Diciembre

¿Etiopía llajtata mandaj huarmita sirvij shuj runaca bautizaringapajca listochu carca? Etiopía llajtamanta eunuco runaca judiocunapaj religiontami catij carca. Chaimantami Diosta adorangapaj Jerusalenman rishca carca (Hechos 8:27). Shinallataj Ñaupa Testamentota alli rijsishcamantami Jehová Diosmantaca achcata yacharca. Chaimi chai eunuco runaca profeta Isaiaspaj quillcashcacunata liyicurca (Hechos 8:28). Etiopía llajtamanta Jerusalenpi tiyaj templocama Diosta adorangapajmi rirca. Felipeca Etiopía llajtamanta runamanca chai runa mana yachashca valishca yuyaicunatami yachachirca. Por ejemplo, Yayitu Dios cachasha nishca Mesías, Jesús cashcatami yachachirca (Hechos 8:​34, 35). Etiopía llajtamanta runaca Jehová Diostapish, Jesustapish achcata cꞌuyashcamantami Jesusta catij tucunata, bautizarinatapish decidirca. Felipeca chai runa bautizaringapaj listo cashcata ricushpaca paitami bautizarca. w23.03 págs. 8, 9 párrs. 3-6

Jehová Diosca ñucanchijcuna llullachunca mana munanchu (Proverbios 6:​16, 17). Gentecunaca maipica llullanllami. Mana cashpaca paicunaca mana tucuita verdadta huillashpami shujtajcunata umancuna. Pero ñucanchijca Jehová Dios yuyashca shina yuyashpami tucuipi verdadta nina canchij (Salmo 15:​1, 2). Shujtajcunamanta ama mana alli parlashunchij (Proverbios 25:23; 2 Tesalonicenses 3:11). Pi shujtajcunamanta mana allicunata parlai callarijpica, shujtaj temamanta o animaj shimicunamantami parlana canchij. Jehová Diosca animaj shimicunahuan parlachunmi munan. Pero cai mundopica casi la mayoría gentecunaca mana allicunallatami parlancuna. Cutin ñucanchijca predicacushpa, tandanacuipi cashpa, shujtajcunahuan parlashpaca Jehová Diosllatami ñucanchij animaj shimicunahuan jatunyachisha ninchij. Ñallami millai gentecuna mana tiyajpi Jehová Diosta ñucanchij nishcacunahuan alabanaca jahualla canga (Judas 15). w22.04 pág. 9 párrs. 18-20

Jehová Dios ñucanchijta achcata cꞌuyashcata yuyarishpa, Jesús cada unomanta huañushcatapish yuyarishpaca paicunata cꞌuyashcatami ricuchisha ninchij (1 Juan 4:10). Apóstol Pablopish chaicunatami yuyarirca. Paica: “Jesusca ñucata cꞌuyashpami paipaj causaita ñucamanta curca” nircami. Chaita yuyarishcamantami Pabloca achca agradecido sintirirca (Gálatas 2:20). Jehová Diosca cantapish cꞌuyashcamantami paipaj puebloman pushamushca, paipaj amigo cachunpishmi saquishca (Juan 6:44). ¿Jehová Dios canta cꞌuyashcata, canta agllashcata yachashpaca manachu tucui shunguhuan agradicisha ningui? ¿Jesús canmanta huañushcata yachashpacarin manachu Jehová Diostapish, Jesustapish cꞌuyashcata ricuchisha ningui? ¿Jehová Diosta, Jesusta cꞌuyashcataca ima shinataj ricuchina cangui? Jehová Diosta, Jesustapish cꞌuyashcamantami shujtajcunata cꞌuyanata yachanchij (2 Corintios 5:​14, 15; 6:​1, 2). w23.01 págs. 28, 29 párrs. 6, 7

Bibliapaj consejocunataca allimi estudianchij. Yayitu Diosca chashna Bibliahuan yachachishpami paita sirvijcuna tandalla paita sirvichun ayudashca. Bibliapi tiyaj achca yachaicunataca humilde gentecunalla intindi tucuchunmi Jehová Diosca quillcachirca (Lucas 10:21). Chashnami Bibliataca mundo enteropi achca gentecuna liyishcacuna. Pero cai librotaca humilde gentecunallami alli intindi tucushcacuna, chaipi nishcacunatapish tucuita pajtachi tucushcacuna (2 Corintios 3:​15, 16). Yayitu Diosca paipaj Shimihuanmi alajata yachachin. Ashtahuancarin cada unota animangapajmi paipaj Shimitaca utilizan. Chashnami Yayitu Diosca alli yachaj cashcata ricuchin. Bibliata liyishpaca Yayitu Dios cada unomanta preocuparishcatami yachanchij (Isaías 30:21). Achca cutincunami huaquin versocunata liyishpa animota japishcanchij. Pero ¿Bibliapaj consejocunaca imamantataj cada unota ayudai tucun? ¿Chai consejocunaca imamantataj cunancama valishca can? Yayitu Dios Bibliata quillcachishcamantami Bibliapi tiyaj consejocunaca ñucanchijta ayudan (2 Timoteo 3:​16, 17). w23.02 págs. 4, 5 párrs. 8-10

Diosta sirvijcunaca Jehová Diosta cꞌuyashcamantami paita sirvingapaj tucui pudishcata rurasha ninchij. Chaipajca alli cualidadcunata charingapaj, imata alli ruranata yachangapaj o shujtajcunata ayudangapajmi metacunata churana canchij. ¿Jehová Diosta sirvingapajca imamantataj metacunata churashpa pajtachina canchij? Puntapica, Jehová Diosta cushichingapajmi metacunata churasha ninchij. Ñucanchij tucui pudishcahuan Jehová Diosta sirvijpica paica cushillami sintiringa. Ishquipica, huauqui panicunata ayudangapaj, paicunata sirvingapajmi metacunata churasha ninchij (1 Tesalonicenses 4:​9, 10). Apóstol Pablo nishca shinaca mashna huatacunata Diosta sirvicushpapish, tucuicunami Jehová Diosta ashtahuan alli sirvishpa catina canchij. w22.04 pág. 22 párrs. 1, 2

Gobiernocunaca muyundij Allpapi tiyaj tucui panda religioncunatami llaquichi callaringa. Chashna llaquichi callarijpimi jatun llaqui punllacunaca chayanga. ¿Chai tucujpica achca gentecunachu Jehová Diosta adoranata munangacuna? Mana. Ashtahuanpish Apocalipsis capítulo 6-pi nishca shinaca, Diosta mana sirvijcunaca gobiernocunapi, negociocunapimi shunguta churangacuna. Gobiernocunata, negociocunataca sinchi urcucunata shinami ricungacuna. Jehová Diosca chai millai gentecunataca paipaj contracuna cashcatami ricunga (Lucas 11:23; Apocalipsis 6:​15-17). Jehová Diosta sirvijcunaca chai jatun llaqui punllacunapica shujtaj gentecuna shinaca mana cangachu. Paicunallami cai Allpapica Jehová Diosta tucui shunguhuan sirvishpa catingacuna. Puca jatun animalpaj ladopish mana cangacunachu (Apocalipsis 13:​14-17). w22.05 págs. 16, 17 párrs. 8, 9

Diosta sirvijcunaca Diospaj Gobiernomanta alli huillaicunallataca mana huillancunachu (Mateo 24:14). Apocalipsis capítulos 8 al 10-pi nishca shinaca, angelcunaca millai gentecunahuan ima tucunatami huillacuncuna. Chaimantami Diosta sirvijcunapish millai gentecunahuan llaqui tucunata huillacunchij. Chashna sinchi huillaicunaca millaicunataca rundu laya, nina layami llaquichin (Apocalipsis 8:​7, 13). Tucui gentecunaca cai tucuri punllacuna quichquiyamucushcata yachanatami minishtincuna. Chaita yachashpami tiempo tiyajpiraj paicunaca cambiai pudingacuna (Sofonías 2:​2, 3). Cashna sinchi huillaicunataca la mayoría gentecunaca mana uyasha nincunachu. Jatun llaqui punllacuna callarijpicarin ashtahuan sinchi huillaicunatami huillana tucunga. Chaimantami mana manchashpa predicashpa catina canchij (Apocalipsis 16:21). w22.05 págs. 6. 7 párrs. 18, 19

Cazadocunaca huahuacunata ima shina huiñachinamantaca huaquin discursocunatami uyashcacuna. Pero ña huahuacunata charishpaca chai rijsishca consejocunataca pajtachinatajmi can. Yaya mamacunaca huahuacunata huiñachina responsabilidadtami charincuna. Cai ejemplopi ricushca shinaca, ñucanchij causaipi ima cambio tiyajpica ña rijsishca versocunataca pajtachinatami minishtishun. Chaimantami Diosta sirvijcunaca Israel llajtata mandajcuna shina cada punlla Bibliata estudiana, liyina canchij (Deuteronomio 17:19). Yaya mamacuna, cancunaca huahuacunamanca Jehová Diosmantami yachachina canguichij. Caita ruranaca dimastij valishcami can. Shinapish huahuacunamanca mana solo Diosmanta yachachinallachu canguichij. Ashtahuancarin Jehová Diosta cꞌuyachunmi yachachina canguichij. w22.05 pág. 26 párrs. 2, 3

Arrepentidos cashcata ricuchingapajca mana llaquirishpallachu saquirina canchij. Ashtahuanpish ñucanchij ruraicunahuanpishmi arrepentidos cashcata ricuchina canchij. Jehová Diosca ñucanchijta perdonangapajca mana allicunata saquishcata, pai munashca shina causangapaj esforzaricushcatapishmi ricun (Isaías 55:7). Shungumanta arrepintirishpaca ñucanchij yuyaita mushujyachingapajmi cada punlla esforzarina canchij (Romanos 12:2; Efesios 4:23). Mana alli yuyaicunatapish, mana alli ruraicunatapishmi saquina canchij (Colosenses 3:​7-9). Pero Dios ñucanchijta perdonachunca ashtahuantajca Jesús ñucanchijmanta huañushcapimi feta churana canchij (1 Juan 1:7). Jehová Diosca ñucanchijcuna mana allicunata saquingapaj esforzaricujta ricushpapishmi perdonanga. w22.06 págs. 6, 7 párrs. 16, 17

Cai tucui tiempopica gentecunapurami llaquichinacushcacuna (Eclesiastés 8:9). Achca gentecunapish, autoridadta charijcunapish shujtajcunatami llaquichincuna, cꞌamincuna, lituncuna. Escuelapipish, familiapipishmi maipish cachun tratancuna. Cai tucuimantami gentecunaca achca manchaita charincuna. Satanasmi chashna manchaita charichun munan. Satanasca gentecunata manchashpa predicanata saquichun, Diosta cazunata saquichunmi munan. Chaimantami huaquin gobiernocunaca ñucanchijcuna predicachunca mana saquincuna. Huaquin huauqui panicunatapishmi llaquichincuna (Lucas 21:12). Huaquin gentecunacarin testigo de Jehovacunamantami achca llullacunata nincuna. Chaicunata crishpami huaquincunaca ñucanchijta mana uyasha nishpa ñucanchijmanta burlarincuna, llaquichincunapish (Mateo 10:36). Apostolcuna causashca tiempopipishmi Diabloca shinallataj llaquichij carca (Hechos 5:​27, 28, 40). w22.06 págs. 16, 17 párrs. 10, 11

¿Picunamantaj allita ruranata yachachingacuna? Cai Allpapi causarijcunaman, Armagedonmanta quishpirijcunaman, chai tiempopi huacharishcacunamanpishmi yachachingacuna. 1.000 huatacuna huashaca Paraíso Allpapica tucuicunami jucha illaj cangacuna. Maijan jucha illaj cashpapish huiñai causaita chasquina derechotaca mana charinchu. Por ejemplo, Adán y Evaca jucha illajcunami carca. Pero huiñai causaita chasquingapajmi Jehová Diostaca tucuipi cazuna carcacuna. Shinapish Diosta mana cazushcamantami huiñai causaita chingachircacuna (Romanos 5:12). 1.000 huatacuna qꞌuipaca cai Allpapi tucui causaj gentecunaca jucha illajcunami cangacuna. Pero ¿chai jucha illaj gentecunaca Diospaj Gobiernota huiñaipajchu apoyangacuna? ¿O Adán y Eva shinachu Diosta mana cazungacuna? ¿Chaita yachangapajca Jehová Diosca imatataj ruranga? w22.09 págs. 22, 23 párrs. 12-14

Cai mundopi causanaca sinchimi can. Achca familiacunapica cꞌuyaica ña mana tiyanchu. Cai mundopi cajcunaca shujtajcunata llaquichishpa, pꞌiñashpami causancuna. Achcacunacarin autoridadta charijcunapica ña mana confiancunachu. Cashna laya gentecunata ricushcamantami tucuri punllacunapaj profeciacuna pajtaricushcata yachanchij (2 Timoteo 3:​1-5). Alli shunguta charij gentecunaca cai profeciacuna pajtaricushcataca allimi intindincuna. Cai profeciacuna pajtaricushcata ricushpami Diospaj Gobiernopi Jesús mandacushcata intindinchij. Chaimantami shamuj punllacunapi tranquilo, alli causanata seguros canchij. Cai profeciacunaca cai último punllacunapimi pajtaricushca. Shuj rompecabezaspaj dibujo ima cashcata intindingapajca allimi piezacunata tandachina canchij. Chai shinallatajmi ima tiempopi causacushcata yachangapajca profeciacunata alli intindina canchij. w22.07 págs. 2, 3 párrs. 1, 2

COVID-19 pandemia chayashca horaspi predicangapaj, tandanacungapajmi huaquin instruccioncunata chasquircanchij. Pushaj huauquicunaca ñapishmi “cunanca internetpimi tandanacui callarishun” nishpa huillarcacuna. Predicangapajpish telefonopi cayachun, cartacunata rurachunmi animarcacuna. Caicunata cazushcamantami Jehová Diosca achcata bendiciashca. Chaimantami achca huauqui panicunaca huaquin gentecunata ayudai tucurcacuna. Huaquin llajtacunapicarin achca publicadorcunami mirarirca. Maijan huauqui panicunaca: “COVID-19 ungüimantaca mana manchanaita cuidarinata minishtinchijchu, instruccioncunatapish cuchunca mana minishtinchijchu” nishpachari yuyashcangacuna. Pero pushaj huauquicuna cushca instruccioncunata cazunaca valishcami cashca. Jesús ñucanchijta ima shina cuidacushcata ricushpaca shamuj punllacunapi Jehová Diospish, Jesuspish ñucanchijta cuidanatami seguros canchij (Hebreos 13:​5, 6). w22.07 págs. 12, 13 párrs. 15, 16

Jehová Diosca tucuita cushcamantami agradicina canchij. Por ejemplo, paica tucui laya alaja sisacunata, mishqui micunacunata, alli amigocunatapishmi cushca. Tucui caicunataca ñucanchijcuna cushilla, alaja causachunmi cushca (Salmo 104:​12-15, 24). Ashtahuancarin ñucanchijman achca yachaicunata, Paraíso Allpapi causana esperanzatapish cushcamantami shungumanta agradicinchij. Huaquinpica Jehová Dios ñucanchijman imalla cushcamantaca ratomi cungarinchijlla. Pero chaita ama cungaringapajca Jehová Diosta imata mañashcataca shuj listapimi anotai tucunchij. Qꞌuipaca chai listapi ricushpa, Jehová Dios ñucanchijta ima shina cutichishcatami cuentata cuna canchij. Jehová Dios ñucanchijta cutichishcata ricushpaca shungumantami agradicina canchij (Colosenses 3:15). w22.07 págs. 22, 23 párrs. 8, 9

Bibliata estudiashpallaca mana saquirinachu canchij. Ashtahuanpish Biblia yachachishcacunataca ñucanchij causaipimi pajtachina canchij. Chashnami cushilla causashun (Santiago 1:25). Shuj huauquica: “Biblia yachachishcacunata pajtachicushcata o mana pajtachicushcata yachangapajca allimi ricurana canchij. Chashnami imapi mejorana cashcata yachashun” ninmi. Apóstol Pablopish: “Shinaca mashnata sinchiyashca cashpapish chai ñanllapitaj allita rurashpa catishunchij” nircami (Filipenses 3:16). Mana llullapi catishpaca cushillami causashun. Jehová Diostapish, huauqui panicunatapishmi cushichishun (Proverbios 27:11; 3 Juan 4). Chaimantami Biblia yachachishcacunata valorashpa, pajtachishpa catina canchij. w22.08 págs. 18, 19 párrs. 16-18

Ancianocunaca Jehová Diosta, Jesustapish cꞌuyashcata ricuchingapajca huauqui panicunatami alli cuidana can (1 Pedro 5:​1, 2). Jesucristoca apóstol Pedrotaca chaita rurachunmi yachachirca. Apóstol Pedroca Jesusta mana rijsishcataca quimsa cutincunami nishca carca. Pero Pedroca arrepintirishpami Jesús causarishca huasha de verdadtaj paita cꞌuyashcata ricuchisha nishcanga. Jesusca Pedrotaca: “Juanpaj churi Simón, ¿ñucata cꞌuyanguichu?” nishpami tapurca. Pedro ari nijpica Jesusca: “Ñuca ovejacunata michingui” nircami (Juan 21:​15-17). Chai punllamanta huichimanca apóstol Pedroca Jesusta cꞌuyashcata ricuchingapajmi huauqui panicunata cꞌuyaihuan cuidanataca manataj saquirca. Ancianocunapish ¿Jesús nishca shimicunata pajtachingapajca imatataj rurana cancuna? Paicunaca huauqui panicunata animashpa, visitashpa, congregacionmanta caruyashcacunatapish animashpami Jehová Diosta, Jesustapish cꞌuyashcata ricuchincuna (Ezequiel 34:​11, 12). w23.01 págs. 29, 30 párrs. 10, 11

Mana alli munaicunahuan chꞌimbapuracushpaca, “ñucata pi mana intindingachu, pi mana ayudangachu” nishpaca mana yuyanachu canchij. Chashna yuyashpaca mana alli munaicunamanta mana llujshi tucushcatami crishun. Pero chaica mana ciertochu can. Bibliapica: ‘Ima tentacioncuna ricurijpipish Diosllatajmi chaicunata mishashpa catichun ayudanga’ ninmi. Chaimantami mana alli munaicunahuan chꞌimbapuracushpapish chaicunamanta caruyangapaj esforzarishpa catina canchij. Juchayujcuna cashcamantami mana alli munaicunaca rato ricuringalla. Chashna ricurijpica ima shinami Joseca Potifarpaj huarmimanta rato caruyashpa rirca (Génesis 39:12). Chashnallatajmi ñucanchijpish mana alli munaicunamanta rato caruyana canchij. Ashtahuanpish mana alli munaicuna ñucanchijta controlachunca manataj saquinachu canchij. w23.01 págs. 12, 13 párrs. 16, 17

Jehová Diosca cashcata rurajmi can (Deuteronomio 32:4). Paica tucuicunamanmi paita rijsina, sirvina oportunidadta cun (Hechos 10:​34, 35). Chaimantami Bibliataca gentecuna parlashca shimicunapi quillcachun rurarca. Jehová Diosca tucuri punllacunapi achca gentecuna Bibliata alli intindina cashcatami nirca (Daniel 12:4). Cai shimicunaca cunan punllacunapimi pajtaricun. Bibliatapish, Bibliamanta yachachij achca publicacioncunatapish tauca shimicunapimi traducishcacuna, imprimishcacuna. Diospaj puebloca 240 yalli shimicunapimi tucui Bibliata o shuj partellata traducishcacuna. Tucui chai Bibliacunatami gentecunaca gratis chasqui tucuncuna. ¿Gentecuna paicunapaj propio shimipi Bibliata chasquishcamantaca ima shinataj beneficiarishcacuna? Dios tucuchina punlla manaraj shamujpimi achca gentecunaca Diospaj Gobiernomanta alli huillaicunata yachaj chayashcacuna (Mateo 24:14). Jehová Diosca cashcata ruraj cashcamantami, yallitaj achca gentecuna paipaj Shimita liyishpa paita rijsina oportunidadta charichun munan. Chaica Yayitu Dios dimastij cꞌuyaj cashcatami ricuchin. w23.02 pág. 5 párrs. 11, 12

Canca allita rurangapajmi esforzaricungui. Pero juchayujcuna cashcamantami millai gentecuna shina mana allicunata ama rurangapaj esforzarina canchij (Isaías 5:20). Jesús cai Allpapi cajpica religionta pushajcunaca paicunalla allita ruracushcatami yuyajcuna carca. Pero chai runacunaca shujtajcunata yalli cashcata yuyashpami sinchi mandashcacunata churajcuna carca. Chaimantami Jesusca paicunataca mana allita ruracushcata nirca (Eclesiastés 7:16; Lucas 16:15). Cunan punllacunapish huaquin gentecunaca paicunalla allita ruracushcatami yuyancuna. Paicunaca shujtajcunata yalli cashcata yuyashpami shujtajcunataca huashalla rimancuna. Pero Dios munashca shina allita rurajcunaca shujtajcunata yalli cashcataca mana yuyancunachu. Bibliapica Dios mandashcacunata cazuchun, allita rurachunmi yachachin. w22.08 pág. 27 párrs. 3-5

Jesusca paipaj discipulocuna pandarijpipish paicunapimi confiashpa catirca (Juan 15:16). Shuj cutinca Santiagopish, Juanpish Jesustaca paipaj Gobiernopi alli puestota cuchunmi mañarcacuna. Chashna mañajpipish Jesusca paicuna Jehová Diosta mana cꞌuyashcata o paipaj discipulocuna ña mana cana cashcataca mana nircachu (Marcos 10:​35-40). Shinallataj Jesús huañunapaj ashalla horascuna faltajpipish paipaj tucui discipulocunaca shitashpami rircacuna (Mateo 26:56). Pero Jesusca paicuna juchayujcuna cashcata yachashpapish paicunata huañungacamami cꞌuyarca (Juan 13:1). Jesús causarishca qꞌuipacarin paipaj 11 apostolcunamanca paicunapi confiashcamantami predicacionta pushachun, paipaj ovejitacunata cuidachunpish mingarca (Mateo 28:​19, 20; Juan 21:​15-17). Jesusca paicunapi confiashpaca mana pandarircachu. Paipaj 11 apostolcunaca huañungacamami allita rurashpa catircacuna. Caipi ricushca shinaca Jesusca juchayujcunapimi confiarca. Ñucanchijpish pai shinami ñucanchij huauqui panicunapi confiana canchij. w22.09 pág. 6 párr. 12

Diablo manchachisha nijpipish, Jehová Dios ñucanchijta cꞌuyashcata crishpaca imatapish mana manchashunchu. Por ejemplo, Salmo 118-ta quillcaj runaca achca llaquicunatami charirca. Maijan autoridadta charijcunaca paipaj contrami tucurcacuna. Paitapish llaquichishami nircacuna. Shinallataj Jehová Diospish paitaca sinchitami disciplinarca (Salmo 118:​9, 10, 13, 18). Chashna llaquicunata charishpapish cai runaca imatapish mana manchashachu nircami. Jehová Dios paita disciplinajpipish paita achcata cꞌuyashcatami yacharca. Shinallataj Dios paita ayudangapaj listo cashcatapishmi yacharca. Caita intindishpami manchaitaca mana charirca (Salmo 118:29). Manchaita mishangapajca Jehová Dios canta achcata cꞌuyashcatami crina cangui. Chaita crishpaca familiata ima shina mantininamantaca mana achcata preocuparinguichu. Shinallataj shujtajcuna llaquichinatapish, huañunatapish mana manchanguichu. w22.06 pág. 15 párrs. 3, 4

Cushilla causangapajca Jehová Diosta sirvinatami punta lugarpi churana canchij. Jehová Dios ñucanchijta rurashcamantami paitaca adorana canchij (Apocalipsis 4:11; 14:​6, 7). Pero Jehová Dios munashca shina adorangapajmi esforzarina canchij (Juan 4:​23, 24). Chaipajca Diospaj espíritu santo ñucanchijta ayudachun saquishpa Dios yachachishcacunatami cazuna canchij. Contracuna ñucanchijta catirashpa llaquichisha nijpipish Jehová Diosta sirvinataca punta lugarpimi churana canchij. Por ejemplo, cai ratoca 100 yalli huauqui panicunami Jehová Diosta sirvishcamanta carcelpi cancuna. Carcelpi cashpapish paicunaca Jehová Diosta shungumanta mañangapaj, Bibliata estudiangapaj, shujtajcunaman Diospaj Gobiernomanta predicangapajpishmi esforzaricuncuna. Chaita rurashpaca cushillami sintirincuna. Ñucanchijtapish catirashpa llaquichijpi o rimajpica Jehová Dios ñucanchijta ayudanata, bendicianata yachashpaca cushillami sintirinchij (1 Pedro 4:14). w22.10 pág. 9 párr. 13

Jehová Diosca Proverbios libropica cushilla causachunmi valishca consejocunata ñucanchijman cun. Proverbios libromanta ishqui valishca consejocunamantami yachashun. Puntapica, charishca cosascunallahuan contentos cashunchij. Proverbios 23:​4, 5-pica: “Ama charij tucuna yuyailla caichu. Chaicunaca alas jundajpi águila jatarishpa, jahuata rij shina ñapish chingaringallamari” ninmi. Cai tiempopica achca cullquita charijcunapish, ashalla cullquita charijcunapish ashtahuan charinatami munancuna. Charij tucuna yuyailla cashcamantami yallitaj preocuparincuna. Shujtajcunahuanpish mana alli apanacuncuna. Maipicarin hasta ungurincunapish (Proverbios 28:20; 1 Timoteo 6:​9, 10). Ishquipica, alli yuyashpa parlashunchij. Mana cuidadota charishpaca ñucanchij shimicunahuanmi shujtajcunata llaquichi tucunchij. Proverbios 12:​18-pica: “Maijancunaca imata rimashpapish espadahuan chugrichishca shinami saquincuna. Ashtahuanpish yachaisapacunaca sumaj shimicunahuan jambincunami” ninmi. Chaimantami shujtajcunamanta huashallaca mana parlana canchij. Chashnami tucuicunahuan alli apanacushun (Proverbios 20:19). w22.10 págs. 21-23 párrs. 14, 16, 17

Ezequielca shujtajcunaman predicangapajca Diospaj shimicuna paipaj shunguman chayachunmi saquina carca. Shinallataj muscuipi shina Ezequielca chai rollota micushpaca yallitaj mishquijlla cashcatami sintirca (Ezequiel 3:3). Ezequielca chai mishquita munanajlla caj shinallatajmi Yayitu Diosmanta huillanataca achcata munarca (Salmo 19:​8-11). Chaimantami Ezequielca Jehová Dios profeta cachun paita agllashcamanta achcata agradicirca. Qꞌuipaca Jehová Diosca Ezequieltaca: “Ñuca imalla nishca shimicunataca, cambaj shungupi huaquichingui. Cambaj rinrinhuantaj alli uyangui” nircami (Ezequiel 3:10). Jehová Diosca Ezequiel chai rollopi tiyaj shimicunapi cutin cutin yuyarichunmi munarca. Chashnami Ezequielca alli alimentarij shina predicangapaj fuerzasta japina carca (Ezequiel 3:11). Ezequielca Diospaj Shimicunata paipaj shungupi charishpaca shujtajcunaman predicangapajmi listo carca. w22.11 pág. 6 párrs. 12-14

¿Cambiocuna tiyajpi Jehová Diosmanta ama caruyangapajca canca imatataj rurana cangui? Diospaj organizacionpi ima cambiocuna tiyajpipish chaicunata tucui shunguhuan apoyangapajmi esforzarina cangui. Israelitacuna chaquishca pambapi cajpica Cohatpaj familiamanta levitacunaca Diospaj Arcatami apajcuna carca (Números 3:​29, 31; 10:33; Josué 3:​2-4). Chaica shuj jatun privilegiomi carca. Pero israelitacuna Dios cusha nishca allpata japijpica shuj cambiomi tiyarca. Diospaj Arcata shujtaj ladoman apanaca ña mana minishtirircachu. Chaimantami huaquin cohatitacunata shujtaj cosascunata ayudachun churarca (1 Crónicas 6:​31-33; 26:​1, 24). Pero cai cambiocuna tiyajpipish paicunaca mana quejarircacunachu. Ashtahuan valishca trabajota mingachunpish mana mañarcacunachu. ¿Cohatitacunamantaca imatataj yachai tucungui? Diospaj organizacionpi ima cambiocuna tiyajpi chai cambiocuna mana can munashca laya cajpipish chaicunata apoyangapajmi esforzarina cangui. Jehová Dios ima trabajota mingajpipish chaitaca tucui shunguhuanmi pajtachina cangui. Diospaj organizacionpi imata rurashpapish Jehová Diospajca valishcami canchij. Jehová Diosta tucuipi cazunami tucuimanta yalli ashtahuan importante can. w22.11 pág. 23 párrs. 10, 11

Onesiforoca apóstol Pablota japingacamami mashcarca. Chaipica huañunata mana manchashpami Pablo ayudata minishticui horas paita ayudarca. ¿Onesiforomantaca imatataj yachai tucungui? Llaquichijcunata mana manchashpami pushaj huauquicunata ayudashpa catina cangui. Paicunata difindingapajpishmi esforzarina cangui (Proverbios 17:17). Chai llaqui horaspica paicunaca ñucanchijcuna cꞌuyaita ricuchichun, paicunata ayudachunmi minishtincuna. Rusia llajtapi huaquin huauqui panicunata carcelpi churajpi caishuj huauqui panicuna imata rurashcata yuyari. Maijan huauquita o panita tribunalpi juzganata yachashpaca achca huauqui panicunaca paicunata apoyangapajmi chai tribunalman rincuna. ¿Caimantaca imatataj yachai tucungui? Pushaj huauquicunata yangamanta juchachishpa carcelpi churajpica mana mancharinachu canchij. Ashtahuanpish paicunamantami Yayitu Diosta mañana canchij. Paicunapaj familiatapish cuidangapajmi esforzarina canchij. Paicunata ima shina ayudanatapishmi ricurana canchij (Hechos 12:5; 2 Corintios 1:​10, 11). w22.11 pág. 17 párrs. 11, 12

Ancianocunaca huauqui panicuna sinchi feta charichun, cushilla, tranquilo sintirichunmi ayudana cancuna (1 Pedro 5:2). Shuj llaqui atraso japijpica ancianocunaca huauqui panicuna alli cachun, micunata charichun, ropatapish charichun, maipi causanata charichunpishmi ayudana cancuna. Pero tal vez huauqui panicunaca achca quillacunatami paicunapaj feta sinchiyachichun, paicunata cushichichun minishtingacuna (Juan 21:15). Shuj Comité de Sucursalmanta huauqui Haroldca llaquicunata charishca achca huauqui panicunahuanmi parlashca. Paica: “Cai huauqui panicunaca llaqui horas pasashca huashaca allimi sintiri callarincuna. Pero ñapishmi paicunapaj cꞌuyashca familia huañushcata, cosascunata chingachishcata o ima llaquita charishcata yuyarincunalla. Chaimi cutin dimastij llaquilla sintirincuna. Chashna sintirinaca mana ima juchachu can. Ashtahuanpish paicunata cushichishpami catina canchij” ninmi. Romanos 12:​15-pica: “Cushicujcunahuanca cushicuichij. Huacajcunahuanca huacaichij” ninmi. Ancianocunapish cai consejotami pajtachina can. w22.12 págs. 22, 24, 25 párrs. 1, 10, 11

Jehová Diosca generoso cashcamantami allicunata rurashpa catichunca ñucanchijman espíritu santota cun. Por ejemplo, Diospaj Shimita estudiacushpaca espíritu santo ñucanchijta pushachunmi saquinchij. Shinallataj tandanacuicunaman rishpami espíritu santota chasquinchij. Tandanacuicunapica allita rurangapajmi ñucanchij huauqui panicunahuan caishujmanta chaishujmanta animanacushpa catinchij (Hebreos 10:​24, 25; 13:7). Mana alli munaicunata, mana alli yuyaicunata saquingapajca Jehová Diostapishmi ayudachun rogana canchij. Paimi paipaj espíritu santota cushpa ñucanchijta ayudanga. Bibliata cada punlla estudiangapaj, tandanacuicunaman ringapaj, predicacionman llujshingapajpishmi shuj horariota charina canchij. Chai horariota ña charishpaca chaita ama saquingapajmi esforzarina canchij. Chashnami ñucanchij yuyaita cambiashpa catishun. w23.01 págs. 11, 12 párrs. 13, 14

Bibliaca ima shina alimentarinata ricuchij shuj libro o medicinapaj libroca mana canchu. Shinapish Bibliapica Yayitu Dios ñucanchij cuerpota cuidachun munashcatami ricuchin. Paica Eclesiastés 11:​10-pica: “Cambaj aichahuan ima mana allita ruranamantapish chꞌicanyailla” ninmi. Ñucanchijtaca yallitaj micuna, machashcalla purinami llaquichi tucun. Yayitu Diospish Bibliapica chaita ama rurachunmi consejan (Proverbios 23:20). Chaimantami ñucanchijpish Yayitu Dios munashca shinaca mana alli micunamanta, yallitaj micunamanta, machanamantapish jarcarinata yachana canchij (1 Corintios 9:25). Ñucanchij decidishcacunahuanmi Yayitu Dios causaita cushcamantaca agradecidos cashcata ricuchina canchij. Pero alli decidingapajca alli yuyaiyujcunami cana canchij (Salmo 119:​99, 100; Proverbios 2:11). Por ejemplo canca shuj micunatachari dimastij munangui, pero canta dañota rurajta yachashpaca chaitaca mana micunguimanchu. Shinallataj alli dormishpa, ejerciciota rurashpa, ñucanchij huasitapish, cuerpotapish limpiota charishpami Yayitu Dioshuan agradecidos cashcata, alli yuyaiyuj cashcata ricuchishun. w23.02 pág. 21 párrs. 6, 7

¿Mana ricuipaj laya valishca yuyaicunata Bibliapi taringapajca imatataj rurana canchij? 2 Timoteo 3:​16, 17-pi ima nishcata ricushunchij. Chaipica: ‘Dios quillcachishca shimica tucuimi yachachingapaj, sinchita cunangapaj, imatapish allichingapaj, allita rurana cashcata yachachingapajpish alli can’ ninmi. Bibliapaj mana tanto rijsishca librocunapishmi caicunata pajtachichun ayudan. ¿Caicunataca ima shinataj pajtachi tucunchij? Bibliata liyicushpaca Jehová Diosmanta, paipaj munaimantapish imata yachachishcatami alli ricurana canchij. Jehová Dios ñucanchijta cunachun saquingapajpishmi Bibliapi tiyaj valishca consejocunata mashcana canchij. Chai consejocunata ricushpaca imapi fallacushcata, ima mana alli munaicunata, ima mana alli ruraicunata saquina cashcatami yachashun. Shinallataj panda yuyaicunata allichingapajmi huaquin versocunata mashcana canchij. Por ejemplo, predicacionpi ima pandata nijcunaman ayudangapajca alli intindichij versocunatami mashcai tucunchij. Ashtahuancarin Jehová Dios shina yuyangapajmi huaquin versocunata mashcana canchij. Chashnami Jehová Dios allita ruranata yachachichun saquishun. Caicunata pajtachishpaca curita tarij shinami Bibliapi valishca yuyaicunata tarishun. w23.02 págs. 11, 12 párr. 11

Daniel libropi nishca shinaca siete huatacuna o siete tiempocuna tucurijpimi Jesusca mandai callarina carca. Cunanca cai profecía ima shina pajtarishcata ricushun. (Daniel 4:​10-17). Chai siete tiempocuna o siete huatacunaca 2.520 huatacunatami ricuchin. Cai tiempoca Jesús manaraj huacharijpi 607 huatapimi callarirca. Cai huatapimi Babiloniocunaca Jerusalenpi Jehová Dios churashca tucuri reyta anchuchircacuna. Cai 2.520 huatacunaca 1914 huatapimi tucurirca. Chai huatapimi Jehová Diosca Jesustaca paipaj Gobiernopi mandachun churarca (Ezequiel 21:​25-27). ¿Cai profeciamantaca imatataj yachai tucunchij? Cai siete tiempocunamanta parlaj profeciata intindishpaca, Jehová Dios pai nishcacunata pai agllashca horaspi pajtachij cashcatami yachanchij. Jehová Diosca pai agllashca tiempopimi paipaj Gobiernotaca callarichirca. Shamuj punllacunapipish Jehová Diosca pai ña agllashca tiempopimi tucui profeciacunata pajtachinga. Chaimantami Jehová Diospaj punllapish mana qꞌuipayanata yachanchij (Habacuc 2:3). w22.07 pág. 3 párrs. 3-5