Febrero

Jesús llaquij, cꞌuyaj cashcatami gentecunaca ricurca. Chaimantami pai Diospaj Gobiernomanta huillajpica uyanata munarcacuna. Ñucanchijpish Jesús shina cashunchij. Chashnami gentecunaman Bibliamanta huillacushpaca paicunata ashtahuan ayudai tucushun. ¿Gentecunata llaquishpa predicangapajca imatataj rurana canchij? Paicuna ima shina sintirishcata, imata yuyashcatami yachana canchij. Shinallataj ñucanchijta ima shina tratachun munashca shinami tratana canchij (Mateo 7:12). Cada uno imata minishtishcapi yuyashunchij. Predicacushpaca mana tucui gentecunamanchu chaillatataj huillana canchij. Ashtahuanpish cada unopaj causai ima shina cashcatami intindina canchij. Chaimi paicuna imata minishtishcata yachashpa Diospaj Shimihuan huillashun. Gentecuna imata crishcata, imata yuyashcata yachangapaj tapuicunatami rurana canchij (Proverbios 20:5). Chai laya tapuicunata rurashpami paicuna imata minishtishcata yachashun. Chaimi Jesús shina llaquishpa Bibliamanta ima shina huillanata ricushun (1 Corintios 9:19-23-ta ricui). w19.03 págs. 20, 22 párrs. 2, 8, 9

Adanpish, Evapish Jehová Dios tucuita cushcamanta mana pagui nishcatami ricuchircacuna. Pero ñucanchijca mana paicuna shina casha ninchijchu. Ashtahuanpish tucuita cushcamantami Diostaca pagui nishcata ricuchisha ninchij. Chaipajca ¿imatataj rurana canchij? Bautizarinami canchij. Chashnami Jehová Dioslla ima alli cashcata, ima mana alli cashcata agllana derechota charishcata ricuchinchij. Chashnallataj paita cꞌuyashcata, paipi confiashcatami ricuchinchij. Bautizarishca qꞌuipaca mana ñucanchij munaita rurashpachu catina canchij. Yaya Diospaj munaita rurashpami catina canchij. Pero maipica mana facilchu can. Chashna jahuapish achca gentecunami Diosta sirvishpa causancuna. Diosta alli sirvishpa causangapajca ¿imatataj rurana canchij? Bibliata alli yachashpami catina canchij. Huauqui panicunahuanpish imallatapish rurangapaj tandanacunami canchij. Shujtajcunamanpish ñucanchijta cꞌuyaj Yaya Diosmantami parlana canchij (Hebreos 10:24, 25). Chashnallataj Jehová Dios paipaj Shimipi, paipaj organizacionpi ima nishcata uyashpami imatapish alli agllana canchij (Isaías 30:21). Chashnami alli, cushilla causashun (Proverbios 16:20). w19.03 pág. 7 párrs. 17, 18

Jehová Diosca ñucanchijmanca tandanacuicunahuan, revistacunahuan, Internetpi tiyaj paginacunahuanmi yachachin. ¿Manachu shuj revistata liyicushpa o shuj conferenciata uyashpaca caitami uyanata minishticurcani nishcanchij? O ¿JW Broadcasting® nishca canalpi shuj programata ricushpaca manachu chaillatataj nishcanchij? ¿Chaicunata cushcamanta Diosta pagui ningapajca imatataj rurana canchij? (Colosenses 3:15). Tucui punllacunami Diosta mañacushpaca pagui nina canchij. Diosta agradicishcata ricuchingapajca ñucanchij Tandanacuna Huasicunatami limpio, ordenado charina canchij. Chaipajca siempremi limpiana, allichina canchij. Shinallataj equipo de sonidopi cajcuna, videocunata churajcunaca paicuna utilizaj aparatocunatami cuidana can. Tucuita alli charijpimi Tandanacuna Huasicunataca ña mana tanto allichina tucunga. Ashtahuancarin muyundij Allpapi Tandanacuna Huasicunata rurangapaj, allichingapajmi cullquipish tiyanga. w19.02 pág. 18 párrs. 17, 18

Job runaca Allpata, cielota, pꞌuyucunata ricushpa, truenocunata uyashpaca mancharishpami saquirij carca. Shinallataj chaicunapimi cutin cutin yuyaj carca (Job 26:7, 8). Ashtahuancarin Dios rurashcacunamanta ashallata yachashcatami cuentata curca. Jobca Jehová Dios imalla yachachishcacunatapish achcatami valoraj carca. Chaimantami: “Paipaj shimihuan yachachishcaca achcamari valishca” nirca (Job 23:12, NM ). Job runaca Dios rurashcacunata ricushpa mancharishcamanta, paita respetashcamantaca ¿imatataj rurarca? Diosta ashtahuan cꞌuyashpami tucui causaipi cazunata munarca. Ñucanchijpish Job shinallatajmi Dios rurashcacunapi cutin cutin yuyana canchij. Cunan punllacunapica ñucanchijca Dios rurashcacunamantaca Jobta yallimi yachanchij. Chashnallataj Diosta alli rijsingapajca entero Bibliatami charinchij. Diosmanta ashtahuan yachashpaca paitaca ashtahuanmi cꞌuyashun, respetashun. Chaimi paipaj ñaupajpi ima pandata mana ruranata munashun (Job 28:28). w19.02 pág. 5 párr. 12

Gobiernocunaca achca huatacunatami Diosta sirvijcunata llaquichishcacuna. ¿Imamanta? Ñucanchij leyta mana cazuncunachu nishpami llaquichincuna. Pero mana chashnachu can. Runacunata cazunapaj randi, Taita Diosta cazushcamantami llaquichincuna (Hechos 5:29). ¿Ima shinataj llaquichincuna? Ñucanchijmanta burlarishpami asincuna, macancuna, hasta carcelpi churancuna. Pero chashna llaquichijpipish Jehová Dios ayudahuanca mana chashnallataj tigrachinchijchu. Ashtahuanpish tranquilomi sintirinchij. Cunanca quimsa hebreo jovencunapi yuyashunchij. Ananías, Misael y Azariastaca Babilonia llajtamanmi aparcacuna. Cai quimsa jovencunaca Babilonia llajtata mandaj rurashca diosta imamanta mana adorasha nishcatami sumajta parlarca. Paicunaca: ‘Ñucanchij Mandaj Jehová Diosmi quishpichinga, mana chai rato quishpichijpipish paitami cazushun’ nircacunami (Daniel 3:1, 8-28). ¿Cai quimsa jovencunamantaca imatataj yachacunchij? Ñucanchijtapish Jehová Diosmanta caruyachisha nishpachari llaquichisha nincuna. Chaipica cai jovencuna shinami humildes cana canchij. Jehová Diosllataj cuidana cashcatapishmi crina canchij (Salmo 118:7). Shujtajcuna ñucanchijta yangamanta juchachijpipish mana pꞌiñarishpami respetohuan cutichina canchij (1 Pedro 3:15, NM ). Ashtahuancarin imapish Jehovamanta caruyachichunca manataj saquinachu canchij. w19.02 págs. 10, 11 párrs. 11-13

Mana manchaj cangapajca Jesús paipaj causaita cushcamanta huiñai causaita charinapimi yuyana canchij (Juan 3:16; Efesios 1:7). Jesús huañushcata agradicingapajca asha semanacuna faltajpirajmi pai imamanta huañushcata cutin cutin yuyarina canchij. Shinallataj chai semanapaj versocunatami liyina canchij. Chashnami Jesús huañushcata yuyarina tandanacuipica tandapish, vinopish imata ricuchishcata alli intindishun. Yaya Diospish Jesuspish ñucanchijpaj imallata rurashcata yachashpaca ñucanchij crishcacunami ashtahuan sinchiyanga. Jatun llaqui punllacunapipish mana manchashpami ahuantashpa catishun (Hebreos 12:3). Jesús huañushcata yuyarina tandanacuica Jesús humilde cashcata, mana manchaj cashcatami ricuchin. Chaimantami Jesustaca achcata agradicinchij. Paimantami Diospajman cꞌuchuyashpa quishpiri tucunchij (Hebreos 7:24, 25). Jesús ñucanchijmanta paipaj causaita cushcata agradicingapajca pai huañushcata yuyarina tandanacuitami cada huata rurana canchij (Lucas 22:19, 20). w19.01 págs. 22-24 párrs. 8, 10, 11

Tucuicunami Yaya Diostaca alabai tucunchij. Ñucanchij comentariocunaca Diosman shuj sacrificiota cushca shinami can. Chashna sacrificiocunataca mana pi ñucanchijpaj randi cui tucunchu (Hebreos 13:15). ¿Jehová Diosca shujtajcuna layallataj comentariota cuchunchu munan? Mana. Tandanacuicunaca amigocunahuan shuj micuita preparacushca layami can. Huauqui panicuna micunaman invitajpica mana chushaj maquilla rinchijmanchu. Ashtahuanpish imallatapish apashpami rinchijman ¿nachu? Chaipajca huauquicuna munashca micunata apangapajmi esforzarinchijman. Tandanacuicunapica Jehová Diosmi micunaman invitacuj shina can. Paica sumaj micunacunata cuj shinami alli yachaicunata ñucanchijman cushca (Salmo 23:5; Mateo 24:45). Pero mana Diospaj micunallata micucuj shinachu cana canchij. Ashtahuanpish chai micunapimi shujtajcunapaj imallatapish churana canchij. Chaimanta alli comentariocunata cungapaj esforzarishunchij. w19.01 págs. 8, 13 párrs. 3, 20

Ñaupa tiempopica gentecunaca yanga dioscunata adoraj cashcata ricuchingapajmi huainayajcuna carca (Oseas 4:13, 14). Huainayanata munashcamantami achca gentecunaca yanga dioscunata adorarcacuna. Pero mana cushilla sintirijcunachu carca. Davidca, “nanaicunami jahuanpi shamunga” nircami. Chai gentecunaca yanga dioscunamanmi paicunapaj huahuacunata rupachishpa cujcuna carca (Isaías 57:5). Pero Jehová Diosca chai ruraicunataca manataj ricunayachijchu carca (Jeremías 7:31). Cunan punllapica panda religioncunaca gentecuna huainayajpica mana imata nincunachu. Cꞌaripura o huarmipura huainayajpipish mana imata nincunachu. Chaimantami gentecunaca ñaupa tiempopi layallataj causancuna (1 Corintios 6:18, 19). Gentecunaca chashna causashpaca libresmi canchij nincunami. Pero nanaicunataca jahuanpi jahuanpimi charincuna. Canca chaitachari cuentata cushcangui. Chaimantami Yaya Jehová Diosta uyana cangui. Paita cazuna tucuimanta yalli alli cashcatapishmi tucui shunguhuan crina cangui. Shinallataj shuj ratolla mana alli cosascunata rurashcamanta jatun llaquicunata charina cashcataca mana cungarinachu cangui (Gálatas 6:8). w18.12 pág. 25 párrs. 16-18

Diosta sirvij cusa o huarmi shujtajhuan huainayajpica mana culpata charijca shuj decisiontami agllana can. Jesusca mana culpata charijca divorciarishpa shujtajhuan cazarai tucunmi mana cashpaca perdonai tucunmi nircami (Mateo 19:9). Chaita ruranaca mana juchachu can. Bibliapica Oseasca paipaj huarmita cutin huasiman apashcatami huillan. Chai punllamantami cai huarmica shujtaj cꞌarihuan mana chayarina carca. Oseashuanpish shuj tiempotami mana chayarircacuna (Oseas 3:1-3, nota, nwt-E). Pero qꞌuipaca chayarinacurcami. Caica Jehová Dios paipaj pueblota cutin chasquishpa alli tucusha nishcatami ricuchirca (Oseas 1:11; 3:4, 5). ¿Caimantaca imatataj yachacunchij? Mana culpata charij paipaj cusahuan o huarmihuan catinata decidishpa, shinallataj paihuan cutin chayarinata decidishpaca perdonashcatami ricuchin (1 Corintios 7:3, 5). Chaita rurashpaca ña imamanta mana divorciari tucunchu. Ashtahuanpish chai punllamantami matrimoniotaca Dios ricushca shina ricungapaj ishquindij esforzarina can. w18.12 pág. 12, párr. 13

Bibliamanta yachacushpaca qꞌuipa punllacunapi ima decisionta agllagricushpa Diospaj yuyaicuna ima shina ayudanatami yuyarina canchij. Shinami ima ruraipi utca decidina cajpica preparados cashun. Josepi yuyashun. Potifarpaj huarmica Josehuanmi siririsha nirca. Pero paica chai ratomi chai huarmimanta caruyarca. Chashnami Joseca Jehová Dios matrimoniota ima shina ricuj cashcata yuyaipi charishcata ricuchirca (Génesis 39:8, 9). Shinallataj cai huarmimanca Joseca: “Ñucaca maitataj jatun millaita rurashpa, Taita Diosta pꞌiñachishpa juchallishari” nircami. Chashna nishpaca Diospaj yuyaita charishcatami ricuchirca. Cunanca ñucanchijpi yuyashun. Trabajopi o escuelapichari compañerocunaca ñucanchijhuan asirishpa pugllai callarin. Mana cashpaca ñucanchij celularmanchari huainayanahuan chagru fotota cachan o mensajeta quillcan. Chaipica ¿imatataj rurashun? Chai tentacioncunata Yaya Dios ima shina ricushcata yuyarishca cashpa, pai shina yuyashca cashpa, shinallataj imata ruranata ña yachashca cashpaca Diosta cazunaca jahuallami canga. w18.11 pág. 30 párrs. 13, 14

Huaquin Bibliamanta yachaj gentecunaca cai versomanta parlashpaca Habacuc runaca Dios nishcacunata uyashpaca cushicushpa, muyushpa bailasha nishcatami ricuchin nincunami. Cai versoca ñucanchijmanca achcatami yachachin. Diosca shamuj punllacunapi imata rurasha nishpallaca mana saquirinchu. Ashtahuanpish pai nishcacunataca ñallami pajtachinga. Habacuc libropica Jehová Diospi confiana importante cashcatami yachachin (Habacuc 2:4). Paipi confiashpa catingapajca ñucanchij crishcacunatami sinchiyachina canchij. Chaipajca punta, Diostami punllanta mañashpa tucui ñucanchij preocupacioncunata huillana canchij. Ishqui, Bibliapi imalla yachachishcacunata, Diospaj organización imalla nishcacunatami uyashpa cazuna canchij. Quimsa, pai nishcacunata pajtachingacamaca tucui shunguhuan crishpa, pacienciahuanmi shuyana canchij. Habacuc runaca chaitami rurarca. Callaripica Dioshuan parlanacushpa dimastij preocupado cashcatami ricuchirca. Pero ultimotaca animarishpami cushilla sintirirca. Habacuc runa shina cashunchij. Chashnami Jehová Diosca shuj yaya shina paipaj rigra ucupi ugllacushcata sintishun. Paillami cai millai mundopi ñucanchijtaca animai tucun. w18.11 pág. 20 párrs. 18, 19

Juan 3:16-pi ima nishcata yuyarishpapishmi Jehová Dios ñucanchijta cꞌuyashcataca yachanchij. Chaipica: “Taita Diosca, cai pachapi causajcunataca yallitaj cꞌuyashpami, paipaj shujlla Churita cacharca. Pipish paita crijca ama chingarishpa, ashtahuanpish huiñai causaita charichunmi cacharca” ninmi. Jesusca paipaj causaita cushpami ñucanchijta achcata cꞌuyashcata ricuchishca. Bibliapica ima llaquicunapish “Cristopaj cꞌuyaimantaca” manataj caruyachingachu ninmi (Romanos 8:35, 38, 39). Caita yachashpami ñaupajman catinata munanchij. Huaquinpica ima problemata charishcamantami yuyaipipish cuerpopipish shaicushca sintirinchij. Diostapish ña mana tanto cushilla sirvishpa catisha ninchij. Pero Jesús ñucanchijta cꞌuyashcata yuyarishpami chai llaquicunata ahuantangapajca fuerzasta charishun (2 Corintios 5:14). Jehová Diostapish allimi sirvishpa catishun, huañuna munaitapish mana charishunchu. Shinallataj terremoto o jatun acapana shamujpi, pi ñucanchijta llaquichijpi, ima ruraicunapish mana ñucanchij munashca shina llujshijpi, yallimana sustarishca cashpapish Jesús cꞌuyashcata yuyarishpami ahuantashpa catishun. w18.09 pág. 10 párrs. 8, 9

Mana llullapi puringapajca Dios yachachishcacunatami tucuipi cazuna canchij. Paitami punta lugarpi churashpa causana canchij. Mana llullaj shimipi puringapajca David shinami decididos cana canchij. Mana chaita rurashpaca Diospaj Shimita yachangapaj imata saquishcapimi yuyai tucushun. Ashtahuancarin imallata saquishcata tigra charinatami munai callarishun. Ñucanchijca Dios yachachishcacunamanta caitaca cazushami pero caishujtaca mana cazushachu nishpaca mana agllai tucunchijchu. ¿Imamanta? ‘Tucui imatapish cashcata rurashpami’ causana canchij (Juan 16:13, QC, 1989). Dios yachachishcacunata ama saquingapajca ñucanchij tiempotami alli utilizana canchij. Mana cuidarishpaca diversioncunapi, Internetpi, televisionpimi yallitaj dedicari tucunchij. Caita rurana mana malo cajpipish Bibliata estudiangapaj, Diospajta rurangapajmi tiempota quichui tucun. w18.11 pág. 11 párrs. 7, 8

Ñucanchij causaipica maipica mana pensashca cambiocunami tiyai tucun. Chaimantami sustarishca o yuyaipi shaicushca sintiri pudinchij (Proverbios 12:25). Chashna cambiocuna tiyajpimi chaicunata pajtachinaca sinchi cai tucun. ¿Pero ama yalli sustarishpa, tranquilo cangapajca imataj ayudanga? (Salmo 131:1-3). Cunan punllacunapica sinchi problemacunatami chari tucunchij. Shina cajpipish ‘Diospaj sumaj causai’ ñucanchij yuyaicuna tranquilo cachun ayudaj cashcatami ricui tucunchij (Filipenses 4:6, 7). Chaimanta dimastij sustarishca cashpaca Diosta ayudahuai nishpa mañashunchij. Shinami Diospaj sumaj causaica paita alli sirvishpa, ama shaicurishpa catingapaj fuerzata cunga. Diospaj espirituca ama yallitaj sustarishca cachun ayudashpapish, alaja versocunata yuyarichunmi ayudan. Chaicunami ñucanchij causaipi ima ashtahuan importante cashcata yuyarichun ayudan (Juan 14:26, 27). w18.10 págs. 22-24 párrs. 2, 5, 8

¿Imataj ashtahuan gentecunata dañota rurashca? Llullana. Chaica ima mana cierto cashcata yachashca jahua shujtajcunata pandachingaraicu imatapish nina nisha ninmi. Punta llullata nijca Diablomi can. Jesuspish: Diabloca “llullapaj yayami” nircami (Juan 8:44). ¿Ima horataj punta cutin llullarca? Edén huertapimi achca huaranga huatacuna huashaman Diabloca chaita rurarca. Adán Evaca Dios cushca paraisopimi sumajta causacurcacuna. Pero Yaya Diosca “allita mana allita yachaj” chayachij yuramantaca ama micunguichijchu nishpami mandashca carca. Chaita mana cazushpaca huañunami carcacuna. Shinapish caita yachashca jahuami Satanás Diabloca shuj culebrata rimachishpa Evataca: “Cancunaca mana huañunguichijchu” nishpa punta cutin llullarca. “Ashtahuanpish chai yuramanta micushpaca cancunapaj ñahuicuna pascarijpi Taita Dios shina tucunata, allitapish, mana allitapish yachaj tucuna cashcatamari Taita Diosca yachan” nircami (Génesis 2:15-17; 3:1-5). w18.10 pág. 3 párrs. 1, 2

Ñucanchij shungu chuya cachunca ñucanchij yuyaicuna, ñucanchij munaicunapishmi chuya o limpio cana can. Chaita ruranaca minishtirishcami can. Chaimi Jehová Diosca ñucanchij adoracionta chasquinga (2 Corintios 4:2; 1 Timoteo 1:5). Jehová Diosca: “Ñuca ñahuita ricushpaca, pi mana causai tucungachu” nircami (Éxodo 33:20). Shinashpaca, ¿imamantataj Jesusca chuya shungucunami Diostaca ricungacuna nirca? Griego shimimanta “ricuna” nishca shimica “ricushca shina yuyana, intindina, rijsina” nisha ninmi. Shinashpaca Jehová Diosta ricunaca pai ima shina cashcata intindina, pai cꞌuyaj, llaquij, mana utca pꞌiñarij cashcata valorana nisha ninmi (Efesios 1:18). Jehová Diostaca pai ima shina ñucanchij causaipi ayudacushcata yuyarishpapishmi ricui pudinchij (Job 42:5). Shinallataj shamuj punllacunapi sumaj bendicioncunata cusha nishcapi yuyarishpapishmi paita ricui pudinchij. Chai bendicioncunataca limpio causaita charijcunaman, paimanta manataj caruyajcunamanmi cusha nin. w18.09 págs. 18, 19 párrs. 13, 15, 16

Ima alli cashcata yachashpa chaitataj rurashpaca achca bendicioncunatami charishun. Yachaisapa cangapajca mana imatapish yachashpallachu saquirina canchij. Ashtahuanpish alli decisioncunata agllashpami yachaisapa cashcataca ricuchinchij. Bibliapica añangucunapishmi “yachaisapa” cancuna ninmi. Paicunaca “usya punllacunapimi micunataca sumajta tandancuna” (Proverbios 30:24, 25). Cristoca “Diospaj yachaipishmi” can. Paica siempremi Diospaj munaita ruran (1 Corintios 1:24; Juan 8:29). Humildes cangapaj esforzarijcunata, allita ruranata agllashpa yachaisapa cashcata ricuchijcunatami Jehová Diosca bendician (Mateo 7:21-23). Chaimanta, humildes cangapaj esforzarishunchij. Shinami huauqui panicuna congregacionpi Diosta humildadhuan sirvichun ayudashun. Ima alli cashcata yachashpa rurangapajca tiempo y pacienciami minishtirin. Pero chaita rurashpallami humildes cashcata ricuchishun. Cunan punllacunapipish shamuj punllacunapipish cushillami causashun. w18.09 pág. 7 párr. 18

Jehová Dios gentecunata rurashpaca paihuan trabajachunmi munarca. Juchayujcuna cashpapish Diosta sirvijcunaca paihuanmi tucui punllacuna trabajai tucunchij. Por ejemplo, Bibliapica huillashpa, Jesusta catijcunata rurashpaca “Diospajta paihuan rurajcunami canchij” ninmi (1 Corintios 3:5-9). Tucuita ruraj Diosca chai importante trabajota rurachunmi ñucanchijta agllashca. Chaica shuj jatun bendicionmi can. Shinallataj shujtaj layapishmi Dioshuan trabajai tucunchij. Ñucanchij familiacunata, huauqui panicunata ayudashpami Dioshuan trabajai tucunchij. Shinallataj shujtajcunaman pozadata cushpa, Diospaj organizacionpi trabajashpa, Diosta ashtahuan sirvishpami paihuan trabajanchij (Colosenses 3:23, NM ). Shinapish cada unomi chꞌican chꞌican cashcata yuyarina canchij. Ñucanchij causai, edad, salud, ruraicunapish chꞌican chꞌicanmi can. Chaimantami Diospaj imata rurai tucushcallata ricuna canchij. Ñucanchij ruraicunata shujtajcunapaj ruraicunahuanca mana comparanachu canchij. w18.08 pág. 21 párrs. 1, 2

Jehová Diosca cambaj tapushcacunata cutichishatajmi nishpa Habacucta cushichirca. “Ñucapi shunguta churashpa pacienciahuan shuyai. Qꞌuipayaj shina ricurijpipish cutichishami” nicuj layami carca. Diosca pai nishcacuna shuj punlla pajtarinatami yuyachirca. Shinallataj shuyashpa catichunmi animarca. Ñucanchijpish Jehová Diosllataj pai nishcacunata pajtachichunca pacienciahuanmi shuyana canchij. Pai nishcacunatapish allimi uyana canchij. Shinami ima problemacuna ricurijpipish Diospi confiashun, shungu ucupipish tranquilo sintirishun. Jesusca “ima huata, ima punlla pajtarinata” Dios mana huillajpipish mana dimastij sustarinachu canchij nircami (Hechos 1:7). Jehová Dios pai agllashca horaspi imata ruranatami tucui shunguhuan crina canchij. Chaipajca mana shaicunachu canchij. Ashtahuanpish pacienciahuan humilde shunguhuanmi shuyana canchij. Diospi feta charishcatapishmi ricuchina canchij. Chaicamaca pudirishcahuanmi Diosta sirvishpa catina canchij (Marcos 13:35-37; Gálatas 6:9). w18.11 pág. 18 párrs. 13, 14

Pedroca judiocunapurapi huiñashcamantami mana judío gentecunataca mana allita shina ricuj carca. Shinapish huaquin cosascuna pasashcamantami Pedroca cambiashca carca. Por ejemplo, paica shuj muscuita shinami charishca carca (Hechos 10:9-16). Ñucanchijpish chashna sintishpa caticushcata yachangapajca huauqui panicunatami ayudahuai nishpa mañana canchij. Pero, ¿imatataj ashtahuan rurai tucunchij? Shujtajcunata shungumanta cꞌuyashpaca paicunataca mana yangata shina ricushunchu (2 Corintios 6:11-13, NVI ). ¿Ñucanchij llajtamanta cajcunallahuan, ñucanchij shimita parlajcunallahuanchu tandanacunata yachanchij? Shina cashpaca tucui laya huauqui panicunahuan apanacunata yachashunchij. Paicunataca ñucanchijhuan huillanaman, ñucanchij huasipi micunaman o shujtaj huauqui panicunahuan shuj rato pasachunmi invitanalla canchij (Hechos 16:14, 15). Chaita rurashpaca tiempohuanca ashtahuanmi cai huauqui panicunataca cꞌuyashun. Paicunata yangata shina ricuna yuyaitaca mana charishunchu. w18.08 págs. 10, 11 párrs. 3, 6, 7

Huaquin testigocunaca cai mundopaj espirituta saquishpa Diosta alli sirvijcuna cashcataca mana ricuchincunachu. Por ejemplo, fiestacunaman rishpaca pinganayajtami bailancuna. Mana alli fotocunata, mana alli comentariocunatapishmi internetpi churancuna. Chaimanta, Diosta alli sirvingapaj esforzaricujcunapajmi mana alli ejemplo can (1 Pedro 2:11, 12). Cai mundoca aicha munaicunallapi, ñahui ricushca munaicunallapi, charinacunallapi yuyachunmi munan (1 Juan 2:16). Pero ñucanchijca Diospajllami canchij. Chaimantami ‘millai munaicunata’ saquishpa, ‘alli yuyaihuan cashcata rurashpa, Diosllata sirvishpa’ causana canchij (Tito 2:12). Ñucanchijca rimanapi, micunapi, ubyanapi, churanapi, trabajanapipish Diosta alli sirvijcuna cashcatami siempre ricuchina canchij. w18.07 pág. 24 párrs. 13, 14

Diosta ricurashpa causashpaca shujtajcuna mana allita rurajpipish mana pꞌiñarinachu canchij. Pꞌiñarishpa mana allita rurashpaca Diosmantami caruyashun. Cai yuyaicunataca Moisés shina Diospaj organizacionpi ima responsabilidadta charijcunami ashtahuan yuyaipi charina can. Shinapish Diosta cazungapajca cada unomi esforzarina canchij. Chashnami quishpiri pudishun (Filipenses 2:12). Ashtahuan responsabilidadcunata charijpica Diosca ashtahuan alli ejemplota ricuchichunmi munan (Lucas 12:48). Jehová Diosta tucui shunguhuan cꞌuyajpica paimanta ni ima mana caruyachingachu (Salmo 119:165; Romanos 8:37-39). Llaqui punllacunapimi causacunchij. Chaimantami jahua pachapi caj Jehová Diosta ricuranaca importante can. Paita ricurashpallami paipaj munai maijan cashcata yachashun (Salmo 123:1). Shujtajcuna mana allita rurajpipish Dioshuan alliapanacunataca manataj saquishunchu. w18.07 pág. 14 párrs. 19, 20

Jehová Diospaj puebloman achcacuna shamucushcata yachashpaca achcatami cushicunchij. Caita ricushpami Diosta sirvijcuna luz shina achijyachicushcata yachanchij. 2017 huatapica 10 millones gentecunamanmi Diospaj Shimita yachachircanchij. Shinallataj achca gentecunami Jesús huañushcata yuyarina tandanacuiman shamurcacuna. Chai tandanacuipica Jehová Dios ñucanchijta cꞌuyashcamanta paipaj Churita cushpa quishpichishcatami yacharcacuna (1 Juan 4:9). Diospaj pueblopica huauqui panicunaca tucui laya shimicunatami rimanchij. Chashna cashpapish tucuicunami Yaya Diostaca tandalla alabanchij (Apocalipsis 7:9). Chaimanta, chꞌican chꞌican shimicunata rimashpapish maipi causashpapish ‘cai pachapi achijyachijcuna’ cashunchij (Filipenses 2:15). Ñucanchijca paimanta huillashpa, tandalla causashpami Jehová Diosta alabacushcata ricuchinchij. Shinallataj Dios agllashca punlla shamunata chaparashpami paitaca jatunyachinchij. w18.06 pág. 21 párrs. 1-3

Jesucristoca samaritana huarmihuan unitami parlanacurca. Paipajca micunatapish yallica Diospaj munaita rurana, paimanta huillanami ashtahuan importante carca (Juan 4:32-34). Jesús imata yachachisha nishcataca Santiago, Juanpish mana intindircacunachu. Shuj cutinca Jesusca paita catijcunahuanmi Samaria llajtata pasacurcacuna. Dormingapaj saquirishun nishpami samaritanocunata pozadata mañarcacuna, pero pozadataca mana mañachircacunachu. Chaimantami Santiagopish Juanpish jahua pachamanta nina shamushpa paicunata huañuchichun Jesusta mañarca. Pero Jesusca ama chashna yuyachunmi sinchita rimarca (Lucas 9:51-56). Santiago, Juanpish Galilea llajtamantami carca. Chai llajtapi paicunata chashna tratashca cajpica mana tanto pꞌiñarinmanchu carcacuna. Ashtahuanpish Santiago, Juanca shujtajcunamanta yalli cashcata sintishpami chashna pꞌiñarishcacuna canga. Qꞌuipa punllacuna samaritanocunaman Diospaj Shimita huillanaman Juan rijpica achcacunami uyarca. Chaimantami Juanca pai ñaupa ima shina pꞌiñarishcata yuyarishpa pingarishca canga (Hechos 8:14, 25). w18.06 pág. 12 párrs. 12, 13

Bibliapi yachachishcacunata cazushcamantami siempre verdadta nina canchij. Pero, ¿llullanaca imamantataj mana alli can? Satanasmi llullanata yachan. Chaimantami ñucanchijpish llullashpaca llaquicunata charishun, shujtajcunatapish llaquichishun (Juan 8:44). Juchayujcuna cashpapish nunca mana llullangapajmi esforzarina canchij (Efesios 4:25). Caita ruranaca maipica sinchi layami ricurin. 18 huatata charij Abigailca: “Llullashpaca ima problemacunamantapish ratomi llujshi tucunchij. Chaimantami verdadta ninaca mana minishtirishca laya ricurin” ninmi. Pero, ¿imamantataj mana llullanata yachana canchij? 23 huatata charij Victoriapish: “Ñucanchij crishcacunata difindijpi, imatapish mana llullajpica compañerocunaca llaquichinatami munancuna. Pero mana llullashpaca mana imata manchashunchu, Diospajmanpish ashtahuanmi cꞌuchuyashun, shujtajcunapish respetangacunami” ninmi. Chaimanta, mana llullahuan sinchita chumbillirishca shina cashunchij. w18.05 pág. 22 párrs. 3, 5

Llaquicuna, problemacunaca ashtahuanmi miraricun. Chaimantami ashtahuan rijcharishca shina causana canchij. Jehová Diosca pai agllashca punllataca chayachimungatajmi (Mateo 24:42-44). Chai punllataca pacienciahuanmi chaparashpa shuyana canchij. Chaipajca Bibliatami cada punlla leyina canchij. Diosta mañanatapish manataj saquinachu canchij (1 Pedro 4:7). Shinallataj achca huatacunata Diosta sirvijcunamantami yachai tucunchij. Diosta sirvishpami ocupado causana canchij. Shujtajcunapajpish allicunatami rurana canchij. Huauqui panicunahuan pasangapajpish tiempotami llujchina canchij. Chashnami cushilla causashun. Tiempopish rato pasacuj layami ricuringa (Efesios 5:16). Imapi pandarijlla cajpipish Diosca paita sirvichunmi saquin. Paita sirvishpa catichunca Diosca ancianocunatami shuj regalota shina cushca (Efesios 4:11, 12). Ancianocunaca Bibliamantami alli consejocunata cun. Chaimantami shuj anciano visitanaman shamushpa consejota cujpica alli uyana canchij. w18.06 págs. 24-26 párrs. 15-18

Jesusca paita catijcunataca ñuca cꞌuyaipi catichij nircami. ¿Imamantataj chashna nirca? Diosta sirvingapajca ahuantana cashcamantami chashna nirca. Juan 15:4-10-pica Jesusca achca cutinmi “catichij” nirca. Shina nishpaca llaquicuna shamujpipish Diosta sirvijcunaca ahuantana cashcamantami parlacurca. Jesuspaj cꞌuyaipi catisha nishcata, paipaj ñaupajpi alli ricurisha nishcataca ¿ima shinataj ricuchinchij? Paitami cazuna canchij. Jesusca ñucanchijpish pai rurashca layallataj imatapish rurachunmi mañan. Chaimantami paica: ‘Ñuca Yaya mandashcacunata cazushpami paipaj cꞌuyaihuan shujlla cani’ nirca (Juan 15:10). Dios mandashcacunata ima shina cazunataca Jesusllatajmi shuj alli ejemplota ricuchishpa saquirca (Juan 13:15). Jesusca paipaj Yaya munashcatami rurachun mandan (Mateo 17:5; Juan 8:28). Chaimantami pai mandashcata cazushpa huillanaman rinchij. Shinami Jehová Diostapish Jesustapish cꞌuyashcata ricuchinchij. Chaita rurajpica paicunapish ñucanchijtaca cꞌuyashpami catinga. w18.05 págs. 10, 11 párrs. 5-7

Joven cashpaca imata estudianata, maipi trabajanatami decidina cangui. Shinallataj shujtaj importante decisioncunatami agllana cangui. Causaipi imata ruranata alli yachashpaca decisioncunata agllanaca cambajca jahualla canga. Chaimantami Diosta ashtahuan sirvingapaj can churashca metacunata utca pajtachina cangui. Shinami cambajllataj alli cashcata cuentata cungui. Mundo enteropimi achca jovencunaca Diosta tucui shunguhuan sirvicuncuna. Chaimantami felicitana canchij. Cai jovencunaca imata agllagricushpaca Jehová Diostami yuyaipi charincuna. Rey Salomonca: “Mandaj Diospi cambaj tucui shunguta churangui. Imata rurangapajpish, Diosta yuyaipi charingui. Paimi cantaca alli ñanta pushanga” nircami (Proverbios 3:5, 6). Jovencuna, Jehová Diosca cancunataca achcatami cꞌuyan. Chaimantami cancunataca cuidacun, bendiciacun. w18.04 págs. 28, 29 párrs. 7, 9

Apóstol Juanca Jesusta punta catijcunapajca shuj sinchi pilar shinami tucurca. Paica Jesús imalla rurashcatami escribirca. Pai escribishca libroca Bibliapica Juan shutillatajmi can. Chai libropi Jesusmanta escribishcacunaca Jesusta catijcunataca tauca huatacunatami achcata animashca. Cunan punllacunapipish ñucanchijta animashpami catin. Por ejemplo, Jesusca caishuj chaishuj cꞌuyanacushpami ñuca catijcuna cashcata ricuchinguichij nircami. Chai shimicunaca Juan librollapimi tiyan (Juan 13:35). Juanca quimsa cartacunatapishmi escribirca. Chai cartacunapica shujtaj valishca yachaicunami tiyan. Por ejemplo, huaquinpica ñucanchij pandarishcamanta llaquillami sintirinchij. Shinapish 1 Juan 1:7-pica ‘Jesucristopaj yahuarmi, ñucanchij tucui juchacunataca pꞌichan’ ninmi. Chaita liyishpaca ¿manachu alli sintirinchij? Cutin pandarishcamanta arrepintirishpapish, shungupi mana alli sintirishpaca 1 Juan 3:20-pi nishcata liyishpaca ashtahuan allimi sintirinchij ¿nachu? Cai versopica: ‘Dioscarin ñucanchij shungutapish yallimi’ ninmi. Shinallataj Juanllami “Diosca cꞌuyajmari” nishpa escribirca (1 Juan 4:8, 16). 2 Juan y 3 Juan cartacunapica Diosta sirvishpa catijcunatami felicitan (2 Juan 4; 3 Juan 3, 4). w18.04 págs. 18, 19 párrs. 14, 15