Enero

Ñucanchijcunaca ima shina huillanataca allimi yachana canchij. ¿Imamanta? Diospaj punllaca ñallami chayamucun. Chaimantami cai mandashcataca alli pajtachisha ninchij (2 Timoteo 4:5). Pero achcata predicanata munashpapish huaquinpica sinchimi ricurin. Huaquin ruraicunami ñucanchij tiempota, fuerzata quichun. Por ejemplo, familiata mantiningapajca achca horascunatachari trabajana canchij o paicunatami cuidana canchij. Huasipipish shujtaj ruraicunapichari ocuparinchij. Mana cashpaca yuyajlla, ungushca, yallitaj llaquillachari canchij. Jesusca tucuicuna achca horascunata mana huillai tucushcataca allimi yacharca (Mateo 13:23). Chaimantami mana tanto huillai tucushpaca mana llaquirina canchij. Pero yuyarishunchij, tucui shunguhuan Diospaj Shimita huillangapaj esfuerzota rurajpica Yaya Diosca cushillami sintiringa (Hebreos 6:10-12). w19.04 págs. 2, 3 párrs. 1-3

Diabloca llullacunata nishpami Jehová Diospaj shutita yangapi churan. Paica Yaya Dios millai cashcata yuyachunmi munan. Chaimantami Diabloca, Diosca huañushcacunataca ucu pachapimi llaquichicun nishpa llullan. Pero Diosca cꞌuyajmi can (1 Juan 4:8). Paica tucui mana alli ruraicunatami pꞌiñan (Jeremías 19:5). Diosmanta achca llullacunata Diablo nijpica ¿ima shinataj sintirinchij? Jehová Dioscarin ¿ima shinashi sintiringa? Jesús ñucanchijmanta degana huañushcata crichunmi Diabloca munan (Mateo 20:28). Jesusca paipaj causaita cushpami ñucanchijtaca achcata cꞌuyashcata ricuchirca (Juan 3:16; 15:13). Shinapish Diabloca, gentecuna huañujpica almaca causashpami catin ninmi. Chai cierto cajpica ñami huiñai causaita charinchijman. Jesús ñucanchijmanta huañuchunpish mana minishtinchijmanchu. Jesuspaj causaita Diablo mana valichishcata ricushpaca Diosca achcatami llaquirin. Jesuspish chashnallatajmi llaquilla sintirin. w19.04 págs. 14, 16 párrs. 1, 8, 9

Jesús yachachishcacunataca Mateo, Marcos, Lucas, Juan librocunapimi liyi tucunchij. Mushuj Testamentopi tiyaj shujtaj librocunatapish liyishpami Jesús ima shina yuyashcata intindishun. Cai librocunata quillcajcunaca Diospaj espíritu santota, ‘Cristopaj yuyaitami’ charircacuna. Jesús mandashcacunataca huasipi, escuelapi, trabajopi, congregacionpipishmi cazuna canchij (Gálatas 6:2). Cai mandashcacunamanta ashtahuan yachangapajca Mushuj Testamentotami liyina canchij. Chaipi imallata yachashcatapish cutin cutinmi yuyarina canchij. Jesusca paipaj Yaya yachachishcatami yachachirca (Juan 8:28). Chaimantami Jesuspaj mandashcacunata cazushpaca Jehová Diostapish cazucunchij. w19.05 págs. 3, 4 párrs. 6, 7

Diablopish, paita catijcunapish gentecunataca achcatami llaquichishca. Pero Jehová Diosca Diablo ñucanchijta llaquichicushcataca tucuitami ricucun. “Paica llaquij Yayami, tucuipi cushichij Diosmi. Paimi tucui ñucanchij llaquicunapipish cushichin. Shujtajcuna ima llaquipi cajpipish, Dios ñucanchijta cushichishca shinallataj cushichichunmi, ñucanchijtaca chashna cushichin” (2 Corintios 1:3, 4). Maijan huahuacunataca yaya mamacuna mana cuidashcamantami violashcacuna. Huaquinpicarin rijsishcacunami huahuacunata violashcacuna. Cai huahuacuna jatunyashpaca achca llaquillami sintirincuna. Chaimantami pi animachun minishtincuna. Rey Davidca Jehová Dios tucuipi cushichij cashcatami yacharca (Salmo 27:10). Paica familiacuna mana cuidajpipish Yaya Dios cuidanatami crirca. Congregacionpi huauqui panicunami ñucanchij familia shina can. Paicunatami Diosca ñucanchijta ayudachun churashca. Chaimantami Jesusca: ‘Ñuca Yayapaj munaita rurajcunaca ñuca huauqui, ñuca pani, ñuca mamami’ nirca (Mateo 12:48-50). w19.05 págs. 15, 16 párrs. 8, 9

Tucui punllacunami Bibliata estudiana canchij. Chaupi semana tandanacuipajca cunanca ashalla capitulocunatami liyina canchij. Chaimantami Bibliapi imata liyishcata yuyaringapaj, huaquin versocunamanta ashtahuan estudiangapaj tiempota charinchij. Pero Bibliata liyichun nishcallamantaca mana liyinachu canchij. Chaipaj randica Diospaj Shimi ñucanchij shunguman chayachun, Jehová Dioshuanpish alli amigo tucungapajmi liyina canchij (Salmo 19:14). Huillaj revistata estudiashpami Bibliataca alli intindishun. Chaimantami preparacushpaca cada parrafopi ricurij versocunata alli intindina canchij. Ashtahuantajca tandanacuipi liyigrishca versocunatami alli intindina canchij. Versocunapi tiyaj yuyaicunapish ima shina parrafopaj yuyaicunata apoyacushcatami ricuna canchij. Shinallataj liyishca versocunapimi cutin cutin yuyana canchij. Ñucanchij causaipipish ima shina pajtachinatami ricuna canchij (Josué 1:8). w19.05 págs. 27, 28 párrs. 5, 9

Jesuspajca Diospaj Gobiernomanta huillanami tucuimanta yalli valishca carca. Chaimi caruta rishpa achca gentecunaman huillarca. Shinallataj huasin huasin rishpa, gentecuna tiyan lugarcunapipishmi huillarca. Paipaj tucui causaipimi chaita rurarca. Jesusca ñucanchijmanca alaja ejemplotami saquishca. ¿Jesús shina huillangapajca imatataj rurana canchij? Pai shinami maipi cashpapish, ima hora cajpipish Diospaj Gobiernomanta huillana canchij. Shinallataj ashtahuan huillangapajmi huaquin ruraicunata ladoman saquina canchij (Marcos 6:31-34; 1 Pedro 2:21). Maijan huauqui panicunaca precursores especiales, regulares o auxiliaresmi tucushcacuna. Shujtajcunaca huillajcuna minishtirishca ladocunapi Diospaj Shimita huillangapajmi rincuna. Mana cashpaca shujtaj shimitami yachancuna. Pero achca huauqui panicunaca cashna shina mana huillai tucuncunachu. Chashnapish paicunaca Diospaj Shimita huillangapajmi tucuita rurancuna. Achcacuna cashcamantami tucui precursorescunata yalli mundo enteropi huillancuna. Ima laya huillajpipish Yayitu Diosca mana rurai pudishcataca mana mañanchu. w19.04 págs. 3, 4 párrs. 7, 8

Cashna nishpa tapurishunchij: ¿Envidiosochu cani? (1 Pedro 2:1). ¿Shujtaj llajtamanta cashcamanta, alli escuelacunapi estudiashca cashcamanta, cullquiyuj cashcamantachu jatun tucushca sintirini? (Proverbios 16:5). ¿Shujtaj llajtamanta gentecunata, pobrellacunataca imapaj mana valishcata shinachu ricuni? (Santiago 2:2-4). ¿Diablopaj ruraicunahuan chagrurishca cosascunatachu munani? (1 Juan 2:15-17). ¿Huainayanahuan, macanacuicunahuan chagrurishca peliculacunatachu ricunata munani? (Salmo 97:10; 101:3; Amós 5:15). Cai tapuicunapi yuyashca qꞌuipaca ñucanchij yuyaita cambiana cashcatachari cuenta japishun. Huaquinpica pihuanmi yalli apanacunchij, paicuna shinami imatapish rurai, yuyai callarinchij (Proverbios 13:20). Trabajopi, escuelapica Jehová Dios shina yuyachunca mana ayudancunachu. Pero Tandanacuna Huasipica alli amigocunami tiyan. Paicunami cꞌuyajcuna cachun, Diostapish alli sirvichun ayudancuna (Hebreos 10:24, 25). w19.06 pág. 12 párrs. 13, 14

Jehová Diosca gentecuna llaquicunata charichunca mana rurarcachu. Chaimantami maijancunaca achca llaquicunata charishpaca Job shinallataj imatapish mana yuyashpa rimarincuna (Job 6:2, 3). Pero paicunahuan coleranapaj randi, juchachinapaj randica llaquij cashcata ricuchishunchij. Huaquinpica sinchi llaquicunata charij huauqui panicunaca consejachunmi minishtingacuna (Gálatas 6:1). ¿Ancianocunaca ima shinataj ayudai tucuncuna? Paicunaca Eliú runapaj ejemplotami catina can. Eliuca manaraj consejashpami Job parlashcataca alli uyarca (Job 33:6, 7). Ancianocunapish llaquilla cajcunata alli uyanatami yachana can. Paicuna ima shina sintirishcata yachashpaca animaj shimicunahuanmi consejai tucungacuna. w19.06 pág. 23 párrs. 10, 11

Diosta sirvichun jarcasha nijpipish ¿ima shinataj paita sirvishpa catishun? Sucursalmanta huauquicunami ancianocunamanca imata ruranata huillangacuna. Pero, ¿sucursalmanta huauquicuna ancianocunahuan mana parlai tucujpica? Ancianocunaca Bibliahuan, publicacioncunahuanmi huauqui panicunata Diosta sirvishpa catichun ayudangacuna (Mateo 28:19, 20; Hebreos 10:24, 25). Jehová Diosmanta yachashpa catichunca paillatajmi ñucanchijmanca tucuita cushpa ayudanga (Isaías 65:13, 14; Lucas 12:42-44). Chaimantami pushaj huauquicuna Diosta alli sirvichun ayudanata crina canchij. Pero ñucanchijpish Diosmanta yachashpa catingapaj imata ruranatami ricuna canchij. Por ejemplo, gobiernocuna Diosta sirvichun jarcasha nijpica Bibliata, publicacioncunatami maipi alli pacanata mashcana canchij. Shinallataj tabletpi o celularpi publicacioncunata charishpaca chaicunatapish mana tucuitachu aliripi saquina canchij. Chashnami contracunaca publicacioncunata mana quichui tucungacuna. w19.07 págs. 10, 11 párrs. 10, 11

Ñaupa punllacunapica casi tucui gentecunami shuj religionta charircacuna. Pero cunan punllacunapica achca gentecunaca Diosmanta yachanata ña mana munancunachu. Huaquin llajtacunapicarin achca gentecunaca shuj religiontapish mana charincunachu (Mateo 24:12). Huaquincunaca alli causaita charinallapi, paicunapaj problemacunallapimi ocuparincuna (Lucas 8:14). Cutin shujtajcunaca Dios tiyashcataca mana crincunachu. Maijancunaca Diospimi crincuna. Pero paicunaca, “yachaj gentecuna, cientificocunaca ima religiontapish mana charincunachu, ñaupa gentecunallami religionta charircacuna” nishpami yuyancuna. Televisionpi, Internetpi, profesorcuna, amigocunapish monocunamantami shamunchij nishcatami crincuna. Paicunaca Yaya Diospi imamanta crina cashcata mana yachashcamantami evolucionpi crincuna. Cutin shujtajcunaca religionta pushajcunaca charijyana munaillatami charin nishpami paicunapi ña mana confiancuna. Shujtaj llajtacunapicarin gobiernocunaca shuj religionta charichunca mana saquincunachu. w19.07 pág. 20 párrs. 1, 2

Ñucanchijca fuerza illaj saquirishpapish ñucanchij feta sinchiyachishpami cati tucunchij. Huaquin huauqui panicunaca chaitami rurashpa causancuna (2 Corintios 4:16). Jehová Diostaca achca huatacunatachari sirvinchij. Pero cunanca ungushca cashcamantachari ña mana tanto sirvi pudinchij. Chashna sintirishpaca mana desanimarinachu canchij. Jehová Diosca ñucanchij imalla rurashcacunata yuyarishpaca cushillami sintirin (Hebreos 6:10). Paica “ñucataca ashallata cꞌuyashcamantami ashallata sirvin o achcata cꞌuyashcamantami achcata sirvin” nishpaca mana yuyanchu. Chaita yuyarishpaca Diosta sirvingapajmi tucui pudishcata rurashun. Shinami paita cꞌuyashcata ricuchishun (Colosenses 3:23). Paica ñucanchij imallata rurai pudishcataca allimi yachan. Chaimantami mana rurai pudishcataca mana mañan. Chaitaca ama cungarishunchij (Marcos 12:43, 44). w19.08 págs. 3-6 párrs. 6, 11, 12

Gentecunaca Diosta sirvijcunapaj alli ruraicunata ricushpami Diospajman cꞌuchuyai tucuncuna (Mateo 5:14,15; 1 Pedro 2:12). Cambaj cusa o huarmica manachari testigo de Jehová can. Paitaca huauqui panicunata rijsichunmi ayudai tucungui. Ashtahuanpish paita ayudangapajca tandanacuicunamanmi invitana canchij (1 Corintios 14:24, 25). Ñucanchij familiacunapish Diosta sirvichunmi shuyanchij. Pero tucui laya ayudajpipish Diosta sirvinataca manachari munangacuna. Paicuna mana munajpica ñuca culpami can nishpaca mana yuyanachu canchij. Ñucanchij crishcacunata chasquichunca mana obliganachu canchij. Shinapish Jehová Diosta cushilla sirvicujta ricushpaca Diosmanta yachanatami munangacuna. Chaimanta paicunamanta Yaya Diosta mañashunchij. Diospaj Shimitapish alli yuyashpa parlashunchij. Ayudanatapish amataj saquishunchij (Hechos 20:20). Chaita rurangapaj esforzarijpica Diosmi bendicianga. Shinallataj familiacuna ñucanchijta uyashpaca quishpiri tucungacunami. w19.08 págs. 18, 19 párrs. 15-17

¿Jesusca imatataj nisha nirca? Achca ruraicunapi ocuparinapaj randica, Diospajta ruranapi ocuparina cashcatami nisha nicurca. Jesusca Diospajta rurana yuyaillami causarca. Paipaj discipulocunamanpish chashna causachunmi yachachirca. Ñucanchijpish “Diospaj Gobiernotami punta lugarpi churana” canchij. Shinami Diospajta rurana yuyailla causacushcata ricuchishun (Mateo 6:33, NWT). Huaquin pugllaicuna, ricunacuna, uyanacunaca tiempotami quichun. Chaicunata ladoman saquishpami ashtahuan predicana canchij. Shinallataj pudishpaca ashalla horascunata trabajashpami ashtahuan predicana canchij. Chashnami gentecuna Diosta rijsichun, paita cꞌuyachun ayudashun. Ashtahuanpish Diospajta rurana yuyailla causacushcatami ricuchishun. w19.04 págs. 5, 6 párrs. 12, 13

Cunan huatacunapica, achca tiempota sirvij huauqui panicunata shujtaj Dios mingashca trabajotami chasquishca. Chai trabajota pajtachinata achcata munashcamantami shujtaj trabajota mingajpica llaquilla sintirishcacuna. Pero tiempohuanca chai mushuj trabajopimi amañarishcacuna. ¿Imamanta? Paicunaca mana shuj lugarpi Dios mingashca trabajota pajtachishcamantachu Diosta sirvincuna. Ashtahuanpish Diosta cꞌuyashcamanta, paicunapaj causaita Diosman mingashcamantami paita sirvincuna. Chaimantami amañarishcacuna (Colosenses 3:23, NWT). Cai huauqui panicunaca ima trabajota mingajpipish humilde shunguhuanmi pajtachishpa causancuna. Shinallataj Jehová Dios paicunata cuidacushcata yachashcamantami ima llaquicunatapish paiman mingancuna (1 Pedro 5:6, 7). Humildes cashpaca allimi causashun. Shujtajcunahuanpish allimi apanacushun. Humildes cashpallami problemacuna ricurijpipish jahualla chꞌimbapurai tucushun. Ashtahuancarin Jehová Diospajmanmi cꞌuchuyashun. w19.09 págs. 6, 7 párrs. 15, 17

Jehová Diosca Davidtaca paipaj familiata, Israel llajtatapish mandachunmi churarca. Rey cashcamantami achca autoridadta charirca. Pero huaquinpica imatapish mana alli decidishcamantami jatun juchacunapi urmarca (2 Samuel 11:14, 15). Shinapish Jehová Dios paita corregijpica cazurcami. Chaimantami shungumanta arrepintirishpa Jehová Diosta ayudahuai nishpa mañarca (Salmo 51:1-4). Huarmicunapish consejota cujpica humilde cashcamantami chasquirca (1 Samuel 19:11, 12; 25:32, 33). Ashtahuancarin juchacunapi ña mana urmashpami Jehová Diosta sirvishpa catirca. Paica Dios mandashcacunata cazuna alli cashcatami yacharca. Cunan punllacunapish Diosta cazujcunallami cushilla causancuna (Isaías 65:13, 14). w19.09 págs. 17-19 párrs. 15, 21

1935 huatapica testigo de Jehovacunaca yallitaj achcacuna cai Allpapi causashpapish Jehová Dios tucuita mandaj cashcata crishpa, paita cazushpaca jatun tiyarinapaj ñaupajpi shayaricushcatami cuenta japircanchij (Isaías 66:1). Shinallataj Jesús huañushcapi feta charishpaca Ovejapaj ñaupajpi shayaricushcatami cuenta japircanchij. Chaimantami yallitaj achcacuna jahua cieloman mana rina cashcata intindircanchij. Mateo 25:31, 32-pipish yallitaj achcacuna mana jahua pachaman rina cashcatami intindichin. Chai versocunapica ‘tucui mama llajtacuna’, mana alli gentecunapish Jesuspaj ñaupajpimi tandanacungacuna ninmi. Cai llajtacuna, mana alli gentecunapish mana jahua pachapichu tandanacunga, cai Allpapimi tandanacunga. Chaimantami 1935 huatapi testigo de Jehovacunaca 144 mil agllashcacunalla Jesushuan cielopi mandana cashcata intindircanchij (Apocalipsis 5:10). w19.09 pág. 28 párr. 9

Jehová Diosca panda religioncunamanta caruyachunmi mandan. Pero mana chaillatachu rurana canchij. Jehová Diostaca tucui shunguhuanmi sirvina canchij. Caita rurangapaj ishqui yuyaicunata ricushun. Puntapica, Diospaj mandashcacunatami cazuna canchij. Cai mundopi causajcunaca mapa ruraicunapimi ocuparincuna. Paicunaca cꞌaricunapura, huarmicunapurami cazarashpa causancuna. Pero Diosta sirvijcunaca cai laya mapa ruraicunataca manataj ricunayachinachu canchij (Mateo 19:4, 5; Romanos 1:26, 27). Ishquipica, huauqui panicunahuanmi Jehová Diosllata adorashpa catina canchij. Tandanacuna huasipi, huauqui panicunapaj huasipi, mana cashpaca pacalla lugarcunapimi Diosta adoranchij. Jehovapaj punlla chayamucushcamantami maipi cashpapish siempre tandanacuna canchij (Hebreos 10:24, 25). w19.10 págs. 15, 16 párrs. 6, 7

Jehová Diosca cushilla causachunmi munan. Bibliapica: “Quiquin trabajomantaca micushpa, ubyashpa cushicunamari alli” ninmi (Eclesiastés 2:24). Shinapish achca ricunacuna, uyanacuna, pugllanacunaca mana allicunami can. Chaicunapi ocuparishpaca Dios millashca cosascuna alli cashcata shinami yuyai callarishun. Caipi yuyashun. Pi yanushpachari ñucanchijtaca paihuan micuchun invitan. Paihuan micushpaca paipaj amigo cashcatami ricuchinchij. Diospaj contracunapish yanuj shinami brujeriahuan, macanacuihuan, huainayanahuan chagrushca peliculacunata, musicacunata rurashca. Paicunaca chaicunata ricuchun, uyachunmi ñucanchijta invitancuna. Chai mana alli peliculacunata, musicacunata ricushpa, uyashpaca Diospaj contracunahuan micucuj shinami canman. Pero ñucanchijca Jehová Diosllata adorashcata ricuchingapajca supaicunapaj mesamantaca mana micunachu canchij (1 Corintios 10:21, 22). Caita mana cazushpaca Yaya Diosmantami caruyashun. w19.10 págs. 26, 29, 30 párrs. 2, 11, 12

¿Barcota manejajca huaira ayudachunca imatataj rurana can? Puntapica, barcotaca maipi huaira tiyanmanmi pushana can. Ishquipica, barcopi tiyaj telacunatami alzashpa pascana can. Chaita rurajpica huairaca telacunata pꞌucushpami barcotaca pushanga. Shinallatajmi ñucanchijpish espíritu santota chasquingapajca ishqui yuyaicunata pajtachina canchij. Puntapica, huaira tiyashcaman rij shinami Diospaj ruraicunata pajtachishpa callarina canchij. Ishquipica, barcopaj telacunata alzacuj shinami Diospaj avanzashcata rurana canchij (Salmo 119:32). Jehová Diosca paipaj espíritu santota cujpimi llaquicunahuan cashpapish Paita sirvishpa catishun. w19.11 págs. 9-11 párrs. 8, 11

Jesusca huañungapaj ashalla horascuna faltajpica ¿imapitaj yuyacurca? Paipaj contracunami llaquinaita huañuchigrircacuna. Shinallataj paipaj Yayata cꞌuyashcamantami tucuipi cushichinata munarca. Chaimantami llaqui horaspi Diosta cazushpa, Diablopaj nishcacuna llulla cashcata ricuchisha nirca. Chaita rurashpa Diosta jatunyachi tucushcataca allimi yacharca. Jesusca gentecunatapish achcatami cꞌuyarca. Chaimi paicuna huiñai causaita charichunca huañuna horascama Diosta cazusha nirca. Chai tucuita yuyaipi charishpapish Jesusca tranquilomi sintirirca. Paica Diospaj ñaupajpi alli ricurishcamantami chashna tranquilo sintirirca (Filipenses 4:6, 7). Jesús charishca llaquicunataca pi mana apashunchu. Shinapish Jesusta catijcunaca shujtaj llaquicunatami charishun (Mateo 16:24, 25, NWT; Juan 15:20). Chaimantami huaquinpica Jesús shina sustarishca cashun. w19.04 pág. 8, 9 párrs. 1-3

Cunan punllacunapica Jehová Diosca alli cazuj alli yuyaiyuj sirvij huauquicunata agllashcatami ricuchin. Chaimantami Diospaj pueblo ucupi cashcamanta cushilla sintirinchij (1 Tesalonicenses 5:18). ¿Alli cazuj alli yuyaiyuj huauquicunata ayudangapajca imatataj rurana canchij? Publicacioncunata estudiashpa, tandanacuicunaman rishpami Bibliamanta yachachishcacunata pajtachina canchij. Shinallataj huillanataca manataj saquinachu canchij. Gentecunapish Jesuspaj discipulocuna tucuchunmi yachachina canchij (1 Corintios 15:58). Jehová Diospaj ñaupajpipish alli ricuringapajmi tucuipi cazuna canchij. Shinallataj paita cꞌuyashcamanta, agradicishcamantami sirvina canchij. Dios agllashca huauquicunatapishmi ayudana canchij. Tucui caicunata rurashpaca Jehová Diosta shungumanta sirvicushcatami ricuchishun. w19.11 pág. 25 párrs. 17, 18

Jesusca paita catijcuna milagrocunata ruranamantaca mana parlacurcachu. Ashtahuanpish paicuna tucui llajtacunapi achca huatacunata huillana cashcatami parlacurca. Shuj trabajota charishpaca cashna nishpa tapurishunchij: ¿Alli trabajaj cashcatachu rijsincuna? ¿Mingashca trabajotaca allichu pajtachini? Chashna cajpica ñucanchij jefeca ñucanchijpimi confianga. Compañerocunapish Diosmanta huillajpica uyasha ningacunami. Shinallataj: ¿Gentecunaca Diospaj Shimimanta alli yachachij cashcatachu rijsincuna? ¿Gentecunata visitangapajca allichu allichirini? ¿Diosmanta yachasha nijcunataca utcachu visitani? ¿Tucui laya predicanapichu siempre participani? nishpa tapurishunchij. Caicunata alli pajtachicushpaca cushillami huillashpa catishun. w19.12 págs. 5, 7 párrs. 14, 15

Cazarashcacunaca huahuacunata ima hora charinata, mashna huahuacunata charinatami parlanacuna can. ¿Cai minishtirishca yuyaicunamantaca ima horataj parlanacuna can? Manaraj cazarashpami huahuacunata charinata o mana charinataca parlanacuna can. Shinallataj huahuacunata huiñachingapaj listos cashcatami ricuna can. Huahuacunata cuidangapajpish achca tiempo, fuerza minishtirishcatami yuyana can. Chaimantami huaquin cazarashcacunaca huahuacunata charingapajca shuj o ishqui huatacunata shuyancuna. Chashnami paicunaraj alli rijsinacushpa causanata yachancuna. w19.12 pág. 23 párrs. 4, 5

Muyundij Allpapica achca huauqui paicunami tucui laya llaquicunahuan chꞌimbapuracuncuna. Maijancunaca paicunapaj cꞌuyashca familia o amigo huañushcamantami llaquilla sintirincuna. Shujtacunaca paicunapaj familia o cꞌuyashca amigo Diosta sirvinata saquijpimi llaquilla sintirincuna. Cutin huaquincunaca terremoto, jatun acapana tiyashcamantami llaquilla sintirincuna. Cashna llaquicunata charijcunaca paicunata ayudachunmi minishtincuna. Alli horaspi cajpi, llaqui horaspi cajpipish manataj saquinachu canchij. Alli amigocunaca tiempohuan, fuerzahuanmi llaquilla cajcunata ayudancuna. Por ejemplo, Pedromanta paipaj huarmi Katherinemanta parlashun. Pani Katherineca: “Congregacionmanta shuj cusa huarmimi ñuca cusata doctorpajman pusharcacuna. Chaipimi doctorca Pedrotaca huañuchij ungüimi japishca nirca. Chaita yachaj chayashpapish cai cusa huarmica cancunataca tucuipimi ayudashun nircacunami. Paicunaca cunancamami ayudashpa caticushcacuna” ninmi. Ñucanchijta alli amigocuna llaqui horaspi ayudajpica cushillami sintirishun. w20.01 págs. 8-10 párrs. 1, 5, 6

Huata 33 Pentecostés punllapica 120 discipulocunami shuj altibajo huasipi carcacuna. Can chai discipulocunapurapi cashpaca espíritu santota chasquishcamantami Yayitu Dios jahua pachapi mandachun agllashcataca tucui shunguhuan cringuiman (Hechos 2:5-12). ¿Pero Diosca tucuicunatachu chai shinallataj agllan, mana cashpaca chai horallatajchu agllan? Mana. Puntaca Jesushuan mandagrijcunata Dios ima horas agllashcata ricushun. Chai punllapica Diosca 120 discipulocunata agllashca huashami 3.000 discipulocunata agllarca. Cai 3.000 discipulocunaca bautizarishcahuanmi jahua pachapi mandangapaj Diospaj espíritu santota chasquircacuna (Hechos 2:37, 38, 41). Pero asha huatacuna qꞌuipaca mana tucuicunachu bautizarishcahuan Diospaj espíritu santota chasquircacuna. Por ejemplo, samaritanocunataca bautizarishca qꞌuipami Jesushuan jahua pachapi mandachun Jehová Diosca agllarca (Hechos 8:14-17). Cutin Corneliota, paipaj familiataca manaraj bautizarijpimi jahua pachaman richun agllarca (Hechos 10:44-48). w20.01 págs. 20, 21 párrs. 2-4

Mateo, Marcos, Lucas y Juan librocunapica casi 165 cutinmi Jesusca Diostaca “Yaya” nishpa cayarca. Jesusca Jehová Dios cꞌuyaj Yaya cashcata tucui gentecuna yachaj chayachunmi paimantaca achca cutin parlarca (Juan 17:25). Jesusta Jehová Dios ima shina tratashcata yachashpami pai cꞌuyaj cashcata intindinchij. Diosca Jesús imalla mañashcata uyashpami cutichirca (Juan 11:41, 42). Chaimantami Jesusca ima llaquicunata charishpapish Yayitu Dios ayudanataca tucui shunguhuan crirca (Lucas 22:42, 43). Jehová Diosca Jesusta tucuipi ayudashpami cꞌuyaj Yaya cashcata ricuchirca (Mateo 26:53; Juan 8:16). Shinapish Jesús llaquicunata charijpica Jehová Diosca mana tucuita anchuchircachu. Ashtahuanpish llaquicunata ahuantachunmi ayudarca. Chaimantami Jesusca cai llaquicuna ashacamalla tiyana cashcata yacharca (Hebreos 12:2, NWT). Jehová Diosca paipaj Churitaca ima nishcata uyashpa, imalla minishtishcacunata cushpa, yachachishpami paita cuidarca (Juan 5:20; 8:28). w20.02 págs. 3, 5 párrs. 6, 7, 9

Shuj costumbrepi participanata o mana participanata agllacushpaca shujtajcunapimi yuyana canchij. Ashtahuancarin ñucanchij huauqui panicunapimi yuyana canchij. Ñucanchij culpamanta Diosmanta caruyachunca mana munanchijchu (Marcos 9:42). Diosta mana rijsijcunapaj costumbrecunatapish respetanami canchij. Paicunapaj crishcacunamantapish mana burlarinachu canchij. Respetohuan parlajpica ñucanchijtapish respetohuanmi tratangacuna. Chashnami Diospaj shutita jatunyachishun. Ñucanchij familiacunaman, vecinocunaman testigos de Jehová cashcata huillashunchij (Isaías 43:10). Manaraj jatun llaqui tiyajpimi ñucanchij crishcacunataca familiacunaman parlana canchij. Chashnami huañui tiyajpica panda costumbrecunapi participachunca mana obligangacuna. Ñucanchij crishcacunamantaca mana manchashpami parlanalla canchij (Romanos 1:16). w19.04 págs. 17, 18 párrs. 14-16

12 apostolcunaca Jesús cai Allpapi huillacujpica paihuanmi carca. Pero apóstol Pabloca Jesús causarishca qꞌuipami Jesusta cati callarirca. Qꞌuipaca Diosca Pablotaca mana judiocunapaj apóstol cachunmi agllarca. Chashna cashpapish 12 apostolcunapuramantaca paica mana carcachu (Romanos 11:13; Hechos 1:21-26). Shinapish Pabloca 12 apostolcuna Jesushuan alli apanacuj cashcamantami paicunataca mana envidiarca. Ashtahuanpish Dios mingashcataca cushillami pajtachirca. Humildecuna cashpaca Yayitu Dios ima trabajota mingajpipish cushillami pajtachishun. Shinallataj Dios churashca pushaj huauquicunatapishmi respetashun (Hechos 21:20-26). Pushaj huauquicuna juchayujcuna cajpipish Jehová Diospajca shuj valishca regalomi can (Efesios 4:8, 11, NWT). Paicunata cazushpaca Jehovapaj amigocunami tucushun. Huauqui panicunahuanpish allimi apanacushun. w20.02 págs. 17, 18 párrs. 13, 14

Manaraj testigo de Jehovacunahuan estudiashpachari Bibliataca valichij carcangui. Shinallataj Jesustapishmi cꞌuyaj carcangui. Cunanca Testigocunahuan Bibliata estudiai callarishcamantami paicunahuan alli apanacungui. Caicunata rurashpapish bautizarina munaitaca manaraj pajtachinguichu. Ashtahuanpish Diosta shungumanta cꞌuyashpallami bautizarinata munangui. Jehovata tucui shunguhuan cꞌuyashpaca ima jarcajpipish paita sirvinatami agllangui. Bautizarishca huashapish paimantaca manataj caruyanguichu. Jesusca: “Taita Diostaca tucui shunguhuan, tucui almahuan, tucui yuyaihuan, tucui fuerzahuan cꞌuyangui” nircami (Marcos 12:30). Canca ¿ima shinataj paita cꞌuyanata, respetanata yachangui? Dios canta cꞌuyashcata yuyarishpami paitaca cꞌuyangui, respetangui. w20.03 pág. 4 párrs. 4, 5

Diosta sirvingapaj imata rurana cashcata ricushunchij. Jehová Diosta, gentecunatapish cꞌuyashcamantami huillanchij, yachachinchij. Shinallataj Diosmanta huillashpami paita tucui shunguhuan sirvicushcata ricuchinchij (Marcos 12:30, 31; Colosenses 3:23). Pero Diosca mashna horascunata paipaj obrata ruracushcataca mana ricucunchu. Ashtahuanpish imamanta paita sirvicushcatami ricucun. Diosta sirvingapajca tucui ñucanchij fuerzatami cuna canchij. Diosmanta huillanami tucuimanta yalli valishca can. Chaimantami tucui gentecunaman Diospaj Shimimanta huillana canchij. Diospaj Shimita huillanata munashpapish manachari achca tiempota charinchij. Shinapish chaita ruranatami tucui shunguhuan munanchij. Chaimantami alli huillajcuna cangapaj esforzarinchij, Diospaj obratapish apoyanchij. w19.04 págs. 2, 3, párrs 3, 4, 6

Diablopaj llullacunata crishpami achca gentecunaca llaquilla, manchaihuan causancuna. Maijancunaca shuj huahua huañujpica: “Jahua cielopi shuj angelito faltashcamantami Yayitu Diosca apan” nincunami. Caita uyashpami yaya mamacunaca ashtahuan llaquilla sintirincuna. Ñaupa punllacunapica huaquin catolicocunami paicunapaj crishcacunahuan mana de acuerdo cajpica llaquichijcuna, rupachijcuna carca. Paicunaca: “Ucu pachapi ima shina rupachishca canata ricuchingapajmi chashna ruranchij. Chaimi paicunaca tal vez arrepintiringacuna” nijcunami carca. Cutin shujtaj gentecunaca huañushcacunatami adorancuna o bendicionta cuchunpish mañancuna. Shujtajcunacarin almacuna ama llaquichichun nishpami imatapish rurancuna. w19.04 págs. 14, 16 párrs. 1, 10