Enero

Timoteoca Biblia yachachishcacuna verdad cashcata tucui shunguhuan crishcamantami sinchi feta charirca. Ñucanchijpish Jehovamanta yachachishcacunata tucui shunguhuan cringacamami Bibliata estudiashpa catina canchij. Jehová Diosmanta yachachishcacunataca tucui shunguhuan crishunchij. Puntapica, Jehová Dios tucuita ruraj Dios cashcatami crina canchij (Éxodo 3:14, 15; Hebreos 3:4; Apocalipsis 4:11). Ishquipica, Jehová Dios ñucanchijta yachachingapaj Bibliata cushcatami crina canchij (2 Timoteo 3:16, 17). Quimsapica, testigo de Jehovacuna paita adorachun Dios agllashca pueblo cashcata, Jesús ñaupajman pushacushcatami tucui shunguhuan crina canchij (Isaías 43:10-12; Juan 14:6; Hechos 15:14). Caicunata verdad cashcata cringapajca Bibliamanta tucuita yachanataca mana minishtinchijchu. Ashtahuanpish alli estudiajcunami cana canchij (Romanos 12:1). w20.07 págs. 9, 10 párrs. 8, 9

Apocalipsis libropica: ‘Langostacunaca umacunapi, curi coronacunata shina churashcacunami carca. Paicunapaj ñahuicunapish gentepaj ñahuicuna shinami carcaꞌ ninmi (Apocalipsis 9:7). Langostacunaca ‘Diospaj sellota paicunapaj frentepi mana charijcunallataꞌ o Diospaj contracunatami llaquichincuna. Paicunaca pichca quillacama canishpami huanachincuna. Chai animalcunaca pichca quillacunallatami causancuna (Apocalipsis 9:4). Cai langostacunaca jahua pachapi causachun Dios agllashcacunatami ricuchij yuyachin. Paicunaca mana manchashpami Jehová Diosca ñallami millai gentecunataca tucuchinga nishpa huillancuna. Cai mundopaj ruraicunata catijcunaca caita uyashpaca mana alli sintirincunachu. Cai yuyaicunaca Joel 2:7-9-pi parlashca langostacuna Apocalipsispi parlashca langostacunahuan mana igual cashcatami ricuchin. Bibliapica shuj chꞌimbapuraillatajmi huaquinpica chꞌican chꞌican yuyaicunata intindichin. Chaimantami mana mancharina canchij. Por ejemplo, Apocalipsis 5:5-pica Jesusca “Judá aillumanta Leonmi” can ninmi. Cutin 1 Pedro 5:8-pica “Diabloca león huacaricuj shinami” can ninmi. w20.04 págs. 3-5 párrs. 8, 10

Agarca Saraipaj esclavami carca. Qꞌuipaca Agarca Abrampaj caishuj huarmimi tucurca. Saraica huahuacunata mana chari tucurcachu. Pero Agarca chichu saquirishpami jatun tucushpa Saraitaca mana ricunayachirca. Chaimantami Sarai paita llaquichi callarijpica Agarca miticushpa rirca (Génesis 16:4-6). Juchayujcuna cashcamantami ‘Agarca chashna llaquita charinaca allimi carcaꞌ nishpa yuyai tucunchij. Shinapish Jehová Diosca mana chashna yuyarcachu. Chaimi paipaj yuyaita cambiachun, paita bendiciachun shuj angelta cacharca. Agarca Jehová Dios paita ricucushcata, paimanta sustarishcatami cuentata curca. Chaimantami paica: “Ñucata ricuj Taita Diosmi” cangui nirca (Génesis 16:7-13). ¿Diosca Agarmantaca imatataj yacharca? Ñaupa punllacunapi ima shina causashcata, imata rurashcatami alli yacharca. Saraita Agar mana respetashcataca Jehová Diosca allimi yacharca. Shinapish Agar ima shina sintirishcata yachashpami Diosca cꞌuyaihuan tratarca. w20.04 pág. 16 párrs. 8, 9

Apóstol Pabloca Diosta sirvijcunaca shuj carrerapi callpacuj shinami canchij nircami (Hebreos 12:1). Mashna huatacunata charishpapish, fuerza illaj cashpapish, fuerzayuj cashpapish Dios cusha nishca premiota japingacamami tucuicuna callpana canchij (Mateo 24:13). Pabloca tucui shunguhuanmi carrerapi callpanamanta parlarca. Paillatajmi: “Callpashpa mishanacuitapish tucuchishcanimi” nirca (2 Timoteo 4:7, 8). Pero Pabloca ¿ima carreramantataj parlacurca? Huaquinpica Pabloca Diosta sirvijcunamanca Grecia llajtapi tiyaj pugllaicunahuan chꞌimbapurashpami yachachij carca (1 Corintios 9:25-27; 2 Timoteo 2:5). Achca cutinmi Diosta sirvijcunataca shuj carrerapi callpacujcunahuan chꞌimbapurarca (1 Corintios 9:24; Gálatas 2:2; Filipenses 2:16). Maijanpish Diosman mingarishpa, bautizarishpaca carrerapi callpanata callarij shinami can (1 Pedro 3:21). Ashtahuanpish Jehová Dios huiñai causaita cujpimi carrerata mishaj shina can (Mateo 25:31-34, 46; 2 Timoteo 4:8). w20.04 pág. 26 párrs. 1-3

Bibliapica: ‘Mandaj Diosmi paillapi shunguta churajcunataca huaquichinꞌ ninmi (Salmo 31:23). ¿Jehová Diosca ima shinallataj ñucanchijta cuidan? Jehová Diosca Diablo ama pandachichunca tucui macanacunata churarichunmi cushca (Efesios 6:13-17). Pero cai macanacunataca imapaj mana llujchinachu canchij. Mana llullahuan alli chumbillirishca shinami Bibliapi yachachishcacunata crina canchij. ¿Imamantataj chaita rurana canchij? Diabloca llullata callarichij cashcamantami llullapaj yaya can (Juan 8:44). Chaimantami paica tucui Allpapi gentecunataca umashpa caticun (Apocalipsis 12:9). Pero ñucanchijca Diablo ama pandachichunca Bibliapi yachachishcacunatami crina canchij. Chaimantami Jehová Diosmanta yachashpa, pai munashca shina tucui shunguhuan adorana canchij. Shinallataj tucuipimi honrados cana canchij (Juan 4:24; Efesios 4:25; Hebreos 13:18). w21.03 págs. 26, 27 párrs. 3-5

Chai llajtapi Jehová Diosta adorashcamantami ‘sumaj llajtaꞌ nishpa rijsijcuna carca. Pero huata 33-pi tiyaj Pentecostés punllamanta huichimanmi cai sumaj llajtaca mana shuj lugar cashcata ricuchin. Diosta sirvijcunaca muyundij Allpapimi causancuna. Chaimantami cunan punllacunapica chai ‘sumaj llajtacaꞌ Diosta alli sirvijcuna ima shina causashcata ricuchin. Paicunaca tandanacuiman rishpa, huillanaman llujshishpami Jehová Diosta adorancuna. Cai tucurimui punllacunapica janaj ladomanta mandajca achca cutinmi ‘sumaj llajtaman’ yaicushca. Por ejemplo, Alemania nazi janaj ladomanta mandaj cajpica ‘sumaj llajtaman’ yaicuj shinami Diosta sirvijcunataca catirashpa llaquichishpa huañuchircacuna. Segunda Guerra Mundialpimi ashtahuantajca chaita rurarca. Chai qꞌuipaca Unión Sovieticapish janaj ladomanta mandaj tucushpami sumaj llajtaman yaicuj shina Diosta adorajcunata catirashpa llaquichirca. Paicunapaj huasicunamantapish llujchishpa caru llajtaman richunmi obligarca. w20.05 págs. 13, 14 párrs. 7, 8

Diospaj huaquin amigocunamanta yachashun. Paicunaca Jesús manaraj cai Allpaman shamujpimi causarcacuna. Abrahamca Diospimi tucui shunguhuan crirca. Pai huañushca mil huatacuna pasajpipish Yayitu Diosca “ñucahuan alli apanacuj” nircami (Isaías 41:8). Paita sirvijcuna huañujpipish Jehová Diosca paipaj alli amigocuna cashcata yuyarishpami catin. Chaimantami Jehová Diosca Abrahamtaca manataj cungarishca (Lucas 20:37, 38). Jobpish Diospaj alli amigomi carca. Shuj cutinca angelcuna jahua pachapi tandanacushca cajpimi Diosca Jobpi confiashcata ricuchirca. Paimanta parlashpaca Diosca: “Paica ima pandata mana ruraj, allita ruraj, ñucatapish manchaj, millaita ruranatapish pꞌiñajmi” nircami (Job 1:6-8). Danielca 80 huatacunatami yanga dioscunata adorajcunapaj chaupipi Diosllata sirvishpa causarca. ¿Diosca Danielmantaca imatataj yuyarca? Daniel ña mayorlla cajpica quimsa cutinmi angelcunaca, Diospajca “canca yallitaj cꞌuyashcami cangui” nishpa animarca (Daniel 9:23; 10:11, 19). Jehová Dios paipaj amigocuna causarichun shungumanta munashcatami yachanchij (Job 14:15). w20.05 págs. 26, 27 párrs. 3, 4

Bibliamanta estudiacujcunaca Jehová Diospaj mandashcacunata yachashpachari paita respetangacuna. Pero ¿Jehová Diostaca cꞌuyashcamantachu cazungacuna? Eva ima tucushcata yuyashun. Evaca Diospaj mandashcacunata rijsircami. Pero paica Diostaca mana shungumanta cꞌuyarcachu. Adanpish chaitami rurarca (Génesis 3:1-6). Chaimanta Diospaj mandashcacunata yachachishpallaca mana saquirinachu canchij. Diospaj mandashcacunaca alajami can. Chaicunami ñucanchij alli causachun ayudan (Salmo 119:97, 111, 112). Bibliamanta yachacujcuna caicunata intindichunca Dios tucuicunata cꞌuyashcamanta mandashcacunata cushcatami intindina can. Yachacujcunataca cashnami tapui tucunchij: “¿Imamantataj Jehová Diosca caita rurangui caitaca ama rurangui nishpa mandan? Caicunaca Jehová Diosmantaca ¿imatataj yachachin?”. Bibliamanta yachacujcunaman Jehová Diospi yuyachun, paipaj shutita cꞌuyachunmi yachachina canchij. Chashnami paicunapaj shunguman chayashun. Chaita rurajpica paicunaca Diospaj mandashcacunata valichishpami Diostaca shungumanta cꞌuyangacuna. Shinallataj paicunapaj femi sinchiyanga. Sinchi llaquicuna ricurijpipish ahuantangacunami (1 Corintios 3:12-15). w20.06 págs. 10, 11 párrs. 10, 11

Diosmanta caruyashcacunaca Diospajman tigrangapajca tiempotami minishtincuna. Chaimantami paicunata ayudangapajca pacienciata charina canchij. Maijancunaca congregacionman tigrachun huauqui panicuna, ancianocunapish cutin cutin visitashcatami yuyarincuna. Asia llajtamanta Nancy shuti panica cashna nishpami escribin. Paica: “Congregacionmanta shuj ñañaca ñuca minishticun horaspimi achcata ayudarca. Ñucataca punta ñañata shinami cꞌuyarca. Paihuan sumajta pasashcatami yuyachij carca. Ñuca ima shina sintirishcata parlajpica pacienciahuanmi uyaj carca. Imapipish consejana cajpica utcami consejarca. Chashnami ñuca alli amiga cashcata ricuchirca” ninmi. Maijancunaca resentirishca cashcamantami shuj chugririshca shina can. Pero paicuna ima shina sintirishcata intindishpaca shuj pomada jambita churacuj shinami alli sintirichun ayudashun. Huaquincunaca congregacionpi shuj huauqui o pani paicunata llaquichijpimi achca huatacunata resentirishca can. Chaimantami Diospajmanca mana tigrasha nincuna. Maijancunaca paicunata yangamanta rimashcata o mana alli tratashcatami yuyancuna. Chaimi paicuna parlashcata uyachun, ima shina sintirishcata intindichun minishtincuna. w20.06 págs. 26, 27 párrs. 10, 11

Tentacioncunata vincishpaca shujtaj tentacioncunapica mana urmanguichu. Satanasca cai mundopaj gentecuna chayarinamanta mana allicunata yuyachunmi pandachishca. Ñucanchijca paicuna shina mana yuyashpaca Diablo pandachichunca mana saquishunchu. Jehová Diosllami ima ruraicuna jucha cashcataca huillan. Chaimantami juchapi ama urmangapajca esforzarinchij. Pero juchapi urmashpaca chai ratomi Jehová Diosman tucuita huillana canchij (1 Juan 1:9). Cutin jatun juchapi urmashpaca ancianocunatami ayudachun mañana canchij. Jehová Diosmi paicunataca ñucanchijta cuidachun agllashca (Santiago 5:14-16). Pero ima juchacunata rurashca cashpaca mana llaquirishpallachu pasana canchij. ¿Imamanta? Cꞌuyaj Yaya Diosca ñucanchij juchacunata perdonangapajmi paipaj Churita cushca. Chaimantami shungumanta arrepintirijpica paica perdonan. Chaimi concienciapi alli sintirishpa Jehová Diosta sirvishun (1 Juan 2:1, 2, 12; 3:19, 20). w20.07 págs. 22, 23 párrs. 9, 10

Achca tiempotami Jehová Diosca pailla causarca. Sololla cashpapish mana llaquilla sintirircachu. Cushilla causangapajpish mana pita minishtircachu. Pero cꞌuyaimantami shujtajcuna cushilla causachun munarca. Chaimantami tucuita rurarca (1 Juan 4:19). Puntapica Jehová Diosca paipaj Churi Jesustami rurarca. Qꞌuipaca Diosca jahua pachapi, cai pachapi tucui imalla tiyajtaca paipaj Churihuanmi rurarca. Achca angelcunatapishmi rurarca (Colosenses 1:16). Jesusca paipaj Yayahuan trabajashcamantami cushilla sintirirca (Proverbios 8:30). Jahua pachata, cai pachata ruracujta ricushpami angelcunapish cushilla sintirircacuna. Bibliapica angelcunaca Yaya Diostami alabai callarircacuna ninmi. Jehová Dios gentecunatapish ruracujta ricushpaca angelcunaca Yaya Diostaca alabashpami catircacuna (Job 38:7; Proverbios 8:31). Jehová Dios tucui imalla rurashcacunaca pai cꞌuyaj, tucuita yachaj cashcatami ricuchin (Salmo 104:24; Romanos 1:20). w20.08 pág. 14 párrs. 1, 2

Jehová Diosca ñucanchijtaca shujtajcunata cꞌuyachun, ñucanchijtapish paicuna cꞌuyachunmi rurarca. Chaimantami ñucanchijta shujtajcuna llaquichijpica llaquilla o mancharishca sintirinchij. Shuj huauquica: “Jehovata sirvicushcamanta soldadocuna ñucata macajpi, rimajpica mancharishcami saquirircani” ninmi. Huaquinpica gentecuna pꞌiñajpipish mana mancharinachu canchij. Jesusca ñucanchijta pꞌiñanatami huillarca. Cai mundopaj ruraicunapi mana chagrurishcamantami gentecunaca Diosta sirvijcunataca pꞌiñancuna (Juan 15:17-19). Ñucanchijca gobiernocunata respetashpapish mana politicacunapi chagrurinchijchu. Himno nacionaltapish mana cantanchijchu. Banderatapish mana saludanchijchu. Yaya Dioslla mandana derechota charishcata difindishpami paillata adoranchij. Chaimi Diablopish paita apoyajcunapish Jehová Dios ama gobernachunca jarcasha nincuna (Génesis 3:1-5, 15). Ñucanchijca Jehová Diospaj Gobiernolla tucui llaquicunata tucuchinata, mana alli gentecunatapish tucuchinatami predicanchij (Daniel 2:44; Apocalipsis 19:19-21). Alli shungu gentecunaca caita uyashpaca cushillami sintirincuna. Pero millaicunaca pꞌiñarincunami. w21.03 pág. 20 párrs. 1, 2

¿Panicunamantapish imatataj ni tucunchij? Paicunaca Jehová Diosta sirvingapajmi esforzarincuna. Paicunaca yachaj, sinchi feta charij, cushicuihuan Diosta sirvij, mana manchaj, mana mitsa, allicunata rurajcunami carca (Lucas 8:2, 3; Hechos 16:14, 15; Romanos 16:3, 6; Filipenses 4:3; Hebreos 11:11, 31, 35). Congregacionpi mayorlla huauqui panicuna tiyashcamantami shuj bendición can. Paicunaca mayorlla cashcamanta, fuerzasta mana charishcamantachari congregacionpi, huillanapi mana tanto ayudai tucuncuna. Pero predicangapaj, shujtajcunata animangapaj, yachachingapajpishmi achcata esforzarincuna. Paicunapaj experienciamantaca achcatami yachai tucunchij. Paicunaca Jehová Diospajpish ñucanchijpajpish achca valishcami can (Proverbios 16:31). Cunanca jovencunapipish yuyashun. Diablo cai pachata mandacushcamanta, pai pandachisha nishcamantami jovencunapajca Diosta sirvinaca sinchi can. Pero paicuna tandanacuipi comentajpi, huillanaman llujshijpi, paicunapaj crishcacunata difindijpica achcatami animarinchij. Jovencuna, congregacionpica Diospajca achca valishcami canguichij (Salmo 8:2). w20.08 págs. 22, 23 párrs. 9-11

Huillai callarishpa o testigo de Jehová tucushpaca sinchi huairata shina, tamyata shinami tal vez jarcaicunata charingui. Ñucanchij familiacuna jarcajpi, amigocuna burlarijpi o gentecuna mana uyasha nijpimi Jesús nishca jarcaicunahuan chꞌimbapuranchij. ¿Mana manchaj cangapajca imatataj rurana cangui? Jesús jahua pachamanta predicacionta pushacujtaca mana cungarinachu cangui (Juan 16:33; Apocalipsis 14:14-16). Shinallataj Jehová Dios ñucanchijta cuidanatami tucui shunguhuan crina cangui (Mateo 6:32-34). Cambaj feta sinchiyachishpaca mana manchajmi tucungui. Can sinchi feta charishcamantami cambaj amigocunaman, familiacunaman Bibliata yachai callarishcata huillashcangui. Tandanacuicunamanpishmi ri callarishcangui. Shinallataj Dios mandashcacunata pajtachingapajmi huaquin cambiocunataca rurashcangui. Chashnami mana manchaj cashcata ricuchishcangui. Chashna esforzaricushcamantami Jehová Diosca cantaca manataj saquinga (Josué 1:7-9). w20.09 págs. 4-6 párrs. 11, 12

Asapaj ejemplomantami yachai tucunchij. Asaca jovenmantami jarcaicuna tiyajpipish alli causai tiyajpipish Diosta sirvina decisionta agllarca (1 Reyes 15:14). Asamanta parlashpaca Bibliapica: “Paica rurashcalla dioscunata yuyarina altarcunatapish, lomacunapi tiyaj altarcunatapish tucuimi urmachirca. Shinallataj dioscunata rurashca rumicunatapish pꞌaquircami” ninmi (2 Crónicas 14:3, 5). Shinallataj paipaj abuela Maaca shutitapish shuj yanga diosta adorachun mandashcamantami paipaj mandanata quichurca (1 Reyes 15:11-13). Rey Asaca yanga dioscunallataca mana tucuchircachu. Ashtahuanpish Judá llajtapi causajcunata cutin Jehová Diosta adorachunmi ayudarca. Chaimantami Jehová Diosca rey Asamanpish Judapi causajcunamanpish tranquilo sumaj causaita curca. Rey Asá mandacujpica Judá llajtapica 10 huatacunatami tranquilo causaita tiyarca (2 Crónicas 14:1, 4, 6). w20.09 págs. 14, 15 párrs. 2, 3

Huaquinpica ima valishca cosascunata charishpaca shuj rijsishcamanmi pai cuidachun minganchij. Por ejemplo, cullquitaca pi ama shuhuachun o ama chingarichunmi bancopi huaquichinchij. Apóstol Pabloca Timoteotaca paipish valishca cosascunata chasquishcatami yuyachirca. Por ejemplo, Jehová Diosca Timoteomanca paipaj munai gentecunapaj ima cashcatami yachachirca. Shinallataj predicachunmi mingarca (2 Timoteo 4:2, 5). Chaimi Pabloca Timoteomanca canman imalla mingashcataca allimi cuidana cangui nirca. Jehová Diosca ñucanchijmanpish valishca cosascunatami mingashca. Jehová Diosca cꞌuyaimantami Bibliapi tiyaj yachachishcacunataca ñucanchijman yachachishca. Cai yachachishcacunami Diospaj amigos cachun, cushilla causachun ayudan. Bibliapi yachachishcacunata pajtachishpaca panda yachachishcacunatami huashaman saquishcanchij. Mapa causaitapishmi saquishcanchij (1 Corintios 6:9-11). Chaimantami Bibliapi yachachishcacunaca tucuimanta yalli valishca can. w20.09 pág. 26 párrs. 1-3

Imata yachashcataca ciertotaj cashcatami cushilla yachachina canchij. Yachacujca chaitami ricunga. Chashnami yachacujca cushilla sintiringa. Ñucanchij causaipipish Biblia yachachishcacuna ima shina ayudashcatami parlai tucunchij. Yachacujca Biblia yachachishcacunata paipaj causaipi ayudai tucushcatami cuentata cunga. Yachacuj shuj problemata charijpica pai charishca laya problemacunata charij huauqui panicunapaj experienciacunamantami parlai tucunchij. Chai huauqui panicuna ima shina chai problemacunata chꞌimbapurashcatapishmi parlai tucunchij. Mana cashpaca maijan huauqui panipaj experienciami ayudai tucun. Paicuna compañachunmi mañana canchij. Chai experienciacunamanta yachashpaca Biblia yachachishcacuna paitapish ayudai tucushcatami intindinga. Yachacuj cazarashca cajpica paipaj cusa o huarmi Bibliamanta yachachunmi invitai tucunchij. Shinallataj imata yachashcacunatapish amigocunaman familiacunaman parlachunmi animai tucunchij (Juan 1:40-45). w20.10 págs. 16, 17 párrs. 7-9

Yaya mamacunaman cushca consejocunata catishcamantami Josepish Mariapish Jesusta Diospaj ñaupajpi alli ricurichun ayudarcacuna (Deuteronomio 6:6, 7). Josepish Mariapish Jehová Diostaca achcatami cꞌuyajcuna carca. Paicuna shina huahuacuna Jehová Diosta cꞌuyachun ayudanami importante carca. Josepish Mariapish paicunapaj huahuacunahuanmi Jehová Diosta sirvinata agllarcacuna. Cada semanacunami Nazaretpi saquirij sinagogaman rijcuna carca. Shinallataj Jerusalenmanmi cada huata pascua fiestata rurangapaj rijcuna carca (Lucas 2:41; 4:16). José paipaj familiahuan chaiman ricushpaca Diospaj pueblohuan ima tucushcatami parlajcuna cashcanga. Shinallataj Bibliapi parlaj lugarcunatapishmi visitashcangacuna. Huahuacunata charishcamantami Jehová Diosmanta cutin cutin huahuacunaman yachachinaca ashtahuan sinchi cashcanga. Pero Diosta adoranata manataj saquishcamantami tucui familia Jehová Diospaj ñaupajpi alli ricurirca. w20.10 pág. 28 párrs. 8, 9

Yachacujman manaraj yachachingapaj acompañanaman rishpaca ñucanchijrajmi alli prepararina canchij. Shuj precursor huauquica: “Ñuca compañero alli prepararishpa rishpaca yachacujtaca achcatami ayudan” ninmi. Yachachijpish yachachijta acompañajpish alli prepararishpaca yachacujmanmi alli ejemplota cuncuna. Pero maipica yachachijta acompañashpaca tal vez imata yachachigrishcataca manachari tucuita alli prepararinchij. Shinapish ima yachaimanta valishca yuyaicunata intindingapajmi prepararina canchij. Bibliamanta yachachishpa callaringapajca Yaya Diosta mañanami importante can. Chaimanta yachachij Yayitu Diosta mañachun nijpica imata nigrishcatami alli yuyanaraj canchij (Salmo 141:2). Japón llajtamanta pani Hanaeca: “Ñucata yachachingapaj acompañaj ñaña Yayitu Diosta mañajpica Yaya Dioshuan pai alli apanacushcatami cuentata curcani. Ashtahuancarin ñucamanta Diosta mañajpica ñucata cꞌuyashcatami cuentata curcani” ninmi. w21.03 págs. 9, 10 párrs. 7, 8

Jesusca Apóstol Pablotaca Romamanmi chayangui nirca. Jerusalenmanta huaquin judiocunaca Pablota huañuchisha nishpami shuj trampata churasha nircacuna. Romamanta soldadocunata mandaj Claudio Lisiasca Pablota huañuchisha nijta yachaj chayashpami paita ayudarca. Chai ratomi mandaj Claudioca achca soldadocunata Pablota cuidachun mandarca. Soldadocunaca Pablotaca Cesarea llajtacamami cuidashpa rircacuna. Cesarea llajtapica mandaj Felixca Pablotaca Herodes mandashpa tiyana huasipi churashpami soldadocunata cuidachun mandarca. Chashnami Pabloca paita huañuchisha nijcunamanta quishpirishca carca (Hechos 23:12-35). Mandaj Félix llujshijpica Cesarea llajtapica Festomi mandai callarirca. Mandaj Festoca judiocunapaj ñaupajpi alli ricurisha nishpami Pablotaca: “¿Jerusalenman risha ninguichu canta imallata juchachicushcata chaipi tapungapaj?” nishpa tapurca. Pabloca pai Jerusalenman rijpi chaipi paita huañuchinataca allimi yacharca. Chaimi Pabloca: “Ñucataca Cesartaj alli tapuchun ninimi” nirca. Festoca Pablotaca, ‘canllatajmi César ñucata tapuchun nircangui. Chaimantami cunanca chaiman rina cangui’ nircami. Mandaj Festoca Pablota Romaman cachashpaca judiocuna ama llaquichichunmi ayudarca (Hechos 25:6-12). w20.11 págs. 13, 14 párrs. 4, 8-10

Maipica tucuicunami ima mana allita rurashcata yuyarishpaca llaquilla sintirinchij. Bibliata manaraj yachashpa o ña bautizarishca qꞌuipachari ima mana allita rurarcanchij (Romanos 3:23). Allita rurangapaj esforzarishpapish “tucuicunami achca cutin pandarinchij” (Santiago 3:2; Romanos 7:21-23). Mana allita rurashpa pandarishcamanta llaquilla canaca ñucanchijtami ayudai tucun. Mana allita rurashcata cuentata cushpaca ama chashnallataj pandaringapaj, ñucanchij causaita cambiangapajmi esforzarishun (Hebreos 12:12, 13). Maipica mana allita rurashcamanta ña arrepintirishca cashpapish, Jehová Dios ñucanchijta perdonashcata yachashpapish yallitaj llaquilla sintirishpachari catinchij. Pero yallitaj llaquilla sintirinaca dañotami rurai tucun (Salmo 31:10; 38:3, 4). Ama yallitaj llaquilla sintiringapajmi esforzarina canchij. Dios ñucanchijta perdonashca jahua paita sirvinata saquijpica Diabloca cushillami canga (2 Corintios 2:5-7, 11-ta ricui). w20.11 pág. 27 párrs. 12, 13

Levita quillcaj runaca Diosta sirvicushpapish charijcunata, jatun tucushcacunatami envidiai callarirca. Chaimantami paica desanimarirca. Paica paicuna laya mana alli cosascunata ruranataca mana yuyarcachu. Pero paicuna alli causaita charijta ricushpami paicuna laya causasha nirca (Salmo 73:2-9, 11-14). Chai gentecunaca charij cashcamanta, llaquicuna illaj, alajata causacushca shinami carcacuna. Levitaca millaicuna ima tucunata intindishpami envidianata, desanimarinata saquirca. Chaita rurashcamantami paica tranquilo, cushilla sintirirca. Paica Jehová Diostaca: “Cai pachapipish, quiquinmanta chꞌican ima shujtajtaca mana charisha ninichu” nircami (Salmo 73:25). Ñucanchijpish, mana alli gentecuna alli causaita charijta shina ricushpaca paicunataca mana envidianachu canchij. Paicuna cushilla canaca ashacamallami canga (Eclesiastés 8:12, 13). Mana alli gentecunata envidiashpaca ñucanchijllatajmi desanimarishun. Chashna desanimarishpaca Jehová Dioshuanpish alli apanacunatami saquishun. Ñucanchijpish levita shina sintirishpaca pai imata rurashcata rurashunchij. Diospaj consejocunata uyashunchij, ñucanchij huauqui panicunahuan pasangapaj tiempota surcushunchij. Tucuimanta yalli Jehová Diosta cꞌuyashpaca cushillami causashun. Shinallataj huiñai causaiman apaj ñanpimi purishpa catishun (1 Timoteo 6:19). w20.12 págs. 19, 20 párrs. 14-16

Llaquicunahuan cashpa Yayitu Diosta mañacushpaca ñucanchij causaipi alli cosascunata charishcamantami agradicina canchij. Maipica ima shina sintirishcata Yayitu Diosman tucuita huillanaca sinchimi canga. Shinapish susto pena cashcamanta Jehová Diosta ayudahuai nijllapica paica ayudangami (2 Crónicas 18:31). Ñucanchijllapi confianapaj randica Jehová Diospi confiashunchij. Profeta Isaías causashca punllacunapica Judá llajtapi causajcunaca asiriocuna tucuchinga nishpami manchajcuna carca. Shinallataj paicunapaj esclavosmi tucushun nishpami Egiptota ayudachun mañarcacuna (Isaías 30:1, 2). Pero Jehová Diosca paicunataca Egiptopaj ayudataca ama mashcaichijchu nishpami advirtirca (Isaías 30:7, 12, 13). Yaya Diosca paipaj pueblo tranquilo sintirichunmi Isaiasman cashna huillachun cacharca: ‘Jehovapi shunguta churashpa, casijlla causajpica muyujta pirca shinami cancunataca paillataj cuidanga’ (Isaías 30:15b). w21.01 págs. 3, 4 párrs. 8, 9

Jahua pachaman richun agllashcacunaca Jesushuanmi mandangacuna, sacerdotecunapishmi tucungacuna (Apocalipsis 20:6). 144 mil agllashcacuna jahua pachapi causanata chasquijpica Jehovapish, Jesuspish, angelcunapish cushillami sintiringacuna. 144 mil agllashcacunata ricushca qꞌuipaca apóstol Juanca Armagedonmanta quishpirij yallitaj achcacunatami ricurca. Cai yallitaj achcacunaca 144 mil agllashcacunamanta maihuan yallimi cancuna. Apóstol Juan nishca shinaca pi mana yupaipaj yallitaj achcacunami can (Apocalipsis 7:9, 10). Paicunaca yurajlla churanacunata churashcami can. Caica Yayitu Diosta, Jesusta tucui shunguhuan sirvishcata, Diablopaj ruraicunapi mana chagrurishcatapishmi ricuchin (Santiago 1:27). Chai yallitaj achcacunaca Jehová Diospish, Jesuspish paicunallami ñucanchijta quishpichijcuna nishpami sinchita caparincuna. Shinallataj paicunapaj maquicunapipish ramacunata aisashcami cancuna. Chashnami Jehová Dios agllashca Rey Jesusta apoyashcata ricuchin (Juan 12:12, 13-ta ricui). w21.01 pág. 16 párrs. 6, 7

Cusacunaca Jehovapaj, Jesuspaj ejemplota catishpami familiata alli pushai tucuncuna. Jehová Diospish, Jesuspish humilde cashcatami ricuchincuna. Jehová Diosca tucuita yachaj cashpapish, autoridadta charishpapish humilde cashcamantami paita sirvijcuna ima nishcata uyan (Génesis 18:23, 24, 32). Shinallataj paica jucha illaj cashpapish ñucanchijcuna imapi mana pandarichunca mana shuyanchu. Ashtahuanpish allita rurachunmi paita sirvijcunataca ayudan (Salmo 113:6, 7). Bibliapica Davidca Jehová Diosmanca: “Ñucata ayudajmari cangui” nircami (Salmo 27:9; Hebreos 13:6). Yayitu Dios humilde cashcamanta, tucuipi ayudashcamantami Davidca chashna nirca. Jesusca alli yachachij cashpapish apostolcunapaj chaquicunatami maillarca. Jesusca: “Caitaca cancunapish ñuca rurashca shinallataj rurachunmi ricuchini” nircami (Juan 13:12-17). Jesusca autoridadta charishpapish paita sirvichunca mana shuyarcachu. Ashtahuanpish paimi shujtajcunata sirvirca (Mateo 20:28). w21.02 págs. 3, 4 párrs. 8-10

Jovencitocuna, cancunaca achca fuerzata charishcamantami congregacionpica achcata ayudai tucunguichij. De seguro achcacunami siervo ministerial canata munanguichij. Maipica “shujtajcunaca ñucataca huahuata shinami ricuncuna” nishpachari yuyanguichij. Pero jovencuna cashpapish congregacionpi alli pajtachij, responsables cashcatami ricuchi tucunguichij. Jovencuna, cancunapishmi congregacionpica huauqui panicunata ayudai tucunguichij. Por ejemplo, mayorlla huauqui panicunaca tabletta, celularta ima shina alli utilizangapajmi yachachichun munancuna. Jovencitocuna, cancuna chashna ayudashpaca huauqui panicuna tandanacuipaj alli prepararichunmi ayudanguichij. Jehová Diosta jatunyachingapaj, paita tucuipi cushichingapaj esforzari. w21.03 págs. 2, 3, 7 párrs. 1, 3, 18

Huarmi cusata yalli estudiashca cajpipish cusami paipaj familia Yayitu Diosta sirvichun, Bibliamanta estudiachun ayudana can (Efesios 6:4, NWT ). Cusacuna paicunapaj familiata Diosta sirvichun ayudana cajpipish huarmicunaca paicunallatajmi Jehová Dioshuan alli apanacungapajca esforzarina can. Chaimantami Bibliata estudiangapaj, imata yachashcapipish cutin cutin yuyangapaj tiempota surcuna can. Chaita rurashpaca Jehová Diostami cꞌuyai tucungacuna, respetangacuna. Cusata cazushpapish cushillami sintiringacuna. Cai mundopica huaquin huarmicunaca paicunapaj cusacunataca mana respetancunachu. Pero cazarashca panicunaca Jehová Diosta cuyashcamanta paicunapaj cusata respetashpaca cushillami sintirincuna. Cusacunata respetaj panicunaca jovenlla huauqui panicunamanmi alli ejemplota cuncuna. Familia ucupipish, congregación ucupipish alli apanacuchunmi ayudancuna (Tito 2:3-5). Cunan punllacunapica Jehová Diosta sirvijcunamantaca yallitajca huarmicunami tiyan (Salmo 68:11). w21.02 pág. 13 párrs. 21-23

Apóstol Pabloca mana manchashpa llaquicunata ahuantachunmi alli ejemplota curca. Pero paipish huaquinpica desanimarishcami sintirirca. Desanimarishca cashpapish Jehová Dios fuerzata cuchunmi paipi confiarca (2 Corintios 12:8-10; Filipenses 4:13, NWT ). Ñucanchijpish fuerzata charingapaj, mana manchaj cangapaj, humildadhuan Jehová Dios ayudanapimi confiana canchij (Santiago 4:10). Pruebacunata charishpaca Yayitu Diosmi castigacun nishpaca mana yuyanachu canchij. Discípulo Santiagoca: “Pi llaquicunahuan cashpaca Diosmi ñucaman pruebacunata churacun nishpaca mana yuyanachu can. Diosca mana alli cosascunahuanca mana pruebacunata churanchu. Diostapish pi mana pruebacunata churai tucunchu” nircami (Santiago 1:13, NWT ). Caita tucui shunguhuan crishpaca Jehová Diospajmanmi ashtahuan cꞌuchuyashun. Jehová Diosca mana nunca cambianchu (Santiago 1:17). Apostolcuna causashca punllacunapi Diosta sirvijcuna pruebacunahuan cajpi paicunata ima shinami ayudarca, shinallatajmi ñucanchijtapish ayudanga. Chaipajca ñucanchijca Jehová Diostami yachaita cuchun, sinchi feta charingapaj, manchaita ama charingapaj ayudachun mañana canchij. w21.02 pág. 31 párrs. 19-21

Yachacujcuna tandanacuicunaman rijpica paicunamanta preocuparishcata ricuchishunchij (Filipenses 2:4). Paicunata ashtahuan rijsingapajca paicunapaj familiamanta, trabajomanta o Bibliamanta imata yachacushcatami tapui tucunchij. Shinallataj Diosta sirvingapaj paipaj causaipi cambiocunata rurashca cajpica felicitanami canchij. Chashna rurashpaca ñucanchijca paicunapaj amigosmi tucushun. Paicunataca Bibliamanta ashtahuan yachachunpish, bautizarichunpishmi ayudashun. Yachacujcuna paicunapaj causaipi cambiocunata rurajpica congregacionpi alli sintirichunmi ayudai tucunchij (Hebreos 13:2). Bibliamanta yachacuj publicador tucujpica paicunataca ñucanchijhuan huillachunmi invitana canchij. Brasilmanta huauqui Diegoca: “Achca huauquicunami paicunahuan huillachun ñucataca invitarca. Chaimi paicunataca alli rijsircani. Paicunamantapish achcatami yacharcani. Jehová Diospajmanpish, Jesuspajmanpish ashtahuanmi cꞌuchuyarcani” ninmi. w21.03 pág. 12 párrs. 15, 16

Jesusca ñucanchijta pꞌiñajcunata cꞌuyachunmi mandarca (Mateo 5:44, 45). Huaquinpica caita pajtachinaca sinchimi can. Shinapish Jehová Dios paipaj espíritu santohuan ayudajpica paicunatami cꞌuyashun, mana rato pꞌiñarishunchu, pacienciatapishmi charishun (Gálatas 5:22, 23). Catirashpa llaquichijcunaca Diosta sirvij cusa o huarmi, huahuacuna, vecinocuna cꞌuyaita ricuchijpimi maijancunaca cambiashcacuna. Huaquincunacarin testigo de Jehovacunami tucushcacuna. Chaimanta sinchi cajpipish ñucanchijta pꞌiñajcunata cꞌuyangapajmi Jehová Diostaca paipaj espíritu santota cuchun mañana canchij (Lucas 11:13). Jehová Diosta tucuipi cazushpaca alli causaitami charishun (Proverbios 3:5-7). Ñucanchijta pꞌiñashpa llaquichijpica llaquillami sintirinchij. Pero paicunaman cꞌuyaita ricuchijpica paicunaca tal vez cambiangacunami, ñucanchijtapish Jehová Diosta sirvichunmi saquingacuna. Chaita rurajpica Jehová Diosca cushillami sintiringa. Pero contracuna pꞌiñashpa catijpipish Diosta sirvishpami cushilla causashun. w21.03 págs. 23, 24 párrs. 13, 15, 17

Joel profetaca soldadocuna llaquichinamanta parlashcatami intindinchij (Joel 2:1, 8, 11). Jehová Diosca ñucata mana cazuj israelitacunata tucuchingapajmi ‘ñuca soldadocunataꞌ cachasha nircami. Paicunaca Babiloniamanta soldadocunami carca (Joel 2:25). Chai soldadocunaca “janaj ladomanta” shamushpami Israel llajtata dueñoyana carca (Joel 2:20). Cai soldadocunataca alli allichirishca achca langostacunahuanmi chꞌimbapuran. Joelca chai soldadocunamanta parlashpaca: ‘Tucuicuna quiquin ñanllatami ringallacuna. Puebloman chayashpa, huasicunaman huichiyashpaca, shuhua shinami ventanacunata yaicungacunaꞌ nircami (Joel 2:8, 9). Caita yuyashun. Soldadocunaca tucui ladocunapimi can. Gentecunaca mana maipi pacacui tucuncunachu. Babilonio soldadocunamantaca mana pi quishpiri tucuncunachu. Jesús manaraj huacharijpi huata 607-pimi babiloniocuna o caldeocunaca langostacuna shina Jerusalenman yaicurcacuna. ‘Caldeocunata jatun mandajmantaꞌ parlashpaca Bibliaca: ‘Mosocunatapish, solteracunatapish, yuyajcunatapish, ungushcacunatapishmi’ mana llaquishpa huañuchirca ninmi (2 Crónicas 36:17). w20.04 pág. 5 párrs. 11, 12