Enero

¿Imamantataj Jehová Diosca Timoteomanca huaquin responsabilidadcunata mingarca? Timoteoca alli cualidadcunatami charirca (Filipenses 2:​19-22). Apóstol Pabloca Timoteo humilde, alli trabajaj, alli pajtachij cashcatami nirca. Timoteoca huauqui panicunamantami preocuparirca. Chaimi Pabloca Timoteota achcata cꞌuyarca, huaquin responsabilidadcunatapishmi mingarca. Ñucanchijpish alli cualidadcunata charijpica Jehová Diosca achcatami cꞌuyanga, huaquin responsabilidadcunatapishmi minganga (Salmo 25:9; 138:6). Imapi mejorana cashcata yachangapajmi Jehová Diosta mañana canchij. Shinallataj cashna nishpami tapuri tucunchij: “¿Ashtahuan cꞌuyaj canatachu minishtini? ¿Mana rato pꞌiñarijchu cani? ¿Shujtajcunata shungumanta perdonanata yachanichu?”. Ashtahuancarin shuj amigotami imapi mejorangapaj tapuna canchij. Ima cualidadcunata pajtachina cashcata cuentata cushpaca shuj shujta pajtachingapajmi esforzarina canchij (Proverbios 27:6). w22.04 pág. 23 párrs. 4, 5

Jehová Diosca ñucanchijcuna cushilla cachunmi munan. Chaimantami paipaj espíritu santota cushpa cushilla sintirichun ayudan (Gálatas 5:22). Pero cushilla sintiringapajca ñucanchij huauqui panicunatami ayudana canchij. Diosta sirvinapipishmi ocupados cana canchij (Hechos 20:35). ¿Imata rurashpataj cushilla sintirishun? Cai punllapaj versopica Apóstol Pabloca ishqui yuyaicunata pajtachichunmi yachachirca. Puntaca, cushilla sintiringapajca tucui pudishcahuanmi Jehová Diosta sirvina canchij. Chaitaca tucuicunami pajtachi tucunchij (Mateo 22:​36-38). Ishquipica, cushilla sintiringapajca shujtajcunahuanca mana compararinachu canchij. Tal vez ñucanchijca alli saludta charishpa o imata alli rurashpaca Jehová Diostami agradicina canchij. Cutin shujtaj huauqui panicuna Diosta sirvinapi ñucanchijta yalli imata alli rurajpica paicunamantami cushiyarina canchij. Chai huauqui panicunaca Jehová Diosta sirvinapimi ocuparincuna. w22.04 pág. 10 párrs. 1, 2

Panda religioncuna ñapish tucurishcamantami gentecunaca mancharingacuna, achca llaquicunapishchari tiyanga (Apocalipsis 18:​8-10). Pero Diosta sirvijcunaca panda religioncuna tucurishcamanta, ñalla alli causai tiyanata yachashcamantami dimastij cushilla sintirishun. Profeta Danielca: “Ima jatun yachaipish ashtahuanmi miranga” nircami. Chaimantami cai tiempopica profeciacunataca alli intindinchij (Daniel 12:​4, 9, 10). Cai profeciacuna ima shina pajtaricujta ricushpaca Jehová Diospi, Bibliapimi ashtahuan confianchij (Isaías 46:10; 55:11). Chaimantami ñucanchij feta sinchiyachishpa catina canchij. Chaipajca cada punllami Bibliata alli estudiana canchij, shujtajcunapish Diospajman cꞌuchuyachunmi ayudana canchij. Jehová Diospi tucui shunguhuan confiajpica paica ñucanchijtami cuidanga. Shungupipish tranquilo sintirichunmi ayudanga (Isaías 26:3). w22.07 págs. 6, 7 párrs. 16, 17

Apocalipsis libroca jahua pachapi Diospaj Gobierno ña mandacushcata, Diablotapish cai Allpaman shitashcatami huillan (Apocalipsis 12:​1-9). Cai tucushcacunaca jahua pachapi causajcunapajca allimi carca. Pero cai Allpapi causajcunapajca llaquimi cashca. ¿Imamanta? Diabloca cai Allpapi Diosta sirvijcunataca yallitaj pꞌiñashcamantami llaquichicun (Apocalipsis 12:​12, 15, 17). ¿Diablo llaquichicujpipish ima shinataj Diosta sirvishpa cati tucunchij? (Apocalipsis 13:10). Diosta sirvishpa catingapajca shamuj punllacunapi ima tucunatami yachana canchij. Apocalipsis libropica Diosta sirvijcunaca achca bendicioncunata chasquinata, cutin Diospaj contracunaca tucurina cashcatami parlan. Apocalipsis libropica Diospaj contracunataca huaquin señalcunahuan chꞌimbapurashcatami parlan (Apocalipsis 1:1). w22.05 págs. 8, 9 párrs. 1-3

Jehová Diosta sirvishpa catijpimi Jehovapaj contracunaca pꞌiñaringacuna. Chaimantami tucui allpa pachapi mandajcunaca Diosta sirvijcunata llaquichisha ningacuna. Bibliapica cai tandanacushca mandajcunataca Magog llajtata Mandaj Gog nishpami shutichin (Ezequiel 38:​14, 15). Diosta sirvijcunata contracuna llaquichisha nijpica Jehová Diosca achcatami pꞌiñaringa (Ezequiel 38:​18, 21-23). Apocalipsis capítulo 19-pica qꞌuipa ima tucuna cashcatami huillan. Jehová Diosca paita sirvijcunata difindingapaj, contracunatapish tucuchingapajca paipaj Churitami cachanga. Jahua pachapica Jesushuanmi achca soldadocuna tandanacunga. Chai soldadocunaca angelcunapish, 144.000 agllashcacunapishmi can (Apocalipsis 17:14; 19:​11-15). ¿Cai macanacuipica imataj tucunga? Millai gentecunapish, Diospaj contra organizacioncunapishmi tucuchishca canga (Apocalipsis 19:​19-21). w22.05 pág. 17 párrs. 9, 10

Adán y Eva juchapi urmashca huashaca Jehová Diosca tucuita allichinatami huillarca. Génesis 3:​15-pica ima shina tucuita allichinatami ñucanchijman huillan. Cunanca canhuan, huarmihuanca pꞌiñanacuipimi churani. Cambaj huahua huahuacunahuanpish, huarmipaj huahua huahuacunahuanpish pꞌiñanacuipimi churani. Huarmipaj huahua huahuapurami cantaca umapi sarunga. Canca chaqui talonllapimi chugrichingui. Génesis 3:​15-pi tiyaj profeciata alli intindishpaca tucui Bibliatami alli intindishun. Bibliapi tiyaj tucui librocunapish cai profeciamantami parlan. Caipi yuyashun. Ima shinami shuj libropaj tucui paginacunaca shuj shinalla can, chashnallatajmi Bibliapi tiyaj librocunapish shuj shinalla, shuj yuyaillamanta parlan. Génesis 3:​15-pipish, Bibliapi tiyaj shujtaj librocunapipish Diablota tucuchingapaj, paita catij millaicunatapish tucuchingapaj Jehová Dios shuj quishpichijta cachagrishcatami parlan. Caita yachashpaca Jehová Diosta cꞌuyajcunaca achcatami cushiyarinchij. Bibliata estudiashpami ima shina cai profecía pajtaricushcata, cai profeciamanta ima shina beneficiarishcata ricushun. w22.07 pág. 14 párrs. 1-3

Huahuacunaman Jehová Diosta cꞌuyachun yachachingapajca Dios cushca yachaitami minishtinguichij (Santiago 1:5). Jehová Diosmi valishca consejocunataca charin. ¿Imamanta? Paica unai unaita causashcamantami achca experienciata charij Yaya can (Salmo 36:9). Chaimantami paipaj consejocunaca ñucanchijtaca siempre ayudan (Isaías 48:17). Yaya mamacuna huahuacunaman alajata yachachichunca Jehová Diosca Bibliatapish, shujtaj ayudacunatapishmi cushca (Mateo 24:45). Por ejemplo, Rijchari nishca revistapi, jw.org paginapipish valishca consejocunami tiyan. JW.ORG paginapicarin huaquin videocunapi, entrevistacunapimi huahuacunata ima shina huiñachinata yachachin (Proverbios 2:​4, 5). w22.05 pág. 27 párrs. 4, 5

Jehová Dios shina perdonajca ni pi mana tiyanchu. Jehová Diosca ñucanchijta perdonangapajca listomi can. Shinallataj ñucanchij shunguta, ñucanchij yuyaitapish alli rijsishcamantami ñucanchijcuna arrepentidos cashcata ricui tucun. Ashtahuancarin Jehová Diosca perdonashpaca ñucanchij juchacunata ña mana cutin yuyaricunllachu. Chaimantami Diospaj ñaupajpi alli ricurishpa tranquilos sintiri tucunchij. Tucuicunami juchayujcuna canchij. Pero Perspicacia nishca libropi volumen 1, página 209-pica: “Juchayujcuna cashcamantami maipica cutin cutin pandarinchijlla. Pero Jehová Diosca ñucanchijta llaquishpami perdonan. Chaimanta maipica pandarishpapish mana llaqui llaquilla purinachu canchij (Salmo 103:​8-14; 130:3). Chaipaj randica Jehová Diosta sirvingapaj esforzaricushcamantami contentos sintirina canchij” ninmi (Filipenses 4:​4-6; 1 Juan 3:​19-22). w22.06 pág. 7 párrs. 18, 19

Huaquin huauqui panicunaca testigo de Jehová cashcata familiaman huillanatami ashtahuan manchancuna. Paicunaca paicunapaj familiata cꞌuyashcamantami paicunapish Diosta rijsichun, cꞌuyachun munancuna. Pero familiacuna Diosmanta, testigo de Jehovacunamanta mana alli parlajpica llaquillami sintirincuna. Shinapish tiempohuanca familiacunaca Yayitu Diostami sirvi tucuncuna. Pero ¿ñucanchij familia ñucanchijmanta caruyajpica imatashi rurashun? Salmo 27:​10-pi ima nishcata yachashpaca cushillami sintirinchij. Familiacuna ñucanchijmanta caruyajpipish Jehová Dios ñucanchijta cꞌuyashcata, bendicianata crishpaca tranquilosmi sintirishun. Jehová Diosca paita sirvishpa catichun, cushilla, alli cachunmi tucui ñucanchij ima minishtishcacunata cunga. w22.06 págs. 16, 17 párrs. 11-13

Jesús cai Allpapi cajpica paitaca contracunaca “yallitaj micuj, yallitaj ubyaj, Diablohuan caj, sábado punllatapish mana respetaj” nishpami yallitaj rimajcuna carca (Mateo 11:19; 26:65; Lucas 11:15; Juan 9:16). Jesusca paita rimajpipish mana chashnallataj cutichircachu. Ñucanchijtapish shujtajcuna pꞌiñarishpa mana alli rimajpica, Jesús shinallatajmi mana chashnallataj tratana canchij (1 Pedro 2:​22, 23). Maipica paicuna pꞌiñarishpa rimajpica paicunaman cꞌuyaita ricuchinaca sinchimi can (Santiago 3:2). ¿Cꞌuyaita ricuchingapajca imatataj rurai tucunchij? Predicacujpi maijanpish pꞌiñarishpa mana alli rimajpica, paicuna rimashcallapi mana yuyashpa saquirinachu canchij. Sam shuti huauquica: “Gentecuna Jehová Diosmanta yachanata minishtishcapi, paicunapish cambiai tucushcapimi yuyani” ninmi. Maipica huasiyujcuna imamanta pꞌiñarishca cashcataca mana yachanchijchu. Paica huasiyujcunaman cꞌuyaihuan, respetohuan, alli parlangapajca Jehová Diospaj ayudatami siempre mañan. w22.04 pág. 6 párrs. 8, 9

Yaya mamacunaca paicunapaj huahuacunaman Jehová Diosmanta yachachingapajmi paicunahuan Bibliamanta estudiana cancuna (2 Timoteo 3:​14-17). Shinapish yaya mamacunaca Diospaj rurashcacunata ricuchishpapish Yayitu Diosmantami yachachi tucuncuna. Proverbios libropica shuj yayaca paipaj huahuamanca Diospaj rurashcacunata yuyarishpami Dios ima shina cashcata yachachun animarca (Proverbios 3:​19-21). Yaya mamacuna, cancunapaj huahuacunahuan shuj campopi cashpa o parquepi cashpa Diospaj rurashcacunata ricushpami cushilla sintiringuichij ¿nachu? Chaimi cancunapaj huahuacunamanca Diospaj rurashcacunata ricuchishpa Yayitu Dios ima shina cashcata yachachi tucunguichij (Romanos 1:20). ¿Jesusca Diospaj rurashcacunamantaca ima shinataj yachachirca? Shuj cutinca paipaj discipulocunataca cuervocunata, lirio sisacunatapish ricuchunmi nirca (Lucas 12:​24, 27-30). ¿Chai cuervocunamanta, lirio sisacunamantaca Jesusca imatataj yachachisha nirca? Jehová Dios cuervocunaman micunata carashca shinallataj, sisacunatapish alajata churachishca shinallatajmi paipaj discipulocunatapish cuidanata yachachisha nirca. w23.03 págs. 20, 21 párrs. 1-4

Cai versopi ricushca shinaca Jesusmantami Yayitu Diosta mañai tucunchij. Jesuspaj shutipi mañajpica Jehová Diosca ñucanchij mañashcacunatami cutichin. Chaimantami Yayitu Diosta achcata agradicina canchij. Jesús ñucanchijmanta huañushcamantami Jehová Diosca ñucanchij juchacunata perdonan (Romanos 5:1). Bibliapica Jesusmanta parlashpaca: “Sacerdotecunata jatun mandajtami charinchij. Paica jahua pachapimi Jatun Diospaj jatun tiyarina alli ladopi tiyarishca” ninmi (Hebreos 8:1). 1 Juan 2:​1-pica: “Shuj ayudajtami charinchij. Paica Yaya Diospaj cꞌuchupi caj cashcata ruraj Jesucristomi” ninmi. Jesucristoca ñucanchijta llaquishpa ayudashcamanta, ñucanchijmantapish Diosta rogashcamantami cushilla sintirinchij. Jesús ñucanchijmanta mana huañushca cajpica, Jehová Diosta mana mañai tucunchijmanchu (Romanos 8:34; Hebreos 4:15). Cai tucuita intindishpaca Jehová Diostami paipaj cꞌuyashca Churita cushcamanta achcata agradicinchij. w22.07 pág. 23 párrs. 10-12

Confianalla gentecunaca paicuna ima nishcatami tucuita pajtachincuna. Ima llullacunatapish mana nincunachu (Salmo 15:4). Shujtajcunata ayudangapajpish listosmi cancuna. Ñucanchijpish paicuna layami casha ninchij. Cullquita ganangapajca sinchita trabajana, achca esfuerzomi minishtirin. Chai shinallatajmi shujtajcuna ñucanchijpi confiachunca alli cualidadcunata charina, sinchi esfuerzo minishtirin. Jehová Diosca siempremi tucuita pajtachin, chaimantami ñucanchijca paipi confiashcanchij (Salmo 33:4). Paica ñucanchijpish pai shinallataj cachunmi munan (Efesios 5:1). Diospaj pueblo ucupi cashcamantami cushilla sintirinchij. Caipica huauqui panicunapurami confianacunchij. Tucuicunami cꞌuyanacunchij. Pero tucuicuna ñucanchijpi confiachunca punllantami esforzarishpa catina canchij. Cꞌuyaita ricuchingapaj, humildadta charingapaj, alli yuyaiyujcuna cangapaj, honrados cangapaj, jarcarijcuna cangapaj esforzarishpaca caishuj chaishujpi confianacushpami Yayitu Diosta tandalla sirvishun. Chaimanta Yayitu Dios shina confianalla cangapaj esforzarishpa catishunchij. w22.09 págs. 8, 13 párrs. 1, 2, 17

Achca huauqui panicunata charishpapish maipica solollami sintirinchij. Huaquincunacarin depresión ungüita charishcamantami llaquilla, sololla sintirincuna. Pero ñucanchijta cꞌuyaj Jehová Diosca chashna llaquilla, sololla sintirichunca mana munanchu. Por ejemplo, Jehová Diosca Eliasta ayudangapajca pai ima shina sintirishcata huillachunmi paitaca ishqui cutin parlachun animarca (1 Reyes 19:​9, 13). Elías ima shina sintirishcata parlajpica Jehová Diosca allimi uyarca. Israel llajtapipish achcacuna Jehová Diosta adoracushcatami huillarca (1 Reyes 19:​11, 12, 18). Elías ima shina sintirishcata Jehová Diosman huillashpa, Dios imata nishcata uyashpaca cushilla, tranquilomi sintirishcanga. Ashtahuancarin Jehová Diosca Elías alli sintirichunmi huaquin ruraicunata pajtachichun mingarca. Eliasca Siria llajtata mandachunmi Hazael nishca runata agllana carca. Israel llajtata mandachunpish Jehú nishca runatami agllana carca. Eliseotapishmi profeta cachun agllana carca (1 Reyes 19:​15, 16). Qꞌuipaca Eliasca Eliseohuanca allimi apanacurca. w22.08 págs. 8-10 párrs. 3, 5

Tal vez canca shuj Tandanacuna Huasita shayachishpa o allichishpachari ayudarcangui. Chai Tandanacuna Huasita tucuchishpa, chaipi punta cutin tandanacuita charishpaca cushillami sintirircangui. Chaipica Jehová Dioshuan agradecido cashcamanta, dimastij cushilla cashcamantami cantanallatapish tal vez mana cantai tucurcangui. Cai Tandanacuna Huasicunaca Yayitu Diostami jatunyachin. Shinapish apóstol Pablo nishca shinaca chai Tandanacuna Huasi ucupi caishujmanta chaishujmanta sinchiyarinami ashtahuan importante can. Cai punllapaj versopi nishcataca ñucanchijpish apóstol Pablo shinami ñucanchij huauqui panicunatapish sinchiyachina canchij. Por ejemplo, apóstol Pabloca paicuna ima shina sintirishcatami alli intindij carca. Shinallataj apóstol Pablo caishujmanta chaishujmanta alli apanacuchun, Jehová Diospipish sinchi feta charichun yachachirca (1 Corintios 11:1). w22.08 pág. 20 párrs. 1, 2

Cunan punllacunapica Jesusta catijcunaca negociocunapica Dios munashca shinami honrados cana canchij. Allita rurajcunaca shujtajcunata llaquichijpica mana allimi sintirincuna. Imata decidingapajpish Dios mandashcacunatarajmi alli ricurancuna. Bibliapica: “Jehová Diosca allita rurajmi can” ninmi (Jeremías 50:7). Jehová Diosca allita ruraj cashcamanta, ñucanchijta rurashcamantami ima alli cashcata, ima mana alli cashcata decidi tucun (Proverbios 14:12; Isaías 55:​8, 9). Shinaca ¿ñucanchijpish Dios munashca shinachu allita rurai tucunchij? Ari, paiman rijchaj rurashca cashcamantami ñucanchijpish allicunata rurai tucunchij (Génesis 1:27). Chaicunata rurashpaca dimastij cushillami sintirinchij. Jehová Diosta cꞌuyashcamanta, respetashcamantami paita cazungapaj esforzarinchij (Efesios 5:1). w22.08 pág. 27 párrs. 5, 6

Preocupados o desanimados cashpaca chaicunata cungaringapajmi divirtirisha ninchij. Chaica allimi can, pero Jehová Dios mana munashcacunata ama rurangapajmi cuidarina canchij (Efesios 5:​10-12, 15, 16). Apóstol Pabloca Filipos llajtapi causaj huauqui panicunataca cashcata ruranacunapi, chuya cashcacunapi, cꞌuyaita ricuchina cashcacunapi, alli nishca cashcacunapi yuyachunmi animarca (Filipenses 4:8). Cai consejoca ñucanchijtapish alli diversioncunata agllachunmi ayudai tucun. Por ejemplo, apóstol Pablo nishca shinaca cashcata rurachun animaj librocunata, cꞌuyaita ricuchichun animaj video juegocunata, allita rurachun animaj peliculacunata, musicacunatapishmi agllana canchij. Chashnami Dios munashca shina causashun (Salmo 119:​1-3). w22.10 págs. 8, 9 párrs. 11, 12

Cashcata mana rurajcunamanta huaquincunaca manchanai millai cosascunata rurashpami causajcuna carca. Chaimantami Diospaj Gobiernoca Dios yachachishcacunamanta paicunaman yachachinga. Paicuna chaicunata cazujpica Yayitu Diosca paicunapaj shuticunataca causaita chasquinapaj libropimi quillcanga. ¿Cashcata mana rurajcunamanca picunataj yachachingacuna? Armagedonmanta quishpirishca achca gentecunapish, cashcata ruraj causarishcacunapishmi paicunamanca yachachingacuna. Cashcata mana rurajcunaca paicunapaj shuticuna causaita chasquinapaj libropi quillcashca cachunca, ¿imatataj rurana canga? Paicunaca Diospaj amigos cashpami Jehová Diosllata sirvina canga. Paicuna cambiashcata o mana cambiashcataca Jesuspish, ungidocunapishmi alli ricungacuna (Apocalipsis 20:4). Cashcata mana rurajcunamanta maijan mana cambiasha nijpica, 100 huatacunata charijpipish Jesusca paitaca chingachingami (Isaías 65:20). Jehová Diospish, Jesuspish gentecunapaj shungutaca allimi rijsincuna. Chaimantami Paraíso Allpapica shujtajcunata pi llaquichichunca mana saquingacuna (Isaías 11:9; 60:18; 65:25). w22.09 págs. 17, 18 párrs. 11, 12

Cai versopi nishca shinaca Jesusta catijcunaca autoridadcunata, gobiernocunatami cazuna canchij. Autoridadcunaca orden tiyachunmi huaquin leycunata churashcacuna. Huaquinpicarin hasta Diosta sirvijcunatapishmi difindincuna (Apocalipsis 12:16). Chaimantami Bibliapica autoridadcunaman impuestota pagachun, paicunata respetachun, cazuchun mandan (Romanos 13:7). Pero chai gobiernocunamanca Jehová Diosmi autoridadta cun. Chaimantami Jesucristoca mandaj Pilatotaca: “Dios canman autoridadta mana cushca cajpica ñuca contraca imata mana rurai tucunguimanchu” nirca (Juan 19:11). Cunan tiempopipish gobiernocuna, politicocunaca Jehová Dios saquijllapimi mandai tucuncuna. w22.10 págs. 13, 14 párr. 6

Jehová Diosca Davidmanca shuj alli mandaj mandacui horas sumaj causai tiyanatami quillcachirca. Chaitaca Davidca Salmo 37-pimi quillcarca (Salmo 37:​10, 11, 29). Ñucanchijcunaca Paraíso Allpamanta gentecunaman predicangapajca achca cutincunami Salmo 37:​11-ta liyinchij. Jesucristopish chai versollamantatajmi yachachirca. Paica chaipi tiyaj shimicuna shamuj punllacunapipish pajtarinatami ricuchirca (Mateo 5:5). Shinapish David imata quillcashcacunaca Salomón mandacui horaspipishmi pajtarirca. Chai tiempopica tucui Israel llajtapi causajcunaca alaja, sumaj causaita, achca micunacunatapishmi charircacuna (1 Crónicas 22:9; 29:​26-28). Jehová Diosca israelitacunataca: ‘Ñuca mandashcacunata huaquichishpa chaitataj rurana yuyailla tucushpa ruraichij. Chaita rurajpica ñucaca chai llajtapica sumaj causaitami cusha. Cancunaca pi mana manchachishcami dorminguichij’ nircami (Levítico 20:24; 26:​3, 6). Cai tucui shimicunaca Salomón mandacui tiempopimi pajtarirca. Pero shamuj punllacunapipishmi Salmo 37:​10, 11, 29-pi tiyaj shimicunaca pajtaringa. w22.12 pág. 10 párr. 8

Diosta sirvijcunaca Diospaj organización cushca instruccioncunatami pajtachina canchij. Bibliapica: “Jatun macanacuitapish alli yachashcahuanmi pushana. Achca alli yachajcuna yuyaita cushcami, macanacuitaca mishachin” ninmi (Proverbios 24:6). Cai versopi nishca shinaca imata rurangapajca alli yachajcuna yuyaita cuchunmi minishtinchij. Por ejemplo, ñucanchij munashca shina predicanapaj randica chasquishca instruccioncunatami pajtachina canchij. Tandanacuicunapi, conferenciacunapi o huauqui panicuna rurashca demostracioncunapimi ima shina predicanata, ima shina yachachinata yachai tucunchij. Diospaj organizacionca gentecunaman yachachingapajca achca publicacioncunata, videocunatapishmi cushca. Bibliapi valishca consejocuna tiyashcamantami Jehová Diostaca achcata agradicinchij. Chai consejocunata mana charishpaca llaquillami causanchijman. Chaimanta Diospaj yachaita chasquingapaj, chaita pajtachingapaj esforzarishunchij (Proverbios 3:​13-17). w22.10 pág. 23 párrs. 18, 19

Alli micunata micunaca Bibliata liyina shinami can. Pero chai micunamanta beneficiaringapajca micunata alli cashtushpami pasachina canchij. Chai micunata alli cashtushpa pasachicuj shinami Bibliamanta imata liyishcapipish, imata yachashcapipish cutin cutin yuyana canchij. Chaimantami Diospaj shimicuna ñucanchij shunguman chayachunca puntaca Jehová Diosta mañana canchij. Qꞌuipaca Bibliapica huaquin versocunatami liyina canchij. Chai huashaca imata liyishcapipish, imata yachashcapipishmi cutin cutin yuyana canchij. Chaita rurajpica Diospaj shimicunaca ñucanchij shungumanmi chayanga. ¿Imamantataj Bibliataca liyina canchij? ¿Liyishcapipish imamantataj yuyana canchij? Chaita rurashpaca Diospaj Gobiernomanta predicangapajmi fuerzasta charishun. Millai gentecuna tucurigrishcata ñalla huillangapajpishmi mana manchashun. Ashtahuancarin Jehová Dios cꞌuyaj, perdonaj, allita ruraj cashcapi cutin cutin yuyashpaca paipajmanmi ashtahuan cꞌuchuyashun. w22.11 págs. 6, 7 párrs. 16, 17

Jesús nishca shinaca shujtaj gentecuna ñucanchijcuna Jesusta catijcuna cashcata ricuchunmi ñucanchijpura cꞌuyaita ricuchinacushpa causana canchij. Congregacionpi cajcunaca cꞌuyaita ricuchinacushpami causancuna (1 Juan 1:8). Pero juchayujcuna cashcamantami maipica huauqui panicunapaj pandarishcacunata rato ricui tucunchijlla (Romanos 3:23). Huaquincunacarin chai pandarishcacunata ricushpaca Yayitu Diosta sirvinatami saquishcacuna. ¿Jesusca paipaj discipulocunamanca ima shinataj cꞌuyashcata ricuchirca? ¿Ñucapish Jesuspaj ejemplotaca ima shinataj cati tucuni? Ñucanchijpish chai tapuicunapimi yuyana canchij. Chai tapuicunamanta yachashpaca shujtajcuna pandarijpipish cꞌuyaita ricuchishpa catina cashcatami yachashun (Efesios 5:2). w23.03 págs. 26, 27 párrs. 2-4

Cai tucuri punllacuna quichquiyamucushcamantami maipica congregación ucupica jarcaicunata charinchij. Pero chai jarcaicunahuan chꞌimbapurangapajca alli yuyaiyujcunami cana canchij. Chaimanta shuj huauqui o shuj pani ñucanchijta llaquichijpica mana pꞌiñarishpalla, mana resintirishpalla saquirinachu canchij. Jehová Dios ñucanchijta corregijpipish pingarishpalla saquirinapaj randica, chai corregishcata chasquishpami cambiocunata rurana canchij. Diospaj organizacionpi cambiocuna tiyajpi, chai cambiocuna mana ñucanchij munashca laya cajpipish chaicunata tucui shunguhuan apoyangapajmi esforzarina canchij. Ima jarcaicuna ricurijpipish Jehová Diospi, paipaj organizacionpi confiashpa cati. Alli yuyaiyujcuna cashpaca mana pꞌiñarishpalla, mana resintirishpalla saquirishunchu. Ashtahuanpish Jehová Dios yuyashca shinami yuyashun. Jehová Diostapish ayudachunmi mañana cangui. Huauqui panicunamantapish manataj caruyanachu cangui. Caicunata rurajpica Diabloca Jehová Diosmanta, paipaj organizacionmantaca manataj caruyachi tucungachu (Santiago 4:7). w22.11 págs. 24, 25 párrs. 14-16

Ancianocunaca huauqui panicunataca llaquicunapaj allichirichunmi ayudana cancuna. Huauqui panicunaca llaqui horaspi quishpiringapaj, ancianocunahuan parlangapajpish imata rurana cashcatami yachana cancuna. Can causan ladopi ima llaqui tiyajpica ima shina ayudanatami ancianocunaman tapui tucungui. Tal vez canca llaquita charishca huauqui panicunata o chaipi ayudanaman shamuj huauqui panicunatami cambaj huasipi chasqui tucungui. Mana cashpaca congregacioncuna tandachishca micunacunata, shujtaj cosascunata repartishpami ayudai tucungui. ¿Cutin chai llaquicuna caru lugarpi tiyashca cajpica ima shinataj ayudai tucungui? Llaquita charishcacunamantami Jehová Diosta mañai tucungui. Paicunata ayudangapajpishmi congregacionpi cullquita churai tucungui (2 Corintios 1:​8-11; 8:​2-5). Llaqui tiyan lugarpi ayudanaman ri pudishpaca ancianocunahuanrajmi parlana cangui. Chaipi ayudachun invitajpica ima shina ayudanata, maipi ayudanatami huaquin instruccioncunata chasquingui. w22.12 págs. 24, 25 párrs. 8, 11, 12

Cai punllapaj versopi nishca shimicunaca Corintopi causaj huauqui panicunapajmi carca. Paicunapuramanta huaquincunaca huainayajcuna, cꞌaricunata munajcuna, machajcunami carca (1 Corintios 6:​9-11). Pero cai ungido huauqui panicunaca caicunata saquishpami bautizari tucurcacuna. Chashnapish juchayujcuna cashcamantami mana alli munaicunahuan maipica chꞌimbapurashpa catircacuna. Cunan punllacunapipish achca huauqui panicunaca ñucanchij charishca shinallataj tentacioncunata, mana alli munaicunatami mishashcacuna (1 Pedro 5:9). Caicunata ricushpaca ñucanchijpish mana alli munaicunata mishai tucushcatami cuentata cunchij. w23.01 pág. 12 párr. 15

Jesusca paipaj discipulocunapish chashna laya llaquicunata charigrishcataca allimi yacharca. Chaimantami Jehová Diostaca paicunata cuidachun mañarca (Juan 17:11). Jehová Dios ñucanchijtapish cuidacushcata yachashcamantami mana manchaj cai tucunchij. Jehová Diosca ñucanchijpaj contracunata yalli achca podertami charin (1 Juan 4:4). Paica ñucanchijmantami achcata preocuparicun. Chaimantami paillataj ñucanchijta manchaita mishachun ayudanga. ¿Canpish manchashcamantachu escuelapi o trabajopi Jehová Diosta sirvicushcata manaraj huillashcangui? ¿O gentecunata manchashcamantachu publicador canata o bautizarinata manaraj decidishcangui? Chashna manchashpaca Jehová Diosta fuerzasta cuchunmi mañana cangui. Pai cambaj mañashcacunata ima shina cutichijta ricushpaca mana manchashpami allicunata ruranata decidingui (Isaías 41:​10, 13). w23.01 pág. 30 párrs. 12, 14

Fariseocunaca mana humildadhuan Bibliata liyijcunachu carca. Ashtahuanpish paicunaca criticashpallami pasajcuna carca (Mateo 12:​1-7). Shuj punllaca fariseocunaca Jesuspaj discipulocuna sábado punllapaj leyta mana caticushcatami nircacuna. Chaimi Jesusca “¿Davidhuan, sacerdotecunahuan ima tucushcata Bibliapi nachu liyishcanguichij?” nishpa tapurca. Oseas libropi tiyaj shuj versomantapishmi parlarca. Chashnami Jesusca fariseocuna Diospaj Leytapish mana intindishcata, shujtajcunatapish cꞌuyaita mana ricuchishcata intindichirca. Cai runacunaca jatun tucushcamantami Biblia ima nishcacunataca mana intindircacuna, paicunapaj causaipipish mana pajtachircacuna (Mateo 23:23; Juan 5:​39, 40). Fariseocunaca Jehová Dios punta cꞌarita, punta huarmita rurashcata, cazarachishcatapishmi alli yacharcacuna. Shinapish paicunaca shuj cꞌari paipaj huarmimanta imamantapish divorciari tucushcatami yuyajcuna carca. Chaimantami Jesusca Mateo 19:4 al 6-pica: ‘¿Jehová Dios punta cꞌarita, punta huarmita cazarachishpa shuj aichalla tucushcataca manachu liyishcanguichij?’ nishpa tapurca. Fariseocuna shinaca ama cashunchij. Ashtahuanpish Jesús yachachishca shina humildadhuan Bibliata liyishunchij. Chashnami Yayitu Dios ñucanchijta yachachichun saquishun. w23.02 págs. 12, 13 párrs. 12, 13

Huasipi cashpa, trabajopi cashpa accidentecunata ama charichunmi Jehová Diosca israelitacunamanca Leycunata curca (Éxodo 21:​28, 29; Deuteronomio 22:8). Por ejemplo, maijan israelita mana munashcahuan pita huañuchishpapish achca llaquicunatami charina carca (Deuteronomio 19:​4, 5). Cutin manaraj huacharishca huahuata huañuchijpica Yayitu Diosca huañuchijta castigachunmi mandarca (Éxodo 21:​22, 23). Caicunata ricushpami Yayitu Diosca accidentecunamanta cuidarichun munashcata yachanchij. Ñucanchij huasipi o trabajopi accidentecunata ama charingapajca, imata rurana cashcatami alli ricuna canchij. Filojlla cosascunata charishpa, productos quimicocunata charishpa, medicamentocunatapish charishpaca huahuacuna ama japinalla pushtupimi huaquichina canchij. Chaicunata shitasha nishpaca alli asegurashpami shitana canchij. Shinallataj ninahuan, cocinapi tꞌimbucujcunahuan, enchufleyuj aparatocunahuanpishmi cuidadota charina canchij. Chaicunata utilizacushpaca chaupipi saquishpa, shujtaj cosascunata ruranamanca mana rinallachu canchij. Ashtahuanpish ima medicamentota ubyashca cashpa, tragota ubyashca cashpa o mana alli dormishca cashpaca carrota mana manejanachu canchij. Manejacui horaspipish telefonotaca mana maquipi charinachu canchij. w23.02 págs. 21-23 párrs. 7-9

Jehová Diosca paciente, cꞌuyaj, ñucanchijta alli intindij, ñucanchij alli ruraicunatapish valichijmi can (Salmo 130:3). Paica ñucanchij mana rurai tucushcata rurachunpish mana mañanchu. Jehová Diosca ñucanchijcuna Bibliata alli estudiai tucushcata yachashcamantami estudiachun nin. Paica ñucanchij cerebrota ruracushpaca ñucanchijllataj yachana munaita charichunmi rurarca (Salmo 139:14). Paica paimanta yachashpa cushilla sintirichunmi munan. Caita intindishpaca cunanmantami Bibliata yachana munaita charingapaj esforzarina canchij (1 Pedro 2:2). ¿Chai munaita charingapajca imatataj rurai tucungui? Chaipajca can imata rurai pudishcata pajtachingapajmi esforzarina cangui. Bibliata liyingapaj, estudiangapajpishmi punllanta esforzarina cangui (Josué 1:8). Caita pajtachijpica Jehová Diosllatajmi cushicuihuan Bibliata liyichun, imata liyishcapipish yuyachun ayudanga. Ñucanchijca yachashpallaca mana saquirinachu canchij. Chaipaj randica Jehová Diosta ashtahuan rijsingapaj, paita cꞌuyangapaj, paipi feta churangapajmi esforzarisha ninchij (1 Corintios 8:​1-3). Jehová Diosmanta ashtahuan yachashpaca cambaj feta sinchiyachichun Diosta mañai (Lucas 17:5). Chashna mañajpica paimi canta ayudanga. w23.03 pág. 10 párrs. 11, 13

Jesuspaj discipulocunaca Jerusalén tucuringacamaca mana maqui cruzashca saquirircacunachu. Ashtahuanpish paicunaca Jesús ima mandashcatami pajtachircacuna. Jesusca paicunataca: “Jerusalenpi, tucui Judeapi, Samariapi, cai allpapi tiyaj caru llajtacunapipish ñucamanta huillanguichij” nishpami mandarca (Hechos 1:​6-8). Tiempota alli aprovechangapajca paicunaca alli huillaicunata huillanallapimi empeñarina carcacuna. Eclesiastés 9:​11-pica: ‘Mana yuyashcapimi ima llaquipish japi tucunlla’ ninmi. Ñucanchijcunaca ima horas ungunata, ima horas huañunataca mana yachanchijchu. Caicunata mana yachashcamantami alli yuyashpa ñucanchij tiempotaca alli aprovechana canchij. Cai tucuri punllacuna manaraj tucurijpiraj, huañui manaraj japijpiraj tiempota alli aprovechashunchij. Tiempota alli aprovechangapajca Jehová Diospaj munaitami pajtachina canchij. Paihuan alli apanacungapajpishmi esforzarina canchij (Juan 14:21). Ñucanchijcunaca 1 Corintios 15:​58-pi ima nishcatami pajtachina canchij. Chaipica: “Sinchiyarishpa catichij, imapish cuyuchichunca ama saquichijchu. Amitopajta ruranapi siempre ocupado caichij” ninmi. Caicunata pajtachishpaca “Jehová Diospajtaca imata mana rurai tucushcanichu” nishpaca mana llaquirishunchu (Mateo 24:13; Romanos 14:8). w23.02 págs. 18, 19 párrs. 12-14