Febrero

Jehová Diosca paita sirvijcunamantami preocuparin. Chaimantami cada uno desanimado cajpica ñucanchijta ayudan (Salmo 145:18, 19). Profeta Eliasca Diosta mana sirvijcunapaj chaupipimi causarca. Ashtahuancarin contracunaca paitaca huañuchisha nircacunami (1 Reyes 19:1, 2). “Diosta sirvijcunamantaca ñucallami saquirishcani” nishpami Eliasca pailla sintirirca (1 Reyes 19:10). Chaimi Jehová Diosca shuj angelta cachashpa Eliastaca: ‘Mana canllachu cangui. Achca israelitacunami ñucataca adoracuncuna’ nishpa animarca (1 Reyes 19:5, 18). Jesusca cꞌuyaihuan paita catijcunamanca: ‘Cai tucuita saquishcamantaca achca huauqui panicunami cancunapajca familiacuna shina canga’ nircami (Marcos 10:29, 30). Jehová Diosca paita sirvijcunatami ayudasha nin (Salmo 9:10). w21.06 págs. 8, 9 párrs. 3, 4

Ñucanchijca Bibliamanta yachachishpami huaquin crishcacuna panda cashcata ricuchinchij. Chaimantami predicajpica achca gentecunaca ñitcarishpa mana uyasha nincuna. Religionta pushajcunaca ‘Diosca gentecunataca infiernopimi castigan’ nishpami yachachincuna. Chashnami gentecunataca manchachishpa charincuna. Pero Diosta sirvijcunaca Jehová Dios cꞌuyaj cashcata, Yayitu Dios gentecunata infiernopi mana castigaj cashcatami Bibliahuan yachachinchij. Huaquin religioncunapica ‘almaca mana huañunchu’ nishpami yachachincuna. Pero chai cierto cajpica causarinaca mana minishtirinmanchu. Cutin ñucanchijca almaca huañunmi nishpami Bibliahuan yachachinchij. Shinallataj achca religioncunapica ‘Yaya Diosmi ñucanchijta destinashca’ nishpami yachachincuna. Pero ñucanchijca Jehová Diosta sirvingapajca cada uno decidi tucushcatami yachachinchij. Chashna yachachijpimi panda religionta pushajcunaca ñucanchijhuanca achcata pꞌiñarincuna. Jehová Dios Bibliapi ima nishcata intindishpami crina, cazuna canchij. Pai yachachishcacunataca manataj saquinachu canchij (Juan 8:45, 46). Satanasca chaitaca mana rurarcachu (Juan 8:44). Pero Jehová Diosca paita sirvijcuna Jesuspaj ejemplota catichunmi munan. Chaimantami paica: “Millaitaca pꞌiñaichij, allitaca catichij” nirca (Romanos 12:9; Hebreos 1:9). w21.05 págs. 10, 11 párrs. 10, 11

Jatun tucushca cashpa, shujtajcunapajta munashca cashpaca chaicunamantami caruyai tucunchij (2 Timoteo 2:26). Jehová Diosca Diablota yallimi poderta charin. Chaimanta Diospaj ayudata chasquishpaca Diablopaj trampapi urmashca cashpapish chaicunamantami caruyai tucunchij. Diablopaj trampapi ama urmangapaj callarimanta esforzarishunchij. Jehová Diospaj ayudahuanca cai trampacunapi mana urmashunchu. Ama chai yuyaita charingapajmi Jehová Diostaca tucui punllacuna mañana canchij. Chaita rurashpaca jatunyana munaimanta, shujtajcunapajta charina munaimantami caruyashun (Salmo 139:23, 24). Diabloca huaranga huaranga huatacunatami shuj cazaj runa shina gentecunataca paipaj trampapi urmachishpa caticun. Pero ñallami paica huichcashca canga. Qꞌuipacarin tucuchishcami canga (Apocalipsis 20:1-3, 10). Chai punlla chayachunmi cushilla shuyanchij. Pero chai punlla chayangacamaca ama jatun tucungapaj, shujtajcunapajta ama munangapaj cuidarishunchij. “Diablotaca ama ricunachichijchu. Chashna rurajpica paica miticungallami”. w21.06 pág. 19 párrs. 15-17

Jehová Diosca gentecuna Bibliamanta yachanata chasquijpi, paicunapish shujtaj gentecunaman yachachijpica cushillami sintirin (Proverbios 23:15, 16). Por ejemplo, 2020 huatapica huauqui panicunaca pandemia tiyajpipish 7.705.765 estudiocunatami charishcacuna. Shinallataj 241.994 gentecunatami Jehová Diosman mingarishpa bautizarichun ayudashcacuna. Cai mushuj huauqui panicunaca paicunapish ashtahuan Jesusta catijcunata rurashpami ayudangacuna (Lucas 6:40). Gentecunata Yayitu Diosta sirvichun ayudashpaca Jehová Diospaj shungutami cushichishun. Pimanpish Jehová Diosta cꞌuyachun yachachingapajca achca esfuerzomi minishtirin. Pero Jehová Diospaj ayudahuanmi chaita pajtachi tucushun. Chaimanta siquiera shuj yachacujta charingapaj esforzarishunchij. Predicacushpaca gentecunataca: “¿Bibliamanta yachasha ninguichu?” nishpa tapushunchij. Chashna tapujpica gentecunaca tal vez Bibliamanta yachasha nishcatami cutichingacuna. w21.07 págs. 6, 7 párrs. 14-16

Rey Davidca Diospaj templota shayachingapajmi achca cullquihuan ayudarca (1 Crónicas 22:11-16). Mayorlla huauqui panicunapish tandanacuna huasicunata mana shayachishpa, allichishpa ayudai tucushpaca cullquihuanmi ayudai tucuncuna. Shinallataj jovenlla huauqui panicunamanmi cancuna ima yachashcata yachachi tucunguichij. Apóstol Pablopish generosomi carca. Paica congregacioncunata visitacushpaca Timoteotami huillanaman acompañachun invitarca. Timoteomanca ima shina yachachinata, ima shina predicanatami yachachirca (Hechos 16:1-3). Pablo chashna ayudashcamantami Timoteoca alli predicaj carca (1 Corintios 4:17). Timoteoca Pablo yachachishca shinami paipish shujtajcunata yachachirca. w21.09 pág. 12 párrs. 14, 15

¿Apolosmanta, Pablomantaca imatataj yachanchij? Paicunaca Diospaj Shimimanta achcata yachaj, alli yachachijcunami carca. Shinallataj achcacunatami Yayitu Diosta sirvichun ayudarcacuna. Pero paicunapuraca mana envidianacurcacunachu (Hechos 18:24). Chaimantami apóstol Pabloca Apolostaca cutin Corintopi sirvinaman richun invitarca (1 Corintios 16:12). Apolosca alli yachachij cashcamantami gentecunaman predicangapaj, huauqui panicunata sinchiyachingapaj esforzarirca. Shinallataj paica humildemi carca. Chaimantami Áquila, Priscila paiman yachachijpica paica alli uyarcalla (Hechos 18:24-28). Pabloca Apolos, Diosta alli sirvij cashcatami yacharca. Pero Apolos alli yachachij cajpipish mana envidiarcachu. Ashtahuanpish Pabloca humilde cashcatami ricuchirca (1 Corintios 3:4-6). w21.07 págs. 18, 19 párrs. 15-17

Adanpish Evapish paicunallataj juchata ruranata decidishcamantami Yayitu Diospaj familia canata saquircacuna. Chashnami paicunapaj huahuacunatapish Jehová Diosmanta caruyachircacuna. Pero Yayitu Diosca cazuj gentecunata cꞌuyashcamantami paipaj cꞌuyashca Churita curca (Juan 3:16). Jesusmantami 144 mil gentecunataca Yayitu Diosca paipaj huahuacuna cutin tigra cachun agllashca (Romanos 8:15-17; Apocalipsis 14:1). Achca gentecunami Yayitu Diosta cazushpa, paipaj munaita pajtachishpa causacuncuna. Paicunaca Jesús cai Allpata mil huatacunata mandashca qꞌuipa cutin Diospaj familia canatami shuyacuncuna (Salmo 25:14; Romanos 8:20, 21). Jehová rurashcamantami paitaca Yaya ni tucuncuna (Mateo 6:9). Causarij gentecunapish Yayitu Diosta rijsina oportunidadtami charingacuna. Paicunaca Jehová Diosta cazunata decidishpaca tiempohuanca Diospaj huahuacunami cangacuna. w21.08 pág. 5 párrs. 10, 11

Apóstol Pablopajca gentecunaman predicanami tucuimanta yalli valishca carca. Chaimantami paica callecunapi, huasin huasin predicaj carca (Hechos 20:20). Ashtahuanpish tucui layami predicaj carca. Por ejemplo, shuj cutinca paica Atenas llajtapimi paipaj compañerocunata shuyacurca. Chashna shuyacushpapish paica chaipimi achca gentecunaman predicarca (Hechos 17:16, 17, 34). Shinallataj paica prezupi cashpapish pai huillai tucushca gentecunamanmi huillarca (Filipenses 1:13, 14; Hechos 28:16-24). Apóstol Pabloca predicangapajmi tiempota alli aprovecharca. Paica shujtajcunatapishmi paihuan predicachun invitaj carca. Por ejemplo, shuj cutinca Juan Marcostami paihuan predicachun invitarca. Cutin qꞌuipaca Timoteotapishmi invitarca (Hechos 12:25; 16:1-4). Shinallataj Pabloca cai huauquicunataca congregacionta alli organizachun, alli michij cachun, alli yachachijcuna cachunmi capacitarca (1 Corintios 4:17). w22.03 pág. 27 párrs. 5, 6

Huaquin gentecunaca Diosta mana ricushcamantami Diospi mana crincuna. Pero chashnapish paicunaca mana ricushcacunapimi crincuna. Por ejemplo, huaira tiyashcataca huaquin pruebacunata ricushpami crincuna. Bibliapipish mana ricushcacunamantami parlan. Pero Bibliata alli investigashpaca chaicuna tiyashcatami cuentata cunchij (Hebreos 11:1). Mana ricushcacuna tiyashcata investigangapajca achca tiempo, esfuerzomi minishtirin. Gentecunaca investigangapaj mana esfuerzota rurashcamantami Dios tiyashcataca mana crincuna. Universidadcunapi Dios tucuita rurashcata mana yachachishcamantami huaquincunaca Dios mana tiyashcapi crincuna. Pero achca cientificocunaca achcata investigashpami Dios tucuita rurashcata yachashpa paita cꞌuyai callarishcacuna. Chaimanta ñucanchijpish estudiado cashpapish, mana estudiado cashpapish Yayitu Dios tucuita rurashcata investigangapajmi tiempota llujchina canchij. Chashnami ñucanchij fetaca Jehová Diospi sinchiyachishun. w21.08 págs. 14, 16, 17 párrs. 1, 6, 7

Jesusca chingarishca jovenmanta parlashpami Jehová Dios llaquij cashcata yachachirca. Cai chingarishca jovenca paiman cushca herenciatapish gastashpami tucuita tucuchirca (Lucas 15:13). Cai jovenca tiempo qꞌuipaca pai mana allita ruracushcamanta arrepintirishpami huasiman tigrarca. ¿Paipaj yayaca imatataj rurarca? Jesusca: “Pai caruta shamucujpirajmi paipaj yaya ricushpaca achcata llaquirishpa, callpashpa, rishcahuan ugllarishpa mucharca” nircami. Cai joven huasiman tigrajpica yayaca mana rimarcachu. Chaipaj randica cꞌuyaitami ricuchirca. Shinallataj familia parte cachunpishmi saquirca. Cai joven achca juchacunata rurashcamanta shungumanta arrepintirishcata yachashpaca paipaj yayaca perdonarcami. Jesús parlashca llaquij yayaca Jehová Diostami ricuchin. Jesusca cai ejemplohuanmi gentecuna shungumanta arrepintirijpica Yayitu Dios paicunata perdonaj cashcata yachachirca (Lucas 15:17-24). w21.10 págs. 8, 9 párrs. 4, 6

Cunan punllacunapica religionta pushajcunaca Diospaj shutitaca pacancunami. Paicunaca Bibliamantapish Diospaj shutitami llujchincuna. Huaquincunacarin Diospaj shutitaca mana ninachu canguichij nishpami jarcashcacuna. Pero testigo de Jehovacunallami Diospaj shutitaca jatunyachishpa paipaj shutitaca respetanchij. Shujtaj religioncunaca Diospaj shutitaca gentecunamanca mana rijsichincunachu. ¿Ñucanchijca imamantataj Diospaj shutita rijsichinchij? Testigo de Jehová cashcamantami Diospaj shutita rijsichinchij (Isaías 43:10-12). Traducción del Nuevo Mundo Bibliataca 240 millones yalli Bibliacunatami imprimishcanchij. Chai Bibliacunaca Diospaj shutitami charin. Shinallataj mil yalli shimicunaman publicacioncunata traducishpapish Diospaj shutitaca manataj pacashcanchijchu. w21.10 págs. 20, 21 párrs. 9, 10

Ayudata minishtij huauqui panicunata ayudashpaca Jehová Diostami adoranchij. Jehová Diosca israelitacuna pobrecunata ayudajpica paicunatami bendiciarca (Deuteronomio 15:10). Ñucanchijpish huauqui panicunata ayudashpaca shuj valishca regalota Jehová Diosman cucuj shinami can (Proverbios 19:17). Por ejemplo, apóstol Pablo prezupi cajpica Filipos llajtamanta huauqui panicunaca paimanmi shuj regalota curcacuna. Chaimi Pabloca: ‘Ñucata chashna ayudashpaca Jehová Diosman shuj valishca ofrendata cucuj shinami can’ nirca (Filipenses 4:18). Chaimantami ñucanchijpish “¿ñuca congregacionpica pitataj ayudai tucuni?” nishpa tapurina canchij. Huauqui panicunata ñucanchij tiempohuan, fuerzashuan, ima rurai tucushcahuan o cullquihuan ayudajpica Jehová Diosca achcatami valoran. Chashna huauqui panicunata ayudashpaca Jehová Diosta adorashcatami ricuchinchij (Santiago 1:27). Jehová Dios munashca shina adorangapajca tiempota, fuerzastami llujchina canchij. Diosta cꞌuyashcamanta, huauqui panicunatapish cꞌuyashcamantami chashna adorana mana shuj carga shina can (1 Juan 5:3). w22.03 pág. 24 párrs. 14, 15

Achca huauqui panicunami llaquicunata charincuna. Chaimantami paicunaca ñucanchij cꞌuyaita ricuchichun minishtincuna. Por ejemplo, shuj panichari ancha ungüihuan can. Pero paica ima shina sintirishcataca manachari huillan. Tal vez familiamanmi minishtirishca cosascunata cushpa ayudai tucunchij. Shinallataj micunitata apashpa, huasita pꞌichashpami ayudai tucunchij. Cutin tal vez shuj huauquipish trabajo illajchari saquirirca. Cai huauqui trabajota cutin japingacamami pudishpaca cullquihuan ayudai tucunchij. Ñucanchijpish huauqui panicunata cꞌuyashcata ricuchingapajca paicuna ayudata mañangacamaca mana shuyanachu canchij. Ima shinami Jehová Dios ayudan chashnallatajmi ayudana canchij. Paica intitaca tucuicunamanmi cun. Cai intimantaca tucuicunami beneficiarinchij. Jehová Diosca imalla minishtishcacunata cushpami achcata cꞌuyashcata ricuchin. Ñucanchijpish caita yachashpaca cushillami sintirinchij. w21.09 págs. 22, 23 párrs. 12, 13

Jehová Diosca cꞌuyanata manataj saquishcamantami perdonaj can. Maijancuna juchacunamanta arrepintirishpa paipaj causaipi cambiangapaj esforzarijpica Diosca cꞌuyanata manataj saquishcamantami paicunataca perdonan. Salmos libropica Diosmantaca Davidca: “Ñucanchij millaita rurashcamantaca, llaquichina shinatajca mana llaquichircachu. Ñucanchij juchacunamantaca cuna cashca shinaca mana cushcachu” nircami (Salmo 103:8-11). Davidca juchapi urmashcamantami paipaj concienciapica mana alli sintirirca. Pero paica shungumanta arrepintirijpi Jehová Dios perdonangapaj listo cashcatami intindirca. Davidca Diosta mañacushpaca pai ima shina perdonaj cashcatami cai punllapaj versopi ricuchirca. Jehová Diosca paita mashcajcunataca paipaj cꞌuyaita ricuchinataca manataj saquinchu. Chaimantami paica perdonaj can. Ima juchamanta llaquilla sintirinaca allimi can. Llaquilla sintirishpaca arrepintirishpa cutin ama pandaringapajmi cambiachun ayudanga. w21.11 págs. 5, 6 párrs. 11, 12

Jehová Diosca paipaj shutita respetachun, jatunyachichunmi munan (Isaías 42:8). Pero Diabloca 6 mil huatacunatami Diospaj shutitaca yangapi churashpa caticun (Salmo 74:10, 18, 23). Adán y Evataca Diabloca: ‘Yaya Diosca mana tucuita cushcachu’ nishpami llullarca (Génesis 3:1-5). Chai punllamanta huichimanmi Diabloca Diostaca: ‘Canca gentecunataca mana cuidai tucunguichu’ nishpa juchachishca. Jesusca cai Allpapi cashpaca Jehová Diospaj shutita yangapi churachunca mana munajchu carca. Jehová Diosca pailla alli mandaj cashcamantami jahua pachata, cai pachata mandana derechota charin (Apocalipsis 4:11). Pailla mandana derechota charishcata ñallami tucuicuna cuentata cungacuna. Shinallataj Diospaj Gobiernolla cai Allpaman alaja causaita apamunatapishmi intindingacuna. w21.07 pág. 9 párrs. 5, 6

Cusacunaca paicunapaj familiacuna micunata, ropata, maipi saquirinata charichunmi munan. Minishtirishca cosascunata mana charishpapish cambaj fetami sinchiyachi tucungui. Chaipajca Jehová Diosta mañashpa Mateo 6:25-34-pi Jesús ima nishcapimi yuyai tucungui. Shinallataj huauqui panicuna Diospaj Gobiernota punta lugarpi churajpi Dios paicunata ima shina cuidashcapipishmi yuyai tucungui (1 Corintios 15:58). Chashnami cambaj feta sinchiyachingui. Yayitu Diosca ima shinami shujtajcunata ayudarca chashnallatajmi cantapish ayudanga. Paica allimi yachan imata minishtishcata chaimanta minishtirishca cosascunata cunga nin. Yayitu Dios cambaj causaipi ima shina ayudashcata ricushpaca cambaj fetami sinchiyachingui. Shinallataj shamuj punllacunapipish sinchi pruebacunatami chꞌimbapurangui. w21.11 págs. 20-22 párrs. 3, 6

Jesús huañushcapi feta churajcunaca llaquicuna tiyajpipish, jarcaicuna tiyajpipish paicunaca tucui causaipimi Jehová Diosmanta predicashpa caticushcacuna. Apóstol Juanpaj ejemplopi yuyashun. Paica Jesús tucuicunamanta huañushcatami 60 huatacunata yalli huillashcanga. Pai 100 huatacunata charijpica Roma llajtata mandaj gobiernoca Jehová Diosmanta, Jesusmanta huillacushcamantami Patmos islaman prezu cacharca (Apocalipsis 1:9). Apóstol Juanca sinchi feta charishpa, llaquicunata ahuantashpaca ñucanchijman alli ejemplotami cushca. Apóstol Juanca pai quillcashca librocunapica Jesusta cꞌuyashcata, pai huañushcamanta achca cutin agradicishcatami ricuchirca. Paica 100 yalli cutincunami Jesús huañushcamanta beneficiari tucushcataca quillcarca (1 Juan 2:2). Chashnami Juanca Jesús paipaj causaita cushcamanta shungumanta agradicishcata ricuchirca. w21.04 pág. 17 párrs. 9, 10

Jehová Diosca paita sirvijcunataca mana uyajcunata, mana ricujcunata alli tratachunmi mandarca. Por ejemplo, Diosca israelitacunataca: ‘Mana uyaj runataca ama huashalla rimanguichij, ama paimantaca mana allicunata ninguichij’ nircami. Paicunamanta huashalla rimashpaca mana allitami rurancunaman carca. Mana uyaj runaca paita huashalla rimajpica mana uyashcamantami mana difindiri tucushcanga. Levítico 19 verso 14-pica Jehová Diosca israelitacunataca: ‘Ñahui mana ricuj ñitcarichunca ama imata churanguichij’ nircami. Shuj libropica mana uyajcunamanta, mana ricujcunamanta parlashpaca: “Cunan punllacunapi maipimi israelitacuna causan chai llajtapica ñaupa punllacunaca mana ricujcunata, mana uyajcunataca llaquichishpa mana allimi tratajcuna carca” ninmi. Tal vez mana ricujcunataca paicunata llaquichingapaj o paicunamanta burlaringapajmi maijancunaca paicunapaj ñaupajpi jarcaicunata churaj cashcangacuna. Chaimi Jehová Diosca paipaj pueblotaca mana uyajcunata, mana ricujcunataca cꞌuyaihuan tratana cashcata yachachirca. w21.12 págs. 8, 9 párrs. 3, 4

Jacobca mancharishcami carca. Paica ñuca huauquica ñucahuanmi pꞌiñarishca canga nishpami yuyarca. Chaimantami puntapica, Jehová Diosta shungumanta ayudachun mañarca. Ishquipica, Esaumanmi valishca regalocunata curca (Génesis 32:9-15). Quimsapica, paipaj huauquihuan ñahui ñahui tupashpaca paitami jatunyachirca. Paipaj ñaupajpipish siete cutinmi cumurirca. Chashnami paica respetohuan, humildadhuan paipaj huauquihuan alli tucurca (Génesis 33:3, 4). Jacobmantaca valishca yuyaicunatami yachai tucunchij. Paica paipaj huauquihuan tupangapajca allimi allichirirca. Jehová Diostapish ayudachunmi mañarca. Qꞌuipaca pai ima mañashcata pajtachingapaj, paipaj huauquihuan alli tupangapajmi esforzarirca. Paihuan ñahui ñahui parlashpaca pi culpata charishcataca mana nircachu. Ashtahuanpish paipajca paipaj huauquihuan alli tucunami importante carca. ¿Jacobpaj ejemplotaca cati tucunchijchu? (Mateo 5:23, 24). w21.12 pág. 25 párrs. 11, 12

Maipica ñucanchij shungu pandachijlla cashcamantami imapaj mana valishca shina sintirinchij (1 Juan 3:19). Chaimantachari Jesús ñucanchijmanta huañushca cajpipish Yaya Diosca mana perdonangachu nishpa yuyashun. Chashna sintirishpaca Jehová Dios ñucanchij shunguta yalli yachaj cashcatami yuyarina canchij. Jehová Diosca mana llaquingachu, mana perdonangachu nishpa yuyanapaj randica pai ñucanchijta cꞌuyaj, perdonaj cashcatami tucui shunguhuan crina canchij. Caita cringapajca cada punllami Bibliata estudiana canchij. Shinallataj Yayitu Diostami mañana canchij. Huauqui panicunahuanpish pasangapajmi tiempota surcuna canchij. Imamanta caita rurana cashcata ricushun. Cada punlla Bibliata estudiashpaca Jehová Diostami ashtahuan alli rijsishun. Pai ñucanchijta cꞌuyaj cashcatapishmi yachashun. Chashnami pandachij yuyaicunata ñucanchij shungumanta anchuchishun (2 Timoteo 3:16). w21.04 págs. 23, 24 párrs. 12, 13

Sinchi feta charingapajca yachashpallaca mana saquirinachu canchij. Imata yachacushcapimi yuyarina canchij. Salmo 77-ta quillcajpi yuyashunchij. Paica: ‘Ñucapish, shujtajcunapish Diospaj ñaupajpica mana allimi ricurinchij’ nishpami achcata preocuparirca. Chaimantami paica dorminatapish mana pudirca (Salmo 77:2-8). ¿Chashna sintirishpaca imatataj rurarca? Paica Jehová Diostaca: “Quiquin imalla ruracushcacunataca yuyaricushallami” nircami (Salmo 77:12). Paica Jehová Dios paipaj pueblota ima shina ayudashcatami alli yacharca. Chaita yachashpapish paica: ‘¿Jehová Diosca ñucanchijhuan pꞌiñarishca cashcamantachu paica cꞌuyanata saquishca?’ nishpami tapurirca (Salmo 77:9). Pero chai solopi yuyanapaj randica Jehová Dios ima shina paipaj pueblota cꞌuyaihuan ayudashcapimi yuyarirca (Salmo 77:11). Chaita rurashcamantaca paica Jehová Dios paipaj pueblota manataj saquij cashcatami intindirca (Salmo 77:15). w22.01 págs. 30, 31 párrs. 17, 18

Jehová Diosca paita sirvijcuna huañujpipish paicunata cutin ricunatami shuyacun (Job 14:15). Por ejemplo, paipaj amigo Abrahamtami cutin ricunata achcata munan (Santiago 2:23). Cutin Moiseshuanca paica ‘ñahui ñahuimi’ parlaj carca. Paita ricunatapishmi shuyacun (Éxodo 33:11). Shinallataj Davidpish, salmocunata cantajcunapish cutin paita alabachunmi achcata munan (Salmo 104:33). Cai Diosta sirvijcuna huañushca cajpipish paicunamantaca manataj cungarinchu (Isaías 49:15). Jehová Diosca paicuna ima shina cashcataca allimi yuyarin. Ñallami paicunataca causachinga. Paicunapaj mañashcacunata, paicunapaj adorashcatami cutin ñalla chasquinga. ¿Familia huañujpi paita cutin tigra ricunata yachashpaca manachu cushilla sintirinchij? Yayitu Diosca Adán y Eva paita mana cazushca qꞌuipaca ashtahuan millai gentecuna tiyanataca allimi yacharca. Paica cunan punllacunapi tiyaj tucui millai ruraicunataca manataj ricunayachinchu. w21.07 págs. 10, 12 párrs. 11, 12

Jesús huañushcata agradicishpaca ñucanchij huauqui panicunatami cꞌuyashun. Jesusca ñucanchij huauqui panicunata cꞌuyashcamantami paipaj causaitapish curca. Chaitaca mana cungarinachu canchij (1 Juan 3:16-18). Chaimantami ñucanchij huauqui panicunataca alli tratashpa paicunaman cꞌuyaita ricuchina canchij (Efesios 4:29, 31–5:2). Por ejemplo, paicuna ungujpi, jatun terremoto tiyashcamanta o acapana tiyashcamanta llaquicunahuan chꞌimbapuracujpimi paicunataca ayudana canchij. Pero ¿huauqui panicuna ñucanchijta llaquichijpica ima shinataj paicunata cꞌuyashcata ricuchishun? ¿Pi ñucanchijta llaquichijpica resintirishca saquirishcanchijchu? (Levítico 19:18). Chashna resintirishca saquirishpaca cai consejopimi yuyana canchij. Colosenses 3:13-pica: “Maijan caishujta pꞌiñashpa juchachijpica, caishuj chaishuj ahuantanacushpa, ima shinami cancunata Cristo perdonarca, chai shinallataj caishuj chaishuj perdonanacuichij” ninmi. Huauqui panicunata siempre perdonashpaca Jesús ñucanchijmanta huañushcatami agradicishcata ricuchishun. w21.04 pág. 18 párrs. 12, 13

Yayitu Diosta sirvingapajca quizás achcatami esforzaricunchij. Mana cashpaca achcacunatami bautizarichun ayudashcanchij. Caicunata rurashpapish Jehová Dios ayudajllapi chaicunata pajtachi tucushcatami yuyarina canchij. Ancianocunapish, siervo ministerialcunapish huauqui panicunatami Diosta tandalla sirvichun ayudana can. Chaimantami siempre Bibliahuan consejocunata cuna can. Shinallataj paicunata jatunyachichunpish mana mashcanachu can. Ashtahuanpish huauqui panicunataca Jesusta cazuchun, paipaj ejemplota catichunmi ayudana can. Ancianocuna, siervo ministerialcuna chashna ayudashcamantami paicunataca achcata agradicinchij (1 Corintios 4:6, 7). Jehová Diosca ñucanchij alli ruraicunahuan caishuj chaishuj ayudanacushpa causachunmi rurashca. Pero maipica ñucanchij ruraicunaca ashallami can nishpachari yuyanchij. Caipi yuyashun, shuj ropata alajata tandachishpa rurangapajca uchilla hilocunahuanmi siranchij. Chashnallataj ñucanchij alli ruraicuna uchilla cajpipish huauqui panicuna congregacionpi tandalla Diosta sirvichunmi ayudashun. Chaimanta shujtajcunata yalli canata ama mashcashunchij. Ashtahuanpish congregacionpi tandalla Jehová Diosta sirvingapaj esforzarishunchij (Efesios 4:3). w21.07 pág. 19 párrs. 18, 19

Ñucanchijpish Jehová Dios huañushcacunata causachinatami tucui shunguhuan crina canchij. Jesusca paipaj amigo Lázaro huañushcamanta huacashpaca, huañushcacunata causachisha nishcatami ricuchirca (Juan 11:35). Familiata huañuipi chingachijcunatami ayudai tucunchij. Jesusca Martahuan, Mariahuan huacashpallaca mana saquirircachu. Ashtahuanpish paica paicuna ima shina sintirishcatami uyarca, animaj shimicunahuanpish animarca (Juan 11:25-27). Ñucanchijpish maijan huauqui o pani familiata huañuipi chingachijpica, paicunataca chashnallatajmi animai tucunchij. Australia llajtamanta Dan shuti shuj pushaj huauquica: “Ñuca cꞌuyashca huarmi huañujpica shujtajcuna ayudachunmi minishtircani. Achca cusa huarmimi ñuca ima shina sintirishcata uyangapaj, ñucahuan huacangapaj tiempota surcurcacuna. Shinallataj ñuca fuerza illaj sintirijpica paicunaca huaquin tareacunata rurashpami ayudarcacuna. Por ejemplo, carrota maillashpa, mercadomanta comprasta apamushpa, yanushpami ayudarcacuna. Paicunaca Jehová Diostapish ñucahuanmi mañarcacuna. Chashnami ñuca llaquihuan cai horasca alli amigocuna cashcata ricuchircacuna” ninmi (Proverbios 17:17). w22.01 pág. 16 párrs. 8, 9

Jehová Dios ñucanchijta cꞌuyashcamanta consejashcatami yuyarina canchij (Proverbios 4:20-22). Diosca paipaj Shimihuan, publicacioncunahuan, experienciata charij huauqui panicunahuanmi ñucanchijta consejan. Chashnami paica yallitaj cꞌuyashcata ricuchin (Hebreos 12:9, 10). Consejota ima laya cujpipish chai consejota pajtachishunchij. Bibliapica cushichij, alli shimicunahuan consejana cashcatami yachachin (Gálatas 6:1). Pero maipica maijancunaca sinchita rimashpa o pꞌiñarishpachari consejota cungacuna. Chashna consejajpipish consejota pajtachingapajmi esforzarina canchij. Chaipajca: “¿Consejashcamantaca imatataj yachai tucuni?” nishpami tapurina canchij. Pꞌiñarishpa, sinchita rimashpa consejashcapi yuyanapaj randica, chai consejashcamanta ima shina beneficiari tucushcataca siempremi ricuna canchij. w22.02 págs. 12, 13 párrs. 13, 14

Mana alli munaicunata, ruraicunata saquingapaj tiempota, fuerzasta minishtishcataca Jehová Diosca allimi yachan (Salmo 103:13, 14). Chaimantami Jehová Diosca ñucanchij cambiachunca fuerzasta, yachaita cun. Shinallataj paipaj Shimihuan, paipaj espíritu santohuan, paipaj pueblohuanmi ayudan. Imapi mejorana cashcata yachangapaj Bibliata estudiai. Bibliata estudiashpaca shuj espejopi ricuricuj shinami cambaj causaipi, cambaj yuyaipi imapi cambiana cashcata cuentata cungui (Santiago 1:22-25). Ashtahuancarin Jehová Diosca cambaj shunguta, cambaj yuyaita alli rijsishcamantami canta ayudai tucun (Proverbios 14:10; 15:11). Chaimanta Jehová Diosta mañanata, Bibliata cada punlla estudianata amataj saqui. Diospaj mandashcacunata cazushpa alli causanata cri. Jehová Diospaj mandashcacunaca ñucanchij allipajllatajmi can. Paipaj mandashcata cazujcunaca cushillami causancuna (Salmo 19:8-11). w22.03 pág. 4 párrs. 8-10

Tandanacuna Huasicunata shayachishpa, allichishpami Jehová Diosta adoranchij. Ñaupa punllacunapica israelitacunaca Diospaj carpa huasita shayachishpami Jehová Diosta adorarcacuna (Éxodo 36:1, 4). Cunan punllacunapish Tandanacuna Huasicunata shayachishpami Jehová Diosta adoranchij. Huaquin huauqui panicunaca achca tiempotami chashna ayudancuna. Paicuna Diospaj obra ñaupajman catichun chashna ayudashcamantami agradicishca sintirinchij. Cai huauqui panicunaca chashna ayudashpapish predicangapajmi tiempota surcuncuna. Huaquincunacarin precursorescunami casha nincuna. Ancianocunaca construccionpi trabajaj huauqui panicunata precursor cachun animashpaca Jehová Diospaj obratami apoyancuna. Construccionpi ayudangapaj experienciata charishpapish o mana charishpapish tucuicunami Diospaj Tandanacuna Huasicunata pꞌichashpa, allichishpa ayudai tucunchij. w22.03 pág. 22 párrs. 11, 12