Febrero

Huauqui panicunata alli rijsishunchij. Tandanacui manaraj callarijpi o tucurishca qꞌuipa paicunahuan parlashunchij. Shinallataj paicunataca huillanamanpish, micunamanpish invitashunchij. Chaita rurashpaca paicunataca allimi rijsishun. Maipica shuj panica mana pihuan apanacusha ninchu nishpa yuyashpapish paica shujtajcunahuan parlanata manchashcatami cuentata cunchij. Mana cashpaca cullquiyuj huauquita ricushpaca paica charinacunallapimi yuyan nishpachari yuyanchij. Pero qꞌuipaca generoso cashcatami cuentata cunchij. Shinallataj maijancunachari tandanacuicunamanca yallitaj qꞌuipayan. Shinapish qꞌuipaca cai huauqui panicuna jarcaicunata charishcatami yachaj chayanchij (Job 6:29). Shujtajcunapaj causaimantaca mana tucuita yachasha ninachu canchij (1 Timoteo 5:13). Pero huauqui panicunata alli rijsingapaj, paicunapaj experienciacunamanta yachangapajmi esforzarina canchij. Chashnami paicunataca ashtahuan intindishun. Huaquinpica shuj huauqui o pani imata nijpi o imatapish rurajpica ratomi pꞌiñarinchij. Pero paicunata alli rijsishpaca imamanta chashna cashcatami intindinchij. Caita rurana mana fácil cajpipish shujtajcunata cꞌuyaihuan tratashpaca Jehová Diospaj ejemplota caticushcatami ricuchinchij. Paica tucui laya gentecunatami cꞌuyan (1 Timoteo 2:3, 4; 2 Corintios 6:11-13). w20.04 págs. 16-18 párrs. 10-12

Jesusca huañunapaj shuj punlla faltajpimi paita catijcunataca caishujmanta chaishujmanta cꞌuyanacunguichij nishpa mandarca. Jesusta catijcunaca cꞌuyaita ricuchishpami gentecuna pꞌiñajpipish ahuantai tucurcacuna. Tesalónica congregacionpica callarimantami huauqui panicunataca catirashpa llaquichircacuna. Pero cai huauqui panicunaca paicunata llaquichijpipish cꞌuyaita ricuchishpami ahuantarcacuna. Pabloca cai huauqui panicunataca cꞌuyaita ricuchijpipish ashtahuan cꞌuyaita ricuchishpa catichunmi animarca (1 Tesalonicenses 1:3, 6, 7; 4:9, 10). Paicunaca cꞌuyaita ricuchishpami llaquilla cajcunatapish animarcacuna (1 Tesalonicenses 5:14). Chaimi shuj huata huashaca apóstol Pabloca cancuna tucuicunaman cꞌuyaita ricuchicushcaca ashtahuanmi mirarishpa caticun nircami (2 Tesalonicenses 1:3-5). Cashna cꞌuyaita ricuchishcamantami catirashpa llaquichijpipish paicunaca ahuantarcacunalla. w21.03 págs. 22, 23 párr. 11

Jesusta catijcuna huiñai causaita charingapajca Dios ricuchishca ñanpimi callpana canchij o pai munashca shinami causana canchij (Hechos 20:24; 1 Pedro 2:21). Pero Diablo, paita catijcunapish Diosta sirvijcuna chai ñanmanta llujshishpa, ‘ima millaitapish ruranaman richunmi’ munancuna (1 Pedro 4:4). Paicunaca ñucanchij ima shina causashcata ricushpami burlarincuna. Shinallataj “imatapish rurai tucushcamantami ñucanchijca cushilla causanchij” nincunami. Pero chaica llullami can (2 Pedro 2:19). Huiñai causaiman apaj quichqui ñanpimi purina canchij. Diabloca chai ñanpi purichunca mana munanchu. Paica ancho ñanpi purichunmi munan. Chaitaca Diosta mana cazujcunami rincuna. Chai ñanta rina jahualla cajpipish paicunaca ‘chingarinamanmi’ ricuncuna (Mateo 7:13, 14). Quichqui ñanmanta pi ama llujchichunca Jehová Diospi confiashpa, paita uyashpami catina canchij. w20.04 págs. 26, 27 párrs. 1, 5, 7

Cai último punllacunaca Rusia y paita apoyajcunapishmi ‘sumaj llajtaman’ yaicushcacuna (Daniel 11:41). 2017 huatapica cai janaj ladomanta mandajca testigo de Jehovacunatami Diosmanta ama huillachun jarcarcacuna. Shinallataj huaquin huauqui panicunatapishmi carcelpi churashcacuna. Publicacioncunata, Traducción del Nuevo Mundo Bibliatapish ama utilizachunmi obligarcacuna. Rusia llajtapi tiyaj sucursalta, tandanacuna huasicunatapishmi dueñoyarcacuna. Caita ricushpami Cuerpo Gobernante huauquicunaca 2018 huatapi Rusia llajta, paita apoyajcunapish janaj ladomanta mandaj cashcata intindircacuna. Pero mandajcuna ñucanchijta chashna llaquichijpipish cai mandajcunahuanca mana macanacunchijchu. Shujtajmi mandana can nishpapish mana yuyanchijchu. Ashtahuanpish Bibliapi tiyaj consejocunata catishpami ‘jatun mandajcunamantaca Taita Diosta mañanchijꞌ. Jehová Diosta sirvishpa catichun o mana catichun gobiernocuna decidicujpicarin paicunamantaca Diostami ashtahuan mañashpa catinchij. w20.05 pág. 14 párr. 9

Yaya mamacuna cancunapaj huahuacuna sinchi feta charichunca paicunallatajmi Dioshuan alli apanacuna can. Shinallataj Bibliapi verdadta yachachishcatami crina can. Cancunapaj huahuacunaman Diosmanta yachachisha nishpaca cancunarajmi Bibliata alli estudiashpa alli ejemplota cuna canguichij. Shinallataj liyishcapi cutin cutin yuyaringapajmi tiempota surcuna canguichij. Chashnami cancunapaj huahuacunapish chaita ruranata yachangacuna. Shinallataj JW Library® aplicacionta, publicacioncunata, videocunata utilizachunmi alli yachachina canguichij. Chaita rurajpica cancunapaj huahuacunaca Jehová Diostami cꞌuyangacuna. Shinallataj alli cazuj, alli yuyaiyuj huauquicunata utilizashpa Jehová Dios Bibliata intindichun ayudacushcatami cringacuna (Mateo 24:45-47, QC, 1989). Cancunapaj huahuacunamanca Bibliamanta jahualla yachachishcacunallata yachachinapaj randica Jehová Diosta ashtahuan rijsichunmi ayudana canguichij. Chaimi Diospi ashtahuan cringacuna. Pero cancunapaj huahuacuna ima edadta charishcata, mashnata intindi tucushcatami alli ricuna canguichij (1 Corintios 2:10). w20.07 págs. 10, 11 párrs. 10, 12, 13

Cunan punllacunapipish achca gentecunaca juchayujcuna cashpapish Dioshuanmi alli apanacui tucuncuna. Jesús huañushcata tucui shunguhuan crishpami Diospaj amigocuna cai tucunchij. Shinallataj pai huañushcamantami Diosman mingarishpa bautizari tucunchij. Caicunata pajtachishpaca muyundij Allpapi Diospaj amigocunahuanmi Yayitu Diosta tandalla sirvishun. ¿Diospaj amigocuna cachun saquishcamantaca ima shinataj agradicishcata ricuchishun? Abrahampaj, Jobpaj ejemplotami catina canchij. Paicunaca 100 huata yallicunatami Diostaca tucuipi cazurcacuna. Ñucanchijpish cai millai mundopi mashna tiempota Diosta sirvicushpapish paicuna shinallatajmi tucuipi cazuj cana canchij. Huañuna cashpapish Daniel shinami Dioshuan alli apanacunataca manataj saquina canchij (Daniel 6:7, 10, 16, 22). Diospaj ayudahuanmi ima llaquicunata charishpapish chꞌimbapurai tucunchij. Shinami paipaj alli amigocuna cashpa catishun (Filipenses 4:13, NWT ). w20.05 pág. 27 párrs. 5, 6

Rey Davidca Betsabé cazada huarmi armacujtami ricurca. Davidca Jehová Dios shujtajpaj huarmita ama munangui nishcataca allimi yacharca (Éxodo 20:17). Pero paica cai huarmitaca ricushpami saquirirca. Davidca Jehovatapish jatunyachinatami munarca. Betsabehuanpish chayarinatami munarca. Chaimantami paipaj shunguca ishquipi chaupirishca shina carca. Davidca Jehová Diosta achca huatacunata manchashpa, cꞌuyashpa causashpapish paipaj mana alli munaitami pajtachirca. Chaimantami mana allicunata rurarca. Paica Diospaj shutitami pingaipi churarca. Shinallataj mana culpata charijcunata, paipaj familiatapishmi llaquichirca (2 Samuel 11:1-5, 14-17; 12:7-12). Jehová Diosca Davidtaca castigarcami. Pero paica cutinmi Jehová Dioshuan alli tucurca (2 Samuel 12:13; Salmo 51:2-4, 17). Paica Diosta tucui shunguhuan mana cazushcamanta llaquicunata charishcataca mana cungarircachu. Salmo 86:11-pi David nishcacunataca: “Ñuca shungu ama ishquipi chaupishca shina cachun ayudahuai” nishpapishmi traduci tucun. ¿Pai mañashcacunataca Jehová Diosca cutichircachu? Ari. Davidmanta parlashpaca Bibliapica: ‘Paica Diostaca tucui shunguhuanmi cazurca’ ninmi (1 Reyes 11:4; 15:3). w20.06 págs. 11, 12 párrs. 12, 13

Bibliapica Jehová Diospaj cꞌuyaitaca shuj huascahuanmi chꞌimbapuran. ¿Imamanta? Cai ejemplopi yuyashun. Canchari shuj jatun jutcupi urmangui. Can chai jatun jutcumanta llujshichunca pichari shuj huascata shitashpa cantaca allimanta llujchichun minishtirin. Cai punllapaj versopi nishca shinaca Jehová Diosca israelitacunataca cꞌuyaihuanmi pushamurca. Huaquincunaca yallitaj llaquicunapi, problemacunapi urmashcamantami imata ruranata mana yachashpa Diostaraj sirvinata saquishcacuna. Pero Yayitu Diosca paicunatapishmi cꞌuyaihuan ayudasha, pushamusha nin. Chaimantami Diosca paicunata achcata cꞌuyashcata intindichun munan. Diosmanta caruyashcacunataca Jehovapish ñucanchijpish cꞌuyashcatami yuyachina canchij. w20.06 págs. 27, 28 párrs. 12, 13

Jesusta catij Estebanta huañuchijpicarin huauqui panicunaca miticushpami Judeaman, Samariaman, Chipreman, Antioquía llajtacunaman rircacuna (Hechos 7:58–8:1; 11:19). Paicunaca achca llaquicunatami charircacuna. Shinapish Diosmanta predicanataca manataj saquircacunachu. Cushilla huillashpa catishcamantami congregacioncunapish tiyai callarirca (1 Pedro 1:1). Chashnapish paicunapajca llaquicunaca mana chaipi tucurircachu. Por ejemplo, huata 50-pica Roma llajtata mandaj Claudioca judío gentecuna chai llajtamanta llujshichunmi mandarca. Chaimantami Diosta sirvij judiocunaca huasicunata saquishpa shujtaj ladocunapi causanaman rina tucurca (Hechos 18:1-3). Huata 61-pica apóstol Pabloca: ‘Jesusta catijcunaca paicunata rimashcacuna, carcelpi churashcacuna, paicunapaj cosascunata quichushcacunami can’ nircami (Hebreos 10:32-34). Huaquincunacarin huajchacunami tucurca. Paicunataca hasta ungüimi japirca (Romanos 15:26; Filipenses 2:25-27). w21.02 págs. 26, 27 párrs. 2-4

Ñucanchij feta sinchiyachijpica Diablopish paita apoyajcunapish ñucanchijtaca mana pandachingachu (2 Juan 8, 9). Cai pachapaj cajcuna ñucanchijta pꞌiñanataca allimi yachanchij (1 Juan 3:13). Apóstol Juanca cai pachataca Diablomi mandacun nircami (1 Juan 5:19). Pero mana allicunaca ñallami tucuringa. Chaita yachashpami Diabloca dimastij pꞌiñaricun. Diabloca ñucanchijta pandachisha nishpaca huainayanata, apostatacunapaj llullacunallataca mana utilizanchu. Ashtahuanpish contracuna ñucanchijta catirashpa llaquichichunmi yuyaita cun. Ashalla tiempota charishcata yachashpami Diabloca huillanata jarcasha nin. Shinallataj ñucanchij crishcacunatami chiriyachisha nin. Huaquin llajtacunapica testigo de Jehovacuna huillachun, tandanacuchunca mana saquincunachu. Chaita rurajpipish huauqui panicunaca chai llaquicunata ahuantashpami catincuna. Ñucanchijpish Diablo llaquichisha nijpipish Jehová Diostami sirvishpa catishun. w20.07 pág. 24 párrs. 12, 13

Jehová Diosca cai Allpapi gentecuna huiñaita causachunmi munarca. Pero Adán y Eva Diosta mana cazushcamantami juchapish huañuipish cai pachaman yaicurca (Romanos 5:12). ¿Jehová Diosca imatataj rurarca? Paica chai ratomi gentecunata ima shina quishpichinata huillarca (Génesis 3:15). Gentecunata juchamanta, huañuimanta quishpichingapajmi paipaj Churita curca. Chashnami huiñai causaita chari tucushun. Pero Yaya Diosca paita sirvinata o mana sirvinata cada uno decidichunmi saquishca (Juan 3:16; 1 Corintios 15:21, 22). Jesusmantami Jehová Diosca achca gentecunata causachinga. Pero mana tucuicunachu igual causaringa. ¿Imamanta? Tucuicuna igual causarijpica ima orden mana tiyanmanchu. Jehová Diosca tucuipi orden tiyachunmi munan. Tucuita ordenpi charijpica tranquilo causaimi tiyanga (1 Corintios 14:33). w20.08 págs. 14-16 párrs. 3, 5

Yachacujca huaquin quillacunata Bibliamanta yachacushpaca testigo de Jehová tucuchun ayudasha nishcatami intindina can. ¿Bibliamanta yachacujca bautizaringapajca imacunallatataj rurana can? Jehová Diostami rijsina, cꞌuyana can. Paipimi fetapish churana can (Juan 3:16; 17:3, QC, 1989). Diospaj amigo, huauqui panicunapajpish amigomi cana can (Hebreos 10:24, 25; Santiago 4:8). Tiempohuanca mana alli cosascunata saquishpami paipaj juchacunamanta arrepintirina can (Hechos 3:19). Biblia yachachishcacunapi feta churashcamantami shujtajcunaman predicana can (2 Corintios 4:13). Ultimotacarin Diosman mingarishpami, bautizarina can (1 Pedro 3:21; 4:2). Yachacuj bautizaringapaj cambiocunata rurajpica felicitanami canchij. Pai bautizarijpica tucuicunami cushilla sintirinchij. w20.10 págs. 17, 18 párrs. 12, 13

Maijan huauquicunaca alli yachachijcuna, alli organizajcuna, congregacionta alli pushajcunami can. Paicuna ñucanchijta yalli cashcata yuyashpaca humildecuna cashcatami ricuchinchij (Filipenses 2:3). Pero ñucanchijca paicuna shina pajtachinataca mana pudishunchu nishpaca mana yuyanachu canchij. Paicunahuan chashna compararishpaca ñucanchijllatajmi desanimarishun. Apóstol Pablo nishca shinaca paicunahuan chꞌimbapurashpaca congregacionpica imapaj mana valinichu nishpami yuyai callarishun. Jesusta punta catijcunaca chꞌican chꞌican ruraicunata pajtachichunmi Jehová Diosca paipaj espíritu santota curca (1 Corintios 12:4-11). Shinapish tucuicunami Diospajca valishca carca. Cunan punllacunapica ñucanchijca paicuna shina milagrocunataca mana rurai tucunchijchu. Pero Dios ayudajpimi chꞌican chꞌican ruraicunata pajtachi tucunchij. Chashna cashpapish Jehová Diospajca tucuicunami valishca canchij. w20.08 págs. 23, 24 párrs. 13-15

Mana manchaj cangapajca Jehová Diostami ayudahuai nishpa mañana cangui. Jehová Diosca can mañashcacunata uyashpaca manataj saquingachu (Hechos 4:29, 31). Cambaj causaipipish problemacunahuan chꞌimbapurachun cambiocunata rurachun ima shina ayudashcapi yuyai. Jehová Diosca ñaupa tiempopica paipaj pueblotami puca cuchata chꞌimbachun ayudarca. Shinallataj cantapish Jesuspaj discípulo tucuchun ayudanataca mana cungarinachu cangui (Éxodo 14:13). Cai punllapaj versopi ima nishcataca ama cungaringuichu. Diosca mushuj publicadorcunataca ama manchaj cachunmi ayudan. Tomoyo shuti panimantapish yachashun. Cai pani huasin huasin huillai callarijpica shuj huarmica: “Cancuna testigo de Jehovacunami canguichij. Mana imata uyasha ninichu” nishpami sinchita caparishpa punguta huichcarca. Tomoyo shuti panica mana desanimarishpami paipaj compañeramanca: “Ñuca imata manaraj nijpimi chai señoraca ñucanchij testigo de Jehová cashcata ña yachashca. Chaimantami achcata cushicuni” nircami. Cai panica cunanca precursora regularmi can. w20.09 pág. 6 párrs. 13, 14

Rey Asaca Judá llajtapi causajcunataca: ‘Jehová Diosca tucui ladocunapimi sumaj causaita cushca’ nircami (2 Crónicas 14:6, 7). Pero sumaj causaita tiyajpipish cushicunallapica mana yuyarcachu. Chaipaj randica rey Asaca: ‘Cai llajtacuna muyundijta jatun pircacunata, torrecunata, pungucunata rurashunchijꞌ nircami. Shinallataj Judá llajtapi causajcunataca: ‘Cai llajtaca ñucanchij maquipimi canꞌ nircami. Chashna nishpaca rey Asaca Dios cushca llajtapi manaraj jarcaicuna tiyajpica caicunata tranquilo shayachi tucushcatami nisha nirca. Chaimantami Judá llajtapi causajcunataca chai tiempota alli aprovechachun animarca. Chai tiempopica rey Asaca paipaj soldadocuna allichirishca cachunmi ayudarca (2 Crónicas 14:8). ¿Jehová Diospi mana confiashcamantachu chashna rurarca? Mana. Paica Jehová Diospimi confiarca. Pero rey cashcamantami shamuj punllacunapi ima llaquicunamanta tucui pueblota cuidana cashcata alli yacharca. Shinallataj Judá llajtapi tranquilo causai mana siempre tiyana cashcatami alli intindirca. Chaimantami paica soldadocuna alli prepararishca cachun ayudarca. w20.09 pág. 15 párrs. 4, 5

Maipica congregacionta shuj pushaj huauquica huauqui panicunata cuidangapajca huaquin leycunatami churai tucun. Pero congregacionta pushajcunapaj autoridadhuan familiata pushajcunapaj autoridadhuanca maipica mana igualchu can. Por ejemplo, Jehová Diosca congregacionta pushajcunamanca juchata rurajcunata juzgachun, juchamanta mana arrepintirijcunata congregacionmanta llujshichichunmi autoridadta cushca (1 Corintios 5:11-13). Cutin Jehová Diosca familiata pushajcunamanca shujtaj autoridadtami cushca. Por ejemplo, familiata pushajcunaca paicunapaj familia ucupimi huaquin leycunata churai tucun. Chaicunata pajtachichunpishmi ricuna can (Romanos 7:2). Familiata pushajcunaca paicunapaj huahuacuna mai horascama huasiman chayanatami decidi tucun. Shinallataj paicunapaj huahuacuna mana cazujpipish paicunata corregina derechotami charincuna (Efesios 6:1). Pero familiata pushajca paipaj familiata cꞌuyashcamanta, paipaj huarmihuan ‘shuj aichalla’ cashcata yuyaipi charishcamantami imata decidingapajpish paipaj huarmihuanraj parlan (Mateo 19:6). w21.02 págs. 16-18 párrs. 10-13

Jehová Diosca humilde, alli shungu gentecunamanmi Bibliamantaca yachachin (Hechos 13:48). Cashna humilde gentecunaca alli cazuj alli yuyaiyuj huauquicuna Bibliamanta yachachishcacunatami cushicushpa chasquincuna (Mateo 11:25; 24:45, QC, 1989). Ñucanchijca Diospaj Shimitaca mana ñucanchijllataj intindi tucunchijchu. Pero Biblia yachachishcacunata intindinami shujtaj cosascunamanta yalli valishca can (Proverbios 3:13). Jehová Diosca paimanta, paipaj munaimanta shujtaj gentecunaman yachachichunmi mingashca (Mateo 24:14). Cai yachachishcacunami gentecunata Diospaj puebloman yaicuchun, shinallataj huiñai causaita charichun ayudan. Chaimantami Diosmanta yachachinaca valishca can (1 Timoteo 4:16). Cunan punllacunapish achcata huillashpapish, ashallata huillashpapish Dios mingashca obratami pajtachicunchij (1 Timoteo 2:3, 4). ¡Cashna Dioshuan trabajanaca maravillami can! (1 Corintios 3:9). w20.09 págs. 26, 27 párrs. 4, 5

Apóstol Pablo Romaman viajacujpica Jehová Diosca paita ayudachunmi huauqui panicunata utilizarca. Por ejemplo Pablopaj alli amigocuna Aristarco y Lucasca Romamanmi compañanata decidircacuna. Bibliapica Jesusca Aristarcota, Lucastaca Romamanmi chayanguichij nishcaca mana maipi ricurinchu. Pero paicunaca Romaman chayanata mana yachashpapish Pablota compañangapajmi tucuita rurarcacuna. Jatun tamya, huaira jatarijpimi Pabloca barcopi rijcunamanca: “Taita Diosca huañuimanta quishpichisha ninmi” nirca. Sidón llajtaman chayashpaca soldadocunata mandaj Julioca Pablotaca paipaj amigocunata visitachunmi saquirca. Shinallataj cai huauqui panicuna Pablota cuidachunmi saquirca (Hechos 27:1, 2). Asha punllacuna qꞌuipaca Pablo paipaj compañerocunaca Puteoli llajtamanmi chayarcacuna. Chaipi causaj huauqui panicunaca canchis punllacunata caipi saquiripaichij nishpami rogarcacuna. Huauqui panicuna Pablota, paita compañajcunata atindicujpica Pabloca animachij experienciacunata parlajpimi paicunaca achcata cushicushcanga (Hechos 15:2, 3-ta ricui). w20.11 págs. 16, 17 párrs. 15-17

Yaya mamacuna cancunapaj huahuacunamanca ruraicunahuan, nishcacunahuanmi Jehová Diosta tucui shunguhuan cꞌuyashcata ricuchina canguichij. Tucuimanta yallica huahuacuna Jehová Diosta sirvichunmi ayudana canguichij. Huahuacuna Bibliata liyina programata charichun, Diosta mañachun, tandanacuicunaman richun, huillanaman llujshichun ayudanami importante can (1 Timoteo 6:6). Pero huahuacunamanca imalla minishtishca cosascunatami cuna can (1 Timoteo 5:8). Caipi yuyashun. Ñallami Diablopaj ruraicunaca tucurigrin. Cancunapaj huahuacuna paraíso Allpaman yaicuchunca cai mundopi charishca cosascunaca mana ayudangachu. Ashtahuanpish Yaya Dioshuan alli apanacushpallami quishpiri tucungacuna (Ezequiel 7:19). Yaya mamacuna huahuacunata Diosta sirvichun ayudajta ricushpaca cushillami sintirinchij. Cashna shina familiacunapi huiñaj huahuacunaca jatunyashpapish cai alli cosascunata ruranataca manataj saquincunachu. Paicunapaj yaya mamacunatapish chashna yachachishcamantami agradicincuna (Proverbios 10:22). w20.10 págs. 28, 29 párrs. 10, 11

Apóstol Pedroca huaquinpica imatapish manaraj alli yuyashpami imatapish ruraj o parlaj carca. Por ejemplo, Jesusca paipaj apostolcunamanca pai ima shina llaquicunata chꞌimbapuranata, ima shina huañunatami parlarca. Chaimi Pedroca cai punllapaj versopi nishca shimicunata nirca (Mateo 16:21-23). Pero chashna nijpimi Jesusca corregirca. Achca gentecuna Jesusta japinaman shamujpica Pedroca, curacunata mandajpajta rurajtami, espadata llujchishcahuan alli lado rinrinta pꞌitirca (Juan 18:10, 11). Chaita rurajpimi Jesusca cutin paita corregirca. Ashtahuancarin Pedroca: ‘Shujtajcuna canta saquijpipish, ñucaca manataj saquishachu’ nishcami carca (Mateo 26:33). Pedroca paillapimi confiaj carca. Pero qꞌuipaca runacunata manchaj cashcatami ricuchirca. Pedroca quimsa cutinmi Jesustaca ‘mana rijsinichu’ nishpa negarca. Pedroca arrepintirishpami canllaman llujshishpaca achcata llaquirishpa huacarca (Mateo 26:69-75). Tal vez Pedroca Jesusca ñucataca mana perdonangachu nishpami yuyashcanga. Pedroca pai pandarishcacuna desanimachichunca mana saquircachu. Pandarishpapish caishuj apostolcunahuanmi ñaupajman catirca (Juan 21:1-3; Hechos 1:15, 16). w20.12 págs. 20, 21 párrs. 17, 18

Familiata pushajca chꞌican chꞌican ruraicunapimi humilde cashcata ricuchi tucun. Por ejemplo, paipaj huarmi, huahuacuna imapipish mana pandarichunca mana shuyanchu. Imapi paicunahuan mana de acuerdo cashpapish paicuna ima nishcacunatami alli uyanata yachan. Maijan llajtacunapica huasi ucupi ima ruraicunataca huarmicunallami rurana can nincunami. Pero cusacunaca huasipi chꞌican chꞌican ruraicunapi ayudashpami paicunaca humilde cashcata ricuchincuna. Pani Rachelca: “Ñuca huiñashca lugarpica cusacuna platocunata maillajpi, huasi ucuta pꞌichajpica vecinocunapish, familiacunapish chai runaca huarmita mana mandai tucunchu nishpami yuyancuna” ninmi. Can causan lugarpi gentecuna chashna yuyajpica Jesús imata rurashcapimi yuyana cangui. Jesús causashca tiempopica gentecunaca chaquicunataca esclavocunallami maillana can nishpami yuyaj carca. Pero paicuna chashna yuyajpipish Jesusca paipaj discipulocunapaj chaquicunatami maillarca. Familiata alli pushajcunaca shujtajcunapaj ñaupajpi alli ricurinallataca mana mashcancunachu. Paicunaca paicunapaj familiacuna alli sintirichunmi ayudancuna. Chashnami humilde cashcata ricuchincuna. w21.02 págs. 2-5 párrs. 3, 11

Ñucanchij causaipi imalla pasashcata yuyarinaca Dios cushca regalo shinami can. Pero alaja causaita charishca cashpapish shamuj punlla paraisopi causanami ashtahuan alli canga. Shujtajcuna ñucanchijta llaquichishca cajpipish paicunata perdonashpa, Diosta alli sirvishpami catina canchij. Shinallataj, mana allicunata rurashcata yuyarishpa yallitaj llaquirishpaca Diosta cushilla sirvishpa catinatami saqui pudinchij. Chaimanta Apóstol Pablo shina Jehová Dios ñucanchijta perdonashcata shungumanta crishunchij (1 Timoteo 1:12-15). Ñucanchijca paraisopi causanatami shuyacunchij. Chaipica huiñai huiñaitami causashun, llaquicunatapish ña mana yuyarishunchu. Bibliapica: “Ñaupaman imapish tucushcataca mana yuyaringacunachu” ninmi (Isaías 65:17). Huaquincunaca achca huatacunatami Jehová Diostaca sirvicushcanchij y ñami mayoryashcanchij. Pero paraíso Allpapica cutinmi jovenyashun (Job 33:25). Chaimanta ñucanchij causai ima shina cashcallata ama yalli yuyarishunchijchu. Ashtahuanpish shamuj punllapi bendicioncunata chasquinata yuyashpa, chai bendicioncunata chasquingapaj tucui pudishcata rurashpa causashunchij. w20.11 págs. 24, 25, 29 párrs. 4, 18, 19

Jatun llaqui punllacuna callarijpi paipaj pueblota quishpichingapajca Jehová Diosca imatataj ruranga? Cai Allpata mandajcunahuanmi tucui panda religioncunata tucuchinga (Apocalipsis 17:16-18; 18:2, 4). Shinallataj Armagedón macanacui callarijpimi cai mundopi tiyaj tucui mana alli ruraicunata tucuchinga (Apocalipsis 16:14, 16). Jehová Dioshuan cashcamantami ñucanchijtaca Diabloca mana pandachi tucunga. Jehová Diosca Diablotaca huiñaipajmi tucuchinga (Romanos 16:20). Chaimanta Dios cushca macanacunata churarishpa ladoman amataj saquishunchij. Huauqui panicunapaj ayudatapish mashcashunchij. Jehová Dios ñucanchijta ñaupajman pushachunpish saquishunchij. Caicunata rurajpica Jehová Diosmi ñucanchijtaca sinchiyachishpa, cuidashpa catinga (Isaías 41:10). w21.03 pág. 30 párrs. 16, 17

¿Imacunallapitaj Jehová Diospi confiashcata ricuchina canchij? Bibliapica Diosta alli sirvijcunapaj o mana alli sirvijcunapaj ejemplocunami tiyan. Huaquincunapaj ejemploca ama yallitaj sustarichun, Jehová Diosllapi confiachunmi ayudan. Bibliapica Diosta alli sirvijcuna sinchi jarcaicunahuan chꞌimbapuracujpi Jehová Dios ima shina ayudashcatami ricui tucunchij. Por ejemplo, apostolcuna ama huillashpa catichunmi Jerusalenpi tiyaj autoridadcunaca jarcarcacuna. Pero paicunaca mana manchashpami: “Runacunata cazunapaj randica, Taita Diostami cazuna canchij” nircacuna (Hechos 5:29). Paicunata macajpipish paicunaca mana mancharcacunachu. ¿Imamantataj mana mancharcacuna? Paicunaca Jehová Dios paicunata apoyacushcamantami mana mancharcacuna. Chaimi paicunaca mana manchashpa, predicashpa catircacuna (Hechos 5:40-42). Shinallataj Jesusta catij Estebanpish paita huañuchinata yachashpapish paica tranquilomi sintirirca. Chaimantami paipaj ñahuica ‘angelpaj ñahui shina carca’ (Hechos 6:12-15). ¿Imamantataj Estebanca tranquilo sintirirca? Paica Jehová Dios tucuipi ayudacushcataca tucui shunguhuanmi crirca. w21.01 pág. 4 párrs. 10, 11

Caica ¿imatataj nisha nin? Paicuna alli concienciata charinata, Diospaj ñaupajpi alli ricurinatami nisha nin (Isaías 1:18). Cai yallitaj achcacunaca Jesús huañushcapi feta churashcamanta, Diospaj amigos cashcamantami paiman mingarishcacuna, bautizarishcacunapish (Juan 3:36; 1 Pedro 3:21). Chaimantami paicunaca jatun tiyarinapi tiyacuj Diospaj ñaupajpi caj shina punllapish, tutapish cai Allpapi Yayitu Diosta sirvincuna (Apocalipsis 7:15). Shinallataj paicunaca Diospaj Gobiernota punta lugarpi churashpami muyundij Allpapi predicancuna, Jesuspaj discipulocunatapish rurancuna (Mateo 6:33; 24:14; 28:19, 20). Juanca Diospaj carpa huasica tucui gentecunahuanmi nircami. Chaimantami yallitaj achcacunaca jatun llaqui punllacuna huasha Jehová Dios paicunata cuidashpa catinata crincuna. Yayitu Diosca paicuna shuyacushcatapishmi pajtachinga. ‘Diosca paicunapaj ñahuicunamantaca, tucui huiquitami pꞌichanga’ (Apocalipsis 21:3, 4). w21.01 págs. 16, 17 párrs. 9, 10

Jehová Diospaj pueblopi cashcamantami tucuicuna cushilla sintirinchij. Congregacionpi, familiapi Yayitu Dios churashca autoridadta tucuicuna respetashpaca cushilla, tandallami causanchij. Jehová Diospajca cꞌaricunapish huarmicunapish valishcami can. Por ejemplo, apostolcuna causashca punllacunapimi Jehová Diosca cꞌaricunamanpish huarmicunamanpish paipaj espíritu santota curca. Chaimantami paicunaca valishca ruraicunata pajtachircacuna. Shinallataj chꞌican chꞌican shimipipish parlarcacuna (Hechos 2:1-4, 15-18). Jehová Diosca Jesushuan mandachunca cꞌaricunata huarmicunatami agllashca (Gálatas 3:26-29). Jehová Diosca cꞌaricunaman huarmicunamanmi cai allpapi huiñai causaita charichunpish cunga (Apocalipsis 7:9, 10, 13-15). Shinallataj Jesusca cꞌaricunatapish huarmicunatapish tucuicunaman Dios cushca alli huillaicunata yachachichunmi mandarca (Mateo 28:19, 20). Por ejemplo, Hechos libropica Diosta sirvij Priscilamantami parlan. Shuj cutinca paipish paipaj cusapish achcata yachaj Apolos runamanca “Diospaj Shimimantaca allimi yachachircacuna” (Hechos 18:24-26). w21.02 págs. 14, 15 párrs. 1, 4

Congregacionta pushajcunaca, publicadorcuna alli yachachijcuna cachunmi ayudana canguichij. Shuj publicadorchari congregacionta pushajhuan Bibliamanta yachachinaman rishpaca asha manchaita charin. Chaita ricushpaca yachacujman estudiota cushpami ayudana canguichij. Congregacionta pushajcunaca yachacujcuna ama desanimarichunmi ayudana canguichij (1 Tesalonicenses 5:11). Tal vez cai ratoca Bibliamanta yachacujcunataca manachari charinchij. Shinapish Bibliamanta yachachinaman acompañashpaca mana tanto parlashpa, alli prepararishpa ayudashunchij. Yachacujcuna tandanacuicunaman rijpipish paicunapaj amigos cangapaj esforzarishunchij. Ñucanchijpish alli ejemplota paicunaman cushunchij. Congregacionta pushaj huauquicunapish Bibliamanta yachacujcunata animangapaj, yachachijcunatapish alli yachachijcuna cachun capacitangapaj, felicitangapajmi tiempota surcuna canguichij. Bibliamanta yachacujcunata Jehová Diosta cꞌuyachun, paita sirvichun ayudashpaca tucuicunami cushilla sintirishun. w21.03 pág. 13 párrs. 18, 19

Davidca huambramantapachami imatapish alli pajtachij carca. Por ejemplo, paipaj yaya ovejacunata cuidachun mandajpica sinchi cajpipish alli cuidangapajmi esforzarirca. Asha tiempo qꞌuipaca Davidca Saulmanca: “Cambajta ruraj ñucaca ñuca yayapaj ovejacunata michijmi carcani. León cashpa, oso cashpa shamushpa chai canlla ovejacunamanta shujta apajpica, catishpa rishpaca, chai animalpaj shimimanta quichujllami cani” nircami (1 Samuel 17:34, 35). Davidca ovejacunata alli cuidashpami responsable cashcata ricuchirca. Jovencitocuna, cancunapish ima mingashcacunata alli pajtachingapajmi esforzarina canguichij. Davidca jovenmantami Jehová Dioshuan alli apanacungapaj esforzarirca. Paipajca arpapi tocanata yallimi Jehová Diospaj alli amigo cana importante carca. Jovencitocuna, cancunapish tucuimanta yallica Jehová Dioshuan alli apanacungapajmi esforzarina canguichij. w21.03 pág. 3 párrs. 4, 5