Febrero

¿Jesús shina cꞌuyaita ricuchingapajca Jesuspaj discipulocunaca imatataj rurana can? Jesús shinallataj shujtajcunata cꞌuyashcamantami paicunamantapish huañungapaj listos cana can. Chashna laya cꞌuyaitaca mana tucuicunachu ricuchi tucuncuna. Ashtahuanpish Jesusta alli catijcunallami chashna cꞌuyanacuncuna. Bibliapica cꞌuyaita ricuchina valishca cashcatami yachachin. Por ejemplo, 1 Juan 4:​8-pica: “Diosca cꞌuyaimi” ninmi. Mateo 22:​39-pipish: “Can quiquin cꞌuyarij shinallataj shujtajcunatapish cꞌuyangui” ninmi. 1 Pedro 4:​8-pipish: “Cꞌuyaita charijca achca juchacunata perdonangapajmi listo can” ninmi. 1 Corintios 13:​8-pipish: “Cꞌuyaica manataj tucuringachu” ninmi. Cashna cꞌuyaimanta parlaj versocunataca achcacunami munancuna. Chaimantami ñucanchijpish cꞌuyaita ricuchishpa catingapaj esforzarishpa catina canchij. Jehová Diosca dimastij cꞌuyaj cashcamantami Jesusta alli catijcunaman pai shina cꞌuyanacuchun yachachi tucun. Jesusta alli catijcunallami Diospaj espíritu santota chasquishcamanta, Diospaj bendicionta chasquishcamantaca Jesús yachachishca cꞌuyaita ricuchinacuncuna (1 Juan 4:7). Jesús nishca shinaca achca gentecunaca Testigocuna cꞌuyanacujta ricushpami paicuna Jesusta catijcuna cashcata yachaj chayashcacuna. w23.03 págs. 27, 28 párrs. 5-8

Ñucanchijca tal vez ashtahuan alli perdonajchari casha ninchij. Chaipajca Bibliapimi huaquincunaca perdonashcata, cutin shujtajcunaca mana perdonashcata yachai tucunchij. Por ejemplo, Jesusca shujtajcunataca shungumantami perdonaj carca (Lucas 7:47). Paica shujtajcunapaj pandarishcacunallata ricunapaj randica, paicunapaj alli ruraicunatami valorarca. Cutin fariseocunaca humilde gentecunatami pꞌiñajcuna carca (Lucas 18:9). Paicunamanta yachashca huashaca cashna nishpami tapurina canchij: “¿Shujtajcunamantaca imatataj yuyani? ¿Paicunapaj alli cualidadcunatachu valorani?”. Callaripi pi ñucanchijta llaquichijpica paita perdonanaca sinchichari canga. Chashna cajpica paipaj alli cualidadcunatami shuj listapi anotai tucunchij. Chai huashaca cashna nishpami tapurina canchij: “¿Jesusca paimantaca imatashi yuyan? ¿Paitaca perdonanmanchu?”. Chashna Bibliamanta yachashpa, yuyarishpaca shujtajcunataca shungumantami perdonashun. w22.04 págs. 23, 24 párr. 6

Apocalipsis libropica Diospaj contracunataca yallitaj jiru animalcunahuanmi chꞌimbapuran. Por ejemplo, Apocalipsis 13:​1-pica mama cucha chaupimanta canchis umacunayuj, chunga gachucunayuj animal llujshicujtami parlan. Chai qꞌuipaca shujtaj manchanai millai animal Allpamanta llujshicujtami huillan. Chai animalca dragón layami riman. Paica cielomantami allpa pachaman ninata tamyachin (Apocalipsis 13:​11-13). Shinallataj chai huashaca pucanicuj jatun animalpi shuj huarmi tiyacujtami parlan. Cai quimsa jiru animalcunaca Diospaj contracunatami ricuchin. Paicunaca ñaupa tiempomanta cunancamami Jehová Diospaj, paipaj Gobiernopaj contra tucushcacuna. Chaimantami paicuna picuna cashcata yachanaca importante can (Apocalipsis 17:​1, 3). Diospaj contracuna picuna cashcata, cai señalcuna imata nisha nishcata yachangapajca Bibliatami alli estudiana canchij. Apocalipsis libropi señalcunataca Bibliapaj shujtaj librocunahuanmi alli intindi pudinchij. w22.05 págs. 8, 9 párrs. 3, 4

Huaquin huauqui panicunaca mayorlla cashcamanta o ungushca cashcamantami Jehová Diostaca paicuna munashca shina ña mana sirvi tucuncuna. Ñucanchij munashca shina Jehová Diosta mana sirvi tucushpaca cashna nishpa tapurishunchij: “¿Jehová Diosca imata rurachuntaj munan?”. Paica tucui pudishcahuan paita sirvichunmi munan. Cai catij ejemplopi yuyashunchij. Shuj panica 40 huatacunata charishpami tucui pudishcahuan Jehová Diosta sirvirca. Pero ña 80 huatacunata charishpa, pai munashca shina mana sirvi tucushcamantami desanimarishca sintirin. Paica: “Ñaupa laya Diosta mana sirvi tucushcamantami cunanca Jehová Diosca ñucata mana valichinga” nishpami yuyan. Pero ¿chaica ciertochu canga? Mana. Cai panica 40 huatacunata charishpapish, 80 huatacunata charishpapish tucui pudishcahuanmi Jehová Diosta sirvishpa catishca. Chaimi Jehová Diosca paitaca achcata valoran. Ñucanchijpish tucui pudishcahuan Jehová Diosta sirvishpa catijpica Jehová Diosca ñucanchijtaca: “Allitami ruracungui” nishpami valoranga (Mateo 25:​20-23-ta ricui). Yayitu Diosta cushilla sirvingapajca imata mana rurai tucushcapi mana yuyanachu canchij. Ashtahuanpish imata rurai pudishcata pajtachingapajmi esforzarina canchij. w22.04 págs. 10, 11 párrs. 2, 4, 6

Apocalipsis capítulo 21-pica 144.000 agllashca ungidocunataca cielopi caj shuj sumaj llajtahuanmi chꞌimbapuran. Cai llajtaca mushuj Jerusalenmi can. Chai llajtaca “12 callari rumicuna jahuapimi shayachishca carca. Chai rumicunapica Malta Ovejapaj 12 apostolcunapaj 12 shuticunami quillcashca carca” (Apocalipsis 21:​10-14; Efesios 2:20). Cai llajtaca mana shujtaj llajtacuna shinachu can. Cai llajtapaj ñanca orollahuanmi rurashca can. Llajtapaj 12 pungucunapish 12 perlacunami can. Muyundij pircaca sumaj rumicunahuan rurashcami can. Tucuimi alli alli medishca can (Apocalipsis 21:​15-21). Chashna jahuapish Juanca ima illashcatami cuentata curca. Juanca: ‘Chai llajtapica Diospaj templotaca maipi mana ricurcanichu. Ashtahuanpish Tucui poderta charij Jehová Dios, Malta Ovejapishmi chai llajtapaj temploca. Chai llajtaca intipish, lunapish achijyachichunca mana minishtinchu. Diospaj sumaj achijnicujmi llajtataca achijyachin. Llajtapaj lamparapish Malta Ovejami can’ nircami (Apocalipsis 21:​22, 23). Chaica 144.000 agllashca ungidocuna Jehová Diosllahuantaj canatami nisha nin (Hebreos 7:27; Apocalipsis 22:​3, 4). w22.05 págs. 17, 18 párrs. 14, 15

Jehová Dios ñucanchijta Ruraj, mandashcacunata cuj, alli Juez cashpapish ñucanchijta achcata cꞌuyaj Yayami can (Salmo 100:3; Isaías 33:22). Chaimantami shungumanta arrepintirijpica paica perdonasha nin (Salmo 86:5). Jehová Diosca: “Cancunapaj juchacuna amsa puca cajpipish, rasu shina yurajllata yurajyachishcami canga” nircami (Isaías 1:18). Caita yachashpami tranquilos sintirinchij. Tucuicuna juchayuj cashcamantami maipica shujtajcunata llaquichinchij (Santiago 3:2). Chaimantami shujtajcunahuan alli apanacungapajca shungumanta perdonanata yachana canchij (Proverbios 17:9; 19:11; Mateo 18:​21, 22). Jehová Diosca shujtajcunata perdonachunmi munan. Ima shinami Jehová Dios ñucanchijta shungumanta perdonan, chashnallatajmi ñucanchijpish shujtajcunata perdonana canchij (Isaías 55:7). w22.06 pág. 8 párrs. 1, 2

Shujtajcunahuan mana compararina cashpapish paicunapaj alli ejemplomantami yachana canchij. Jesuspaj ejemplopi yuyashunchij. Ñucanchijca juchayujcuna cashpapish Jesuspaj alli cualidadcunamanta, paipaj ruraicunamantami yachana canchij (1 Pedro 2:21). Paipaj alli ejemplota catishpaca Diosta alli sirvijcunami cashun. Bibliapica Diosta alli sirvijcunamantami parlan. Paicunapaj alli ejemplomantapishmi yachai tucunchij. Rey Davidpi yuyashun. Diosca Davidmanta parlashpaca: “Paica ñuca shungu munashca shina cazujmi” nircami (Hechos 13:22). Shinapish Davidca huaquin juchacunapimi urmarca. Chashnapish paica alli ejemplotami ñucanchijman saquirca. ¿Imamantataj chashna ninchij? Paica mana quejarishpami correccionta chasquirca. Juchacunapi urmashcamantapish shungumantami arrepintirirca. Chaimantami Diosca Davidta perdonarca (Salmo 51:​3, 4, 10-12). w22.04 pág. 13 párrs. 11, 12

Huañuica shuj enemigo shinami achcata llaquichin (1 Corintios 15:​25, 26). Ñucanchij familia ungushca cajpi o ñucanchijllataj ungushca cashpaca huañunatami manchanchij. Pero ¿imamantataj huañunataca manchanchij? Jehová Diosca ñucanchijtaca huiñaipaj causachunmi rurarca. Chaimantami huañunata manchanchij (Eclesiastés 3:11). Mana huañusha nishcamantami alli alimentarinchij, ejerciciotapish ruranchij, alli cuidarinchij, doctorpajman rinchij, minishtishpaca jambicunatapishmi ubyanchij. Diabloca ñucanchij mana huañusha nishcataca allimi yachan. Paica: “Cancunaca mana huañusha nishpami Diosta sirvinata saquinguichij” nishpami juchachin (Job 2:5). Chaimantami Diabloca huañunata manchashpa Diosta sirvinata saquichun munan (Hebreos 2:​14, 15). w22.06 pág. 18 párrs. 15, 16

Contracuna llaquichi horasca tal vez uchilla grupocunallapimi tandanacui tucushun. Chaimantami ñucanchij huauqui panicunahuan alli apanacungapaj esforzarina canchij. Chaipajca caishuj chaishujhuan perdonanacushunchij. Shujtajcunatapish ñucanchijraj ayudashunchij. Chashnami Diablota mishashun (Proverbios 19:11; Tito 3:14). Huauqui panicunaca ungushca panita ayudashcamantami tucuicuna shuj familia shina ashtahuan alli apanacui tucurcacuna (Salmo 133:1). Autoridadcuna chꞌican chꞌican jarcaicunata churajpipish, achca huaranga huauqui panicunaca Jehová Diosta sirvishpami caticuncuna. Chashna Diosta sirvicushcamantami huaquincuna carcelpi cancuna. Chaimi paicunamanta, paicunapaj familiacunamanta Jehová Diosta mañana canchij. Shujtaj huauqui panicunaca autoridadcunapaj ñaupajpimi carcelpi caj huauqui panicunata mana manchashpa difindincuna. Shinallataj paicunaca cai huauqui panicunamanmi minishtishca cosascunatapish cuncuna. Sinchi feta charichunpishmi ayudancuna. Cai huauqui panicunamantapishmi Diosta mañana canchij (Colosenses 4:​3, 18). Chashna tucui shunguhuan mañashpa catijpica Jehová Diosca paicunatami ayudanga (2 Tesalonicenses 3:​1, 2; 1 Timoteo 2:​1, 2). w22.12 págs. 26, 27 párrs. 15, 16

Huahuacunaca imata ricushcatami rurancuna. Chaimantami yaya mamacunaca juchayujcuna cashpapish huahuacunapajca alli ejemplo cana can (Romanos 3:23). Shuj yayaca: “Ima shinami shuj esponjaca yacuta tucui chupan. Chashnallatajmi huahuacunaca tucui ima ricushcata rurancuna. Yaya mamacuna paicuna imata yachachishcata mana pajtachijpica huahuacunaca cuentata cuncunami. Chaimi huahuacunapish chaitaca mana rurangacuna” ninmi. Chaimantami yaya mamacunaca huahuacuna Jehová Diosta cꞌuyachunca paicunaraj Jehová Diosta cꞌuyashcata ricuchina can. Yaya mamacuna huahuacunaman ima shina alli ejemplota cui tucushcata ricushunchij. 17 huatacunata charij huauqui Andrewca: “Ñuca yaya mamaca Yayitu Diosta mañana importante cashcatami yachachirca. Cada tutapica Diosta ñuca ña mañashca cajpipish ñuca yayaca ñucahuanmi siempre Jehová Diosta mañaj carca. Chaimantami Jehová Diosta mañashpaca cushilla sintirini. Jehová Dios ñucata cꞌuyaj Yaya cashcataca allimi intindini” ninmi. Yaya mamacuna, cancuna Jehová Diosta cꞌuyajpimi cancunapaj huahuacunapish Diosta cꞌuyangacuna. w22.05 págs. 27, 28 párrs. 7, 8

Manaraj bautizarishpaca ñucanchij juchacunamantami shungumanta arrepintirina canchij (Hechos 2:​37, 38). Shungumanta arrepintirishcata ricuchingapajca chai juchacunallapitaj ña mana cutin tigra urmanachu canchij. Por ejemplo, Jehová Dios mana munashcacunata, huainayanata, tabacota fumanata, millai shimicunata parlanatapishmi saquina cangui (1 Corintios 6:​9, 10; 2 Corintios 7:1; Efesios 4:29). Chaicunata saquingapajmi esforzarishpa catina cangui. Shinallataj Bibliamanta yachachijta, ancianocunatapishmi canta ayudachun mañai tucungui. Can jovenraj cashpa, cambaj yaya mamahuan causacushpaca mana allicunata mishangapaj ayudachunmi paicunata mañai tucungui. Cunanmantami Yayitu Diosta sirvinata punta lugarpi churana cangui. Por ejemplo, tandanacuicunaman rinata, chaipi participanatapish mana saquinachu cangui (Hebreos 10:​24, 25). Publicador tucushpacarin predicanatapish mana saquinachu cangui. w23.03 págs. 11, 12 párrs. 14-16

Génesis 3:​14, 15-pica shuj culebramanta, chai culebrapaj huahua huahuacunamantapishmi parlan. Caipi parlashca culebraca mana shuj animalchu carca. Shuj culebraca Jehová Dios ima nishcataca mana intindi pudinchu. Apocalipsis 12:​9-pi nishca shinaca chai culebraca Diablomi can. Bibliapica Diablo shina millai gentecunataca Diablopaj huahuacunami can ninmi. Diablopaj huahuacuna o culebrapaj huahuacunaca pai shinami Diospaj contracuna, Diospaj pueblopaj contracuna can. Paicunaca Diosta mana cazuj angelcuna, millai gentecunapishmi can (Génesis 6:​1, 2; Juan 8:44; 1 Juan 5:19; Judas 6). w22.07 págs. 14, 15 párrs. 4, 5

Apóstol Pabloca achca llaquicunatami charirca. Chaimantami huauqui panicunata alli intindishpa paicunamanca cꞌuyaita ricuchirca. Por ejemplo, shuj punllaca apóstol Pabloca cullqui illajmi saquirirca (Hechos 20:34). Chaimantami paipajpish, paipaj compañerocunapajpish trabajana carca. Apóstol Pabloca carpa huasicunata rurashpami trabajaj carca. Chaimi Corinto llajtaman chayashpaca Aquilahuan, Priscilahuan carpacunata rurashpa trabajai callarirca. Chashna sinchita trabajashpapish tucui sabadocunami judiocunaman, griegocunaman sinagogapi yachachij carca. Pero Silaspish, Timoteopish chayashpaca Pabloca Diospaj Shimitami ashtahuan huillai callarirca (Hechos 18:​2-5). Caipi ricushca shinaca Pablopajca Diosta sirvinami tucuimanta yalli importante carca. Chaimantami Pabloca huauqui panicunatapish Diosta sirvinata punta lugarpi churachun consejarca. Familiata mantinina cashpapish trabajollapi ama pasachunmi animarca. w22.08 págs. 20, 21 párr. 3

Jehová Diosca muyundij Allpapi paipaj Gobiernomanta predicachunmi munan (1 Timoteo 2:​3, 4). Diospaj Gobiernomanta predicanaca valishcami can. Chaimantami Jehová Diosca predicacionta pushachunca paipaj cꞌuyashca Churiman mingashca. Jesús ñucanchijta pushacushcamantami alli predicai tucunchij. Cai millai mundo manaraj tucurijpimi Dios mingashcataca cabalta pajtachicushun (Mateo 24:14). ¿Imamantataj chashna ninchij? Paica manaraj jahua pachaman rishpami Galileapi tiyaj shuj urcupi paipaj discipulocunahuan cashpaca: “Diosmi jahua pachatapish, cai pachatapish mandangapaj poderta ñucaman cushca. Chaimanta tucui llajtacunapi causaj gentecunapajman rishpa ñucata catijcuna tucuchun yachachigrichij” nirca (Mateo 28:​18, 19). Caipi nishca shinaca Jesusca predicacionta pushangapajmi autoridadta chasquirca. Caipi ricushca shinaca Jesusca cunan punllacunapipish gentecunaman predicachunmi ñaupajman pushacun. w22.07 págs. 8, 9 párrs. 1, 3, 4

Manaraj huañushpa allita rurajcunapaj shuticunaca causaita chasquinapaj libropimi ña quillcashca can. Chaimantami paicunaca huiñai causaita chasquingapaj causaringacuna. Juan 5:​29-pi, Hechos 24:​15-pipish allita rurajcuna huiñai causaita chasquingapaj causarinatami parlan. Romanos 6:​7-pica: “Maijanpish huañushpaca paipaj juchamanta perdonashcami can” ninmi. Shinaca allita rurajcuna huañushpaca paicunapaj juchacunamantami ña perdonashca can. Pero paicuna allita rurashcataca Jehová Diosca manataj cungarinchu (Hebreos 6:10). Shinapish allita rurajcuna causarishpaca, paicunapaj shuticuna causaita chasquingapaj libropi quillcashca saquirichunmi allita rurashpa catina canga. w22.09 pág. 18 párrs. 13, 15

Profeta Danieltaca Babilonia llajtamanmi prezu aparcacuna. Shinapish Danielca tiempohuanca confianalla, alli runa cashcatami ricuchirca. Shuj cutinca Diospaj ayudahuanmi Nabucodonosorpaj muscushcacuna ima nisha nishcata huillarca (Daniel 4:​20-22, 25). Achca huatacuna huashapish Babilonia llajtapica reypaj huasipimi shuj pata quinripi shuj maqui quillcashca ricurirca. Chai quillcashca ima nisha nishcatami chaitataj Danielca huillarca (Daniel 5:​5, 25-29). Qꞌuipacarin Medo llajtamanta rey Dariopish, paita ayudajcunapish Daniel yalli yachaj cashcata, allita ruraj cashcatami cuentata curcacuna (Daniel 6:​3, 4). Chaimantami: “¿Ñucamantaca confianalla, tucuita pajtachij cashcatachu yuyancuna?” nishpa tapurina canchij. Confianalla, tucuita alli pajtachijcuna cashcata ricuchishpaca Jehová Diostami jatunyachishun. w22.09 págs. 8, 9 párrs. 2-4

Dios mandashcacunata cazushpaca cushilla, allimi causashun. Caita alli intindingapajca cai catij ejemplocunapi yuyashun. Carreteracunapi accidentecuna ama tiyachunca leyes de transitotami churashcacuna. Pero maipica chai leycunata mana catishcamantami accidentecuna tiyashca. Shinallataj doctorcunaca ungushcacunata alli atindingapajmi huaquin leycunata, instruccioncunata catina cancuna. Chaicunata mana catijpica ungushcacunaca huañuncunamanmi. Cai ejemplocunapi ricushca shinaca leycunata, mandashcacunata cazunaca valishcami can. Chaimantami ñucanchijpish Dios cushca mandashcacunataca cazuna canchij. Jehová Diosca pai mandashcacunata cazujcunatami achcata bendician. Paica: “Cashcata rurajcunallami Dios cusha nishca llajtata japingacuna. Tucui causaipimi chai llajtapi causangacuna” ninmi (Salmo 37:29). Cai Allpapi tucui gentecuna Dios mandashca shina allita rurashpaca sumajta cushillami causashun. Jehová Diosca canpish cai bendicioncunata chasquichunmi munan. Chaimantami allicunata rurashpa catingapaj esforzarina cangui. w22.08 págs. 27, 28 párrs. 6-8

Llaquicunata chari horasmi Diabloca Jehová Diosmanta, paipaj organizacionmanta caruyachisha nin. Pero ¿Diablo ñucanchijta ama pandachichunca imatataj rurana canchij? Ñucanchijca alli yuyaiyujcuna, rijcharishca, crishcapi sinchimi cana canchij. Alli yuyaiyujcuna cashpaca mana rato pꞌiñarishunchu, resintirishca, llaquillapish mana saquirishunchu. Jehová Dios yuyashca shina yuyangapajpishmi esforzarishun. ¿Maijan pani o shuj ancianoca cantachu llaquichishca? Tal vez chai huauquica cantaca mana llaquichisha nishcangachu (Romanos 3:23; Santiago 3:2). Pero canta llaquichishcamantami canca tal vez pꞌiñarircangui. Chai huauqui o pani chashna comportarijta ricushpaca “¿ciertochu cai organizacionca Diospaj can?” nishpachari tapurircangui. Diablomi chashna dudacunata charichun munan (2 Corintios 2:11). Pero chashna yuyashpaca Jehová Diosmanta, paipaj organizacionmantapishmi caruyangui. Chaimanta shuj huauqui o shuj pani canta llaquichijpica ama resentido saquirichu. w22.11 págs. 20, 21 párrs. 1, 3, 4

Jehová Diosca para siempre causana esperanzatami ñucanchijman cushca. Huaquincunaca espiritucuna shina jahua pachapi causana esperanzatami charincuna (1 Corintios 15:​50, 53). Cutin achcacunaca cai Allpapi nanaicuna illaj cushilla causana esperanzatami charincuna (Apocalipsis 21:​3, 4). Cai Allpapi o jahua pachapi causana esperanzata charishpapish tucuicunami shungumanta Diosta pagui ninchij. Jehová Diosca paipaj nishcacunataca siempremi pajtachin. Shamuj punllacunapipish pai cusha nishcacunataca tucuitami pajtachinga (Números 23:19; Romanos 15:13). Y chaicunata pajtachingapajmi poderta charin. Chai nishcacunaca Jehová Diosmanta shamushcamantami de verastaj pajtarinataca seguros canchij. Jehová Diosca ñucanchijtami cꞌuyan y paipi confiachunmi munan. Dios cusha nishcacunata japina yuyailla cashpaca, ima llaquicuna shamujpipish chaicunatami ahuantai tucushun. Chaicunata ahuantashcata ricushpaca cushillami sintirishun. w22.10 pág. 24 párrs. 1-3

Israelitacuna mana cazushcamantami Isaiasca paicuna llaquipi urmachun Jehová Dios saquigrishcata huillarca (Isaías 30:​5, 17; Jeremías 25:​8-11). Y chaica pajtarircami. Babiloniocunaca judiocunatami esclavocunata shina aparcacuna (Isaías 30:​18, 19). Pero huaquin judiocunaca Diosta cazujcunami carca. Chaimantami profeta Isaiasca Jehová Dios paicunata ayudanata huillarca. Shinapish Jehová Diosca chai shimicunataca mana chai rato pajtachircachu. Profeta Isaiasca “Mandaj Diosca cancunata llaquingapaj shuyacunmi” nishcami carca. Chaimi 70 huatacuna qꞌuipaca Jehová Diosca huaquin judiocunata Jerusalenman tigrachun ayudarca (Isaías 10:21; Jeremías 29:10). Chai judiocuna Jerusalenman tigrashpaca cushicuimantami huacarcacuna. w22.11 pág. 9 párr. 4

Cunan punllacunapica huaquin huauqui panicunaca apostolcuna causashca tiempopi shinallatajmi causacuncuna. Apostolcunatapish huaquin autoridadcunaca Jesucristomanta “imata ama yachachichunmi mandarcacuna” (Hechos 4:​18-20; 5:​27, 28, 40). Pero apostolcunaca chai juezcunata cazunapaj randica Jehová Diosta cazuna ashtahuan importante cashcatami cuentata curcacuna (Hechos 10:42). Pedro y Juanca chai juezcunataca ‘Jehová Diosmi cancunata yalli autoridadta charin’ nicushca shinami Jesucristomanta predicashpa catircacuna (Hechos 5:29). Qꞌuipaca autoridadcuna azotijpipish paicunaca Jesuspaj shutimanta llaquita apashpa pingai tucushca cashcamantami cushicushpa rircacuna. Huillanatapish mana saquircacunachu (Hechos 5:​41, 42). w22.10 págs. 12, 13 párrs. 2-4

Apóstol Pablo nishca shinaca Jehová Diosmanta yachai callarishpaca punta yachaicunatami yachanchij. Chai punta yachaicunaca huahuata alimentangapaj leche shinami can (Hebreos 5:12; 6:1). Shinapish Pabloca chai punta yachashcacunallahuan ama saquirichun, ashtahuanpish Bibliapi tiyaj sinchi yachaicunatapish yachachunmi animarca. ¿Canpish punta yachaicunata yachangapajchu esforzaricungui? ¿Cambaj feta sinchiyachishpa catingapajca Jehová Diosmanta, paipaj munaimanta yachashpachu caticungui? Achcacunaca estudianata mana munancunachu. ¿Canpish chashnallatajchu sintiringui? ¿Escuelapica canmanca liyinata, estudianatachu yachachircacuna? ¿Chaita ruranataca munanguichu? Estudianata mana munajpipish Jehová Diosmi canta ayudanga. Paimi tucuimanta yalli alli yachachij can. w23.03 págs. 9, 10 párrs. 8-10

Bibliata liyicushpaca mana jatun tucunachu canchij. Shujtajcunapaj pandarishcacunapipish mana yuyanachu canchij. Chashna humildadta ricuchijpica Bibliapaj consejocunaca cꞌuyajcuna, llaquijcuna, perdonajcuna cachunmi ayudanga. Bibliapaj nishcacuna ñucanchij shunguman chayajpica shujtajcunataca allimi tratashun. Cutin fariseocunaca rumi shungucuna cashcamantami Bibliapaj nishcacunata mana chasquircacuna, shujtajcunatapish yangamantami juchachircacuna (Mateo 12:7). Chaimantami ñucanchijca shujtajcunata ima shina tratacushcata alli ricurana canchij. Chaipajca cashna nishpa tapurishunchij: “¿Shujtajcunapaj alli cualidadcunamanta parlanata yachanichu o paicunapaj pandarishcacunallatachu ricuni? ¿Shujtajcunata perdonangapaj, ama criticangapaj, ama pꞌiñarishpalla saquiringapajchu esforzarini?”. Cai tapuicunapi yuyashpaca Bibliapaj nishcacuna ñucanchij shungupi, yuyaipi huaquichicushcata o mana huaquichicushcatami cuentata cushun (1 Timoteo 4:​12, 15; Hebreos 4:12). w23.02 págs. 12, 13 párrs. 13, 14

Arimatea llajtamanta José shuti runapi yuyashunchij. Judiocunaca paitami respetajcuna carca. Joseca Sanedrín nishcapi tribunal supremopimi juez carca. Paica Diospaj Gobiernomantami yachanata munarca. Jesuspipishmi feta churarca. Pero judiocunata manchashcamanta, paita ña mana respetanata manchashcamantami Jesuspi crishcataca piman mana huillarca (Juan 19:38). Shinapish Jesús huañushca huashaca ima manchaita mana charishpami Pilatopajman rishpa Jesuspaj cuerpota mañarca (Marcos 15:​42, 43). Chaita rurashpami tucuicunapaj ñaupajpi Jesuspi feta churashcata ricuchirca. ¿Canpish chaipi cashca cashpaca ima shinataj sintirinman carcangui? w23.01 pág. 30 párrs. 13, 14

Saba llajtata jatun mandaj huarmica israelitacunata Salomón mandacujpi sumaj causaita charishcatami yachaj chayarca. Chaimi paipaj ñahuihuantaj ricungapaj caru llajtamanta Jerusalencama shamurca (1 Reyes 10:1). Salomón alli mandacushcata ricushpaca chai mandaj huarmica cai punllapaj versopi nishcatami nirca. Shinapish shamuj punllacunapi Jesús cai Allpata mandacui horasca, Salomón mandacui punllacunatapish yalli allimi canga. Jesusca Salomontapish yalli alli mandajmi can. Salomonca juchayuj cashcamantami achca cutincuna pandarirca. Chaimi paipaj puebloca achca llaquicunata charirca. Cutin Jesusca jucha illaj cashcamantami mana nunca pandarin (Lucas 1:32; Hebreos 4:​14, 15). Jesusca imapi mana pandarij, gentecunata ayudaj, alli cuidajmi can. Chai laya reyta charishcamantaca achcatami cushicunchij. w22.12 pág. 11 párrs. 9, 10

¿Shuj millai ungüi ñucanchij causan ladopi rato mirarijpica imatataj rurana canchij? Autoridadcuna nishcacunatami cazuna canchij. Por ejemplo, ñucanchij maquicunatami cutin cutin maillana canchij, caishujmanta chaishujmanta caru carupimi purina canchij, mascarillacunatapishmi churarina canchij, minishtirijpicarin cuarentenatami rurana canchij. Caicunata pajtachishpaca Jehová Dios cushca causaita valorashcatami ricuchishun. Ima llaquicuna tiyai horaspica ñucanchij amigocuna, rijsishcacuna o noticierocunapica panda informaciontachari huillangacuna. Pero chaicunata crinapaj randica gobiernopaj autoridadcuna, doctorcunapish ima nishcacunatami uyana canchij (Proverbios 14:15). Shinallataj Cuerpo Gobernantepi caj huauquicuna, Betelpi caj huauquicunapish predicanamanta, tandanacunamanta ima instruccioncunata cujpica paicunatami cazuna canchij. Chai huauquicunaca tucuita alli investigashpa alli decidingapajmi esforzarincuna. Chai pushaj huauquicunata cazushpaca ñucanchij causaitapish, shujtajcunapaj causaitapishmi cuidashun. Chashna allita rurajta ricushpaca shujtaj gentecunaca testigo de Jehovacunamantami alli parlangacuna (1 Pedro 2:12). w23.02 pág. 23 párrs. 11, 12

Israelitacunaca Yayitu Dios cusha nishca allpaman yaicushpaca chꞌican chꞌican lugarcunapimi saquirircacuna. Paicunamanta huaquincunaca carupi causashcamantacarin tal vez paicunapuraca ña cungarishcangacunami. Pero Jehová Diosca tucuicuna paipaj Shimita uyachun, paipaj Shimimanta ashtahuan yachachunmi Jerusalenpi tandachirca (Deuteronomio 31:​10-12; Nehemías 8:​2, 8, 18). Shuj israelitaca ña Jerusalenman chayashpa, chaipi achca millón israelitacuna Yayitu Diosta adorangapaj chayashcata ricushpaca ¿ima shinashi sintirishcanga? Apostolcuna causan punllacunapipish Diosta sirvijcunaca chꞌican chꞌican costumbrecunata charijcuna, ashalla cullquita charijcuna o achca cullquita charijcuna, chꞌican chꞌican shimita parlajcunami carca. Chashna cashpapish tandallami Jehová Diostaca sirvi tucurcacuna. Achca gentecunapish huauqui panicunahuan tandanacushcamanta, paicuna yachachichun saquishcamantami Yayitu Diospaj Shimitaca yachai tucurcacuna (Hechos 2:42; 8:​30, 31). w23.02 págs. 3, 4 párr. 7

Jehová Diosca paita cazujcunamanca huiñai causaitami cusha nin (Romanos 6:23). Caita yachashcamantami Yayitu Diostaca ashtahuan ashtahuan cꞌuyai callarinchij. Paica paimanta ama caruyachun, ashtahuanpish huiñai causaita charichunmi cai sumaj regalota cushca. Jehová Dios ñucanchijman huiñai causaita cusha nishcata yachashcamantami ima llaquicunatapish ahuantai tucushun. Cai millai mundopi causacushcamantaca ñucanchij contracunaca ñucanchijtami huañuchisha ninga. Pero Jehová Diosca paita tucui shunguhuan sirvishcamantami ñucanchijtaca causachinga (Juan 5:​28, 29; 1 Corintios 15:​55-58; Hebreos 2:15). Jehová Diosca causaita cuj cashcamanta, huiñaita causaj cashcamantami ñucanchijmanpish huiñai causaita cui tucushcata crinchij (Salmo 36:9). Bibliapica Jehová Diosca huiñaimanta huiñaicama causaj cashcatami yachachin (Salmo 90:2; 102:​12, 24, 27). w22.12 pág. 2 párrs. 1-3

Diosta sirvijcunaca llaquicunata charinatami alli yachanchij. Bibliapica: “Diospaj Gobiernopi yaicungapajca achca llaquicunatami apana canchij” ninmi (Hechos 14:22). Shinapish tucui cai llaquicuna Paraíso Allpallapi tucurina cashcatami alli intindinchij. Chaipica llaquipish, huacaipish, nanaipish, huañuipish ña mana ashtahuan tiyangachu (Apocalipsis 21:4). Jehová Diosca ñucanchijcuna pruebacunata charichunmi saquin. Pero chaicunata ahuantachunmi ayudacun. Apóstol Pablo Romapi causaj huauqui panicunata ima nishcatami ricushun. Paica huauqui panicunapaj pruebacunamanta parlashpaca: “Tucui caicunataca pai cꞌuyashcamantami ñucanchijca tucuita mishanchij” nircami (Romanos 8:​36, 37). Cai versopi ricushca shinaca Jehová Diosca tucui pruebacunata ahuantashpa catichunmi ayudanga. w23.01 pág. 14 párrs. 1, 2