Enero

Shuj huahua huacharijpica yaya mamacunaca achcatami cushicuncuna. Paicunaca llullu huahuataca achcatami cꞌuyancuna. Pero para siempre llullu huahua cachunca mana munancunachu. Ashtahuanpish huiñashpa catichunmi munan. Huahua mana huiñajpica paicunaca achcatami sustarinman. ¿Caimantaca imatataj yachanchij? Diosmanta yachai callarishpaca uchilla huahuacuna shinami carcanchij. Ñucanchij esfuerzocunata ricushpaca Yayitu Diosca achcatami cushicurca. Pero paica “uchilla huahuacuna” shina saquirichunca mana munanchu (1 Corintios 3:1). Ashtahuanpish espiritualmente ‘jatun runacuna shina tucuchunmi’ munan. Bibliapi “jatun runacuna shina caichij” nishpaca ashtahuan edadta charina cashcataca mana nicunchu. Ashtahuanpish griego rimaipica “jatun runacuna shinami cana canguichij” nishpaca espiritualmente sinchi cana cashcatami nicun (1 Corintios 2:6). Shinashpaca jatun runacuna shina cangapajca huahuacuna laya canata saquishpami espiritualmente sinchi tucuna canchij. Pero ña espiritualmente sinchi tucushpapish huiñashpami catina canchij (1 Timoteo 4:15). w24.04 pág. 2 párr. 1; pág. 3 párr. 3

“¿Jehová Diosca cambajca imataj can?” nishpa tapujpica ¿imatataj cutichinguiman? Tal vez “Jehová Diosca ñuca alli amigo, ñuca Yaya, ñuca Diosmi can” nishpami cutichinguiman. Mana cashpaca Jehová Dios shujtaj sumaj cualidadcunata charishcatami ninguiman. Pero chashna tapujpica “Jehová Diosca paipaj carpa huasipi ñucata alli chasquijmi can” ¿nishpachu cutichinguiman? Rey Davidca: ‘Ima shinami huasiyujca paipaj invitadocunata alli tratan, chashnallatajmi Jehová Diosca paipaj alli amigocunataca alli tratan’ nircami. Shinallataj Davidca: “Mandaj Dioslla, cambaj carpa huasipica ¿maijantaj causagringari? Cambajlla urcupica ¿pitaj causagringari?” nircami (Salmo 15:1). David nishca shinaca Jehová Diospaj alli amigocuna cana oportunidadtami charinchij. Jehová Diosca Jesusta manaraj rurashpaca paillami causarca. Pero Jesús tiyai callarishpaca paimi Diospaj carpa huasipica punta invitado carca. Paipaj carpa huasipi chasquij shina Jesushuan alli apanacui tucushcamantami Jehová Diosca cushilla sintirirca. Bibliapi nishca shinaca Jehová Diosca ‘punllantami Jesusta cushichirca’. Ashtahuanpish Jesusca ‘Jehová Diospaj ñaupajpi cashcamantami yallitaj cushilla carca’ (Proverbios 8:30). w24.06 págs. 2, 3 párrs. 1-3

Ñaupa punllacunapi ima tucushcata yuyarishunchij. 340.000 yalli israelitacunami Israelta mandaj cachun Davidta churangapaj tandanacushcacuna carca. Paicunaca quimsa punllacunatami sumajta parlanacushpa, cantocunahuan Jehová Diosta alabashpa Hebrón cꞌuchullapi pasarcacuna (1 Crónicas 12:39). Paicunapurapica Sadoc shuti jovenmi carca. Paica mana rijsishca jovenmi carca. Pero Jehová Diosca paitaca allimi rijsirca. Ashtahuanpish ñucanchijcunapish paimanta yachachunmi munarca (1 Crónicas 12:​22, 26-28). Sadocca sacerdotemi carca. Paica sacerdotecunata mandaj Abiatarhuanmi trabajaj carca. Shinallataj Jehová Diosca Sadocmanca achca sabiduriatami curca. Chaimi paica Jehová Diospaj munai maijan cashcata alli intindij carca (2 Samuel 15:27). Sadocca mana manchaj runami carca. Cai tucuri punllacunapica Diabloca Diosta sirvijcunataca ashtahuan ashtahuanmi llaquichishpa caticun (1 Pedro 5:8). Jehová Dios Diablotapish, millai gentecunatapish tucuchingacamaca mana manchajcunami cana canchij (Salmo 31:24). Chashnami Sadoc shina mana manchajcuna cashcata ricuchishun. w24.07 pág. 2 párrs. 1-3

Jehová Diosca punta cꞌarita, punta huarmita rurashpaca cushilla causachunmi munarca. Paicunataca Paraisopi cusa huarmi shina causachunmi churarca. Paicunaca huahuacunata charishpami cai Allpapi jundarina carcacuna. Shinallataj tucui Allpa pacha Edén huerta shina tucuchunmi trabajana carcacuna. Pero Yaya Diosca paicunataca caillata ama rurachunmi mandarca: ‘Ñuca mandashcata mana cazushpaca juchayujcuna tucushpami huañunguichij’ nishpami advirtirca. Adán, Evahuan ima tucushcataca tucuicunami alli yachanchij. Mana cazuj, shuj millai angelmi paicunata pandachishpa juchapi urmachirca. Adán y Evaca Jehová Diospi mana confiashcamantami juchapi urmarcacuna. Paicunaca Jehová Dios ima nishcata mana cazushcamantami yuyajyashpa huañuna carcacuna (Génesis 1:​28, 29; 2:​8, 9, 16-18; 3:​1-6, 17-19, 24). w24.08 pág. 3 párr. 3

Jehová Diospish, paipaj cꞌuyashca Churi Jesuspish ñucanchijcuna cushilla causachunmi munancuna. Salmo 119:​2-pica: “Ima shina causanata pai yachachishcata huaquichijcunaca cushijllacunami. Tucui shunguhuan chaita mashcajcunaca cushijllacunami” ninmi. Jesuspish: “¡Diospaj shimita uyashpa cazujcunami cushicuncuna!” nircami (Lucas 11:28). Diosta sirvijcunaca achca bendicioncunata chasquishcamantami cushilla causanchij. Pero ashtahuantajca Diospaj Shimita punllanta liyijcuna cashcamanta, chaipi nishcacunata pajtachijcuna cashcamantami cushilla causanchij (Santiago 1:​22-25). Chashnami Jehová Diospaj ñaupajpi alli ricurishun (Eclesiastés 12:13). Shinallataj Bibliapi imata liyishcata pajtachishpaca ñucanchij familiacunahuan, huauqui panicunahuanpishmi alli apanacushun. Ashtahuanpish gentecuna Jehová Diosta mana cazushcamanta apashca llaquicunataca mana charishunchu. Rey Davidca Jehová Diospaj mandashcacunamanta, leycunamanta shuj cantota cantashca qꞌuipaca: “Chaicunata cazujpajca, sumaj japinami tiyan” nircami (Salmo 19:​7-11). Chai nishcacunaca ciertomi can. w24.09 pág. 2 párrs. 1-3

Jehová Diosca ñucanchijmantami preocuparin. Chaimantami ñucanchijcuna cushilla cajpi, llaquilla cajpica cuentata cun (Salmo 37:18). Shinallataj llaquicunata charishpapish paita tucui shunguhuan sirvingapaj esforzaricujta ricushpaca cushillami sintirin. Ashtahuanpish paica ñucanchijtami animasha, sinchiyachisha nin. Salmo 147:​3-pi nishca shinaca Jehová Diosca ‘shungu pꞌaquirishcacunapaj chugricunatami jambishpa pilluchin’. Chaita nishpaca Jehová Diosca llaquilla cajcunata cꞌuyaihuan ayudaj cashcatami ricuchin. Pero ¿Jehová Dios ñucanchijta ayudachunca imatataj rurana canchij? Caipi yuyashun. Doctorcunaca chugririshca gentecunatami ayudai tucun. Pero alliyasha nishpaca paicunaca doctor ima nishcatami tucuita cazuna can. Shinallatajmi Jehová Diosca shungupi llaquilla cajcunata animan, ashtahuanpish paipaj nishcacunata ima shina pajtachina cashcatami yachachin. w24.10 pág. 6 párrs. 1, 2

Ñaupa punllacunapica Jehová Diosca huaquin gentecunataca cashcata mana rurajcuna cashcamantami tucuchirca. ¿Chai gentecunahuanca imataj tucunga? Ñaupaca chai gentecuna paraisopi mana causarinatami yuyaj carcanchij. Bibliapica achca cutincunami Jehová Dios cashcata mana ruraj gentecunata tucuchishcata nin. Por ejemplo, Noepaj punllacunapica Noeca paipaj familiallahuanmi quishpirirca. Shinapish achca gentecunami huañurca. Qꞌuipaca Jehová Diosca israelitacunataca siete llajtacunapi causaj gentecunata tucuchichunmi mandarca. Paicunata huañuchishca qꞌuipaca israelitacunami chaipica causana carcacuna. Shinallataj shuj cutinca Jehová Diosca shuj angelta cachashpami shuj tutallapi 185.000 asirio soldadocunata tucuchirca (Deuteronomio 7:​1-3; Isaías 37:​36, 37). Bibliapica chai tucui gentecunata Jehová Dios imamanta, ima shina tucuchishcataca mana tucuita huillanchu. Chaimantami “Jehová Diosca chai gentecunataca para siempre tucuchirca. Chaimi cutinca manataj causaringacuna” nishpa mana ni tucunchij. Chai gentecunaca cada uno Diosmanta yachashpa arrepintirina oportunidadta charishcataca mana yachanchijchu. w24.05 pág. 3 párrs. 5-7

Jesusca shuj viuda huarmi juezpaj ñaupajman rishpa paita alli juzgashpa ayudachun mañashcatami parlarca. Chai punllacunapica gentecunataca achcatami maltratajcuna carca. Chaimantami Jesusta catijcunaca chai huarmi ima laya sintirishcataca alli intindircacuna (Lucas 18:​1-5). Tal vez ñucanchijtapish maltratashcacunami. Chaimi Jesús parlashca viuda huarmi ima laya sintirishcata alli intindinchij. Cai mundopica gentecunaca chꞌican laya cashcamanta, shujtaj razamanta cashcamanta, ashtahuan charinata munashcamantami shujtajcunata llaquichincuna (Eclesiastés 5:8). Huaquinpica ñucanchij huauqui panicunapishmi mana alli tratai tucuncuna. Pero paicunaca mana ñucanchijtaca catirashpa llaquichisha nincunachu. Ashtahuanpish juchayujcuna cashpami maipica pandarincuna. Shinapish Jesús paita mana alli tratajpi imata rurashcatami yuyarina canchij. ¿Manachu Diosta mana sirvij gentecuna llaquichijpica ahuantanchijlla? ¿Ñucanchij huauqui panicuna llaquichijpicarin manachu paicunahuan pacienciata charina canchij? w24.11 pág. 2 párrs. 1, 2

Bibliapi nishca shinaca ñaupa tiempopi causajcunaca casi tucui punllacunami tandata micujcuna carca (Génesis 14:18; Lucas 4:4). Chaimantami Bibliapica “tanda” nishpaca huaquinpica tucui laya micunacunamanta parlan (Mateo 6:11; Hechos 20:​7, español Bibliapi tiyaj notata ricui). Shinallataj Jesusca ishqui cutinmi tandahuan milagrocunata rurarca (Mateo 16:​9, 10). Por ejemplo, Juan capítulo 6-pica tandahuan Jesús shuj milagrota rurashcatami nin. Discipulocunaca Jesushuanca achcatami huillashcacuna carca. Chaimi ashata samarichun Jesusca barcopi mar de Galileata paicunahuan pasarca. Jesuspish, discipulocunapish Betsaida llajtapi tiyaj chulunlla lugarmanmi chayarcacuna (Marcos 6:​7, 30-32; Lucas 9:10). Jesús chaipi cashcata yachaj chayashpaca achca gentecunami chaiman rircacuna. Shinapish Jesusca paicunamanta caruyanapaj randica cꞌuyaihuanmi Diospaj Gobiernomanta yachachirca, ungushcacunatapish alliyachirca. Ña chishiyamucujta ricushpaca discipulocunaca: ‘Cai tucui gentecunaca micungapaj imallatapish manachari charingacuna’ nishpami sustari callarircacuna. Maijancunaca ashalla micunatami charishcangacuna. Pero la mayoriaca micungapajca imallatapish mana charishcacunachu carca (Mateo 14:15). w24.12 pág. 2 párrs. 1, 2

Ñucanchij punta yaya mamaca jucha illajcunami carca (Génesis 1:27; 2:​7-9). Paicunaca paraisopica huiñai huiñaita cushilla causana oportunidadtami charircacuna. Pero Jehová Diosta mana cazushcamantami juchayujcuna tucurcacuna. ¿Chaimanta paicunapaj huahua huahuacunamanca ima herenciatataj saquircacuna? Bibliapica: “Shuj runallamantami juchaca cai pachaman yaicurca. Chai juchamantami huañuipish yaicurca. Chashnami tucuicuna juchayuj cashcamanta huañuica tucuicunata japirca” ninmi (Romanos 5:12). Shinaca Adanca juchatami shuj herenciata shina tucuicunaman saquirca. Chaimantami tucuicuna huañunchij. Juchaca pi mana pagai tucuj jatun dibi shinami can (Salmo 49:8). Jesusca juchacunaca ‘dibicuna’ shina cashcatami nirca (Mateo 18:​32-35). Chaimantami ima juchata rurashpaca Jehová Dioshuan dibiyashca shina can. Chai dibita perdonangapaj Jehová Dios imata mana rurashca cajpica huañuillahuanmi chai dibitaca pagai tucunchijman (Romanos 6:7). w25.02 págs. 2, 3 párrs. 2, 3

Diospaj Gobiernomanta shujtaj gentecunaman yachachinaca valishca privilegiomi can. Chaitaca mana tucui gentecunachu rurai tucun. Por ejemplo, demoniocuna Jesús pi cashcata huillasha nijpica paica mana saquircachu (Lucas 4:41). Cunan punllacunapipish testigo de Jehovacunahuan pi huillanaman llujshisha nishpaca huaquin requisitocunatami pajtachina can. ¿Diosmanta huillana privilegiota valorashcataca ima shinatataj ricuchinchij? Chaipajca maipi cashpapish Diosmanta huillanami canchij. Ashtahuanpish Jesuspaj ejemplota catishpami muyuta tarpuj shina, yacutapish jichaj shina Diospaj yachachishcacunahuan gentecunapaj shunguman chayangapaj esforzarina canchij (Mateo 13:​3, 23; 1 Corintios 3:6). Testigo de Jehovacunaca tucui gentecunaman Diospaj shutita rijsichingapajmi esforzaricunchij. Chaipajca Traducción del Nuevo Mundo nishca Bibliatami utilizanchij. Chai Bibliapaj tucui librocuna o huaquin librocunaca 270 yalli shimicunapimi tiyan. Traducción del Nuevo Mundo nishca Bibliata traducijcunaca punta quillcashcacunapi Diospaj shutica maipimi carca, chaipimi Diospaj shutitaca churarcacuna. w24.04 pág. 9 párrs. 8, 9

Huaquin cusacunaca punllantami paicunapaj huarmicunata cꞌuyashcata ricuchingapaj esforzarincuna. Chaimantami cushilla causancuna (1 Juan 3:18). Canpish uchilla cosascunata rurashpami cambaj huarmita cꞌuyashcata ricuchi tucungui. Por ejemplo, maquita japishpa, paita ugllashpami pai valishca cashcata ricuchi tucungui. Shinallataj: “Cantami extrañani, ¿imanalla cangui?” nishpami shuj mensajeta cachai tucungui. Maipicarin alaja shimicunahuan shuj cartitata quillcashpa o shuj regalitota cushpami paita cꞌuyashcata ricuchi tucungui. Caicunata rurashpami cambaj huarmita respetashcata, valorashcata ricuchingui. Ashtahuancarin ishquindijmi cushilla causanguichij. “Cantaca achcatami valorani” nijpica cambaj huarmica cushillami sintiringa. Shinallataj canta tucuipi apoyashcamantami paitaca shungumanta agradicina cangui (Colosenses 3:15). Cambaj huarmita chashna tratajpica paica achca valishca cashcatami segura canga. w25.01 pág. 11 párr. 15; pág. 13 párr. 16

Salmo 15-ca caita nishpami tucuchin: “Maijanpish tucui chaicunata manataj rurajca mana lluchcaringachu”. Rey David nishca shinaca Jehová Diosca ñucanchijcuna alli causachun munashpami paipaj mandashcacunata cushca. Chaimantami paica paipaj bendicionta, paipaj ayudatapish chasquingapaj imata rurana cashcata yachachin. Jehová Diospaj huasipi cajcunaca paita tucuipi cazushpaca achca bendicioncunatami chasquingacuna. Jehová Diosca ungidocunataca jahua pachapimi chasquinga. Jesusca paicunapajca ‘maipi causanatami’ jahua pachapica ña allichishcata charin (Juan 14:2). Cutin cai Allpapi causana esperanzata charijcunaca Apocalipsis 21:​3-pi nishca bendicioncunatami chasquingacuna. Jehová Diospaj carpa huasipi canaca valishca bendicionmi can. Shamuj punllacunapica chaipica huiñai huiñaitami causai tucushun (Salmo 15:​1-5). w24.06 pág. 13 párrs. 19, 20

Bibliapica Jehová Dios Jatun Dios cashcatami yachachin. Por ejemplo, israelitacunata Egiptomanta llujshichishca huashaca Jehová Diosca Jatun Dios cashcatami ricuchirca. Israelitacunaca Sinaí urcu chaquipimi Jehová Dios imata nigrishcata uyangapaj tandanacurcacuna. Chaipica shuj amsa pꞌuyumi urcu jahuapi tiyarirca. Shuj sinchi terremoto tiyajpimi urcumantaca cushnipish llujshi callarirca. Shinallataj cꞌulun nishcami uyarirca, achij nishcapishmi ricurirca. Ashtahuanpish gachupi sinchita tocashca shinami uyarirca (Éxodo 19:​16-18; 24:17; Salmo 68:8). Jehová Dios chaita rurashpa Jatun Dios cashcata ricuchijpimi israelitacunaca mancharishca saquirishcangacuna. Cunan punllacunapish Jehová Diosta jatunyachingapajca shujtaj gentecunamanmi pai poderyuj cashcata, sumaj cualidadcunatapish charishcata huillana canchij. Shinallataj Jehová Dios imatapish rurachun ayudashcamantami paita jatunyachina canchij (Isaías 26:12). w25.01 págs. 2, 3 párrs. 2, 3

Israelitacunaca Jehová Dios cusha nishca allpaman ricushpaca pai churashca pushaj Moisestami criticai callarircacuna. Paicunaca: ‘Mana Moisesllachu jucha illaj can. Tucui israelitacunami jucha illajcuna can. Mandaj Diosca paicunapaj chaupipimi can’ nircacunami (Números 16:​1-3). Chaica ciertomi carca. Jehová Diospajca ‘tucui israelitacunami’ jucha illajcuna carca. Pero Jehová Diosca Moisesllatami israelitacunata pushachun churashca carca. Chaimantami Moisesta criticashpaca Jehová Diosta criticacushca shina carca. Paicunaca Jehová Diospaj munai maijan cashcataca mana intindircacunachu. Ashtahuanpish jatun tucushcamantami paicunapish autoridadta charisha nircacuna. Jehová Diosca chai jatun tucushcacunatapish, paicunata apoyajcunatapishmi tucuchirca (Números 16:​30-35, 41, 49). Cunan punllacunapipish Jehová Dios churashca pushajcunata mana cazujcunaca Diospaj ñaupajpica mana alli ricurincunachu. w24.07 pág. 11 párr. 11

Cunan punllacunapica Diospaj punlla ñalla shamuna cashcataca casi ni pi mana crinchu. Pero ñucanchijcuna chaita crishcamantami burlarincuna (2 Pedro 3:​3, 4). Chai punllacuna Jehová Dios agllashca punllapi shamunataj cashcata cringapajca sinchi fetami charina canchij. Ashtahuanpish chai punllacunapi Jehová Dios ñucanchijta cuidanatami seguros cana canchij. Jehová Diosca paipaj pueblota pushachunca “alli cazuj, alli yuyaiyuj sirvij” nishca huauquicunatami churashca. Chaimantami paicunapi confianata yachana canchij (Mateo 24:45). Jatun llaqui punllacuna shamujpipish pushaj huauquicunaca de seguromi ñucanchijcunamanca instruccioncunata cungacuna. Chai instruccioncunata cazushpami quishpiri tucushun. Chaimantami Diospaj organizacionta pushaj huauquicunapi cunanmanta confianata yachana canchij. Cunan punllacunapi paicunapi mana confiajpi, mana cazujpica jatun llaqui punllacuna shamujpipish paicunapi confianaca ashtahuan sinchimi canga. w24.09 pág. 11 párrs. 11, 12

Yaya mamacunaca paicuna feta charishcallamanta huahuacunapish feta charinataca mana yuyanachu can. Chaimantami maipica huahuacunaca: “¿Jehová Dios tiyashcataca ima shinataj yachai tucuni? ¿Bibliapi nishcacunaca ciertochu canga?” nishpa tapurincuna. Shinallataj Bibliapica alli yuyaihuan tucuita ricurana cashcatami nin (Romanos 12:1; 1 Tesalonicenses 5:21). Huahuacunallataj Bibliapi nishcacuna ciertotaj cashcata ricuchun animai. Huahuacuna tapuicunata rurajpica paicunallataj investigachunmi ayudai tucunchij. Por ejemplo, Diospaj Shimi Bibliata Jehová Dios quillcachishcata huahuacuna seguro cachunca ñucanchij publicacioncunapi, videocunapi investigachunmi animai tucunchij (1 Tesalonicenses 2:13). w24.12 págs. 14, 15 párrs. 4, 5

¿Ancianocunaca Jesús shinaca imatataj rurana can? Shujtaj huauquicunata, jovencunatapish congregacionpi ashtahuan ayudachunmi yachachina can. Pero ancianocunaca chai huauquicuna imapipish nunca pandarichunca mana shuyanachu can. Ashtahuanpish cꞌuyaihuanmi consejana can. Chashnami paicunaca humilde canata, confianalla canata, shujtajcunata cꞌuyaihuan tratanata yachangacuna (1 Timoteo 3:1; 1 Pedro 5:5). Jesusca paita catijcunaman Diosmanta huillachun mingashpapish Diospaj Shimipi nishcacunata alli intindichichunmi mingarca. Discipulocunaca “chaita ruranataca mana valishunchu” nishpami yuyashcangacuna. Pero Jesusca paicuna chai mingashcata alli pajtachinataca seguromi carca. Chaimantami paicunataca: “Ima shinami ñuca Yayaca ñucata cacharca, ñucapish cancunataca chashnallatajmi cachani” nirca (Juan 20:21). w24.10 pág. 16 párr. 15; pág. 17 párr. 17

Davidca alli reymi carca. Paica músico, poeta, macanacuj, profetami carca. Paica achca llaquicunatami charirca. Achca huatacunatami rey Saúl huañuchisha nishcamanta miticushpa purirca. Davidca ña rey cashpapish paipaj churi Absalón rey tucusha nishpa huañuchisha nijpimi cutinllataj miticurca. Achca llaquicunata charishpapish Davidca Diostami tucui shunguhuan sirvishpa catirca. Chaimantami Jehová Diosca: “Davidmi ñuca shunguta cushichin” nirca. Davidpaj consejocunata uyanaca allimi can (1 Reyes 15:5). Paipaj churi Salomón rey tucugrijpi David ima nishcata ricushun. Salomontaca Jehová Diosmi paipaj huasita shayachichun agllarca. Chai huasipimi gentecunaca Diosta adorana carca (1 Crónicas 22:5). Salomonca tucui chaita pajtachingapaj, israelitacunata pushangapajca Jehová Diospaj ayudatami minishtirca. ¿Davidca Salomonmanca imatataj nirca? Davidca paipaj churitaca: ‘Jehová Diosta cazujpica tucui can imalla rurashcami alli llujshinga’ nircami (1 Reyes 2:​2, 3). w24.11 págs. 10, 11 párrs. 9-11

¿Paicunapaj huarmicunata macaj, maltrataj cusacunaca Diospaj ñaupajpi, paicunapaj huarmicunapaj ñaupajpi cutin alli ricuringapajca imatataj rurana can? Puntapica, mana allita ruracushcatami reconocina can. Jehová Diosca tucuitami ricun. Paipaj ñaupajpica imapish mana pacashcachu can (Salmo 44:21; Eclesiastés 12:14; Hebreos 4:13). Ishquipica, cusaca paipaj huarmita mana alli tratanata saquishpami alli comportaringapaj esforzarina can (Proverbios 28:13). Quimsapica, Jehová Diostapish, paipaj huarmitapish llaquichishcata reconocishpami perdonta mañana can (Hechos 3:19). Shinallataj alli yuyaicunata charingapaj, alli shimicunata ningapaj, alli ruraicunata rurangapajmi Jehová Diospaj ayudata mañana can. Allita rurana munaitapish cuchunmi mañana can (Salmo 51:​10-12; 2 Corintios 10:5; Filipenses 2:13). Chuscupica, Jehová Dios paipaj mañaicunata cutichichunca llaquichij shimicunata nina, shujtajcunata llaquichina mana alli cashcata intindishpami chaicunata ama rurangapaj esforzarina can (Salmo 97:10). Pichcapica, ancianocunapaj ayudatami utca mashcana can. Paicunaca cꞌuyaihuanmi paitaca ayudangacuna (Santiago 5:​14-16). Y sujtapica, mana alli ruraicunapi ama cutin urmangapaj imata ruranatami yuyana can. w25.01 pág. 11 párr. 14

¿Canca Jehová Diosta cꞌuyanguichu? Paica causaita, sumaj bendicioncunatapishmi canmanca cushca. Chaimanta ¿paita cꞌuyashcataca ima shinataj ricuchi tucungui? Chaipajca paiman mingarishpami bautizarina cangui. Chashnami Jehová Diospaj familia parte tucungui. Jehová Diosca cambaj Yaya, cambaj amigo cashcamantami tucuipi cantaca cuidanga, ayudanga (Salmo 73:24; Isaías 43:​1, 2). Shinallataj Diosman mingarishpa bautizarishcamantami huiñai huiñaita causana oportunidadta charingui (1 Pedro 3:21). ¿Canca bautizarinataca manchanguichu? Ama sustarichu. Mana canllachu chashna sintirishcangui. Achcacunami bautizaringapajca huaquin cambiocunata rurana cashcacuna, paicunapaj yuyaitapishmi cambiana cashcacuna. Pero cunanca cushillami Jehová Diosta sirvicuncuna. w25.03 pág. 2 párrs. 1, 2

Bibliapica ñucanchij juchacunamanta parlashpaca huaquinpica llashaj quipi shina cashcatami nin. Por ejemplo, rey Davidca: “Ñucallataj millaita rurashcamari ñuca uma jahuapi llapishpa caticun. Llashaj quipi shinamari ñuca jahuapi llapishca caticun” nircami (Salmo 38:4). Pero Salmo 25:18 y 32:​5-pi nishca shinaca Jehová Diosca paicunapaj juchacunamanta arrepintirijcunatami perdonan. Hebreo rimaipi “perdonan” nishpaca “alzan” o “apan” ninmi. Shinashpaca Jehová Diosca shuj sinchi runa shinami ñucanchij apacushca juchacunataca apashpa rin. ¿Jehová Diosca maimantaj ñucanchij juchacunataca apashpa rin? Chaita alli intindingapajca Salmo 103:​12-pi shuj chꞌimbapuraita ricushun. Chaipica: ‘Inti llujshinmanta, inti huashicuncamaca yallitaj carumari. Chai shinallatajmari Diosca ñucanchij juchacunatapish caruyachirca’ ninmi. Inti llujshin ladoca inti huashicun ladomantaca carupimi can. ¿Chaimantaca imatataj yachanchij? Jehová Diosca ñucanchij juchacunata perdonashpaca yallitaj caruman apashca shinami can. Chaita yachashpaca, ¿manachu cushilla sintirinchij? w25.02 pág. 9 párrs. 5, 6

Jesús jahua pachaman rishca huashaca apóstol Pedroca huacharishcamantapacha purinata mana valij runatami jambirca (Hechos 1:​8, 9; 3:​2, 6-8). Chaita ricushpaca achca gentecunaca mancharishca saquirishpami Pedropajman callpashpa rircacuna (Hechos 3:11). ¿Chaipica Pedroca imatashi rurarca? ¿Shujtaj judiocuna shinachu gentecuna paita alabachun mashcarca? Mana. Pedroca: “Jesuspaj shutimanta, ñucanchijpish paipaj shutipi feta churashcamantami cancuna ricucushca, cancuna rijsishca runapaj chaquicunaca sinchiyashca” nishpami Jesustapish, Jehová Diostapish jatunyachirca (Hechos 3:​12-16). Ñucanchijpish Pedro shinami humilde canata yachai tucunchij. Chashnami shujtajcuna ricuchunlla imatapish ruranapaj randica Jehovata cꞌuyashcamanta, shujtajcunata cꞌuyashcamanta imapipish cushilla ayudashun. Chashnami humildes cashcata ricuchishun (Mateo 6:​1-4). w25.03 págs. 10, 11 párrs. 11, 12

Cushicushpa huillangapajca Jehová Diosta, gentecunatapish cꞌuyashcamanta huillacushcatami yuyarina canchij (Mateo 22:​37-39). Ñucanchijcuna tucui shunguhuan huillacushcata ricushpaca Yayitu Jehová Diosca cushillami sintirin. Ashtahuancarin gentecunaca Bibliamanta yachai callarishpaca cushi causaitami chari tucungacuna. Chashnami paicunapish quishpiri tucungacuna (Juan 6:40). Predicacionman ringapaj huasimanta mana llujshi tucushpaca ¿imatataj rurana canchij? Huasimanta mana llujshi tucushpapish ñucanchij rurai pudishcallatami rurashpa catina canchij. Chashnami Jehová Diosta, gentecunatapish cꞌuyashcata ricuchishun. COVID-19 pandemia punllacunapica huauqui Samuel y paipaj huarmi Daniaca huasimantaca mana llujshi tucurcacunachu. Chashnapish paicunaca telefonopi cayashpa, cartacunata quillcashpa, Zoom programata utilizashpami Diosmanta yachachishpa catircacuna. Caipi ricushca shinaca cai huauqui panica achca llaquicunata charishpapish Diosmanta huillashpa catingapajmi esforzarircacuna. Chaita rurashcamantami paicunaca cushilla carcacuna. w24.04 págs. 18, 19 párrs. 15, 16

Cushilla causangapaj cazaranaca mana minishtirishca cajpipish chꞌican chꞌican edadta charij huauqui panicunaca cazaranatami munancuna. Pero manaraj cazarashpaca Jehová Dioshuanmi alli apanacuna cangui. Familiatapish ima shina mantininatami alli yachana cangui. Shinallataj canllataj ima shina cashcatami alli yachana cangui (1 Corintios 7:36). Pihuan cazaranata manaraj mashcai callarishpaca cambaj cusa, huarmi ima shina cachun munashcatami alli yuyanaraj cangui. Chaita mana rurashpaca can munashca cualidadcunata charij huauquita o panita ashtahuan rijsina oportunidadtami pirdi tucungui. Ashtahuanpish canhuan mana tanto alli saquirij huauquihuan o panihuanmi novio, novia tucungui. Caitapishmi yuyarina cangui. Bautizarishca testigocunallahuanmi novio, novia tucuna cangui (1 Corintios 7:39). Pero bautizarishca huauqui pani cajpipish cambajca manachari alli cusa, alli huarmi canga. Chaimantami cashna nishpa tapurina cangui: “¿Ñucaca ima metacunallatataj pajtachisha nini? ¿Ñuca cusa, ñuca huarmica ima cualidadcunallatataj charinataj can?” Shinallataj alli cusa, alli huarmi cachun munashpapish tucuipi jucha illaj cachunca mana shuyanachu cangui. w24.05 págs. 20, 21 párrs. 1, 3

¿Noviocuna paicunapura problemacunata charishpa, imapi mana de acuerdo cashpaca imatataj rurana can? Noviocuna maijan rato imapi mana de acuerdo cashpaca ishquindij noviocuna tucuna mana alli decisión cashcataca mana yuyanachu can. Ashtahuanpish noviocunaca tucui parejacuna maijan rato problemacunata charishcatami yuyarina can. Cushilla causaj cusa huarmicunaca paicunapura shuj shinalla problemacunata allichingapajmi esforzarincuna. Chaimantami noviocunaca paicunapura problemacunata charishpaca chai problemacunata ima shina allichijcuna cashcata ricuna can. Chaipajca: “¿Ñucanchijpura problemacuna tiyajpica mana pꞌiñarishpa, respetohuanchu parlanacunchij? Shinallataj ¿ñucanchij pandarishcacunata reconocishpa mejorashpa catingapajchu esforzarinchij? ¿Siemprechu ñuca munashca shina tucuita rurachun munani? ¿Shungumanta perdonanata, ñucapish perdonta mañanata yachanichu?” nishpami tapurina can (Efesios 4:31). Shinapish noviocunaca cada rato paicunapura litunacushpalla pasashpaca cazarashca qꞌuipa sumajta causanataca mana yuyanachu can. Chai solterohuan o chai solterahuan cazarashca qꞌuipa mana alli causanata cuentata cushpaca noviocuna canata saquinaca allimi canga. Chaita ruranaca ishquindijpajllatajmi alli can. w24.05 pág. 30 párr. 12

Jehová Diospaj yachachishcacunata yuyaipi charishpami imatapish decidina canchij. Chashnami shujtajcunamanca alli ejemplota cui tucushun. Shinallataj Diospaj Shimita punllanta estudiashpami ñucanchij feta sinchiyachishpa catishun. Sinchi feta charijpica cai mundopaj yachachishcacunaca ñucanchijtaca mana pandachingachu (Efesios 4:14; Santiago 1:​6-8). Ashtahuanpish llaquicunata charijcunatami ayudai tucushun (1 Tesalonicenses 3:​2, 3). Anciano huauquicunaca tucuipi jarcarijcuna, alli yuyaiyujcuna, mana maipish cachun causajcunami cana can. Shinallataj Diospaj mana llulla shimipi nishcatami catina can. Chaita rurajpimi huauqui panicuna Jehová Diosta alli sirvichun ayudangacuna (Tito 1:9; 1 Timoteo 3:​1-3). Shinallataj ancianocunaca huauqui panicunaman alli ejemplota cungapaj, paicunata animangapajpishmi esforzarina can. Chaita rurajpimi huauqui panicunaca tucui tandanacuicunaman ringapaj, predicacionman llujshingapaj, Bibliata estudiangapajpish esforzaringacuna. Cutin huauqui panicuna paicunapaj llaquicunamanta sustarishca cajpica Jehová Diospi, pai rurasha nishcacunapi yuyachunmi animana can. w24.06 pág. 31 párrs. 16-18

Jesusca cai Allpapi cashpaca Jehová Dios gentecunapaj juchacunata perdonangapaj listo cashcatami yachachirca. Caita alli intindichingapajca chingarishca churimantami shuj parlota parlarca. Chai churica huasimanta rishpaca mapa ruraicunata rurashpami causai callarirca. Shinapish “ña yuyaita japishpaca” paipaj yayapaj huasimanmi tigrarca. ¿Yayaca churita ricushpaca imatataj rurarca? Jesusca ‘churi caruta shamucujpirajmi yayaca paita ricushpaca tupanaman callpashpa rirca. Ña tupashpaca cꞌuyaihuanmi ugllashpa mucharca’ nircami. Churica paipaj yaya paita perdonachunca mana shuyarcachu. Chaimi, ‘¿cambaj huasipi sirvij shinalla trabajai tucunichu?’ nishpa tapurca. Shinapish yayaca ‘caimi ñuca cꞌuyashca churi’ nishpa cutin paipaj familiapi chasquirca. Shinallataj yayaca ‘ñuca churica chingarishcami carca, cunanca tigramushcamari’ nircami (Lucas 15:​11-32). Jesusca manaraj cai Allpaman shamushpaca juchata rurajcuna arrepintirijpi Yaya Dios ima shina cꞌuyaihuan perdonaj cashcatami ricushcanga. Chaimantami cai parlomanta parlashpa Jehová Dios yallitaj cꞌuyaj, llaquij cashcata intindichirca. w24.08 págs. 11, 12 párrs. 11, 12

¿Alli yuyaiyuj canaca imatataj nisha nin? Ñucanchij causaipi Jehová Dios munashca shina decidina cashcata, causana cashcatami nisha nin. Ashtahuancarin tucuimanta yalli Jehová Dioshuan alli apanacuna cashcatami nisha nin. Chaimantami alli yuyaiyujcuna cashpaca shujtajcunata yalli cashcata, tucuita yachajcuna cashcataca mana yuyashun. Chaipaj randica humildadhuanmi Jehová Dios ñucanchijta ayudachun mañashpa catina canchij. Alli yuyaiyujcuna cangapajca paitaca cutin cutinmi mañana canchij. Imatapish alli ruranata yachashpapish valishca decisioncunata agllangapajmi pai ñucanchijta ayudachun mañanalla canchij. Jehová Dios ñucanchijta yalli yachaj, yalli yuyaiyuj cajpipish paiman rijchajta rurashca cashcamantami achcata agradicinchij (Génesis 1:26; Isaías 55:9). w25.03 pág. 11 párr. 13; pág. 13 párrs. 17, 18

Shujtajcuna mana allicuna cashcamanta ñucanchijta mana agradicishcataca mana yuyanachu canchij. Ayudashcamanta ñucanchijta mana agradicijpica: “¿Paica mana alli cashcamanta o cungarishcallamantachu mana agradicirca?” nishpami tapurina canchij. Maijancunaca paicunata ayudajpica agradecidosmi sintirincuna. Pero ima shina agradicinataca mana yachancunachu. Tal vez ñaupaca paicunami shujtajcunata ayudajcuna carca. Pero cunanca paicunata ayudajta ricushpaca asha pingaitachari charincuna. Ima laya cajpipish ñucanchij huauqui panicunata cꞌuyashcamantami paicunamantaca mana allicunataca mana yuyana canchij. Ashtahuanpish cushicushpami paicunataca ayudashpa catina canchij (Efesios 4:2). Pacienciata chari. Shujtajcunata ayudanamanta parlashpaca rey Salomonca: “Cambaj tandataca yacupi cacharilla. Ña unipica, cutin japinguillami” nircami (Eclesiastés 11:1). Cai versopi nishca shinaca maijancunaca achca tiempo qꞌuipami paicunata ayudashcamanta agradicingacuna. w24.09 págs. 30, 31 párrs.18, 19

Paicunapaj juchacunamanta shungumanta arrepintirijcunataca congregacionmantaca mana llujshichincunachu. Huaquinpica ancianocunaca chai persona sinchita cunashca cashcallatami congregacionman huillancuna. Chai huauqui o pani millaita ruranata saquishpa shungumanta arrepintirishcata yachashcamantami paihuan apanacushpa cati tucunchij. Paica Diospaj pueblo ucupi cashcamantami huauqui panicuna animachun, ayudachun minishtin (Hebreos 10:​24, 25). Pero ¿congregacionmanta llujshichishcacunahuanca apanacushpachu catina canchij? Mana. Paicunahuan tandanacunatami saquina canchij. Paicunahuanca mana micunallapishchu canchij (1 Corintios 5:11). ¿Pero congregacionmanta llujshichishcacunataca manachu ni tigra ricunallapish canchij? Mana. Bibliapi nishca shinaca paicunahuan tandanacunatami saquina canchij. Pero ñucanchij familiacuna o shuj alli amigo congregacionmanta llujshichishca cajpica paicunata tandanacuiman invitanata o mana invitanataca cada unomi decidina canchij. w24.08 págs. 30, 31 párrs. 13, 14