Noviembre

Jehová Dios ayudajpimi cushilla huillashpa caticunchij. Shinallataj gentecuna mana alli tratajpipish, mana uyasha nijpipish tranquilo sintirichun, cushilla huillashpa catichunmi Yayitu Diosca ayudacushca. Ashtahuancarin gentecunaman predicangapaj versocunata de memoria yuyarichunpishmi ayudashpa caticushca (Jeremías 20:7-9). Jehová Diosca ñucanchijta ima shina predicanata yachachishpami ayudacushca. Chaupi semana tandanacuipica gentecunaman ima shina predicanata valishca yuyaicunatami yachanchij. Maipica chai yuyaicunata pajtachingapajca asha manchaitami charinchij. Pero manchaita mishashpa, chai yuyaicunata pajtachishpaca allimi huillashun. Tandanacuicunapi, jatun tandanacuicunapipish ima shina telefonomanta cayashpa huillachun, cartacunata quillcashpa huillachun, carritocunahuan huillachunmi animancuna. Chaicunata pajtachishpaca cushillami predicashpa catishun. Diospaj bendiciontapishmi chasquishun. w21.08 pág. 27 párrs. 5, 6

Shuj cutinca apóstol Pabloca Corinto llajtapi causaj huauqui panicunamanmi sinchi consejota curca. Qꞌuipaca Pabloca Titotami cai huauqui panicunapajman cacharca. Pai cushca consejota pajtachicushcata yachashpaca cushillami sintirirca (2 Corintios 7:6, 7). Ancianocunaca Pablopaj ejemplota catishpaca huauqui panicunahuan tiempota pasangapajmi esforzari tucuncuna. Chaipajca paicunaca huauqui panicunata animangapajmi tandanacuicunaman utcalla ri tucuncuna. Paicunata animangapaj, sinchiyachingapajca maipica asha tiempollami minishtirin (Romanos 1:12). Shinallataj ancianocunaca Bibliahuanmi huauqui panicunata animancuna. Ancianocunaca huauqui panicunahuan parlashpa, paicunata felicitashpaca cꞌuyaitami ricuchincuna. Paicunaca piman consejacushpapish Bibliahuan, cꞌuyaihuanmi consejana can (Gálatas 6:1). w22.03 pág. 29 párrs. 11, 12

Cunan punllacunapica Jehová Diosca paita sirvijcuna llaquicunahuan cajpipish paita sirvishpa catichunmi fuerzasta cun. Jehová Diosca ñucanchijta sinchiyachingapajca mañana regalotami cushca. Apóstol Pabloca: “Punllanta Diosta mañaichij” nircami (Efesios 6:18). Chaita rurajpica Jehová Diosmi ñucanchijtaca sinchiyachishpa catinga. Maipica ima shina sintirishcata parlana sinchi cajpipish Jehová Diosmanca parlanallami canchij. Paica ñucanchij ima shina sintirishcata paiman parlachunmi munan (Romanos 8:26, 27). Apóstol Pablo shinami Dios quillcachishcacunataca liyina canchij. Chashnami fuerzasta charishun. Tranquilopish sintirishun (Romanos 15:4). Bibliata liyicushpaca chaipi cutin cutin yuyashunchij. Jehová Diosca paipaj espíritu santohuanmi pai yachachishcacunata intindichun, llaquicunata chꞌimbapurachun ayudanga (Hebreos 4:12). w21.05 pág. 22 párrs. 8-10

Jesuspaj discipulocunata rurana importante cashcataca allimi yachachij. Pero maipica chꞌican chꞌican jarcaicunahuanmi chꞌimbapuranchij. Maipica ungushca cashcamanta, mayorlla cashcamanta o ima shujtaj jarcaita charishcamantami Bibliamanta yachacujcunata charinaca sinchi cashca. Chashna jarcaicunata charishpaca gentecunaman ima shina yachachishcatami yuyarina canchij. Ñucanchij huasillamantatajmi gentecunataca telefonomanta, Internetmanta cayashpa yachachi tucunchij. Cutin maijan gentecunaca paicuna munashca horaspimi yachasha nincuna. Pero huaquin huauqui panicunaca mana chai horaspi yachachi tucuncunachu. Chaimi ñucanchijca tal vez tutamanta lado o chishi lado yachachi tucunchij. Jesuspish Nicodemo tuta horas yachasha nijpimi tuta horas yachachirca (Juan 3:1, 2). w21.07 pág. 5 párrs. 10, 11

Jesuspaj discipulocuna mana ayunajpimi bautizaj Juanpaj discipulocunaca: ‘¿Imamantataj cambaj discipulocunaca mana ayunancuna?’ nishpa tapurcacuna. Chaimi Jesusca: ‘Ñuca causacujpirajca mana ayunangacunachu’ nishpa intindichirca (Mateo 9:14-17). Fariseocuna, shujtaj contracunacarin Jesustaca: ‘¿Imamantataj mana ñucanchij costumbreta catingui?’ nishpami rimarcacuna. Sábado punllapi Jesús ungushcacunata jambijpicarin achcatami paicunaca pꞌiñarircacuna (Marcos 3:1-6; Juan 9:16). Cai millai runacunaca sábado punllapi leyta pajtachishcamantami jatun tucujcuna carca. Pero Diospaj templo huasipica negociocunata rurashpami pasajcuna carca. Chaimi Jesús paicunata sinchita rimajpica achcata pꞌiñarircacuna (Mateo 21:12, 13, 15). Nazaretpi tiyaj sinagogapi israelitacuna Diosta mana cazushcamanta, paicunapaj fepish imamanta mana sinchi cashcamanta yachachijpicarin ashtahuanmi pꞌiñarircacuna (Lucas 4:16, 25-30). Judiocunapaj costumbrecunata Jesús mana catijpimi achcacunaca ñitcarishpa paita mana catircacuna (Mateo 11:16-19). w21.05 págs. 5, 6 párrs. 13, 14

Ñaupa punllapi Diosta sirvij huaquin runacunaca jatun tucushcamanta, shujtajcunapajta munashcamantami juchapi urmarcacuna. Ñucanchijpish chai trampacunapi ama urmachunmi Jehová Diosca Bibliapi paicunapaj ejemplocunamanta yachachin. Diabloca Jehová Diospaj manaraj contra tucushpaca shuj angelmi carca. De seguro Jehová Diosca paimanca huaquin responsabilidadcunata pajtachichunmi mingarca. Pero Diabloca jatun tucushcamantami Jehová Diosta adoranapaj randica paita adorachun munarca. Diabloca ñucanchijpish imalla charishcacunahuan cushilla canapaj randica ashtahuan shujtaj cosascunata mashcachunmi munan. Evapi yuyashunchij. Jehová Diosca Evata, paipaj cusata cꞌuyashcamantami paraisopi tucui laya yuracunamanta micuchun saquirca. Pero shuj yuramanta ama micuchunmi mandarca (Génesis 2:16). Chaimi Diabloca Evataca Dios ama micuchun nishca yuramanta micuna munaita charichun pandachirca. Evaca chai yuramanta micushpami Jehová Dios tucuita cujpipish chaicunamanta mana agradicishcata ricuchirca. Qꞌuipaca paica juchayuj tucushpami huañurca (Génesis 3:6, 19). w21.06 págs. 14, 15, 17 párrs. 2, 3, 9

Yayitu Diosca Adán y Evataca cai Allpata cuidashpa, achca huahuacunata charishpa cuidachunmi mandarca. Paicuna Jehová Diosta cazushca cashpa, paipaj munaita pajtachishca cashpaca paicunapish, paicunapaj huahua huahuacunapish Diospaj familia ucupimi huiñaita causacunman carca. Jehová Diosca Adán y Evata paipaj familia ucupi causachun saquishpaca paicunata valorashcatami ricuchirca. Davidca Jehová Dios runacunata rurashcamanta parlashpaca: “Ashallamantami angelcuna shinallatataj mana rurashcangui. Jatun nishca canata, alli nishca canatami coronata shina churachishcangui” nircami (Salmo 8:5). Diosca runacunataca mana angelcunata shina poderyujta, yachaisapa cajta rurarcachu (Salmo 103:20). Adán y Evaca Diospaj familia ucupi canatami saquircacuna. Chaimantami paicunapaj huahua huahuacunapish llaquicunata charircacuna. Pero Jehová Diosca paita cazuj runacuna paipaj huahuacuna cachunmi munan. w21.08 págs. 2, 3 párrs. 2-4

Huaquin llajtacunapica testigo de Jehovacunataca Jehová Diosta ama sirvichunmi carcelpi churancuna, mana cashpaca mandajcunapaj ñaupajmanmi apancuna. Chaimi paicunaca mandajcunamanpish, shujtajcunamanpish predicai tucushcacuna (Mateo 10:17, 18). Cutin shujtaj huauqui panicunaca gobiernocuna mana jarcajpipish paicunapaj huasi ucupimi jarcaicunata charincuna (Mateo 10:32-36). Pero familiacuna chashna jarcajpipish paicunaca Jehová Diostami sirvishpa catincuna. Chashna ahuantajta ricushpami huaquin familiacunaca qꞌuipaca Jehová Diosta rijsishpa, paicunapish Yaya Diosta cushilla sirvi callarishcacuna. Chaimanta gobiernocuna, familiacuna jarcajpipish mana manchashpa Jehová Diosta sirvishpa catishunchij. Diosmi ñucanchijtaca paipaj espíritu santohuan ayudanga. w22.03 pág. 16 párr. 8

Bibliapica Diosca jatun tucushcacunata, llullacunata, llaquichijcunata, umajcunataca pꞌiñanmi ninmi (Proverbios 6:16, 17; Salmo 5:6). Noé causashca punllacunapica Jehová Diosca gentecuna mana allicunata rurashcamantami paicunataca tucuchirca (Génesis 6:13). Profeta Malaquiasman quillcachishca shinaca Jehová Diosca cusa huarmi huainayashpa traicionachunpish mana munanchu. Chaita rurajpica Diosca paita adorachunca mana chasquinchu. Ashtahuancarin paica cada unotami juzganga (Malaquías 2:13-16; Hebreos 13:4). Jehová Diosca: “Millaitaca pꞌiñaichij” ninmi (Romanos 12:9). Chashnallatajmi Jehová Dios pꞌiñashcacunataca mana ricunayachina canchij. w22.03 págs. 4, 5 párrs. 11, 12

Yayitu Diosca ñallami achca bendicioncunata cunga. Jehová Dios llaquicunata tucuchingacama pacienciahuan shuyashpaca cunan punllapish, shamuj punllapish achca bendicioncunatami charishun. Cunan punllacunapica minishtirishca cosascunamantami maipica achcata preocuparinchij. Pero paraíso Allpapica minishtishca cosascunata yallimi tucuita charishun (Salmo 72:16; Isaías 54:13). Shinallataj llaquicunata, problemacunataca manataj charishunchu (Apocalipsis 21:4). Caita yachashpaca dimastij cushillami sintirinchij. Jehová Diosca paraíso Allpapi causangapajca cunanmantami mana allicunata saquishpa, alli cosascunata rurashpa catichun ayudacun. Chaimanta amataj desanimarishpa ñaupajman catishunchij. Yayitu Diosca ñallami maravilla causaita cunga. Jehová Dios paipaj munaita pajtachingacama pacienciahuan shuyashpa catishunchij. w21.08 pág. 13 párrs. 17-19

Judeapi causaj huauqui panicunaca apóstol Pablopaj shimicunata chasquishca qꞌuipallami huasicunata, negociocunata, Diosta mana sirvij familiacunata saquishpa, urcucunaman miticushpa rina carcacuna (Mateo 24:16). Pero paicunaca miticuna tiempo manaraj chayajpica, caishujmanta chaishujmantami ayudanacushpa catina carcacuna. Chashnami shujtaj lugarcunapi causanaman rishpaca minishtirishcacunallahuan causanata yachashcangacuna. Maipica huauqui panicunaca imapi ayudachun minishtishcataca mana huillancunachu. Chaimanta shujtajcunata ayudangapaj listos cashcata ricuchishunchij. Chashnami shujtajcunaca mana manchashpa ñucanchij ayudachun mañangacuna. Ñucanchij congregacioncunapica achca huauqui panicunami shujtajcunata ayudangapajca listos can. Paicunaca ayudata minishtijcunataca shuj cargata shinaca mana ricuncunachu. Ñucanchijpish paicunapaj ejemplotami catisha ninchij. w22.02 págs. 23, 24 párrs. 13-15

Cai recienlla punllacunapica huaquin congregacioncunataca shujllapimi tandachishca. Pero ñucanchijta shujtaj congregacionpi sirvinaman richun nijpica amigocunata, familiacunata saquinaca sinchichari ricuringa. Jehová Diosca ancianocunamanca cada publicadorta maijan congregacionman cachana cashcataca mana huillanchu. Chaimantachari paicunata cazunaca sinchi canga. Pero Jehová Diosmi paicunapi confiashca. Chaimantami ñucanchijpish paicunapi confiana canchij. ¿Ancianocuna decidishcahuan mana de acuerdo cashpapish imamantataj paicunata cazuna canchij? Humildadhuan paicunata cazushpaca tandallami Diosta sirvishun. Shinallataj congregacionpipish tucuicunami beneficiarishun (Hebreos 13:17). Ashtahuancarin Jehová Diospi confiashcatami ricuchishun. Jehová Diosllatajmi ancianocunataca ñucanchijta cuidachun agllashca (Hechos 20:28). w22.02 págs. 4, 5 párrs. 9, 10

Can bautizado huauqui cashpaca alli conferenciata cungapaj, alli yachachingapajmi metacunata churai tucungui. Chaita pajtachijpica canta uyajcunapish achcatami beneficiaringacuna (1 Timoteo 4:15). Alli yachachij cangapajca Alajata liyij, alli yachachij cai nishca folletopi tiyaj yachaicunatami cutin cutin repasana cangui. Conferenciata cucushpa, alli yachachicushpami practicapi churana cangui. Shinallataj consejero auxiliar nishca ancianota o shujtaj alli yachachij ancianocunatami ayudachun mañana cangui (1 Timoteo 5:17). Conferenciata cucushpaca uyacujcunapaj fetami sinchiyachina cangui. Paicuna ima yachashcatapish pajtachichunmi ayudana cangui. Chaita rurashpaca canpish, canta uyajcunapishmi cushilla sintiringuichij. w21.08 págs. 24, 25 párr. 17

Cai verso nishca shinaca shujtajcuna ñucanchijta yalli cashcatami yuyana canchij. Chashnami shujtajcuna Yayitu Diosta sirvingapaj tucui allicunata rurajpica paicunamanta cushicushun. Caita pajtachishpaca tucuicunami congregacionpica tandalla, sumajta Jehová Diosta sirvishun. ¿Ama envidiangapajca imatataj rurana canchij? Mana tucuita alli ruraj cashcatami intindina canchij. Chaita intindishpaca shujtajcunapaj alli ruraicunamanta yachangapajmi esforzarishun. Por ejemplo, shuj huauqui congregacionpi alli conferenciata cujpica cai huauqui ima shina chai conferenciata cungapaj allichirishcatami tapuna canchij. Shuj pani mishqui micunitata yanunata yachajpica cai panitami ñucanchijpish alli yanungapaj ima shina yanunata tapuna canchij. w21.07 págs. 15, 16 párrs. 8, 9

Números libropica Jehová Diosca shuj israelita runata sábado punllapi yantata japicujpi paita huañuchichun mandashcatami parlan. Cutin Samuel librota liyicushpaca rey David, Betsabé huarmihuan huainayashpa paipaj cusata huañuchijpi, pero David arrepintirijpi, Jehová Dios paita perdonashcatami yachanchij (Números 15:32, 35; 2 Samuel 12:9, 13). Caicunata liyishpaca maipica cashnachari tapurishcanchij: “¿Jehová Diosca imamantataj Davidtaca jatun juchata rurajpipish perdonarca? Pero ¿sábado punllapi yantata japij runa jatun juchata mana rurajpipish paita huañuchichun mandarca?”. Maipica Bibliapica imalla tucushcataca mana tucuita huillanchu. Por ejemplo, David shungumanta arrepintirijpi Jehová Dios perdonashcatami yachanchij (Salmo 51:2-4). Pero ¿Moisesman cushca leyta mana cazuj runaca ima layataj carca? ¿Cai runaca sábado punllapi yantata japishcamantaca arrepintirircachu? ¿Shujtaj punllacunapipish Jehová Diostaca manachu cazushcanga? ¿Shujtajcuna paita advirtijpipish paica uyashcangachu? Bibliapica cai runa imallata rurashcataca mana tucuita huillanchu. Pero Jehová Diosta ashtahuan rijsishpaca, Pai tucuipi “cashcata ruraj” cashcapimi confianchij (Salmo 145:17). w22.02 págs. 2, 3 párrs. 3, 4

Humildecunaca paicuna ima rurai tucushcahuanmi cushilla sintirincuna. Paicuna ima shina cashcata yachangapajca cai ejemplopi yuyashun. Shuj carrota manejajca mana quinripi laya huichipica manejanchu. Huichipi manejangapajca asha velocidadtami bajana can. Chashnallatajmi humildecunaca ñaupaca fuerzasta charishcamantami tucui pudishcahuan Yayitu Diosta sirvi tucushcanga. Pero cunanca ña mana tanto sirvi tucushpapish paicuna pudishcahuanmi Jehová Diosta sirvishpa, shujtajcunata ayudashpa catincuna (Filipenses 4:5). Barzilái 80 huatacunata charijpica rey Davidca paita sirvichunmi invitarca. Pero Barzilaica humilde cashcamantami chaitaca mana chasquirca. Paica allimi yacharca ña ñaupa laya mana sirvi tucushcata. Chaimi Quimam joventa paipaj randi agllachun nirca (2 Samuel 19:35-37). Mayorlla huauquicunaca Barzilái shinallatajmi jovenlla huauquicuna paicuna charishca responsabilidadta chasquijpica cushilla sintirincuna. w21.09 pág. 10 párrs. 6, 7

Huaquincunapajca Jehová Diosta shuj cꞌuyaj yayata shina ricunaca sinchimi can. ¿Imamanta? Paicuna uchillaraj cajpica tal vez yaya mamacunaca mana cꞌuyaita ricuchishcangacunachu. Pero Jehová Dios ñucanchij ima shina sintirishcata yachashpa, pai ñucanchijman cꞌuchuyasha nishcata yachashpaca cushillami sintirinchij. Bibliapica: “Diosman cꞌuchuyaichij, paipish cancunapajman cꞌuchuyangami” ninmi (Santiago 4:8). Jehová Diosca shuj propio yayata yalli cꞌuyajmi can. Jesusca Jehová Diospajman ashtahuan cꞌuchuyachunmi ayudan. Paica allimi rijsin Jehová Dios ima shina cꞌuyaj, llaquij, mana pꞌiñarij cashcata. Chaimantami Jesusca: “Pipish ñucata rijsijca, ñuca Yayatapish ñami rijsin” nirca (Juan 14:9). Jesusca ñucanchij shuj punta huauqui shinami Jehová Diosta cazuchun, paita respetachun yachachin. Shinallataj Jehová Diospaj ñaupajpi alli ricuringapaj, paita cushichingapaj imata ruranatapishmi yachachirca. Jesusca cai Allpapi cashpaca Jehová Dios cꞌuyaj, alli cashcata intindichunmi ayudarca. w21.09 pág. 21 párrs. 4, 5

Ñucanchijca Jehová Diosta sirvishcamantami tandalla causanchij. Jehová Diosca ancianocunamanca jatun juchata rurajcuna congregacionpi catichun o mana catichun ricuna responsabilidadtami mingashca. Ancianocunaca juchata ruraj de verastij arrepintirishca cashcatami ricuna can. Chaipajca juchata ruraj mana allita pꞌiñashcata, juchapi cutin ama urmangapaj esforzaricushcata, mana alli amigocunamantapish caruyacushcatami alli ricuna can. Ancianocunaca caita alli yachangapajca Jehová Diostami mañancuna. Ima tucushcatapish, Biblia yachachishcatapish allimi ricuncuna. Chai tucuita rurashca qꞌuipaca paicunaca juchata ruraj congregacionpi catinata o mana catinatami decidincuna. Tal vez juchata ruraj mana arrepintirijpica paitaca congregacionmantami llujchina minishtiringa (1 Corintios 5:11-13). w22.02 pág. 5 párrs. 11, 12

Cunanlla bautizarishca cashpapish, achca huatacunata bautizarishca cashpapish tucuicunami Jehová Dios munashca shina casha ninchij. Chaipajca mana alli yuyaicunataca mana charinachu canchij. Mana alli yuyaicunata charishpaca mana allicunatami parlashun, mana allicunatapishmi rurashun (Efesios 4:17-19). Cutin allicunata yuyashpaca allicunamantami parlashun. Jehová Dios munashca shinapishmi causashun (Gálatas 5:16). Pero ñucanchij yuyaimantaca mana tucui mana alli yuyaicunata anchuchi tucunchijchu. Chaimanta mana alli yuyaicunata ama rurangapajmi esforzarina canchij. Manaraj bautizarishpaca mana alli rimaicunata, mana alli ruraicunatami saquircanchij. Chashnami mauca causaita saquircanchij. Pero Jehová Diosta tucuipi cushichingapajca mushuj causaita churarina canchij. w22.03 pág. 8 párrs. 1, 2

Congregacionpi jatun juchata rurajcuna paicuna de verdadtaj arrepintirishcata yachanaca ancianocunapajca sinchimi can. ¿Imamanta? Ancianocunaca gentecunapaj shungupi ima tiyashcataca mana yachai tucuncunachu. Chaimantami jatun juchata rurajcuna cambiacushcata yachangapajca pruebacunata mashcana can. Chaimi ancianocunaca juchata ruraj huauqui de verdadtaj paipaj yuyaipi cambiacushcata alli ricuna can. Tal vez cai juchata rurajcuna cambiacushcata yachangapajca achca tiempomi minishtirin. ¿Congregacionmanta llujchishcacunaca de verdadtaj arrepintirishca cashcataca ima shinataj ricuchina can? Paicunaca tandanacuicunaman rinataca manataj saquinachu can. Shinallataj ancianocuna cushca consejocunatapishmi pajtachina can. Yayitu Diosta mañanatapish Bibliata estudianatapish manataj saquinachu can. Cutin jatun juchapi ama urmangapajmi esforzarina can. Chaita rurashpaca Jehová Dioshuanmi alli apanacunga. Ashtahuancarin Diosmi paicunataca perdonanga. Ancianocunapish paicunataca congregacionman tigrachunmi ayudanga. w21.10 págs. 5-7 párrs. 16-18

Jesusca jahua pachapi cashpapish, cai Allpapi cashpapish Jehová Diosllatami adorarca (Lucas 4:8). Paipaj discipulocunatapish chashnallataj Jehová Diosllata adorachunmi yachachirca. Jesuspish, discipulocunapish Jehová Diosta adorangapajca mana santocunata o yanga dioscunata utilizarcachu. Jehová Diosca shuj espiritumi can. Chaimantami runacunaca Diosman rijchajtaca shuj santotaca mana rurai tucuncuna (Isaías 46:5). ¿Imaman rijchajta rurashca santocunata rezanaca allichu canga? Moisesman cushca leypica Jehová Diosca cai punllapaj versopimi nirca. Jehová Diosllata jatunyachisha nijcunaca allimi yachan santocunata, yanga dioscunata mana adorana cashcata. Historiamanta parlajcunaca punta siglopi Jesusta catijcunaca Diosllatami adorajcuna carca ninmi. Cunan punllacunapish testigo de Jehovacunaca punta siglopi Diosta sirvijcuna shinallatajmi paicunapaj ejemplota catinchij. w21.10 págs. 19, 20 párrs. 5, 6

Jesusca achca soldadocuna Jerusalén muyundijta shayarijpica Judeapi causaj discipulocunataca chai rato urcucunaman llujshichunmi advirtirca (Lucas 21:20-24). Chashna rurashpallami discipulocunaca quishpiri tucurcacuna. Pero chaipajca tucui imalla cosascunatami huashaman saquina carca. 1999 huatapi llujshishca La Atalaya revistapica: “Paicunaca huasicunata, campocunata, imalla charishcacunatapish mana apashpami rircacuna. Paicunaca Jehová Diosta punta lugarpi churajpi paillataj cuidanata, apoyanatami confiarcacuna” ninmi. Shinallataj “¿Shamuj punllacunapica ima llaquicuna ricurijpica ñucanchijpajca charishca cosascunachu ashtahuan importante canga? O ¿Jehová Diosta sirvishcamanta quishpirinachu ashtahuan importante canga? Cai millai mundo tucurina chayamujpica sinchi llaquicunahuan chꞌimbapurashpachari ima cosascunata saquina tucunga. Jesús ima nishcata cazungapaj allichirishca cashunchij” ninmi. w22.01 pág. 4 párrs. 7, 8

Jehová Diosca israelitacuna Egiptomanta llujshishca qꞌuipaca Moisesmanmi paipaj shuti, paipaj cualidadcunata huillarca. Diosca: “Tucuita rurai tucuj Dios, llaquij, cꞌuyaj shungu, mana utca pꞌiñarij, yallitaj llaquij, mana llullaj Diosmi cani. Millaita rurashcata, cꞌariyashcata, juchallishcata perdonajmi cani” nircami (Éxodo 34:6, 7). Chashnami Diosca cꞌuyanata manataj saquinata alli intindichun ayudarca. Caimanta ashtahuan yachashun. Jehová Diosca cꞌuyaita charishcallataca mana nircachu. Ashtahuanpish paica huiñaipaj cꞌuyaita charishcatami nirca. Bibliapica cai shimicunaca achca cutinmi ricurin (Números 14:18; Nehemías 9:17; Salmo 86:15; 103:8; Joel 2:13; Jonás 4:2). Cai shimicunata nishpaca Jehová Diosca paillamantami parlan. Bibliapica Diospaj cualidad importante cashcata ricuchingapajmi achca cutin quillcachishca. w21.11 págs. 2, 3 párrs. 3, 4

Apóstol Pedro, paipaj huarmipish cazarashcacunapajca alli ejemplomi can. Pedroca 6 quillacunata yalli Jesusta rijsishca huashaca paica shuj importante decisiontami agllarca. Pedroca pescadocunata japishpami trabajaj carca. Pero Jesús paita tiempo completopi sirvichun invitajpica paipaj huarmita ima shina mantininapimi yuyashcanga (Lucas 5:1-11). Bibliapica Jesús causarishca qꞌuipaca Pedropaj huarmica Pedrohuan Yayitu Diosta sirvingapaj viajashcatami huillan. Chashnami Pedro predicashpa catichun paipaj huarmi apoyashcata yachanchij. (1 Corintios 9:5). Pedropaj huarmica alli ejemplomi carca. Chaimantami Pedroca cazarashcacunamanca alli consejota cui tucurca (1 Pedro 3:1-7). Pedroca, paipaj huarmihuan Yayitu Diospaj Gobiernota punta lugarpi churajpi Dios paicunata bendicianatami yacharcacuna (Mateo 6:31-34). w21.11 pág. 18 párr. 14

Apóstol Pabloca huauqui panicunataca achcatami cꞌuyarca. Chaimantami paicunapajca sinchita trabajarca (Hechos 20:31). Chaimi huauqui panicunapish paitaca achcata cꞌuyarcacuna. Shuj cutinca Éfeso llajtamanta ancianocunaca Pablo ña mana tigranata yachashcamantami dimastij huacarcacuna (Hechos 20:37). Cunan punllacunapish ancianocunaca Pablo shinami huauqui panicunata cꞌuyancuna. Chaimantami paicunata ayudangapaj tucui pudishcata rurancuna (Filipenses 2:16, 17). Pero maipica paicunapish sinchi jarcaicunahuanmi chꞌimbapurana can. ¿Caicunata mishangapajca imatataj rurana can? Sinchita trabajaj ancianocunaca apóstol Pablopaj ejemplotami catincuna. Apóstol Pabloca imapi jucha illaj, shuj ángel shinaca mana carcachu. Paipish maipica sinchi jarcaicunahuanmi chꞌimbapurarca (Romanos 7:18-20). Sinchi jarcaicunata charishpapish paica Jehová Diostami cushilla sirvirca. Ancianocunaca ima jarcaicunata charishpapish, apóstol Pablo shinami Jehová Diosta cushilla sirvi tucuncuna. w22.03 pág. 26 párrs. 1, 2

Levítico 19:3-pica: “Samana punllata huaquichinguichij” ninmi. Pero cunan punllapica Diosta sirvijcunaca chai samana punllataca mana huaquichinchijchu. Pero israelitacuna chai punllapi imata rurashcatami yachai tucunchij. Shinallataj chai punllata huaquichishcamanta ima bendicioncunata chasquishcatapishmi ricui tucunchij. Chai punllapica israelitacunaca ima ruranacunata ladoman saquishpami Jehová Diosta adorajcuna carca. Chaimantami Jesusca cai Allpapi cashpaca sinagogacunapi sábado punllapi Diospaj Shimita liyij carca (Éxodo 31:12-15; Lucas 4:16-18). Levítico 19:3-pi “samana punllata huaquichinguichij” nishcamanta yachashpaca ñucanchijpish huaquin ruraicunata ladoman saquishpa Jehová Diosmanta ashtahuan yachangapaj, paita adorangapaj tiempota surcunatami ricunchij. Diosta adorangapaj, paipaj Shimimanta ashtahuan yachangapaj tiempota surcushpaca paihuanmi alli amigos tucushun. Chashnami jucha illaj cai tucushcata ricuchishun. w21.12 pág. 5 párr. 13

Jesús cai Allpapi cashpaca autoridadta charij gentecunahuan, pobrecunahuan, maltratashca gentecunahuanmi pasarca, micurca. Achca gentecunaca shujtajcunataca juchayujcuna nishpami mana alli tratajcuna carca. Pero Jesusca paicunamanmi cꞌuyaita ricuchirca. Chaimantami jatun tucushca gentecunaca ñitcarishpa Jesusta mana catircacuna. Paicunaca Jesuspaj discipulocunataca: “¿Ima nishpataj tributota japijcunahuan, juchayujcunahuanca micucunguichij, ubyacunguichij?” nishpami tapurcacuna. Chaimi Jesusca cai punllapaj versopi nishcata cutichirca (Lucas 5:29-31). Mesías manaraj cai Allpaman shamujpimi profeta Isaiasca Mesiasmantaca: ‘Runacunapurapica yanganchishca, mana nishpa shitashcami carca. Tucuicunami mana ricunayachircanchij. Tucuicunami mana munarcanchij. Tucuicunami mana cꞌuyarcanchij’ nirca (Isaías 53:3). Cai profecía pajtarinata yachashpami judiocunaca achca gentecuna Jesusta mana catina cashcata intindina carca. w21.05 págs. 8, 9 párrs. 3, 4

Huaquincunaca Diospaj mandashcacunataca mana utca pajtachijcunachu carca (Santiago 1:22). Cutin shujtajcunaca charijcunallatami alli tratajcuna carca (Santiago 2:1-3). Huaquincunacarin paicunapaj rimashcacunahuanmi shujtajcunata llaquichijcuna carca (Santiago 3:8-10). Paicuna chashna problemacunata charijpipish, “paicunaca mana nunca cambiangachu” ninapaj randica Santiagoca cꞌuyaihuanmi ayudarca. Shinallataj paicunataca pushaj ancianocunapaj ayudatapish mashcachunmi animarca (Santiago 5:13, 14). Bibliamanta yachacujcunapajca Biblia yachachishcacunata paicunapaj causaipi pajtachinaca maipica sinchichari ricuringa (Santiago 4:1-4). Paicunaca mana alli ruraicunata saquingapaj, ima costumbrecunata saquingapajca tiempotami minishtincuna. Chaimanta yachacujcunata imapi mejorachun ayudashunchij. Shinapish Jehová Diosllataj humilde gentecunata cambiachun ayudanatami yuyarina canchij (Santiago 4:10). w22.01 pág. 11 párrs. 11, 12

Jehová Diosca llaquij Diosmi can. Ñucanchij mañashcacunata Yayitu Dios uyachunca ñucanchijpishmi shujtajcunata llaquina canchij. Yayitu Dios ñucanchij mañashcacunata uyachunca ayudata minishticuj huauqui panicunata ayudangapajmi listos cana canchij. Bibliapica: “Imamantapish maijanta mana llaquishpa llaquichijtaca, paitapish mana llaquishpallataj llaquichishcami canga” ninmi (Santiago 2:13). Ñucanchijpish shujtajcuna ñucanchijta llaquichunmi minishtinchij. Chaimanta ñucanchijpish shujtajcunatami llaquina canchij. Ashtahuancarin shuj huauqui o pani arrepintirishpa congregacionman tigrajpimi paicunamanca cꞌuyaita ricuchina canchij. Bibliapimi Diosta sirvijcuna shujtajcunata llaquishcata, paicunata alli tratashcata yachai tucunchij. w21.10 pág. 12 párrs. 16, 17

Huañunapaj ashalla horascuna faltajpica Jesusca Getsemaní huertaman rishpami Yayitu Diosta mañarca. Dios imata munashcapipishmi yuyarca. Chaipica Jesusca paipaj discipulocunamanca Yayitu Diosta mañana imamanta importante cashcatami yachachirca. Paicunaca Getsemanimanca chaupi tutatami chayashcangacuna. Jesusca chaiman chayashpaca apostolcunataca “rijcharishca caichij” nishca huashaca paica Diosta mañanamanmi rirca (Mateo 26:37-39). Ña tigrashpaca paipaj apostolcuna dormicujtami japirca. Chaimi paica: “Llaquicunata mishangapaj chaparaichij, mañaraichij” nirca (Mateo 26:40, 41). Jesusca paipaj apostolcuna shaicushca cashcataca allimi yacharca. Pero paica ishqui cutinhuanmi Diosta mañanaman rirca. Cutin tigrashpaca paipaj apostolcuna dormicushcatami japirca (Mateo 26:42-45). w22.01 págs. 28, 29 párrs. 10, 11