Febrero

Rey Ezequías ‘ñucata alliyachipai’ nishpa mañajpica Jehová Diosca paita alliyachircami (2 Reyes 20:​1-6). Shinapish apóstol Pablo Jehová Diosta ‘ñuca aichapi tujsicuj shina cashata anchuchipai’ nishpa mañajpica Diosca paipaj mañaitaca mana cutichircachu. Pabloca ungushca cashcamantachari Yaya Diostaca chashna mañashcanga (2 Corintios 12:​7-9). Mandaj Herodesca apóstol Santiago y Pedrotami huañuchisha nirca. Chaimi huauqui panicuna Yaya Diosta mañajpipish Herodesca Santiagota huañuchirca. Pero Jehová Dios shuj milagrota rurajpimi Pedrotaca mana huañuchi tucurca (Hechos 12:​1-11). Tal vez maijancunaca “¿Diosca imamantataj Pedrollata ayudarca?” nishpachari yuyashun. Biblia chaita mana nijpipish Jehová Dios siempre cashcata ruraj cashcatami seguros canchij (Deuteronomio 32:4). Caipi ricushca shinaca huaquinpica Jehová Diosca ñucanchij mañaicunataca mana chashnallatajchu cutichinga. Chashnapish pai cꞌuyaj, tucuita alli ruraj cashcatami seguros canchij (Job 33:13). w23.11 pág. 21 párr. 6

Discípulo Santiagoca: ‘Jahua pachamanta shamuj alli yachaita charij runaca utca cazujmi can’ nircami. ¿Chaica imatataj nisha nin? Jehová Dios churashca pushajcunata, autoridadcunata cazuna munaita charina cashcatami nisha nin. Paicunataca mana pꞌiñarishpami utca cazuna canchij. Pero paicuna Jehová Diospaj mandashcacunata ama cazuchun nijpica paicunataca mana cazunachu canchij (Hechos 4:​18-20). Jehová Diospaj mandashcacunaca ima mana pandachu. Chaimantami chai mandashcacunataca mana quejarishpalla cazunchij (Salmo 19:7). Shinapish yaya mamacuna, autoridadcuna, congregacionta pushaj ancianocuna juchayujcuna cashcamantami paicunata cazunaca huaquinpica sinchi can. Chashna jahuapish Jehová Diosca paicunata cazuchunmi munan (Proverbios 6:20; 1 Tesalonicenses 5:12; 1 Pedro 2:​13, 14). Chaita ruranaca Jehová Diosta cazucushca shinami can. w23.10 págs. 6, 7 párrs. 2, 3

Jehová Diosca achca podertami charin. Chaipi yuyashpami ñucanchij feta ashtahuan sinchiyachishun. Paica pai tucui imata nishcata pajtachingapajmi poderta charin. Jehová Diosca tucui poderta charij cashcamantami gentecuna mana rurai tucushcata pajtachinga (Job 42:2; Marcos 10:27; Efesios 3:20). Diosca Abrahanman, Saramanca ña mayorllacuna cajpipish “shuj huahuatami charinguichij” nirca (Génesis 17:​15-17). Shinallataj Abrahanmanca “cambaj huahua huahuacunamanmi Canaán llajtata cusha” nircami. Pero Abrahanpaj huahua huahuacunaca achca huatacunatami Egipto llajtapi esclavocuna shina causarcacuna. Paicunaca Jehovapaj promesa mana nunca pajtarina cashcatami yuyashcangacuna. Shinapish Jehovapaj promesaca pajtarircami. Shinallataj Diosca María shuti solteramanmi Diospaj Churipaj mama cana cashcata huillarca. Chashnami Edén huertapi huaranga huaranga huatacuna huashaman Jehová imata nishcaca pajtarina carca (Génesis 3:15). Jehová Diospaj promesacuna ima shina pajtarishcata ricushpaca pai achca poderta charishcatami cuentata cunchij. Chaita ricushpami cai Allpata shuj Paraisota ruranata tucui shunguhuan crinchij (Josué 23:14; Isaías 55:​10, 11). w23.04 pág. 28 párrs. 10-12

Jehová Diosca Davidpaj mañaitaca uyarcami. Chaimantami paitaca ayudarca (1 Samuel 19:​10, 18-20; 2 Samuel 5:​17-25). Ñucanchijpish Jehová Dios ñucanchij mañashcacunata cutichij cashcataca segurosmi cana canchij (Salmo 145:18). Huaquinpica Jehová Diosca mañaicunataca ñucanchij munashca shinaca mana cutichinchu. Apóstol Pabloca llaquitaca aichapi tujsicuj casha shinatami charirca. Chaimantami quimsa cutintaca cai cashata anchuchihuai nishpa Diosta mañarca. ¿Paipaj mañaitaca Jehová Diosca uyarcachu? Ari. Pero Pablo munashca shinaca mana cutichircachu. Paipaj llaquicunata anchuchinapaj randica paita sirvishpa catichunmi fuerzasta curca (2 Corintios 12:​7-10). Jehová Diosca ñucanchijpaj ima alli cashcataca allimi yachan. Paica, “paipaj poderhuanmi tucui ñucanchij mañashcatapish yalli, ñucanchij yuyashcatapish yalli rurai tucun” (Efesios 3:20). Chaimantami huaquinpica ñucanchij mana yuyashca horas o ñucanchij mana yuyashca shina ñucanchij mañaicunataca cutichin. w23.05 págs. 8, 9 párrs. 4-6

Ima horas ancha ungunata, shuj cꞌuyashca familia o amigo huañunataca mana yachanchijchu. Chaimantami causarina promesapica cutin cutin yuyarina canchij (Eclesiastés 9:11; Santiago 4:​13, 14). Chai promesapi yuyarishpaca tucui laya llaquicunatami ahuantai tucushun (1 Tesalonicenses 4:13). Bibliapica Yayitu Dios ñucanchijta alli rijsishcata, achcata cꞌuyashcatami huillan (Lucas 12:7). Chaimantami paica ñucanchij ima shina cashca laya causachinga. Ashtahuancarin Yayitu Diosca para siempre causana oportunidadtami cunga. ¿Causarinapica imamantataj confiai tucunchij? Pai ima nishcapi confiangapajca Jehová Dios huañushcacunata causachina munaita charishcata, poderta charishcatapishmi alli yachanchij. Chaita yachashpaca Jehová Dios cusha nishcacunapimi tucui shunguhuan confianchij. w23.04 págs. 8, 9 párrs. 2-4

José y Mariaca Diospajman cꞌuchuyashpa catingapajca ishquindijmi ayudanacujcuna carca. Paicunapajca Diosmanta tandalla yachanami valishca carca (Lucas 2:​22-24; 4:16). ¿Cazarashcacunaca paicunamantaca imatataj yachai tucuncuna? Cancunapish huahuacunata charishpaca tandanacuicunaman ringapaj, familiahuan Diosta adorangapaj tiempota llujchinaca ashtahuan sinchimi canga. Shinallataj Bibliata ishquindij estudiangapaj, Yaya Diosta mañangapajpish ña manachari achca tiempota charinguichij. Pero ishquindij Jehová Diosta adorashpa catingapaj esforzarishpaca cancunapurami alli apanacunguichij. Cꞌuyaipish mana chiriyangachu. Chaimanta, Jehová Diosta adoranataca punta lugarpi churashpa catichij. Matrimoniopi problemacuna tiyajpica Diosmanta tandalla yachanaca ashtahuan sinchichari canga. Pero cashna problemacuna tiyajpica tal vez ishquindij munashca temacunatami ashallata yachai tucunguichij. Chaita rurajpimi cancunapaj matrimonioca asha asha sinchiyarishpa catinga. Ashtahuancarin ishquindij Diospajta rurashpa catingapajmi animaringuichij. w23.05 pág. 22 párrs. 7, 8

Abdiasca Jehová Diosta tucui shunguhuan manchaj cashcamantami allita rurashpa causarca. Chaimi mandaj Acabca paipaj huasita cuidachun mingarca (Nehemías 7:​2-ta ricui; 1 Reyes 16:30). Chashnapish Abdiasca Jehová Diosta tucui shunguhuan manchaj cashcamantami paipajta mana manchashpa rurashpa catirca. Acabca Jezabel huarmihuanmi cazarashca carca. Chai huarmica Baal diostami adoraj carca. Pero Jehová Diostaca tucui shunguhuanmi millaj carca. Chaimantami Israelpi Jehová Diosta ni pi ama sirvichun jarcasha nirca. Jehová Diospaj achca profetacunatapishmi huañuchirca (1 Reyes 18:4). Jezabel huarmi huañuchingapaj catiracujpica Abdiasca 50 profetacunataca shuj jutcupi, caishuj 50 profetacunataca shujtaj jutcupimi pacarca. Micunatapish, yacutapishmi curca (1 Reyes 18:​13, 14). Jezabel chaita yachaj chayashpaca Abdiastami huañuchinman carca. Abdiasca chaitami manchashcanga. Pero Jehová Diosta, paita sirvijcunatapish, paipaj causaitapish yallimi cꞌuyarca. Chaimantami mana manchashpa profetacunataca ayudarca. w23.06 pág. 16 párrs. 9, 10

Jehová Diosca ñaupa punllacunapi shinami cunan punllacunapica paipaj Shimihuan, pai churashca pushajhuanmi ñucanchijtaca pushacun. Jesusmi tucui congregacioncunapaj pushaj can. Pero ¿Jehová Diosca ñucanchijta pushachunca runacunatapishchu churashca? Ari. Por ejemplo, más o menos 1870 huatapi ima tucushcata yuyarishun. Chai huatacunapica huauqui Charles Russellpish, paita apoyajcunapish 1914 huatapi Diospaj Reino mandai callarigrishcatami intindircacuna (Daniel 4:​25, 26). Chaita intindingapajca paicunaca Bibliapi tiyaj profeciacunatami alli estudiarcacuna. Chai profeciacuna ima shina pajtarinata intindichunca Jehovami paicunataca ayudarca. 1914 huatapi imalla tucushcacunaca Diospaj Reino mandai callarishcatami ricuchirca. Chai huatapica Primera Guerra Mundialmi callarirca. Shinallataj achca ungüicuna, terremotocuna, yaricaicunami tiyai callarirca (Lucas 21:​10, 11). Huauqui Russell, paita apoyajcuna intindishca shina Bibliapi tiyaj profeciacuna pajtarijpica Jehová Dios paipaj pueblota pushachun paicunata agllashcatami tucuicuna ricurcacuna. w24.02 pág. 23 párr. 11

Diosta sirvijcunaca Jehová Dios ñucanchijta achcata cꞌuyashcata, ñucanchijta ayudasha nishcatapishmi alli yachanchij (Romanos 8:​35-39). Shinallataj Dios yachachishcacunata cazushpa alli causaita charinatapishmi seguros canchij (Isaías 48:​17, 18). Shinapish ¿ima llaqui ñapish ricurijpica? Chashna ricurijpipish Jehová Diospimi confiashpa catina canchij. Por ejemplo, shuj familiaca paipaj rurashcacunahuan o rimashcacunahuanchari ñucanchijta llaquichicun. Mana cashpaca, ima ungüita charishcamantachari ña mana ñucanchij munashca shina Jehová Diosta sirvi tucunchij. Cutin ima desastre natural tiyashcamantachari achca llaquicunata apacunchij. Contracunapish ñucanchij crishcacunamantaca achcatachari llaquichicun. Cashna laya llaquicunata charishpaca: “¿Imamantataj cai llaquicunaca ñucata japicun? ¿Manachu allicunata ruracuni, imashi? ¿Jehová Diosca ñucataca ña manachu ayudasha nin?” nishpachari tapuringui. Chashna sintirishca cashpapish mana yallitaj preocuparinachu cangui. Diosta achca sirvijcunapishmi chashnallataj sintirishcacuna (Salmo 22:​1, 2; Habacuc 1:​2, 3). w23.04 pág. 14 párrs. 1, 2

Ñucanchijpajca Jehová Dioshuan alli apanacunami tucuimanta yalli valishca can. Chaimantami tentacioncuna, mapa yuyaicuna shamujpica chaicunamanta rato ladoyana canchij. Jehová Diosca paita tucui shunguhuan cazuchunmi munan (Romanos 6:17). Paica ñucanchijcuna alli causachunmi mandashcacunata cun. Ñucanchijca paipaj mandashcacunataca mana cambiai tucunchijchu (Isaías 48:​17, 18; 1 Corintios 6:​9, 10). Diabloca llaquichishpa, llaquilla sintichishpami Diosmanta caruyachisha nin (1 Pedro 5:8). Punta siglopi causaj huauqui panicunataca Diosta sirvishcamantami macarcacuna, cꞌamircacuna, huañuchircacunapish (Hechos 5:​27, 28, 40; 7:​54-60). Cunan punllacunapipish Diabloca Diosta sirvijcunatami catirashpa llaquichicun. Por ejemplo, Rusiapi, shujtaj llajtacunapi caj huauqui panicunatami achcata llaquichishca. Ashtahuanpish tucui huauqui panicunatami ima layapish llaquichingapaj tucuita ruracun. Diabloca “ima shinapish umashpami urmachisha nin” (Efesios 6:11). w23.07 págs. 15, 16 párrs. 6-9

Bibliata estudiacushpaca Jehová Diostami ashtahuan cꞌuyangui. Chaimantami Bibliapi imalla yachashcacunataca cambaj causaipi pajtachingui. Shinallataj Bibliapi nishcacunata yuyarishpami alli decisioncunata japingapaj esforzaringui. Jehová Diospaj shunguta cushichingapajpishmi pai munashca shina causangui. Ima shinami shuj huahua paipaj cꞌuyaj yaya laya cangapaj esforzarin, canpish Jehová Dios shina cꞌuyaj cangapajmi esforzaringui (Efesios 5:​1, 2). Cashna nishpa tapurishunchij: “¿Bautizarishca punllamantaca cunanca Jehová Diostaca ashtahuanchu cꞌuyani? ¿Jehová Dios shina huauqui panicunaman cꞌuyaita ricuchingapaj esforzaricunichu?”. Callaripi charishca cꞌuyai chiriyashca cajpica mana yallitaj llaquirinachu canchij. Punta siglopi causaj huauqui panicunapaj cꞌuyai chiriyajpica Jesusca paicunahuanca mana pꞌiñarircachu. Ashtahuanpish cutin cꞌuyaita charichunmi ayudarca (Apocalipsis 2:​4, 7). Jesusca ñucanchijtapishmi callaripi charishca cꞌuyaita charichun ayudasha nin. w23.07 pág. 8 párrs. 2, 3

Apóstol Pedroca huaquin cosascunapi pandarishpami jatun juchapi urmarca. Puntapica paillapi confiarishpami Jesustaca: ‘Tucui apostolcuna canta saquijpipish ñucaca cantaca manataj saquishachu’ nirca (Marcos 14:​27-29). Chai qꞌuipaca cutin cutinmi dormishca saquirirca (Marcos 14:​32, 37-41). Chai huashaca Jesusta prezu japijpica paitami saquishpa rirca (Marcos 14:50). Gentecuna ‘canpish Jesushuanmi carcangui’ nijpipish quimsa cutinmi ‘paitaca manataj rijsinichu’ nirca (Marcos 14:​66-71). ¿Pedroca Jesusta negashcamanta jatun juchata rurashcata cuentata cushpaca ima shinataj sintirirca? Paica yallitaj llaquilla sintirishpami huacaillata huacai callarirca (Marcos 14:72). Jesusca imamanta paita negashcata Pedrota reclamanapaj randica shamuj punllacunapi Jehová Dios paiman chꞌican chꞌican ruraicunata mingagrishcatami nirca (Juan 21:​15-17). Pedroca jatun juchata rurashcataca allimi yacharca. Pero ¿chaita yachashpapish imamantataj ñaupajman catirca? Paica Jesús paita shungumanta perdonashcatami seguro carca. ¿Paimantaca imatataj yachanchij? Jehová Diosca ñucanchijta uyaj cashcata, shungumanta perdonaj cashcata crichunmi munan (Romanos 8:​38, 39). w24.03 págs. 18, 19 párrs. 13-15

Huainayashpa causajcunaca imapaj mana valij shinami llaquilla sintirincuna. Huaquincunacarin mana munashpami huahuata charincuna. Paicunapaj familiatapishmi llaquichincuna. Paicunaca espiritualmente huañushca shinami can. Cutin shujtajcunaca millai ungüicuna japishcamantami huañuncuna. Chaimanta, chꞌahuanyashca huarmi nishcacunataca mana uyanachu canchij (Proverbios 7:23). Shinallataj Proverbios 9:​18-pica: ‘Chꞌahuanyashca huarmipaj invitacionta chasquijcunaca Seolpi o Pambana Jutcupimi can’ ninmi. Cai gentecunaca huañunata yachashpapish ¿imamantataj chai invitacionta chasquincuna? (Proverbios 9:​13-18). Mapa fotocuna, videocunaca tucui ladocunapimi can. Maijancunaca “chaicunata ricunaca mana juchachu can” nishpami yuyancuna. Pero chaica mana ciertochu can. Pornografiata ricunaca shuj vicio shinami can. Mapa fotocunata, videocunata ricushcata cungarinapish mana facilchu can. Chaita ricujcunaca pingaihuan, imapaj mana valij shinami sintirincuna. Ashtahuanpish pornografiata ricujcunaca aicha munaicunamanta jarcarinapaj randica mapa ruraicunata rurana yuyaillami causancuna (Colosenses 3:5; Santiago 1:​14, 15). Maijancunacarin pornografiata ricushcamantami huainayanapi urmashcacuna. w23.06 pág. 23 párrs. 10, 11

Tal vez huaquin llajtacunaca Estados Unidos y Reino Unido llajtacunatami mishasha ningacuna. Pero mana pudingacunachu. Ashtahuanpish Diospaj Gobiernomi cai ishqui llajtacunata ñutushpa tucuchinga. Daniel libropica cai Gobiernoca shuj jatun “rumi” shina cashcatami nin (Daniel 2:​34, 35, 44, 45). ¿Canca estatuapaj chaqui dedocunamanta Daniel imalla nishcacuna cierto cashcata cringuichu? Cai nishcacuna cierto cashcata crishpaca cai millai mundo ñalla tucurina cashcataca seguromi cangui. Chaimantami ashtahuan charinataca mana mashcana cangui (Lucas 12:​16-21; 1 Juan 2:​15-17). Shinallataj cai profeciata alli intindishpaca tucui shunguhuan huillashpa catingapaj, gentecunaman Bibliamanta yachachingapajmi esforzarishpa catingui (Mateo 6:33; 28:​18-20). Shinashpaca Diospaj Gobierno cai pacha gobiernocunata ñalla tucuchina cashcataca segurosmi cana canchij. Seguro cashcataca alli decisioncunata japishpami ricuchishun. w23.08 pág. 11 párrs. 13, 14

Tal vez cambaj edadmanta, saludmanta o shujtaj llaquicunata charishcamantami ñaupa shinaca ña mana rurai tucungui. Por ejemplo, cambaj saludmanta huaquin asignacioncunata mana chasqui tucushpaca mana pingashpami “chaitaca mana rurai valishachu” ninalla cangui. Chashnami Barzilai runa shina humilde cashcata ricuchingui (2 Samuel 19:​35, 36). Shinallataj alli cajpica can pajtachicushca asignacioncunatami Moisés shina shujtajcunaman mingana cangui (Éxodo 18:​21, 22). Humilde cashpaca can rurai pudishcallatami rurangui. Shujtajcuna mana alli desicioncunata japishcamantaca mana culpablechu sintirina cangui. Shujtajcunamantaca mana decidi tucunchijchu. Shinallataj mana alli decidishcamanta llaquicunata ama charichunca imata mana rurai tucunchijchu. Huahuacuna Jehová Diosta saquijpica yaya mamacunaca achcatami llaquirincuna. Shinapish yaya mamacunaca paicunapaj culpamanta Jehová Diosta saquishcataca mana yuyanachu can. Chashna yuyanaca llashaj cargata apacushca shinami can. Jehová Diosca yaya mamacuna chai cargata apachunca mana munanchu. w23.08 págs. 29, 30 párrs. 11, 12

Sansonca ñucanchij shinami juchayuj carca. Chaimantami huaquinpica mana alli decisioncunata japirca. Por ejemplo, Israelpi juez shina huaquin huatacunata sirvicushpaca Sorec llajtapi causaj Dalila huarmimantami enamorarirca. Dalilata manaraj rijsishpaca paica shuj filistea huarmihuanmi cazarasha nirca. Bibliapi nishca shinaca filisteocunata mishangapajmi Jehová Diosca Sansón chai huarmihuan cazarachun munarca. Chai qꞌuipaca Sansonca Gaza nishca llajtaman rishpaca shuj huainayaj huarmipaj huasipimi saquirirca. Chaita ricushpaca Jehová Diosca filisteocunata llaquichichunmi Sansonmanca poderta curca. Chaimi Sansonca chai llajtapaj pungucunata llujchishpa shujtaj ladoman aparca (Jueces 14:​1-4; 16:​1-3). Pero ¿Jehová Diosca Sansón Dalilamanta enamorarichunchu munashcanga? Mana. Dalilaca Israelmantami cashcanga. Chaimantami Sansón paihuan cazarashpapish filisteocunataca mana mishai tucunman carca. Filisteocunaca Dalila Sansonta pandachichunmi munarcacuna. Chaimantami ‘Sansonta pandachijpica cullquitami cushun’ nircacuna. w23.09 págs. 4, 5 párrs. 12, 13

Alli yuyaiyuj canaca valishcami can. Alli yuyaiyujcuna cashpaca shujtajcuna sinchi shimicunahuan ñucanchij crishcacunamanta tapujpica mana pꞌiñarishunchu. Shinallataj huaquin gentecunaca shuj tapuita rurashpaca imamanta chai tapuita rurashcataca manachari tucuita huillangacuna. Chaimantami manaraj cutichishpaca paicunata alli intindingapaj esforzarina canchij (Proverbios 16:23). Gedeonpi yuyashun. Efrainpaj runacunaca Gedeontaca: ‘Canca madianitacunahuan macanacunaman rishpaca ¿imamantataj mana ñucanchijman huillarcangui?’ nishpami sinchita rimarcacuna. Efrainpaj runacunaca ¿jatun tucushca cashcamantachu pꞌiñarircacuna? Ima laya cashca cajpipish Gedeonca sumaj shimicunahuan cutichishpami paicunata respetashcata ricuchirca. Gedeón chashna cutichishcamantami paicunaca ña mana pꞌiñarircacuna (Jueces 8:​1-3). w23.09 pág. 16 párrs. 8, 9

Yaya Diosca jahua pachapi huaranga huaranga huatacunata Jesushuan causashcamantami paitaca achcata cꞌuyan. Chaimanta millai gentecuna paipaj cꞌuyashca Churita macajta, cꞌamijta, llaquichijta ricushpaca seguramentemi paica dimastij llaquirishcanga. Shuj huahua huañujpica yaya mamacunaca dimastijmi sufrincuna. Paipaj huahua Paraisopi cutin causarinata yachashpapish achcatami llaquirincuna. Huata 33-pi Jesús cꞌuyaillata huañujpica, ¿Yayitu Diospish ima shinataj sintirirca? Paica dimastij llaquillami sintirirca (Mateo 3:17). Jesús huañushcata yuyaringapajca ashalla punllacunami illan. ¿Chai punlla chayangacamaca canlla o cambaj familiahuan Jesús imamanta huañushcata estudiai tucunguichu? Chaipajca conmemoración punllapaj adoración matutina nishca videota ricunatapish ama cungaringuichu. Caicunata rurashpami conmemoración punllapaj ñucanchij shunguta preparashun. Shujtajcunatapish chai tandanacuimanta beneficiarichunmi ayudai tucushun (Esdras 7:10). w24.01 págs. 11, 12 párrs. 10-12

Jehová Dios ñucanchijman fuerzasta cuchunca paitami mañana canchij. Chaita rurajpica Diosca poderta cushpami ñucanchijta ayudanga (2 Corintios 4:7). Diospaj Shimica achca podertami charin (Hebreos 4:12). Chaimantami Bibliata liyina, chaipi nishcacunapi yuyana canchij (Salmo 86:11). Diosta mañangapaj, Bibliata liyingapaj esforzarishpaca Dios cushca fuerzastami chasquishun. Chashnami llaquicunata ahuantashpa cushilla Jehová Diosta sirvishun, sinchi mingashcacunatapishmi alli pajtachi tucushun. Cunanca Jehová Dios Jonasta ima shina sinchiyachishcatami ricushun. Jonasca manchaita charishcamantami Dios cachashca llajtaman ringapaj barcota japinapaj randica shujtaj barcota japirca. Chaimi paipish, paihuan barcopi cajcunapish jatun acapana shamujpi casi huañurcacuna. Barcopi cajcuna paita mama cuchaman shitajpica shuj jatun pescadomi paitaca causajta millpurca. ¿Jonasca pescadopaj huijsa ucupi cashpaca fuerzasta chasquingapajca imatataj rurarca? Jehová Diostami mañarca (Jonás 2:​1, 2, 7). w23.10 pág. 13 párrs. 4-6

Apóstol Pedroca punta siglopi causaj huauqui panicunamanmi paipaj ishqui cartacunata quillcarca. Pero Jehová Diosca ñucanchijcunapish beneficiarichunmi chai ishqui cartacunataca Bibliapi churarca (Romanos 15:4). Testigo de Jehovacunaca achca huatacunatami Diospaj punlla ñalla chayamuna cashcata huillacushcanchij. Shinapish achca gentecunaca shamuj punllacunapi ima tucunamanta Bibliapi nishcacunataca mana crincunachu. Chaimantami paicunaca huaquinpica ñucanchijmanta burlarincuna. Maijancunacarin “Diospaj punllaca nunca mana shamungachu” nincunami (2 Pedro 3:​3, 4). Predicacujpi, trabajopi o ñucanchij familia chaita nijpica ñucanchij femi chiriyai tucun. ¿Pero ñucanchij fe ama chiriyachunca imatataj rurana canchij? Pedro imata nishcata ricushun. Maijancunaca Diospaj punllaca uniyacunmi nincunami. Pero paicuna shina ama yuyangapajca Pedro nishcacunapimi yuyana canchij. Paica Jehová Diosca tiempotaca ñucanchij shina mana ricuj cashcatami nirca (2 Pedro 3:​8, 9). Jehová Diospajca shuj punllaca mil huatacuna shinami can. Paica shujllapish ama chingarichunmi pacienciata charin. Pero paipaj punllaca chayamungatajmi. Millai gentecunaca tucuchishcami canga. w23.09 págs. 26, 27 párrs. 2-5

¿Apóstol Pabloca Judeapi causaj hebreo huauqui panicunamanca imamantataj shuj cartata quillcashcanga? Paicunaman animota cungapajmi quillcashcanga. Chai huauqui panicunaca Jesusta manaraj catishpaca la mayoriami judaísmo nishca religionta catijcuna carca. Chaimantami paicuna Jesusta cati callarijpica paicunapaj ñaupa religionta pushajcunaca achcata burlarishcangacuna. Judiocunaca Diosta adorangapajca jatun templotami charircacuna. Shinallataj Diosman sacrificiocunata cungapajca altarta, sacerdotecunatapishmi charircacuna. Pero Jesusta catijcunaca Diosta adorangapajca chaicunataca mana charircacunachu. Chaimantachari huaquin huauqui panicunaca desanimarishcangacuna (Hebreos 3:​12, 14). Huaquincunacarin judaísmo religionta cutin catinatami yuyashcangacuna. Shinallataj Pabloca hebreo huauqui panicuna Diospaj Shimipi tiyaj sinchi yachaicunata intindingapaj mana esforzaricushcatami nirca. Chai sinchi yachaicunaca “sinchi micuna” shinami carca (Hebreos 5:​11-14). Maijan huauqui panicunaca todaviarajmi Moisesman cushca leyta cazucurcacuna. w23.10 págs. 24, 25 párrs. 3, 4

Maijan huarmicunaca mana cazaranatami agllancuna (Mateo 19:​10-12). Soltera panicunaca Jehová Diospaj, Jesuspajpish achca valishcacuna cashcatami yuyarina can. Muyundij Allpapimi soltera panicunaca congregacioncunapica achcata ayudacuncuna. Paicuna cꞌuyaita ricuchishcamantami achcacunapajca panicuna shina, mamacuna shina tucushcacuna (Marcos 10:​29, 30). Huaquin panicunaca tiempo completota Jehová Diosta sirvinatami agllashcacuna. Panicunami muyundij Allpapi Diosmanta alli huillaicunata huillashpa achcata ayudacuncuna (Salmo 68:11). ¿Canca tiempo completota Jehová Diosta sirvinata yuyashcanguichu? Por ejemplo precursora shina, tandanacuna huasicunata shayachishpa o Betelpimi sirvi tucungui. Shuj metata pajtachisha nishpaca Jehová Dios canta ayudachun mañai. Chai qꞌuipaca chai metata ña pajtachishca huauqui panicunahuan parlai. Paicunami chai metata pajtachingapaj imata ruranata ricuchi tucuncuna. Chai qꞌuipaca chai metata pajtachingapaj imallata ruranata yuyai. Jehová Diosta ashtahuan sirvingapaj esforzarishpaca chꞌican chꞌican ruraicunata rurashpami cushilla causangui. w23.12 pág. 22 párrs. 16, 17

Jatun llaqui punllacuna ñalla shamuna cashcataca allimi yachanchij. Chaimantami alli huillaicunata huillanaca minishtirishca can. Shinapish cullqui illaj saquirishca cashpa o autoridadcuna Diosmanta ama huillachun jarcasha nijpica Diospajta rurashpa catinaca sinchimi canga. Pero ¿ñaupajman catingapajca imatataj rurana canchij? ‘Jahua pacha soldadocunata mandaj Jehová Diospimi’ confiana canchij. Paica ñucanchij cꞌuchullapi cashcamantami ayudai tucun. Pero ñucanchijta ayudachunca llaquicunata charishpapish paipajta rurashpa catingapajmi esforzarishpa catina canchij (Ageo 2:4). Jehová Diosca shujtaj gentecunaman paimanta yachachinapi ocuparichunmi munan. Chaita rurashpallami shujtajcunata quishpirichun ayudashun. Ageoca Diospaj huasita cutin shayachichunmi judiocunata animarca. Paica achca huatacunata chai trabajota mana rurashcata cungarishpa, cutin tucui shunguhuan trabajai callarichunmi animarca. Chaita rurashcamantami Jehová Diosca paicunataca achcata bendiciarca (Ageo 2:​18, 19). Ñucanchijpish Diospajta rurashpa catingapaj esforzarijpica Yaya Diosca ñucanchijta bendiciashpami catinga. w23.11 págs. 16, 17 párrs. 8, 11

Apóstol Pabloca Romanos libropica tucuicuna juchayujcuna cashcatami nirca. Chashna jahuapish Jehová Diosca paita sirvijcunataca cashcata rurajcunata shinami ricun. ¿Imamanta? Apóstol Pabloca Abrahanpaj causaimanta parlashpami chaitaca alli intindichirca. Abrahán Canaán llajtapi causacujpimi Jehová Diosca cashcata rurajta shina ricui callarirca. Pero ¿imamantataj Jehová Diosca paitaca chashna ricurca? Tal vez ¿Abrahán Moisesman cushca tucui leycunata cazuj cashcallamanta? Mana. Mana chaimantachu carca (Romanos 4:13). ¿Imamanta shina ninchij? Abrahán causashca punllacunapica Moisesman cushca mandashcacunaca manaraj tiyarcachu. Israelitacunaca 400 huatacuna qꞌuipami chai mandashcacunataca chasquircacuna. Shinashpaca Abrahán sinchi feta charishcamantami Jehová Diosca cashcata rurajta shina paitaca ricui callarirca. Chaimantami cꞌuyaihuan paitaca ayudarca (Romanos 4:​2-4). w23.12 pág. 3 párrs. 4, 5

Chai tutallapitajmi Jehová Diosca profeta Natantaca Davidman Diospaj templota mana shayachigrishcata huillachun cacharca (1 Crónicas 17:​3, 4, 11, 12). ¿Chaita yachaj chayashpaca Davidca imatataj rurarca? Paica tucui pudishcahuanmi paipaj churi Salomonta apoyarca. Davidca templota shayachichunca minishtishca cullquitapish, minishtishca materialcunatapish tandachingapajmi esforzarirca (1 Crónicas 29:​1-5). Jehová Diosca Davidtaca: ‘Canca ñuca templota mana ruragrishpapish cambaj huahua huahuacunamanta huiñaipaj mandajmi shamunga’ nishpami huillarca (2 Samuel 7:16). Chai mandajca Jesucristomi tucurca. Jesús cai Allpata mil huatacunata mandacui horas Davidca causarishpami chaita yachaj chayashpaca achcata cushiyaringa. ¿Davidpaj causaimantaca imatataj yachai tucunchij? Ñucanchijpish David shinallatajmi Diosta sirvingapajca mana tucui ñucanchij munashcacunata pajtachi tucushun. Shinapish Jehová Diosca ñucanchij mana yuyashcapimi achcata bendicianga. w23.04 págs. 15, 16 párrs. 8-10

Llaquilla cai horasca Job, Salmos, Proverbios, Mateo 6-pi Jesús nishca shimicunatami liyi tucunchij. Chai versocunata liyishpami achcata animarishun. Jatun llaquicuna japijpipish Jehová Diosca siempremi ñucanchij cꞌuchullapi canga. Paica ñucanchijtaca manataj saquingachu (Salmo 23:4). Paica llaqui punllacunapi ñucanchijta huaquichinata, ayudanata, chariranata, cushichinatami huillashca. Chaimi Isaiasca Yayitu Diosmanca: “Quiquinpi yuyaita churashpa, chaitataj rurashpa catijtaca quiquinmi manataj pi cuyuchipaj sumaj causaipi huaquichingui. Quiquinpi shunguta churashcamantami chashna huaquichingui” nirca (Isaías 26:3). Shinashpaca Jehová Diospi cambaj shunguta churai. Pai cushca ayudacunata chasquingapajpish esforzari. Chaita rurashpami jatun llaquicunata ahuantangapaj fuerzata charingui. w24.01 pág. 25 párrs. 16, 17

Cai versoca cunan punllacunapimi pajtaricun. Shinallataj Bibliapica: “Cambaj huahuacunaca tucuicuna Mandaj Dios yachachishcami canga. Cambaj huahuacunapaj sumaj causaica ashtahuanmi miraringa. Cashcata ruranahuan sumajyachishcami cangui. Manchaihuan canaca cambajmanca mana cꞌuchuyana cashcamanta manchaihuan canamantaca carupimi cangui” ninmi. Cai nishcacunapishmi cunan punllacunapica pajtaricun (Isaías 54:​13, 14). Diabloca cai pachata mandacushpapish Jehová Diosta sirvijcuna muyundij Allpapi huillashpa catichunca mana jarcai tucunchu (2 Corintios 4:4). Shinaca Diosta sirvijcunaca cutinmi pai munashca shina ima mapa illajlla paitaca adorai tucunchij. Jehová Diosta chashna adorachunca imapish mana jarcai tucungachu. w24.02 pág. 4 párr. 10

Ñucanchijcunaca Jehová Diosman mingarishpa ari nishcata pajtachingapajmi esforzarina canchij. Chaipajca alli decisioncunatami japina canchij. Shinallataj ñucanchij familiata ayudangapajmi esforzarina canchij. Pero Diospaj mandashcacunata ladoman saquishpa paicunapaj munashcata rurachun nijpica paicunata cazunapaj randica Jehová Diostami cazuna canchij (Mateo 10:​35, 36; 1 Timoteo 5:8). Paicunapaj munashcata mana rurashcamanta ñucanchij familiacuna pꞌiñarijpipish Yayitu Jehová Diostami tucuipi cazuna canchij. Jehová Diosca tucui familiacunata ruraj cashcamantami cushilla causachun munan (Efesios 3:​14, 15). Sumaj causaita charisha nishpaca Jehová Diostami tucuipi cazuna canchij. Paica ñucanchij familiata cꞌuyaihuan, respetohuan cuidangapaj sinchita esforzarijta ricushpaca cushillami sintirin (Romanos 12:10). w24.02 págs. 17, 18 párrs. 11, 13