Diciembre

Jesusca: ‘Ovejacunaca paicunata michijta uyashpaca cazuncunami. Chashnallataj ñuca discipulocunapish ñuca ima yachachishcata uyashpaca cazuncunami’ nircami (Juan 10:14). Ashtahuancarin ovejacunaca michijtaca allimi rijsin. Michij ima nishcatapish cazuncunami. Shuj cꞌarica: “Ñucaca shuj jovencitopaj ovejacunatami grabasha nircani. Chaimantami ovejacuna ñucapajman cꞌuchuyachun munarcani. Pero ovejacunaca ñucata mana rijsishcamantami paicunata cayajpipish mana cazurcacuna. Ashtahuancarin michij jovencito ricurijpica pai cayancami ovejacunaca paita catircacuna” ninmi. Cai cꞌarihuan ima tucushcata yachashpaca Jesús paipaj discipulocunamanta ima nishcatami yuyarinchij. Jesusca: “Paicunapish ñuca rimaitami uyangacuna” nircami. Cunanca Jesusca jahua pachapimi can. ¿Shinapish paitaca ima shinataj uyai tucunchij? Paipaj yachachishcacunata pajtachishpami paitaca uyai tucunchij (Mateo 7:24, 25). w21.12 pág. 16 párrs. 1, 2

Yaya Diosta manaraj rijsishpaca apóstol Pabloca Diosta sirvijcunatami catirashpa llaquichirca. Pero tiempo qꞌuipaca paica paipaj causaipi cambiangapajmi esforzarirca (1 Timoteo 1:12-16). Jehová Diospaj ayudahuanmi paica alli michij, cꞌuyaj, humilde tucurca. Pabloca Jehová Dios paita perdonashcapimi confiarca. Chaimantami ña mana pandarishcacunallapi yuyashpa catirca (Romanos 7:21-25). Ashtahuancarin paica mana tucuipi jucha illaj cai tucushcataca allimi intindirca. Pero Dios munashca shina causangapajmi esforzarirca. Chaimantami Jehová Dios paipaj obrata pajtachichun paita ayudanapi confiarca (1 Corintios 9:27; Filipenses 4:13). Ancianocunaca juchayujcuna cashpapish Diospaj ovejacunata michina regalotami chasquishcacuna. Pero Jehová Diosca ancianocuna pandarishpapish paicunapaj causaipi mejorashpa, pai munashca shina causachunmi munan (Efesios 4:23, 24). Ancianocunaca paicuna imapi mejoranata yachangapajca Bibliapimi ricui tucuncuna. Imapi cambianata yachashpaca cambiangapajmi esforzarina can. Cambiocunata rurajpica Jehová Diosca cushilla sintirichun, pai mingashcata pajtachichunmi ayudanga (Santiago 1:25). w22.03 págs. 29, 30 párrs. 13-15

Shujtaj huauqui panicunata juzgacushcata cuentata cushpaca paicunata cꞌuyana cashcatami yuyarina canchij (Santiago 2:8). Ama juzgangapajpish Jehová Diostaca ayudachunmi mañana canchij. Mañashcata pajtachingapajca chai huauquihuan panihuan parlangapajmi esforzarina canchij. Paicunataca huillanaman llujshingapaj, micungapajmi invitai tucunchij. Paicunata ashtahuan rijsishpaca paicunapaj alli ruraicunata ricushpami Jehová Dios shina, Jesús shina alli tratashun. Shujtajcunata ama juzganguichij nishpa Jesús mandashcatapishmi pajtachishun. Ima shinami ovejacunaca michij ima nishcata uyashpa cazuncuna, chashnallatajmi Jesuspaj discipulocunapish Jesús yachachishcata uyashpa cazuncuna. ‘Ashalla ovejamanta’ cashpapish o ‘shujtaj ovejamanta’ cashpapish Jesús yachachishcata uyashpa, cazushpa catishunchij (Lucas 12:32; Juan 10:11, 14, 16). w21.12 págs. 19, 21 párrs. 11, 17, 18

Salomonpaj yaya Rehoboam mandacushpaca israelitacunapajca llaquichij leycunatami churarca. Chaimi Rehoboam mandai callarijpica gentecunaca chai sinchi leycunata anchuchichun mañarcacuna. Rehoboamca imata agllanata yachangapajmi Israelpi pushaj ancianocunata tapunaman rirca. Paicunaca: “Gentecuna canta apoyachunca paicuna mañashcatami rurana cangui” nishpami consejarcacuna (1 Reyes 12:3-7). Pero Rehoboamca chai consejotaca mana munarcachu. Chaimantami paica paihuan huiñai runacunata tapunaman rirca. Pero paicunaca: “Gentecunataca ashtahuanmi llaquichina cangui” nishpami consejarcacuna (1 Reyes 12:9-11). Rehoboamca pai munashca consejota chasquisha nishpami, paihuan huiñai runacuna consejashcata chasquirca. Pai mana alli mandai tucushcamantami gentecunapish llaquicunata charirca. Ñucanchijpish maipica ñucanchij munashca shinami consejachun munanchij. Pero Bibliahuan consejajpica chaitaca chasquinallami canchij. w22.02 pág. 9 párr. 6

Humildecunaca jovenlla huauquicuna mana imata yachanchu, ima experienciata mana charinchu nishpaca mana yuyancunachu. Ashtahuanpish jovenlla huauquicuna imatapish pajtachi tucushcata yachashpami paicunataca achcata valorancuna. Mayorlla huauqui panicunaca Jehová Dios jovenlla huauqui panicunata cushcamantami achcata agradicincuna. Paicunaca mana achca fuerzata charishcamantami jovenlla huauqui panicuna congregacionpi sirvi tucushcata yachancuna. Jovencuna fuerzasta charishcata yachashpaca cushillami sintirincuna. Bibliapica Noemica agradecidami carca ninmi. Paica mayoryashpaca shuj jovenpaj ayudatami chasquirca. Noemica paipaj churi huañushca qꞌuipaca paipaj nuera Ruttaca familiahuan tigrachunmi munarca. Pero Rutca Belenmanmi Noemita acompañasha nirca. Noemica agradecida cashcamantami chaita chasquirca (Rut 1:7, 8, 18). Chaita rurashcamantami ishquindij achca bendicioncunata chasquirca (Rut 4:13-16). Mayorlla huauqui panicunaca humildes cashcamantami Noemipaj ejemplota catingapaj esforzarincuna. w21.09 págs. 10, 11 párrs. 9-11

Yayitu Diosca ñucanchijta allimi rijsin. Tal vez canca shujtajcunata yallimi Jehová Diosta sirvi tucungui. Mana cashpaca mayorlla cashcamanta, ungushca cashcamanta o familiata mantinina cashcamantami Diostaca mana tanto sirvi tucungui. Pero ama desanimarichu (Gálatas 6:4). Jehová Diosca can paita shungumanta sirvishcataca manataj cungaringachu. Ashtahuanpish paica cushillami sintiringa. Jehová Diosca paita sirvingapaj imata can munashcatapish allimi yachan. Shinapish paica ñucanchij pudishcahuan paita sirvishpa cushilla sintirichunmi munan. Diospish ñucanchij ima problemacunahuan cajpica chaita chꞌimbapurachunmi ayudanga (Isaías 41:9, 10). Shamuj punllacunapicarin paitami para siempre adorashun. Chaimanta tucuita ruraj Jehová Diosllata adorashpa catishunchij (Apocalipsis 4:11). w22.03 págs. 24, 25 párrs. 16, 18

Jesuspaj ejemplota mana tucuipi alli cati tucushpaca mana desanimarinachu canchij (Santiago 3:2). Caipi yuyashun. Maipica shuj yachacujca paipaj yachachij shina mana tucuita alli rurai tucunchu. Pero paica desanimarinapaj randica ashtahuan yachashpa catishpaca asha ashami mejoranga. Chashnallatajmi Biblia yachachishcacunata estudiashpa, chaipi yachashcacunata ñucanchij causaipi pajtachishpaca Jesuspaj ejemplota cati tucushun (Salmo 119:59). Cai mundopi causaj gentecunaca paicunallapimi yuyancuna. Pero Diosta sirvijcunaca mana chashna yuyanchijchu. Jesús ima shina shujtajcunata ayudashcata yachashpaca, ñucanchijpish paipaj ejemplotami catisha ninchij (1 Pedro 2:21). Jesuspaj ejemplota catingapaj tucui pudishcata rurashpaca, Jehová Diospaj ñaupajpica allimi ricurishun. w22.02 págs. 24, 25 párrs. 16, 18

Cunan punllacunapica Jehová Diosca paipaj Shimihuanmi paipaj pueblotaca yachachishpa ñaupajman pushacun. Bibliata estudiangapaj tiempota surcushpaca Dios yachachishcata, ima mingashcatapishmi alli pajtachishun (1 Timoteo 4:15, 16). Shinallataj cunan punllacunapish Jehová Diosca “alli cazuj alli yuyaiyuj” sirvij huauquicunahuanmi paipaj pueblota ñaupajman pushacun (Mateo 24:45). Maipica cai huauquicuna ima instruccionta cujpica manachari tucuita alli intindishun. Por ejemplo, jatun terremotocuna, acapanacuna o shujtaj llaquicuna manaraj tiyajpimi imata ruranata huillancuna. Pero ñucanchijca: “Ñucanchij causan lugarpica chaica mana pasangachu” nishpachari yuyashun. Pero ¿cai pushaj huauquicuna cushca instruccionta cazungapajca imatataj rurana canchij? Diospaj instruccioncunata cazushcamanta ima shina quishpiri tucushcapimi yuyai tucunchij. Chashnami Diosta cazuna siempre alli cashcata cuentata cushun (Jueces 7:7; 8:10). w22.03 págs. 18, 19 párrs. 15, 16

Jesusca cai punllapaj versopi nishcata nircami. Paica pai huañujpipish Jehová Dios paita causachinataca tucui shunguhuanmi crirca. ¿Caimantaca imatataj yachanchij? Huañunata yachashpapish Jehová Diosta tucuipi sirvingapajmi esforzarina canchij. Chaipajca tucui shunguhuanmi Yaya Diospi confiana canchij (Proverbios 3:5). Huauqui Joshuapi yuyashun. Paica 15 huatacunata charishpami achca ancha ungüita charirca. Pero jambiringapajca Dios mana munashca tratamientocunataca mana chasquircachu. Paica huañungapaj asha tiempo faltajpica paipaj mamitamanca: “Jehová Diosmi ñucata cuidacun. Ñuca paita shungumanta sirvishcata, paita tucui shunguhuan cꞌuyashcataca allimi yachan. Chaimanta ñuca huañujpipish Jehová Diosmi de seguro causachinga” nircami. Ñucanchijpish chashnallatajmi tapurina canchij: ¿Sinchi pruebacunata charishpa, huañunata yachashpaca Jehová Diostaca tucuipichu alli sirvisha? ¿Pai ñucata yuyarishpa causachinatachu tucui shunguhuan crisha? w21.04 págs. 12, 13 párrs. 15, 16

Huillanaman llujshishpaca gentecuna uyajpipish, mana uyajpipish animarishcami sintirinchij. Maipica predicanapica mana tanto ayudai tucushachu nishpachari yuyanchij. Pero gentecunaman predicangapaj tucui pudishcata rurajpica Jehová Diosca cushillami sintiringa. Huillangapaj huasimanta mana llujshi tucujpipish Jehová Diosca predicangapaj esforzarishcatami valoran. Chaimantami ungushca cajpica Diosca doctorcunaman o ñucanchijta cuidajcunaman predicachun ayudan. Maipica ñaupa laya mana huillai tucushcamantami desanimarinchij. Pero Jehová Dios ayudacushcata ricushpaca fuerzasta japishpami cushilla huillashpa catishun. Gentecunaman predicashpaca picuna Jehová Diosta sirvinataca mana yachanchijchu (Eclesiastés 11:6). w21.05 págs. 24, 25 párrs. 14-17

Rey Davidpi yuyashun. Jehová Diosca Davidmanca achca cosascunata, autoridadtami curca. Shinallataj contracunata mishachunpishmi ayudarca. Chaimantami Davidca Jehová Diosta agradicishpaca: ‘Pai tucuita cushcacunataca mana yupai tucunichu’ nirca (Salmo 40:5). Pero qꞌuipaca Davidca Dios imalla cushcacunataca cungarishpa ladoman saquirca. Paica achca huarmicunata charishpapish shuj cazada huarmitami munai callarirca. Cai huarmica Uriaspaj huarmi Betsabemi carca. Davidca paillapi yuyashpami Betsabé huarmihuan huainayarca. Qꞌuipaca Betsabeca chichumi saquirirca. Chaita yachaj chayashpami Davidca Uriasta huañuchichun mandarca (2 Samuel 11:2-15). ¿Chaita ruracushpaca Davidca imapishi yuyacushcanga? ¿“Jehová Diosca ñucataca mana ricucunchu” nishpachu yuyashcanga? Paica achca huatacunata Jehová Diosta sirvicushpapish shujtajcunapajta munashcamantami llaquipi urmarca. Pero asha tiempo qꞌuipaca Davidca juchamanta arrepintirishpami Jehová Diosman huillarca. Jehová Dios paita perdonajpica agradecidomi sintirirca (2 Samuel 12:7-13). w21.06 págs. 17, 18 párr. 10

Maipica ñucaca Bibliamantaca mana tanto yachanichu, alli yachachijpish mana canichu nishpami Bibliamanta yachacujcunataca mana charisha ninchij. Chashna sintirishpaca cai quimsa yuyaicunapi yuyashun. Puntaca, Jehová Diosca ñucanchijcuna gentecunaman yachachi tucushcataca allimi yachan. Ishquipica, jahua pachatapish, cai pachatapish mandana derechota charij Jesusmi gentecunaman yachachichunca mandashca (Mateo 28:18). Quimsapica, gentecunaman yachachicushpaca mana ñucanchijllachu canchij. Ñucanchijpish Jesús shinallatajmi Jehová Dios ayudanapi confiana canchij (Juan 8:28; 12:49). Ashtahuancarin superintendente del grupo huauquita o alli yachachij precursorta o achca experienciata charij publicadortami Bibliamanta yachachinata callaringapajca ayudachun mañana canchij. Shinallataj paicunahuan Bibliamanta yachachinaman llujshishpaca paicunamantami achcata yachashun. w21.07 págs. 5, 6 párr. 12

Cai millai mundoca ñallami tucuringa. Chaimantami Jehová Diospica cunanmanta confiana canchij. Jatun llaqui punllacunapica mushuj instruccioncunatami chasquishun. Tal vez chaita chasquishpaca mushuj cashcamanta o mana intindishcamantami chaita pajtachinaca sinchi laya ricuringa. Chai punllacunapica Jehová Diosca ñucanchijman instruccioncunata cungapajca pushaj huauquicunatami utilizanga. Paicuna chai punllacunapi instruccioncunata cujpica ñucanchijca mana dudashpami pajtachina canchij. Chaimantami cunanmanta ancianocuna cushca instruccionta pajtachina canchij. Chaita rurashpaca shamuj punllacunapipish Diostami cazushun. w22.02 pág. 6 párr. 15

Gedeonca Jehová Diospaj ayudahuanmi 300 runacunallahuan Diospaj contracunata misharcacuna. Chashna mishashpapish paicunaca mana jatun tucurcacunachu. Pero Efrainmanta huaquin runacunaca Gedeonta felicitanapaj randica achcata pꞌiñarishpami rimarcacuna. Chai runacunaca paicunata macanacungapaj mana cayashcamantami achcata pꞌiñarircacuna. Gedeonca Jehová Dios paicunata ima shina bendiciashcatami parlarca (Jueces 8:3). Chaimi Efrainpaj runacunaca pꞌiñarinata saquircacuna. Gedeonca humilde cashcamantami Diospaj pueblo ucupi tucuicuna tandalla sirvichun ayudarca. Ñucanchijta jatunyachichun mashcanapaj randica siempremi Jehová Diosta jatunyachina canchij. ¿Gedeonmantaca imatataj yachanchij? Familiata pushajcuna, congregacionta pushajcunaca pi paicunahuan pꞌiñarijpi, paicuna imamanta pꞌiñarishcata intindingapajmi esforzarina can. Shinallataj paicunapaj alli rurashcacunamantami felicitana can. Chaita rurangapajca humildes canami minishtirin. Paicunahuan alli apanacungapajmi esforzarina canchij. w21.07 págs. 16, 17 párrs. 10-12

Jehová Diosca ñucanchijta paiman rijchajta rurashpami valorashcata ricuchirca. Diosman rijchajta rurashca cashcamantami Jehová Dios shina cꞌuyaj, llaquij, cashcata ruraj cai tucunchij (Salmo 86:15; 145:17). Chashna cangapaj esforzarishpaca Jehová Diostami jatunyachishun, paita agradicishcatapishmi ricuchishun (1 Pedro 1:14-16). Jehová Dios munashca shina causashpaca contentosmi sintirishun. Ashtahuancarin Jehová Diosca ñucanchijtaca paipaj familia ucupi cachunmi saquinga. Jehová Diosca runacuna causachunmi cai Allpata rurarca. Paica gentecunata manaraj rurashpami achca huatacuna ñaupajman cai Allpata alajata allichirca (Job 38:4-6; Jeremías 10:12). Paica mana mitsashpami tucui cai Allpapi imalla tiyashcacunataca ñucanchijpaj alajata rurarca (Salmo 104:14, 15, 24). Paillatajmi tucui rurashcacunataca alli cashcata ricurca (Génesis 1:10, 12, 31). w21.08 pág. 3 párrs. 5, 6

Diosta sirvijcunaca tucuicunami predicana canchij. Jesusta catijcunatapishmi rurana canchij (Mateo 28:19, 20; Romanos 10:14). ¿Ashtahuan alli predicaj, yachachij cangapajca imatataj rurana canchij? Chaipajca Alli yachachij cai nishca folletota estudiashpami practicapi churana canchij. Shinallataj tucuicunami alli cualidadcunata charingapaj esforzarina canchij (Colosenses 3:12; 2 Pedro 1:5-8). Tucuicunami Jehová Diosta ashtahuan sirvisha ninchij. Paraíso Allpapimi Diostaca cabalta sirvi tucushun. Pero chai punlla chayangacamaca ñucanchij tucui pudishcahuan Yayitu Diosta sirvingapaj esforzarishunchij. Chaita rurashpaca ñucanchijpish cushillami sintirishun. Ashtahuancarin cushi Jehová Diostami jatunyachishun (1 Timoteo 1:11). Chaimanta ñucanchij rurai tucushcahuan Jehová Diosta cushicushpa sirvishunchij. w21.08 pág. 25 párrs. 18-20

Can uchillaraj cajpica cambaj familiaca tal vez ñami testigo de Jehová cashcanga. Chaimantachari canca uchillaraj cashpa Jehová Dios tucuita ruraj cashcata yacharcangui. Shinallataj pai cꞌuyaj, llaquij cashcata, shamuj punllapipish paraíso Allpapi sumaj causai tiyanatami yachashcangui (Génesis 1:1; Hechos 17:24-27). Cutin achca gentecunaca Dios tiyashcapi, pai tucuita rurashcapica mana crincunachu. Paicunaca: “Causaipish, imalla tiyajcunapish ñapish ricurircallami. Animalitocunapish, plantacunapish, imalla tiyajcunapish evolucionmantami tiyan” nincunami. Chaita crij huaquincunaca estudiadosmi cancuna. Paicunaca: “Cienciaca Biblia pandarij cashcatami ricuchishca, mana estudiado gentecunallami Bibliapi, tucuita ruraj Diospi crincuna” nincunachari. Mashna huatacunata Jehová Diosta sirvicushpapish ñucanchij fetami sinchiyachina canchij. Chaita rurashpaca yachaj tucushca gentecuna, panda yachachijcuna ñucanchijta pandachichunca mana saquishunchu (Colosenses 2:8). w21.08 págs. 14, 15 párrs. 1-3

Abel, Noé, Abrahán, Jobca Jehová Diostaca respetohuan, cꞌuyaihuanmi adorarcacuna. Paicunaca Diosta cazushpami sinchi feta charishcata ricuchircacuna. Shinallataj huaquin sacrificiocunatapishmi rurarcacuna. Paicunaca Jehová Diosta alli adorangapajca tucui pudishcatami rurarcacuna. Chaimantami paicuna adorashcataca Jehová Diosca chasquirca. Tiempo qꞌuipacarin Jehová Diosca israelitacunamanmi paita alli adorachun huaquin leycunata curca. Jesús causarishca qꞌuipaca Jehová Diosca paita sirvijcunamanca Moisesman cushca leycunata ña mana cazuchunmi mandarca (Romanos 10:4). Ashtahuanpish paicunataca ‘Cristopaj mandashcata’ cazuchunmi mandarca (Gálatas 6:2). Chaipajca paicunaca achca leycunata cazunataca ña mana minishtircacunachu. Ashtahuanpish paicunaca Jesuspaj ejemplota catishpami Jesuspaj yachachishcacunata cazuna carcacuna. Cunan punllacunapish chashnallatajmi Diosta sirvijcunaca Jesuspaj ejemplota catishpa Jehová Diosta cushilla sirvinchij (Mateo 11:29). w22.03 págs. 20, 21 párrs. 4, 5

Jehová Diosca paita alli sirvijcunapaj mañashcataca shuj yaya shinami uyan. Por ejemplo, Jesús cai Allpapi cashpaca Jehová Diostami cutin cutin mañarca. Pai mañashcataca Jehová Diosca uyarcami. Jesusca 12 apostolcunata agllacushpapish Yayitu Diostami mañarca (Lucas 6:12, 13). Shinallataj achca preocupado cashpapish Jehová Diostami ayudachun mañarca. Judas paita traicionajpi chai sinchi pruebacunata chꞌimbapurangapajpishmi mañarca. Jehová Diosca paipaj Churi mañajpica mana uyashpalla saquirircachu. Ashtahuanpish shuj angeltami sinchiyachichun cacharca (Lucas 22:41-44). Cunan punllacunapish Jehová Diosca ñucanchij mañashcacunata uyashpami paica cutichin (Salmo 116:1, 2). India llajtamanta shuj panica dimastij preocuparishca cashpami Jehová Diosta ayudachun mañarca. Paica: “Ñucaca mayo de 2019-pi llujshishca JW Broadcasting^® programata ricushpami ama dimastij preocuparingapaj imata ruranata yacharcani. Jehová Diosca ñuca minishticun horasmi ñuca mañashcacunataca cutichishpa ayudarca” ninmi. w21.09 págs. 21, 22 párrs. 6, 7

Apostolcunapaj tiempopica Jesuspaj discipulocunapajca imalla cosascunata saquishpa, shujtaj ladopi causanaman rinaca sinchimi cashcanga. Paicunaca Jehovallataj cuidanapimi confiana carcacuna. 5 huatacuna ñaupajmanmi Romamanta soldadocuna Jerusalenman manaraj chayajpica, apóstol Pabloca Judeapi causaj discipulocunamanca valishca consejocunata cushca carca. Paica: “Cancunaca quiquinpajlla ashtahuan charij canataca ama munaichijchu. Cunan imata charishcacunallahuan cushi caichij. Chashnacunatami Diosca: ‘Cantaca manataj shitashachu, manataj cungarishachu’ nin. Chashna cajpimi, imata mana manchashpa: ‘Jatun Diosca ñucata ayudajmi. Pipish ñucata imata ruranataca, mana manchanichu’ ninchij” nircami (Hebreos 13:5, 6). Jesusta catijcunaca apóstol Pablopaj consejota chasquishpaca, paicuna maiman rijpipish Jehová Dios imalla minishtirishca cosascunata cushpa catinapimi confiarcacuna. w22.01 pág. 4 párrs. 7, 9

¿Llaquij gentecunaca ima shinataj can? Paicunaca cꞌuyaj, generososcunami can. Por ejemplo, Jesús parlashca samaritanopi yuyashun. Shuj cutinca shuj judío runatami shuhuacunaca macashpa, shuhuashpa rircacuna. Chaimi samaritano runaca llaquishpa ayudarca. Shinallataj imalla minishtishca cosascunahuanpishmi ayudarca (Lucas 10:29-37). Cai chꞌimbapuraita yachashpami Jehová Diosca cꞌuyaj, generoso cashcata yachanchij. ¿Ima shinataj ñucanchijpish llaquij cashcata ricuchina canchij? Maijan ñucanchijta llaquichijpica mana ñucanchijpish chashnallataj llaquichinachu canchij. Jehová Diosca llaquijmi can. Rey Davidca: ‘Ñucanchij millaita rurashcamantaca, llaquichina shinatajca Jehová Diosca mana llaquichircachu’ nircami (Salmo 103:10). Pero maipica Jehová Diosca juchata rurajcunataca pai cashcata ruraj, llaquij cashcamantami corregin. w21.10 pág. 8 párrs. 1, 2

Jehová Diosca paihuan alli apanacujcunallamanmi paipaj cꞌuyaita ricuchinataca manataj saquin. Caitaca mandaj David, profeta Danielmi Jehová Diospaj ayudahuan parlarca. Davidca: ‘Quiquinta rijsijcunamanca quiquin llaquij cashcata ricuchihuayari. Mandaj Dios llaquij cashcaca paita manchajcunapajca huiñaimanta huiñaicamami’ nircami. Cutin profeta Danielca: ‘Jatun Dios quiquinca manchashca cana jatun Taita Diosmi cangui. Quiquinta cꞌuyajcunata, quiquinpaj mandashcacunata huaquichijcunapajca, llaquij canatapish pajtachijmi cangui’ nircami (Salmo 36:10; 103:17; Daniel 9:4). Cai versocunapi nishca shinaca Jehová Diosca paita rijsijcunaman, cꞌuyajcunaman, paipaj mandashcata pajtachijcunamanmi cꞌuyaita ricuchinataca manataj saquin. Jehová Diosta manaraj sirvi callarishpami paipaj cꞌuyaitaca tucuicuna chasquishcanchij (Salmo 104:14). Pero paita sirvi callarishca horasmantami pai cꞌuyanata manataj saquinataca chasquishcanchij. w21.11 pág. 4 párrs. 8, 9

Ñucanchijca Jesús nishca shimicunataca cai punllapaj versopi nishcatami cazunchij. Achca gentecunaca religionta pushajcunatami casi adorancuna. Cullquita cushpa, librocunata randishpami paicunataca apoyancuna. Huaquincunacarin ima nishcataca tucuitami crincuna. Shinallataj paicunata ricushpapish achcatami cushicuncuna. Pero testigo de Jehovacunaca runacunataca mana adoranchijchu. Jehová Diospaj organizacionta pushajcunata respetashpapish Jesús yachachishcacunatami cazunchij. Jesusca: “Cancunaca tucuicunami huauquindijcuna canguichij” nircami (Mateo 23:8-10). Shinallataj religionta pushajcunata, politicocunataca mana adoranchijchu. Politicapipish mana chagrurinchijchu. Achca religioncunamantaca testigo de Jehovacunallami Jehová Diosta de verdadtaj alli adorajcuna cashcata ricuchinchij (Juan 18:36). w21.10 pág. 20 párrs. 6, 7

Diosta sirvijcunaca jucha illaj cangapajca Jehová Dioshuan apanacuna tucuimanta yalli valishca cashcatami ricuchina canchij. Ñucanchijca testigos de Jehová cashcamanta, Diospaj jucha illaj shutita charishcamantami paipaj shutitaca mana mapayachisha ninchij (Levítico 19:12; Isaías 57:15). Israelitacunaca Jehová Diospaj mandashcacunata cazushpami paicunapaj Dios cashcata ricuchircacuna. Levítico 18:4-pica: “Ñuca mandashcacunata chaitataj pajtachina yuyailla ruranguichij. Ñuca chaitataj pajtachichun nishcacunata huaquichishpa, chaipi nishca shinataj puringuichij. Ñucami Mandaj Dios cancunapaj Taita Dios cani” ninmi. Capítulo 19-pipish Jehová Dios israelitacunaman imalla mandashcacunatami ricuchin. Por ejemplo, versículos 5 al 8, 21, 22-pica israelitacuna Jehová Diosman animalcunata cungapaj imallata rurashcatami ricuchin. Cai sacrificiocunamantaca Diospajlla chꞌicanyachishcata ama yangapi churangapajmi cuidadota charina carcacuna. Ñucanchijpish cai versocunata liyishpaca Jehová Diosta jatunyachina importante cashcatami yachashun. Shinallataj Dios ñucanchij sirvishcacunata chasquichunca Hebreos 13:15-pi ima nishcatami pajtachina canchij. w21.12 págs. 5, 6 párrs. 14, 15

Cunanlla cazarashcacunaca Jehová Diosta achca huatata sirvijcunapaj experienciamantami yachai tucuncuna. Huaquin cusa huarmicunaca achca huatacunatami tiempo completopi sirvishcacuna. Cunanlla cazarashcacunaca Yayitu Diosta ashtahuan sirvingapaj, metacunata pajtachingapajca paicuna consejachunmi mañana canguichij. Chashnami cancunaca Diospi confiashcata ricuchinguichij (Proverbios 22:17, 19). Cazarashpa causanaca Jehová Diospaj regalomi can. Paica cusa huarmi cushilla causachunmi munan (Mateo 19:5, 6). Cunanlla cazarashcacunaca paicunapaj causaihuan imata ruranatami yuyarina can. Shinallataj Jehová Dios paicunaman huaquin bendicioncunata cushcamantapish agradicishcatami ricuchina can. Chaimanta Diosta mañangapaj imata alli decidingapajpish Diospaj Shimipi consejocunata mashcaichij. Chaita pajtachingapajpish esforzarichij. Jehovata punta lugarpi churashpaca cazarashcacunaca cushillami causangacuna. w21.11 págs. 18, 19 párrs. 16, 18

Santiagoca shujtajcunata yalli cashcataca mana yuyarcachu. Paica Jesuspaj huauqui cashpapish, paiman valishca ruraicunata mingajpipish mana jatun tucurcachu. Ashtahuanpish paica tucui huauqui panicunatami cꞌuyaihuan tratarca (Santiago 1:16, 19; 2:5). Imapipish mana pandarij cashcataca mana yuyarcachu. Santiago shina ñucanchijpish juchayuj cashcata yuyarishunchij. Yachacujcunata yalli cashcataca mana yuyanachu canchij. Ñucanchij tucuipi cashcata ruraj shina cajpica, yachacujcunapajca Jehová Diosta sirvinaca sinchi layami ricuringa. Pero Biblia yachachishcacunata pajtachina mana jahualla cashcata paicunaman intindichijpi, Diospaj ayudahuan chaita pajtachi tucushcata yachachijpica yachacujcunaca Jehová Diostami sirvisha ningacuna. w22.01 págs. 11, 12 párrs. 13, 14

Jesús yuyashca shina yuyangapaj esforzarishpaca paipaj ejemplotami catishun (Hebreos 1:3). Canca: “Jesusca jucha illajmi can. Paipaj ejemplota catinaca sinchimi can” nishpachari yuyangui. Chashna yuyashpaca cai quimsa yuyaicunapi yuyari. Puntaca, cantaca Jehová Diosca paiman, Jesusman rijchajtami rurashca. Chaimanta canca juchayuj cashpapish paicunapaj ejemplota catingapajmi esforzari tucungui (Génesis 1:26). Ishquipica, Jehová Diosca paipaj espíritu santohuanmi, can mana yuyashcata pajtachichun ayudanga. Quimsapica, Jehová Diosca cunan punllacunapica tucuipi Jesuspaj ejemplota alli pajtachichunca mana mañanchu. Por ejemplo, paica Paraíso Allpapi causagrijcuna 1.000 huatacunata jucha illaj tucuchunmi ayudanga (Apocalipsis 20:1-3). Pero Jehová Diosca cunan punllacunapimi Jesuspaj ejemplota catingapaj esforzarichun mañan. Chaita pajtachichunca paillatajmi ayudanga. w22.03 págs. 9, 10 párrs. 5, 6

Jehová Diospajman ashtahuan cꞌuchuyangapajca Bibliatami estudiana canchij, tandanacuicunamanpishmi rina canchij. ¿Chaicunata ruracushpaca tiempota alli aprovechangapajca imatataj rurana canchij? Bibliata yachacushpaca chaipi concentraringapajca, celulartami silenciopi o shujtaj ladoman churai tucunchij. Bibliata estudiacushpa, tandanacuipi cashpaca imata yachacushcapi concentraringapaj Jehová ayudachun mañashunchij. Maipica imata yachacushcapi mana concentrari tucunchij. Chashna sintirishpaca atentos uyangapajmi Jehová Diostaca ayudachun mañana canchij (Filipenses 4:6, 7). w22.01 págs. 29, 30 párrs. 12-14

Rey Uziasca consejocunataca mana chasquircachu. Shuj punllaca paica inciensota rupachina ucupimi, inciensota rupachisha nirca. Pero chaitaca sacerdotecunallami rurana carca. Chaimi sacerdotecunaca: “Uzías, Mandaj Diosman inciensota cushpa rupachinaca mana cambaj ruranachu. Aaronpaj huahua huahua curacunallami caitaca rurai tucun” nishpami consejarcacuna. Chashna aconsejajpica Uziasca achcatami pꞌiñarirca. ¿Uziasca imamantataj chai consejotaca mana chasquisha nirca? Paica: “Ñucaca mandajmi cani. Chaimanta ñucataca pi mana aconsejanachu can” nishpami yuyashcanga. Pero Jehová Diosca chashna rurachunca mana munarcachu. Uzías humilde cashca cashpaca cai consejota chasquishcahuanmi chai templo ucumantaca rinman carca. Jehová Diospish paitaca perdonanmanmi carca. Uzías mana cazushcamantami Jehová Diosca paitaca lepra ungüihuan castigarca. Chaimantami paica huañuna horascama lepra ungüihuan causarca (2 Crónicas 26:16-21). ¿Caimantaca imatataj yachai tucunchij? Ima responsabilidadcunata charishpapish consejocunatami cazuna canchij. Chaita mana rurashpaca Diospaj ñaupajpipish mana allimi ricurishun. w22.02 págs. 9, 11 párr. 7

Mauca causaita pajtachijcunaca rato pꞌiñarijcuna, paicunallapi yuyajcuna, mana agradicijcuna, jatun tucushcacunami can (Colosenses 3:9). Shinallataj paicunaca huainayanahuan, macanacuihuan chagrurij ricunacunatachari ricunata munancuna. Maijancunaca chashna rurashcamantami mana alli sintirincuna o cambiashapish nincuna. Pero paicunapajca chaita saquinaca sinchimi can (Gálatas 5:19-21; 2 Timoteo 3:2-5). Tucuicuna juchayuj cashcamantami ñucanchij yuyaimanta, shungumantaca tucui mana alli yuyaicunataca mana anchuchi tucunchij. Chaimantami maipica pandarishun (Jeremías 17:9; Santiago 3:2). Pero chashna juchayujcuna cashpapish mauca causaita saquishpaca mana allicunata rurana yuyaillaca mana causashunchu (Isaías 55:7). w22.03 pág. 3 párrs. 4, 5

Huauqui panicunaca juchayujcuna cashcamantami, maipica paicunapaj ruraicunahuan o ima nishcacunahuan pandaringacuna. Chaimi ancianocunaca tal vez paicunata corregina cangacuna. Chashnapish ancianocunaca huauqui panicunapaj alli ruraicunata ricushpami felicitana can. Shinallataj huauqui panicuna Jehová Diosta cꞌuyashcata, paicunapaj causaipi mejoracushcatami ricuna can. Ancianocuna chaita rurajpica huauqui panicunaca congregacionpimi cꞌuyaita ricuchishpa tandalla sirvingacuna. Ancianocuna, Jehová Diosca cancuna jucha illaj cachunca mana shuyanchu. Pero paica alli sirvichunmi shuyan (1 Corintios 4:2). Paita sirvingapaj esforzarishcataca achcatami valoranga. Hebreos 6:10-pica: ‘Diosca cancunapaj rurashcacunata paipaj shutipi cꞌuyaihuan trabajashpa ricuchishcata, jucha illajcunapajta rurashpa cunancamapish ruracushcamantaca manataj cungaringachu’ ninmi. w22.03 pág. 31 párrs. 19, 21