Diciembre

Maipica Bibliata liyishpa, ima nishcata mana alli intindishpami dudai callarishun. Mana cashpaca ñucanchij mañashcacunata Jehová Dios mana ñucanchij munashca shina cutichijpimi dudai callarishun. Chashna dudajpica ñucanchij femi chiriyanga. Dioshuanpish alli apanacunatami saquishun (Santiago 1:7, 8, NWT ). Dios cusha nishcacunapish ña mana yuyashunchu. Apóstol Pabloca Dios cusha nishcacunapi shuyanataca barcota charichina shuj jatun fierrohuanmi chꞌimbapurarca (Hebreos 6:19). Chai jatun fierroca shuj cadenahuanmi barcota charichishca carca. Achcata tamiajpi huaira ama maiman apachunca barcotaca cai fierromi charin. Pero barcota charichishca cadena oxidashpa pꞌitirijpica barcoca maitami ri tucun. Ima shinami oxidashpa cadena pꞌitirin, chashnallatajmi ñucanchij crishcacunapi dudai callarishpaca ñucanchij fepish chiriyanga. Ashtahuancarin Dios cusha nishcacunapi yuyanatami saquishun. Chashna cashpaca Jehová Diostaca mana cushilla sirvi tucushunchu. w21.02 pág. 30 párrs. 14, 15

Abrahamca Ur llajtamanta paipaj familiahuan llujshishpaca 70 yalli huatacunatami charishcanga (Génesis 11:31–12:4). Paica casi 100 huatacunatami carpa huasicunapi tucui Canaán llajtapi causarca. 175 huatacunata charishpami huañurca (Génesis 25:7). Paica Jehová Dios Canaán allpata paipaj huahuacunaman cushcataca mana ricurcachu. Shinallataj Diospaj Gobierno mandai callarishcataca mana ricurcachu. Chaita mana ricushpapish, Bibliapica: ‘Abrahamca uni huatacunatami cushilla causarca’ ninmi (Génesis 25:8). Achca problemacunata charishpapish sinchi fetami charirca. Achca tiempotami Abrahamca Jehová Dios cusha nishcacunata pajtachichun pacienciahuan shuyarca. ¿Imamanta? Jehová Dioshuan alli amigo cashcamanta, Jehová Dios paita cuidashcamantami pacienciahuan shuyarca (Génesis 15:1; Isaías 41:8; Santiago 2:22). Ñucanchijpish Abraham shinami “alli shayachishca pueblota” shuyacunchij (Hebreos 11:10). Pero cai pueblota pi shayachichunca mana shuyanchijchu. Cai puebloca Diospaj Gobierno cashcamantami 1914 huatamanta jahua pachapi ña mandai callarirca (Apocalipsis 12:7-10). Pero cai Allpata Diospaj Gobierno mandachunmi shuyacunchij. w20.08 págs. 4, 5 párrs. 11, 12

Shujtajcunata alli uyajcuna cangapajca humildecuna, mana utca pꞌiñarijmi cana canchij. ¿Imamantataj alli uyajcuna cana canchij? Puntapica, alli uyajcuna cashpaca paicunaca mana allicunami can nishpaca mana yuyashunchu. Ishquipica, paicuna ima shina sintirishcata, imamanta chashna rurashcatami intindishun. Chashnami paicunataca cꞌuyaihuan tratashun. Quimsapica, paicunata parlachun saquishpaca paicunallataj ima shina sintirishcata cuentata cuchunmi ayudashun. Huaquinpica pihuan parlashpallami ñucanchij ima shina sintirishcata intindinchij. Maijan huauqui panicunaca ñaupa punllacunapi ima shina causashcamanta, ima costumbrecunata charishcamantami paicuna ima sintirishcata parlanata manchancuna. Paicunaca ima shina sintirishcata manachari utca parlanga. Pero Jehová Dios shinallataj pacienciata charijpica paicunaca ñucanchijpi confiashpami parlangacuna. Paicuna parlajpica alli uyashunchij. w20.04 págs. 15, 16 párrs. 6, 7

Pescadocunaca alli yacu tiyanpi, micunacuna tiyanpimi pasancuna. Pero pescadota japijcunapish ima horas pescanatami alli yachana can. Shuj isla del Pacificomanta huauquica shuj misionero huauquitami pescanaman invitarca. Cai huauquimanca misioneroca: “9 de la mañanatami tupashun” nircami. Pero cai huauquica: “Pescana horasmi rina canchij. Mana ñucanchij munashca horaspi” nircami. Apostolcunapaj punllacunapica Jesusta catijcunapish maipi, ima hora gentecuna cajta ricushpami huillajcuna carca. Por ejemplo, templopi, sinagogacunapi, mercadocunapi, huasin huasin rishpami huillajcuna carca (Hechos 5:42; 17:17; 18:4). Shinallataj ñucanchijpish gentecuna huasipi cai horasmi predicana canchij. Gentecuna maipi tiyajtapishmi mashcana canchij (1 Corintios 9:19-23). w20.09 pág. 4 párrs. 8, 9

Jesuspaj alli amigocuna cangapajca Diospaj organizacionta apoyashunchij. Ñucanchijta cuidangapaj Jesús agllashca huauquicunata apoyashpami Jesushuan ashtahuan alli amigos tucushun (Efesios 4:16). Por ejemplo, Diospaj organizacionca Tandanacuna Huasicunata alli utilizachunmi ricuracuncuna. Chaipajca huaquin congregacioncunataca shujllapimi tandachishca. Chashnami Diosman cushca cullquicunataca alli utilizashcacuna. Cai cambiocuna tiyashcamantami huaquin publicadorcunaca shujtaj congregacionman rina cashca. Cai huauqui panicunaca achca huatacunatami shuj congregacionpi sirvishcacuna. Chaimantami chaipi sirvij huauqui panicunahuanca alli apanacushcacuna canga. Pero paicunataca shujtaj congregacionpi sirvichunmi mandashcacuna. Ñaupajman pushaj huauquicunata cazujpica Jesusca cushillami sintiringa. w20.04 págs. 24, 25 párr. 14

Janaj ladomanta, ura ladomanta mandajcunaca cai pachata mandasha nishpami paicunapura macanacucuncuna. Por ejemplo, Segunda Guerra Mundial huashaca Unión Soviética, paita apoyajcunapish Europapi tiyaj huaquin llajtacunatami mandai callarircacuna. Chaita ricushpami ura ladomanta mandajpish shujtaj mandajcunahuan achca soldadocunata tandachirca. Chashnami OTAN nishca organización tucurca. Cai ishqui jatun mandajcunaca ashtahuan soldadocunata, armacunata charisha nishpami achca cullquita gastashcacuna. Shinallataj ura ladomanta mandajpaj contracunataca janaj ladomanta mandajmi guerracunapi apoyan. Cutin janaj ladomanta mandajpaj contracunataca ura ladomanta mandajmi guerracunapi apoyan. Cai contracunaca África, Asia y América Latina llajtacunamantami can. Cai huatacunapica Rusia, paita apoyajcunaca tucui llajtacunamanta yalli jatun mandajmi tucushca. Janaj ladomanta mandajca ura ladomanta mandajhuanmi paicunapura pꞌiñanacushpa: “Cancunaca computadoracunapi tiyaj programacunata utilizashpami ñucanchij cullquita perdichinguichij. Ñucanchij mandana derechotapishmi llaquichinguichij” nincuna. Daniel nishca shinaca janaj ladomantami Diosta sirvijcunataca llaquichishpa catincuna (Daniel 11:41). w20.05 pág. 13 párrs. 5, 6

Profeta Isaías causaj punllacunapica Jehová Diosca paipaj pueblomanca: ‘Shuj huarmica pai huachashca huahuataca ¿cungaringachu? Huahuata chai huarmi cungarijpipish ñucaca cantaca manataj cungarishachu’ nircami (Isaías 49:15). Jehová Diosca paillataj shuj mamahuanca mana siempre chꞌimbapurarinchu. Pero caipi sí, paica shuj mamahuanmi chꞌimbapurarirca. Paica paita sirvijcunata achcata cꞌuyashcatami ricuchisha nirca. Chaimantami Diosca shuj mama paipaj huahuacunata achcata cꞌuyashcahuan chꞌimbapurarca. Achca mamacunaca pani Jasmín shinami yuyancuna. Paica: “Shuj mamaca paipaj huahuata chuchuchishpaca paihuanmi cꞌuyanacui callarincuna. Toda la vidami chashna cꞌuyanacuncuna” ninmi. Jehová Diosca paita sirvijcuna huillanata saquijpi, tandanacuicunata saquijpica cuentatami cun. Diosmanta caruyashcacuna congregacionman cutin tigrajpica cushillami chasquinchij. Jehová Diospish ñucanchijpish paicuna congregacionman tigrachunmi munanchij (1 Pedro 2:25). w20.06 pág. 18 párrs. 1-3

Yallitaj valij regalocunataca mana ricui tucunchijchu. Jesusca Sermón del Montepi yachachicushpaca jahua pachapi charinacunaca tucui charinacunamanta yallimi can nircami. Paica: “Cancunapaj charishcacuna maipimi can, cancunapaj shungupish chai yuyaillami canga” nircami (Mateo 6:19-21). Ñucanchij shungupi imapish valishca shina ricurijpica chaita charingacamami mashcashun. Diospaj ñaupajpi alli ricuringapaj esforzarishpaca jahua pachapi charij tucunapajmi mashcashun. Jesús nishca shinaca cai charinacunataca ni pi mana tucuchi o shuhuai tucungacunachu. Apóstol Pabloca: “Mana ricushcacunapi yuyaimi canchij” nishpami animarca (2 Corintios 4:17, 18). Cai mana ricushcacunaca Dios cusha nishca Allpapi tiyaj bendicioncunatami ricuchin. ¿Cai mana ricui tucushca regalocunamanta ima shinataj agradicishcata ricuchinchij? w20.05 pág. 26 párrs. 1, 2

Ñutu tamya urmajpimi plantacunaca alli huiñan. Shinallatajmi Moisés israelitacunata yachachijpica paicunaca alli sintirircacuna. Ñucanchij yachachishcacunapish cai ñutu tamya shina gentecunata ayudachunca ¿imatataj rurana canchij? Huillacushpaca Jehová Diospaj shutita gentecunaman yachachingapajmi Bibliata utilizana canchij. Shinallatajmi publicacioncunata saqui tucunchij, videocunatapish ricuchi tucunchij. Ashtahuancarin jw.org paginata ricuchunmi animai tucunchij. Chai paginapi tiyaj yuyaicunata ricushpaca Jehová Diosta jatunyachina cashcatami intindingacuna. Trabajopi cashpa, escuelapi cashpa, viajacushpapish Jehová Dios ima shina cashcata huillashunchij. Ñucanchijpajpish cai Allpapajpish pai imallata rurasha nishcata parlashunchij. Caicunata uyashpaca Yayitu Dios paicunata achcata cꞌuyashcatami punta cutin cuentata cungacuna. Jehová Diosmanta alli yachachishpaca paipaj shutitami jatunyachinchij. Ashtahuancarin paicunaman Diosmanta panda yuyaicunata yachachishcata cuentata cuchunmi ayudanchij. Bibliamanta gentecunaman yachachijpica paicunaca cushilla tranquilomi sintiringacuna (Isaías 65:13, 14). w20.06 pág. 10 párrs. 8, 9

¿Jehová Diosmanta caruyashcacunata paipajman tigrachun ayudangapajca imalla cualidadcunatataj charina canchij? Jesusca shuj churi huasimanta llujshishpa rishcatami parlarca. Cai chꞌimbapuraimanta imata yachai tucushcata ricushun (Lucas 15:17-24). Cai jovenca mana allita rurashcata cuentata cushpami huasiman tigran. Paipaj yayaca paipaj churi tigramujpica ugllashpami chasquin. Chashnami paipaj churita cꞌuyashpa catishcata ricuchin. Cai jovenca pandarishcapi yuyashpami, “ñucaca ña mana cambaj churitaj shinachu cani” nishpa nin. Paipaj churi shungumanta arrepintirishcata ricushpami yayaca cꞌuyaihuan tratan. Chaimantami paipajta rurajcunataca jatun fiestata ruraichij, tucuimanta yalli alli churanata churachichij nishpa mandan. Chashnami yayaca shuj cꞌuyashca churita tratashcata shinami ricuchin. Jehová Diosca cai chꞌimbapuraipi parlashca yaya shinami can. Paimanta caruyashcacunataca achcatami cꞌuyan. Paipajman tigrachunpishmi munan. Paipaj ejemplota catishpami paicunata ayudai tucunchij. Chaipajca pacienciata, cꞌuyaitami charina canchij. Paicuna ima shina sintirishcatapish intindinami canchij. w20.06 págs. 25, 26 párrs. 8, 9

Jesusca ‘maijancunaca Diosmanta yachanataca cushicushpami chasquingacuna. Pero llaquicuna shamujpica paicunapaj feca chiriyangami’ nircami (Mateo 13:3-6, 20, 21). Paicunaca Jesusta catijcuna llaquicunata charina cashcataca mana intindincunachu (Mateo 16:24). Mana cashpaca Diosta sirvijcunaca problemacunataca mana charingachu. Ima problemacunatapish Diosmi anchuchinga nishpami yuyancuna. Pero cai millai mundopi causacushcamantami achca llaquicuna ricurin. Mana yuyashcapimi ñucanchij causaica cambiai tucun. Chaimi llaquilla sintiri tucunchij (Salmo 6:6; Eclesiastés 9:11). Achca huauqui panicunaca tucui shunguhuanmi Bibliapi yachachishcacuna verdad cashcata crincuna. Chaimantami shuj huauqui paicunata llaquichijpi o mana allita rurajpica Diospi crinataca mana saquincuna (Salmo 119:165). Chaipaj randica paicunapaj fetami ashtahuan sinchiyachincuna (Santiago 1:2-4). Ñucanchijpish sinchi feta charingapajca esforzarinami canchij. w20.07 págs. 8, 9 párrs. 1, 4, 5

Bibliata manaraj liyishpaca Bibliapi yachachishcacunata alli intindingapajmi Jehová Diosta ayudachun mañana canchij. Por ejemplo, ñucanchij problemacunahuan ima shina chꞌimbapurangapajca Jehová Dios paipaj shimipi valishca yuyaicunata ricuchichunmi mañana canchij (Filipenses 4:6, 7). Bibliapi maijanmanta liyicushpaca paicuna ima shina sintirishcata, ima shina yuyashcatami yuyarina canchij. Shinallataj ñucanchijpish paicunahuan chaipi cashcata shinami yuyana canchij. Chashna yuyanaca Dios cushca valishca regalomi can. Bibliata liyicushpaca imata nicushcapi, imata yachachicushcapimi cutin cutin yuyana canchij. Chashnami imata, imamanta parlacushcata, imata yachachicushcataca alli intindishun. Bibliata liyishpa chaipi mana cutin cutin yuyashpaca granocunata charishpapish mana mishqui micunata yanuj shinami can. Pero Bibliata liyishpa chaipi cutin cutin yuyashpaca granitocunata alajata tandachishpa mishquijllata yanuj shinami can. w21.03 pág. 15 párrs. 3-5

Pabloca Yaya Diosta sirvinata mana agllashca cashpaca carcelpica mana caimanchu carcani nishpaca mana yuyarcachu. Shinallataj huaquincuna paita saquishpa rijpipish paica mana resintirishca saquirircachu. Paica ñalla huañunata yachashpapish Jehová Diostami jatunyachishpa catirca. Shinallataj shujtajcunata animashpa, Jehová Diosta tucui shunguhuan mañashpami catirca. Huaquin huauqui panicuna paita saqui rijpipish paicuna saquirishcallapi yuyacunapaj randica paica paipaj amigocuna ayudashcamantami agradicirca. Shinallataj Bibliata estudiashpami catirca (2 Timoteo 3:16, 17; 4:13). Tucuimanta yallica Jehovapish, Jesuspish paita cꞌuyashcata, paita manataj saquinatami tucui shunguhuan crirca. w21.03 pág. 18 párrs. 17, 18

100 huata qꞌuipami panda yachachijcunaca Diosta alli sirvijcunata pandachircacuna. 1870 huatacamami Diosta sirvijcunaca mana tandalla sirvi tucurcacuna. Panda yachachijcunami shuj millai qꞌuihua shina mirarircacuna. Chaimantami Diosta alli sirvijcunata rijsinaca sinchi carca (Mateo 13:36-43). 100 huatamanta 1870 huatacamaca mandajcuna tiyajpipish Daniel capítulo 11-pi nishca shinaca janaj lado mandajta, ura lado mandajtaca mana ricuchincunachu. ¿Imamantataj chaita ninchij? Chai huatacunapi mandajcunaca picuna Diosta sirvijcuna cashcata mana yacharcacunachu. Chaimantami paicunataca mana llaquichircacuna. Pero 1870 huatacuna qꞌuipami janaj ladomanta mandaj, ura ladomanta mandajcunaca cutin ricurina carca. w20.05 pág. 3 párr. 5

Langostacuna Israel llajtata tucuchina cashcatami Joelca huillarca. Caicunaca Israel llajtapi tiyaj ricurishca tucui plantacunatami micunga nircami (Joel 1:4, NWT ). Cai profeciata ricushpaca Diosta sirvijcuna langostacuna shina mana shaicushpa huillanamanta parlashcatami intindircanchij. Cai profeciapi “llajta” nishpaca panda religionta catijcunamanta parlacushcatami intindircanchij. Shinallataj Diosmanta huillajpi paicunaca llaquichishca laya sintirishcatami yuyaj carcanchij. Pero shujtaj versocunata liyishpaca cai profeciamanta shujtaj shina intindina cashcatami cuentata curcanchij. La Biblia. Traducción del Nuevo Mundo Joel 2:20-pi Jehová ima nishcata ricushun: “Janaj ladomanta shamucujtami [o langostacunatami] cancunamantaca caruman apasha” ninmi. Langostacunaca Testigocunata ricuchij cashcatami crircanchij. Pero paicunaca Jesús mandashcata cazushpami Bibliamanta huillancuna, yachachincuna. Shina cajpica ¿Jehová Diosca paicunataca caruman apanmanchu? nishpachari tapurinchij (Ezequiel 33:7-9; Mateo 28:19, 20). Diosca paita sirvijcunataca mana caruman apanchu. Paicunata llaquichisha nijcunallatami caruman apan. w20.04 pág. 3 párrs. 3-5

¿Ñucanchij mañashca shina Yayitu Dios mana cutichijpica imatataj rurana canchij? Santiagoca: “Jehová Diosta mañarashpa catichij” nircami. Jehová Diosca ñucanchij paita siempre mañajpica mana pꞌiñaringachu. Ashtahuanpish paita mañajpica ñucanchijmanca yachaitami pruebacunata chꞌimbapurachun cunga (Salmo 25:12, 13). Paica ñucanchij pruebacunata charijtaca allimi yachan. Chaimantami ñucanchijtaca ayudasha nin. ¿Manachu caita yachashpaca cushilla sintirinchij? Cunanca Jehová Dios ima shina ñucanchijman yachaita cushcata ricushun. Jehová Dios ñucanchijman yachaita cuchunca Bibliata, publicacioncunatami estudiana canchij (Proverbios 2:6). Pero estudiashpallaca mana saquirinachu canchij. Ashtahuanpish ñucanchij causaipimi ima yachachishcataca pajtachina canchij. Santiagoca: “Diospaj Shimi nishca shina rurajcuna caichij, ama uyajcunalla caichijchu” nircami (Santiago 1:22). Dios yachachishcacunata pajtachishpaca alli yuyaj, llaquij, cꞌuyajmi cashun (Santiago 3:17). Chaimi ima llaquicunata charishpapish cushilla canataca manataj saquishun. w21.02 pág. 29 párrs. 10, 11

Tucuicunami congregacionpica Bibliamanta yachacujcunataca paicunapish bautizarichun ayudai tucunchij. Shuj precursoraca: “Ñuca causan ladopica gentecunaca shuj huahuata huiñachingapajca shuj comunami minishtirin nincunami. Chashnallatajmi Bibliamanta yachacujcunataca bautizarichun tucuicuna ayudai tucunchij” ninmi. Shuj huahuata alli huiñachingapajca familiacuna, amigocuna, yachachijcunami ayudai tucun. Chashnallatajmi ñucanchijpish Bibliamanta yachacuj bautizarichunca consejashpa, animashpa, alli ejemplota cushpa ayudai tucunchij (Proverbios 15:22). ¿Bibliamanta yachacujcunata charishpaca imamantataj shujtajcuna ayudachun saquina canchij? Bibliamanta yachacujcunaca achca ayudatami minishtincuna. Chaimantami Bibliamanta yachacujcunataca bautizarichun tucuicuna ayudai tucunchij. w21.03 págs. 8, 9 párrs. 1-3

Diosta sirvijcunaca jovencunapish mayorcunapish mana alli ruraicunata pacallaca mana ruranachu canchij. Apóstol Juanca: ‘Diostami sirvinchij nishpapish mana allicunata rurashpaca llullanchijmi’ nircami (1 Juan 1:6). Pacalla mana allita ruracujtaca gentecunaca mana ricui tucunchu. Pero Jehová Diosca tucuitami ricucun. Paipaj ñaupajpi alli ricuringapajmi chaitaca mana cungarina canchij (Hebreos 4:13). Cai mundopaj gentecunaca ima juchata mana charinchijchu nincunami. Pero ñucanchijca mana paicuna shina yuyanachu canchij. Apóstol Juan causashca punllacunapica apostatacunaca Dios mana rurachun nishcacunata rurashpapish paipaj amigocunami cai tucunchij nijcunami carca. Cunan punllacunapish gentecunaca chashnallatajmi yuyancuna. Jehová Diosca huainayana, shujtaj mana alli ruraicunapish juchami can ninmi. Pero huaquincunaca Diospimi crinchij nishpapish chaicunata ruranaca mana juchachu can nincunami. w20.07 pág. 22 párrs. 7, 8

Panicuna difindichun minishtijpica paicunata difindishunchij. Shuj panica mana testigo cusahuanmi cazarashca can. Chaimantami tandanacui callarishca qꞌuipa chayan. Shinallataj tandanacui tucurincami utca rin. Huahuacunatapish casi mana nunca tandanacuicunaman apanchu. Chaimantachari huaquincunaca paipaj cusahuanmi huahuacunata tandanacuiman pushangapajca sinchi sinchita parlana can nishpa yuyancuna. Pero cai panipaj cusa familiata pushaj cashcamantami mana pailla imatapish decidi tucun. Chaimantami huahuacunata tandanacuiman apanata o mana apanataca paipaj cusa ima nishcata uyana can. Shujtajcuna cai panimanta mana allita nijpica cai pani tucui pudishcata ruracushcamantami paitaca felicitai tucunchij. Shujtajcunamanpish cai panimantaca allicunatami parlai tucunchij. Chashnami cai panimantaca mana huashalla rimangacuna. Congregacionta pushaj huauquicunapish panicuna imallapi ayudachun minishtishcatami alli ricuna can. Jehová Diosca panicunata alli tratachunmi munan (Santiago 1:27). Chaimantami congregacionta pushajcunaca Jesús shinallataj shujtajcunata cꞌuyaihuan ayudancuna (Mateo 15:22-28). Paicuna chaita rurajpica panicunaca Jehová Dios paicunata cuidacushcatami sintincuna. w20.09 págs. 24, 25 párrs. 17-19

Profeta Danielca humilde cashcamantami Jehová Diospaj ayudata siempre mashcarca. Por ejemplo, shuj punllaca Nabucodonosormi shuj muscuita charirca. Danielca Dios ayudajpimi chai muscui ima nisha nishcata huillarca. Paica humilde cashcamantami Jehová Diosta jatunyachirca (Daniel 2:26-28). ¿Caimantaca imatataj yachanchij? Alli conferenciata cuj cashpapish, Diosmanta alli huillaj cashpapish siempremi Jehová Diosta jatunyachina canchij. Ñucanchijllaca imatapish mana rurai tucunchijchu. Jehová Diospaj ayudatami minishtinchij (2 Corintios 4:7). Humilde cashpaca Jesuspaj ejemplotami catishun. Jesusca siempremi Jehová Diospi confiarca (Juan 5:19, 30). Diospaj randi mandanataca Jesusca mana nunca yuyarcachu. Filipenses 2:6-pica: “Jesusca Dios shina canataca” mana munaj shinami carca, ninmi. Jesusca Yayitu Dioslla tucui autoridadta charishcataca allimi yacharca. Chaimantami paitaca tucuipi cazurca. w20.08 pág. 11 párrs. 12, 13

Huiñai causaiman callpacuj huaquin huauqui panicunaca ima ungüita charishcata shujtajcunaca mana yachai tucuncunachu. Ungushca cajpi, ima llaquicunahuan cajpi o pi ñucanchijta mana intindishcata sintishpaca Mefi-bosetpaj causaimanta yachashpami fuerzasta charishun (2 Samuel 4:4). Mefi-bosetca chaqui lisiadomi carca. Chai llaquihuan cajpica rey Davidpish yangamanta juchachishpami mana allita tratarca. Pero paica mana dimastij llaquilla sintirircachu. Ashtahuanpish allicunallapimi yuyarca. Paita ayudangapaj rey David imallata rurashcatami agradicirca (2 Samuel 9:6-10). David paita yanga juchachijpica Mefi-bosetca mana pꞌiñarircachu. Jehová Diostapish mana culparcachu. Ashtahuanpish Dios agllashca rey Davidta apoyangapajmi esforzarirca (2 Samuel 16:1-4; 19:24-30). Jehová Diosca Mefi-bosetpaj causaimanta ñucanchij yachachunmi munan. Chaimantami Bibliapica paipaj causaimanta quillcachirca (Romanos 15:4). w20.04 págs. 26, 30, 31 párrs. 3, 18, 19

Ñucanchij congregacionpica misionerocuna, precursores especialcuna, precursores regularcunachari tiyan. Paicunaca tiempo completotami predicancuna. Cai huauqui panicuna ashalla cosascunata charijpipish Jehová Diosmi paicunataca achcata bendiciashca (Marcos 10:29, 30). Cai huauqui panicunata ñucanchij congregacionpi charishpaca cushillami sintirinchij. ¿Congregacionta pushajcuna, tiempo completopi sirvij huauquicunallachu congregacionpica valishca can? Mana. Cada publicadorcunami Jehová Diospajpish, congregacionpajpish valishca can (Romanos 10:15; 1 Corintios 3:6-8). ¿Imamantataj chashna ninchij? Tucui publicadorcunami predicashpa, yachachishpa gentecuna Jehová Diosta sirvichun ayudancuna. Caita ruranami tucuimanta yalli valishca can (Mateo 28:19, 20; 1 Timoteo 2:4). Publicadorcunaca bautizarishca cashpapish mana bautizarishca cashpapish Diospaj obrata punta lugarpi churangapajmi esforzarincuna (Mateo 24:14). w20.08 págs. 21, 22 párrs. 7, 8

Cai punllapaj versopi nishca shimicunaca ¿imamantataj ñucanchijtaca achcata animan? Tucuicunami huaquinpica achca llaquicunata charinchij. Por ejemplo, shuj cꞌuyashca familia huañujpica achca huatacunatami llaquilla sintirinchij. Mana shuj punllallata chashna sintirinchijchu. Maijan huauqui panicunaca mayorlla tucushcamantami sinchi llaquicunataca chꞌimbapurancuna. Cutin, shujtajcunaca depresión ungüita charishcamantami sinchi punllacunata charincuna. Chashna llaquicunata charishpapish Jesús “tucui” punllacuna ñucanchijta ayudanata yuyarishcamantami ñaupajman catinchij (Mateo 11:28-30). Bibliapica Jehová Diosca ñucanchijta ayudangapajca angelcunata utilizashcatami huillan (Hebreos 1:7, 14). Por ejemplo, angelcunaca Diospaj Gobiernomanta alli huillaicunataca “tucui llajtacunaman, chꞌican chꞌican aillucunaman, chꞌican chꞌican rimaicunaman” huillachunmi ayudan (Mateo 24:13, 14; Apocalipsis 14:6). w20.11 págs. 13, 14 párrs. 6, 7

Yachacujca ima yachacushcacuna Bibliamanta cashcata yachachunmi munanchij (1 Tesalonicenses 2:13). Yachacujtaca tigra parlachunmi animana canchij. Versocunamantapish ñucanchijlla parlanapaj randica pai ima intindishcata parlachunmi saquina canchij. Shinallataj Bibliapi yachashcacunata paipaj causaipi ima shina pajtachichunmi ayudana canchij. Versocunata liyishca qꞌuipaca chai versomanta imata yuyashcata, imata intindishcata parlachunmi huaquin tapuicunata rurana canchij (Lucas 10:25-28). Por ejemplo, cai tapuicunata rurashunchij: “¿Cai versopica Jehová Diospaj ima cualidadcunatataj yachashcangui? ¿Ima yachashca versoca ima shinataj canta ayudai tucun?”. Yachacujca Bibliamanta achcata yachanapaj randica chai yachachishcacunata cꞌuyana, paipaj causaipi pajtachinami ashtahuan importante can. Biblia yachachichun saqui. Alli yachachijcuna cangapajca humildecunami cana canchij. w20.10 págs. 15, 16 párrs. 5, 6

Dios agllashca punllapimi Diospaj Reinomanta huillanataca saquishun. Noepaj punllacunapi ima tucushcata yuyashun. Jehová Diosca 120 huatacuna faltajpimi juillu tamyahuan mana alli gentecunata tucuchinata ña decidirca. Achca huatacuna qꞌuipaca Jehová Diosca Noetaca shuj arcata rurachun gentecunata advertichunmi mandarca. Casi 40 o 50 huatacunatami mana shaicushpa trabajarca. Shinallataj Noeca gentecuna mana uyasha nijpipish huillashpami catirca. Jehová Dios arcapi yaicuchichun mandangacamami predicarca. Chaimi Jehová Diosca pai agllashca horaspi punguta huichcarca. Noepaj punllapi shinallatajmi paipaj munaitaca pai agllashca horaspi pajtachinga (Génesis 6:3; 7:1, 2, 16). Ñallami Jehová Diosca caicamalla huillaichij ninga. Shinallataj Diablota paipaj ruraicunata tucuchishpami Yayitu Jehová Diosca cai Allpamanca mushuj causaita apamunga. Cai Allpapica Yaya Diosta cazuj gentecunallami causanga. Chai punlla chayamungacamaca Noepaj, caishujcunapaj ejemplota catishpa huillanapi ocuparishunchij. Paciente cangapajpish esforzarishunchij. Dios cusha nishcapipish shunguta churashunchij. w20.09 pág. 13 párrs. 18, 19

Yayitu Dios autoridadta piman mana cushca cajpica familia ucupi, congregacionpi ima shina decidinata, ima shina pajtachinatapish mana yachanchijmanchu. Jehová Diosca familia ucupica cusamanmi autoridadta cushca. Shinapish, huaquin cusacunaca Dios yachachishcata pajtachinapaj randica paicunapaj culturapi tiyaj costumbrecunatami catincuna. Shinallataj paicunapaj munaita pajtachingapajllami paicunapaj huarmicunataca mana alli tratancuna. Por ejemplo, huaquin cꞌaricunaca shujtajcunapaj ñaupajpi valishca cashcata ricuchingapaj, pailla mandaj cashcata ricuchingapajmi huarmicunataca mana alli tratancuna. Shujtajcunaca huarmicunata cꞌuyachun mana obligai tucushpapish paicunata tucuipi cazuchunmi manchachincuna. Cꞌaricunaca chashna yuyashpa, chashna rurashpaca huarmicunata mana respetashcatami ricuchincuna. Jehová Dioscarin cusacuna huarmicunata chashna tratachunca mana munanchu (Efesios 5:25, 28). w21.02 pág. 3 párrs. 6, 7

Problemacunahuan cashpaca tucui shunguhuanmi Yaya Diosta cutin cutin mañana canchij. Paita mañanata mana saquijpica ‘shungupipish, yuyaipipish tranquilo sintirichunmi’ Diosca paipaj espíritu santohuan ayudanga (Filipenses 4:6, 7; Gálatas 5:22). Ima problemata charishpaca ima shina sintirishcataca tucuita Jehová Diosman huillashunchij. Problemata allichi tucushpaca alli yuyaita cuchun, fuerzasta cuchun mañashunchij. Cutin chai problemata mana allichi tucushpaca chai problemamanta ama yallitaj sustaringapaj ayudachun nishpami mañana canchij. Chashna cutin cutin Yayitu Diosta mañashpaca tiempohuanca pai ima shina ayudashcatami cuentata cushun. Yayitu Dios ñucanchij mañashcacunata mana utca cutichijpipish ama shaicurishunchij. Jehová Diosca paita mañarashpa catichunmi munan (Lucas 11:8-10). w21.01 pág. 3 párrs. 6, 7

Congregacioncunapica cazarashcacunalla, huahuayujcunallaca mana tiyanchu. Ashtahuanpish achca solteracuna, solterocunapishmi tiyan. ¿Solterocunata respetashcataca ima shinataj ricuchinchij? Jesuspi yuyashun. Paica cai Allpapi cashpaca mana cazararcachu. Ashtahuanpish Diosta sirvingapajmi dedicarca. Jesusca solterocunataca: “Cazaranatajmi canguichij” o “mana cazaranachu canguichij” nishpaca mana yachachircachu. Pero huaquincunaca soltero saquirinatami decidingacuna nircami (Mateo 19:12, QC, 1989). Maijancuna mana cazarashcamanta ima faltashcataca Jesusca mana yuyarcachu. Chaipaj randica paicunataca respetohuanmi tratarca. Apóstol Pablopish Diosta sirvingapajmi soltero saquirirca. Pero cazaranaca mana allichu can nishpaca mana yachachircachu. Chaitaca cada uno decidina cashcatami ricuchirca. w20.08 pág. 28 párrs. 7, 8

Apóstol Juanca achca huatacunatami causarca. Paipaj causaipica alaja experienciacunata, desanimachij experienciacunatami charirca. Chashnapish Jesús mandashcata cazushpa huauqui panicunaman cꞌuyaita ricuchingapajmi esforzarirca. Chaimantami Juanca Jehová Diospish, Jesuspish paita cꞌuyashcata seguro carca. Llaquicunahuan cajpipish paicuna ayudanapimi confiarca (Juan 14:15-17; 15:10). Diablopish, paita apoyajcunapish Juan cꞌuyaita ricuchichunca mana jarcai tucurcacunachu. Cunan punllacunapipish Juan causashca punllacunapi shinallatajmi cai Allpata Diablo mandacushcamantaca achca pꞌiñanacuicuna tiyan (1 Juan 3:1, 10). Diabloca ñucanchij huauqui panicunata cꞌuyanata saquichunmi munan. Chaimanta ñucanchij huauqui panicunata cꞌuyashcataca rimaicunahuan, ruraicunahuan ricuchishunchij. Chaita rurashpaca huauqui panicunahuanmi Jehová Diostaca tandalla, cushilla sirvishun (1 Juan 4:7). w21.01 pág. 13 párrs. 18, 19

Cai Allpata Diablo mandacushcamantami achca llaquicunata charishun (2 Timoteo 3:1). Pero manchaitaca mana charinachu canchij. Jehová Diosca ñucanchij ima shina sintirishcata, ima llaquicunahuan cajtaca allimi yachan. Paica ñucanchijtaca ‘manataj saquishachu. Ñuca maquihuanmi charisha’ nicuj shinami cuidanga (Isaías 41:10, 13). Jehová Dios ñucanchijta manataj saquinataca mana cungarinachu canchij. Bibliata liyinata manataj saquijpica Jehová Diosca llaquicunata chꞌimbapurachunmi fuerzasta cushpa catinga. Videocunapi, publicacioncunapimi paicunamantaca yachai tucunchij. Pero manaraj ricushpa, manaraj liyishpaca alli intindingapajmi Jehová Diosta ayudachun mañana canchij. Shinallataj Diosta sirvijcunamanta yachacushpaca paicunahuan cashca shinami yuyana canchij. Paicuna pruebacunata ahuantangapaj imata rurashcapi, Jehová Diospish paicunata ima shina ayudashcapimi cutin cutin yuyana canchij. Paicunamanta yachashpaca ñucanchij causaipipishmi pajtachina canchij. Qꞌuipaca Yayitu Diostaca alajata yachachishcamantami agradicina canchij. Shinallataj shujtajcunamanpishmi imalla yachashcacunataca parlashpa animana canchij. w21.03 pág. 19 párrs. 22, 23

Cazarashcacuna cashpa huahuacunata charisha nishpaca cashna tapuri: “¿Ñucanchijca Diosta cꞌuyajcuna, paipaj Shimita pajtachijcuna, humildecunachu canchij? ¿Cunanlla huacharishca huahuata cuidachunchu Jehová Diosca ñucanchijta agllanman?” (Salmo 127:4). Ña yaya o mama cashpaca cashna nishpa tapuri: “¿Trabajana importante cashcataca ñuca huahuacunaman yachachinichu? (Eclesiastés 3:12, 13). ¿Mana alli munaicunamanta, mana alli cosascunamantachu ñuca huahuacunataca cuidani?” (Proverbios 22:3). Huahuacunata cuidasha nishpapish mana tucui problemacunamantachu cuidai tucungui. Pero paicuna chai problemacunahuan chꞌimbapurachunmi ayudai tucungui. ¿Ima shinataj ayudai tucungui? Bibliapi alli consejocunata mashcachunmi ayudai tucungui (Proverbios 2:1-6). Por ejemplo, shuj cꞌuyashca familia Jehová Diosmanta caruyajpica Diosta tucuipi cazuna imamanta importante cashcatami yachachina cangui (Salmo 31:23). Shuj cꞌuyashca familia huañujpica chai llaquita chꞌimbapurachun, tranquilo sintirichunmi huaquin versocunata mashcachun ayudai tucungui (2 Corintios 1:3, 4; 2 Timoteo 3:16). w20.10 págs. 27, 28 párr. 7