Agosto

Cai versopica cashcata rurajcuna llaquicunata charigrishcatami yachachin. Shinallataj chai llaquicunata ahuantachun Jehová Dios ñucanchijta ayudana cashcatapishmi yachachin. ¿Jehová Diosca ñucanchijtaca ima shinataj ayudacun? Ñucanchijca Diosta sirvicushcamantami cushilla causanchij. Pero Yayitu Diosca llaquicuna ricurinatapishmi ñucanchijman yachachishca (Isaías 66:14). Chaimantami pai cusha nishca bendicioncunata huiñai huiñaicama ñalla charigrishcapi yuyachun animan (2 Corintios 4:​16-18). Chai punlla chayangacamaca paica ñucanchij charishca llaquicunata ahuantashpa catichunmi punllanta ayudacun (Lamentaciones 3:​22-24). ¿Ñaupa tiempopipish, cunan tiempopipish Diosta sirvijcunapaj llaquicunamantaca imatataj yachai tucunchij? Ñucanchijpish Jehová Diospi confiashpa pai ñucanchijtapish manataj saquinatami yachanchij (Salmo 55:22). w23.04 págs. 14, 15 párrs. 3, 4

José y Mariamantaca achcatami yachai tucunchij. Paicunaca autoridadcuna churashca leycunata cazuna mana jahualla cajpipish chaicunata cazungapajmi listos carcacuna (Lucas 2:​1-6). Jesusta María ñalla charigricujpimi Romata mandaj César Augustoca tucui gentecuna shuj censota rurashpa registrarichun mandarca. Paita cazungapajca José y Mariaca Belenmanmi rina carcacuna. Chaipajca paicunaca 150 kilometrocunatami urcucunata rishpa viajana carcacuna. Chaita ruranaca Mariapajca mana jahuallachu cagrirca. Chaimantami José y Mariaca ‘¿Belenman ricujpi huachana nanaicuna japijpica imatataj rurashun?’ nishpa sustarishcangacuna. Shinallataj paicunaca María paipaj huijsapi gentecuna shuyacushca Mesiasta apacushcatami yacharcacuna. Chaimantami paicunaca Jesustaca allimi cuidasha nircacuna. Chashnapish ¿paicunaca Jesusta cuidana cashcamanta César Augusto mandashcata mana cazuna cashcatachu yuyashcangacuna? José y Mariaca Jesusmanta achca preocupados cashpapish autoridadcuna cushca mandashcacunatami cazurcacuna. Chaita rurashcamantami Jehová Diosca paicunataca achcata bendiciarca. Chaimi Mariaca Belenmanca alli chayarca, Jesuspish sanomi huacharirca. Ashtahuancarin Mariaca shuj profecía pajtarichunmi ayudarca (Miqueas 5:2). w23.10 págs. 8, 9 párrs. 9, 11, 12

Achca huauqui panicunaca tandanacuicunapi comentanataca achcatami manchancuna. ¿Can chashna sintirishpaca imatataj rurana cangui? Allimi prepararina cangui (Proverbios 21:5). Imata yachachicushcata alli intindishpaca comentangapajca ratomi maquita alzangui. Mana cashpaca ashalla shimicunapimi comentariocunata cui tucungui (Proverbios 15:23; 17:27). Ashalla shimicunapi comentashpaca manchaitami saquingui. Cambaj propio shimicunahuan comentajpicarin shujtajcunaca can alli preparashcata, alli intindishcatapishmi cuentata cungacuna. Pero ¿manchaihuan caticushcamanta shuj o ishqui cutinlla comentariocunata cushpaca imatataj yuyaipi charina cangui? Jehová Diosca can comentariocunata cungapaj esforzarishcataca achcatami valoran (Lucas 21:​1-4). Shinallataj paica can mana cui tucushcata cuchunca mana mañanchu. Caicunatami yuyaipi charina cangui (Filipenses 4:5). Chaimanta mashna comentariocunata cui tucushcata ricui. Manchaita ama charingapajpish Jehová Diosta mañai. Callaripica ashalla shimicunapi shuj comentariota cungapaj esforzari. w23.04 pág. 21 párrs. 6-8

Apóstol Pabloca Diosta sirvijcunaca soldadocuna shina cashcatami nirca. Soldadocunaca siempremi macanacungapaj listos cana can. ¿Ñucanchijpish Jehová Diospaj punllapaj allichirishca cashcata ricuchingapajca imatataj rurana canchij? Fetapish, cꞌuyaitapish pechopi fierro churanata churarij shinami churarina canchij. Shinallataj quishpiringapaj esperanzatapish cascota shinami churarina canchij. Soldadocunaca paicunapaj shunguta cuidangapajca pechopimi fierro churanata churarijcuna carca. Ñucanchijpish ñucanchij shunguta cuidangapajca feta, cꞌuyaita charingapajmi esforzarina canchij. Chashnami Jehová Diosta, Jesustapish cazushpa catishun. Shinallataj sinchi feta charishpaca Jehová Dios paita cazujcunata bendiciaj cashcatami seguros cashun (Hebreos 11:6). Ashtahuancarin llaquicuna ricurijpipish Jesustami apoyashpa catishun. Pero, ¿sinchi feta charingapaj, llaquicunatapish ahuantangapajca imatataj rurana canchij? Huauqui panicuna llaquicunata ima shina ahuantashcatami yachana canchij. Shinallataj ashtahuan charina yuyai ama japichun, minishtirishcallahuan causangapaj imata rurashcatami yachana canchij. w23.06 págs. 10, 11 párrs. 8, 9

Jarcarijcuna cashpaca mana allicunata ruranamantami jarcarishun. Shinallataj mana jahualla cajpipish allicunata rurangapajmi esforzarishun. Bibliapi nishca shinaca Jehová Diosmi paipaj espíritu santota cushpa jarcarijcuna cachun ayudai tucun (Lucas 11:13; Gálatas 5:​22, 23). Cambaj causaipi tucui alli cachunca mana shuyanachu cangui. Causaipica siempremi llaquicuna, jarcaicuna tiyanga. Chaimantami jarcaicunata, llaquicunata charishpapish ñucanchij metacunata pajtachingapaj esforzarina canchij. Huaquinpica yallitaj jatun metacunata churarishcamantami chaicunata pajtachinataca ña mana munashun. Chaipaj randica uchilla metacunataraj pajtachishpami callarina canchij. Por ejemplo, shuj cualidadtachari charinata munashun. Callaripica chai cualidadtaca uchilla cosascunapimi ricuchi tucunchij. Shinallataj Bibliatachari ashtahuan liyinata munanchij. Achca versocunata liyinapaj randica ashalla versocunata liyishpami callari tucunchij. w23.05 págs. 29, 30 párrs. 11-13

Jehová Diosca paipaj organizacionta utilizashpami ñucanchijman yachachishpa caticushca. Chashnami ‘Jucha illaj Ñanpi’ puri tucushcanchij (Isaías 35:8; 48:17; 60:17). Gentecunaca Bibliamanta yachai callarishpaca jucha illaj ñanpi purina oportunidadtami charincuna. Shinapish huaquincunaca Diosmanta yachanata saquishpaca cai ñanpi purinatami saquishcacuna. Cutin shujtajcunaca metaman chayangacamami purishpa catincuna. Pero, ¿metaca maijantaj can? Ungidocunaca ‘Jucha illaj Ñanpi’ purishpa catishpaca jahua pachapi causana bendiciontami chasquingacuna (Apocalipsis 2:7). Cutin, cai Allpapi causana esperanzata charijcunaca jucha illajmi tucungacuna. Chaica Jesús 1.000 huatacunata mandashca qꞌuipami pajtaringa. w23.05 págs. 17, 19 párrs. 15, 16-18

Yayitu Dios canmanta imallata rurashcata yuyari (Salmo 116:​12-14). Bibliapica ‘tucui alli regalocunapish, ima ashtahuan allicunapish Jehová Diosmantami shamun’ ninmi (Santiago 1:17). Por ejemplo, Jehová Diosca ñucanchijmanta huañuchunmi paipaj Churita curca. Chaica valishca regalomi can. Jesús huañushcamantami canca Diospaj amigo cana, huiñai huiñaita causana oportunidadta charingui (1 Juan 4:​9, 10). Shinashpaca Jehová Dios cꞌuyaita ricuchishcamanta, tucuipi ayudashcamanta agradicingapajmi paiman mingarina cangui (Deuteronomio 16:17; 2 Corintios 5:15). w24.03 pág. 5 párr. 8

Diosta mana sirvijcuna mana alli cosascunata rurashpa causacujta ricushpaca Lot shinachari sintirinchij. Paica Yaya Dios millai ruraicunata mana ricunachij cashcatami yacharca. Chaimantami mana alli gentecuna millai ruraicunata mana pingashpa rurajta ricushpa yallitaj sustarirca (2 Pedro 2:​7, 8). Ñucanchijpish Diosta mana cazuj gentecunapaj chaupipimi causanchij. Shinapish Jehová Diosta tucui shunguhuan cꞌuyashpaca mana alli ruraicunapica mana urmashunchu. Mana alli ruraicunapi ama urmachunmi Yayitu Jehová Diosca Proverbios libropi sumaj consejocunata cushca. Chaimantami cꞌaricuna, huarmicuna, jovencuna, mayorllacuna cashpapish chai consejocunata pajtachingapaj esforzarina canchij. Jehová Diosta shungumanta manchajcuna, cꞌuyajcunaca millai ruraicunata rurangapajlla pretextocunataca mana churancunachu. w23.06 págs. 20, 21 párrs. 1, 2, 5

Jehová Diosta sirvinata agllashcamantami tal vez familia ucupica problemacunata charircangui. Mana cashpaca Jehová Diosta ashtahuan sirvingapajchari huaquin cosascunata huashaman saquircangui (Mateo 6:33). Jehová Dios paita sirvingapaj imalla rurashcataca manataj cungarinchu (Hebreos 6:10). Jesusca: “Maijanpish ñucata catij cashcamanta, alli huillaicunamantapish huasita, huauquicunata, panicunata, yayata, mamata, huahuacunata, allpacunata saquijca, catirashpa llaquichishca cashpapish cunan punllapica 100 cutinhuan yallimi huasicunata, huauquicunata, panicunata, mamacunata, huahuacunata, allpacunata chasquinga. Shamuj punllacunapicarin huiñai causaitami chasquinga” nircami (Marcos 10:​29, 30). Seguramente Jesús nishcacunaca cambaj causaipi pajtarishcatami ricushcangui. Jehová Diosta sirvinata agllashcamanta can chasquishca bendicioncunaca can rurashca sacrificiocunata yallimi can (Salmo 37:4). w24.03 pág. 9 párr. 5

Judeamanta huauqui panicunaca micungapajca imata mana charircacunachu. Antioquiamanta huauqui panicunaca “Judea llajtapi causaj huauqui panicunata ayudangapaj paicuna imalla cui tucushcata cachanata yuyarircacuna” (Hechos 11:​27-30). Judeamanta huauqui panicuna carupi causashca cajpipish Antioquiamanta huauqui panicunaca shungumantami ayudarcacuna (1 Juan 3:​17, 18). Huauqui panicuna llaquicunata apacujta yachaj chayashpaca ñucanchijpishmi ayudai tucunchij. ¿Ima shina? Tal vez imapi ayudai tucushcatami ancianocunata tapui tucunchij. Shinallataj llaquipi cajcunata ayudachunmi contribucioncunata cushpa ayudai tucunchij. Mana cashpaca llaquicunata ahuantachunmi huauqui panicunamanta mañana canchij. Llaquicuna ashtahuan mirashpa catijpimi huauqui panicunaca imalla minishtishcata cushpa ayudachun minishtingacuna. Jesús gentecunata juzganaman shamujpi Diosta sirvijcuna shujtajcunata ayudacujta ricushpaca cushillami sintiringa. Chaipimi paica: “Diospaj Gobierno cushca bendicioncunata japichij” ninga (Mateo 25:​34-40). w23.07 págs. 4, 6 párrs. 9, 10, 12

Jesusca Jehová shina gentecunata intindingapajmi esforzarirca. Diosca paitaca ‘chingarishca ovejacuna shina causacuj israelitacunallata ayudachunmi’ cachashca carca. Pero shujtaj llajtamanta caj huarmi ‘ñuca ushushita demonio japishcamantami llaquita apacun, paita ayudapai’ nishpa rogajpica Jesusca paita llaquishpami ayudarca (Mateo 15:​21-28). Shinallataj Jesusca Diosmanta huillai callarishpaca ‘gentecunapaj ñaupajpi ñucata mana rijsinichu nijtaca, ñucapish paitaca mana rijsinichu nishami’ nishcami carca (Mateo 10:33). Pero ¿Pedro paita quimsa cutin negajpica, Jesusca paita mana rijsinichu nircachu? Mana. Ashtahuanpish arrepintirishcata, sinchi feta charishcata ricushpaca paitami perdonarca. Shinallataj causarishca qꞌuipaca Pedrota perdonashcata, cꞌuyashcatami yuyachirca (Lucas 24:​33, 34). Jehová Diospish Jesuspish intindijcuna cashcatami yachashcanchij. Jehová Diosca ñucanchijpish intindijcuna cachunmi munan. w23.07 págs. 21, 22 párrs. 6, 7

¿Shujtaj gentecunapish cai Allpa Paraíso tucunata seguros cachunca ima shinataj ayudai tucunchij? Puntapica Jehová Diosllataj cai Allpa Paraíso tucunata huillashcatami ricuchina canchij. Apocalipsis libropica Jehová Diosmanta parlashpaca: “Jatun tiyarinapi tiyacujca: ‘¡Ricui! Tucuitami mushujta ruracuni’ nircami” ninmi. Shinaca Jehová Diosca pai rurasha nishcatami pajtachisha nin. Chaita pajtachingapajca paica tucui poderta, alli yachaitami charin. Shinallataj Jehová Diosca pai rurasha nishcacuna pajtarinataj cashcatami seguro can. Chaimantami chaicuna manaraj pajtarishca cajpipish ña pajtarishca shina parlan. Paica: ‘Cai shimicunaca crinalla, mana llulla shimicunami can. ¡Cai shimicunaca ñami pajtarishca!’ ninmi. Ashtahuanpish Jehová Dios imata rurai callarishpaca paillataj chaita rurashpa tucuchij cashcatami gentecunamanca yachachina canchij. Diosca pai rurai callarishcata tucuchij cashcamantami “ñucami Alfa y Omega cani” nin (Apocalipsis 21:6). Paica Diablo llulla cashcataca ñallami ricuchinga. Apocalipsis 21:​5, 6-pi nishcata liyishca qꞌuipaca maijancunaca chai versopi nishcacunaca manachari pajtaringa nijpica tal vez chai versocunapi nishcatami intindichi tucunchij. Chai versocunapi nishcacunaca Jehová Dios pai rurasha nishcacunata pajtachinataj cashcata ricuchingapaj shuj papelpi firmacushca shinami can (Isaías 65:16). w23.11 pág. 7 párrs. 18, 19

Jehová Dios cai promesata rurajpica Abrahanca 75 huatacunatami charirca. Abrahanca Jehová Dios nishcacuna ima shina pajtarishcataca mana tucuita ricurcachu. Isaac huacharichunca río Eufratesta chꞌimbashca qꞌuipaca 25 huatacunatami shuyana carca. Y 60 huatacuna qꞌuipami paipaj nietocuna Esaú y Jacob huacharircacuna (Hebreos 6:15). Shinapish Abrahanca paipaj huahua huahuacuna shuj jatun llajta tucushpa Jehová Dios cusha nishca allpata japijtaca mana ricurcachu. Chaita mana ricushpapish Abrahanca Jehová Diospaj alli amigomi cashpa catirca (Santiago 2:23). Pero paraisopi Abrahán causarishpaca pai sinchi feta charishcamanta tucui gentecuna achca bendicioncunata chasquishcatami yachaj chayanga. Chaita yachaj chayashpaca paica cushillami sintiringa (Génesis 22:18). ¿Abrahanmantaca imatataj yachanchij? Ñucanchijpish Jehová Diospaj nishcacuna ima shina pajtarinataca manachari ricui tucushun. Pero Abrahán shina pacienciata charishpaca cunan punllacunapi, shamuj punllacunapi Jehová Dios bendicianatami seguros cashun (Marcos 10:​29, 30). w23.08 págs. 24, 25 párr. 14

Mandaj Uziasca jovenraj cashpaca humilde, Jehová Diosta manchajmi carca. Paica 68 huatacunatami causarca. Jehová Diosca casi tucui paipaj causaipimi bendiciarca (2 Crónicas 26:​1-4). Uziasca Jehová Diosta mana sirvij achca llajtacunatami misharca. Shinallataj Jerusalenman yaicushpa pi ama llaquichichunmi ricurarca (2 Crónicas 26:​6-15). Uziasca Jehová Diospaj ayudahuan allicunata rurashcamantami cushilla sintirishcanga (Eclesiastés 3:​12, 13). Uziasca mandaj cashcamanta imatapish rurai tucushcatami yuyashcanga. Chaimi shuj punllaca Diospaj huasiman yaicushpa altarpi inciensota rupachirca. Shinapish mandajcunaca chaitaca mana ruranachu carca (2 Crónicas 26:​16-18). Sumo sacerdote Azarías Uziasta consejajpica paica achcatami pꞌiñarirca. Chaimi Jehová Diosca lepra ungüihuan paita llaquichirca. Shinaca Uziasca Jehová Diosta alli sirvishpapish mana alli decidishcamantami llaquicunata charirca (2 Crónicas 26:​19-21). Uziasca humilde cangapaj esforzarishca cashpaca tucui vidami cushilla causanman carca. w23.09 pág. 10 párrs. 9, 10

Apóstol Pedroca ungido cashpapish pandarishpami catirca. Huata 36-pica Pedroca mana judío caj Cornelio runa espíritu santota chasquishcatami ricurca. Chaita ricushpami Pedroca Jehová Dios tucui gentecunata chasquishcata, mana judiocunapish congregacionpi cai tucushcata intindirca (Hechos 10:​34, 44, 45). Pedroca mana judiocunahuanca mana micujchu carca. Pero Jehová Dios Cornelioman espíritu santota cujta ricushpaca mana judiocunahuanmi micui callarirca. Shinapish maijancunaca ‘judiocunaca mana judiocunahuanca mana micunachu can’ nishpami yuyajcuna carca. Paicuna Antioquiaman rijpica paicunata ama pꞌiñachingapajmi Pedroca mana judío huauqui panicunahuanca mana micusha nirca. Chaita ricushpaca Pabloca Pedrotaca tucuicunapaj ñaupajpimi cunarca (Gálatas 2:​13, 14). Pedroca pandarishpapish ñaupajmanmi catirca. w23.09 pág. 22 párr. 8

Ashata mejorana cashpaca mana desanimarinachu cangui. ‘Amito Jesús’ cꞌuyaj cashcamanta mejorashpa catichun ayudasha nishcatami yuyarina cangui (1 Pedro 2:3). Shinallataj Apóstol Pedroca, Diosca “cancunataca tucuipi alli cajta ruranga. Paimi cancunataca sinchiyachinga” nircami. Pedroca shuj cutinca Jesusta sirvij canataca mana mericinichu nircami (Lucas 5:8). Pero Jehová Diospish Jesuspish ama chashna yuyachunmi paitaca ayudarcacuna. Chaimantami Pedroca Jesustaca tucui shunguhuan sirvirca. Chaita rurashcamantami paica ‘Jesucristopaj mana tucurij Gobiernopi yaicuna jatun bendicionta chasquirca’ (2 Pedro 1:11). Chai premioca achca valishcami can. Canpish Pedro shina Jehová Diosta sirvishpa catingapajmi esforzarina cangui. Shinallataj Jehová Dios canman yachachishpa catichunmi saquina cangui. Chaita rurashpaca huiñai huiñaita causana premiotami chasquingui. Shinallataj cambaj “feta ricuchishcamantami cushicushpa quishpiringui” (1 Pedro 1:9). w23.09 pág. 31 párrs. 16, 17

¿Judiocunaca ima shinataj adorarcacuna? Diospaj carpa huasipica shuj patiomi tiyarca. Chai patiopaj muyundijtaca telacunahuanmi tapashcacuna carca. Chai ucupimi sacerdotecunaca Diospajta rurajcuna carca. Shinallataj chai patiopica cobremanta rurashca jatun altarmi tiyarca. Chaipimi rupachishca sacrificiocunata cujcuna carca. Patiopica cobremanta rurashca tanquepishmi tiyarca. Chai tanquepimi sacerdotecunaca manaraj Diospajta rurashpaca maillarijcuna carca (Éxodo 30:​17-20; 40:​6-8). Jesushuan sacerdotecuna cangapaj manaraj jahua pachaman rij ungidocunaca Diospaj huasipi tiyaj ucu patiopimi sirvincuna. Cutin, ¿Diospaj carpa huasipi, templopi tiyashca tanquemantaca imatataj yachanchij? Cai Allpapi o jahua pachapi causana esperanzata charishpapish tucuicunami shungupi, yuyaipi, espiritualmente chuya cangapaj esforzarina canchij. Cutin, ¿achca gentecuna nishca grupoca maipitaj Jehová Diosta adorancuna? Juanca muscuipi shinami chai grupopi cajcuna jatun tiyarinapaj ñaupajpi tutapish, punllapish Diospajta ruracushcatami ricurca. Cai grupopi cajcunaca Diospaj huasipi tiyaj canlla patiopimi paita sirvincuna. Chai patioca cai Allpa pachatami ricuchin (Apocalipsis 7:​9, 13-15). ¿Tucuicuna Diospaj huasipi paita adorangapaj shuj lugarta charishcamantaca manachu cushilla sintirinchij? w23.10 págs. 28, 29 párrs. 15, 16

Jehová Diosca anciano huauquicunata utilizashpami ñucanchijmanca fuerzasta, animota cun (Isaías 32:​1, 2). Chaimantami llaquicunata apacushpaca ancianocunahuan parlangapaj esforzarina canchij. Paicuna ayudasha nijpica ñucanchijta ayudachunmi saquina canchij. Chaita rurashpami Jehová Dios ñucanchijta sinchiyachichun saquicushcata ricuchishun. Bibliapi nishca shinaca shamuj punllacunapi sumaj causai tiyanatami seguros cana canchij. Maijancunaca Paraisopi causanatami shuyacuncuna. Shujtajcunaca jahua pachapi Jesushuan mandanatami shuyacuncuna. Chai esperanzata charishcamantami ima llaquicuna ricurijpipish ahuantanchij (Romanos 4:​3, 18, 19). Tucui shunguhuan huillangapaj, ñucanchijman mingashcacunata alli pajtachingapajpishmi esforzarinchij (1 Tesalonicenses 1:3). Apóstol Pablo bendicioncunata chasquina yuyailla causashcamanta ima shina sintirishcata ricushun. Pabloca Diospaj enemigocuna paita catirashpa llaquichishcata, urmachisha nishcatami huillarca. Huaquinpica caita chaita yuyacushcata, casi huañushcatapishmi nirca (2 Corintios 4:​8-10). ¿Pabloca fuerzasta, animota japingapajca imatataj rurarca? Paica shamuj punllacunapi bendicioncunata chasquina cashcata yuyangapajmi esforzarirca (2 Corintios 4:​16-18). Pabloca jahua pachapi causana esperanzatami charirca. Chai bendicionta chasquina yuyailla causashcamantami llaquicunataca cushilla ahuantai tucurca. Chaimantami ‘ñuca yuyaipish, ñuca shungupish punllantami mushujyarishpa catin’ nirca. w23.10 págs. 15, 16 párrs. 14-17

“¿Jehová Diosca ñuca munashca horaschu ñuca mañashcacunata cutichinga?” nishpami tapurina canchij. Maipica chai rato Jehová Dios ñucanchij mañaicunata cutichichunmi shuyashun. Pero Jehová Diosca ñucanchij mañaicunata ima horas cutichinataca allimi yachan (Hebreos 4:16). Jehová Dios ñucanchij munashca horas ñucanchij mañaicunata mana cutichijpica ñucanchijta mana uyashcatachari yuyashun. Pero ñucanchij munashca horas mana cutichijpipish nunca mana cutichinataca mana yuyanachu canchij. Por ejemplo, Jehová Dios shuj joventa alliyachishca cajpica, Diabloca cai jovenca paita alliyachishcallamanta Jehová Diosta sirvishcatami ninman carca (Job 1:​9-11; 2:4). Pero Jehová Diosca tucui ungüicunata ima hora tucuchinataca ñami agllashcata charin (Isaías 33:24; Apocalipsis 21:​3, 4). Chaimantami cunan punllacunapi Jehová Dios shuj milagrota rurashpa ñucanchijta alliyachichunca mana shuyanchij. ¿Shinashpaca cai jovenca Jehová Diostaca imatataj mañana can? Ungushca cashpapish paita sirvishpa catingapaj fuerzasta cuchunmi mañai tucun. Chashna mañashpami cai jovenca tranquilo sintiringa. w23.11 pág. 24 párr. 13

Sansonca pandarishpapish ñaupajmanmi catirca. Chaimantami paica Jehová Dios paiman mingashcata pajtachingapaj esforzarirca (Jueces 16:​28-30). Sansonca: “Filisteocuna ñuca ishqui ñahuicunata surcushcamanta cunantaj tucuicunata huañuchingapaj cutin fuerzata cuhuai” nishpami Yaya Diosta mañarca. Jehová Diosca Sansón mañashcata uyashpami cutin paimanca fuerzata curca. Chashnami Sansonca achca filisteocunata huañuchi tucurca. Paica tucui paipaj causaipi huañuchishcatapish yallitami huañuchirca. Sansonca pandarishcamantami achca llaquicunata charirca. Chashnapish Jehová Diospaj munaita pajtachishpa catingapajmi esforzarirca. Ñucanchijpish imapi pandarishpaca llaquicunatami charishun o ñucanchijman mingashcacunataca ña manachari pajtachi tucushun. Chashnapish ñaupajmanmi catina canchij. Jehová Diospajca pandarishca cajpipish valishcami canchij (Salmo 103:​8, 9). Ashtahuanpish imapi pandarishca cashpapish Sansón shina Diospajta rurashpa catingapajmi esforzarina canchij. w23.09 pág. 6 párrs. 15, 16

Ñucanchijcuna sufricujta ricushpaca ¿Jehová Diosca cushillachu sintirin? Mana. Ashtahuanpish llaquicunata ahuantacujta ricushpami paica cushilla sintirin. ¿Llaquicunata ahuantashpa Jehová Diosta cushichi tucushcata yachashcamantaca manachu cushilla sintirinchij? (Salmo 5:12). Abrahanca llaquicunata ahuantashcamantami Diospaj ñaupajpica alli ricurirca. Shinallataj Jehová Diosca paipaj alli amigo cashcamantami Abrahantaca cashcata rurajta shina ricurca (Génesis 15:6; Romanos 4:​13, 22). Ñucanchijca ¿Diospaj obrata rurangapaj esforzarishcallamanta, congregacionpi achca privilegiocunata charishcallamantachu Diospaj ñaupajpica alli ricurishun? Mana. Ashtahuanpish Diospaj ñaupajpi alli ricuringapajca paitami tucuipi cazuna canchij. Ima llaquicuna shamujpipish ahuantanami canchij. Tucuicunami mashna huatacunata charishpapish, ima llaquita apacushpapish chaita rurangapaj esforzarina canchij. ¿Canca llaquicunata apacunguichu? Caita yuyari: llaquicunata ahuantangapaj esforzarishpaca Diospaj ñaupajpimi alli ricuringui. Jehová Dios cambaj esfuerzocunata ricushpami cushilla sintirin. Chaita yachashcamantami shamuj punllacunapi bendicioncunata chasquina cashcata seguro cangui. w23.12 págs. 11, 12 párrs. 13, 14

Diosta sirvij cꞌaricunaca sumajta parlanacunatami yachana can. Chashnami shujtajcuna imata nicushcata, imata yuyashcata, ima shina sintirishcata intindi tucunga (Proverbios 20:5). Shinallataj sumajta parlanacujcunaca shujtajcuna ima tonohuan parlacushcata uyashpa, paicunapaj ñahuita ricushpami ima shina sintirishcata yachai tucuncuna. Joven huauquicuna, ¿chashna parlanacunata yachanata munashpaca imatataj rurana canguichij? Shujtajcunaman correo electronicocunallata, mensajecunallata cachajcuna cashpaca paicunahuan ñahui ñahui parlanacunaca sinchimi canga. Chaimantami shujtajcunahuan ñahui ñahui sumajta parlanacungapaj esforzarina cangui (2 Juan 12). Espiritualmente sinchi caj cꞌaricunaca paicunallataj mantinirinata, mana cashpaca paicunapaj familiata mantininatami yachana can (1 Timoteo 5:8). Trabajota japingapajca huaquin ruraicunata, oficiocunatami yachana cangui (Hechos 18:​2, 3; 20:34; Efesios 4:28). Shinallataj ima trabajota chasquishpaca chaita alli rurangapaj, a tiempo tucuchingapajmi esforzarina cangui. Chashna trabajaj cashpaca trabajota japinaca ashtahuan jahuallami canga. w23.12 pág. 27 párrs. 12, 13

Jehová Diosca ñaupa punllacunapica paipaj enemigocunata tucuchishpami israelitacunata quishpichirca. Chai punllamanta parlashpaca Bibliapica ‘Diospaj punlla’ ninmi (Isaías 13:​1, 6; Ezequiel 13:5; Sofonías 1:8). ¿Cutin cunan punllacunapica Diospaj punllaca ima horataj callaringa? Jatun mandajcuna Babilonia jatun pueblota tucuchijpimi callaringa. Shinallataj chai punllaca Armagedón jatun macanacuipimi tucuringa. Chai punlla shamujpi quishpiringapajca cunanmantami allichirina canchij. Chaimantami Jesusca jatun llaqui punllapaj o gran tribulacionpaj “allichirishca shuyacuichij” nishpa mandarca (Mateo 24:21; Lucas 12:40). 1 Tesalonicenses libropica apóstol Pabloca Jesusta punta catijcunataca Jehová Diospaj punllapaj allichirishca cachunmi animarca. Paica Diospaj punlla chai tiempopi mana shamuna cashcataca allimi yacharca (2 Tesalonicenses 2:​1-3). Chaita yachashpapish Pabloca Jesusta punta catijcunataca chai punlla ñalla shamugrij shina allichirishpa catichij nishpami animarca. w23.06 pág. 8 párrs. 1, 2

1978 huatapica Japón llajtapica shuj jatun edificiotami rurarcacuna. Chai edificiota shayachicujta ricushpaca gentecunaca jatun terremoto tiyajpica urmangallami nishpami yuyarcacuna. Pero ingenierocunaca chai edificio ama urmachunmi sinchita shayachircacuna. Sinchita shayachijpipish terremotocuna tiyajpi caiman chaiman ashata cuyurichunmi rurarcacuna. Diosta sirvijcunaca chai jatun edificio shinami canchij. ¿Imamanta? Ñucanchijca Jehová Diospaj mandashcacunata difindingapajmi sinchi, imapish mana cuyuchij edificio shina cana canchij. Shinallataj Jehová Diosta utca cazungapajmi esforzarina canchij. Pero ima shinami terremoto tiyajpi edificioca ashata cuyurin, ñucanchijpish huaquinpica ñucanchij yuyaitami ashata cambiana canchij. Chashnami alli yuyaiyuj, intindij cashcata ricuchishun (Santiago 3:17). Shinallataj alli yuyaita charishpaca nunca manataj pandarina cashcata o imatapish ruranalla cashcataca mana yuyashunchu. w23.07 pág. 14 párrs. 1, 2

Jesusca cai Allpapi cashpaca jarcaicunahuanmi chꞌimbapurarca. Por ejemplo, Jehová Diosta ama cazuchun Satanás pandachisha nijpipish Jesusca paitaca mana uyarcachu (Mateo 4:​1-11). Jesús paipaj causaita cushpa gentecunata ama quishpichichunmi Satanasca tucui laya jarcaicunata churarca. Jesusca Diosmanta huillacushpapishmi jarcaicunahuan chꞌimbapurarca. Por ejemplo, paipaj enemigocunami paita huañuchisha nishpa catirashpa llaquichircacuna (Lucas 4:​28, 29; 13:31). Shinallataj paita catijcuna pandarijpipish pacienciatami ricuchina carca (Marcos 9:​33, 34). Paita huañuchingapaj juzgacujpipish maijancunaca sinchitami macarcacuna, burlarircacunapish. Shinallataj paitaca shuhuata shinami cꞌuyaillata huañuchircacuna (Hebreos 12:​1-3). Jesús ñalla huañugrijpipish Jehová Diosca paita cuidanatami saquirca. Chaimi pailla chai sinchi llaquita ahuantarca (Mateo 27:46). Jesusca ñucanchijta quishpichingapajca achcatami sufrirca. ¿Pai tucui imalla rurashcata yuyashpaca ima shinataj sintirinchij? Seguramente paitaca tucui shunguhuanmi cꞌuyashun ninchij. w24.01 págs. 10, 11 párrs. 7-9

Pacienciata charishpaca shujtajcunahuanmi alli apanacushun. Paicuna imata parlacujpipish atencionhuanmi uyashun (Santiago 1:19). Shinallataj pacienciata charishpaca tucuicuna alli apanacuchunmi ayudashun. Shaicushca o estresado cashpapish alli yuyashpami imatapish nishun. Ashtahuancarin pi ñucanchijta pꞌiñachijpi o llaquichijpipish mana pꞌiñarishpami paicunataca alli tratashun. Shinallataj mana tigra llaquichishunchu. Ashtahuancarin caishuj chaishuj perdonanacushpa, ahuantanacushpami sumajta causashun (Colosenses 3:​12, 13). Mana pacienciata charishpaca yuyarishcahuanmi ucui jahua imatapish decidishun. Pero pacienciata charishpaca manaraj decidishpami alli yuyangapaj tiempota llujchishun. Shinallataj “¿cai decisionta japinaca allichushi canga? ¿manachu alli canga?” nishpami alli yuyashun. Por ejemplo, tal vez trabajo illaj saquirishcamantami mana alli yuyashpa ima trabajotapish japinata yuyashun. Pero manaraj shuj trabajota japishpaca allimi ricuna canchij. Shinallataj, “chai trabajota japishpaca ñuca familiahuan cangapaj, Jehová Diosta adorangapajca ¿tiempota charishachu?” nishpami yuyarina canchij. Alli yuyashpa imatapish decidishpaca tranquilo, cushillami causashun. w23.08 pág. 22 párrs. 8, 9

Aicha munaicunamanta jarcarinaca huaquinpica sinchimi canga. Pero chaicunapi ama urmangapajca Jehová Diosman mingarishpa ari nishcatami yuyarina canchij. Jehová Diosman mingarishcamantami tentacioncunapica mana jahualla urmashun. Jehová Diosman mingarishpaca ‘mana alli munaicunata, mana alli ruraicunata huashaman saquishpa Jehová Diosllatami sirvigrini’ nishpami ari nircanchij. Chaita nishpami ñucanchijpajlla ña mana causagrishcata ricuchircanchij (Mateo 16:24). Chaimantami tentacioncuna ricurijpica chaicunapi urmanata yuyanapaj randica “Jehová Diosllatami sirvigrini” nishpa ari nishcata yuyarina canchij. Chaita yuyarishpami Jehová Diosta tucuipi cazungapaj fuerzasta charishun. Ashtahuanpish Job shina cashcatami ricuchishun. Paica jatun llaquicunahuan chꞌimbapuracushpapish Jehová Diostami tucuipi cazurca (Job 27:5). w24.03 pág. 9 párrs. 6, 7

Jehová Dios ñucanchijta cꞌuyaj cashcatami cuentata cunchij (2 Corintios 13:11). Paica cada unomantami preocuparin. Pai cꞌuyaj, llaquij cashcamanta ñucanchij cꞌuchullapi cashcatami seguros canchij (Salmo 32:10). Chaimanta Jehová Dios ñucanchijta cꞌuyashcata ima shina ricuchishcata yuyangapaj tiempota surcushunchij. Chashnami pai ñucanchijta ayudaj cashcata, ñucanchij cꞌuchullapi cashcata seguros cashun. Shinallataj ñucanchij shunguta pascashpa, cꞌuyaita ricuchihuayari nishpa Diosta mañashunchij. Paimanca ima shina sintirishcata, ima llaquicunata apacushcatami tucuita huillana canchij. Yayitu Dios ñucanchijcuna ima shina sintirishcata intindishpa ayudanatami seguros cana canchij (Salmo 145:19). Diospaj cꞌuyaica chiri tutapi jatun nina cunuchicuj shinami can. Chaimantami Jehová Diosmanta mana caruyana canchij. Pai yallitaj cꞌuyaj cashpami ñucanchijtaca alli tratan. ¿Jehová Dios ñucanchijta achcata cꞌuyaj cashcata yachashpaca manachu cushilla sintirinchij? Chaimanta Salmota quillcaj runa shina ‘Jehová Diosta cꞌuyanimi’ nishunchij (Salmo 116:1). w24.01 pág. 31 párrs. 19, 20

Jesusca Yaya Dios Jehová shuti cashcallataca mana yachachircachu. Judiocunaca chaitaca ñami yacharcacuna. Ashtahuanpish Jesusca paicunamanca Jehová Dios ima shina cashcatami yachachirca (Juan 1:​17, 18). Por ejemplo, Ñaupa Testamentopica Jehová Dios cꞌuyaj, llaquij cashcatami nin (Éxodo 34:​5-7). Pero Jesusca chingashca churimanta chꞌimbapuraita churashpami judiocunataca Jehová Dios ima laya cashcata intindichun ayudarca. Chingashca churi caruta shamucujpirajmi yayaca paita ricushpa achcata llaquirirca. Chaimi paita tupanaman callpashpa rirca. Ña tupashpaca cꞌuyaihuanmi ugllashpa mucharca. Chashnami Yayaca paipaj churita perdonarca. Bibliapi chaita liyishpaca Jehová Dios yallitaj cꞌuyaj, llaquij cashcatami intindinchij (Lucas 15:​11-32). w24.02 pág. 10 párrs. 8, 9

Llaquicunata apacujpica Yayitu Diosca tranquilo sintirichunmi ayudan. Pero ¿Jehová Dios shina shujtajcunata llaquishcamanta paicunata ayudangapajca imatataj rurana canchij? Alli cualidadcunata charingapajmi esforzarina canchij. ¿Caishuj chaishuj cꞌuyanacushpa, cushichinacushpa catingapajca imatataj rurana canchij? (1 Tesalonicenses 4:18). Llaquilla cajcunahuan llaquirinata, familia ucupi shina cꞌuyaita ricuchinata, cuj canatapish manataj saquinachu canchij (Colosenses 3:12; 1 Pedro 3:8). Cai sumaj cualidadcunata charishpaca huauqui panicuna llaquicunata apacujpica paicunatami shungumanta animanata munashun. Jesusca: “Shimica shungupi ima tiyashcatami riman. Alli runaca paipaj shungupi alli yuyaicunata charishcamantami allicunata riman” nircami (Mateo 12:​34, 35). Shinashpaca huauqui panicunata cꞌuyashcata ricuchingapajca paicunatami animana canchij. w23.11 pág. 10 párrs. 10, 11

Profeciacunata alli intindingapajca pi ñucanchijta ayudachunmi mañana canchij. Cai ejemplopi yuyashun. Canchari can mana rijsishca llajtaman ringui. Pero mana canllachu ringui. Chai llajtata alli rijsij amigohuanmi ringui. Paica maipi cashcata, maita rinataca allimi yachan. ¿Paihuan rishcamantaca manachu tranquilo sintiringui? Jehová Diosca chai amigo shinami can. Paica ima punllacunapi causacushcata, shamuj punllacunapi ima tucunataca allimi yachan. Chaimantami Bibliapi tiyaj profeciacunata alli intindingapajca mana jatun tucushpa Jehová Diospaj ayudata mashcana canchij (Daniel 2:28; 2 Pedro 1:​19, 20). Yayitu Diosca shuj alli Yayami can. Chaimantami paipaj huahuacuna shamuj punllacunapi cushilla causachun munan (Jeremías 29:11). Gentecunaca shamuj punllacunapi ima tucunataca mana yachai tucunchijchu. Pero Jehová Diosca chaitaca allimi yachan. Paica paipaj sirvijcunapish shamuj punllacunapi imalla tucuna cashcata yachachunmi munan. Chaimantami Bibliapi profeciacunata quillcachirca (Isaías 46:10). w23.08 págs. 8, 9 párrs. 3, 4