Noviembre

Diosta sirvijcunaca malas palabrascunataca mana ninachu canchij. Pero maipica mana yuyashcapimi ñucanchij shimicunahuan huauqui panicunata llaquichi tucunchijman. Por ejemplo, shujtaj razamanta, shujtaj culturamantaca mana allicunataca mana ninachu canchij. Ñucanchij shimicunahuan shujtajcunata ama mana alli sintichingapajpishmi cuidarina canchij. Animaj shimicunahuan shujtajcunata cushichishunchij. Shujtajcunamanta quejarishpalla pasanapaj randica paicunatami felicitana canchij. Israelitacunaca minishtirishca cosascunata charishpapish quejarishpallami pasajcuna carca. Shuj cutinca 10 runacunalla quejarijpica, tucuicunami Moisesmantaca quejari callarircacuna (Números 13:31–14:4). Ñucanchijca paicuna shinaca mana casha ninchijchu. Ashtahuanpish shujtajcunata sinchiyachingapajmi paicunata felicitasha ninchij. Chaimanta shujtajcunata animangapaj esforzarishunchij. w22.04 pág. 8 párrs. 16, 17

Ñaupa punllamantami Jehová Diosca jovencunataca paipaj amigo tucuchun ayudashca. Chaimantami cambaj huahuacuna munajpica espiritualmente huiñashpa catichun ayudanga (1 Corintios 3:​6, 7). Cambaj huahuacuna Jehová Diosta mana tucui shunguhuan sirvijpipish Jehová Diosca paicunatami ayudashpa catinga (Salmo 11:4). Paicuna ima hora cambianata yuyajpica Jehová Diosca atentomi canga (Hechos 13:48; 2 Crónicas 16:9). Shinallataj Jehová Diosca huahuacuna minishticui horas alli shimicunahuan parlachunmi canta ayudanga (Proverbios 15:23). Mana cashpaca cambaj huahuacunaman cꞌuyaita ricuchichun, ayudachunmi Jehová Diosca maijan huauqui panicunaman yuyaita cunga. Paicuna ña jatunyajpipish Jehová Diosca can imata yachachishcata yuyarichunmi ayudanga (Juan 14:26). Cambaj huahuacunaman ruraicunahuan, nishcacunahuan yachachishpa cati. Chashna catijpica Jehová Diosca cantaca achcatami bendicianga. w22.04 págs. 20, 21 párr. 18

Diabloca jahua pachaman ña mana ri tucushcamantami cai Allpapi caj ungido huauqui panicunataca catirashpa llaquichicushca. Chai ungido huauqui panicunaca Diospaj Gobiernopi mandangapajmi agllashcacuna can. Paicunaca Jesusmantapishmi tucuicunaman huillancuna (2 Corintios 5:20; Efesios 6:​19, 20). 1918 huatapica autoridadcunaca predicacionta pushaj 8 huauquicunatami yangamanta juchachircacuna. Carcelpipish achca tiempotami churarcacuna. Chashna tucushcamantami predicacionca chaipi tucurishca laya carca (Apocalipsis 11:​3, 7-11). 1919 huatapi, marzo quillapimi chai 8 ungido huauquicunaca carcelmanta llujshircacuna. Chai huashacarin autoridadcunaca paicunata yangamanta juchachishcacunatami anchuchircacuna. Shinapish Diabloca Diosta sirvijcunataca jatun yacuhuan apachicuj shinami catirashpa llaquichicushca (Apocalipsis 12:15). Diablo chashna llaquichicushcamantami ñucanchijpish sinchi feta charinata, ahuantashpa catinata minishtinchij (Apocalipsis 13:10). w22.05 págs. 5, 6 párrs. 14-16

Shuj muscuipica apóstol Juanca Jehová Diospaj Gobiernota apoyaj ishqui grupocunatami ricurca. Cai grupocunaca huiñai causana bendiciontami chasquirca. Punta grupopica 144.000 ungidocunami can. Paicunaca Jesushuan jahua pachapi mandangapajmi cai Allpamanta agllashcacuna can. Paicunaca Jesushuanmi cai Allpata mandangacuna (Apocalipsis 5:​9, 10; 14:​3, 4). Apóstol Juanca shuj muscuipimi jahua pachapi 144.000-cunataca Jesucristohuan Sión urcupi shayacujta ricurca (Apocalipsis 14:1). Apostolcuna causashca punllacunamanta cunancamami Jehová Diosca Jesushuan mandachun huaranga huaranga gentecunata agllashca (Lucas 12:32; Romanos 8:17). Paicunamantaca ña achcacunami huañushpa jahua pachapi causarishcacuna. Cai tiempopica 144.000 agllashcacunapuramantaca cai Allpapica ashacunallami tiyan (Apocalipsis 12:17). Chaimi jatun llaqui punllacunapica paicunaca jahua pachaman pushashca canga. Chaipimi caishuj agllashcacunahuan tandachishca canga. Cai ungidocunaca Diospaj Gobiernopimi Jesushuan mandangacuna (Mateo 24:31; Apocalipsis 5:​9, 10). w22.05 pág. 16 párrs. 4, 5

Jesusca paipaj discipulocunataca Yayitu Diospaj valishca cashcata intindichunmi ayudarca. Jesusca: ‘Cancunapaj umapi mashna ajchacuna tiyashcatapish Diosca allimi yachan’ nircami (Mateo 10:30). Maipica ñucanchijca imapaj mana valij shinami sintirishcanchij. Pero Jesús ima nishcata yuyarishpami Jehová Diospajca ñucanchijpish valishca cashcata intindinchij. Jehová Diosca ñucanchijtaca paita sirvichunmi saquishca. Ashtahuancarin Paraíso Allpapi causachunmi munan. Caicunata intindishpaca Yayitu Diospajca valishca cashcatami yuyarina canchij. 15 huatacuna huashamanca, La Atalaya revistapica cashnami nirca: “Ñucanchijcunaca mana orgullososchu tucuna canchij. Shinallataj imapaj mana valinichu nishpapish mana yuyanachu canchij. Ni dimastij alli cani, ni dimastij mana allichu cani” mana yuyanachu canchij ninmi. w22.05 págs. 24, 25 párrs. 14-16

Tucui huauqui panicunahuan alli apanacungapajmi esforzarina canchij (Mateo 5:9; Romanos 12:18). Chaita rurashpaca shuj paraisopi caj shina paicunahuanmi tandalla Diosta sirvishun. Jehová Diosca tucui huauqui panicunatami achcata cꞌuyan. Chaimantami paicunataca paipaj puebloman pushamushca (Juan 6:44). Ñucanchij huauqui panicunahuan alli apanacungapaj esforzarijpica Jehová Diosca cushillami sintirin (Isaías 26:3; Ageo 2:7). Jehová Diosca paita alli sirvichunmi achca bendicioncunata cushca. ¿Chaicunata aprovechangapajca imatataj rurana canchij? Bibliapi imata yachashcapimi cutin cutin yuyana canchij. Chaita rurashpaca cꞌuyaj, llaquij, perdonaj, mana utca pꞌiñarijmi tucushun (Romanos 12:10). w22.11 págs. 12, 13 párrs. 16-18

Jehová Dios ñucanchijta perdonashcata tucui shunguhuan crishpaca cushillami sintirinchij. Yuyaipipish, shungupipish tranquilomi sintirinchij. Jehová Dios perdonajllapimi chashna sintirinchij (Hechos 3:19). Jehová Diosca ñucanchijta perdonashpami paipaj amigos tucuchun saquin. Dios perdonajpica paipaj ñaupajpica ima juchata mana rurashca shinami canchij. Jehová Diosca pitapish perdonashpaca paipaj juchacunatami cungarin. Juchacunamantapish mana castigacunllachu (Isaías 43:25). Salmo 103:​12-pica: ‘Diosca inti llujshinatapish, inti huashicunataca carupimi churarca. Ñucanchij juchacunatapish chai shinallatajmi ñucanchijmanta anchuchishpa caruyachin’ ninmi. Caita yachashpaca Jehová Diostami achcata agradicinchij. Shungumantapishmi paita adorasha ninchij (Salmo 130:4). Jatun juchata rurashpa shungumanta arrepintirijpica Jehová Diosca ñucanchijtami perdonan. Paica ñucanchij shunguta, ñucanchij yuyaita alli rijsishcamantami perdonanata o mana perdonanata decidi tucun. w22.06 pág. 5 párrs. 12-14

Jehová Diosca ñallami tucui ungüicunata, llaquicunata, huañuitapish tucuchinga (Apocalipsis 21:​3, 4). Alli shungu gentecunatapish cai Allpata shuj Paraisota rurachunmi ayudanga (Salmo 37:​9-11). Paraíso Allpapicarin Jehová Diospaj alli amigosmi cai tucushun. Jehová Diosca ñucanchijmanca cai alaja esperanzacunatami cun. Pero ¿Jehová Dios cusha nishcacunata pajtachinataca imamantataj seguros canchij? Jehová Diosca pai nishcacunataca siempremi pajtachin. Chaimantami paipi tucui shunguhuan confianchij (Salmo 27:14). ¿Jehová Diospi tucui shunguhuan confiashcata ricuchingapajca imatataj rurana canchij? Pai nishcacunata pajtachingacamami pacienciahuan cushilla shuyashpa catina canchij (Isaías 55:​10, 11). Yayitu Diosta tucui shunguhuan sirvijpica Paica ñucanchijtaca achcatami bendicianga. w22.06 págs. 20, 25 párrs. 1, 18

Ñucanchijca Jehová Diospaj familiami canchij. Pai ñucanchij Yaya cashcamantami 1 Timoteo 5:​8-pi nishca shinaca tucui ñucanchijta cuidashpa catinga. Jehová Dios ñucanchijta cꞌuyashcamanta ñucanchij familiata mantiningapaj ayudagrishcatami crina canchij (Mateo 6:​31-33). Jehová Diosca cai Allpata rurashpaca mana ashalla cosascunatachu rurarca. Ashtahuanpish tucuicuna cushilla causachunmi tucui laya achca cosascunata rurarca (Génesis 2:9). Chaimantami pꞌichillata charishpapish chaita cushcamanta Jehová Diosta agradicina canchij (Mateo 6:11). Cai tiempopi mana achca cosascunata charijpipish Jehová Diosca ñami achcata bendiciashca. Shamuj punllacunapicarin ashtahuanmi bendicianga (Isaías 65:​21, 22). w22.06 págs. 15, 16 párrs. 7, 8

Jehová Diosmanta yachashpa catinataca tucuicunami minishtinchij. Apóstol Pablopish: “Paicunaca cutin cutin yuyanata yachashcamantami ima alli cashcata, ima mana alli cashcatapish yachaj chayashcacuna” nircami. Cunan tiempopica mapa ruraicuna tiyashcamantami Jehová Diosta cazunaca sinchi can. Chaimantami Jesusca ñucanchij feta sinchiyachisha nin. Jesús shinallatajmi ñucanchijpish Diospaj shutita jatunyachishcanchij (Juan 17:​6, 26). Por ejemplo, 1931 huatapica testigo de Jehovacuna nishca shutitami churarircanchij. Chashnami ñucanchijpaj Diospaj shuti importante cashcata ricuchircanchij (Isaías 43:​10-12). Ashtahuancarin ñaupa quillcashcacunapi Diospaj shuti maipi cashcata ricushpami, Traducción del Nuevo Mundo Bibliapipish Diospaj shutita churarcanchij. w22.07 págs. 11, 12 párrs. 11, 12

Bibliapica Diospaj Gobiernomantami verdadta yachanchij. Cai yachachishcacunataca Jesusca shuj tesorohuanmi chꞌimbapurarca. Paica: “Jahua pacha Gobiernoca allpapi pacashca tiyacuj yallitaj valishca tesorocuna shinami. Chai valishca cosascunata shuj runa japishpaca, chaillapitajmi alli pacashpa saquin. Chai qꞌuipaca cushilla cashcamantami paipaj tucui charishcacunata cꞌatushpa chai allpataca randirca” nircami (Mateo 13:​44, nota). Jesús parlashca runaca tesorotaca mana mashcacurcachu. Cai tesoroca chai runa charishca tucui cosascunamanta yallimi valirca. Cai tesoro valishca cashcamantami pai tucui charishcacunata cꞌatushpa chai allpata randirca. Cai tiempopica Jehová Diosta sirvina, Diospaj Gobiernomanta alaja causai tiyanata yachanami tucuimanta yalli valishca can. Ñucanchijpajca Diospaj amigos cana, paita cushichinaca shuj jatun bendicionmi can. Chaimantami Diosta sirvingapajca sacrificiocunataca ruranchijlla (Colosenses 1:10). w22.08 págs. 15, 17 párrs. 8, 9, 12

¿Diospaj ñaupajpi huainayana mana alli cashcataca Joseca ima shinataj yacharca? Moisesman cushca leypica Jehová Diosca “ama huainayangui” nircami. Shinapish chai leycuna tiyangapajca 200 huatacunami faltarca (Éxodo 20:14). Joseca chai leyta mana charishpapish huainayanamanta Jehová Dios imata yuyashcataca allimi yacharca. Por ejemplo, Joseca Jehová Dios shuj huarmi, shuj cꞌari cazarashpa shuj shinalla tucuchun munashcatami alli yacharca. Shinallataj paipaj bisabuela Sarahuanca ishqui reycunami siririsha nircacuna. Pero Jehová Dios chaita rurachun mana saquishcatami alli yacharca (Génesis 2:24; 12:​14-20; 20:​2-7). Chaicunata yuyarishpaca huainayana Jehová Diospaj mana alli cashcataca Joseca allimi intindirca. Jehová Diosta cꞌuyashcamanta, respetashcamantami Dios cushca mandashcacunatapish cazungapaj esforzarirca. w22.08 págs. 26, 27 párrs. 1, 2

Cai versopi nishca shinaca huañushcacunaca causaringami. Ñaupaca cai versoca jahua pachapi causarinamanta parlacushcatami crij carcanchij. Shinallataj cai verso 1918 huatamanta cutin causarij laya ashtahuan predicashpa catinamanta parlacushcatami crij carcanchij. Pero cunanca cai versoca Armagedón qꞌuipa cai Allpapi causarinamanta parlacushcatami intindinchij. ¿Daniel 12:​2-pica ‘huaquincunaca huiñaita causangapajmi causaringacuna’ nishpaca imatataj nisha nin? Armagedón qꞌuipa causarijcuna Jehová Diosmanta yachashpa, Jesusta, Jehová Diostapish cazushpa huiñai causaita chasquinatami nisha nin (Juan 17:3). w22.09 pág. 21 párrs. 6, 7

Jehová Diosca maijanpipish confiachunllaca mana munanchu. Ashtahuanpish paicunata alli rijsishpa paicunapi confiachunmi munan. Shujtajcunata respetangapajca tiempomi minishtirin, chai shinallatajmi shujtajcunapi confiangapajca tiempota minishtinchij. Pero ¿shujtajcunapi confiangapajca imatataj rurana canchij? Paicunatami alli rijsina canchij. Shinallataj tandanacuicunapipish paicunahuanmi parlana canchij. Huillanaman llujshishpapish paicunahuanmi cana canchij. Paicunamanpish pacienciatami ricuchina canchij. Paicunallataj confianalla cashcata ricuchichunpishmi oportunidadta cuna canchij. Pita mana alli rijsishpaca ñucanchij ima shina sintirishcata, imata yuyashcataca quizás mana parlanchijchu. Pero paita asha asha rijsishpa catishpaca ñucanchij ima shina sintirishcatami asha asha parlai callarishun (Lucas 16:10). Pero shuj huauqui o shuj pani ñucanchij cushca confianzata mana valichijpi, shujtajcunaman ñucanchijmanta tucuita parlashpa purijpica, ¿imatataj rurana canchij? Paipi ña mana nunca confiana cashcataca mana yuyanachu canchij, ashtahuanpish asha tiempo pasachunmi saquina canchij. Shinallataj chai huauquimanta o chai panimantaca shujtajcunapi confianatapish manataj saquinachu canchij. w22.09 pág. 4 párrs. 7, 8

Miqueas shuti ancianotaca shujtaj ancianocunami mana alli tratarcacuna. Chashna tratajpipish Miqueasca mana resintirishcalla, mana llaquilla saquirircachu. Chaipaj randica Jehová Diostami paipaj espíritu santota cuchun, chaita ahuantangapajpish fuerzasta cuchun mañarca. Ñucanchij publicacioncunapipish ahuantashpa catingapajmi investigarca. ¿Huauqui Miqueasmantaca imatataj yachai tucungui? Cantapish shuj huauqui o shuj pani llaquichijpica mana rato pꞌiñarinachu cangui. Resintirishcalla o llaquillapish mana saquirinachu cangui. Huauqui o pani chai punllapi ima llaquita, ima problemata charishcataca mana yachanguichu. Chaimantami Jehová Diosta mañashpa chai huauquita o panita intindingapajca ayudachun mañana cangui. Chai huauqui o pani canta mana llaquichisha nishcatami alli intindingui, paitapish shungumantami perdonangapaj esforzaringui (Proverbios 19:11). Jehová Diosca can ima shina sintirishcataca allimi yachan. Chaimantami canmanca chai llaquita ahuantashpa catichun fuerzasta cunga (Eclesiastés 5:8). w22.11 pág. 21 párr. 5

Jehová Diosta sirvijcunahuan apanacui. Alli amigocunata charinami espiritualmente sinchi cachun ayudanga (Proverbios 13:20). Julien shuti ancianoca: “Jovenraj cashpaca predicacionman llujshishpami alli amigocunata tarircani. Paicunaca siempremi cushilla carcacuna, ñucatapish cushilla huillachunmi ayudarcacuna. Shinallataj ñuca edadta charij amigocunallahuan tandanacushcamanta shujtaj alli amigocunata charina oportunidadta chingachicushcatami cuentata curcani. ¿Pero Jehová Diosta sirvichun cambaj amigo mana ayudajpica imatataj rurana cangui? Apóstol Pabloca congregación ucupi mana tucuicuna Jehová Diosta alli sirvicushcatami yacharca. Chaimantami Timoteotaca paicunamanta caruyachun mandarca (2 Timoteo 2:​20-22). Jehová Diospaj amigo canaca achca valishcami can, chaimantami pipish paimanta caruyachichunca mana saquina canchij. w22.08 págs. 5, 6 párrs. 13-15

Diospaj mandashcacunata pꞌiñajcuna shinaca mana casha ninchijchu. Ashtahuanpish ñucanchijca Diospaj mandashcacuna ñucanchij allipaj cashcatami seguros canchij. Chaita crishpa catingapajca Diosta mana cazujcunahuan ima tucushcapimi yuyana canchij. Dios cushca consejocunata mana cazuj gentecunaca achca llaquicunapimi urmancuna. Cutin ñucanchijca Jehová Diosta tucuipi cazushcamantami alaja, cushilla causaita charinchij (Salmo 32:​8, 10). Jehová Diosca tucuicunamanmi alli yachaita cusha nin. Pero chaita chasquichunca pita mana obliganchu. Shinapish alli yachaita mana chasquijcunahuan ima tucunatami huillan (Proverbios 1:​29-32). Paicunaca achca llaquicunata, achca problemacunatami charingacuna. Qꞌuipacarin huiñaipajmi tucuchishca cangacuna. Cutin Dios cushca alli yachaita chasquijcuna, chaita pajtachijcunaca achca bendicioncunatami chasquingacuna. Jehová Diosca: “Ñuca yachachishcata cazushpaca, imata mana manchashpami causanga. Ima llaqui japinata mana manchashpa, sumajtami causancuna” ninmi (Proverbios 1:33). w22.10 págs. 20, 21 párrs. 11-13

Jehová Diosta manchashpa, shungumanta respetashpaca paitaca mana llaquichisha nishunchu (Proverbios 16:6). Bibliapica imacuna alli cashcata, imacuna mana alli cashcatami yachachin. Chaicunata pajtachingapajmi esforzarina canchij (2 Corintios 7:1). Jehová Dios munashcacunata rurashpa, pai pꞌiñashcacunata mana rurashpaca contentosmi causashun (Salmo 37:27; 97:10; Romanos 12:9). Maijanca tal vez Jehová Dios ima alli cashcata, ima mana alli cashcata decidingapaj derechota charishcataca allimi yachan. Pero mana yachanallachu can, ashtahuanpish shungumantami cazuna can (Romanos 12:2). Ñucanchijca shungumantami Jehová Diosta cazuna canchij. Pai mandashcacuna ñucanchij allipaj cashcatami tucui shunguhuan crina canchij (Proverbios 12:28). Rey Davidca Jehová Diostaca: “Ñucamanca causaiman apaj ñantami ricuchingui. Cambaj alli ladopica huiñaita sumajmari. Cambaj ñaupajpica cushicucunallami canga” nircami (Salmo 16:11). w22.10 pág. 8 párrs. 9, 10

Jesusca humildemi carca. Paica manaraj cai Allpaman shamushpaca paipaj Yayahuanmi achca cosascunata rurarca. Colosenses 1:​16-pica: “Tucui ima shujtaj tiyashcacunatapish paipaj Churipaj cachunmi paillahuantaj rurarca” ninmi. Jesusca bautizarishpaca jahua pachapi paipaj Yayahuan imacunallata rurashcatami yuyarishcanga (Mateo 3:16; Juan 17:5). Pero chai tucuita yuyarishpapish paica shujtajcunata yalli cashcataca mana yuyarcachu. Jesusca paipaj discipulocunataca: ‘Ñucaca sirvishca cangapajca mana shamurcanichu. Ashtahuanpish shujtajcunata sirvingapaj, ñuca causaita cushpa achcacunata randishpa quishpichingapajmi shamurcani’ nircami (Mateo 20:28). Ashtahuancarin Jesusca paipaj munaimanta imatapish mana rurai tucushcatami intindirca. ¿Manachu ñucanchijpish Jesús shinallataj humildes casha ninchij? w22.05 pág. 24 párr. 13

Jehová Diosca ñucanchijta perdonangapajca imamanta juchata rurashcatami ricun. Maijancunaca mana allita ruracushcata yachashca jahuami mana allita rurancunalla. Jesús nishca shinaca paicunataca Jehová Diosca manachari perdonanga (Lucas 12:​47, 48; Marcos 3:29; Juan 9:41). ¿Pero maipica chashna pandarijpipish Jehová Diosca ñucanchijtaca perdonangachu? Ari, perdonangami. Pero Jehová Diosca ñucanchijta perdonangapajca shungumanta arrepintirishcata o mana arrepintirishcatami ricun. Shungumanta arrepintirishpaca ñucanchij yuyaipipish, shungupipishmi cambiana canchij. Chaipajca alli yuyaicunata, Jehová Diospajman cꞌuchuyana munaitapishmi charina canchij. Shungumanta arrepintirishpaca mana allicunata rurashcamanta o alli cosascunata mana pajtachishcamantami dimastij llaquilla sintirinchij. Ashtahuancarin Jehová Diosmanta caruyashcata yachashcamantami shungupipish achcata llaquirinchij. w22.06 págs. 5-7 párrs. 15-17

Ñucanchijpaj contracunaca Dios churashca pushaj huauquicunamanta llullacunatami nincuna (Salmo 31:13). Huaquin huauquicunataca yangamanta juchachishpami carcelpi churashcacuna. Apóstol Pablotapishmi yangamanta juchachishpa carcelpi churarcacuna. Apóstol Pablo Roma llajtapi prezupi cajpica huaquin huauqui panicunaca paitami saquircacuna (2 Timoteo 1:​8, 15; 2:​8, 9). Ima laya cajpipish apóstol Pabloca paicunamanta huañunata mana manchashpa achca llaquicunatami ahuantashca carca. Chaimi paicuna saquijpica Pabloca achcata llaquirishcanga (Hechos 20:​18-21; 2 Corintios 1:8). Ñucanchijca chai huauqui panicuna shinaca mana casha ninchijchu. Chaimantami pushaj huauquicunata carcelpi churacushcata ricushpaca mana mancharina canchij. Diabloca cai pushaj huauquicuna Diosta sirvinata saquichunmi munan. Ñucanchijpish chaita ricushpa manchaita charichunmi munan (1 Pedro 5:8). Pushaj huauquicunata ayudanataca manataj saquinachu cangui (2 Timoteo 1:​16-18). w22.11 págs. 16, 17 párrs. 8-11

Jesuspaj ladopi caspipi huarcushca arrepintirishca shuhuaca judiomi cashcanga. Judiocunaca shujlla Dios tiyashcatami crircacuna. Cutin shujtaj llajtamanta gentecunaca achca dioscunatami adorajcuna carca (Éxodo 20:​2, 3; 1 Corintios 8:​5, 6). Cai arrepintirij shuhuaca judio mana cashca cashpaca “¿manachu ñucanchij dioscunata manchangui?” nishpami tapunman carca. Shinallataj Jesusca chingarishca ovejacuna shina caj israelitacunata ayudangapajmi shamushca carca. Caishuj llajtacunamanta gentecunata predicangapajca mana shamushcachu carca (Mateo 15:24). Jehová Diospish israelitacunamanca huañushcacunata causachinatami huillashca carca. Chaita crishpami arrepintirishca shuhuaca Jehová Dios paipaj Gobiernopi mandachun Jesusta causachinapi crirca. Ashtahuancarin Jehová Dios paitapish causachinapimi crishcanga. Cai arrepintirishca shuhuaca judío cashcamantami Jehová Dios Adanta, Evata shuj paraisopi churashcata yacharca. Chaimantami Jesús “ñucahuanmi Paraisopi cangui” nijta uyashpaca cai Allpapi shuj Paraisopi canata intindishcanga (Génesis 2:15). w22.12 págs. 8, 9 párrs. 2, 3

Ñucanchijca espíritu santota chasquishpallami gentecunaman predicashpa cati tucunchij. ¿Imamantataj chashna ninchij? Ñucanchijca espíritu santota chasquishcamantami, Diablo ama predicachun jarcaicunata churajpipish, pai achca poderta charijpipish mana saquirinchij (Apocalipsis 12:​9-11, 17). Mana manchashpa gentecunaman predicashpaca Diablotami mishanchij, paita mana manchashcatapishmi ricuchinchij. Chaimi Jehová Dios ñucanchijman paipaj espíritu santohuan fuerzasta cucushcata, bendiciacushcatapish intindinchij (Mateo 5:​10-12; 1 Pedro 4:14). Jehová Dios Ezequielta sinchiyachishca shinallatajmi ñucanchijmanpish paipaj espíritu santota cushpa sinchiyachinga. Chashnami ima jarcaicuna ricurijpipish tucuita ahuantai tucushun (2 Corintios 4:​7-9). Shinaca ¿Diospaj espíritu santota chasquishpa catingapajca imatataj rurana canchij? Jehová Diostami cutin cutin shungumanta mañashpa catina canchij. w22.11 págs. 5, 6 párrs. 10, 11

Huauqui panicunata cꞌuyashcata ricuchingapajca paicunahuanmi alli apanacuna canchij. Chaimantami Jehová Dios shinallataj paicunata perdonangapaj listos cana canchij. Jehová Diosca ñucanchij juchacunamanta paipaj cꞌuyashca Churi huañuchunmi saquirca. Chaita yuyarishpaca ¿manachu ñucanchijpish, huauqui panicuna pandarijpipish o llaquichijpipish perdonanalla canchij? Ñucanchijca Jesús parlashca millai sirvij shinaca mana casha ninchijchu. Chai millai sirvijpaj amoca paitaca shuj jatun dibitami perdonashca carca. Chashnapish chai millai sirvijca shujtaj sirvij paiman ashallata dibijpipish mana perdonasha nircachu (Mateo 18:​23-35). Shinaca congregacionpi maijanhuan ima problemata charishca cashpaca ¿Jesús huañushcata yuyarina tandanacui manaraj chayajpi paihuan alli tucungapajchu canraj esforzaringui? (Mateo 5:​23, 24). Chaita rurashpaca Jehová Diostapish, Jesustapish cꞌuyashcatami ricuchingui. w23.01 pág. 29 párrs. 8, 9

Ancianocunaca huauqui panicuna imata minishtishcata yachangapajmi huaquin tapuicunata rurana cancuna. Pero huauqui panicunata ama pingachingapajmi cuidadota charina can (Proverbios 20:5). Por ejemplo, “¿huauqui panicunaca micungapajpish, jambicunata randingapajpish cullquitachu charincuna? ¿Huasi illaj, trabajo illajchu saquirishcacuna? ¿Gobiernopaj ayudata chasquingapaj ñucanchij ayudatachu minishtincuna?” nishpami tapurina cancunaca. Jehová Diosca tucuicuna ayudanacuchunmi munan (Gálatas 6:10). Uchilla cosascunata rurashpami shujtajcunata animai tucunchij. Por ejemplo, huahuacunaca shuj dibujitota rurashpami ungushca huauqui o paniman cui tucuncuna. Jovencunapish huauqui panicunata ayudangapajmi shuj mandadota rurai tucuncuna. Cutin shujtajcunaca ungushca huauqui panicunapajmi micunata apai tucuncuna. Ancianocunatami agradicingapaj shuj tarjetitata rurai tucunchij. Tucuicunami 1 Tesalonicenses 5:​11-pi ima nishcata pajtachina canchij. Chaipica: “Chaimanta ña ruracushca shinallataj caishuj chaishuj animanacushpa, sinchiyarinacushpa catichij” ninmi. w22.12 págs. 22-24 párrs. 2, 5, 6

Saduceocunaca Bibliapaj callari cinco librocunatami alli rijsijcuna carca. Chashna rijsishpapish chai librocunapaj valishca yachachishcacunapimi mana crircacuna. Por ejemplo, saduceocunaca Jesusta causarinamanta tapushpami pandachisha nircacuna. Chaimi Jesusca paicunataca: “¿Huañushcacuna causarinamantaca Moisés quillcashca libropica manachu liyishcanguichij? Diosca zarza yura chaupimantaca: ‘Ñucami Abrahanpaj, Isaacpaj, Jacobpaj Dios cani’ nircami” nishpa cutichirca (Marcos 12:​18, 26). De seguromi saduceocunaca cai shimicunata achca cutincuna liyishca cangacuna. Chashnapish Jesús ricuchishca shinaca saduceocunaca causarinamantami mana intindishcacuna carca (Lucas 20:38). ¿Saduceocunamantaca imatataj yachai tucunchij? Bibliata liyicushpaca shuj versomanta o chaipi tiyaj parlocunamanta tucuita intindingapajmi esforzarina canchij. Bibliapica huaquin yachachishcacunaca mana ricunallachu can. Pero chai yachachishcacuna valishca cashcamantami chaicunata taringapaj esforzarina canchij. Chai valishca yachachishcacunata tarishpaca shuj valishca curita tarishca shinami cushilla sintirishun. w23.02 pág. 11 párrs. 9, 10

Cai punllapaj versopi parlashca testigocunaca achca llaquicunata charishpapish Jehová Diosta sirvishpami catircacuna (Hebreos 11:​36-40). Paicunaca Jehová Dios tucui nishcacuna ima shina pajtarishcata mana ricushpapish Jehová Diospi confiashpami catircacuna. Paicunaca shuj punlla Jehová Dios tucui nishcacuna pajtarinatami tucui shunguhuan crircacuna (Hebreos 11:​4, 5). Ñucanchijpish paicunapaj alli ejemplomanta yachashpaca Jehová Diospimi confiashpa catishun. Llaquicunaca ashtahuan mirarishpami catin (2 Timoteo 3:13). Diablopish Diosta sirvijcunataca ashtahuanmi llaquichisha ninga. Pero ima llaquicuna shamujpipish tucui shunguhuanmi Jehová Diosta sirvishpa catina canchij. Ñucanchijca causaj Diospimi shunguta churashcanchij (1 Timoteo 4:10). w22.06 pág. 25 párrs. 17, 18

Jehová Diosta sirvishpa catingapajmi ñucanchij saludta alli cuidasha ninchij (Marcos 12:30). Chaimantami ñucanchij saludta ima ama llaquichichun alli cuidanchij (Romanos 12:1). Chashna cuidarishpapish maipica ungurinchijllami. Shinapish Jehová Dios causaita cushcamanta, paita agradicisha nishcamantami ñucanchij saludta cuidangapaj esforzarishpa catinchij. Mayorllacuna cashcamanta o ungushcacuna cashcamantachari jovencuna laya o sanocuna laya Yayitu Diosta ña mana sirvishpa catinchij. Chaimantachari maipica desanimados, llaquilla sintirinchij. Chashna sintirishpapish ñucanchij saludtaca mana descuidanachu canchij. ¿Imamantataj ñucanchij saludta cuidashpa catina canchij? Mayorllacuna cashpapish o ungushcacuna cashpapish mandaj David shinami Yayitu Diosta sirvishpa cati tucunchij. Jehová Dioscarin ñucanchijcuna juchayujcuna cajpipish valorashpami catin (Mateo 10:​29-31). Ñucanchijcuna huañujpipish paica ñucanchijta causachinatami munan (Job 14:​14, 15). Caicunata intindishpaca causacushparajmi ñucanchij causaita, ñucanchij saludta cuidashpa catingapaj esforzarina canchij. w23.02 págs. 20, 21 párrs. 3-5

Yallitaj achca shujtaj ovejacunapaj shuticunaca causaita chasquinapaj libropimi quillcashca can. Armagedón huashapish paicunapaj shuticunaca quillcashcami canga (Apocalipsis 7:14). Jesusca “cai gentecunaca ovejitacuna layami can, paicunami huiñai causaita chasquingacuna” nircami (Mateo 25:46). Pero shujtaj ovejacunaca Armagedón qꞌuipallaca huiñai causaitaca mana chasquingacunachu. Jesús cai Allpata 1.000 huatacunata mandacushpaca paicunata michishpami causaita cuj pugyu yacucunaman pushanga. Chai tiempopica Jesusta cazujpi, Yayitu Diosta sirvijpica shujtaj ovejacunapaj shuticunapish huiñaipajmi quillcashca canga (Apocalipsis 7:​16, 17). Chivocuna laya mana cazuj gentecunapaj shuticunaca causaita chasquinapaj libropica mana canchu. Jesusca paicunataca Armagedón punllapica huiñaipajmi tucuchinga (Mateo 25:46). Apóstol Pablopish, “Jesusmi paicunataca juzgashpa huiñaipaj chingachinga” nircami (2 Tesalonicenses 1:9; 2 Pedro 2:9). w22.09 pág. 16 párrs. 7, 8

Bibliapica asingapajpish, bailangapajpish punllami chayan ninmi. Chaimantami Jehová Diosca alaja lugarcunata rurashca. Huaquin familiacunaca campopi cashpa, urcucunapi cashpa, playapi cashpami tranquilos, tandalla, alajata pasancuna. Tucui vidami Paraíso Allpapica yaya mamacunapish, huahuacunapish Jehová Diospaj rurashcacunahuanca cushilla causangacuna. Chaipi cashpaca ñucanchijpish animalitocunataca ña mana manchashunchu. Paicunapish ñucanchijtaca ña mana manchangacunachu (Isaías 11:​6-9). Shinapish yaya mamacuna cunanmantapachami cancunapaj huahuacunamanca Yayitu Diospaj rurashcacunata ricuchishpa pai ima shina cashcata yachachina canguichij (Salmo 22:26). Chashna yachachijpica cancunapaj huahuacunapish Jehová Diostaca rey David shinami ninata munangacuna. Rey Davidca Jehová Diostaca: “Quiquin shinaca pi mana tiyanchu. Quiquinpaj rurashcacunahuanca pi rurashcacunataj igualangari” nircami (Salmo 86:8). w23.03 pág. 25 párrs. 16, 17