nin. Chaimantami ima problemacunata, preocupacioncunata charishpapish Diospi tucui shunguhuan crishpa catina canchij. Diosca Habacucman nishca shinami ñucanchijpaj lado tucushpa quishpichinga. Shinallataj pai churashca Mandana cai Allpata mandai callaringacama pacienciahuan shuyachun ninmi. Chai punllaca cai Allpapica cushillami paitaca shuj shinalla adorashun (Mateo 5:5; Hebreos 10:36-39). w18.11 págs. 19, 20 párrs. 15-17

Jesuspaj punllacunapica huaquincunaca pai yachachishcacunatami chasquircacuna. Pero qꞌuipataca ña mana uyasha nircacunachu. Por ejemplo, shuj punllaca achca gentecunami Jesusta catircacuna. Chai gentecunamanmi Jesusca shuj milagrota rurashpa cararca. Qꞌuipaca paicunaca Galilea cucha chꞌimba ladomanmi Jesushuan cruzarcacuna. Chaipimi Jesusca: “Runa Aichayujpaj aichata mana micushpa, paipaj yahuarta mana ubyashpaca, cancunaca huiñai causaitaca mana charinguichijchu” nirca. Chaita uyashpami gentecunaca mancharircacuna. Paicunaca chai shimicuna ima nisha nishcata intindichihuai nishpa mañanapaj randica: “Cai yachachishcaca sinchimari. ¿Pitaj uyasha ningari?” nircacunami. “Chai punllamantami paipaj yachacujcunaca achcacuna huashaman tigrashpa, ña mana paihuan purircacuna” (Juan 6:53-66). Cunan punllacunapi huaquincunaca mana llullaj shimita cꞌatushpami Diosmanta caruyashcacuna. ¿Imamanta? Shuj rijsishca huauqui imata nijpimi paicunaca ñitcarishcacuna. Shujtajcunaca Bibliamanta shuj consejota chasquishcamanta o shuj huauquihuan mana alli apanacushcamantami risintirishcacuna. w18.11 pág. 10 párrs. 3-5

Diospaj organizacionpi huaquin cambiocuna imamanta tiyashcata mana intindishpaca, ñaupa tiempo Diosta sirvijcunata Jesús ima shina pushashcatami yuyarina canchij. Jesusca Josuepaj punllacunapipish punta siglopipish siempremi Diospaj pueblotaca alli pushashca. Chaita rurashpami paicunataca alli cuidashca, sinchi feta charichun, tandalla cachun ayudashca (Hebreos 13:8). “Alli cazuj alli yuyaiyuj” sirvij huauquicunaca minishtirishca horaspimi imata ruranata ricuchin (Mateo 24:45, QC, 1989). Paicuna chashna rurashpami Jesús ñucanchijta cꞌuyashcata, Dioshuan alli cachun cuidashpa preocuparishcata ricuchin. Jesús ñucanchijta pushacushcata ricushpami, ñucanchijcuna sinchi feta charichun ayudasha nishcata intindinchij. Jesusca huillanapi ocupado cachunpishmi ayudashca. Cunan punllacunapi Diosmanta huillashpa participanaca ashtahuan importantemi can (Marcos 13:10). w18.10 págs. 19, 20 párrs. 13-16

Shujtajcuna ñucanchijta pꞌiñachijpipish mana chashnallataj tigrachishunchu. 2 Samuel 16:5-13-pimi shuj alli ejemplota ricui tucunchij. Saulpaj familiapuramanta Simei runami Davidtapish paita sirvijcunatapish pꞌiñarishpa ajarca. Davidca cai runa ama ajashpa catichunmi jarcanata pudirca. Pero mana pꞌiñarishpami tucuita ahuantarca. Chashna jarcaringapajca ¿maimantataj fuerzasta charirca? Davidca paipaj churi Absalón paita huañuchisha nijpimi Salmo 3-taca quillcarca. Chai punllacunallapitajmi Simei runapish Davidtaca maipish cachun ajarca. Shinapish Davidca mana pꞌiñaringapajmi fuerzasta charirca. Chaipajca ¿imatataj rurarca? Salmo 3:4-pica David Yaya Dios ayudanapi confiashcatami ricuchin. Chaipica: “Mandaj Diostaca ñuca shimihuan caparishpami mañarcani, paica cutichihuarcami” nircami. Shujtajcuna ñucanchijta mana alli tratajpica David shinami Diosta mañana canchij. Shinami Dios paipaj espíritu santota cujpi shujtajcunata ahuantai pudishun. Tapurishunchij, “¿shujtajcuna ñucanchijta mana alli tratajpi ama chashnallataj tigrachingapajca jarcarinchijchu? ¿Paicunata perdonanata yachanchijchu? ¿Ñucanchij ima llaquita apacushcata Jehová Dios ricushpa ayudanata crinchijchu?” nishpa. w18.09 pág. 7 párrs. 16, 17

Huillacushpaca siempremi shujtajcunamanta preocuparij, respetotapish charij cana canchij. Chaipajca ñucanchij causan lado gentecuna ima shina cashcatami alli rijsina canchij. Yuyarishunchij, ñucanchijcuna huasin huasin huillacujpica gentecunaca mana ñucanchijta shuyacuncunachu. ¿Imamanta? Paicunaca mana paicunapaj huasiman shamuchun ñucanchijta invitashcachu. Chaimantami paicuna asha libre cai horas o ñucanchijhuan parlana munaita chari horas visitana canchij (Mateo 7:12). Por ejemplo, ñucanchij huillan ladocunapica ¿gentecunaca sábado o domingotaca punllayashcatachu jatarinata yachancuna? Chashna cajpica puntaca callecunapi o carritocunahuanmi huillai tucunchij. Mana cashpaca ñucanchij revisitacuna ña jatarishcata yachashpaca paicunatami visitai pudinchij. Gentecunaca ura janaj ocupadomi causancuna. Chaimantami utcalla parlana canchij (1 Corintios 9:20-23). Paicuna ocupado cajta respetajpimi cutin visitajpica ñucanchijta uyanata munangacuna. Huillacushpa espiritupaj granota ricuchishpaca ‘Dioshuan trabajajcuna’ cashcatami ricuchishun. Jehová Diosca ñucanchijta cachashpami shujtaj gentecuna paipajman cꞌuchuyachun ayudanga (1 Corintios 3:6, 7). w18.09 págs. 31, 32 párrs. 15-17

¿Manso shungu canaca ima shinataj cushilla cachun ayudan? Huaquin gentecunaca ñaupaca sinchi shungumi carcacuna. Shinallataj pihuanpish litunacujllacuna, pitapish llaquichijcunami carca. Pero Diospaj Shimimanta alli yachashpami paicunapaj causaita cambiashpa “mushuj runata” rurashca shina tucushcacuna. Cunanca paicunaca shungumanta cꞌuyajcuna, llaquijcuna, humildecuna, manso shungucuna, mana utca pꞌiñarijcunami can (Colosenses 3:9-12). Chaimantami shujtajcunahuan alli apanacuncuna, cushilla causancuna. Bibliapica chashna manso shungu gentecunami Dios cusha nishca allpataca chasquingacuna ninmi (Salmo 37:8-10, 29). ¿Manso shungucunaca ima layataj Allpataca chasquingacuna? Ungidocunaca jahua pachapi sacerdotecuna, mandajcuna shina cashpami chasquingacuna (Apocalipsis 20:6). Cutin jahua pachaman rina esperanzata mana charijcunaca cai Allpapi huiñaita causashpami chasquingacuna. Paicunaca jucha illaj cashpami cushilla, sumajta causangacuna. w18.09 pág. 17 párrs. 8, 9

Jehová Diosmi tucuimanta yalli alli uyanata yachan (Génesis 18:32; Josué 10:14). Por ejemplo, ¿Éxodo 32:11-14-mantaca imatataj yachanchij? Moisés imata yuyashcataca Jehová Diosca mana uyanata minishtircachu. Pero pai imata nisha nishcata parlachunmi saquirca. ¿Ñucanchijca, ñaupacunaman pandarij runa parlajpica mana pꞌiñarishpachu uyanchijman? ¿Paipaj nishcacunatapish ruranchijmanchu? Jehová Diosca paipi tucui shunguhuan crishpa mañajcunataca mana pꞌiñarishpami uyan. Yuyashun, Jehová Diosca mana jatun tucushpami tucuicunata uyanata yachan. Por ejemplo, Abraham, Raquel, Moisés, Josué, Manoa, Elías y Ezequías imata nishcataca paica allimi uyarca. Chaimanta: “¿Manachu ñucapish shujtajcunata alli uyanata yachana cani? ¿Huauqui panicunata valorashcata ricuchingapajca paicunata uyanichu? ¿Paicuna ima nishcata pudishpaca cazunichu? ¿Congregacionpi o familiapi pi paicunata uyachun minishtinchu? ¿Paicunata ayudangapajca imatataj rurai tucuni?” nishpami tapurina canchij (Génesis 30:6; Jueces 13:9; 1 Reyes 17:22; 2 Crónicas 30:20). w18.09 págs. 6, 7 párrs. 14, 15

Mitsa gentecunapaj chaupipi causacushcamantami imatapish cuj canaca sinchi canga. Pero Jesusca ishqui mandamientotami yachachirca. Puntaca Jehová Diosta tucui shunguhuan, tucui almahuan, tucui fuerzahuan cꞌuyana cashcatami nirca. Qꞌuipaca quiquinta shinallataj projimotapish cꞌuyana cashcatami nirca (Marcos 12:28-31). Diosta cꞌuyajcunaca pai shinami casha ninchij. Jehová Diospish Jesuspish imatapish mana mitsashpa cujcunami can. Chaimantami ñucanchijtapish paicunapaj ejemplota catishpa cushilla causachun nincuna. Ñucanchij tiempohuan, fuerzahuan Diosta alli sirvishpa, shujtajcunahuanpish mana mitsacuna cashpaca Yaya Diostami jatunyachinchij. Shinami ñucanchijpajpish shujtajcunapajpish allita rurashun. Quiquinca ñachari shujtajcunata ayudacungui. Huauqui panicunatacarin ashtahuan allichari ayudacungui (Gálatas 6:10). Mana shaicushpa ayudashpa catijpica paicunaca cantaca cꞌuyanga, pagui ningacunami. Ñucanchijpish cushillami sintirishun. w18.08 pág. 20 párrs. 19, 20

Jehová Diospajca ima shimita rimaj cashpapish, maijan llajtamanta cashpapish, ima raza cashpapish tucuicunami igual canchij. Paita manchashpa allita rurajcunataca tucuicunatami chasquin (Gálatas 3:26-28; Apocalipsis 7:9, 10). Ñucanchijca cai cierto cashcatami yachanchij. Pero ñahuillata ricushpa juzgaj gentecuna causan lugarcunapi o familiapichari huiñarcanchij. Chaimantami tucuicunata igual tratanchijmi nishpapish, shungu ucupica paicunamanta yalli cashcata yuyai tucunchij. Pedro ima tucushcata yuyarishun. Paica Yaya Dios tucuicunata chasquij cashcata shujtajcuna intindichunmi ayudarca. Pero tiempohuanca shungu ucupi shujtajcunata yalli sinticushcatarajmi ricuchirca (Gálatas 2:11-14). Shinashpaca ¿ima shinataj shujtajcunata ñahuita ricushpalla juzganata saquishun? Shungu ucupi shujtajcunata yalli cashcata sintishpa caticushcata yachangapajca ¿imatataj rurai tucunchij? Diospaj Shimita yachashpami ñucanchij ima shina cashcata ricurina canchij (Salmo 119:105). Alli amigocunatapish, “¿ñucaca shujtajcunamanta yalli cashcata sintishpa caticunichu?” nishpami tapui tucunchij (Gálatas 2:11, 14). Achca huatacunatachari shujtajcunata yalli cashcata sintishcanchij. Chaimantami chashna sintishpa caticushcataca mana cuentata cunchij. w18.08 págs. 10, 11 párrs. 5, 6

“¿Diosta tucui shunguhuan sirvicushcatachu ricuchini? ¿Testigo de Jehová cashcataca mana manchashpachu shujtajcunaman huillani?” nishpami tapurina canchij. Jehová Dios ñucanchijta agllashca jahua paita sirvij cashcata huillanata pinganayachijpica llaquillami sintiringa (Salmo 119:46; Marcos 8:38). Huaquin testigocunaca cai pachapaj espirituta o ruraicunatami catincuna. Chaimantami Diosta mana sirvijcunamanta chꞌican cashcataca mana ricuchincuna (1 Corintios 2:12). Cai pachapaj espirituta catijcunaca paicunapaj munaicunallapimi yuyancuna (Efesios 2:3). Por ejemplo, alli churarinamanta consejocunata cushca jahuami huaquincunaca maipish cachun churarincuna. Maijancunaca pegaricuj ropacunata o aliriyacuj ropacunatami churarincuna. Tandanacuicunamanpish chashna churarishcami rincuna. Shujtajcunaca ajchatapish maipish cachunmi rurarincuna (1 Timoteo 2:9, 10). Chaimantami Diosta sirvijcuna cashcata o mana sirvijcuna cashcata ricunaca shujtajcunapajca mana fácil canga (Santiago 4:4). w18.07 pág. 23 párrs. 11, 12

¿Imamantataj huauqui panindij shina canchij? Adanpaj huahuacuna cashcamantami huauqui panindij shina canchij (Hechos 17:26). Shinallataj ñucanchijca Jehová Diostaca shuj yayata shinami ricunchij. Chaimantami huauqui panindij shina canchij (Mateo 12:50). Ashtahuancarin cꞌuyanacushcamanta, sinchi feta charishcamantami Diospaj familia shina tandalla causanchij. Apostolcunapish Jesusta catijcunaman cartacunata cachashpaca ‘ñucanchij huauquicuna’ nishpami tratajcuna carca (Romanos 1:13; 1 Pedro 2:17; 1 Juan 3:13). Jesusca apostolcunaman huauqui panicuna shinami cana canguichij nishca huashaca humildecunami cana canguichij nircami (Mateo 23:11, 12). Apostolcunaca huaquinpica jatun tucushca cashcamantami paicunapura chꞌicanyarircacuna. Shinallataj chai punllacunapica gentecunapish paicunapaj razamantami jatun tucushcacuna carca. Achca judiocunapish Abrahampaj huahuacunami canchij nishpami shujtajcunamanta yalli cashcata sintircacuna. Pero Bautizaj Juanca paicunamanca: “Diosca, cai rumicunatapish Abrahampaj huahuacuna cachun rurai tucunmi” nircami (Lucas 3:8). w18.06 pág. 11 párrs. 8, 9

Problemacuna ricurijpi o shujtajcuna ñucanchijta cutin cutin pꞌiñachisha nijpica ¿jarcarishunchu? ¿Alli yuyashpachu rimarishun? (Proverbios 10:19; Mateo 5:22). Ñucanchijta pꞌiñachijpipish Jehová Diospaj maquipimi saquina canchij (Romanos 12:17-21). ¿Ima shinataj chaitaca rurashun? Diostami ricurana canchij. Paimi problemacunata ima hora allichinataca yachan. Chaicamaca pacienciahuanmi shuyana canchij. Pero ñucanchijraj chashnallataj tigrachishpaca Diosta mana respetacushcatami ricuchishun. Jehová Dios paipaj organizacionman mushuj mandashcacunata cujpica utcami cazuna canchij. Ñaupa shinami rurana cani nishpaca mana atirinachu canchij (Hebreos 13:17). Shinallataj “quillcachishcapi nicushcata” ama yalli mirachingapajmi cuidadota charina canchij (1 Corintios 4:6, NVI ). Chashnami Jehová Diosta ricuracushcata ricuchishun. w18.07 págs. 13, 14 párrs. 17, 18

Dios mandashcacunaca imata ruranata o imata mana ruranatami ricuchin. Cutin Bibliapi tiyaj yuyaicunaca imatapish alli yuyarishpa rurangapajmi can. Espiritualmente ashtahuan sinchi tucushpami Bibliapi tiyaj yuyaicunaca valishca cashcata ricushun. Huahuacunapi yuyashun. Huahuacunaca mana allicunahuan tandanacushpa llaquicunata charinataca mana intindincunachu. Chaimantami yaya mamacunaca paicunata cuidangapaj imata ruranata mandan (1 Corintios 15:33, QC, 1989). Pero, huahuacuna huiñashpaca Bibliapi tiyaj yuyaicunatami ashtahuan intindincuna. Chashnami alli amigocunata agllancuna (1 Corintios 13:11; 14:20). Ñucanchijpish Bibliapi tiyaj yuyaicunapi ashtahuan yuyashpaca alli concienciatami charishun. Chashnami imatapish Jehová munashca shina rurashun. Jehová Dios munashca shina alli decisioncunata agllangapajca achca ayudacunatami charinchij. ¿Imamantataj chaita ninchij? Dios mandashcacuna, Bibliapi tiyaj yuyaicunaca ‘tucui imatapish allita rurangapaj’ preparado cachunmi ayudan (2 Timoteo 3:16, 17). w18.06 págs. 19, 20 párrs. 14, 16, 17

Shuj samaritano runa tucui laya gentecunata cꞌuyai tucushcatami Jesusca ricuchirca. Judiocuna chai ejemplota catichunmi Jesusca munarca (Lucas 10:25-37). Jesús manaraj jahua pachaman rishpaca: “Jerusalenpi, tucui Judeapi, Samariapi, cai pachapi tiyaj tucui llajtacunapi huillanguichij” nishpami paita catijcunataca mandarca (Hechos 1:8). Pero paicunaca chashna huillangapajca shujtajcunamanta yalli cashcataca mana sintinachu carca. Ñaupa punllacunamanca Jesusca mana judiocuna alli shunguta charishcatami huillarca. Chaita yachashpami Jesusta catijcunaca tucui laya gentecunaman huillanaman rinalla carca. Por ejemplo, shujtaj llajtamanta soldadocunata mandaj Diospi tucui shunguhuan crishcatami Jesusca parlarca (Mateo 8:5-10). Cutin Nazaretpi cashpaca Sarepta pueblomanta shuj viudata, Siria llajtamanta Naamán runatapish Dios ima shina ayudashcatami Jesusca huillarca (Lucas 4:25-27). Jesusca mana shuj samaritana huarmillamanchu Diospaj Shimita huillarca. Ashtahuanpish shujtajcuna yachana munaita charijta ricushpami ishqui punllata Samaria pueblopi saquirirca (Juan 4:21-24, 40). w18.06 págs. 11, 12 párrs. 10, 11

Apóstol Pabloca ñucanchijtaca shuj macanacuj soldadohuanmi chꞌimbapurarca. Ñucanchijca gentecunahuanca mana macanacucunchijchu. Ashtahuanpish Diablohuan, millai angelcunahuanmi macanacucunchij. Paicunaca achca huatacunata macanacucushcamantami alli macanacujcuna can. Chaimantami ñucanchijpajca chai macanacuita mishanaca sinchi ricuringa. Ashtahuantajca jovencunapajmi mishanaca sinchi ricurin. ¿Jovencunaca Diablota, millai angelcunatapish mishai pudingachu? Ari mishai pudincunami. Jehová Dios fuerzata cujpimi mishashpa caticuncuna. Ashtahuanpish alli soldadocuna shinami jovencunaca “Dios cushca tucui macanacunata” churarishcacuna (Efesios 6:11, 12). Pablo chai chꞌimbapuraita nishpaca Roma llajtapi caj soldadocuna macanacunaman ringapaj ima shina churarij cashcatami yuyarishcanga (Hechos 28:16). w18.05 pág. 21 párrs. 1, 2

Diosta jatunyachingapaj, paipaj shutita alli nishca cachunmi huillana canchij (Juan 15:1, 8). Pero Diospaj shutica chuya, mapa illajmi can. Paipaj shuti ashtahuan chuya, mapa illaj cachunca imata mana rurai tucunchijchu. Pero profeta Isaiasca: ‘Cancunaca Jehová Diosllata jucha illajmi cangui nichij’ nircami (Isaías 8:13). ¿Diospaj shuti alli nishca cachunca imatataj rurana canchij? Diospaj shutilla tucuimanta yalli chuya, jucha illaj cashcatami intindina canchij. Shinallataj shujtajcunamanpish chaitami huillana canchij. Ashtahuancarin Jehová Dios cꞌuyaj, llaquij cashcata, shamuj punllacunapipish imata ruragrishcata huillashpami paipaj shutita jatunyachishun. Chashnami Diablo yangamanta Jehová Diosta juchachicushcata ricuchishun (Génesis 3:1-5). Chashnallataj tucuita ruraj Diosta alli nina cashcata gentecunaman intindichishpami Diospaj shutita jatunyachinchij (Apocalipsis 4:11). w18.05 pág. 10 párrs. 3, 4

Joven, Jehová Diosca canmanca tucuita cushpami cꞌuyaita ricuchishca. Canta cꞌuyashcamanta agradicishcata ricuchingapajca paitami ashtahuan sirvina cangui. Joven, Jehová Dios canmanta imallata rurashcata yuyari. Paimi canmanca causaita, congregacionpi huauqui panicunata cushca. Paita rijsichunpish Bibliatami cushca. Shamuj punllacunapicarin shuj sumaj causaitapishmi canmanca cusha nin. Tucuita cushcamanta agradicingapajca, Diospaj munaitarajmi rurana cangui. Shinami paipaj alli amigo tucungui. Diosta tucui shunguhuan sirvingapaj esforzarishpaca paipaj ñaupajpica allimi ricuringui. Paica cambaj tucui alli rurashcacunatami ricucun. Apóstol Pabloca: ‘Diosca cashcata ruraj cashcamantaca, cancunapaj rurashcacunata paipaj shutipi cꞌuyaihuan trabajashpa ricuchishcataca manataj cungaringachu’ nircami (Hebreos 6:10). Jovencitocuna, cancuna uchilla cashpapish Diosta ashtahuanmi sirvi tucunguichij. ¿Diosta ashtahuan sirvingapajca imatataj canca rurasha ningui? (Filipenses 1:10, 11). w18.04 pág. 28 párrs. 5, 6

Roma mandashca llajtacunapi causaj gentecunaca paicunapaj leycunamanta, derechocunamantapishmi jatun tucushca sintirijcuna carca. Achca esclavocunata sinchita trabajachishpami Roma llajtaca jatun, sinchi tucurca. Shuj tiempoca chai llajtapica casi 30% gentecunami esclavocuna carca. Chaimantami chai punllacunapica esclavo shina causacushcamanta cacharichishca canamanta casi tucui gentecuna, Jesusta catijcunapish preocuparishpa parlanacujcuna carca. Apóstol Pabloca mana huatashca shina causanamantami achcata escribirca. Chai tiempopica achca gentecunaca problemacunata, llaquicunatami allichisha nishpa purijcuna carca. Pero Jesusta catijcunaca mana chaita rurarcacunachu. Chaipaj randica Diospaj Mandanamanta, Jesús ñucanchijmanta huañushcamanta yachachingapajmi esforzarircacuna. Pabloca huatashca shina ama causangapaj imata rurana cashcatami ricuchirca. w18.04 págs. 9, 10 párrs. 1, 2

Huañungapaj ashalla horascuna faltajpimi Jesusca cai shimicunata Pedrota nirca. Pedroca, Jesusta punta catijcunapajca shuj sinchi pilar shinami tucurca (Gálatas 2:9). ¿Imamantataj chaita ninchij? Pedroca Pentecostés fiestapipish, qꞌuipa punllacunapipish mana manchashpami Diosmanta parlarca. Chashnami huauqui panicunata animarca. Achca huatacunata Diosta sirvishca qꞌuipaca huauqui panicunaman shuj cartata escribishpaca cashnami nirca: ‘Cai asha quillcata quillcashpami cancunapajman cachani. Caita quillcashpaca, Dios cancunata mana cꞌuyaipajta cꞌuyashcata yuyachishpami, chai cꞌuyaimantaca amataj anchurichun animani’ nircami (1 Pedro 5:12). Pedro escribishca cartacunaca tauca huatacunatami Jesusta catijcunataca achcata animashca. Cunan punllacunapipish Dios cusha nishcacuna pajtaringacama shuyashpa catichunmi Pedropaj cartacunaca animashpa catin (2 Pedro 3:13). w18.04 págs. 17, 18 párrs. 12, 13

Maipi cashpapish gentecunaca mana huatashca shina causanatami mashcancuna. Gentecunaca cacharichishca cangapajmi parocunata rurancuna. Leycunatapish cambiasha nincuna. Pero, ¿paicuna munashcata rurai valishcacunachu? Mana. Chaipaj randica ashtahuan llaquicuna, huañuicunami tiyashca. Chaicunata ricushpami rey Salomón nishcacuna pajtarishcata crinchij. Paica: “Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” nircami (Eclesiastés 8:9). Cai punllapaj versopi nishcata Santiagoca cushilla causangapaj imata ruranatami yachachin. Jehová Diosca ñucanchijcuna cushilla causangapaj imata minishtishcataca allimi yachan. Chaimantami paica ‘cashcata ruraj mandashcata’ curca. Diosca Adán Eva ama huatashca shina sintirichun ashtahuanpish cushilla causachunmi tucuita curca. w18.04 págs. 3, 4 párrs. 1-3