Julio

Jesusca milagrocunata rurashpa, imata rurashpapish Jehová Dios imata yuyashcata, ima shina sintirishcatapishmi ricuchirca (Juan 14:9). ¿Jesuspaj milagrocunamantaca imatataj yachai tucunchij? Jesuspish, paipaj Yaya Jehovapish ñucanchijtaca achcatami cꞌuyancuna. Jesús cai Allpapi cashpaca gentecuna ama sufrishpa catichunmi, huaquin milagrocunata rurashpa paicunata ayudarca. Chashnami gentecunata shungumanta cꞌuyashcata ricuchirca. Shuj cutinca mana ricuj ishqui runacunaca caparishpami Jesustaca ayudahuai nishpa mañarcacuna (Mateo 20:​30-34). Chaita uyashpami Jesusca shungupi dimastij llaquirishpa paicunata jambirca. Jesusca dimastij llaquij cashcamantami yaricaihuan cajcunaman micunata cararca. Lepra ungüita charij shuj runatapishmi jambirca (Mateo 15:32; Marcos 1:41). Caita yachashpaca Jehová Diospish, Jesuspish ñucanchijta achcata llaquishcata, ñucanchijcuna ña mana sufrichun munashcatapishmi intindinchij (Lucas 1:78; 1 Pedro 5:7). Paicunaca tucui shunguhuanmi gentecunapaj llaquicunata tucuchisha nincuna. w23.04 pág. 3 párrs. 4, 5

Panda yachachishcacunata ama uyangapaj, ama ricungapajmi esforzarina canchij. Bibliata liyishpa, estudiashpa, tandanacuicunaman rishpa, predicacionman llujshishpami alli yuyaicunata charishun. Caita rurajpica Jehová Diosca tentacioncunapi ama urmachunmi ayudanga (1 Corintios 10:​12, 13). Cai tucuri punllacunapi llaquicunata ahuantangapajca Jehová Diostami cutin cutin mañana canchij. Paica tucui shunguhuan paita mañachunmi munan (Salmo 62:8). Chaimanta punllanta Yayitu Diosta jatunyachinata, pagui ninatapish amataj saquishunchijchu. Mana manchashpa huillangapaj, llaquicunata ahuantangapaj, tentacioncunapi ama urmangapajpish ayudachun mañashunchij. Shujtajcuna jarcasha nijpipish paita mañanataca manataj saquinachu canchij. w23.05 pág. 7 párrs. 17, 18

¿Imapajtaj tandanacuicunaman rinchij? Tandanacuicunamanca Jehová Diosta alabangapajmi rinchij (Salmo 26:12; 111:1). Shinallataj cai sinchi punllacunapi caishujmanta chaishujmanta animanacungapajmi rinchij (1 Tesalonicenses 5:11). Ñucanchij comentariocunata cushpaca caicunatami pajtachinchij. Shinapish maipica ishqui jarcaicunatami chari tucunchij. Puntapica, yallitaj manchaita charishcamantami comentariocunataca mana cunchij. Ishquipica, maquita achca cutin alzajpipish comentariocunata cuchun mana saquijpimi llaquirinchij. Pero ¿manchaita mishangapaj, ama llaquiringapajpish imatataj yuyarina canchij? Apóstol Pabloca: “Tandanacuicunapi caishujmanta chaishujmanta animanacushunchij” nishpami consejarca. Apóstol Pablo nishca shinaca tandanacuicunapi comentariocunata cushpaca huauqui panicunata animanatami mashcana canchij. Chaita pajtachingapajca ashalla shimicunahuanmi comentariocunata cui tucunchijlla. Chaita yuyarishpami mana manchashpa comentangapaj maquita alzashun. Shinallataj ñucanchijcuna comentachun mana saquijpica mana llaquirinachu canchij. Shujtaj huauqui panicuna comentacujta uyashpami cushiyarina canchij. Chashnami tandanacuicunapica caishujmanta chaishujmanta animanacushun (1 Pedro 3:8). w23.04 págs. 20, 21 párrs. 1-3

Judiocunaca 70 huatacunatami Babiloniapi prezu shina causarcacuna. Pero cunanca Israelmanmi tigrai tucurcacuna (Esdras 1:​2-4). Babiloniocunaca esclavocunataca mana cacharichijcunallachu carca. Pero Diospaj ayudahuanmi israelitacunaca Babiloniamanta llujshi tucurcacuna (Isaías 14:​4, 17). Enemigocuna babiloniocunata mishashpaca cancunapaj llajtaman tigrasha nishpaca tigraichijlla nircami. Chaimi judiocunaca Babiloniapi saquirinata o mana saquirinata decidina carcacuna. Pero chai decisionta japinaca huaquincunapajca sinchimi carca. Huaquincunaca mayorllacuna cashcamantami ña mana achcata viajai tucurcacuna. Shinallataj Babiloniapi causaj judiocunaca casi tucuicunami chaipi huacharishcacuna carca. Chaimi paicunapajca Israelca paicunapaj ñaupa yaya mamacunapaj llajtalla carca. Ashtahuanpish Babilonia llajtapica huaquin judiocunaca cullquiyujcunami tucushca carca. Chaimantami paicunapajca huasicunata, negociocunata saquishpa Israelman tigranaca sinchi cashcanga. w23.05 pág. 14 párrs. 1, 2

Diospaj Shimica ahuantajcuna, llaquijcuna, cꞌuyajcuna cachunmi animan. Por ejemplo, Lucas 21:​19-pica: “Tucuringacama ahuantashpaca cancunapaj causaitami quishpichinguichij” ninmi. Cutin, Colosenses 3:​12-pica: ‘Tucui shunguhuan llaquij caichij’ ninmi. Shinallataj, 1 Tesalonicenses 4:​9, 10-pica: ‘Diosllatajmi cancunamanca caishuj chaishuj cꞌuyanacunata yachachicun. Shinapish huauquicuna, chaita ashtahuan rurashpa catichunmi animanchij’ ninmi. Cai shimicunaca punta siglopi Jesusta sirvijcunapajmi carca. Paicunaca ahuantajcuna, llaquijcuna, cꞌuyajcunami carca. Shinapish paicunaca ashtahuanmi chai cualidadcunataca ricuchishpa catina carcacuna. Ñucanchijcunapish chaillatataj rurangapajmi esforzarishpa catina canchij. Chaipajca ¿imatataj rurana canchij? Punta siglopi Jesusta catijcuna chai cualidadcunata charingapaj imata rurashcata, ñucanchijcunapish chai cualidadcunata ima shina chari tucushcatami yachana canchij. Chashnami jatun llaqui punllapajca allichirishca cashun. Shamuj punllacunapipish llaquicunata ahuantashpa catishun. w23.07 págs. 2-4 párrs. 4, 8

Tucuicunami jucha illaj Ñanpi puricunchij. Chai ñanta purishpallami Jehová Diostaca alli adorai tucunchij. Shamuj punllacunapicarin sumaj causaitami charishun. Chaimantami ungidocunapish, shujtaj ovejacunapish chai ñanpi purishpa catina canchij (Juan 10:16). 1919 huatamantami achca cꞌaricuna, huarmicuna, huahuacunapish Babilonia jatun pueblomanta llujshishpa chai ñanpi puri callarishcanchij. Judiocunapaj punllacunapica Jehová Diosca Israelman rina ñanmanta tucui jarcaicunata anchuchishpami pambajllata rurarca (Isaías 57:14). ¿Cunan tiempopi tiyaj Jucha illaj Ñanpipishchu caitaca rurarca? Ari. Manaraj 1919 huata chayajpica Jehová Diosca paita sirvijcunata utilizashpami cai ñanta allichi callarirca. Chashnami alli shungu gentecunaca Babilonia jatun pueblomanta llujshishpa Jehová Diosta cushilla sirvi tucurcacuna (Isaías 40:​3-ta ricui). w23.05 págs. 15, 16 párrs. 8, 9

Jehová Diosca cushilla, tucui shunguhuan paita sirvichunmi munan (2 Corintios 9:7). Shinaca ¿pajtachina munaita mana charishpapish imamantataj metacunata pajtachingapaj esforzarishpa catina canchij? Apóstol Pablopi yuyashun. Paica: “Ñuca cuerpotaca sinchita macashpami ñucata sirvij cachun rurani” nircami (1 Corintios 9:​25-27). Pabloca Jehová Diosta cazuna munaita mana tanto charishpapish paita tucui shunguhuan cazushpa catingapajmi sinchita esforzarirca. Pablo esforzarijta ricushpaca Jehová Diosca achcatami cushicurca. Chaimantami paitaca achcata bendiciarca (2 Timoteo 4:​7, 8). Huaquinpica huaquin metacunata mana tanto pajtachisha nishpapish Jehová Diosta cꞌuyashcamantami pajtachingapaj esforzarinchij. Chaita ricushpaca Jehová Diosca cushillami sintirin. Paica Pablota bendiciashca shinami ñucanchijtapish bendicianga (Salmo 126:5). Ñucanchijpish Jehová Dios bendiciajta ricushpaca paita ashtahuan sirvina munaitami charishun. w23.05 pág. 29 párrs. 9, 10

Apóstol Pablo nishca shinaca espiritualmente dormicujcunami mana quishpiringacuna. Dormicujcunaca ima tucucushcataca mana yachancunachu. Paicunapaj cꞌuchullapi ima tucucujpipish imata mana rurancunachu. Diosta mana sirvijcunapish paicuna shinallatajmi can (Romanos 11:8). Paicunaca “tucuri punllacunapi” causacushcata, jatun llaqui punllacuna ñalla chayamucushcatapish mana cuentata cuncunachu (2 Pedro 3:​3, 4). Pero ñucanchijcunaca cai tucuri punllacunapi rijcharishca cana cashcatami alli yachanchij. Diosta sirvijcunaca machajcuna shinaca mana canachu canchij. Ashtahuancarin alli yuyaihuanmi causana canchij (1 Tesalonicenses 5:6). Cai mundopaj ruraicunapi, politicacunapi chagrurinaca jahuallami can. Shamuj punllacunapicarin cai mundopaj ruraicunapi chagrurichunca gentecunaca ashtahuanmi obligasha ningacuna. Pero mana yallitaj sustarinachu canchij. Jehová Diosmi paipaj espíritu santota cushpa, alli yuyashpa imatapish decidichun ayudanga (Lucas 12:​11, 12). w23.06 pág. 10 párrs. 6, 7

¿Sansonmantaca imatataj yuyaringui? Seguramente fuerzasapa cashcatami yuyaringui. Chaica ciertomi. Pero Sansonca fuerzasapa cashpapish pandarishcamantami llaquicunata aparca. Sansón pandarishca cajpipish Jehová Diosca tucui causaipi sinchi feta charishcatami yuyarirca. Chaimantami paimanta yachachun Sansonpaj causaita Bibliapi quillcachirca. Jehová Dios poderta cujpimi Sansonca israelitacunata ayudai tucurca. Pai huañushca achca huatacuna pasashca qꞌuipaca Jehová Diosca paimanta quillcachunmi Pabloman yuyaita curca. Pabloca Sansonmanta, shujtaj Jehová Diosta alli sirvijcunamantapishmi quillcarca (Hebreos 11:​32-34). Sansonca llaquicunata charishpapish Jehová Diospimi shunguta churarca. w23.09 pág. 2 párrs. 1, 2

Ima llaquita charishcata, ima shina sintirishcatapishmi Jehová Diosmanca cutin cutin huillana canchij (1 Tesalonicenses 5:17). Tal vez canca cai ratoca manachari jatun llaquicunata charingui. Pero, asha llaquilla cashpa, pꞌiñarishca cashpa o imata ruranata mana yachashpaca ¿Jehová Diospaj ayudatachu mashcangui? Uchilla cosascunapi Jehová Diospaj ayudata mashcashpaca shamuj punllacunapi ima llaquicuna shamujpipish Jehová Diospaj ayudatami mashcashpa catishun. Jehová Diosca cantaca ima shina ayudanata, ima hora ayudanataca allimi yachan (Salmo 27:​1, 3). Cunan punllacunapi llaquicunata ahuantashpaca jatun llaqui punllacuna shamujpipish ahuantai tucushunmi (Romanos 5:3). ¿Imamantataj chashna ninchij? Achca huauqui panicunaca shuj llaquita ahuantashcamantami shujtaj llaquicunatapish ahuantai tucushcacuna. Chai llaquicunata ahuantangapaj Jehová ayudajta ricushpaca paipimi ashtahuan confiashcacuna (Santiago 1:​2-4). w23.07 págs. 3, 4 párrs. 7, 8

Jehová Diosca llaquij, humilde cashcamantami ñucanchijtaca intindin. Por ejemplo, Sodomapi causaj millai gentecunata tucuchigricushpami humilde cashcata ricuchirca. Diosca angelcunata cachashpami urcucunapi miticunaman richun Lottaca mandarca. Pero Lotca chaimanca mana risha nircachu. Chaimi Jehová Diostaca ‘ñuca familiahuan Zoar pueblopi miticugrichun saquihuai’ nishpa mañarca. Pero Diosca chai pueblotami tucuchigrirca. Chaimantami Lottaca paita cazuchun obligai tucurca. Pero chaita ruranapaj randica Zoar pueblotaca mana tucuchircachu (Génesis 19:​18-22). Shinallataj Jehová Diosca Nínive pueblopi causajcunata llaquishcatami ricuchirca. Millaicuna cashcamanta paicunata tucuchigrishcata huillachunmi Jonastaca cacharca. Pero paicuna arrepintirijpimi Jehová Diosca paicunata llaquishpa perdonarca (Jonás 3:​1, 10; 4:​10, 11). w23.07 pág. 21 párr. 5

Mana jatun sapicunata charij yurata shuj caspihuan mana huatajpica chai yuraca urmanllami ¿nachu? Jehoasca chai yura layami carca. Chaimantami Jehoiadá huañujpica yura urmaj shina rato Diosmanta caruyarca. Ñucanchijpish huauqui panicuna, ñucanchij familiacuna Jehová Diosta sirvij cashcallamantaca mana sirvinachu canchij. Ashtahuanpish espiritualmente sinchi cangapaj, Jehová Diosta tucui shunguhuan manchangapajca Bibliata estudiana, chaipi nishcacunapimi yuyana canchij. Cada punlla Jehová Diosta mañangapajpishmi esforzarina canchij (Jeremías 17:​7, 8; Colosenses 2:​6, 7). Jehová Diosca ñucanchij rurai pudishcallata rurachunmi munan. Chaimantami Eclesiastés 12:​13-pica: “Diostaca manchashpa cazungui, pai mandashcacunatapish pajtachingui” nin. Jehová Diosta tucui shunguhuan manchashpami llaquicunataca ahuantashun. Ashtahuancarin Jehová Diosmantaca manataj caruyashunchu. w23.06 pág. 19 párrs. 17-19

Apocalipsis 21:​5-paj callari partepica “jatun tiyarinapi tiyacuj” parlai callarishcatami nin. Paica Jehová Diosmi can. Shinashpaca chai versopi nishcacunataca shuj ángel o Jesusca mana nircacunachu. Jehová Diosllatajmi nirca. Apocalipsis libropica Jehová Diosca quimsa cutinllami directamente parlan. Paica manataj llullanchu (Tito 1:2). Chaimantami pai cusha nishcacuna pajtarinataj cashcata seguros canchij. Apocalipsis libropica achca cutincunami “¡Ricui!” nishca shimica ricurin. ¿Jehová Diosca “¡Ricui!” nishca qꞌuipaca imatataj nirca? Paica: “Tucuitami mushujta ruracuni” nircami. Shamuj punllacunapi ima tucunata parlashpapish Jehová Diosca chaicunata ña ruracushca layami parlan. ¿Imamanta? Pai rurasha nishcacuna pajtarinataj cashcata ricuchingapajmi chashna parlarca (Isaías 46:10). w23.11 págs. 3, 4 párrs. 7, 8

Apóstol Pedroca pandarishpami catirca. Por ejemplo, Jesús ‘profeciacuna pajtarichun achcata sufrishpami huañuna cani’ nijpica Pedroca Jesustaca sinchitami rimarca (Marcos 8:​31-33). Shinallataj Pedroca caishuj apostolcunahuanmi paicunapuramanta maijan ashtahuan jatun cashcata rimanacujcuna carca (Marcos 9:​33, 34). Jesús ñalla huañugrijpipish Pedroca shuj runapaj rinrintami pꞌitirca (Juan 18:10). Chai tutallatajmi manchaita charishcamanta quimsa cutin ‘Jesustaca mana rijsinichu’ nirca (Marcos 14:​66-72). Jesusta negashcamantami Pedroca yallitaj llaquirishpa huacaillata huacarca. Pedroca pandarishcamantami dimastij llaquilla carca. Pero pai pandarijpipish Jesusca paipimi confiashpa catirca. Chaimantami Pedromanca paita mashnata cꞌuyashcata nichun oportunidadta curca. ‘Ñuca ovejitacunata michingui’ nishpapishmi animarca (Juan 21:​15-17). Chaita uyashpaca Pedroca cushillami sintirirca. Chaimantami Pentecostés punllapica Jerusalenman rirca. Chaipimi espíritu santota chasquishpa jahua pachaman ringapaj agllashca carca. w23.09 pág. 22 párrs. 6, 7

Apóstol Pedroca ancianocunamanca “cancunaman mingashca Diospaj ovejacunata michichij” nircami (1 Pedro 5:​1-4). Anciano huauquicunaca huauqui panicunataca achcatami cꞌuyancuna. Chaimantami paicunataca animasha nincuna. Shinapish ocupado cashcamanta o shaicushca cashcamantami huaquinpica chaita ruranaca sinchi can. ¿Ancianocunaca chashna sintirishpaca imatataj rurana can? Jehová Diosmanmi ima shina sintirishcata huillana can. Pedroca “shujtajcunata sirvijpish Dios cushca fuerzahuan sirvicuj shina sirvichun” nircami (1 Pedro 4:11). Maijan huauqui panicunaca sinchi llaquicunahuanmi chꞌimbapuracuncuna. Huaquin llaquicunaca paraíso chayajllapimi tucuringacuna. ¿Chashnapish ancianocunaca imatataj yuyarina can? “Jatun michij” Jesusmi ancianocunata yalli cai huauqui panicunataca cunan punllacunapi, shamuj punllacunapipish ayudai tucun. Pero Jehová Diosca anciano huauquicuna huauqui panicunata cꞌuyachun, paicunata animachun, alli ejemplota cuchunmi munan. w23.09 págs. 29, 30 párrs. 13, 14

Diabloca Diosta mana sirvijcuna shina yuyachunmi pandachisha nin. Pero chaita rurashpaca Diosmanta caruyashpami paitaca ña mana cazunata munashun (1 Corintios 3:19). Diosta mana sirvijcunaca ñucanchij munashca shina causachunmi animan. Ñaupa Pérgamo y Tiatira congregacioncunapi ima tucushcata ricushun. Huaquin huauqui panicunaca huainayashpa causaj, yanga dioscunata adoraj gentecuna shinami yuyai callarircacuna. Paicuna huainayanapi urmana mana jatun jucha cashcata yuyashcamantami Jesusca sinchita cunarca (Apocalipsis 2:​14, 20). Ñucanchijpish mana cuidadota charishpaca Diosta mana sirvijcuna shinami yuyai callarishun. Tal vez maijan familiacuna, rijsishcacunaca: “Bibliaca ñaupa librollami. Chaipi nishcacunata cazunapaj randica ñucanchij munashca shinami causanalla canchij. Chaita ruranaca mana juchachu can” nishpami pandachisha ningacuna. Huaquinpica, ‘Jehová Dios cushca instruccioncunaca tucuitaca mana huillanchu’ nishpachari yuyashun. Chaimantachari Jehová Dios mandashcacunallata cazunapaj randica, ashtahuan mandashcacunata churanata munashun (1 Corintios 4:6). w23.07 pág. 16 párrs. 10, 11

Jesuspaj mama Mariaca fuerzasta, animotami minishtirca. Ángel Gabriel, ‘manaraj cazarashpa chichu saquiringui’ nijpica Mariaca achcatami mancharishcanga. Paica huahuacunata mana charishpapish cunanca Diospaj Churitami alli huiñachina carca. Shinallataj Josehuan manaraj chayarinacushpapish shuj huahuata charigrishcatami paiman huillana carca (Lucas 1:​26-33). ¿Mariaca fuerzasta, animotaca ima shinataj japirca? Paica shujtajcunapaj ayudatami mashcarca. Por ejemplo, ángel Gabrielmanmi Jehová Dios imata rurachun munashcata alli intindichichun mañarca (Lucas 1:34). Asha punllacuna qꞌuipaca Mariaca Judá llajta urcucunapi saquirij shuj llajtamanmi utcashpa rirca. Chaipimi paipaj familia Elisabetta visitarca. Elisabetca Mariatami felicitarca. Shinallataj Diospaj espíritu yuyaita cujpimi Elisabetca María charigrishca huahuamanta shuj sumaj profeciata huillarca (Lucas 1:​39-45). Chaita uyashpami Mariaca: “Diosca paipaj maquihuanmi jatun ruraicunata rurashca” nirca (Lucas 1:​46-51). Caipi ricushca shinaca Jehová Diosca ángel Gabrielta, Elisabetta utilizashpami Mariamanca fuerzasta curca. w23.10 págs. 14, 15 párrs. 10-12

Jehová Diosca paipaj espirituhuanmi 144.000 gentecunata paipaj huahuacuna cachun agllashca. Paicunaca jahua pachapica Jesushuanmi sacerdotecuna canga (Apocalipsis 14:1). Diospaj carpa huasipi tiyashca Diospajlla chꞌicanyachishca ucuca ungidocuna cai Allpapi cajpiraj Jehová Dios paicunapaj huahuacuna cachun ña agllashcatami ricuchin (Romanos 8:​15-17). Cutin Diospaj carpa huasipi tiyashca Diospajlla ashtahuan chꞌicanyachishca ucuca jahua pachatami ricuchin. Jehová Diosca chaipimi causan. Shinallataj chai ishqui ucucunapaj chaupipi tiyaj racu telaca Jesuspaj aicha cuerpotami ricuchin. Jesusca aichayuj, tulluyuj cashpaca Diospaj huasipi jatun mandaj sacerdote shina sirvingapaj jahua pachamanca mana ri tucurcachu. Pero paipaj jucha illaj cuerpota tucui gentecunamanta sacrificio shina cujpica tucui ungidocunamanmi jahua pachaman rina oportunidadta curca. Ungidocunapish jahua pachaman ringapajca paicunapaj aicha cuerpotami saquina can (Hebreos 10:​19, 20; 1 Corintios 15:50). w23.10 pág. 28 párr. 13

Efrainmanta cꞌaricuna Gedeonta sinchita rimajpipish paica mana pꞌiñarircachu (Jueces 8:​1-3). Ashtahuanpish pꞌiñarinapaj randica pacienciahuanmi paicunataca uyarca. Gedeón respetota ricuchijpimi paicunaca calmarircacuna. Ancianocunapishmi shujtajcuna sinchita rimajpica respetohuan uyana can. Shinallataj alaja shimicunahuanmi cutichina can (Santiago 3:13). Ancianocuna chaita rurajpimi congregación ucupica tucuicuna tandalla, tranquilos cangacuna. Madianitacunata mishashcamanta gentecuna Gedeonta jatunyachijpica, paica Jehová Diostaraj jatunyachichunmi animarca (Jueces 8:​22, 23). Ancianocunapish chaillatatajmi rurana can (1 Corintios 4:​6, 7). Por ejemplo, huauqui panicuna alli yachachij cashcamanta felicitajpica ancianocunaca: “Ñucaca Diospaj Shimipi ima nicushcallatami nircani. Diospaj organización alli yachachishcamantami tucuicuna achcata yachai tucunchij” nishpami cutichi tucun. Shinallataj ancianocunaca Bibliamanta yachachicushpa Jehová Diosta jatunyachicushcata o paicunallataj alabaricushcatami yuyana can. w23.06 pág. 4 párrs. 7, 8

Jehová Dios ñucanchij mañashcata mana cutichijpica cai tapuicunapimi yuyana canchij: “¿Ñuca mañacushcaca minishtirishcachu can?” nishpami tapurina canchij. Huaquinpica imata minishtishcata yuyashpami Jehová Diosta chaita cuchun mañanchij. Shinapish chaitaca manachari minishtishun. Shinallataj ñucanchij yuyashca shina Jehová Dios shuj problemata allichichunchari mañashcanchij. Pero ñucanchij yuyashca shina chai problemata allichinaca manachari alli canga. Shinallataj Jehová Dios munashca shina mana mañashcamantachari ñucanchij mañashcataca mana cun (1 Juan 5:14). Por ejemplo, shuj yaya mamaca paipaj churi Jehová Diosta sirvishpa catichunmi mañarcacuna. Chashna mañanaca alli layami ricurin. Pero Jehová Diosca paita sirvichunca pitapish mana obliganchu. Paica huahuacunallataj decidishcamanta paita sirvichunmi munan (Deuteronomio 10:​12, 13; 30:​19, 20). ¿Shinashpaca chai yaya mamaca Yaya Diostaca ima shinataj mañana can? Paicunaca alli yachachijcuna cangapajmi Jehová Diosta mañai tucuncuna. Chashnami paicunapaj huahuaca Jehová Diosta cꞌuyanga, paipaj amigopish tucunga (Proverbios 22:6; Efesios 6:4). w23.11 págs. 21, 23, 24 párrs. 5, 12

¿Cꞌuyaita ricuchingapajca imamantataj animota cunaca minishtirishca can? Bibliamanta parlaj shuj libropi nishca shinaca Pabloca griego rimaipi ‘caishuj chaishuj cushichinacuichij’ nishpaca huauqui panicuna llaquicunata apacujpica paicunata animangapajmi listos cana canchij. Huauqui panicunata chashna ayudajpimi huiñai causaiman apaj ñanpi purishpa catingacuna. Shinashpaca huauqui panicuna llaquilla cai horasca ratomi paicunataca ayudana, animana canchij. Chashnami paicunata cꞌuyashcata ricuchishun (2 Corintios 7:​6, 7, 13). ¿Shujtajcunata shungumanta animangapajca imamantataj paicunataca llaquina canchij? Llaquijcuna cashpaca shujtajcuna llaquicunata apacujta ricushpaca shungumantami paicunataca ayudanata, animanata munashun. Llaquijcuna cangapajca Jehová Diospaj ejemplotami catina canchij. Apóstol Pablo nishca shinaca Jehová Diosca yallitaj llaquij cashcamantami paita sirvijcunataca tucuipi animasha, cushichisha nin (2 Corintios 1:3). w23.11 págs. 9, 10 párrs. 8-10

Diosta sirvijcunaca llaquicunata charina cashcataca allimi yachanchij. Chaimantami apóstol Pabloca Tesalonicapi caj huauqui panicunataca: “Cancunahuan cashpaca cashna llaquicunata apana cashcatami huillaj carcanchij. Cancuna yachashca shinaca chashnami tucushca” nirca (1 Tesalonicenses 3:4). Shinallataj Pabloca Corintopi caj huauqui panicunataca: ‘Ima llaquicunata ñucanchij charishcata cancunapish yachachunmi munanchij. Causanatapish, huañunatapish mana yacharcanchijchu’ nishpami quillcarca (2 Corintios 1:8; 11:​23-27). Punta siglopi causashca huauqui panicuna shina ñucanchijpish llaquicunata charina cashcataca allimi yachanchij (2 Timoteo 3:12). Canca ¿Jesuspi feta churashcamanta, paita cati callarishcamantaca llaquicunata charishcanguichu? Tal vez cambaj familiacuna, amigocunachari Diosta sirvi callarijta ricushpaca llaquichishcangacuna. ¿Mana cashpaca tucuipi honrado cashcamantachu trabajopica mana alli tratashcacuna? (Hebreos 13:18). O ¿shamuj punllacunapaj imata shuyacushcata shujtajcunaman parlashcamantachu autoridadcunaca catirashpa llaquichishcacuna? Ima laya llaquicunata apashca cashpapish apóstol Pablo nishcacunapi yuyashpami cushilla sintirishun. w23.12 págs. 10, 11 párrs. 9, 10

Jacobca achca llaquicunatami charirca. Jacobpaj churicunaca paicunapaj huauqui Josetaca esclavota shina cꞌaturcacuna. Shinallataj Jacobpaj churi Simeonpish, Levipish mana allita rurashpami tucui familiatapish, Jehová Diostapish malpi saquircacuna. Jacobpaj huarmi Raquelpish paipaj tucuri huahuata huachashcahuanmi huañurca. Jatun yaricai tiyashcamantacarin Jacobca ña mayorlla cashpapish Egipto llajtapi causanamanmi rina carca (Génesis 35:​16-19; 37:28; 45:​9-11, 28). Jacobca achca llaquicunata charishpapish Jehová Diospimi feta churashpa catirca. Chaimantami Jehová Diosca paitaca achcata bendiciarca. Por ejemplo, Jehová Diosca Jacobmanca achca cosascunatami curca. Shinallataj Jacobca paipaj churi Josehuan cutin tupashpami pai mana huañushca cashcata yachaj chayarca. Chaimi Jacobca dimastij cushilla sintirishcanga. Jacobca Jehová Dioshuan alli apanacushcamantami tucui llaquicunata ahuantai tucurca (Génesis 30:43; 32:​9, 10; 46:​28-30). Pai shinallatajmi ñucanchijpish ima llaquicunata ahuantangapajca Diospaj alli amigos cana canchij. w23.04 pág. 15 párrs. 6, 7

Salmo 23-pica Davidca Jehová Dios paita cꞌuyashcata, llaquishcata seguro cashcatami nirca. Paica Jehová Dios paipaj Michij cashcamanta paihuan alli apanacushcatapishmi nirca. Shinallataj Davidca Jehová Dios paita ñaupajman pushacushcamantami tranquilo sintirirca. Paica tucui shunguhuanmi Yaya Diospi confiaj carca. Ashtahuancarin tucui vida Jehová Dios paita cꞌuyashpa catinatami seguro carca. ¿Imamantataj seguro carca? Jehová Diosca Davidmanca tucui imalla minishtishcatami curca. Chaimantami Davidca Jehová Dios paita cuidaj cashcata seguro carca. Shinallataj Davidca Jehová Diospaj alli amigo cashcata, paipaj ñaupajpi alli ricurij cashcatami seguro carca. Chaimantami ima tucujpipish Yaya Dios imalla minishtishcata paiman cushpa catinata tucui shunguhuan crirca. Shinallataj llaquilla cai horas Jehová Dios paipaj ladopi canata yachashpami tranquilo sintirirca (Salmo 16:11). w24.01 págs. 28, 29 párrs. 12, 13

Segunda Guerra Mundial tucurishca qꞌuipaca huauqui panicunaca achca llajtacunapimi huillai callarircacuna. Chashnami achca gentecuna Jehová Diosmanta yachai pudircacuna. Cunancarin muyundij allpapimi Jehová Diosmanta yachachinchij. Cuerpo Gobernantepi caj huauquicunaca Jesuspaj ayudatami mashcashpa catincuna. Paicunaca Jehová Dios, Jesús munashca shina huauqui panicunaman instruccioncunata cungapajmi esforzarincuna. Paicuna cushca instruccioncunata huauqui panicunaman huillachunca superintendente de circuito huauquicunata, anciano huauquicunatami churashcacuna. Ungido ancianocunapish, mana ungido ancianocunapish Jesuspaj “alli maquipimi can” (Apocalipsis 2:1). Anciano huauquicunaca Moisés shina, Josué shina, apostolcuna shinami juchayujcuna can. Chaimantami maipica pandari tucuncuna (Números 20:12; Josué 9:​14, 15; Romanos 3:23). Pero, Cuerpo Gobernantepi caj huauquicuna, anciano huauquicuna juchayujcuna cajpipish Jesusca alli pushajcuna cachunmi paicunataca ayudan. Chaimanta Jehová Dios churashca pushajcunapi confiashpa catishunchij. w24.02 pág. 24 párrs. 13, 14

Jehová Diosta shungumanta cꞌuyashcata, paita tucuimanta agradicishcata parlashpami paita jatunyachinchij. Diosmanta huillacushpaca gentecunataca paimanta yachanata munachunmi ayudana canchij. Chashnami paicunapish Jehová Diostaca shungumanta cꞌuyangacuna (Santiago 4:8). Jehová Dios cꞌuyaj, cashcata ruraj, tucuita yachaj, achca poderta charishcata, shujtajcunaman yachachishpami cushilla sintirinchij. Shinallataj Jehová Diosta jatunyachingapajca pai shina tucuita rurangapajmi esforzarina canchij. Chaita rurajpica gentecunaca Diosta mana sirvijcuna shina mana cashcatami cuentata cungacuna. Shinallataj Diosmantami yachanata munangacuna (Mateo 5:​14-16). Diosta sirvijcuna cashcamanta alli cualidadcunata charishcata shujtajcunaman yachachishpami Diospaj shutita jatunyachinchij. Ñucanchij alli ejemplota ricushpaca alli shungu gentecunaca Diosmantami yachanata munangacuna. Jehová Diosca ñucanchijcuna shujtajcunaman paimanta yachachijta ricushpaca cushillami sintiringa (1 Timoteo 2:​3, 4). w24.02 pág. 10 párr. 7

Espiritualmente sinchi tucungapajca chꞌican chꞌican ruraicunatami yachana cangui. Chashnami congregacionpi ayudai tucungui. Shinallataj canllataj mantiniringapaj o cambaj familiata mantiningapajmi imata ruranata yachangui. Shujtajcunahuanpishmi alli apanacungui. Por ejemplo, alli liyinata, alli escribinata yachai tucungui. Bibliapi nishca shinaca alli runaca punllantami Diospaj Shimita liyin, chaipi nishcacunapipish yuyan (Salmo 1:​1-3). Bibliata tucui punllacuna liyishpaca Jehová Dios imata yuyashcatami intindingui. Chashnami imatapish alli yuyashpa rurangui (Proverbios 1:​3, 4). Congregacionpi caj huauqui panicunaca Diosta alli sirvij huauquicuna Bibliamanta yachachichun, alli consejocunata cuchunmi minishtincuna. Alli liyinata, alli escribinata yachashpaca conferenciacunata cungapajmi preparari tucungui. Sinchiyachij comentariocunatapishmi cui tucungui. Shinallataj Bibliata estudiacushpami apuntecunata rurai tucungui. Can anotashcacunapi yuyashpami cambaj feta sinchiyachi tucungui. Shujtajcunatapishmi animai tucungui. w23.12 págs. 26, 27 párrs. 9-11

Manchaita charishpaca Jehová Dios shamuj punllacunapi imallata ruranata yuyai. Shinallataj Satanás cai mundota mana mandacujpica causaica ima shina canata yuyai. 2014 huatapi tiyashca jatun tandanacuipica shuj familia shamuj punllacunamanta parlacushcatami shuj escenificacionpi ricurcanchij. Yayaca, ‘2 Timoteo 3:​1-5-pi nishcacuna tucuri punllacunapi ima laya gentecuna tiyana cashcata parlanapaj randica shamuj punllacunapi paraisopi gentecuna ima laya canata parlashca cashpaca ¿imatataj ninman?’ nircami. Chai versocunapica caitami ninman carca: ‘Paraisopica sumaj punllacunami shamunga. Gentecunaca shujtajcunata cꞌuyajcuna, Diospaj yachachishcacunata valorajcuna, mana jatun tucushcacuna, mana valishca tucushcacuna, Diostapish gentecunatapish respetajcuna, yaya mamata cazujcuna, pagui nijcuna, shujtajcunamanta mana caruyajcuna, familiata cꞌuyajcuna, shujtajcunahuan mana pꞌiñanacujcuna, shujtajcunamanta allicunallata rimajcuna, jarcarijcuna, manso shungucuna, alli ruranata cꞌuyajcuna, confianalla, intindijcuna, shujtajcunata yalli canata mana mashcajcuna, paicunapaj quiquin munaillata ruranata munajcuna canapaj randica Jehová Diosta cꞌuyajcuna, paillata tucui shunguhuan sirvijcunami cangacuna. Paicunamantaca amataj caruyaichu’. Ñucanchijpish ñucanchij familiahuan, huauqui panicunahuanmi shamuj punllacunapi causaica ima shina canata parlanacuna canchij. w24.01 pág. 6 párrs. 13, 14

Jehová Diosca paipaj pueblohuanmi cushicun. Chaita yachashcamantami cushilla sintirinchij (Salmo 149:4). Pero chaita yachashpapish maijancunaca: “¿Jehová Diosca paipaj pueblohuan cushilla cashpapish cada unohuanchu cushicun?” nishpami tapurincuna. Ñaupaj tiempopi Jehová Diosta sirvijcunapajpishmi huaquinpica Jehová Diospaj valishca cashcata crinaca sinchi carca (1 Samuel 1:​6-10; Job 29:​2, 4; Salmo 51:11). Bibliapi nishca shinaca juchayujcuna cashpapish tucuicunami Diospaj ñaupajpi alli ricuri tucunchij. ¿Chaipajca imatataj rurana canchij? Jesuspi feta churashpami bautizarina canchij (Juan 3:16). Bautizarishpami ñucanchij juchacunamanta arrepintirishcata, Jehová Diosllata adorasha nishcatapish ricuchinchij (Hechos 2:38; 3:19). Jehová Diosca ñucanchijcuna paipaj amigocuna tucusha nishcata ricushpaca cushillami sintirin. Chaimantami paiman mingarishpa ñucanchij ari nishcata pajtachingapaj sinchita esforzarina canchij. Chaita rurajpimi Diospaj ñaupajpica alli ricurishun. Ashtahuancarin paipaj amigocunami tucushun (Salmo 25:14). w24.03 pág. 26 párrs. 1, 2

Autoridadcuna ñucanchijtapish ama huillachun nijpica punta discipulocunapaj ejemplotami catina canchij. Ñucanchijpish mana manchashpa ima shina huillanata yachangapajca Jehová Diostami ayudahuai nishpa mañana canchij. Paica ñucanchij mañashcacunataca cutichingatajmi. Llaquicunata ahuantangapaj Jehová Diosta ayudachun mañashunchij. Familiacuna huañushcamanta, predicachun mana saquishcamanta, familia ucupi o ñucanchij saludpi problemacunata charishcamantami huaquinpica llaquilla sintirishcanchij. Shinallataj pandemiacunamanta, jatun macanacuicunamantami ashtahuan llaquirishcanchij. Chaimanta ñucanchij shunguta pascashpa Jehová Diosta mañashunchij. Shuj alli amigohuan parlanacushca shina paiman tucuita huillashunchij. Jehová Dios ayudanataca segurosmi cana canchij (Salmo 37:​3, 5). Llaquicunata ahuantangapajca Jehová Diostami cutin cutin mañana canchij (Romanos 12:12). Jehová Diosca ñucanchijcuna ima shina sintirishcataca allimi yachan. Paita rogarishpa mañajpipish uyanmi (Salmo 145:​18, 19). w23.05 págs. 5, 6 párrs. 12-15

Alli decisioncunata japingapajca ¿imatataj rurana canchij? Puntapica, Jehová Diospaj munai maijan cashcatami intindina canchij. Chaita intindishca qꞌuipaca alli yuyashpami imatapish decidina canchij (Efesios 5:17). Shinallataj manaraj shuj decisionta japishpaca Bibliapi imata nishcatami ricuna canchij. Chashnami chai decisionta japijpi Jehová Dios ima shina sintirinata intindishun. Bibliapi nishcacunata pajtachishpallami alli decisioncunata japi tucushun. Millai Diabloca, ñucanchijcuna yanga cosascunapi ocuparishpa Jehová Diosta sirvingapaj tiempota mana charichunmi munan (1 Juan 5:19). Mana cuidadota charishpaca Jehová Diosta sirvinapi ocuparinapaj randica cullquillapi, estudianallapi, trabajanallapimi ocupari callarishun. Pero chaicunallapi ocuparishpaca cai mundopaj panda yuyaicuna ñucanchijta umacushcatami ricuchishun. Cullquita charina, estudiana, trabajanaca mana juchachu can. Pero chaicunallapica mana ocuparinachu canchij. w24.03 págs. 24, 25 párrs. 16, 17