Febrero

Congregacionpica sumaj cualidadcunata charij huauquicunaca valishcami can. ‘Intindij’ huauquica shujtajcuna ima nishcata uyashpami tucuicunahuan sumajta causan. Shinallataj shujtajcuna imata yuyashcata intindingapajmi esforzarin. Caipi yuyai. Can ancianocunahuan shuj tandanacuipi cashpaca Bibliapi ricushpachari shuj decisionta agllana canguichij. ¿Shujtaj ancianocunahuan mana de acuerdo cashpapish paicuna ima decidishcataca apoyanguimanchu? Can munashcata shujtajcuna rurachun obliganapaj randica paicuna ima nishcatami valichinguiman ¿nachu? (Génesis 13:​8, 9; Proverbios 15:22). Shujtajcunata sinchita rimanapaj randica cꞌuyaihuan, sumajtami parlana cangui. Shujtajcuna llaquichijpipish chaita allichingapajmi esforzarina cangui (Santiago 3:​17, 18). Cꞌuyaihuan parlajpica canta llaquichij gentecunapishmi tranquilo sintiringacuna (Jueces 8:​1-3; Proverbios 25:15; Mateo 5:​23, 24). w24.11 pág. 23 párr. 13

Jesusca ‘shuj cutinllami huañurca’. Cutinca ña mana huañungachu. Pero ñucanchijta ayudanataca manataj saquishcachu (Romanos 6:10). Paica pai huañushcamanta ñucanchijcunaman allicunata cungapajmi sinchita trabajashpa caticun. Por ejemplo, Mandaj cashcamanta, Rey cashcamanta, sacerdotecunata Jatun Mandaj cashcamanta, congregacionpaj uma cashcamanta imallata rurashcata yuyashun (1 Corintios 15:25; Efesios 5:23; Hebreos 2:17). Paica tucui ungidocunata, Paraisopi causagrijcunatapishmi tandachina can. Chaitaca jatun llaqui punllacuna manaraj tucurijpimi ruranata saquinga (Mateo 25:32). Shinallataj cai tucuri punllacunapi paita sirvijcuna espiritualmente sinchi cachunmi ayudashpa caticun (Mateo 24:45). Mil huatacunata mandacushpapish Jesusca ñucanchijta ayudanataca manataj saquingachu. Caipi ricushca shinaca Jehová Diosca ñucanchijmanta huañuchunllaca Jesustaca mana curcachu. Ashtahuanpish ñucanchijta ayudachunpishmi curca. w25.01 pág. 24 párr. 12

Jehová Dios perdonajpica ñucanchij juchacunaca para siempremi chingarin. Chaimantami Jehová Dioshuan alli apanacui tucunchij. Shinapish Jehová Dios ñucanchijta perdonachun mana obligai tucushcatami yuyarina canchij. Jehová Diosca yallitaj cꞌuyaj cashcamantami ñucanchijtaca perdonan. Salmo 130:​4-pi nishca shina Jehová Dios de verastaj perdonaj cashcamantaca achcatami agradicinchij (Romanos 4:8). Shinapish Jehová Dios ñucanchijta perdonachun munashpaca Jesús ima nishcatami yuyarina canchij. Paica: “Shujtajcuna cancunata ima mana allita rurajpi cancuna mana perdonajpica, jahua pachapi caj cancunapaj Yayapish cancunapaj juchacunataca mana perdonangachu” nircami (Mateo 6:​14, 15). Shinashpaca Jehová Dios shinami perdonajcuna cana canchij. w25.02 pág. 13 párrs. 18, 19

Cashcata ruraj Lot runaca Sodoma llajtapimi causaj carca. Pero ¿Sodoma, Gomorra llajtacunapi causajcunamantaca imatataj mana yachanchij? Lot chaipi causaj tucui gentecunaman Diosmanta huillashcataca mana yachanchijchu. Chai gentecunaca yallitaj millaicunami carca. ¿Pero paicunaca ima alli cashcata, ima mana alli cashcataca yacharcacunachu? Chaitaca manachari yacharcacuna. ¿Imamantataj shina ninchij? Por ejemplo, Bibliapica ishqui angelcuna Lotta visitanaman shamujpica ‘Sodoma llajtamanta cꞌaricuna huambracunamanta callarishpa, yuyajcunacama’ paicunata violasha nishcatami nin (Génesis 19:4; 2 Pedro 2:7). ¿Chai tucui gentecunamanta cashcata ruraj Jehová Dios shujllatapish mana causachinataca ni tucunchijchu? Jehová Diosca Abrahanmanca chai llajtapi cashcata ruraj 10 gentecunallapish mana tiyashcatami nirca (Génesis 18:32). Chai llajtapi causajcuna mana cashcata rurajcuna cashcamantami Jehová Diosca paicunataca tucuchirca. Chashnami cashcata ruraj cashcata ricuchirca. ¿Pero mana cashcata rurajcuna causarijpi chai tucui gentecunamanta ni shujllapish mana causarinataca ni tucunchijchu? Mana. Chaitaca mana ni tucunchijchu. w24.05 pág. 2 párr. 3; pág. 3 párr. 8

Trabajo illaj saquirishcamantami achcacuna paicunapaj familiata saquishpa caru llajtapi trabajanaman rishcacuna. Pero qꞌuipaca chai decisión mana alli cashcatami cuentata cushcacuna. Chaimantami shuj trabajota japigrishpaca mashna cullquita gananallapica mana yuyana canchij. Ashtahuanpish cashna nishpami tapurina canchij: “¿Cai trabajota chasquishpaca ñucapish, ñuca familiapish Diosta sirvishpa catishunchu? ¿Ñuca cusata o ñuca huarmita saquishpa carupi trabajanaman rishpaca imataj tucushun? ¿Tucui tandanacuicunaman ringapaj, huillanaman llujshingapaj, huauqui panicunahuan pasangapajpish tiempota charishachu? ¿Ñuca huahuacunata alli huiñachingapaj, paicunaman Diosmanta yachachingapajpish tiempota charishachu?” (Lucas 14:28; Efesios 6:4). Imata decidigrishpaca Diosta mana sirvij familiacuna o shujtajcuna nishca shinaca mana decidinachu canchij. Chaipaj randica Jehová Dios munashca shinami decidina canchij. w25.03 pág. 29 párr. 12

‘Maijancunaca llullacunata yachachishpami espiritualmente mana sinchi cajcunata pandachincuna’. Por ejemplo, maijancunaca llulla noticiacunata, apostatacuna nishcacunata crishcamantami pandarishcacuna. Shinallataj huaquincunaca espiritualmente mana sinchi cashcamantami envidiajcuna, imamantapish pꞌiñarijcuna, rato resintirijcuna can. Maijancunacarin jahuallami tentacioncunapi urmancuna (1 Corintios 3:3). Bibliapi nishca shinaca, huiñashpa catij huahua shinami espiritualmente huiñashpa catina canchij (Efesios 4:15). Uchilla huahuacunaca ama llaqui tucungapajca siempremi paicunapaj yaya mama paicunata cuidachun minishtincuna. Por ejemplo, calleta pasangapajca shuj mamaca paipaj huahuataca “maquita cuhuai” ninmi. Huahua ashtahuan huiñajpica mamaca pailla calleta cruzachunmi saquin. Pero “carrocunata alli ricungui” nishpami advirtin. Chai huahua jatunyashpaca ama llaqui tucungapajmi imata ruranataca paillataj alli yachanga. Shinallataj espiritualmente sinchi cajcunaca Jehová Dios Bibliapi imata yachachishcata yuyaipi charishpami paicunallataj alli decisioncunata japincuna. w24.04 págs. 3, 4 párrs. 5, 6

Jehová Diosca achca huatacunatami jahua pachapi caj angelcunallahuan alli apanacurca. Chai huashaca cai Allpapi causaj gentecunatapishmi paipaj carpa huasiman yaicuchun invitarca. Por ejemplo, Enoc, Noé, Abrahán, Jobpish Jehová Diospaj alli amigocunami carca. Bibliapica maijancunamanta parlashpacarin ‘Jehová Dioshuanmi purircacuna’ ninmi (Génesis 5:24; 6:9; Job 29:4; Isaías 41:8). Jehová Diosca paipaj carpa huasiman invitacuj shinami paipaj amigocuna cachun achca gentecunata invitacushca (Ezequiel 37:​26, 27). Profeta Ezequiel huillashca shinaca Jehová Diosca paita alli sirvijcunahuanmi apanacunata munan. Chaimantami paica ‘paicunahuanca sumajta causanata ari ninacushca’. Ezequiel huillashca shimicunaca jahua pachapi shinallataj cai Allpapi causana esperanzata charijcunapish ‘shujlla shina’ Jehová Diosta adorajpimi pajtarina carca (Juan 10:16). Chai shimicunaca cunan punllacunapimi pajtaricun. w24.06 pág. 3 párr. 2; pág. 3 párrs. 4, 5

Jehová Diosta sirvijcunaca tucui shunguhuanmi Diospaj Gobiernota apoyana canchij. Pero chaita rurangapajca mana manchaj canami minishtirin (Mateo 6:33). Por ejemplo, cai millai mundopi Jehová Diospaj mandashcacunata cazungapaj, Diospaj Gobiernomanta alli huillaicunata huillashpa catingapajca mana manchajcunami cana canchij. Politicapi ama chagruringapajpishmi mana manchajcuna cana canchij (Juan 18:36). Por ejemplo, politicapi mana chagrurisha nishcamanta o soldadocuna mana tucusha nishcamantami achca huauqui panicunataca dimastij llaquichishcacuna. Cutin shujtaj huauqui panicunaca trabajo illajmi saquirishcacuna. Jehová Diosta sirvijcuna paipaj Gobiernota ima shina apoyashcata yachashpaca fuerza, animotami charishun. Por ejemplo, ñucanchijta mandaj Jesucristoca cai pachapaj ruraicunapica mana chagrurircachu (Mateo 4:​8-11; Juan 6:​14, 15). Paica Jehová Diospi confiashcamantami ahuantashpa catingapaj fuerzata charirca. w24.07 pág. 2 párr. 4; pág. 4 párr. 7

Jehová Diosca juchataca manataj ricunayachinchu. Juchami Jehová Diosmanta caruyachishpa ñucanchijtaca huañuiman apan. Chaita yuyarichunmi Jehová Diosca Adán y Eva ima shina juchayujcuna tucushcata Bibliapi quillcachirca (Isaías 59:2). Satanasca Jehová Diostapish, gentecunatapishmi pꞌiñan. Chaimantami Adán y Evata juchapi urmachirca. Paica ñucanchijtapishmi juchapi urmachisha nin. Adán y Evata juchapi urmachijpica Diabloca Jehová Diospaj munai cai Allpapi ña mana pajtari tucushcatami yuyashcanga. Pero paica Jehová Dios yallitaj cꞌuyaj cashcataca mana intindircachu. Jehová Diosca cai Allpapi paipaj munai pajtarichunmi munarca. Chaimantami Adán y Eva juchapi urmajpica chai rato imata ruranata yuyarirca. Chashnami ñucanchijta yallitaj cꞌuyaj cashcata ricuchirca (Romanos 8:​20, 21). Jehová Diosca Adanpaj huahua huahuacunamanta maijancuna paita sirvinata agllana cashcatami yacharca. Paica chai gentecuna juchamanta, huañuimanta quishpirishpa paipajman cꞌuchuyachunmi ayudasha nirca. w24.08 pág. 3 párrs. 3, 4

Diosta sirvijcunaca la mayoriami ocupados pasanchij. Por ejemplo, la mayoriami ñucanchijllataj mantiniringapaj o ñucanchij familiata mantiningapaj trabajana canchij (1 Timoteo 5:8). Huaquin huauqui panicunaca ungushca o yuyajlla familiacunatapishmi cuidana can. Shinallataj tucuicunami ñucanchij saludta cuidangapaj tiempota minishtinchij. Congregacionpi ayudashpapishmi ocupados pasanchij. Por ejemplo, tucui shunguhuan huillashpa catingapajmi esforzarinchij. Diosta sirvijcunapajca Bibliata liyinami achca importante can. Chaimantami chaita rurangapaj esforzarina canchij. Cushilla causaj runamanta parlashpaca Salmo 1-pica: ‘Paica tutapish punllapish Mandaj Dios mandashca ima nisha nishcata umanarina yuyaillami, chai mandashcata pajtachina yuyaillami causan’ ninmi (Salmo 1:​1, 2). Shinashpaca Bibliata liyingapajmi tiempota surcuna canchij. Pero ¿Bibliataca ima horastaj liyina canchij? Chaitaca cada unomi agllana canchij. Pero cada punlla chai horasllataj Bibliata liyingapajmi shuj alli horariota agllana canchij. w24.09 págs. 3, 4 párrs. 5, 6

¿Espiritualmente sinchi cajcunaca shujtajcuna ayudachun minishtincunachu? Ari. Paicunapish huaquinpica experienciata charij huauqui panicunapaj ayudata mashcashpami alli decidincuna. Pero shujtajcunapaj ayudata mashcashpapish paicunallatajmi alli yuyashpa imatapish agllancuna. Cutin, ¿espiritualmente huahuacuna shina cajcunaca ima shinataj can? Paicunaca shujtajcuna imata ruranata nichun o paicunamanta decidishpa cuchunmi shuyancuna. Huahuacunaca jatunyashpaca chꞌican chꞌicancunami can. Chashna layallatajmi Diosta sirvijcunaca espiritualmente huiñashpaca cada uno chꞌican chꞌican cualidadcunata charinchij. Por ejemplo, maijancunaca alli yachaita charijcuna, mana manchajcuna, shungumanta cujcuna, shujtajcunamanta sustarijcunami can. Shinallataj espiritualmente sinchi cashpapish cada unomi chꞌican chꞌican decisioncunata japinchij. Pero Bibliapi nishcacunata yuyaipi charishpa decidishcamantami tucuicuna Diospaj ñaupajpica alli ricurinchij. ¿Shujtajcuna ñucanchij shina mana decidijpica imatataj rurana canchij? Paicunataca mana criticanachu canchij. Ashtahuanpish respetotami ricuchina canchij. Chashnami tucuicuna tandalla Jehová Diosta sirvishpa catishun (Romanos 14:10; 1 Corintios 1:10). w24.04 pág. 4 párrs. 7, 8

¿Imapaj mana valij shina sintirishpaca imatataj rurana cangui? Bibliapimi animachij versocunata liyina cangui. Chai versocunapi yuyashpami Jehová Diospaj valishca cashcata cuentata cungui. Cutin, shuj metata mana pajtachi tucushpa o shujtajcuna shina mana achcata rurai tucushpaca mana llaquirinachu cangui. Jehová Diosca can mana rurai pudishcata rurachunca mana mañanchu (Salmo 103:​13, 14). Shinallataj pi canta llaquichishca cajpica “ñuca culpallamantatajmi llaquichirca” nishpaca mana yuyanachu cangui. Yayitu Diosmi shujtajcunata llaquichijcunataca juzganga. Pero llaquichishca cajcunataca ayudangami. Chaitaca manataj cungarinachu cangui (1 Pedro 3:12). Jehová Diosca shujtajcunata ayudana yuyaitami canmanpish cui tucun. Gentecunaman predicashpa Jehová Diosta ayudanaca sumaj bendicionmi can (1 Corintios 3:9). Llaquicunata apashcamantami llaquilla cajcunata intindinaca cambajca ashtahuan jahualla canga. Chaimantami paicunataca ayudai tucungui. w24.10 págs. 7, 8 párrs. 6, 7

Jehová Diosca shujtajcuna ñucanchijta ima shina tratajtaca allimi yachan. Paica “ima pandata mana rurajtami cꞌuyan” (Salmo 37:28). Jesusca ñucanchij minishticui horas Yaya ‘Dios cashcata rurashpa utca ayudanatami’ nirca. Jehová Diosca ñallami tucui llaquicunata tucuchinga. Pi ñucanchijta ashtahuan llaquichichunca mana saquingachu (Salmo 72:​1, 2). Tucui Allpa pachapi cashcata ruranalla tiyachunmi shuyashpa catinchij. Shinapish cunanllatajmi shujtajcuna mana alli tratajpica Jehová Diosca ñucanchijta ayudan (2 Pedro 3:13). Por ejemplo, shujtajcuna mana alli tratajpi ashtahuan problemacunata ama charingapaj imata rurana cashcatami yachachin. Chaipajca paipaj Churi imata rurashcata ricuchishpa, Bibliapi tiyaj shujtaj consejocunata cushpami ayudan. w24.11 págs. 2, 3 párrs. 3, 4

Jesús gentecunaman carachun nijpica apostolcunapajca achca gentecuna tiyashcamantami sinchi ricurirca. Chaipica 5.000 cꞌaricunami tiyarca. Huarmicunandij, huahuacunandij cuentajpica 15.000 gentecunami chaipi tiyashcanga (Mateo 14:21). Andresca: “Caipimi shuj huambraca pichca cebada tandata, ishqui uchilla pescadocunatapish charicun. ¿Chaillaca cai tucui gentecunapajca imataj pajtangari?” nircami (Juan 6:9). Chai punllacunapica charijcunapish, huajchacunapishmi cebada tandata micujcuna carca. Cutin chai uchilla pescadocunaca salashca, chaquichishcami cashcanga. Pero chai huahua charicushca micunaca tucui gentecunapajca mana pajtanmanchu carca. Jesusca cꞌuyaihuanmi gentecunataca verdijlla qꞌuihua jahuapi asha asha tandanacushpa tiyarichun mandarca (Marcos 6:​39, 40; Juan 6:​11-13). Chai huashaca Jesusca tandamanta, pescadocunamantami Yayitu Diosta pagui nishpa mañarca. Yayitu Diosta tucui micunacunata cuj cashcamanta chashna mañanaca allimi carca. Ñucanchijpish micungapaj manaraj tiyarishpaca chashnallatajmi rurana canchij. Chai qꞌuipaca Jesusca tucui micunata gentecunaman cuchunmi mandarca. Gentecunaca huijsa jundatami micurcacuna. w24.12 págs. 3, 4 párrs. 3, 4

Jesusca cai Allpapi cashpaca siempremi paipaj Yayata jatunyachij carca. Por ejemplo, paica Jehová Dios cushca poderhuan milagrocunata ruraj cashcatami nij carca (Marcos 5:​18-20). Shinallataj paipaj Yayamanta allicunata nishpa, shujtajcunata alli tratashpami Diosta jatunyachij carca. Shuj cutinca Jesusca sinagogapimi yachachicurca. Chaipica millai espíritu japishcamanta 18 huatacunata ungushca huarmimi carca. Chai millai espiritupaj culpamantami chai huarmica curcuyashpa mana recto shayari tucurca. Jesusca chai huarmi achcata sufricujta ricushpaca achcatami llaquirirca. Chaimantami paipajman cꞌuyaihuan cꞌuchuyashpaca: “Huarmi cambaj ungüimantaca alliyashcami cangui” nirca. Jesús chai huarmipaj jahuapi maquita churajpimi chai huarmica ñapish rectota shayarirca. Chai huarmica alliyashcamantami Jehová Diosta alabai callarirca (Lucas 13:​10-13). Ñucanchijpish chai huarmi shinami Jehová Diosta alabana canchij. w25.01 págs. 2, 3 párrs. 3, 4

Adán y Eva imata chingachishcata cutin charingapaj ñucanchijllaca imata mana rurai tucunchijchu (Salmo 49:​7-9). Jehová Dios ñucanchijta mana ayudashca cajpica huiñaita causana, cutin causarina esperanzatapish mana chari tucunchijmanchu carca. Ashtahuanpish animalitocuna shinami huañunchijman carca (Eclesiastés 3:19; 2 Pedro 2:12). Yayitu Jehová Diosca Adán ñucanchijman saquishca dibitami pagasha nin. Chaimi Jesusca: “Diosca cai pachapi causajcunata yallitaj cꞌuyashpami paipaj shujlla Churita curca. Maijanpish paipi feta charijca ama chingarichun, ashtahuanpish huiñai causaita charichunmi curca” nirca (Juan 3:16). Jesús huañushcamantami ñucanchijcunaca Jehová Dioshuanca alli apanacui tucunchij. Jehová Dios paipaj Churita cushcamantami ñucanchij juchacunamanta quishpichishca cai tucunchij. w25.02 págs. 2, 3 párrs. 3-6

¿Saulo bautizarichunca imataj ayudarca? Jesús jahua cielomanta parlajpica achijnicuj luzca Saulotaca ciegotami saquirca (Hechos 9:​3-9). Chaimantami paica quimsa punllacunata nimata mana micushpa ima tucushcapi yuyacushcanga. Sauloca Jesusta Dios agllashcata, Jesusta catijcuna verdadera religión cashcatami cuentata curca. ¿Saulomantaca imatataj yachai tucunchij? Paica jatun tucushca cashpa o manchaita charishca cashpaca mana bautizarinmanchu carca. Pero achca llaquicunata charinata yachashpapish Jesusta catinatami decidirca (Hechos 9:​15, 16; 20:​22, 23). Bautizarishca qꞌuipapish Jehová Diospimi confiashpa catirca. Chaimantami achca llaquicunata charirca (2 Corintios 4:​7-10). Canpish bautizarishpaca tal vez achca llaquicunatami charingui. Pero mana canllachu cangui. Jehová Diospaj, Jesuspaj ayudatami charingui (Filipenses 4:13). w25.03 pág. 4 párrs. 8, 9

Bibliata liyinaca allimi can. Tucuicunami ñucanchij metacunata pajtachingapaj esforzarina canchij. Shinapish Bibliapi nishcacuna ñucanchij shunguman chayachunca Bibliata liyinallaca mana minishtirinchu. Cai ejemplopi yuyashun. Tamya yacucunaca plantitacuna alli huiñachunmi ayudan. Pero shuj ratollapi mana jahuallata tamyajpica allpaca chai tucui yacucunataca mana chupai tucungachu. Chaimi tamya yacucunaca pozayashpa saquiringa. Pero tamya yacucuna pozayashpa saquirijpica plantitacunaca chai yacutaca mana chupai tucungachu. Cutin, ashito ashito tamyajpica allpaca nuyujyashpami catinga. Plantitacunapish chai yacuta chupashpami sumajta huiñangacuna. Ñucanchijpish Bibliataca mana apuradochu liyina canchij. Shuj ratollapi achca versocunata liyishpaca ima liyishcacunaca ñucanchij shungu ucumanca mana chayangachu. Chaimi imata liyishcata mana yuyari tucushpa causaipica mana pajtachi tucushun (Santiago 1:24). ¿Bibliata apurado liyij cashcatachu cuentata cushcangui? Chashna liyij cashpaca imata liyicushcata alli intindingapaj o liyishca qꞌuipa chaipi yuyangapajmi ashtahuan tiempota surcuna cangui. Mana cashpaca achca versocunata liyinapaj randica ashalla versocunatami liyi tucungui. Chashnami imata liyishcapi yuyangapaj tiempota charingui. w24.09 págs. 4, 5 párrs. 7-9

Ancianocunaman cushca instruccioncunata alli intindingapaj, utca pajtachingapajmi esforzarina can. Paicunataca Diospaj organizacionca tandanacuicunata ima shina rurana cashcata, shinallataj tandanacuicunapi Yaya Diosta ima shina mañana cashcatami yachachishca. Ancianocunaca chai instruccioncunata pajtachingapajmi esforzarina can. Shinallataj ancianocunaca Cristopaj ovejitacunata ima shina cuidana cashcata yachangapajca instruccioncunatami chasquishcacuna. Chai instruccioncunata pajtachingapaj esforzarijpica huauqui panicunaca Jehová Diospaj valishca cashcata, paicunata manataj saquishcatami cuentata cungacuna. Ancianocuna instruccioncunata cujpica cushicushpami cazuna canchij. Chashnami paicunaman mingashca trabajota alli pajtachichun ayudashun. Bibliapi nishca shinaca ñucanchijta pushajcunataca cazuna, respetanami canchij (Hebreos 13:​7, 17). Ancianocuna juchayujcuna cashcamantami huaquinpica paicunata cazunaca sinchi canga. Pero paicunapaj pandarishcacunallata ricushpaca ñucanchij enemigo Diablota apoyacushcatami ricuchishun. ¿Imamantataj chashna ninchij? Diospaj enemigocunaca Diospaj organizacionpi ama confiachunmi pandachisha nin. Chaimantami ancianocunapaj pandarishcacunallata ricui callarishpaca Diospaj enemigocuna ñucanchijta pandachicushcata ricuchishun. w24.04 pág. 10 párrs. 11, 12

Achca gentecunaca Jehová Diospaj contracuna tucushcamantami Armagedonpi tucuchishca cangacuna. Bibliapi nishca shinaca chai gentecunaca cutinca ña mana causaringacunachu (2 Tesalonicenses 1:​6-10). Pero gran tribulación o jatun llaqui punllacunapica maijan gentecunaca ima ungüita charishcamanta, yuyajlla cashcamanta, o shuj accidenteta charishcamantami huañungacuna. Cutin shujtajcunataca millai gentecunami huañuchingacuna. ¿Chai tucui gentecunahuanca imataj tucunga? (Eclesiastés 9:11; Zacarías 14:13). Tal vez ¿maijancunaca “cashcata mana rurajcuna” shina Jehová Diospaj ñaupajpi ricurishcamantachu cutin causaringacuna? (Hechos 24:15). Chaitaca mana yachanchijchu. ¿Shamuj punllacunapi ima tucunamantaca imallatataj yachanchij? Por ejemplo, ¿Jehová Diospish, Jesuspish imata ricushpataj gentecunataca juzgangacuna? Paicunaca Jesuspaj huauquicunata ima shina tratashcata ricushpami gentecunataca juzgangacuna (Mateo 25:40). Jesuspaj huauquicuna nishpaca ungidocunamantami parlacunchij. Ungidocunatapish, Jesustapish apoyajcunaca Diospaj ñaupajpica “ovejacuna” shinami ricuringacuna (Apocalipsis 12:17). w24.05 págs. 10, 11 párrs. 9-11

Bibliapica ‘sinchi, llaqui punllacunapi’ causacushcatami nin (2 Timoteo 3:1). Cunan punllacunapica tucuicunami achca llaquicunata chꞌimbapurana canchij. Jehová Diosta sirvijcunatacarin catirashpami llaquichincuna. Shinapish ¿Jehová Diosta sirvishpa catingapajca imatataj yuyarina canchij? Puntapica Yaya Dios ‘causaj Dios cashcatami’ yuyarina canchij (Jeremías 10:10; 2 Timoteo 1:12). Jehová Diosca causaj Diosmi can. Chaimantami ñucanchijcuna llaquicunata charijpica ñucanchijta ima shina ayudanata ricun (2 Crónicas 16:9; Salmo 23:4). Jehová Dios ñucanchijta ayudaj cashcata yuyarishpami ima llaquicunatapish ahuantai tucushun. w24.06 pág. 20 párrs. 1, 2

¿Jehová Diospaj organizacionpica imamantataj confiana canchij? Diospaj organizacionta pushajcuna Bibliapi nishcacunata ashtahuan alli intindina cashcata o Diospaj organizacionpi huaquin cambiocunata rurana cashcata cuentata cushpaca, paicunaca ratomi chai cambiocunata rurancuna. Cai huauquicunaca Jehová Diospaj ñaupajpi alli ricurisha nishcamantami chai cambiocunata rurancuna. Ashtahuanpish paicunaca Bibliapi nishcacunata ricushpami decisioncunata agllancuna. Ñucanchijpish imata decidingapajca chaitami rurana canchij. Apóstol Pabloca; “Alli yachaita catirai” nishpami aconsejarca (2 Timoteo 1:13). ¿‘Alli yachaica’ imataj can? Bibliapi yachachishcacunami can. Jesús imalla yachachishcacunapishmi ‘alli yachaica’ can (Juan 17:17). Ñucanchijca tucui shunguhuanmi Biblia nishcacunapi crinchij. Ashtahuanpish Jehová Diospaj organizacionca chai yachachishcacunata catichunmi yachachishca. Chaita rurashpaca cushillami causashun. w24.07 págs. 11, 12 párrs. 12, 13

Apóstol Pedroca arrepintirina, perdonana ima cashcataca allimi intindirca. Chaimantami shujtajcunamanpish chaita yachachi tucurca. Por ejemplo, Pentecostés fiesta qꞌuipaca Jehová Diosta mana cazuj judiocuna Mesiasta huañuchishcata intindichingapajmi shuj conferenciata curca. Paica cꞌuyaihuanmi judiocunamanca “arrepintirichij, cancunapaj mana alli ruraicunamanta tigrarichij. Chashna rurajpimi Jehová Diosca paillataj cancunapaj juchacunata perdonanga, sumaj causaitapish cancunapaj apamunga” nishpa yachachirca (Hechos 3:​14, 15, 17, 19). ¿Chaita nishpaca Pedroca imatataj nisha nirca? Shungumanta arrepintirijcunaca paicunapaj yuyaitami cambiana can. Chaipajca millai cosascunata mana rurana cashcata intindishpami chaita ruranata saquina can. Chai qꞌuipaca Jehová munashca shina causangapajmi esforzarina can. Shinallataj Pedroca Jehová Diosca ñucanchij juchacunata tucuita borraj shinami perdonan nircami. Shinashpaca jatun juchacunata rurashca cajpipish shungumanta arrepintirijpica Yayitu Diosca ñucanchijta perdonangami. Chaita yachashcamantami cushilla sintirinchij. w24.08 pág. 12 párr. 14

Diospaj punlla ñalla shamunata yuyaipi charishpaca ashtahuan charina yuyaillaca mana causashunchu. Bibliapi nishca shinaca ‘Dios jatunta pꞌiñari punllapica paicunapaj cullquipish, oropish mana quishpichi tucushcata ricushpaca gentecunaca chaicunataca ñancunapimi shitangacuna’ (Ezequiel 7:19). Chaimantami ashtahuan charinallapi ocuparinapaj randica minishtirishcacunallahuan causangapaj imatapish alli yuyashpa decidina canchij. Shinallataj yangamanta ama dibiyangapajpishmi esforzarina canchij. Achca cosascunata charishpaca chaicunata cuidanallapimi ocuparishun. Chaimantami ama chashna causangapaj cuidadota charina canchij. Shinallataj ñucanchij charishca cosascunata ama yallitaj cꞌuyangapajpishmi esforzarina canchij (Mateo 6:​19, 24). Diospaj punlla chayamucushcamantami Jehová Diospi confiashcata o chai cosascunapi confiashcataca ñucanchij ruraicunahuan ricuchina canchij. w24.09 págs. 11, 12 párrs. 13, 14

Huaquin mana alli munaicunata, mana alli yuyaicunataca mishai tucushunmi. Shinapish huaquin mana alli munaicunamanta, mana alli yuyaicunamanta jarcarinaca ashtahuan sinchichari canga. Apóstol Pedropi yuyashun. Paica runacunata manchashcamantami quimsa cutin: ‘Jesustaca mana rijsinichu’ nirca (Mateo 26:​69-75). Shinapish chai qꞌuipaca Pedroca mana manchashpami Sanedrinpaj ñaupajpi Jesusmanta huillarca. Pedroca runacunata ña mana manchaj cashcatami yuyashcanga (Hechos 5:​27-29). Shinapish huaquin huatacuna qꞌuipaca circuncisionta rurachishca judiocunata manchashcamantami Pedroca mana judío caj huauqui panicunahuan micunata saquirca (Gálatas 2:​11, 12). Shinaca runacunata manchana yuyaica cutinmi tigrashca carca. Pedro runacunata manchanata saquishcataca mana yachanchijchu. Ñucanchijpish huaquin mapa munaicunata ña mishashcatachari yuyashun. Mana alli munaicunata mana mishai valishpaca Jesús ima nishcatami rurana canchij. Paica: “Rijcharishca caichij” nircami (Mateo 26:41). Shuj mana alli munaita ña mishashcata yuyashpapish juchaman apaj ruraicunamanta caruyangapajmi esforzarishpa catina canchij. Chai mapa munaita ama charingapaj imata ruranataca ñachari yachangui. Shinashpaca chaita rurashpami catina cangui (2 Pedro 3:14). w24.07 págs. 18, 19 párrs. 17-19

Jesucristo ñucanchijta ayudashca shinaca shujtaj runaca mana ayudashcachu. Por ejemplo, Jesusca cai Allpapi cashpaca milagrocunata rurashpami gentecunataca ayudarca (Lucas 9:​12-17). Ashtahuancarin paipaj causaita cushpami ñucanchijta quishpichirca. Chai regaloca ima regalotapish yallimi valishca can (Juan 15:13). Causarishca qꞌuipapish Jesusca gentecunata ayudashpami catirca. Pai huillashca shinaca jahua pachaman tigrashpaca ñucanchijman espíritu santota cuchunmi Yayitu Diosta mañarca. Espíritu santo ayudajpimi Diosmanta yachai tucunchij, animotapish japi tucunchij (Juan 14:​16, 17; 16:13). Muyundij Allpapi Diosmanta huillashpa catichunpish Jesusca tandanacuicunapimi ima shina huillana cashcata yachachin (Mateo 28:​18-20). Apóstol Pabloca ‘Jesusca jahua pachaman rishpaca huaquin cꞌaricunatami shuj regalota shina cacharca’ nircami (Efesios 4:​7, 8). Apóstol Pablo nishca shinaca Jesusca congregacionpi chꞌican chꞌican ruraicunata rurashpa ayudachunmi cai cꞌaricunata curca (Efesios 1:​22, 23; 4:​11-13). Cai huauquicunaca juchayujcuna cashcamantami huaquinpica pandari tucuncuna (Santiago 3:2). Chashnapish Jesusca ñucanchijta ayudachunmi paicunata churashca. Paicunaca ‘valishca regalocuna’ shinami can. w24.10 pág. 18 párrs. 1, 2

Davidca paipaj churitaca: ‘Jehová Diosta cazujpica tucui can imalla rurashcami alli llujshinga’ nircami. Pero tiempohuanca Salomonca paipaj yaya David cushca consejotaca ña mana cazurcachu. Chaimantami ña yuyajyashpaca shujtaj dioscunata adorarca. Chashna rurajpimi Jehová Diosca cashcata rurashpa, allita rurashpa paipaj pueblota mandachunca ña mana ayudarca (1 Reyes 11:​9, 10; 12:4). ¿Ñucanchijpish imatataj yachanchij? Jehová Diosta cazushpaca cushillami causashun (Salmo 1:​1-3). Jehová Diosca Salomón shina achcata charij cachun, rijsishca cachunca mana ayudangachu. Pero paita tucuipi cazujpica alli decisioncunata agllachunmi ayudanga (Proverbios 2:​6, 7; Santiago 1:5). Jehová Dios cushca consejocunaca trabajomanta, estudianamanta, cullquimanta, divirtirinamanta alli decisioncunata agllachunmi ayudan. Chai consejocunata cazushpaca paipaj alli amigomi cashun. Huiñai causaitapishmi charishun (Proverbios 2:​10, 11). Shinallataj alli amigocunatami charishun. Familia ucupipish cushillami causashun. w24.11 págs. 10, 11 párrs. 11, 12

¿Yaya mamacunaca Bibliamanta, Diosmanta huahuacunaman yachachingapajca imatataj rurai tucuncuna? Por ejemplo, shuj museoman rishca chaipi tiyaj ñaupa cosascunata ricuchishpami Bibliapi nishcacuna ciertotaj cashcata ricuchi tucuncuna. Por ejemplo, shuj rumipica más o menos 3.000 huatacuna huashamanmi Diospaj shutita quillcarcacuna. Chai rumimantaca huaquin copiacunatami rurashcacuna. Shujtaca testigos de Jehovacunapaj central mundialpi tiyaj museopimi charincuna. Cutin shujtaj copiataca Guayaquil sucursalpimi charincuna. Chai rumipica Moab llajtata mandaj Mesá israelitacunapaj contra tucushcatami nin. Chaitaca Bibliapipishmi yachachin (2 Reyes 3:​4, 5). Huahuacuna Bibliapi nishcacuna ciertotaj cashcata cuentata cushpaca Jehová Diostami ashtahuan cꞌuyangacuna. w24.12 pág. 14 párr. 4; pág. 15 párr. 6