Enero

Jesusca chai huarmita ricushpa shungumantami llaquirirca (Lucas 7:13). Pero Jesusca llaquirishpallaca mana saquirircachu. Chaipaj randica chai huarmitami ayudarca. Paica: “Ama ashtahuan huacaichu” nishpami cꞌuyaihuan rimarca. Ashtahuanpish chai huarmipaj churita causachishpami paiman curca (Lucas 7:​14, 15). ¿Jesús rurashca milagromantaca imatataj yachai tucunchij? Ñucanchijca Jesús shinaca huañushcacunata mana causachi tucunchijchu. Pero shujtajcuna paicunapaj familiacunata o amigocunata huañuipi chingachijpica paicunata llaquishpami ayudangapaj listos cana canchij. Chaipajca paicuna ima shina sintirishcata o imata minishtishcatami alli ricuna canchij. Qꞌuipaca ñucanchij shimicunahuan, ruraicunahuanpishmi cushichingapaj, ayudangapaj listos cana canchij (Proverbios 17:17; 2 Corintios 1:​3, 4; 1 Pedro 3:8). Ashalla shimicunata cꞌuyaihuan nijpipish o ashallacunapi paicunata ayudajpipish paicunaca allimi sintiringacuna. w23.04 págs. 5, 6 párrs. 13-15

Jesusca paipaj amigo Lázaro ña huañushcata yachashpapish maipi cashcapi ishqui punllacunahuanmi saquirinata decidirca. Qꞌuipaca ña Betania llajtaman chayajpica Lazaroca ñami chuscu punllacunata pambana jutcupi churashca carca. Lázaro ña huañushca cajpipish Jesusca Yayitu Dios causachingapaj poderta charishcatami tucuicunapaj ñaupajpi ricuchigrirca (Juan 11:​6, 11, 17). ¿Caicamaca imatataj yachai pudinchij? Mariapish, Martapish Jesustaca paicunata ayudanaman richunca mana mañarcacunachu. Paicunaca paicunapaj turi Lázaro huañushcata Jesusman huillachunllami cacharcacuna (Juan 11:3). Lázaro huañujpica Jesusca carupi cashpapish paitami causachi tucunmanlla carca. Pero chaita ruranapaj randica Jesusca paipaj amigacuna Mariahuan, Martahuan cangapajmi Betania llajtaman rinata decidirca. ¿Canpish Jesús shina shuj alli amigotachu charingui? Cambaj alli amigoca ima llaqui japijpipish canta ayudangapajmi listo can. Ñucanchijpish Jesús shinallataj alli amigos cangapajmi esforzarina canchij (Proverbios 17:17). w23.04 pág. 10 párrs. 10, 11

Achca llaquicunahuan cashpa, dimastij llaquilla sintirishpaca “Jehová Diosca cai Allpataca mana nunca shuj Paraisota rurangachu” nishpachari yuyashun. Maipica chashna yuyanaca normalmi can. Caipi yuyashun. Achca semanacunata tamyashpa pasacujta ricushpaca “intica mana llujshipai layami ricurin” nishpachari yuyanchij. Pero mana chashnachu can. Intica siempremi llujshinga. Chashnallatajmi yallitaj desanimarishca cashpaca maipica panda yuyaicunata chari tucunchijlla. Pero ñucanchij fe sinchi cajpica Jehová Diospaj nishcacunata pajtachinataca seguromi cashun (Salmo 94:​3, 14, 15; Hebreos 6:​17-19). Jehová Dios cusha nishcapi confiashpaca paita sirvinatami punta lugarpi churashun. Predicangapajpish sinchi fetami charina canchij. Paraisomanta huillajpica achca gentecunaca “chai alli huillaicunaca mana ciertochu canga” nishpami yuyancuna (Mateo 24:14; Ezequiel 33:32). Pero chai gentecuna shina ama yuyangapajmi cuidadota charina canchij. Paicuna shina ama cangapajca ñucanchij fetami sinchiyachishpa catina canchij. w23.04 págs. 27, 30 párrs. 6, 7, 14

Canca, ¿“Jehová Diosca ñuca mañashcacunataca cutichingachushi” nishpachu yuyashcangui? Achca huauqui panicunami llaquicunahuan chꞌimbapuracushpaca chashna nishpa tapurishcacuna. Ñucanchijpish llaquicunata charishpaca chashnami tapurishcanchij. ¿Jehová Dios ñucanchij mañashcacunata cutichishcataca ima shinataj yachanchij? Bibliapi nishca shinaca Jehová Diosca ñucanchijtaca achcatami cꞌuyan. Paipajca achca valishcami canchij (Ageo 2:7; 1 Juan 4:10). Jehová Diosca llaquicunata ahuantachun, paimanta ama caruyachunmi ayudasha nin. Chaimantami paica, ‘cancunata ayudachun ñucata mañaichij’ nin (1 Pedro 5:​6, 7). Bibliapica Jehová Dios paita sirvijcunapaj mañaicunata ima shina cutichij cashcatami yachachin. w23.05 págs. 8, 9 párrs. 1-4

Mariaca Jehová Diospaj alli amigami carca. Paica sinchi feta charingapajca paillatajmi esforzarij carca. Chaipajca Diospaj Shimitami alli estudiaj carca. Shinallataj Diospaj nishcacunapi yuyangapajmi tiempota llujchij carca (Lucas 2:​19, 51). Mariaca Jehová Diosta tucui shunguhuan cꞌuyaj cashcamantami alli huarmi carca. Cunan punllacunapica achca huarmicunami paipaj ejemplota catingapaj esforzarincuna. Por ejemplo, pani Emikoca: “Soltera cashpaca ñucallatajmi Bibliata ima shina, ima hora estudianata ricuj carcani. Pero ña cazarajpica ñuca cusami ñucanchijmanta mañai callarirca. Shinallataj familiapi tucuicuna espiritualmente sinchi cachunmi ricui callarirca. Chaimi ñucallataj Diospajman cꞌuchuyangapaj esforzarinapaj randica ñuca cusallata shuyai callarircani. Pero ñucallataj Jehová Diospajman cꞌuchuyashpa catingapaj esforzarina cashcatami cuentata curcani. Chaimantami cunanca ñucalla Bibliata estudiangapaj, chaipi nishcacunapi yuyangapaj, Jehová Diosta mañangapaj tiempota surcuni” nircami (Gálatas 6:5). Huarmicuna, Jehová Diospaj alli amigacuna tucungapaj esforzarijpica cancunapaj cusacunaca achcatami cꞌuyangacuna, felicitangacunapish (Proverbios 31:30). w23.05 págs. 21, 22 párr. 6

Tucuicunami Yaya Diosta manchanata yachana canchij. Chaipajca Jehová Dios imalla rurashcacunatami ricuna canchij. Chaicunata ricushpami Jehová Dios tucuita yachaj, poderyuj, cꞌuyaj cashcata cuentata cushun. Chaita cuentata cushpami paitaca shungumanta respetanata, cꞌuyanata munashun (Romanos 1:20). Shinallataj Yaya Diosta manchanata yachangapajca paitami shungumanta mañana canchij. Jehová Diosta cutin cutin mañashpaca pai ñucanchij mañaicunata uyaj cashcatami seguros cashun. Mana alli ruraicunamanta caruyangapajpishmi fuerzasta charishun. Shinallataj jarcaicunata, llaquicunata ahuantangapaj fuerzasta, alli yuyaita cuchun mañashpaca Jehová Dios tucuita yachaj, tucui poderta charij cashcatapishmi yuyarishun. Cutin, ñucanchijta quishpichingapaj paipaj Churita cachashcamanta pagui nishpa mañashpaca Jehová Dios yallitaj cꞌuyaj cashcatapishmi yuyarishun. w23.06 pág. 15 párrs. 6, 7

Jehová Diosmi mandashcacunata cuj can. Paica alli, intindinalla mandashcacunatami cun. Por ejemplo, punta siglopica cuerpo gobernante huauquicunaca espiritualmente sinchi cangapaj imallata rurana cashcatami nircacuna: 1) Yanga dioscunata adoranapaj randica, Jehová Diosllata adorana cashcatami nircacuna, 2) yahuar Jehová Diospaj valishca cashcatami yuyachircacuna, y 3) Diospaj Shimipi nishcacunata cazuna cashcatami nircacuna (Hechos 15:​28, 29). ¿Ñucanchijpish cai quimsa yuyaicunata pajtachicushcataca ima shinataj ricuchinchij? Jehová Diosllatami adorana canchij. Paica israelitacunamanca ñucallatami adorana canguichij nishpami mandarca (Deuteronomio 5:​6-10). Shinallataj Jesusta Diablo urmachisha nijpica paica Jehová Diosllatami adorana canchij nircami (Mateo 4:​8-10). Chaimantami ñucanchijpish yanga dioscunataca mana adorana canchij. Ashtahuanpish religionta pushajcunata, politicocunata, famoso gentecunatapish diosta shinaca mana ricunachu canchij. Paicunata adoranapaj randica tucuita ruraj Diosllatami adorana canchij (Apocalipsis 4:11). w23.07 págs. 14, 15 párrs. 3, 4

Diosta mana sirvijcunaca huainayanallapi, pornografiata ricunallapi yuyashpami causancuna (Efesios 4:19). Pero ñucanchijcunaca Jehová Diosta ashtahuan cꞌuyangapaj, millai ruraicunamanta caruyangapajmi esforzarishpa catina canchij. Tucuicunami Proverbios 9-manta achcata yachai tucunchij. Chaipi parlaj ishqui huarmicunaca yachai illajcunatami paicunapaj huasicunaman shamushpa micuchun invitancuna (Proverbios 9:​1, 4-6). Cunanca paicunapaj huasicunaman yaicujcuna ima tucunatami yachashun. Chꞌahuanyashca, yuyai illaj huarmimanta parlashpa callarishun (Proverbios 9:​13-18). Paica yachai illajcunataca “caiman shamuichij” nishpami paihuan alli pasachun invitan. ¿Pero paipaj huasiman yaicujcunahuanca imataj tucunga? Bibliapica paicunaca “chaiman rishcamanta, taucacuna huañushcataca mana yachancunachu” ninmi. Shinallataj, chaipica: “Chai huarmicunapaj huasica, huañuipi urmanallami tiyacun” ninmi (Proverbios 2:​11-19). Proverbios 5:​3-10-pipishmi maipish cachun causaj huarmimanta cuidarichun nin. Shinallataj chaipica: “Paipaj chaquica huañuimanmi uriyacun” ninmi. w23.06 pág. 22 párrs. 6, 7

Ancianocunaca shujtajcunata intindijcuna, respetajcuna cashcatami ricuchina can (1 Timoteo 3:​2, 3). Por ejemplo, shuj ancianoca shujtaj ancianocunata yalli edadta charishcallamanta tucuicuna pai munashcata rurachunca mana shuyanachu can. Ashtahuanpish ancianocunaca, Jehová Dios tucui ancianocunaman espíritu santota cushpa alli decisioncunata japichun ayudai tucushcatami yuyarina can. Shinallataj huaquinpica shujtaj ancianocuna nishcacunahuanca mana de acuerdochu canga. Pero chai ancianocunapaj nishcacuna, Bibliapi nishcacunahuan de acuerdo cajpica shungumantami apoyanalla can. Shujtajcunata intindingapaj esforzarishpaca achca bendicioncunatami charishun. Por ejemplo, huauqui panicuna chꞌican chꞌican cajpipish, chꞌican chꞌican costumbrecunata charijpipish paicunahuanca allimi apanacushun. Ashtahuantajca Jehová Dios shina intindijcuna cangapaj esforzarishcamantaca cushillami causashun. w23.07 pág. 25 párrs. 16, 17

Danielca verdadta yachasha nishcamantami estudiaj carca. Shinallataj paica humildemi carca. Chaimantami paica Jehová Dios paita cazujcunallaman Bibliapi nishcacunata intindichij cashcata reconocirca (Daniel 2:​27, 28). Danielca siempremi Jehová Diospaj ayudata mashcaj carca. Chashnami humilde cashcata ricuchirca (Daniel 2:18). Ashtahuanpish Danielca Diospaj Shimitaca allimi estudiaj carca. Pai causashca punllacunapica Bibliapi tiyaj huaquin librocunallami tiyarca. Pero Danielca chai librocunatami alli estudiaj carca (Jeremías 25:​11, 12; Daniel 9:2). ¿Danielmantaca imatataj yachanchij? Ñucanchijpish alli munaihuanmi estudiana canchij. ¿Canca Bibliapi tiyaj profeciacunataca imamantataj estudiangui? ¿Jehová Diosmanta yachasha nishcamantachu estudiangui? Chashna cajpica Jehová Diosllatajmi alli intindichun ayudanga (Juan 4:​23, 24; 14:​16, 17). Shinapish maijan gentecunaca Bibliapi nishcacuna Jehová Diosmanta mana shamushcata ricuchingapajllami profeciacunataca estudiancuna. Paicunaca paicunallataj ima alli cashcata, ima mana alli cashcatami agllasha nincuna. Ashtahuanpish paicuna munashca shinami imatapish rurasha nincuna. Pero ñucanchijcunaca paicuna shinaca mana canachu canchij. w23.08 págs. 9, 10 párrs. 7, 8

Shujtajcunahuanca mana compararinachu cangui (Gálatas 6:4). Shujtajcunahuan compararishpaca caishuj chaishujmi mishanacui, envidianacui callarishun (Gálatas 5:26). Tal vez shujtajcuna shina tucuita rurangapaj o tucuita charingapajmi yallitaj esforzari callarishun. Pero mashnata esforzarishpapish manachari paicuna shina tucuita rurai tucushun. Ashtahuanpish ñucanchij shuyacushca ‘mana utca pajtajpica shungu pꞌaquirishpami llaquirishun’ (Proverbios 13:12). Shinallataj shujtajcuna shina mana tucuita chari tucushcata cuentata cushpaca huiñai causaiman apaj carrerapica ña mana utca callpanata munashunchu. Jehová Diosca can rurai pudishcallata rurachunmi mañan. Chaimanta shujtajcuna shina tucuita rurangapajllaca mana yallitaj esforzarinachu cangui (2 Corintios 8:12). Shinallataj Jehová Diosca cantaca shujtajcunahuanca mana comparanchu (Mateo 25:​20-23). Canca tucui shunguhuan Jehová Diosta sirvingapaj, llaquicunata ahuantangapajmi esforzaricungui. Chaimantami can rurai pudishcallata ruracujta ricushpaca Jehová Diosca cushilla sintirin. w23.08 pág. 29 párrs. 10, 11

¿Diosca Sansón mañashcataca ima shinataj cutichirca? Paica shuj milagrota rurashpami shuj jutcuta pascashpa yacuta llujshichirca. ‘Sansonca chai yacuta ubyashpami cutinllataj fuerzata japirca’ (Jueces 15:19). Samuel Jueces librota quillcai horascamami chai jutcumantaca yacuca llujshishpa catirca. Chaimantami israelitacunaca chai yacuta ricushpaca llaqui punllacunapi Jehová Diospi confiana cashcata yuyarishcangacuna. ¿Sansonmantaca imatataj yachanchij? Imata alli rurajcuna cashpapish, Diospaj pueblopi ima mingashcacunata chasquishca cashpapish tucuicunami Jehová Diospaj ayudata mashcana canchij. Shinallataj mana jatun tucushpami Jehová Diospaj ayudata mashcashpalla imatapish alli rurai tucushcata yuyarina canchij. Sansonca Jehová Dios cushca yacuta ubyashca qꞌuipami fuerzasta japirca. Ñucanchijpish espiritualmente sinchi cangapajca Jehová Dios cushca ayudacunatami chasquina canchij (Mateo 11:28). w23.09 pág. 4 párrs. 8-10

¿Gentecuna Diosmanta, Bibliapi nishcacunamanta burlarijpica imatataj ruranguiman? Jehová Diostami alaja shimicunahuan cutichingapaj espíritu santota cuchun mañana cangui. Pero gentecuna pꞌiñachishcamanta sinchi shimicunahuan cutichishpaca ¿imatataj rurana canchij? Ama cutin chashna cutichingapajmi Jehová Dios ñucanchijta ayudachun mañana canchij. Chaita rurajpimi Jehová Diosca espíritu santota cushpa pacienciata charichun ayudanga. Shujtajcuna pꞌiñachisha nijpi o mana alli tratajpica Bibliapi nishcacunatami yuyarina canchij. Jehová Diosmi paipaj espíritu santota cushpa chai versocunapi ima nishcata yuyarichun ayudanga (Juan 14:26). Por ejemplo Proverbios libropica manso shungu canata yachangapajca alaja consejocunami tiyan (Proverbios 15:18). Shinallataj Proverbios libropica mana alli tratajpi imamanta mana pꞌiñarina cashcatami yachachin (Proverbios 10:19; 17:27; 21:23; 25:15). w23.09 págs. 15, 16 párrs. 6, 7

Apóstol Pedroca huañungacamami Jehová Diosta sirvirca. Paica Jesushuanmi predicaj carca. Jesús huañushca qꞌuipaca Pedroca shujtaj llajtamanta cajcunamanmi predicai callarirca. Shinallataj paica cuerpo gobernantepipishmi sirvirca. Pedro ñalla huañugrijpipish Jehová Diosca shuj mingashcatami paiman curca. Chaimi huata 62-manta huata 64-camaca Jehová Dios espíritu santota cujpi Pedroca ishqui cartacunata quillcarca. Chai cartacunataca Primera y Segunda de Pedro nishpami rijsinchij (2 Pedro 1:​13-15). Huauqui panicuna ‘chꞌican chꞌican llaquicunata charishcamanta’ llaquilla cajpimi Pedroca paipaj ishqui cartacunata quillcarca (1 Pedro 1:6). Shinallataj millai runacunami mapa ruraicunapi urmachun, panda yuyaicunapi crichun huauqui panicunata pandachisha nicurca (2 Pedro 2:​1, 2, 14). Jerusalenpi caj huauqui panicunaca, “tucui imalla tiyashcacuna” ima shina tucurinatami ñalla ricugrircacuna. ¿Chaica imatataj nisha nirca? Romanocunami Jerusalenta, templotapish ñalla tucuchigrircacuna (1 Pedro 4:7). Shinaca chai tiempopi causaj huauqui panicunaca Pedro quillcashca cartacunata liyishpami chai rato apacushca llaquicunata, shamuj punllacunapi tiyagrishca llaquicunata ahuantangapaj allichirishca carcacuna. w23.09 pág. 26 párrs. 1, 2

Ñucanchijpish Jesús shina llaquicunahuan chꞌimbapuracushpami huaquinpica cazunata yachashcanchij. Por ejemplo, COVID-19 pandemia punllacunapi ima tucushcata yuyarishun. Pushaj huauquicunaca Tandanacuna Huasicunapi ama tandanacuchun, huasin huasin rishpa ama predicachunmi mañarcacuna. ¿Chaita uyashpaca ima shinataj sintirircangui? ¿Chai nishcacunata cazunaca jahuallachu carca? Chai mandashcacunata cazushcamantami ñucanchij saludta cuidai tucurcanchij. Huauqui panicunahuanpish tandallami carcanchij. Ashtahuantajca Jehová Diospaj shungutami cushichircanchij. Cunanca jatun llaqui punllacuna shamujpi pushaj huauquicuna nishcacunata cazungapajmi allichirishca canchij. Chai llaqui punllacunapi instruccioncunata cazushpallami quishpirishun (Job 36:11). Tucuimanta yallica Jehová Diosta cꞌuyashcamanta paipaj ñaupajpi alli ricurisha nishcamantami cazujcuna cana canchij (1 Juan 5:3). Ñucanchijta ayudashcamantaca Jehová Diosmanca mana imahuan pagai tucushunchu (Salmo 116:12). Pero Jehová Diospaj shunguta cushichisha nishpaca paitapish, pai churashca pushajcunatapishmi cazuna canchij. Chashnami yachaisapa cashcata ricuchishun (Proverbios 27:11). w23.10 pág. 11 párrs. 18, 19

¿Shuj ángel canhuan parlajpica paita uyanguimanchu? Bibliapi nishca shinaca cunan punllacunapica ‘shuj angelca tucui llajtacunaman, tucui familiacunaman, tucui rimaicunaman, tucui pueblocunamanmi shuj huillaita huillacun’. Paica: ‘Diosta manchaichij. Paita jatunyachichij. Jahua pachata, allpa pachata rurajta adoraichij’ ninmi (Apocalipsis 14:​6, 7). Shinashpaca tucuicunami Jehová Diosta adorana canchij. Paica paipaj huasipi paita adorachunmi munan. Chaipi Jehová Diosta adoranaca valishcami can. ¿Diospaj huasica imataj can? ¿Bibliapica chai huasimantaca ima versocunapitaj parlan? Diospaj huasica jahua pachapi, cai allpapi shayachishca huasica mana canchu. Ashtahuanpish Diospaj huasica Jehová Dios pai munashca shina paita adorachun tucui pai imalla rurashcacunami can. Jesús huañushcallamantami Jehová Diostaca chashna adorai tucunchij. Apóstol Pabloca Judeapi causaj hebreo huauqui panicunamanmi Diospaj huasipi imalla tiyashcata parlarca. w23.10 pág. 24 párrs. 1, 2

522 huatapica Diospaj enemigocunaca Diospaj huasita ama shayachishpa catichunmi shuj leyta llujchichircacuna. Pero Zacariasca, ‘Diospaj huasita shayachishpa catichunca Jehová Diosmi espíritu santota cushpa ayudanga’ nishpami animarca. ¿Diosca ima shinataj paicunataca ayudarca? 520 huatapica mandaj Darioca chai leyta anchuchishpami Diospaj huasita shayachishpa catichun permisota curca. Ashtahuanpish judiocunamanca cullquita cushpami ayudarca. Mandajcunatapishmi judiocunata ayudachun mandarca (Esdras 6:​1, 6-10). Jehová Diospaj huasita shayachishpa catingapaj esforzarijpica paillatajmi judiocunataca ayudanga nishpami huillarca (Ageo 1:​8, 13, 14; Zacarías 1:​3, 16). Paicuna chashna animajpimi judiocunaca huata 520-pi Diospaj huasita cutin shayachi callarircacuna. Paicunaca Diospaj huasitaca más o menos 5 huatacunapimi shayachishpa tucuchircacuna. Problemacuna ricurijpipish judiocunaca Jehová Diospaj munaita rurangapajmi esforzarircacuna. Chaimantami Jehová Diosca tucui imalla minishtishcacunata curca. Jehová Dios chashna ayudajpimi paicunaca cushilla paita sirvishpa catircacuna (Esdras 6:​14-16, 22). w23.11 págs. 15, 16 párrs. 6, 7

Achca gentecunami Diosta sirvij Abrahán runa pi cashcataca mana achcata yachancuna. Pero ñucanchijca Abrahanmantaca achcatami yachanchij. Por ejemplo, ‘Abrahán feta charijcunapaj yaya’ cashcataca allimi yachanchij (Romanos 4:11). Pero tal vez: ‘¿Ñucapish Abrahán shinachu sinchi feta chari tucuni?’ nishpachari tapurishcanchij. Ari, tucuicunami Abrahán shina sinchi feta chari tucunchij. Abrahán shina sinchi feta charingapajca paipaj causaimantami yachana canchij. Paica Jehová Diostaca siempremi tucuipi cazurca. Chaimantami caru llajtaman rirca, carpa huasicunapipishmi achca huatacunata causarca. Paipaj churi Isaactapish sacrificiota shinami Jehová Diosman cusha nirca. Caicunata rurashpami paica sinchi feta charishcata ricuchirca. Chaimantami paica Diospaj ñaupajpica alli ricurirca, Diospaj alli amigopishmi tucurca (Santiago 2:​22, 23). Jehová Diosca canpish paipaj ñaupajpi alli ricurishpa paipaj amigo tucuchunmi munan. Chaimantami paica Pablomanpish, Santiagomanpish Abrahanmanta quillcachun yuyaita curca. w23.12 pág. 2 párrs. 1, 2

Diosta sirvijcunaca shujtajcunahuanmi sumajta parlanacuna canchij. Chaimantami discípulo Santiagoca cai punllapaj versopi nishcahuan animarca. Shujtajcuna parlacujpi atencionhuan uyashpami paicunata “shungumanta llaquijcuna” cashcata ricuchinchij (1 Pedro 3:8). Paicuna ima nicushcata, ima shina sintirishcata mana intindishpaca respetohuanmi tapuicunata rurana cangui. Shinallataj manaraj imata nishpaca allimi yuyana cangui (Proverbios 15:28). Por ejemplo: “¿Ñuca nigricushcaca ciertochu can? ¿Chaita nishpaca shujtajcunata sinchiyachishachu? ¿Cꞌuyaihuan, respetohuanchu parlasha?” nishpami tapurina cangui. Sumajta parlanacunata yachangapajca Jehová Diosta alli sirvij panicunapaj ejemplotami catina cangui (Proverbios 31:26). Paicuna parlacujpica atencionhuan uyai. Sumajta parlanacunata yachashpaca shujtajcunahuanmi alli apanacungui. w23.12 pág. 21 párr. 12

Yayitu Diosca ñucanchij familiata, amigocunata, congregacionta pushaj ancianocunata utilizashpami ñucanchijta sinchiyachi tucun. Shinapish yallitaj llaquilla cashpaca ñucanchijlla canatachari munashun. Chashna sintirinaca normalmi can. Pero ¿Jehová Dios ñucanchijta ayudachun saquingapajca imatataj rurana canchij? Tucuicunamanta ama caruyangapaj esforzarishunchij. Shujtajcunamanta caruyashpaca ñucanchij llaquicunallapi, ñucanchij ima shina sintirishcallapimi yuyashpa pasashun. Pero chashna yuyai callarishpaca mana alli decisioncunatami japishun. Tucuicunami maipica ñucanchijlla canata munanchij. Llaquicuna ñapish japijpicarin maipica chaitami ruranata munashun. Pero ñucanchijlla siempre pasashpaca Jehová Dios shujtajcunata utilizashpa ñucanchijta ayudachunca mana saquishunchu. Chaimanta sinchi cajpipish ñucanchij familia, amigocuna, anciano huauquicuna ñucanchijta ayudachun saquishunchij. Jehová Dios paicunata utilizashpa ñucanchijta sinchiyachicushcata amataj cungarishunchij (Proverbios 17:17; Isaías 32:​1, 2). w24.01 pág. 24 párrs. 12, 13

Nazareocunaca paicunapaj ari nishcata pajtachingapajca uma ajchataca mana rutuchinachu carca. Chashnami paicunaca Jehová Diosta respetashcata ricuchircacuna. Chaimi maijancunaca paitaca apoyai tucurcacuna. Shinapish huaquin israelitacunaca nazareocunataca mana respetajcunachu carca. Chaimantami chai punllacunapi nazareo canaca sinchi cashcanga (Amós 2:12). Jehová Diosta sirvijcuna cashcata tucuicuna ricuchunca ñucanchijpish nazareocuna shinami paitaca tucuipi cazuna canchij. Shinapish trabajopi, escuelapi ñucanchij compañerocunaman testigo de Jehovacuna cashcata huillanaca huaquinpica sinchimi can. Shinallataj gentecunaca ashtahuan ashtahuanmi millai tucushpa catincuna. Chaita ricushpaca Jehová Dios munashca shina causanaca ñucanchijpajpish sinchimi cai tucun. Shujtajcunaman Diosmanta yachachinapish huaquinpica sinchi layami ricuringa (2 Timoteo 1:8; 3:13). Pero Diospaj shunguta cushichingapajca millai gentecunapaj ejemplotaca mana catinachu canchij (Proverbios 27:11; Malaquías 3:18). w24.02 págs. 16, 17 párrs. 7, 9

¿Jesusta punta catijcunapajca cꞌuyaita ricuchinacunaca jahuallachu carca? Roma congregacionpi caj huauqui panicunapi yuyashun. Maijancunaca judiocunami carca. Paicunaca Moisesman cushca leyta yachashpami huiñashcacuna carca. Shujtajcunaca shujtaj llajtacunamantami carcacuna. Chaimi paicunaca chꞌican chꞌican culturacunata charircacuna. Shujtajcunaca esclavocuna, shujtajcunaca mana esclavocuna, shujtajcunacarin amocunami carca. Paicunapura alli apanacungapajca ¿imatataj rurana carcacuna? Apóstol Pabloca: “Caishuj chaishuj alli chasquinacuichij” nishpami consejarca. Shinaca paicunaca huasipi alli chasquij shinami cꞌuyaihuan, alli tratanacuna carca. Por ejemplo, Pabloca Filemontami: ‘Cambaj huasimanta miticushpa rij Onesimota alli chasquipai’ nirca (Filemón 17). Shinallataj Priscila y Aquilaca Jesuspaj yachachishcacunamanta Apolosta yalli yachashpapish paitaca allimi tratarcacuna. Qꞌuipacarin paicunahuanmi Apolostaca apashpa rircacuna (Hechos 18:26). Jesusta punta catijcuna chꞌican chꞌican cashpapish paicunapuraca cꞌuyaita ricuchishpami catircacuna. Chaimantami cꞌuyaihuan, alli tratanacurcacuna. w23.07 pág. 6 párr. 13

Ñucanchijca Jehová Diosta cꞌuyashcamantami paiman mingarinchij. Jehová Diosta rijsishcamanta chai rato cushilla cashcallamantaca mana mingarinchijchu. Ashtahuanpish Jehová Diosmanta yachacushpaca paitami asha asha cꞌuyai callarircanchij. Shinallataj espíritu santota cushpa Jehová Dios ayudajpimi paitaca alli rijsi tucurcanchij (Colosenses 1:9). Bibliata estudiashpami Jehová Dios tiyashcata, espíritu santota cushpa Bibliata quillcachishcata, paipaj munaita pajtachichun shuj organizacionta agllashcatapish intindinchij. Jehová Diosman mingarisha nijcunaca Bibliapi tiyaj callari yachachishcacunatami alli rijsina can. Shinallataj Jehová Diospaj mandashcacunatami cazuna can. Paicunapaj crishcacunamantapish shujtajcunaman yachachingapajmi esforzarina can (Mateo 28:​19, 20). Shinallataj Jehová Diosta tucui shunguhuan cꞌuyashcamantami paillata sirvina can. ¿Canca Jehová Diostaca tucui shunguhuanchu cꞌuyangui? w24.03 págs. 4, 5 párrs. 6-8

Abigailca Nabal runahuanmi cazarashca carca. Nabalca yallitaj millai, mana allicunata rurashpa causaj runami carca (1 Samuel 25:3). Paihuan causanaca Abigailpajca sinchimi cashcanga. Abigailca Nabalmanta separaringapaj shuj oportunidadtami charirca. ¿Imamanta shina ninchij? Nabal runaca Davidtapish, paita sirvijcunatapishmi cꞌamishca carca. Chaimantami paita huañuchisha nirca (1 Samuel 25:​9-13). Abigailca Davidpaj maquimanta miticushpa Nabalta huañuchichunmi saqui tucurca. Pero chaitaca mana rurarcachu. Ashtahuanpish ‘ñuca cusata perdonapai’ nishpami Davidtaca rogarca (1 Samuel 25:​23-27). ¿Abigailca imamantataj chaita rurarca? Abigailca Jehová Diostami achcata cꞌuyaj carca. Jehová Diospaj matrimonioca valishca cashcamantami Abigailpajpish valishca carca. Paica Adán y Evata Jehová Dios cazarachishpa imata nishcatami yuyarishcanga. Shinallataj Abigailca Jehová Diosta cꞌuyashcamantami Nabalpish, paipaj huasipi causajcunapish ama huañuchun imata ruranata rato yuyarca. w24.03 págs. 16, 17 párrs. 9, 10

Cambaj congregacionpica tal vez maijan huauqui panicunaca Jehová Diosta ashtahuan sirvingapaj imalla minishtirishcallahuan causanatami yuyacuncuna. Mana cashpaca tal vez maijan jovencunaca escuelapi paicunapaj crishcacunata mana manchashpa difindingapajmi esforzaricuncuna. Chaita ruranaca paicunapajca mana jahuallachu can. Shinallataj tal vez maijancunaca Jehová Diosta sirvicushcamantami familia ucupica achca problemacunata charincuna. Paicunata animangapajmi tiempota surcuna canchij. Shinallataj imata mana manchashpa Jehová Diosta sirvingapaj sinchita esforzaricushcamantami felicitana canchij (Filemón 4, 5, 7). Jehová Diosca ñucanchijcuna ima shina esforzaricushcataca allimi yachan. Shinallataj paica paita shungumanta cꞌuyashcata ricuchichunmi ñucanchijmanca oportunidadta cushca (Proverbios 23:​15, 16). Chaimanta Jehová Diosta tucui shunguhuan sirvishpa catingapaj esforzarishpa catishunchij. w24.02 págs. 18, 19 párrs. 14, 16

Huata 29-pi Jesús huillai callarijpica ima tucushcata yuyarishunchij. Caná pueblopimi shuj cazamiento tiyarca. Chaimi Jesuspish, paipaj mama Mariapish chai cazamientoman rircacuna. Jesuspaj mama Mariaca imallatapish rurashpami ayudacurca. Pero achca gentecuna chaipi cashcamantachari vinoca ñapish tucurirca. Mariaca Jesustaca: ‘Vinoca ña tucurinca’ nishpa huillanaman rirca (Juan 2:​1-3). Chaita uyashpami Jesusca shuj milagrota rurashpa yacumantaca alli vinota llujchirca (Juan 2:​9, 10). Jesusca ashtahuan milagrocunatami rurarca. Paica huaranga huaranga gentecunatami paipaj poderhuan ayudarca. Por ejemplo, shuj punllaca Jesusca 5.000 cꞌaricunamanmi micunata cararca. Cutin shujtaj punllapica 4.000 cꞌaricunamanpishmi micunata cararca. Chai ishqui milagrocunata ruracui horasmi huarmicunapish, huahuacunapish tiyarca. Chaimi Jesusca 27.000 yalli gentecunaman micunata carashpa ayudashcanga (Mateo 14:​15-21; 15:​32-38). Ashtahuancarin chai ishqui cutincunami Jesusca ungushcacunatapish jambirca (Mateo 14:14; 15:​30, 31). w23.04 págs. 2, 3 párrs. 1, 2

Llaquicuna ñapish japijpica ñucanchij cuerpoca maipica shaicushcami sintiringa. Shungupipish, yuyaipipishmi shaicushca sintirishun. Maipicarin Elías shinami dormishpalla cainanata munashun (1 Reyes 19:​5-7). Ñucanchijpish ñaupajman catingapajca Jehová Dios ñucanchijta ayudachunmi minishtinchij. Caitaca cai punllapaj versopimi nin. Rey Davidca paipaj enemigocuna llaquichisha nicujpi, shujtaj llaquicuna japijpica Jehová Dios paipaj cꞌuchullapi cashcatami yacharca. Chaimi: “Canmari cambaj alli maquihuan allipi churashpa charihuangui” nirca (Salmo 18:35). Huaquinpica Jehová Diosca shujtajcunata utilizashpami ñucanchijta ayudan. Por ejemplo, David llaquilla cajpica paipaj amigo Jonatanmi paita sinchiyachinaman rirca (1 Samuel 23:​16, 17). Cutin Eliasman imalla minishtishcacunata cuchunca Diosca Eliseotami agllarca (1 Reyes 19:​16, 21; 2 Reyes 2:2). w24.01 págs. 23, 24 párrs. 10-12

Jehová Diosca ñucanchijta cꞌuyashcamantami allicunata cun. Pai cꞌuyaj cashcataca Proverbios 9-pi tiyaj chꞌimbapuraipimi yachai tucunchij. Chaipica alli yachaita ricuchij huarmimantami parlan. Paica visitajcunata chasquingapajca mishquitami yanurca. Vinotapish chagrushpami churarca. Mesatapish sumajtami allichirca (Proverbios 9:2). Shinallataj versos 4 y 5-pica alli yuyaita mana charijcunataca: “Cancunapaj ñuca allichishca micunata micuj shamuichij” ninmi. Cai huarmipaj invitaciontaca ¿imamantataj chasquina canchij? Jehová Diosca paipaj huahuacuna llaquipi ama urmachunmi alli yachaita cusha nin. Paica juchapi urmashcamanta llaquilla causaita charichunca mana munanchu (Proverbios 2:7). Yayitu Diosta tucui shunguhuan cꞌuyashpa, manchashpaca tucuita pai munashca shina rurangapajmi esforzarishun. Chaita rurashpaca cushillami causashun (Santiago 1:25). w23.06 págs. 23, 24 párrs. 14, 15

Ñucanchij munashca shina Jehová Diosta mana sirvi tucushpapish pai ñucanchij esfuerzocunata achcata valorashcatami yuyarina canchij. ¿Jehová Dios ñucanchij esfuerzocunata valoraj cashcataca ima shinataj yachanchij? Profeta Zacariaspi yuyashunchij. Jehová Diosca Babiloniapi saquirij judiocuna cachashca orohuan, cullquihuan shuj coronata rurachunmi paitaca mandarca (Zacarías 6:11). Chai sumaj coronata ricushpami Jerusalenpi caj judiocunaca Babiloniapi saquirij judiocuna alli shungucuna cashcata yuyarijcuna carca (Zacarías 6:14). ¿Caimantaca imatataj yachanchij? Llaquicunata charishpapish Jehová Diosta tucui shunguhuan sirvingapaj esforzarijpica Jehová Diosca ñucanchij imalla rurashcataca manataj cungaringachu. Cai tucuri punllacunapi ashtahuan llaquicuna shamuna cashcataca allimi yachanchij (2 Timoteo 3:​1, 13). Pero mana yallitaj sustarinachu canchij. Ageo causashca punllacunapi Jehová Dios israelitacunaman imata nishcata yuyarishunchij. Paica: ‘Ñucami cancunahuan cani. Ama manchaichijchu’ nircami (Ageo 2:​4, 5). Ñucanchijpish Jehová Diosta tucui shunguhuan sirvishpa catingapajmi esforzarina canchij. Chaita rurajpica Jehová Diosca ñucanchijhuanmi canga. w23.11 pág. 19 párrs. 20, 21

Jehová Diosca Apóstol Pedromanta yachachunca paipaj pandarishcacunamantami Bibliapi quillcachirca (2 Timoteo 3:​16, 17). Pedro ñucanchij shina pandarij cashcata Bibliapi liyishpaca Jehová Dios siempre imapi mana pandarichun mana shuyashcatami intindinchij. Paica ñucanchijcuna juchayujcuna cajpipish mana alli munaicunata, yuyaicunata mishangapaj esforzarishpa catichunmi munan. ¿Mana alli munaicunata, yuyaicunata mishangapajca imamantataj esforzarishpa catina canchij? Juchayujcuna cashcamantami cutin chaillapitaj urmai tucunchij. Chashnapish ñaupajman catingapajmi esforzarishpa catina canchij. Tucuicunami ñucanchij ruraicunahuan, rimaicunahuan maipica pandarinchij. Pero ñaupajmanmi catina canchij. Jehovami ñucanchij yuyaita cambiashpa catichun ayudanga (1 Pedro 5:10). Pedro pandarijpipish Jesusca llaquishpami perdonarca. Caita yachashpami ñucanchijpish pandarishpaca Jehová Diosta sirvishpa catingapaj animarishun. w23.09 págs. 20, 21 párrs. 2, 3

Cai punllapaj versopi Marta nishca shinaca Jesusca Lazarotaca chai ungüimantami jambi tucunman carca. Shinapish Jesusca Martataca: ‘Cambaj turica jataringami. Ñucami causaita cujpish, causachijpish cani’ nircami (Juan 11:​23, 25). Jehová Diosca Jesusmanca huañushcacunata causachichunmi poderta curca. Chaimantami Jesusca Jairopaj ushushi ashalla tiempo huañushca huashaca paita causachishca carca. Shujtaj jovencitotapish pai huañushca punllallapitajmi ña causachishca carca (Lucas 7:​11-15; 8:​49-55). Pero Lázaro ña chuscu punllacunata huañushca cashcamantami paipaj cuerpoca ña ismui callarishca carca. ¿Paita causachingapajca Jesusca podertachu charirca? Lazaropaj chaishuj pani Mariapish Marta shinallatajmi Jesustaca: “Amito, can caipi cashca cajpica ñuca turica mana huañunmanchu carca” nirca (Juan 11:32). Mariapish, shujtajcunapish dimastij huacacujta ricushpaca Jesuspish shungupi achcata nanarishpami huacai callarirca. Jesusca shuj cꞌuyashca familia o amigo huañui horas dimastij llaqui cashcataca allimi yachan. Chaimantami Lazaropaj panicunapish, shujtajcunapish ña mana sufrishpa catichun ayudasha nirca. w23.04 págs. 10, 11 párrs. 12, 13