Diciembre

Ñucanchij parlashcacunamanta mana jarcarishpaca shujtajcunata llaquichi tucunchij. Por ejemplo, Diosta sirvichun jarcaj lugarcunamanta shuj huauqui o pani cajpica, “¿cancunaca ima shinataj Diosta sirvishpa catinguichij?” nishpa tapunatachari munashun. Paicunata cꞌuyashcamanta, paicunamanta Yaya Diosta mañasha nishcamantachari chashna tapusha ninchij. Pero chashna tucujpimi upalla saquirina canchij. Mana parlanalla cashcata maijanta parlachun obligashpaca mana cꞌuyashcatami ricuchinchij. Chai huauquipi o panipi confiajcunatapish mana cꞌuyashcatami ricuchinchij. Diosta sirvichun jarcaj llajtacunapi causaj huauqui panicunataca mana llaquichisha ninchijchu. Ashtahuanpish chai llajtapi causaj huauqui panicunapish ima shina predicashcata, ima shina tandanacushcata parlanataca mana munancunachu. w20.03 págs. 21, 22 párrs. 11, 12

Diosca gentecuna huañuchunca mana munarcachu. Ashtahuanpish para siempre causachunmi munarca. Huiñaita causangapajca Adán Evaca Diostami cazuna carca. Diosca: “Huerta chaupipi tiyaj yuraca allita mana allita yachaj chayachijmi. Chai yuramantaca ama micungui. Chai yuramanta micushpaca, chai punllallatajmi huañungui” nircami (Génesis 2:16, 17). Cai punllapaj versopi nishcahuan Diabloca shuj culebrata parlachishpami Evataca pandachirca. Chai llullata crishpami Evaca chai yuramanta micurca. Qꞌuipaca paipaj cusapish chashnallatajmi rurarca (Génesis 3:6). Paicuna chaita rurashcamantami tucui gentecunaca juchayuj tucushpa huañuna carca (Romanos 5:12). Yaya Dios nishca shinami Adán Evaca huañurca. Diabloca llullanataca manataj saquishcachu. Paica, gentecuna huañujpica almaca causashpami catin ninmi. Chashna llullacunata nishpami Diabloca cunan punllacunacama pandachicun (1 Timoteo 4:1). w19.04 págs. 14, 15 párrs. 3, 4

Huahuacunaca ima alli cashcata ima mana alli cashcataca mana yachancunachu. Chaimantami huahuacunata llaquichijcunaca jahualla pandachincuna. Por ejemplo, violajcunaca: “Canmi culpata charingui. Ama piman huillangui. Can huillajpica cantaca pi mana cringachu. Canhuan chayarishpaca canta cꞌuyashcatami ricuchini” nishpami llullancuna. Chai llullacunata crishpami huahuaca, “ñuca culpallamantatajmi llaqui tucurcani, pipish ñucata mana cꞌuyanchu” nishpa yuyanga. Pero jatunyashpaca chai llullacuna mana cierto cashcatami cuenta japinga. Cunanca violashca huahuacuna imamanta llaquilla causacushcatami intindinchij. Cai mana alli ruraicunami huahuacunataca achca dañota rurashca. Tucuri punllacunapi causacushcamantami gentecunaca cꞌuyai illajcuna, millai umajcuna can (2 Timoteo 3:1-5, 13). w19.05 pág. 15 párrs. 7, 8

Jesusca paipaj shimicunahuanmi yachachirca. Paica Jehová Dios ima laya cashcata, gentecuna imamanta causashcata, Diospaj gobierno ñalla tucui llaquicunata tucuchina cashcatami yachachirca (Lucas 24:19). Shinallataj Jesusca ruraicunahuanmi paita catijcunaman ima shina causanata yachachirca (Juan 13:15). ¿Jesusca ima horataj yachachirca? Paica cai Allpapi cashpami alli huillaicunata yachachirca (Mateo 4:23). Causarishca qꞌuipapish yachachishpami catirca. Chaimi 500 yalli gentecunaman ricurishpaca “tucui cai pachata richij, ñuca yachacujcunata ruraichij” nishpa mandarca (Mateo 28:19, 20; 1 Corintios 15:6). Jahua pachaman tigrashca qꞌuipapish congregacionta pushaj cashcamantami paita catijcunamanca yachachishpa catirca. Por ejemplo, ungidocunata animangapajca Jesusca huata 96-pimi apóstol Juanta shuj cartata escribichirca (Colosenses 1:18; Apocalipsis 1:1). w19.05 pág. 3 párrs. 4, 5

Cunan punllacunapica cullquita japinaca sinchimi can. Huaquin huauqui panicunaca paicunapaj familiacunata mantiningapajmi achca horascunata trabajancuna. Maijancunaca caru ladopi trabajashpami chishita huasiman tigrancuna. Cutin shujtajcunaca sinchi trabajopi cainashcamantami shaicushca sintirincuna. Chaimantami cai huauqui panicunaca Bibliata, publicacioncunata estudiangapajca fuerzata mana charincuna. Ima shina cashpapish Bibliata, publicacioncunata alli estudiangapajmi tiempota surcuna canchij. Jehová Diospaj alli amigo tucungapaj, huiñai causaita charingapajca cada unomi estudiana canchij (1 Timoteo 4:15, 16). Tutamantapica imatapish rurangapajmi fuerzasta charinchij. Chaimantami maijan huauqui panicunaca manaraj ima bulla tiyajpi, utca jatarishpa Bibliata estudiancuna. Cutin shujtajcunaca chishitami Bibliata liyingapaj, liyishcapi cutin cutin yuyangapaj tiempota surcuncuna. w19.05 pág. 26 párrs. 1, 2

Huaquin cambiocunata rurangapajca achca huatacunami minishtirin (2 Pedro 1:5). Shungupi, yuyaipi cambiashpa catingapajmi esforzarina canchij. Salmo librota quillcaj runa shinami Jehová Diosta mañana canchij. Paica: “¡Taita Dioslla, ñucapica chuya shunguta callarichihuai. Ñuca ucupica ima pandata mana ruraj espirituta cutin churahuai!” nishpami mañarca (Salmo 51:10). Mana alli yuyaicunata saquingapajca Jehová Diostami mañana canchij. Tucui punllacunami Bibliata liyina canchij. Liyishcapipish cutin cutinmi yuyana canchij. Shinallataj mana alli munaicunata ima shina cambianatami yuyana canchij (Salmo 119:59; Hebreos 4:12; Santiago 1:25). “Ñami tucuita alli ruracuni” nishpaca mana yuyanachu canchij. Ashtahuanpish Diablo pandachicushcata cuenta japishpaca utca cambiangapajmi esforzarina canchij. w19.06 págs. 8, 10, 12 párrs. 1, 10-12

Imata ruragrishcata pajtachingapajca ima punlla, ima hora pajtachinata alli ricushunchij. Pajtachingapajca mana tucui ñucanchij munashca shina llujshingacama shuyanachu canchij (Eclesiastés 11:4). Yanga ruraicunapipish mana ocuparinachu canchij. Chaipi yalli ocuparishpaca alli decidishcata pajtachingapajca tiempota mana charishunchu (Filipenses 1:10). Shinallataj pajtachingapajca imapish jarcachunca mana saquinachu canchij. Tal vez ñucanchijlla cashca horasmi imata agllashcata pajtachina canchij. Ashtahuancarin celularta, Internettaca qꞌuipamanmi ricui tucunchij. Caipi yuyashun. Maiman rinata yuyarishpaca ñan huichcashca cajpipish shujtaj ñanta rishpami chaiman chayanchij. Chashnallatajmi ñucanchij decidishcacuna pajtarina cashcata yuyashpaca ima jarcaicuna tiyajpipish ñucanchij decidishcata pajtachishun (Gálatas 6:9). w19.11 pág. 30 párrs. 17, 18

¿Imamantataj bautizarina cangui? Bibliamanta estudiashpami Jehová Dios ima shina cashcata, imallata ruraj cashcata yachashcangui. Cai yachachishcacuna cambaj shunguman chayajpimi paitaca tucui shunguhuan cꞌuyangui. Jehová Diosta cꞌuyashcamantami bautizarinataca agllana cangui. Bautizaringapajca Bibliapi yachachishcacunatami tucui shunguhuan crina cangui. Jesús paipaj discipulocunaman imata nishcata yuyari (Mateo 28:19, 20). Pai nishca shinaca bautizarijcunaca ‘Yayapaj, Churipaj, jucha illaj espiritupaj shutipimi’ bautizarina can nircami. ¿Caica imatataj nisha nin? Jehová Diosmanta, Jesusmanta, espíritu santomanta Bibliapi yachachishcacunatami tucui shunguhuan crina nisha nin. Cai yachachishcacuna cambaj shunguman chayajpimi bautizarinataca munangui. w20.03 págs. 9, 10 párrs. 8, 9

Yayitu Diosca angelcunataca Sodoma llajtatami tucuchigrini nishpa Lotman huillachunllaca mana cacharcachu. Chaipaj randica chai llajtamanta llujshichishpa ayudachunmi cacharca (Génesis 19:12-14, 17). Shuj huauqui mana allita ruracujta yachaj chayashpachari paiman consejota cuna tucunga. Bibliapi tiyaj consejocunata paipaj causaipi mana utca pajtachijpipish pacienciahuanmi ayudana canchij. Cai ishqui angelcuna shinami ayudana canchij. Llaquilla cajcunata mana ayudai tucunichu nishpa, paicunamanta caruyanapaj randica ima shina ayudanatami ricuna canchij (1 Juan 3:18). Bibliapi yachachishcacunatapish paicunapaj causaipi pajtachichunmi ayudana canchij. Diosca Lotpaj pandarishcacunataca mana ricurcachu. Paica achca huatacuna qꞌuipaca apóstol Pedroman Lotpaj causaimantami quillcachirca. Pedroca, Lotca tucuipi cashcata ruraj runami carca nishpami quillcarca (Salmo 130:3). Diospaj ejemplota catishunchij. Huauqui panicunapaj pandarishcallata ricunapaj randica, allita rurashcata ricushunchij. Chashna rurashpaca pacienciata charishcatami ricuchishun. Paicunapish ima shina sintirishcata huillanatami munangacuna. w19.06 págs. 21, 22 párrs. 6, 7

Diosta sirvichun mana saquijpica ¿shujtaj llajtamanchu rina canchij? Chaitaca cada unomi decidina can. Ñaupa tiempopi Jesusta catijcuna imata rurashcata yuyarishun. Jerusalenmantami Jesusta catijcunaca shujtaj ladocunaman rircacuna. Paicunaca Judea, Samaria Fenicia, Chipre, Antioquía llajtacunamanmi rircacuna (Mateo 10:23; Hechos 8:1; 11:19). Cutin, Pablopaj punllacunapi huaquin lugarcunapica gentecunaca Diosmanta huillachunmi jarcarcacuna. Chai lugarcunapi huillanaca peligroso cajpipish Pabloca Diosmanta huillashpa saquirirca (Hechos 14:19-23). ¿Caimantaca imatataj yachanchij? Cusami paipaj familiahuan shujtaj llajtaman rinata o mana rinata decidina can. Pero manaraj imatapish decidishpami Jehová Dios ayudachun mañana can. Shinallataj paica: “Shujtaj llajtaman rishpaca ¿allichu causashun? ¿Llaquicunatachu charishun?” nishpami yuyarina can. Maijanpish pai yuyashca shina decidijpica mana juzganachu canchij. w19.07 pág. 10 párrs. 8, 9

Jesusca: “Tucui cai pachata richij, ñuca yachacujcunata ruraichij” nishpami mandarca (Mateo 28:19). Shinallataj Jesús mandashcacunata alli intindishpa paicunapaj causaipi pajtachichunmi ayudana canchij. Huaquincunaca Bibliamanta yachai callarishcahuanmi causaipi cambiocunata rurancuna. Cutin shujtajcunaca ashtahuanmi demorancuna. Ima laya cajpipish paicunatami ayudana canchij. Perú llajtapi sirvij shuj misioneroca cashna nishpami parlarca: “Raúl shuti runaca ña ishqui librocunata estudiashca cashpapish mana cambiasha nircachu. Paipaj causaipipish achca problemacunatami charirca. Huarmihuanpish maipish cachunmi causaj carca. Mapa shimicunatami parlaj carca. Paipaj huahuacunapish paitaca mana respetajcunachu carca. Chashna jahuapish siempremi tandanacuicunaman purij carca. Chaimi yachachinataca mana saquircani. Bibliata quimsa huatacunata estudiashca huashami Raulca bautizarirca” nircami. w19.07 págs. 15, 18, 19 párrs. 3, 15-17

Apóstol Pabloca Roma llajtapi prezu cashpapish Filipos llajtapi caj huauqui panicunamanmi shuj cartata escribirca. Shinapish Diospaj Shimitaca gentecunaman mana huillai tucurcachu. Pero paita visitajcunamanmi predicaj carca. Caru llajtapi caj congregacioncunamanpishmi cartacunata escribishpa cachaj carca. Pabloca Jesús shinallataj tucui vida Diosta sirvina cashcatami yacharca. Chaimantami paica Diosta sirvinataca shuj carrerahuan chꞌimbapurarca (1 Corintios 9:24-27). Por ejemplo, callpajcunaca ganana yuyaillami callpancuna. Chaimantami shuj ciudadpi callpacushpaca tiendacunapi o negociocunapi imata cꞌatucujtaca mana ricushpa saquirincuna. Ñucanchijpish huiñai causaita charina yuyaillami causana canchij. Chaipajca Pablo shinami Diosta ashtahuan sirvina canchij. Chashnami carrerapi mishaj shina huiñai causaita charishun. w19.08 págs. 3, 4 párr. 4, 7

Diosmanta yachai callarishpaca ñucanchij causaita, crishcacunatapishmi cambiarcanchij. Chaita ricushpami familiacunaca llaquirishcangacuna. Shinallataj huaquin fiestacunapi ña mana participajpi, politicapi ña mana chagrurijta ricushpaca pꞌiñarincunachari (Mateo 10:35, 36). Shinapish paicunaca mana nunca cambiangachu nishpaca mana yuyanachu canchij. Ñucanchij crishcacunata paicunaman parlanata saquishpaca juzgacushca shinami canchij. Huiñai causaitapish ña mana charingachu nishpa yuyacushca shinami canga. Pero Yaya Diosca mana ñucanchijta juzgachun churashcachu. Jesustami juzgachun churashca (Juan 5:22). Familiacunahuan pacienciata charijpica tiempohuanca Diosmanta uyanatachari munangacuna. Paicunataca allimi tratana canchij. Pero ñucanchij decidishcacunata cambiachunca mana saquinachu canchij. Familiacunaca Diosta sirvina valishca cashcataca manachari utca intindingacuna (1 Corintios 4:12b). w19.08 págs. 17, 18 párrs. 10, 13, 14

Tal vez ñucanchijchari ungurcanchij, mana cashpaca shuj familiachari huañurca. Chai llaquicunata yuyarishpaca: “Yaya Dios paipaj espíritu santota cushpa ayudajpimi cada punlla ahuantai tucurcani. Ñucallaca mana ahuantai tucuimanchu carcani” ninchijmi (2 Corintios 4:7-9). Diablopaj ruraicunapipish ama chagruringapajmi espíritu santota minishtinchij (1 Juan 5:19). Shinallataj supaicunahuan macanacungapajmi espíritu santota minishtinchij (Efesios 6:12). Jehová Diosca paipaj espíritu santota cushpami llaquicuna ricurijpipish pai mingashcata pajtachichun fuerzata cun. Apóstol Pabloca ima llaquicuna ricurijpipish paipaj trabajota pajtachirca, huillanamanpish llujshirca. Cristopaj poderhuanmi Diosta sirvishpa catirca (2 Corintios 12:9). w19.11 págs. 8, 9 párrs. 1-3

Bibliapimi Jesús canmanta imallata rurashcataca tucuita parlan. Jesusta cꞌuyanata yachashpami Jehová Diostaca ashtahuan cꞌuyangui. Jesusca paipaj Yaya shinami cꞌuyaj, llaquij, humilde can. Jesusmanta ashtahuan yachashpaca Yayitu Dios ima shina cashcatami ashtahuan alli intindingui. Chashnami paitaca ashtahuan cꞌuyangui. Por ejemplo, Jesusca gentecuna mana ricunayachishca pobrecunata, ungushcacunata, fuerza illajcunata cꞌuyaihuan tratashcatami yachanchij. Shinallataj paica alli causachunmi alaja consejocunata curca. Cai consejocunata pajtachishpaca allimi causangui (Mateo 5:1-11; 7:24-27). Cambaj juchacunamanta Jesús huañushcapi cutin cutin yuyashpaca paitami ashtahuan cꞌuyangui (Mateo 20:28). Jesús canmanta huañushcata yachaj chayashpaca juchacunamanta arrepintirishpami Yaya Diosta perdonachun mañangui (Hechos 3:19, 20; 1 Juan 1:9). Jehová Diosta, Jesusta ashtahuan cꞌuyashpaca Diosta cꞌuyajcunahuanpishmi tandanacunata munangui. w20.03 págs. 5, 6 párrs. 10-12

Shuj huauquica cai trabajotaca ñucallami alli rurai tucuni nishpami yuyai tucun. Cutin shuj panica ñuca cusallami shujtaj turicunatapish yalli cai trabajotaca alli pajtachi tucun nishpami yuyai tucun. Shinapish humilde cashpaca mana chashna yuyashunchu. Israel llajtapi shujtajcuna Dios mingashca trabajota chasquijpi, Moisés imata rurashcata yachashun. Israel llajtata mandanami Moisespajca valishca carca. Pero paita ayudachun Jehová Dios shujtaj israelitacunaman espíritu santota cujpica ¿Moisesca ima shinataj sintirirca? Mana pꞌiñarircachu (Números 11:24-29). Shujtaj cutinca Moisesca humilde cashcamantami shujtajcunapish juezcuna cachun saquirca (Éxodo 18:13-24). Achca juezcuna tiyashcamantami ima problemacunatapish rato allichi tucurcacuna. Chaimantami israelitacunaca mana achcata shuyana carcacuna. Moisespajca israelitacunata ayudanami ashtahuan importante carca. Paica ñucanchijmanca alli ejemplotami cushca. Jehová Dios humilde gentecunata paita sirvichun agllashcatami yuyaipi charina canchij. w19.09 págs. 5, 6 párrs. 13, 14

Gobiernocuna imata nishpa panda religioncunata tucuchinataca mana yachanchijchu. Quizás cai religioncunaca sumaj causaita charichunca mana saquincunachu. Cada ratomi politicapi yaicuncuna ningacunachari. Mana cashpaca achca cullquita, huasicunata, allpacunatami charin ningacunachari (Apocalipsis 18:3, 7). Ashtahuancarin gobiernocuna tucui panda religioncunata tucuchinga nishpaca mana chai tucui religioncunata catijcunata tucuchinatachu ricuchin. Ashtahuanpish cai Allpapi ña ni shuj panda religión tiyanatami ricuchin. Chaimi gentecunaca paicunapaj religioncunata pushajcuna mana imata rurai tucushcata cuenta japingacuna. Chaimantachari paicunaca chai religioncunamanta caruyangacuna. Bibliapica gobiernocuna panda religioncunata ashalla tiempopi tucuchinataca huillanmi (Apocalipsis 18:10, 21). Jehová Diosca agllashcacunapish, alli religionpish quishpirichunmi jatun llaqui punllataca utca tucuchinga (Marcos 13:19, 20). w19.10 pág. 15 párrs. 4, 5

Mamacunaca, cancunapaj yaya mamacunaca rato colerashpachari cancunata sinchita rimaj carca. Chaimantachari cancunapish huahuacunataca chashna shina rimashpami huiñachina canchij nishpa yuyanguichij. Tal vez huahuacunata ima shina huiñachinatami Bibliapi yachashcanguichij. Pero shaicushca rato huahuacuna mana cazujpica pacienciata ricuchinaca sinchichari can (Efesios 4:31). Chashna sintirishpaca chai ratomi Jehová Diosta mañana canguichij (Salmo 37:5). Huaquin mamacunapaj yaya mamacunaca paicuna uchilla cajpimi mana cꞌuyaita ricuchishcacuna. Chaimantami huaquin mamacunapajca huahuacunaman cꞌuyaita ricuchinaca sinchi can. Pero cai mamacunaca mana paicunapaj yaya mamacuna shinachu cana can. Diosta cazuj mamacunaca huahuacunaman ima shina cꞌuyaita ricuchinatami yachana canguichij. Chaipajca cambiana canguichij. Sinchi cajpipish pudinguichijmi. Cꞌuyaita ricuchingapaj esforzarishpaca familiahuanmi cushilla causanguichij. w19.09 págs. 18, 19 párrs. 19, 20

Shuj huauqui o pani cullquiyuj cangapaj tiempota, fuerzata gastashpaca ishqui amota sirvicushca shinami canman. Jehová Diosllata adorana cashcataca mana ricuchinmanchu. 100 huata manaraj tucujpimi Laodicea llajtapi tiyaj huauqui panicunaca: “Achcata charijmi canchij. Imata mana minishtinchijchu” nijcuna carca. Pero paicunaca Jehová Diospaj, Jesuspaj ñaupajpica huajchacuna shina, ciegocuna shina, lluchulla llaquinai shinami carcacuna. Jesusca paicuna charij cashcamantaca mana rimarcachu. Ashtahuanpish cullquipi yalli sustarishpa Jehová Diosmanta caruyacushcamantami rimarca (Apocalipsis 3:14-17). Jehová Diosca paitami tucui shunguhuan cꞌuyachun munan (Marcos 12:30). Chaimantami cullquipi yalli yuyai callarishpaca chai rato chai yuyaita cambiana canchij (1 Timoteo 6:7, 8). Chaita mana rurashpaca cullquita, charinacunatami cꞌuyashun. Diospish ñucanchij adorashcataca mana chasquingachu. w19.10 págs. 27, 28 párrs. 5, 6

Griego rimaipi “pushana” nishpaca huaquinpica “apanamantapishmi” parlacun. Hechos librota quillcaj Lucas runa barcota huaira “apaj cashcamantami” parlarca (Hechos 27:15). Bibliamanta yachaj shuj runaca: “Apóstol Pedro Bibliata quillcajcunata espíritu santomi pusharca nijpica gentecunaca barcota huaira apaj cashcapimi yuyashcangacuna” ninmi. Pedroca ima shinami huairaca barcota pꞌucushpa chayana pushtuman apan. Chashnallatajmi espíritu santoca profetacunatapish Bibliata quillcajcunatapish Dios mingashcata pajtachichun ayudan nicurcami. Bibliamanta yachaj chai runallatajmi: “Bibliata quillcajcunaca barco purichun barcopaj telacunata alzashpa pascaj shinami Dios mingashcata pajtachingapaj listos carcacuna” nircami. Jehová Diosca Bibliata quillcajcunamanca espíritu santotami curca. Chaimantami pai mingashcata pajtachircacuna. Chai shinallatajmi Diospaj espíritu santoca Diosta sirvijcuna llaquicunata apacujpipish paraíso Allpaman chayachun ayudanga. w19.11 págs. 9, 10 párrs. 7-9

Huaquinpica dimastij llaquillami sintirinchij. Pero llaquicunata chꞌimbapurana cashpapish mana chaipi yalli yuyanachu canchij. Chaipi yalli yuyashpaca Jehová Dios cusha nishcacunatami cungarishun (Apocalipsis 21:3, 4). Yallitaj llaquilla sintirishpaca Jehová Diosta sirvinatami saquishun. Estados Unidospi causaj shuj panimanta yachashun. Cai panipaj cusaca ungushcami can. Cai panica paipaj cusata cuidashpapish sinchi fetami charin. Paica: “Ñuca cusa ungushca cashcamantami maipica shaicushca, llaquilla sintirishcanchij. Pero Jehová Diosca ñucanchijman yachachishpami sinchiyachishca. Chaimantami ñaupajman catircanchij” nircami. Ñucanchijpish cai pani shina llaquilla cashpapish ñaupajmanmi catina canchij. Chaipajca llaquicuna Diablomanta shamushcatami crina canchij. Shinallataj llaquicunahuan cashpaca Jehová Dios ayudanapimi confiana canchij. Ashtahuancarin Jehová yachachishcacunatami shungupi huaquichina canchij. w19.11 pág. 16 párrs. 9, 10

Ancianocunaca cai versotami pajtachina can. Paicunaca huauqui panicuna pacalla parlashcataca shujtajcunamanca mana parlanallachu can. Cai parlashcacunata cutin tigra maijanmanpish parlajpica paipica mana confiangacunachu. Shinallataj paica malpimi saquiringa. Ancianocunaca congregacioncunata cuidachunmi agllashcacuna can. Chaimantami paicunaca shujtajcunamanta huashalla parlashpa, llullashpaca mana purina can (1 Timoteo 3:8, nota, NWT). Shinallataj shuj ancianoca huarmita cꞌuyashpaca mana parlana cashcataca paimanca mana huillanachu can. Shinami paipaj huarmica mana preocuparinga. Ancianocunapaj huarmicunaca paicunapaj cusacuna allipi saquirichunmi ayudai tucuncuna. ¿Ima shina? Mana parlana cashcata parlachunca mana obligashpami paicunapaj cusacunata apoyacushcata ricuchingacuna. Shinallataj huarmicunaca paicunapaj cusacunapi confiajcunatami respetashcata ricuchingacuna. Chashnami ancianocunapaj huarmicunaca congregacionpi tucuicuna tandalla, cushilla cachun ayudangacuna. Chaimantami Yaya Diospish cai laya huarmicunamantaca cushilla sintiringa (Romanos 14:19). w20.03 pág. 22 párrs. 13, 14

Jesús manaraj huacharijpi 1512 huatapica, israelitacunaca Sinaí urcupimi Diospaj carpa huasita shayachircacuna. Chai qꞌuipaca Moisesca Aaronta, paipaj churicunatapish sacerdotecuna cachunmi agllarca (Éxodo 40:17; Levítico 9:1-5). ¿Jehová Diosca sacerdotecunataca ima shinataj pai agllashcata ricuchirca? Aaronpish Moisespish tucui israelitacunata bendiciashca huashami, Jehová Diosca jahua pachamanta ninata cachashpa altar jahuapi tiyacuj tucui ofrendacunata rupachirca. Chashnami Jehová Diosca Aaronta, paipaj churicunatapish agllashcata ricuchirca (Levítico 9:23, 24). Israelitacunaca caita ricushpaca sacerdotecunata Dios ayudacushcatami cuenta japircacuna. Chaimantami paicunaca sacerdotecuna Diosta sirvishpa catichun ayudarcacuna. ¿Aaronta, paipaj churicunatapish Jehová Dios ayudashcataca imamantataj alli intindina canchij? Jehová Diosca sacerdotecunata Jesús mandaj cachunmi agllashca. Shinallataj jahua pachapi mandachun, sacerdotecuna cachunpishmi 144 mil gentecunata agllashca (Hebreos 4:14; 8:3-5; 10:1). Caita ricushpami Jehová paipaj pueblota ñaupajman pushacushcata intindinchij. w19.11 págs. 23-25, párrs. 13, 14, 16

Corinto llajtapica apóstol Pabloca Aquilahuan Priscilahuan carpa huasicunata rurashpami trabajarca. Apóstol Pabloca “punllapish tutapish” trabajarcanchij nishpaca trabajacushcallataca mana nicurcachu. Ashtahuanpish sábado punllaca paipish judiocunapish mana trabajajcunachu carca. Chaimantami Pabloca sábado punllapi judiocunaman predicaj carca (Hechos 13:14-16, 42-44; 16:13; 18:1-4). Pabloca mantiniringapaj trabajashpapish Diosmantami siempre huillarca (Romanos 15:16; 2 Corintios 11:23). Shujtajcunapish Diosmanta huillachunmi animarca. Chaimantami Áquila, Priscilapish Pablohuan Jesuspajta ruranapi ashtahuan ocuparircacuna (Romanos 12:11, NWT; 16:3). Apóstol Pabloca Corinto llajtapi causaj huauqui panicunataca: ‘Mandaj Diospajta ruranapi catiraichij’ nircami (1 Corintios 15:58, NWT; 2 Corintios 9:8). Shinallataj “maijanpish mana imata rurasha nijca ama micuchun” nircami (2 Tesalonicenses 3:10). w19.12 pág. 5 párrs. 12, 13

Jehová Diosca Adanta Evataca huahuacunata charichunmi rurarca. Pero ¿cazarashcacuna huahuacunata charinata o mana charinataca pitaj agllana can? Huaquin llajtacunapica familiacuna, amigocunami cunanlla cazarashcacunataca huahuacunata utca charichun munancuna. Asia llajtamanta Jethro shuti huauquica: “Congregacionpica maijan huauqui panicunaca huahuacunata mana charijcunataca huahuacunatami charina canguichij nincunami” ninmi. Shinallataj Asia llajtamanta huauqui Jefrica: “Huaquin yaya mamacunaca cancuna mayorlla tucujpi cancunata cuidachunmi huahuacunata charina canguichij nincunami” ninmi. Shinapish huahuacunata charinata o mana charinataca cazarashcacunallatajmi agllana can (Gálatas 6:5). Familiacunapish amigocunapish cunanlla cazarashcacuna cushilla causachun munashpapish paicunallataj decidichunmi saquina can (1 Tesalonicenses 4:11). w19.12 págs. 22, 23 párrs. 1-3

Huaquinpica Jehová Diostaca shuj Yayata shina ricunaca sinchimi can. ¿Imamanta? Maijancunaca imapaj mana valishca shina sintirishpami: “Jehová Diosca jatun mandajmi can. Ñucanchijmantaca mana preocuparinchu” nishpa yuyancuna. Pero Jehová Diosca mana chashna yuyachunchu munan. Ashtahuanpish causaita cushcamantami paihuan alli apanacuchun munan. Apóstol Pabloca Atenas llajtapi cashpaca: ‘Yaya Diosca ñucanchijmantaca mana carupichu’ nircami (Hechos 17:24-29). Jehová Diosca shuj huahua paipaj yayapajman cꞌuchuyacuj shinallataj ñucanchijpish paipajman cꞌuchuyachunmi munan. Shujtajcunaca paicunapaj yaya, cꞌuyaita mana ricuchishcamantami Jehová Diostaca cꞌuyaj yayata shinaca mana ricui tucuncuna. Shuj panica: “Ñuca yayaca maltratashpami causarca. Chaimantami Bibliata yachai callarishpaca Jehová Diostaca cꞌuyaj Yayata shina ricunaca sinchi carca. Ñucanchijpish cai pani shina sintirishpaca mana desanimarinachu canchij. Tiempohuanmi Jehová Dios cꞌuyaj Yaya cashcata intindishun. w20.02 pág. 3 párrs. 4, 5

Jesusca yuyajlla huauqui panicunamanca achcata rurashpapish o ashallata rurashpapish Diospajca tucuimi valishca can nircami (Salmo 92:12-15; Lucas 21:2-4). Chaimanta imata rurai tucushcapi yuyashunchij. Por ejemplo, Jehová Diosmanta huillashunchij. Huauqui panicunamantapish Diosta mañashunchij. Shinallataj paicuna Diosta alli sirvichun animashunchij. Diosca chashna sirvijcunatami valoran (1 Corintios 3:5-9). Jehová Diosca ñucanchijtaca paita sirvichunmi rurarca. Chaimantami Diosta sirvishpaca cushilla sintirinchij (Apocalipsis 4:11). Gentecunaca ñucanchijtaca imapaj mana valishcata shinami ricuncuna. Mana cashpaca ungüi japishcamanta, cullqui illaj saquirishcamanta, yuyajlla tucushcamantachari llaquilla causanchij. Pero ñucanchijca Jehová Diospajca valishcami canchij (Hebreos 11:16, 38). Yayitu Diospaj cꞌuyaimantaca pi mana caruyachingachu (Romanos 8:38, 39). w20.01 págs. 18, 19 párrs. 16, 18, 19

Ama envidiangapajca charishca cosascunallahuan mana jatun tucushpami cushilla causana canchij. Chashnami shungupi envidiana munaitaca mana charishun. Humildes cashpaca shujtajcunata yalli cashcataca mana yuyashunchu. Shinallataj ñucanchijpajlla alli canataca mana mashcashunchu (Gálatas 6:3, 4). Charishca cosascunallahuan cushilla causashpaca shujtajcunata yalli charinataca mana munashunchu (1 Timoteo 6:7, 8). Ashtahuancarin shujtajcuna ima allita chasquijpica cushillami sintirishun. Ama envidiangapajca Dios paipaj espíritu santota cuchunmi minishtinchij. Espíritu santota chasquishpaca imamanta envidiai callarishcatami cuentata cushun. Jehová Dios ayudajpimi shungumanta envidiana munaita anchuchishpa alli munaicunata, alli yuyaicunata charishun (Salmo 26:2). Chashnami mana jatun tucushpa charishca cosascunallahuan cushilla causashun (Gálatas 5:16; Filipenses 2:3, 4). w20.02 págs. 15, 17 párrs. 8, 9

Diosman mingarishpaca paihuanmi ari ninacungui. Chaimantami Jehová Diosca can ari nishcata pajtachichun munan. Diosta sirvijcunamantaca manataj caruyana cangui. Tandanacuicunaman mana faltashpaca huauqui panicunahuanmi alli apanacungui. Bibliatapish tucui punllacunami liyina cangui, liyishcapipish cutin cutinmi yuyana cangui (Salmo 1:1, 2). Chashnami cai yachashcacunaca cambaj shunguman chayanga. Shinallataj Jesús nishcatami pajtachina cangui. Paica: “Mañaraichij” nircami (Mateo 26:41). Shungumanta Jehová Diosta mañashpaca paipajmanmi ashtahuan cꞌuchuyangui. Ashtahuancarin “Diospaj gobiernotami punta lugarpi churana” cangui (Mateo 6:33, NWT). ¿Ima shina? Diosmanta huillanataca manataj saquinachu cangui. Chashnami sinchi feta charingui. Cunan charishca llaquicunaca ‘tucurijlla llaquicuna’ cashcatami yuyarina cangui (2 Corintios 4:17). Diosman mingarina, bautizarinami cambaj causaipica valishca can. Chaimanta cunan punllacunapipish, shamuj punllacunapipish alli causaitami charingui (1 Timoteo 6:19). w20.03 pág. 13 párrs. 19-21

Bibliamanta yachacuj paipaj causaipi cambiocunata mana rurajpica yachachishpa catinata o saquinatami ricuna canchij. Pero manaraj saquishpaca: “¿Yachacujca ima yachashcata pajtachingapajca tucui pudishcatachu ruracun?” nishpami tapurina canchij (Mateo 28:20). Huaquin yachacujcunaca Ezequiel causashca punllacunapi israelitacuna shinami can. Jehová Diosca Ezequielmanca: ‘Riqui, canca israelitacunapajca cꞌuyaimanta cantaj runa shinamari cangui. Cantaca sumaj cungata charishcamanta alli cantashcata uyanachij shina, can imalla nishcata uyashpapish, chaitaca mana pajtachingacunachu’ nircami (Ezequiel 33:32). Yachacujcunataca canman yachachinatami saquigrini ninaca sinchichari ricuringa. Pero tucuri punllacuna quichquiyamucushcamantami Diosta sirvisha nijcunataca mashcana canchij (Hechos 13:48). w20.01 págs. 6, 7 párrs. 17, 20

Bibliapica cazuj gentecunaca cai Allpapimi huiñaita causangacuna ninmi. Pero Jesusta catinchij nij religioncunaca allita rurajcunaca huañushca qꞌuipaca cielomanmi rinchij nishpami yachachincuna (2 Corintios 4:3, 4). Cutin Bibliamanta yachacujcunaca 100 yalli huatacuna huashamanca mana chaita crircacunachu. Paicunaca 1879 huatamantami Watch Tower nishca revistata rurarcacuna. Cunanca chai revistataca Huillaj revista nishpami rijsinchij. Bibliamanta yachacujcunaca, achca cazuj gentecuna mana jahua pachapi causagrina cashcata, ashtahuanpish cai Allpapi huiñaita causana cashcatami crircacuna. Chaita crishpapish achca cazuj gentecuna picuna cashcataca mana yacharcacunachu. Bibliamanta yachacujcunaca huaquincuna Jesushuan jahua pachapi mandangapaj agllashcacuna cashcatami intindircacuna (Apocalipsis 14:3). Cai agllashcacunaca 144 mil gentecunami can. Paicunaca cai Allpapi cashparajmi Diosta alli sirvijcuna cashcata ricuchincuna. w19.09 pág. 27 párrs. 4, 5