Febrero

Bibliapica allita rurana canguichij nishpaca, Dios munashca shina tucuita rurana cashcatami nisha nicun. Shinallataj imata rurashpapish ñahuita ricushpallaca mana ruranachu canchij. Jesusca siempremi allita ruraj carca. Religionta pushaj judiocunaca shujtaj llajtamanta cajcunata, mana estudiashcacunata, huarmicunatapishmi pꞌiñajcuna carca. Pero Jesusca tucuicunatami alli trataj carca. Chaimantami shujtaj llajtacunamanta gentecuna paipi crijpica ayudaj carca (Mateo 8:5-10, 13). Paica charijcunamanpish, pobrecunamanpish, tucuicunamanmi yachachirca (Mateo 11:5; Lucas 19:2, 9). Shinallataj huarmicunatapish respetohuan, allimi trataj carca (Lucas 7:37-39, 44-50). Ñucanchijpish Jesús shinami tucui laya gentecunata alli tratana canchij. Chaimantami charijcunaman, pobrecunaman, shujtaj religionta catijcunamanpish huillana canchij. Cꞌaricunapish huarmicunataca respetohuanmi tratana can. w19.05 págs. 2, 5 párrs. 1, 15-17

Cunan punllacunapish ancianocunaca Bibliahuanmi llaquilla cajcunata cushichincuna. Mana ancianocunallachu llaquilla cajcunataca ayudana can. Tucuicunami caishuj chaishuj cushichinacuna canchij (1 Tesalonicenses 4:18). Diosca: “Mama paipaj huahuata cushichij shinami, ñucapish cancunataca cushichisha” nircami (Isaías 66:13). Chashna nishpami Diosca huarmicunapish shujtajcunata animai tucushcata ricuchirca. Chaimantami Diosta alli sirvij panicunaca llaquilla caj panicunata ayudana can. Ñaupa tiempocunapipish huarmicunaca shujtajcunata cushichishpami ayudajcuna carca (Job 42:11). Jehová Diosca paita alli sirvij huarmicuna llaquilla caj huarmicunata ayudajpica cushillami sintirin. Huaquinpica ancianocuna shuj pani llaquilla cajta ricushpaca Diosta alli sirvij panitami paita ayudachun mañangacuna. Llaquilla cajcuna ima shina sintirishcata mana parlasha nijpica mana tapunachu canchij (1 Tesalonicenses 4:11). w19.05 págs. 16, 17 párrs. 10-12

Jatun juchata rurajca imata rurashcataca tal vez ancianocunamanca mana huillasha ningachu. Chashna cajpica, por lo menos ishqui testigocuna tiyajpimi ancianocunaca shuj comité judicialta rurai tucuncuna. ¿Ancianocunaca imamantataj chashna rurancuna? Bibliapi mandashcata cazushpami ancianocunaca chaita rurancuna (Deuteronomio 19:15; 1 Timoteo 5:19). Juchachishca huauqui o pani mana imata rurarcanichu nijpica ancianocunaca testigocunatami uyancuna. Chai huauquita o panita juchachijmi shuj testigo can. Cutin huahuata violacujta ricujmi caishuj testigo can. Cai ishqui testigocunata uyashca huashami ancianocunaca juchata rurashcata o mana rurashcata ricushpa, comité judicialta ruranata o mana ruranata decidincuna. Mana ishqui testigocuna tiyajpica, huauquita o panita juchachijca llullacunmi nishpaca ancianocunaca mana yuyanachu can. Ishqui testigocuna mana tiyajpipish juchachishca huauqui o pani tal vez juchata rurashcatami ancianocunaca yuyaipi charina can. Chaimantami llaquilla sintirij huauqui panicunata ayudana can. Shinallataj congregacionpi pitapish ama llaquichichunmi cuidana can (Hechos 20:28). w19.05 pág. 11 párrs. 15, 16

Yaya mamacunaca huahuacuna alli estudiajcuna cachunmi yachachina can. Huahuacunaca tandanacuicunapi participangapajmi prepararinata yachana can. Shinallataj escuelapi jarcaicuna ricurijpica imata ruranatami yachana can (Hebreos 5:14). Huahuacunaca huasipimi Bibliamanta shuj temata alli yachana can. Pero, yaya mamacunaca huahuacuna mashna huatacunata charijta ricushpa, ima shina cashcata ricushpami yachachina can. Bibliamanta yachacujcunatapish alli estudiajcuna cachunmi ayudana canchij. Callaripica Bibliamanta yachachicujpi, tandanacuicunapipish paicuna señalashcallatami cutichingacuna. Pero paicunalla cashpa Bibliamanta ashtahuan estudiachun, publicacioncunapipish investigachunmi yachachina canchij. Chashnami publicacioncunapi ima shina chai problemacunata allichinata mashcangacuna. w19.05 págs. 26, 28 párrs. 2, 10, 11

Diabloca pai shina yuyachunmi munan. Chaimantami paica Diospaj mandashcacunata ama cazuchun tucui laya pandachisha nin. Diabloca: “¿Cancunataca Taita Diostajchu cai huertapi tiyaj yuracunamantaca ama micunguichij nirca?” nishpami Evataca pandachirca. Diabloca ñucanchijtapishmi pandachisha nicun (Génesis 3:1). Paica cꞌaripura, huarmipura huainayanataca allita shina ricuchunmi munan. Shinallataj cumpleaños, Navidad fiestacunata Yaya Diosca chasquinmi nishpa yuyachunmi munan. Yahuartapish gentecuna churarichunca Yaya Diosca saquinmi nishpa yuyachunmi munan. Congregacionmanta llujshichishcacunahuanpish apanacunalla cashcata yuyachunmi munan. Ñucanchij crishcacunata mana alli intindishpaca dudai callarishunmi. Shinallataj panda yuyaicunatami chari callarishun. Jehová Diosmantapishmi caruyashun. w19.06 págs. 12, 13 párrs. 15-17

Jehová Diosca ñucanchijtaca achcatami cꞌuyan (Juan 3:16). Ñucanchijpish Yayitu Dios shinami casha ninchij. Chaimantami tucuicunaman cꞌuyaita ricuchina canchij. Pero ashtahuantajca ñucanchij huauqui panicunamanmi cꞌuyaita ricuchina canchij (Gálatas 6:10). Paicunata ima llaquicuna japijpipish ayudanami canchij. ¿Cusa o huarmi illaj saquirijcunataca ima shinataj ayudana canchij? Imata ninata mana yachashpapish paicunahuan parlashunchij. Paulapaj cusaca manapish yuyashcapimi huañurca. Paica: “Gentecunaca huañuimanta parlanataca mana munancunachu. Paicunaca imata mana ni tucushunchu nishpami yuyancuna. Pero imallatapish mana nijpica ashtahuanmi llaquilla sintirini” nircami. Cusa o huarmi illajlla saquirijcunaca achcata parlachunca mana shuyancunachu. Paulaca: “Ñuca amigocunaca imallatapish nishpami ñucamanta sustarishcata ricuchircacuna. Chaita uyashpami ñucaca tranquila sintirij carcani” ninmi. w19.06 págs. 20, 23, 24 párrs. 1, 14

Contracuna ñucanchijcuna maipi tandanacushcata ama yachachunmi ancianocunaca asha ashapura tandanacuchun tal vez mandangacuna. Shinallataj chꞌican chꞌican horascunapi, lugarcunapi tandanacuchunmi agllangacuna. ¿Diosmanta huillachun gobiernocuna jarcajpica imatataj rurana canchij? Diosmanta huillanaca cada lugarcunapimi chꞌican chꞌican canga. Pero Jehová Diosta cꞌuyashcamanta, huillanatapish munashcamantami paimanta parlanataca manataj saquishun (Lucas 8:1). Emily Baran huarmica Unión Sovieticapi sirvij testigo de Jehovacunamantami parlarca. Paica: “Testigocunata gobiernocuna huillachun jarcajpica paicunaca vecinocunahuan, trabajopi compañerocunahuan, amigocunahuanmi Diosmanta parlai callarircacuna. Chaita rurashcamantami paicunataca prezuman aparcacuna. Chashna jahuapish prezupi cajcunamanpish huillashpami catircacuna” nircami. Chaipi causaj huauqui panicunaca Diosta sirvichun jarcajpipish huillanataca manataj saquircacunachu. Ñucanchijpish paicuna shinallatajmi huillashpa catina canchij. w19.07 pág. 11 párrs. 12, 13

Religioncunapi mana crijcunamanca Diospi crichun, Jesuspaj discipulocuna tucuchunca ¿ima shinataj huillana canchij? Paicunaman alli huillangapajca mai llajtamanta shamushcatami yachanaraj canchij. Por ejemplo, Europa ladopi causajcunaca Bibliamanta, Dios tucuita rurashcataca asha ashami yachancuna. Pero Asia ladopi causajcunaca Bibliamantaca casi imata mana yachancunachu. Dios tucuita rurashcatapish mana crincunachu. Chaimanta mashcashpa catishunchij. Jehová Diospaj ayudahuanmi alli shungu gentecunata tarishun (Hechos 13:48; 1 Timoteo 2:3, 4). Por ejemplo, achca huauqui panicunaca Jehová Diosta manaraj sirvishpaca ima religionta mana charircacunachu. Maijancunaca shuj religionta mana charishpapish allita rurashpami causajcuna carca. Shinallataj paicunaca panda religioncuna llullacunata yachachicujta ricushpami pꞌiñarijcuna carca. Cutin shujtajcunaca mana allita rurashpami causajcuna carca. Pero Jehová Diosta rijsishpaca mana allicunata ruranatami saquircacuna. w19.07 págs. 20, 21 párrs. 3, 4

Paraíso Allpapi huiñaita causasha nijcunapish, jahua cielopi huiñaita causasha nijcunapish Diosta sirvinataca mana saquinachu canchij. Ima laya causaita charishpapish huashaman saquishcacunata cungarishpami Diosta sirvina yuyailla causana canchij (Filipenses 3:16). Tal vez ñucanchij shuyacushcacunaca manachari utca pajtarin. Ñaupa tiempopi laya manachari fuerzata charinchij. Achca huatacunatachari llaquicunahuan, jarcaicunahuan causacunchij. Chashna cajpipish mana yalli sustarinachu canchij. Ashtahuanpish Jehová Diosta mañashpami ñucanchij ima shina sintirishcata huillana canchij. Chaita rurajpica Yayitu Diosca tranquilo sintirichunmi ayudanga (Filipenses 4:6, 7). Carrerapi callpaj runaca ganana yuyaillami callpan. Ñucanchijpish callpacuj runa shinami huiñai causaita charingacama Diosta sirvishpa catina canchij. Yaya Diospajta ruranapi tucui pudishcata rurashpaca ashtahuanmi sinchiyarishun. w19.08 pág. 7 párrs. 16, 17

Shuj huauqui o pani llaquilla cajta ricushpaca ima shina cushichinataca tal vez mana yachashunchu. Shinapish ñucanchij huacashcata ricushpami paicunamanta preocuparishcata ricungacuna. Lázaro huañujpica Marta, María, shujtaj gentecunapishmi paipaj cꞌuyashca amigomanta huacarcacuna. Lázaro huañushca chuscu punlla qꞌuipami Jesusca paipaj huasiman chayarca. Paica Lázaro causarinata yachashpapish achcata llaquirishpami huacarca (Juan 11:17, 33-35). Lázaro huañushcamanta ima shinami Jesús llaquilla sintirirca, chashnallatajmi pi huañujpica Diospish llaquilla sintirin. Shinallataj Jesús huacashcata ricushpami Martapish, Mariapish paicunata cꞌuyashcata ricurcacuna. Ñucanchij huauqui panicunamanta llaqui horaspi cꞌuyashcata ricuchijpica mana paicunalla cashcatachu sintingacuna. Shuj huauqui o shuj pani llaquilla cajpica alli uyanatami yachana canchij. Paicuna imata nijpipish mana pꞌiñarishpami uyanalla canchij (Job 6:2, 3). Tal vez paicunapaj familiacuna mana Testigo cashcamantami chꞌican chꞌican jarcaicunata chꞌimbapuracuncuna. Chai llaquicunata ahuantashpa catichunca paicunahuanmi Jehová Diosta mañana canchij (Salmo 65:2). w19.04 págs. 18, 19 párrs. 18, 19

Betelpi sirvicushpa, maipi Diosta sirvicushpaca chaipi causanatami amañarinchij. Gentecunahuanpish allimi apanacunchij. Chaimantami shujtaj lugarpi Diosta sirvinaman rishpaca llaquilla sintirinchij. Shinallataj huauqui panicunata saquishcamantami llaquirinchij. Autoridadcuna Diosta sirvichun jarcajpicarin panicunamantami ashtahuan sustarinchij (Mateo 10:23; 2 Corintios 11:28, 29). Ashtahuanpish shujtaj lugarpi sirvi callarishpaca chaipi tiyaj costumbrecunata amañarinaca sinchimi canga. Ñucanchij llajtaman tigrana tucujpipish sinchimi ricuringa. Shinallataj ñucanchijpish mana yuyashcapichari cullqui illaj saquirishun. Chaimantachari desanimado sintirishun. Chashna sintirishpapish ¿ñaupajman catingapajca imatataj rurana canchij? Diospajman cꞌuchuyashunchij (Santiago 4:8). ¿Ima shinataj paipajman cꞌuchuyai tucunchij? Diosca ñucanchij mañashcacunataca uyanmi. Chaimantami paipi confiana canchij (Salmo 65:2). Jehová Diosca mana ñucanchij mañashcallatachu cun. Ashtahuanpish ñucanchijta ayudangapajca imata mañashcatapish, imata yuyashcatapish ashtahuan yallimi cun (Efesios 3:20). w19.08 pág. 21 párrs. 5, 6

Huaquin gentecunaca Armagedón shimita uyashpaca bombacunahuan tugyachishpami tucuita tucuchinga. Mana cashpaca jatun llaquicuna ricurishpami tucuita tucuchinga nishpami yuyancuna. Shinapish Bibliapica Armagedonmanta parlashpaca alli huillaicunatami parlacun. Chaita yachashpami cushilla sintirinchij (Apocalipsis 1:3). Armagedón macanacuica mana tucui gentecunatachu tucuchinga. Ashtahuanpish quishpichingami. ¿Chaitaca ima shinataj ruranga? Cai allpata mandajcunata, millai gentecunatapish tucuchishpa. Pero allita rurajcunallatami quishpichinga. Shinallataj cai Allpata tucuchichunpish mana saquingachu (Apocalipsis 11:18). Armagedón shimica Bibliapica shuj cutinllami ricurin. Cai shimica hebreo rimaipica Meguido urcu nisha ninmi (Apocalipsis 16:16). Meguidoca Israel llajtapi saquirij shuj ciudadmi carca (Josué 17:11). Armagedonmanta parlashpaca mana shuj lugarmantachu parlacun. Armagedonpica tucui mandajcunami Diosta sirvijcunahuan macanacungapaj tandanacungacuna (Apocalipsis 16:14). w19.09 págs 8, 9 párrs. 1-3

Ungushca huarmica paita pi utca ayudachunmi minishtirca. Alliyangapaj jambijcunapajman rishpapish 12 huatacunatami ungushca causarca. Chai punllacunapica leypi nishca shinaca cai huarmica mapami carca (Levítico 15:25). Pero Jesús ungushcacunata jambij cashcata yachaj yachashpaca paita mashcanamanmi rirca. Jesusta ricushpaca huasha ladota rishpami paipaj churana puntapi tuparirca. Tuparishpaca chai ratomi alliyarca. Jesusca cai huarmitaca mana jambishpallachu cacharca. Ashtahuanpish “huahua” nishpami cꞌuyaihuan, respetohuan tratarca. Chashna tratajpica huarmica cushilla, tranquilami sintirishcanga (Lucas 8:44-48). Caipi yuyashun. Ungushca huarmica alliyangapajca paimi Jesusta mashcanaman rirca. Ñucanchijpish Jesuspajman cꞌuchuyangapajmi esforzarina canchij. Cunan punllacunapica Jesusca ungushcacunataca mana jambinchu. Pero paica: “Ñucapajman shamuichij. Ñucami cancunataca samachisha” nishpami invitacun (Mateo 11:28). w19.09 págs. 20, 21 párrs. 2, 3

Profeta Zacariasca: “Chai punllacunapica cashnami tucunga: Tucui llajtacunamanta shujtaj shujtaj rimaita rimaj chunga runacunami Judá llajtapi causaj runapaj churanapi charirashpa: Ñucanchijpish cancunahuan rishun nipanchijmi ningacuna” nircami (Zacarías 8:23). Testigo de Jehovacunaca tucui laya shimita rimajcuna tandanacuchunca paicunamanmi predicana canchij. Cunan punllacunapicarin 900 yalli shimicunapimi traducicunchij. Chashnami Jehová Diosca tucui llajtacunamanta yallitaj achcacunata tandachicun. Diospaj yachachishcacuna achca shimicunapi tiyashcamantami Yaya Diosta tandalla sirvicunchij. Shinallataj cushilla predicajcuna cashcamanta, caishuj chaishuj cꞌuyanacujcuna cashcamantami rijsishca canchij. Caicunata yachashpami ñucanchij feta sinchiyachinchij (Mateo 24:14; Juan 13:35). w19.09 págs. 30, 31 párrs. 16, 17

Cunan punllacunapica gentecunaca gobiernocunapi, negociocunapimi confiancuna. Chaimantami jatun llaqui punllacunapi gobiernocuna, negociocuna, cai mundopi tiyaj tucui cosascuna tucuricushcata ricushpaca gentecunaca achcata mancharingacuna. Paicunapaj causaihuan ima tucunatapishmi manchangacuna (Sofonías 1:14, 15). Chai punllacunapica Diosta sirvijcunapajpish causaica sinchimi canga. Cai mundopaj ruraicunapi mana chagrurishcamantachari minishtirishca cosascunata mana charishun. Jatun llaqui punllapi Diosmanta ama caruyachunmi “alli cazuj alli yuyaiyuj” sirvij huauquicunaca ñucanchijta ayudashpa catincuna (Mateo 24:45, QC, 1989). Cai huauquicunaca tucui layami ayudashcacuna. Por ejemplo, 2016 huatamanta 2018 huatacamaca sumaj jatun tandanacuicunami tiyarca. Chai tandanacuicunapica Jehová Diospaj punlla cꞌuchuyamucushcamanta Diosta sirvishpa catingapaj imata rurana cashcatami yachachircacuna. w19.10 págs. 14, 16, 17 párrs. 2, 10, 12

Micushca qꞌuipaca chai micuna ñucanchij cuerpopi imata rurajta mana jarcai tucunchijchu. Alli micunata micushpaca sanomi causashun. Pero mana alli micunata micushpa alli sintirishpapish qꞌuipaca ungushunmi. Chashnallatajmi ñucanchijpish imata ricunata, imata uyanata, imata pugllanata agllai tucunchij. Pero ña agllashca qꞌuipaca chai ima ricushca, uyashcami tiempohuanca ñucanchij yuyaita allipaj o mana allipaj cambianga (Santiago 1:14, 15). Bibliapica: “Maijan imata tarpujca, chaillatatajmi tandanga. Maijanpish quiquin aichapaj tarpujca, aichamantaca ismujllatami tandanga” ninmi (Gálatas 6:7, 8). Chaimantami mana allicunahuan chagrurishca peliculacunata, musicacunataca mana ricuna, mana uyana canchij. Shinallataj mana alli pugllaicunapica mana ocuparinachu canchij (Salmo 97:10). w19.10 pág. 30 párrs. 12-14

“Taita Diosca, cai pachapi causajcunataca yallitaj cꞌuyashpami, paipaj shujlla Churita cacharca” (Juan 3:16). Jehová Diospaj ejemplotami catina canchij. Chaimantami congregacionmanta caruyashcacuna cutin tigrajpica cushilla chasquina canchij (Salmo 119:176; Lucas 15:7, 10). Shinallataj tucui huauqui panicunatami valorana canchij. Paicuna minishtishca horasmi ñucanchij tiempohuan, fuerzahuan ayudana canchij (1 Juan 3:17). Jesusca, ñuca cꞌuyashca shina cancunapish caishuj chaishuj cꞌuyanacuichij nishpami mandarca (Juan 13:34, 35). Cai mandashcaca Moisesman cushca leypica mana tiyarcachu. Jesús ñucanchijta cꞌuyashca shinami huauqui panicunatapish cꞌuyana canchij. Ñucanchijta yallimi paicunataca cꞌuyana canchij. Jesusca ñucanchijmantami paipaj causaita curca. Ñucanchijpish huauqui panicunata cꞌuyashcamantami ñucanchij causaita cuna canchij. w19.05 pág. 4 párrs. 11-13

Diospaj espíritu santota chasquingapajca Diostami cutin cutin mañana canchij (Lucas 11:13). Lucas 11:5-9-pi Jesuspaj chꞌimbapuraipi yuyashun. Shuj runaca paipaj amigo carumanta visitanaman shamushcamantami carasha nirca. Pero carangapajca mana imata charircachu. Chaimantami paipaj vecinoman micunitata mañanaman rirca. Jesusca chai runa mañacujllapimi vecinoca micunata curca nircami. ¿Jesusca chashna nishpaca imatataj yachachisha nirca? Vecinoca juchayuj runa cashpapish cutin cutin mañajpica ayudarcami. Ñucanchijta cꞌuyaj Jehová Dioscarin espíritu santota cuhuai nishpa cutin cutin mañajpica cungallami. Chaimantami espíritu santota cuhuai nishpa Diosta mañanalla canchij (Salmo 10:17; 66:19). Diablo ñucanchijta llaquichishpa catijpipish Diospaj espíritu santota chasquishpami llaquicunata ahuantashun. w19.11 pág. 13 párrs. 17-19

Jesuspish apostolcunapish samarinatami minishtircacuna. Pero paicunaca samarinallapi, cushicunallapica mana dimastij yuyajcunachu carca. Cutin chai tiempopi causaj achca gentecunaca Jesús parlashca shuj charij runa shinallatajmi yuyajcuna carca. Chai charij runaca: “Cunantajca samarishpa, micucuilla, ubyacuilla, cushicucuilla” nirijmi carca (Lucas 12:19; 2 Timoteo 3:4). Cunan punllacunapipish achca gentecunaca cushicunallapi, samarinallapimi yuyancuna. Ñucanchijpish Jesús shinami casha ninchij. Chaimanta samaringapajllaca mana tiempota surcunachu canchij. Ashtahuanpish predicangapaj, tandanacuicunaman ringapajmi cada semana tiempota surcuna canchij (Hebreos 10:24, 25). Shinallataj vacacioncunapi cashpa, maipi cashpapish tandanacuiman rinata, predicanataca mana saquinachu canchij (2 Timoteo 4:2). w19.12 pág. 7 párrs. 16, 17

Jehová Diosca ñucanchij causaipi imata rurangapaj agllachunmi saquishca. Shinallataj imatapish alli agllachunmi yachachin. Ñucanchij agllashcacuna alli cajpica chaita pajtachichunmi ayudan (Salmo 119:173). Diospaj Shimi yachachishcacunata pajtachishpaca imatapish allimi decidishun (Hebreos 5:14). Imata alli decidishpapish maipica imata decidishcata pajtachinaca sinchimi can. Caipi yuyashun, shuj jovenca Bibliata tucui liyingapajmi decidin. Shinapish asha semanacuna qꞌuipaca shujtaj ruraicunamantami Bibliata liyinata saquin. Shinallataj shuj panica precursora canatami decidin. Pero pai decidishcataca mana utca pajtachinchu. Cutin pushaj huauquicunaca huauqui panicunata animashpa visitangapajmi decidincuna. Quillacuna pasajpipish pita mana visitashcacunachu. Cai ejemplocunapi ricushca shinaca, paicunaca alli decidishpapish ima decidishcataca mana pajtachishcacunachu. w19.11 pág. 26 párrs. 1, 2

Cunanca llaqui punllacunapimi causacunchij. Chaimantami Jesusca cunan punllacunataca Noepaj punllacunahuan chꞌimbapurarca (2 Timoteo 3:1; Mateo 24:37). Caita yuyaipi charishpami maijan cazarashcacunaca huahuacunata manaraj charishpa Diosta ashtahuan sirvinata agllashcacuna. Cazarashcacunaca huahuacunata charinata agllashpaca ima shina huiñachinatarajmi alli yuyana can (Lucas 14:28, 29). Huahuacunata charij yaya mamacunaca huahuacunata huiñachingapaj tiempo, cullqui, fuerzami minishtirin nincunami. Chaimantami cazarashcacunaca: “¿Familiata mantiningapajca ishquindijchu trabajashun? ¿Imalla minishtirishcacunamantaca ishquindijchu igual yuyanchij? ¿Ishquindij trabajajpica huahuataca pitaj cuidanga? ¿Huahuaca ima shinashi huiñanga?” nishpa tapurina can. Cazarashcacunaca cai yuyaicunamanta parlanacushpami cai punllapaj versopi nishcacunata pajtachincuna. w19.12 págs. 23, 24 párrs. 6, 7

Pabloca Jesushuan jahua pachapi mandangapajmi agllashca carca. Shinallataj shujtajcunatami animaj carca. Pero paipish shujtajcuna animachunmi minishtirca (Romanos 9:1, 2; 2 Corintios 11:23-28). ¿Imamantataj chashna ninchij? Pabloca ungüita charishcamantami garruchahuan tujsicuj shina sintirishcanga (2 Corintios 12:7). Shinallataj paipaj amigo Demasca cai pachapi tiyashcacunata cꞌuyashpami Diosta sirvinata saquirca. Chaimantami Pabloca llaquilla sintirishcanga (2 Timoteo 4:10). Jehová Diosca Pablota animangapajca espíritu santotami curca (2 Corintios 4:7). Shinallataj paita animachunca huauqui panicunatami cacharca. Chaimantami Pabloca: ‘Aristarco, Marcospish, Tiquicopish, shujtaj huauquicunapish ñucata cushichishpami animarca’ nirca (Colosenses 4:11). w20.01 págs. 8, 9 párrs. 2, 3

Jesusca: “Mana agllashcacunaca cutin huacharijcuna o espíritu santomanta huacharijcuna ima shina sintirishcataca mana intindi tucuncunachu” nircami (Juan 3:3-8). Jesushuan mandagrijcunata Dios manaraj agllajpica paicunaca llaquicuna illaj paraíso Allpapi causanatami munarcacuna. Shinallataj paraíso Allpapi shuj cꞌuyashca familiata o amigota cutin ricunatami munajcuna carca. Pero jahua pachaman ringapaj Jehová Dios agllajpica paicunapaj yuyaipish munaipish tucuimi cambiarirca. ¿Imamantashi cambiarirca? ¿Sustarishca causacushcamanta o cai Allpapi llaquicunata charishcamantachu cambiarirca? ¿Cai Allpapi huiñaita causanaca jiru cashcamantachu cambiarirca? Mana. Ashtahuanpish Yayitu Dios paipaj espíritu santota cushcamantami paicunapaj yuyaipish, paicunapaj munaipish cambiarirca. w20.01 págs. 22, 23 párrs. 9-11

Israelitacuna Dioshuan alli cachunca ancianocuna, juezcunami ayudajcuna carca. Shinallataj jatun pꞌiñanacuicuna tiyajpi, huañuchishca cajpi, violashca cajpi, shuhuashca cajpica paicunallatajmi ayudajcuna carca. Moisesman cushca leycunata catishpami chaita rurajcuna carca. Pero cunan punllacunapica ancianocunaca chai leycunata cazunapaj randica ‘Cristopaj mandashcatami’ cazuncuna (Gálatas 6:2). Chaimantami shuj huauqui o pani jatun juchata rurashca cajpica Diospaj ñaujpajpi cutin alli ricurichun ayudancuna. Pero jatun pꞌiñanacuicuna tiyajpi, huañuchishca cajpi, violashca cajpi, shuhuashca cajpica autoridadcunapaj maquipimi saquincuna. Cai laya problemacunata allichichunca Jehová Diosca autoridadcunatami churashca. Paicunami pi mana allita rurashca cajpica multata cobrancuna o huaquinpicarin carcelpi churancuna (Romanos 13:2-4). Shuj huauqui o pani jatun juchata rurashpa shujtaj huauquita o panita llaquichijpica ¿ancianocunaca imatataj rurancuna? Paicunaca Bibliapi ricushpami imatapish alli decidincuna. Shinallataj Jesús yachachishcacunatapish yuyaipimi charincuna. Cai mandashcacunata catishpami llaquichishca huauquita o panita cꞌuyaihuan ayudancuna. Shinallataj llaquichij huauqui o pani de verdad arrepintirishcata o mana arrepintirishcatami ricuncuna. Juchayuj runa arrepintirijpica Dioshuan cutin alli apanacuchunmi ayudancuna. w19.05 págs. 6, 7 párrs. 23, 24

Jesusca: “Ñucata cachaj Yayaca causaiyujmi. Paimantami ñucaca causani” nircami. Jehová Diosca Jesusmanca imalla minishtishcacunata cushpa, paipaj feta sinchiyachishpami cuidarca. Chaimantami Jesusca Yayitu Diospi tucui shunguhuan confiarca (Mateo 4:4). Jehová Diosca ñucanchijcuna paihuan alli apanacuchunmi ayudan. Por ejemplo, Bibliapimi paimanta, paipaj munaimanta, alli causaimanta, shamuj punllacunapi ima tucunamanta yachachishca. Bibliamanta yachacujpimi Yayitu Diosca ñucanchijmantapish preocuparirca. Chaimantami ñucanchij yaya mamata, mana cashpaca shujtaj huauqui panicunata Bibliamanta yachachichun cacharca. Cunan punllacunapish ancianohuan, shujtaj huauqui panicunahuanmi ñucanchijtaca ayudacun. Shinallataj tandanacuicunapipish huauqui panicunahuan ashtahuan yachachunmi ayudan. Tucui caicunata rurashpami Jehová Diosca ñucanchijmanta preocuparishcata ricuchin (Salmo 32:8). w20.02 págs. 3, 5 párrs. 8, 13

Envidiana munaita charishpaca shujtajcunahuanca mana alli apanacushunchu. Chaimantami shungumanta envidiana munaitaca anchuchina canchij. Shinallataj shujtajcunata ama envidiachunmi ayudana canchij. ¿Ama envidiajcuna cachunca ima shinataj ayudashun? ¿Ima shinataj tucuicunahuan alli apanacushun? Rurashcacunahuan, parlashcacunahuanmi shujtajcuna ama envidiachun ayudana canchij. Diosta mana sirvijcunaca paicunapaj charishca cosascunallahuanmi jatun tucuncuna (1 Juan 2:16). Paicuna chashna rurajpimi shujtajcunaca envidiai callarincuna. Chaimantami charishca cosascunamanta, imata randigrishcacunamantaca cada rato mana parlana canchij. Shinallataj congregacionpi mingashca trabajocunamantaca mana tucuicunamanchu huillana canchij. Ashtahuanpish huauqui panicunamanta preocuparishpami paicunapaj alli rurashcacunamanta parlana canchij. Chaita rurajpica paicunaca cushillami sintiringacuna. Congregacionpipish tucuicunahuanmi alli apanacushun. w20.02 págs. 18, 19 párrs. 15, 16

Jehová Dios rurashcacunapi yuyashpaca paimantami ashtahuan yachai tucungui (Apocalipsis 4:11). Plantacunata, animalcunata ricushpa Yayitu Dios yachaisapa cashcata yuyari. Gentecunatapish ima shina rurashcata ashtahuan yachai (Salmo 139:14). Intipi yuyai. Intipica Jehová Diosca achca rupaitami churashca. Pero intica achca estrellacunamanta shuj estrellallami can (Isaías 40:26). Caicunapi yuyashpami Jehová Diostaca ashtahuan respetangui. Pai yachaj, poderyuj cajta intindishpaca paipaj amigomi cai tucungui. Pero Diosta tucui shunguhuan cꞌuyangapajca paimantami ashtahuan yachana cangui. Jehová Dios canmanta sustarishcatami tucui shunguhuan crina cangui. Paita mashcajpica paipish cambajmanmi cꞌuchuyanga (1 Crónicas 28:9). Jehová Dios paita rijsichun canta agllashcatami intindina cangui (Jeremías 31:3). Yaya Dios cambaj imallata rurashcata yachashpami paitaca tucui shunguhuan cꞌuyangui. w20.03 pág. 4 párrs. 6, 7

Apóstol Pablomanta yachashun. Corinto llajtaman cutin rishpaca ashalla cullquitami charirca. Pero huauqui panicuna paiman ama cullquita cuchunmi carpa huasicunata rurashpa trabajarca (2 Corintios 11:7). Pabloca minishtirishcallata charingapajmi trabajarca. Chashnami Diosmanta huillai tucurca. Paica Diosmanta huillana valishca cashcata yachashpami tucui sabadocuna huillaj carca. Ña cullquita charishpaca “Taita Diospaj Shimita huillana yuyailla tucushpami, judiocunamanca Jesusca Quishpichij Cristomi nishpa huillacurcalla” (Hechos 18:3-5; 2 Corintios 11:9). Qꞌuipa huatacunaca Pablotaca Roma llajtapimi paipaj huasillapitaj ishqui huatacunata prezushpa churarca. Chaipi cashpapish paica visitajcunamanmi Diosmanta huillaj carca. Huauqui panicunapajpishmi cartacunata quillcaj carca (Hechos 28:16, 30, 31). Chashnami Diosmanta huillanata mana pi jarcachun saquirca. w19.04 pág. 4 párr. 9