Enero

Religionta pushajcuna mana allicunata rurashcamantami Jesusca paicunata sinchita rimarca. Por ejemplo, fariseocunaca micungapajca maquicunataca codocunacamami maillajcuna carca. Pero, paicunapaj yaya mamacunataca mana cuidajcunachu carca (Mateo 15:1-11). Religionta pushajcuna pꞌiñarijpipish Jesusca ima verdadtaj cashcata ninataca mana saquircachu. Jesusca tucui panda yachachishcacunataca Diosca mana chasquinchu nishpami huillarca. Paica: ‘Achca gentecunaca ancho ñanpimi ringacuna. Chai ñanca chingarinamanmi apan. Cutin ashacunallami huiñai causaiman apaj ñanpica yaicungacuna’ nircami (Mateo 7:13, 14). Shinallataj Jesusca huaquin gentecuna jahua ñahuillahuan, ricuillahuan Diosta sirvinatami yacharca. Chaimantami paica: “Llullashpa yachachijcunamanta huaquichirichij. Paicunaca oveja shina churarishcami cancunapajmanca shamuncuna. Ashtahuanpish paicunapaj shunguca millai atujcuna shinami. Paicunataca granota pꞌucujta ricushpa pi cashcata rijsinguichij” nirca (Mateo 7:15-20). w21.05 págs. 9, 10 párrs. 7, 8

Anaca Leví familiamanta Elcaná shuti runahuanmi cazararca. Pero Elcanaca Peniná shuti shujtaj huarmitami charirca. Elcanaca Anatami Peninata yalli cꞌuyaj carca. Peninaca achca huahuacunatami charirca. Pero Anaca ima huahuacunata mana charircachu. Chaimi Peninaca Anataca siempre burlashpa mana alli trataj carca. Anaca paita chashna tratashcamantami achcata huacaj carca, maipicarin mana micuj carca. Pero Bibliapica Peniná chashna tratajpipish Ana chashnallataj llaquichishcataca mana parlanchu. Ashtahuanpish Anaca pai ima shina sintirishcatami shungumanta Jehová Diosman parlarca. Pai ayudanapimi confiarca (1 Samuel 1:2, 6, 7, 10). ¿Anamantaca imatataj yachanchij? Pi ñucanchijta yalli canata munashpa, mana alli tratashpa llaquichijpica mana chashnallataj llaquichinachu canchij. Ashtahuanpish paicunahuan alli apanacungapajmi esforzarina canchij (Romanos 12:17-21). Chashnami ñucanchijta llaquichij mana cambiajpipish ñucanchijllataj tranquilo sintirishun. w21.07 págs. 17, 18 párrs. 13, 14

Cunanca Judas Iscariotepi yuyashun. Paica callaripica alli runami carca (Lucas 6:13, 16). Jesusca paipi confiashcamantami predicangapaj cullquita huaquichina cajata cuidachun mingarca. Jesusca achca cutinmi paita catijcunataca: ‘Quiquinpajlla charinata ama munanguichij’ nishpa advirtishca carca (Marcos 7:22, 23; Lucas 11:39). Shuj punllaca Simón shuti runaca paipaj huasipi carangapajmi Jesusta, Jesuspaj discipulocunata, Mariata, Martata invitashca carca. Ña micucun horasmi Mariaca jatarishpa Jesuspaj uma jahuapica mishquijllaman ashnacuj valishca aceiteta tallirca. Chaita ricushpami Judas, caishuj apostolcunaca pꞌiñarircacuna. Caishuj apostolcunaca tal vez cai aceiteta cꞌatushpaca huillangapajmi ashtahuan cullquita charishun nishpami yuyashcangacuna. Pero Judasca chai cullquita shuhuasha nishcamantami pꞌiñarirca (Juan 12:2-6; Mateo 26:6-16; Lucas 22:3-6). w21.06 pág. 18 párrs. 12, 13

Ñucanchijca maipica achca mingashcacunata charishcamanta, chaita mana tucuita pajtachi tucushcamantami desanimarinchij. Apóstol Pablopish congregacionpi achca mingashcacunata pajtachinata charishcamanta, huauqui panicuna yuyailla cashcamantami preocuparirca (2 Corintios 11:23-28). Cutin maipica ancha ungüihuan cashcamantami llaquilla sintirinchij. Apóstol Pablopish ancha ungüimanta mana alliyai tucushcamantachari llaquilla sintirirca (2 Corintios 12:7-10). Shinallataj tal vez maipica cutin cutin pandarishcamantami desanimados sintirinchij. Pablopish juchayuj cashcamantami cada punlla allita rurangapajca esforzarina carca (Romanos 7:21-24). Apóstol Pabloca cashna llaquicunata charishpapish Yayitu Diostami sirvishpa catirca. Paica juchayuj cashcata yachashpapish paita quishpichingapaj Jehová Dios, Jesusta cushcatami alli intindirca. w21.04 págs 21, 22 párrs. 7, 8

Adán juchata rurashcamantami paipish, paipaj huahuacunapish huiñaita causanata chingachircacuna. Adanca paillatajmi juchata rurarca, chaimantami huañurca. Pero paipaj huahuacunaca Adán juchata rurashcamantaca mana ima culpata charircacunachu (Romanos 5:12, 14). Pero, ¿Jehová Diosca Adanpaj huahua huahuacunata quishpichingapajca imatataj rurarca? Jehová Diosca Adanpaj culpamanta huañuimanta, juchamanta quishpichingapajmi paipaj Churita curca (Génesis 3:15). Jesús huañushcamantami juchayujcuna cashpapish Jehová Dioshuan alli apanacui tucunchij. Paimantami Diablopaj ruraicunatapish Jehová Diosca tucui tucuchinga (1 Juan 3:8). Shinallataj Jesús huañushcamantami paita sirvijcuna paraíso Allpapi cushilla causachun saquinga. w21.04 págs. 14, 19 párrs. 1, 17

Achca cꞌaricuna, huarmicunami Jerusalenmanca viajashcacuna carca. Paicunaca chꞌican chꞌican llajtacunamanta, chꞌican chꞌican shimicunata parlajcunamantami carcacuna. Paicuna ña Jerusalenpi cajpica Jesusta catij judiocunaca chai gentecunapaj shimicunapimi predicai callarircacuna. Chaimi apóstol Pedropish Jesuspi feta charishpa quishpiri tucushcata intindichirca. Jerusalenman shamujcunapajca cai nishcacunami ashtahuan importante carca. Cai shimicunata uyashpami huaquincunaca: “¿Quishpiringapajca imatataj rurana canchij?” nircacuna. Chaimi apóstol Pedroca: “Jesucristopaj shutipi bautizarichij” nirca (Hechos 2:37, 38). Chai qꞌipaca 3.000 gentecuna bautizarishpami Jesusta cati callarircacuna. Chai punllamantami discipulocunaca Jesús mingashcata pajtachishpa catircacuna. Cai mingashcataca cunancamami pajtachishpa caticunchij. w21.06 pág. 2 párrs. 1, 2

Gentecuna mana uyasha nijpi o huaquincuna Diospaj contracuna cajpimi Bibliamanta yachacujcunata charinaca sinchi ricurin. Pero gentecunapaj causaipi ima cambiocuna tiyai tucushcatami yuyarina canchij. Chaimantachari qꞌuipaca gentecunaca Bibliamanta yachana munaita charingacuna (Mateo 5:3). Huaquincunaca ñucanchij publicacioncunataca mana chasquijcunachu carca. Pero qꞌuipaca Bibliamantami yachai callarishcacuna. Shinallataj Jehová Dios chagrayuj shina cai obrata alli pushacushcatami yuyarina canchij (Mateo 9:38). Paica plantacunata tarpuj shina, yacucunata churaj shina gentecunaman predicashpa, yachachishpa catichunmi munan. Shinapish Jehová Diosmi shuj plantitata huiñachij shina gentecunataca paita sirvichun ayudan. Ashtahuancarin Bibliamanta yachacujcunata mana charijpipish Jehová Diosca ñucanchij esfuerzocunataca achcatami valoran. w21.07 pág. 6 párr. 14

Jehová Diosca gentecunataca huahuacunata charichunmi saquishca. Shinallataj yaya mamacunamanca huahuacunaman Jehová Diosta cꞌuyachun, paita sirvichun yachachichunmi mingashca. Caipi yuyashun. Jehová Diosca angelcunamanca podertami curca. Pero paica angelcunamanca huahuacunata charichunca mana chai poderta curcachu. Cutin Jehová Diosca yaya mamacunamanmi huahuacunata corregishpa, Jehová Diospaj mandashcacunata yachachishpa huiñachichun saquishca. Chaimantami yaya mamacunaca agradecidos sintirina can (Efesios 6:4; Deuteronomio 6:5-7). Shinallataj Yayitu Diosca paipaj organizacionhuanmi yaya mamacuna huahuacunaman Bibliamanta yachachichunca publicacioncunata, videocunata, cantocunata cushca. Chashnami Yayitu Diospish, paipaj Churi Jesuspish huahuacunata cꞌuyashcata ricuchincuna (Lucas 18:15-17). Jehová Diosca yaya mamacuna paicunapaj huahuacunata cuidangapaj tucui pudishcata rurajpica cushillami sintirin. Yaya mamacunaca caita pajtachishpaca paicunapaj huahuacuna Diospaj familia ucupi cachunmi ayudancuna. w21.08 pág. 5 párr. 9

Huaquin gentecunaca: “Feta charinaca imatapish mana alli investigashpa crinallami can” nincunami. Pero Bibliaca chaitaca mana yachachinchu. Bibliapica mana ricui tucushcacuna tiyashcata cringapajca alli investigana cashcatami yachachin. Por ejemplo, Jehová Dios, Jesús, Diospaj Gobierno tiyashcataca Bibliapica achijtami ricuchin (Hebreos 11:3). Shuj cientificoca Testigomi tucurca. Paica: “Testigo de Jehovacunaca ciencia ima nishcata investigashpa, Biblia ima nishcata investigashpami mana ricushcacuna ciertotaj tiyashcata crinchij” ninmi. Shinaca ¿huaquin gentecunaca imamantataj Dios tucuita rurashcacunapica mana crincuna? Paicunaca mana investigashcamantami mana crincuna. Robertca cunanca testigo de Jehovami can. Paica: “Ñuca escuelapi cajpica Yayitu Dios tucuita rurashcamantaca nunca mana yachachijcunachu carca. Chaimantami Dios tucuita rurashcataca mana crircani. Pero ñuca 22 huatacunata charijpica testigo de Jehovacunami ñucata visitarcacuna. Paicunaca Yayitu Dios tucuita rurashcata yachachingapajca Bibliapi tiyaj yuyaicunahuanmi achijta yachachircacuna” ninmi. w21.08 págs. 15, 16 párrs. 4, 5

Jehová Dios cuidaj, ayudaj cashcataca Bibliata liyishpa, huauqui panicunata ima shina bendiciashcata yachashpa paimanta yachai tucunchij. Pero Jehová Dios ñucanchijta cuidaj cashcata alli intindingapajca shuj micunitata probacuj shina Yayitu Dios ñucanchij causaipi ima shina cuidashcata, ayudashcatami ñucanchijllataj ricuna canchij. Caipi yuyashun. Jehová Diostaca tiempo completotachari sirvisha ninchij. Pero chaipajca ñucanchij causaipichari huaquin cambiocunata rurana tucunga. Tal vez Mateo 6:33-pi Jesús nishcatami liyishcanchij. Chaipica Yayitu Diosta punta lugarpi churajpi paillataj ñucanchijman minishtirishca cosascunata cunamantami yachachin. Pero ñucanchijllatajca Yayitu Dios ima shina cuidashcataca manachari ricushcanchij. Chashna cashpapish Jesús nishcacunapi confiashpaca menos horascunallata trabajashpa, minishtirishca cosascunallahuanmi causai callarinchij. Chashnami Jehovamanta predicanataca punta lugarpi churanchij. Chaita rurajpica Jehová Diosllatajmi ñucanchijmanca minishtirishca cosascunata cushpa cuidanga. Pai ñucanchijta cuidajta ricushpami Yayitu Dios alli cajtaca ñucanchijllataj cuentata cushun. w21.08 pág. 26 párr. 2

¿Cunan punllacunapi gentecunaca imatataj yuyancuna? Iglesiata pushajcunaca charij gentecunata, rijsishca gentecunatami chasquisha nincuna. Chai gentecuna Biblia yachachishcacunata mana cazujpipish chasquincunallami. Iglesiata pushajcunaca Jehová Diosta sirvijcuna cai mundopaj mana importante cashcamantami pꞌiñancuna. Apóstol Pablo nishca shinaca Jehová Diosca cai pachapica gentecuna imapaj mana valishca shinatami paita sirvichunca agllarca (1 Corintios 1:26-29). Pero Jehová Diospajca paita alli sirvijcunaca achca valishcami can. ¿Ama ñitcaringapajca imatataj rurana canchij? (Mateo 11:25, 26). Achca gentecuna Diosta sirvijcunata imapaj mana valishcata shina ricujpipish Jehová Dios paipaj munaita pajtachingapaj humilde gentecunata agllashcatami yuyarina canchij (Salmo 138:6). Shinallataj humilde gentecuna Diospaj ayudahuan paipaj munaita ima shina pajtachicushcatami yuyarina canchij. w21.05 págs. 8, 9 párrs. 1, 5, 6

Apóstol Pabloca agradecido cashcamantami shujtajcunapaj ayudata chasquirca (Filipenses 2:19-22). Mayorlla huauqui panicunaca jovenlla huauqui panicunatami cancunapaj congregacionpi agradicishcata ricuchi tucunguichij. Jovenlla huauquicuna cancunata mai lugarman pushasha nijpi, comprasta randishpa cusha nijpi, ima minishtishcahuan ayudasha nijpica cushicushpa paicunapaj ayudata chasquichij. Jehovami cashna jovenlla huauquicunahuan cancunataca ayudan. Paicunapaj ayudata chasquishpaca jovencunahuanmi alli apanacunguichij. Shinallataj jovenlla huauqui panicunatapish Yayitu Diosta sirvichunmi ayudanguichij. Paicunataca congregacionpi sirvingapaj achcata esforzaricushcamantami pagui ni tucunguichij. Cancunapaj experienciamanta parlangapajpish tiempota surcuichij. Chaita rurashpaca jovenlla huauqui panicunata Jehová Dios congregacionman pushamushcamantami agradicishcata ricuchinguichij (Colosenses 3:15; Juan 6:44; 1 Tesalonicenses 5:18). w21.09 págs. 11, 12 párrs. 12, 13

Jehová Diosca tucui huauqui panicunatami cꞌuyan. Pero maipica ñucanchijca shujtaj culturamanta cashcamanta o uchillapi ima shina huiñashcamantami huauqui panicunaman cꞌuyaita ricuchinaca sinchi cai tucun. Ñucanchij pandarishcacunahuanpishmi huauqui panicunata llaquichi tucunchij. Pero tucuicunami Jehová Dios ima shinami cꞌuyan chashnallataj huauqui panicunata cꞌuyangapaj esforzarina canchij (Efesios 5:1, 2; 1 Juan 4:19). Cꞌuyaita ricuchijcunaca shujtajcunata ayudangapaj, animangapajmi tucui pudishcata rurancuna. Jesusca gentecunata alli tratashpa, paicunaman cꞌuyaita ricuchishpami Jehová Dios gentecunamanta ima shina preocuparishcata ricuchirca (Juan 5:19). Bibliapica: “Chaipica michij illajlla, ovejacuna caita chaita puricuj shinata, achcacunata ricushpami paicunataca achcata llaquirca” ninmi (Mateo 9:36). Jesusca mana cꞌuyashpallachu saquirirca. Paica ungushcacunata, llaquilla cajcunatami ayudashpa cꞌuyaita ricuchirca (Mateo 11:28-30; 14:14). w21.09 pág. 22 párrs. 10, 11

Jehová Diosca llaquij cashcamantami cꞌuyaita ricuchin. Apóstol Pabloca Jehová Diosca cꞌuyaimantami jahua pachapi causana esperanzata charijcunamanca jahua pachapi huiñaita causachun saquishca ninmi (Efesios 2:4-7). Pero Jehová Diosca mana jahua pachaman rigrijcunallamanchu cꞌuyaita ricuchin. Paica tucuicunamanmi cꞌuyaita ricuchin. Davidca: “Mandaj Diosca tucuicunahuan allimari. Pai llaquij canaca tucui rurashcacunapaj jahuapimari” nircami (Salmo 145:9). Pero Jehová Diosca huaquinpica mana siempre llaquij cashcata ricuchinchu. Jesusca achca huatacunatami manaraj cai Allpaman shamushpaca jahua pachapi paipaj Yayahuan causarca. Chaimi Jehová llaquij cashcataca alli yacharca (Proverbios 8:30, 31). Jesusca paipaj Yaya juchayuj runacunata ima shina llaquij cashcataca allimi ricurca (Salmo 78:37-42). Chaimantami Jesús cai Allpapi cashpaca Jehová Dios shinallataj gentecunamanca llaquishpa, cꞌuyaihuan yachachirca. w21.10 págs. 8, 9 párrs. 4, 5

Jehová Diosca Jesús mañashcatami cutichirca. Paica jahua pachamantami ñuca shutitaca jatunyachishami nirca. Jesusca cai Allpapi Jehová Diosmanta yachachicushpaca siempremi Yayitu Diospaj shutita jatunyachirca (Juan 17:26). Testigo de Jehovacunapish chashnallatajmi Jehová Diospaj shutitaca jatunyachinchij, shujtajcunamanpish Diospaj shutimanta yachachinchij. Punta siglopi Jesusta catijcuna tiyai callarishca huashaca Jehová Diosca paicunapuramantami paipaj shutita jatunyachichun, shuj llajtata agllai callarishca (Hechos 15:14). Jesusta catijcunaca Jehová Diospaj shutita utilizashpa, shujtajcunaman yachachishpaca cushillami sintirijcuna carca. Paicunaca Bibliapipish Diospaj shutitami quillcarcacuna. Chashnami paicunalla Jehová Diospaj shutitaca rijsichijcuna carca (Hechos 2:14, 21). Cunan punllacunapipish testigo de Jehovacunaca Diospaj shutitami jatunyachinchij. w21.10 págs. 20, 21 párrs. 8-10

Jehová Diospaj cꞌuyanata manataj saquinaca huiñaipajmi can. Salmo 136-pica Diospaj cꞌuyaica casi 26 cutinmi ricurin. Punta versopica: ‘Mandaj Diostaca alabaichigari, paica allimari. Pai llaquij o cꞌuyaj canaca huiñaipajmari’ ninmi (Salmo 136:1). Cutin versos 2-manta 26-cama tucuri partecunapica Jehová Diospaj cꞌuyaica huiñaipajmari nishcaca achca cutinmi ricurin. Cai versocunata liyishpaca Dios ñucanchijman chꞌican chꞌican siempre cꞌuyaita ricuchishcatami yachanchij. Jehová Diosca huiñaipaj cꞌuyajmari nishcaca paipaj pueblota cꞌuyashpa catinata mana nunca cambianatami ricuchin. Cai shimicunata yachashpaca Dios paita sirvijcunata manataj saquinatami intindinchij. Paica ñucanchij sinchi llaquicunahuan cai horaspish manataj saquingachu. Jehová ñucanchijhuan cashcamanta, problemacunata ahuantachun fuerzasta cushcamanta, huiñai causaiman apaj ñanpi pushacushcamantami cushilla sintirinchij (Salmo 31:7). w21.11 págs. 4, 5 párrs. 9, 10

Ñallami panda religionca tucuchishca canga. Shinallataj Magog llajtata mandaj Gogpish Diospaj pueblotami llaquichisha ningacuna. Armagedón macanacuipishmi tiyanga. ¿Caicunata yachashpaca Diosta sirvinataca ahuantashachu? nishpa tapurishcanchijchu. Manchaita charishpaca cai punllapaj versopi Jesús ima nishcatami yuyarina canchij. Jesusca paipaj discipulocunamanca: ‘Cancunapaj shungupica ama yallitaj sustarichijchu. Ashtahuanpish Diospi feta churashcata ricuchichij’ nircami. Ñucanchij fe sinchi cajpica shamuj punllacunapi llaquicuna ricurijpipish ahuantashunmi. Shamuj punllacunapi sinchi pruebacunata ahuantangapajca cunan punllacunapi tiyaj pruebacunata ahuantashpami fetaca sinchiyachina canchij. Ima pruebacunata chꞌimbapurashpa, chaita ahuantashpaca qꞌuipa punllacunapi sinchi pruebacuna ricurijpipish ahuantai tucushunmi. Jesuspaj discipulocunaca ashtahuan feta charinatami minishtircacuna. w21.11 pág. 20 párrs. 1, 2

Apóstol Pabloca Diosta sirvijcunata, Timoteotami Diospaj mingashcacunata pajtachishpa catichun animarca (2 Timoteo 4:5). Huaquin lugarcunapica gobiernocunaca predicachunca mana saquincunachu. Pero sinchi cajpipish huauqui panicunaca huillashpami catincuna. Achca huauqui panicunaca chꞌican chꞌican llaquicunata charishcamantami desanimarincuna. Maijancunaca minishtirishca cosascunata familiaman cungapajmi achcata trabajancuna. Tucui semana trabajashcamantami huillangapajca sábado, domingotaca fuerza illaj sintirincuna. Cutin caishuj huauqui panicunaca ancha ungüita charishcamanta, mayorlla cashcamanta o huasimanta mana llujshi tucushcamantami huillanataca mana tanto pudincuna. Cutin maijancunaca imapaj mana valishca shinami sintirincuna. Ñucanchij ima problemacunata charijpipish Jehová Diosca ahuantashpa catichun, paita sirvishpa catichunmi fuerzasta cushpa ayudanga. w21.05 pág. 20 párrs. 1-3

Maipica shujtaj gentecunami Jehová Diosta ama sirvichunca jarcasha nincuna. Chaimantami jucha illaj canaca sinchi can. Chaipajca Levítico 19:19-pi tiyaj yuyaicunatami yuyarina canchij. Chaipica: ‘Chꞌican chꞌican puchcacunahuan rurashca churanatapish ama churanguichij’ ninmi. Israelitacunaca cai mandashcata pajtachishpaca Diosta mana sirvijcunamanta chꞌican cashcatami ricuchircacuna. Cunan punllacunapica algodonmanta, poliestermanta o chꞌican chꞌican materialmanta rurashca ropacunataca churai tucunchijmi. Pero Diosta mana sirvijcuna shina mana comportarishpaca ima jucha illajlla cashcatami ricuchishun. Familiacunata, shujtajcunataca achcatami cꞌuyanchij. Pero ñucanchij ruraicunahuan, ima decidishcacunahuanmi Diospajlla chꞌicanyachishca cashcata ricuchina canchij. Chaimanta jucha illaj cangapaj esforzarishunchij (2 Corintios 6:14-16; 1 Pedro 4:3, 4). w21.12 págs. 5, 6 párrs. 14, 16

Jesusca huiñai causaiman apaj ñanpi puri tucunguichijmi nircami. Paica: ‘Ñuca yachachishcacunata catirashpaca, ñuca yachacujcunatajmi canguichij. Chashna cashpami, mana llullataca rijsinguichij. Chai mana llullami huatashca shinamanta cacharichinga’ nircami (Juan 8:31, 32). Quiquin ancho ñanpi mana purinata agllashcamanta, ashtahuanpish huiñai causaiman apaj ñanpi purinata decidishcamantami cushilla sintirinchij. Canca Bibliata estudiai callarishpaca Jehová Dios ima mandashcatami intindishcangui. Shinallataj Jesús yachachishcatapishmi cazushcangui. Por ejemplo, Jehová Dios panda religioncunamanta caruyachun mandashcata, mana alli fiestacunapi mana participana cashcata, huaquin costumbrecunamanta llujshina cashcatachari intindircangui. Maipica Jehová Dios mandashcata pajtachina mana jahualla cashcata, tucui mana alli ruraicunata huashaman saquingapaj esforzarina cashcatapishmi yachashcangui (Mateo 10:34-36). Sinchi cajpipish Diosta achcata cꞌuyashcamantami chaita rurashcangui. Chaimantami Jehová Diosca canmantaca cushilla sintiringa (Proverbios 27:11). w21.12 págs. 22, 23 párrs. 3, 5

Moisesca pandarishpapish Jehová Diospaj consejocunatami chasquirca. Shuj cutinca Moisesca israelitacunahuanmi achcata pꞌiñarirca. Jehová Diostapish mana jatunyachircachu. Chaimantami Jehová Diosca paitaca pai cusha nishca allpaman pasachunca mana saquirca (Números 20:1-13). Tiempo huashaca Moisesca Dios cusha nishca allpaman yaicungapajmi cutin mañarca. Chaimi Diosca: ‘Chaimantaca ama ashtahuan rimaichu’ nirca (Deuteronomio 3:23-27). Moisesca resentirishca saquirinapaj randica Jehová Dios imata decidishcatami apoyarca. Chaita rurajpimi Jehová Diosca israelitacunata mandashpa catichun saquirca (Deuteronomio 4:1). Moisesca ñucanchijpajca alli ejemplomi can. Paica Dios cusha nishca allpaman mana pasashpapish huañuna horascamami Jehová Diostaca alli sirvirca. Ñucanchijpish Moisés shina consejota chasquishpaca ima llaquipi mana urmashunchu (Proverbios 4:11-13). Achca huauqui panicunami chaita rurashcacuna. w22.02 pág. 11 párrs. 9, 10

Huata 32 tucuripica Jesuspaj cꞌuyashca amigo Lazaromi ungushpa huañurca (Juan 11:3, 14). Jesusca Lazarota, Lazaropaj pani Mariata, Martataca achcatami cꞌuyarca. Martaca ña Jesús tigracujta yachashpaca, Jesushuan ñanpi tupashpami paica dimastij llaquirishpa Jesustaca: “Mandaj Jesús, can caipi cashca cajpica, ñuca turica mana huañunmanchu carca” nishpa huacashcanga (Juan 11:21, 32, 33). Jesusca Lazaropaj panicuna María, Marta huacashcata ricushcamantami paipish huacai callarishcanga. Canpish tal vez shuj familiata o amigota huañuipi chingachishcangui. Jehová Diosca can ima shina sintirijtaca allimi yachan. Jesusca Jehová Dios ima shina cajta ricuchijmi can (Hebreos 1:3). Jesusca pai huacashpaca Jehová Dios ñucanchijmanta preocuparishcatami ricuchirca (Juan 14:9). Cambaj cꞌuyashca familiata o amigota huañuipi chingachishca cajpica, Jehová Diosca can ima shina sintirishcataca allimi yachan, paipish llaquillami sintirin. Chaimantami cantaca ayudasha, cushichisha nin (Salmo 34:18; 147:3). w22.01 págs. 15, 16 párrs. 5-7

Diosta mañashpa, paimanta yachashpa, ima yachashcapi yuyashpaca ashtahuanmi beneficiarishun. Punta lugarpica alli decisioncunatami agllashun. Bibliapica: ‘Yachajcunahuan tandanacujca yachaisapami tucun’ ninmi (Proverbios 13:20). Ishquipica alli yachachijcunami cashun. Jehová Diosta mañashpa, paimanta yachashpaca Jehová Diostami ashtahuan cꞌuyashun. Chashna cꞌuyashpaca shujtajcunatapish Jehová Diosta cꞌuyachunmi yachachi tucushun. Jesuspish Diosmanta yachachicushpaca paita cꞌuyashcatami ricuchirca. Chashna yachachishcamantami paipaj discipulocunapish Jehová Diosta cꞌuyai callarircacuna (Juan 17:25, 26). Quimsapica sinchi fetami charishun. Yayitu Diosta mañashpa, pai ñucanchijta ayudajpica ñucanchij fetami sinchiyachinchij (1 Juan 5:15). w22.01 pág. 30 párrs. 15-17

Jehová Diosca ñucanchijta cꞌuyashcamanta, alli causachun munashcamantami mana alli yuyaicunata, mana alli costumbrecunata saquichun munan (Isaías 48:17, 18). Chai mana allicunata mana saquishpaca ñucanchijllatajmi llaquipi urmashun. Shujtajcunatapishmi llaquichishun. Chaita ricushpaca Jehová Diosca llaquillami sintiringa. Mana allicunata saquingapaj esforzarijpica tal vez familiacuna, amigocunachari burlaringacuna (1 Pedro 4:3, 4). Tal vez paicunaca: “Ñucanchij munashca shinami causana canchij. Pi imata mana ninachu can” nishpami yuyancuna. Pero Diosta mana cazujcunaca cai mundopaj esclavocuna shinami causancuna (Romanos 12:1, 2). Cutin ñucanchijca mana cai mundopaj esclavos casha ninchijchu. Chaimantami mauca causaita saquinata decidina canchij. Chaimi Jehová Diosca paita alli sirvijcuna cachun ayudanga (Isaías 64:8). w22.03 págs. 3, 4 párrs. 6, 7

Bibliata liyishpa chaipi cutin cutin yuyashpaca ñucanchij charishca problemacunallapica mana yuyashunchu. Por ejemplo, shuj panica viudami saquirirca. Chaimi shuj ancianoca Job librota liyichun animarca. Job libromanta liyicushpaca cai panica ‘Jobca paipaj problemacunallapimi yallitaj yuyan’ nishpami yuyai callarirca. Qꞌuipaca paipish Job layallataj yuyacushcatami cuentata curca. Chaita intindishpaca problemacunapi ama yallitaj yuyangapajmi esforzarirca. Shinallataj paipaj cusa huañushcamanta chai llaquicunata chꞌimbapurangapajpish fuerzatami charirca. Jehová Diosca ñucanchij llaquilla cajpica huauqui panicunahuanmi animan. Pabloca: ‘Caishujmanta chaishujmanta animanacungapajmi huauqui panicunata ricusha nini’ nircami (Romanos 1:11, 12). w21.05 págs. 22, 24 párrs. 10-12

Ñaupa punllapica israelitacunaca cada huatapaj quimsa cutinmi Dios agllashca pueblopica tandanacuna carcacuna (Deuteronomio 16:16). Paicunaca chaiman ringapajca huasicunata, allpacunatami saquina carcacuna. Pero Jehová Diosca paicunamanca: ‘Chaiman rijpica cancunapaj allpataca pi mana quichusha ningacunachu’ nircami (Éxodo 34:24). Israelitacunaca chaiman ringapajca sinchi fetami charina carcacuna. Chashna rurashpaca achca bendicioncunatami chasquircacuna. Paicunaca chai fiestacunaman rishpaca Jehová Diospaj mandashcacunatami alli intindircacuna. Shinallataj shujtajcunahuan tandalla cashcamantami animarishca sintirircacuna. Ñucanchijpish tandanacuicunaman ringapajca huaquin sacrificiocunatami ruranchij. Tandanacuicunapaj comentariocunata alli allichijpicarin Jehová Diosca cushillami sintirin. w22.03 págs. 21, 22 párr. 9

Jehová Diosca paipaj Churitaca sacerdotecunata mandaj cachun yachachingapajmi chashna llaquinaita huañuchun saquirca. Jesusca cashna llaquicunahuan cashpa Jehová Diosta cazuna mana jahualla cashcatami intindirca. Paica Jehová Diosta rogashpa, huacashpami cutin cutin mañarca. Chaimantami Jesusca Diosta sirvijcuna llaquicunahuan cajpipish ima shina sintirishcata intindin, ima shina ayudanatapish yachan. Caita yachashcamantaca cushillami sintirinchij (Hebreos 2:17; 4:14-16; 5:7-10). Diabloca Diosta sirvijcunataca: “Yaya Dios bendiciajllapimi sirvinguichij, cancunaca Diostaca mana cꞌuyanguichijchu” nishpami juchachin (Job 1:9-11; 2:4, 5). Pero Jesusca sinchi llaquicunata charishpapish huañuna horascamami Jehová Diostaca tucuipi sirvirca. Chashnami paica ricuchirca runacunapish Jehová Diostaca cꞌuyaimanta sirvi tucushcata. Shinallataj Diablo llulla cashcatapishmi ricuchirca. w21.04 pág. 17 párrs. 7, 8

Yachacujca manaraj bautizarishpaca Biblia yachachishcacunatami paipaj causaipi pajtachina can. Chaita rurashpaca alli yuyayuj runa yacu rumi jahuapi ucujta allashpa huasita shayachij shinami canga (Mateo 7:24, 25; Lucas 6:47, 48). Yachacujcunataca paicunapaj causaipi cambiocunata rurachun ayudashunchij. (Marcos 10:17-22). Jesusca shuj charij runataca pai imalla charishcacunata cꞌatuchunmi nirca. Chaita rurana sinchi cajpipish chaita rurachunmi animarca (Marcos 10:23). ¿Imamantataj chashna rurachun nirca? Paita cꞌuyashcamantami chaita rurachun nirca. Shinallataj ñucanchijpish yachacujcunataca cꞌuyaimantami paicunapaj causaipi cambiocunata rurachun ayudana canchij (Colosenses 3:9, 10). Pero mana cambiai tucungachu nishpaca mana yuyanachu canchij. Ashtahuanpish cambiocunata rurachun utca ayudajpica ima cambiocunatami rurai tucungacuna (Salmo 141:5; Proverbios 27:17). w21.06 págs. 2-4 párrs. 3, 5

Apóstol Pedroca, ima shinami Jesusca achca llaquicunata charishpa ahuantarca. Chashnallataj ñucanchijpish achca llaquicunata charishpa ahuantachunmi animacurca. Pero Jesusca mana chaillatachu rurarca (1 Pedro 2:18-25). Jesusca paipaj tucui causaipimi paipaj nishcacunahuan, alli ruraicunahuan ñucanchijmanca alli ejemplota saquirca. Juchayujcuna cashpapish Jesuspaj ejemplotami cati tucunchij. Apóstol Pedroca Jesuspaj chaqui sarushcata catina nishpaca tucuipi mana pandarishpa Jesuspaj ejemplota catinataca mana nisha nicurcachu. Ashtahuanpish paita catingapaj esforzarinatami nisha nicurca. Apóstol Juanpish Jesucristo causashca shina causachunmi animarca. Ñucanchijpish chaita rurangapajmi esforzarina canchij (1 Juan 2:6). Jesuspaj ejemplota catishpaca Jehová Diospajmanmi cꞌuchuyashun. ¿Imamantataj chashna ninchij? Jesuspaj ejemplota catishpaca Dios munashca shinami causashun (Juan 8:29). Chashnami Jehová Diostaca cushichishun. Shinallataj Jesuspaj ejemplota catijpica Jehová Diosca ñucanchij amigomi tucunga (Santiago 4:8). w21.04 pág. 3 párrs. 4-6

Jehová Diosca paipaj amigos cachunmi saquin. Paimanta manataj caruyajpica paipish ñucanchijmantaca manataj caruyangachu. Chaita yachashpaca cushillami sintirinchij (Juan 6:44). Jehová Dios ñucanchijta cꞌuyashcata tucui shunguhuan crishpaca ima llaquicunata charishpapish tucui shunguhuanmi paita sirvishun (Proverbios 24:10). Pero Jehová Diosca ñucanchijta mana cꞌuyanchu nishpa dudai callarishpaca desanimarishunmi. Chashna desanimarijpica Diablomi ñucanchijtaca jahualla pandachisha ninga (Efesios 6:16). Huaquin huauqui panicunaca Jehová Diosca ñucanchijtaca mana cꞌuyanchu nishpami dudai callarishcacuna. Chaimanta desanimachij yuyaicunata ama charingapajca Jehová Diostami ayudachun mañana canchij. Chashna mañajpica Yayitu Diosca shungupipish, yuyaipipish tranquilo sintirichunmi ayudanga (Salmo 139:23; Filipenses 4:6, 7). w21.04 págs. 20, 21 párrs. 1, 4-6

¿Ima shinataj Jehová Diosta sirvi callarircanchij? Tal vez ñucanchij yaya mama, escuelapi, trabajopi compañerocuna o shuj Testigo huasin huasin predicajpimi ñucanchijca Jehová Diosta rijsi callarircanchij (Marcos 13:10). Qꞌuipaca pi ñucanchijman achca tiempota Bibliamanta yachachijpimi Yayitu Diosta cꞌuyai callarircanchij. Jehová Diospish ñucanchijta cꞌuyaj cashcatami intindircanchij. Chashnami Yayitu Diosca ñucanchijtaca paipaj puebloman pushamushca. Cunancarin Jesusta catijcuna cashcamantami huiñai huiñaita causana esperanzata charinchij (Juan 6:44). Jehová Dios ñucanchijta pi yachachichun saquishcamanta, paita sirvichun saquishcamantami achcata agradicinchij. Cunanca Diospaj pueblopi cashcamantami ñucanchijpish gentecuna huiñai causaiman apaj ñanpi purichun ayudasha ninchij. Huaquincunapajca huasin huasin predicanaca jahuallami can. Pero Bibliamanta yachacujcunata charinaca sinchimi can. w21.07 pág. 2 párrs. 1, 2