Diciembre

Jesusta catijcunaca Diospaj Shimita yachashpaca chaicunata paicunapaj causaipi pajtachingapajmi esforzarircacuna (Juan 17:6). Shinapish shuhuata shina Jesusta huañuchijta ricushpaca paicunaca dudacunatami chari callarircacuna. Chaita ricushpaca Jesusca discipulocuna millai shunguta charishcataca mana yuyarcachu. Ashtahuanpish Bibliapi nishcacunata mana tucuita intindishcamanta dudacunata charishcatami yacharca (Lucas 9:​44, 45; Juan 20:9). Chaimi Jesusca Bibliapi nishcacunata alli intindichun paicunataca ayudarca. Ishqui discipulocunahuan Emausman ricushpa paicunata ima shina ayudashcata ricui pudinchij. Jesusca mana chai ishqui discipulocunahuan tupanacushcahuanchu pai pi cashcata huillarca. Chaipaj randica paicuna imata yuyashcata yachangapajmi tapuicunata rurarca. Chai ishqui discipulocunaca romanocunapaj randi Jesús Israel llajtata mandagrishcatami yuyarcacuna (Lucas 24:​18-27). Jesusca Diospaj Shimita utilizashpami achca profeciacuna ima shina pajtarishcata intindichirca. Ña tutayajpimi Jesusca caishuj discipulocunamanpish Diospaj Shimipi nishcacunata intindichirca (Lucas 24:​33-48). w24.10 pág. 14 párrs. 9, 10

Jesusca imata ruranata, imata ninataca paipaj Yayamantami yacharca. Diospaj organizacionpish Bibliapi nishcacunata catishpami consejocunata, yachachishcacunatapish cun (2 Timoteo 3:​16, 17). Shinallataj pushaj huauquicunaca Diospaj Shimita liyichun, chaipi nishcacunata causaipi pajtachichunmi animan. Diospaj organización cushca publicacioncunahuan Bibliata estudianaca allimi can. ¿Imamanta? Chaita rurashpaca Diospaj organización cushca instruccioncunataca Bibliapi nishcacunahuanmi chꞌimbapurai tucushun. Chashnami Diospaj organización cushca instruccioncuna Bibliamanta japishca cashcata cuentata cushun. Ashtahuanpish Diospaj organizacionpimi confiashpa catishun (Romanos 12:2). ‘Jesusca Diospaj Gobiernomanta alli huillaicunatami’ huillashpa purirca (Lucas 4:​43, 44). Shinallataj paita catijcunatapish Diosmanta huillachunmi mandarca (Lucas 9:​1, 2; 10:​8, 9). Cunan punllacunapipish Diospaj pueblopi cajcunaca maipi causashpapish Diosmanta huillashpa catingapajmi esforzarinchij. w24.04 pág. 9 párrs. 5-7

Jehová Diospaj organizacionpimi siempre confiana canchij. Jehová Diosca israelitacunata pushachunca Moisestapish, Josuetapishmi churarca (Josué 1:17). Israelitacuna Jehová Dios churashca pushajcunata cazushpaca tranquilo, cushillami causarcacuna. Shinallataj punta siglopi tiyaj congregacioncunataca 12 apostolcunami pushajcuna carca (Hechos 8:​14, 15). Chai qꞌuipaca Jerusalenpi caj ancianocunapishmi paicunataca ayudai callarircacuna. Huauqui panicuna cai pushajcunata cazushcamantami “crishcapi sinchiyarishpa, punllanta mirarishpa catircacuna” (Hechos 16:​4, 5). Cunan punllacunapipish Diospaj organización cushca instruccioncunata cazujpica Yaya Diosca achcatami bendicianga. w24.07 pág. 10 párr. 10

Jehová Diosca rey Davidtaca achcatami cꞌuyarca. Chaimantami “Davidmi ñuca shunguta cushichin” nirca. Shinapish Davidca jatun juchacunapimi urmarca. Paica cazarashca huarmihuanmi huainayarca. Culpata mana charij runatapishmi huañuchirca. Moisesman cushca leypi mandashca shinaca Davidca chaita rurashcamantami huañuna carca (Levítico 20:10; Números 35:31). Shinapish Jehová Diosca cꞌuyaihuanmi David arrepintirichun ayudarca. David arrepintirishca cashcata manaraj ricuchijpipish Jehová Diosca profeta Natantami paihuan parlachun cacharca. Natanca shuj ejemplota churashpami Davidpaj shunguman chayarca. Chaimi Davidca achcata llaquirishpa arrepintirirca (2 Samuel 12:​1-14). Chai qꞌuipaca arrepintirishca cashcata ricuchingapajmi shuj salmota quillcarca (Salmo 51-paj callari parte). Chai Salmota liyishpami maijancunaca paicunapaj juchacunamanta arrepintirishcacuna. ¿Jehová Dios David arrepintirichun ayudashcamantaca manachu cushilla sintirinchij? w24.08 pág. 10 párr. 9

Huahuacunata alli huiñachinaca mana jahuallachu can. Huahuacunata sinchi feta charichun ayudacushcamantami yaya mamacunataca achcata felicitanchij (Deuteronomio 6:​6, 7). Pero huahuacunaca ashtahuan huiñashpa catishpaca Diospaj Shimimanta, Diospaj mandashcacunamantami tapuicunata charingacuna. Huahuacuna chashna tapujpica yaya mamacunaca Diosmanta caruyacushcata yuyashpami tal vez sustaringacuna. Pero huahuacunaca imatapish yachangapajmi tapuicunata rurancuna (1 Corintios 13:11). Chaimanta huahuacuna paicunapaj crishcacunamanta tapuicunata rurajpica yaya mamacunaca mana mancharinachu can. Ashtahuanpish huahuacuna Bibliapi nishcacunata alli intindishpa paicunapaj crishcacunata sinchiyachichunmi ayudana canchij. w24.12 pág. 14 párrs. 1, 2

Judea llajtapi ñalla tiyagrishca llaquicunata ahuantangapajca huauqui panicunaca sinchi fetami charina carcacuna (Hebreos 10:​37, 38). Jesusca Jerusalén llajta muyundijpi soldadocuna shayacujta ricushpaca urcucunapi miticugrichunmi mandashca carca. Chai mandashcataca Jerusalenpi causajcuna, campopi causajcunapishmi cazuna carcacuna (Lucas 21:​20-24). Ñaupa punllacunapica contra soldadocuna shamucujta yachaj chayashpaca gentecunaca muyundijta pircashca llajtapimi miticunaman rijcuna carca. Jerusalenca chashna laya llajtami carca. Chaimantami chaita ruranapaj randi urcucunapi miticunaman rinaca huaquin judiocunapajca mana alli laya ricurishcanga. Pero chai mandashcata cazungapajca paicunaca sinchi fetami ricuchina carcacuna. Hebreo huauqui panicunaca congregacionta pushachun Jesús churashca huauquicunapimi confiana carcacuna. Pushaj huauquicunami Jerusalenmanta ima hora, ima shina miticunata huillashcangacuna (Hebreos 13:17). w24.09 págs. 10, 11 párrs. 9, 10

Jesusca cai Allpapi cashpaca Yaya Dios paiman mingashcata pajtachingapajmi sinchita esforzarirca (Juan 17:4). Shinapish paica “imapish alli llujshichunca ñucallatajmi rurana cani” nishpaca mana yuyarcachu. Paica shujtajcunaman yachachingapajmi esforzarirca. Shinallataj Jesusca paipaj discipulocunapimi confiaj carca. Chaimantami alli huillaicunata huillachun, Diospaj ovejitacunata cuidachun paicunaman mingarca. Jesusca paipaj discipulocunamanca cꞌuyaihuanmi consejaj carca. Maijan discipulocuna pai causarishcata mana crijta ricushpaca dudacunata ama charichunmi paicunataca ayudarca (Lucas 24:​25-27; Juan 20:27). Shinallataj cullqui yuyailla causanapaj randi Diosta sirvijcunata ayudanapi ocuparichunmi paicunataca animarca (Juan 21:15). Shujtajcunahuan mana compararishpa paicunaman mingashcacunata cushilla pajtachishpa catichunpishmi animarca (Juan 21:​20-22). Cutin maijancuna Diospaj Gobiernomanta mana tucuita intindijta ricushpaca cꞌuyaihuanmi paicunataca corregirca. Shinallataj predicacionpi ocuparichunmi paicunataca animarca (Hechos 1:​6-8). w24.10 págs. 15, 16 párrs. 13, 14

Jehová Diosta cazushpaca huiñai huiñaitami causashun. Ima shinami israelitacunaca Jehová Dios cusha nishca allpaman ñalla yaicugrirca, chashnallatajmi ñucanchijpish Dios cusha nishca Paraisomanca ñalla yaicugrinchij (Isaías 35:1; Lucas 23:43). Chaipica Diablopish, demoniocunapish mana tiyangachu (Apocalipsis 20:​2, 3). Panda religioncunapish Diosmantaca gentecunataca mana caruyachingachu (Apocalipsis 17:16). Gobiernocunapish gentecunataca mana llaquichingachu (Apocalipsis 19:​19, 20). Millai gentecunapish ña mana tiyangachu (Salmo 37:​10, 11). Tucui gentecunami Jehová Diospaj leycunata cazungacuna. Chashnami tandalla, sumajta causangacuna. Caishuj chaishujmi cꞌuyanacungacuna (Isaías 11:9). Chai punlla chayachunmi cushicuihuan shuyacunchij. Jehová Diosta cazushpaca Paraisopimi huiñai huiñaita causashun (Juan 3:16). w24.11 pág. 9 párr. 7

Cai punllapaj versopica Jesús huillashca shimicunaca ¿ima shinataj pajtaricun? Cunan punllacunapipish testigo de Jehovacunaca 1.000 yalli shimicunapimi huillacunchij. Shinallataj jw.org página tiyashcamantami la mayoría gentecunaca Diospaj Gobiernomanta alli huillaicunata yachana oportunidadta charincuna. Jesusca paita catijcunamanca: “Ñuca shamungacamaca tucui pueblocunapica mana huillai tucunguichijchu” nircami (Mateo 10:23; 25:​31-33). Chaita nishpaca Jesusca paita catijcuna muyundij Allpapi causaj cada personaman mana huillai tucunatami nicurca. Ñucanchijpish chaitaca mana rurai tucushunchu. Yuyashun. Achca gentecunaca Diosmanta ama huillachun jarcaj llajtacunapimi causancuna. Shinallataj cada punllami huaranga huaranga huahuacunaca huacharincuna. Chaimantami tucui gentecunaman huillangapaj mashnata esforzarishpapish Diospaj punlla shamungacamaca “tucui llajtacunaman, tucui familiacunaman, tucui rimaicunaman, tucui pueblocunamanca” mana huillai tucushun (Apocalipsis 14:6). w24.05 pág. 10 párrs. 6, 7

Jesusca alaja shimicunahuanmi paita catijcunataca animaj, sinchiyachij carca. Paica paicunataca nunca mana sinchita rimarcachu (Lucas 8:​47, 48). Cusacunaca Jesusmantaca achcatami yachai tucuncuna. Jesusca cusacunataca paicunapaj huarmicunata tucui shunguhuan cꞌuyachun, paicunamanta ama caruyachunmi mandarca. Shinallataj ‘cꞌarica paipaj huarmihuanmi tandanacunga’ nircami (Mateo 19:​4-6). Griego rimaipica “tandanacunga” nishpaca cusapish, huarmipish ishquindij gomahuan pegashca shina cashcatami nin. Chashna pegashca shina cashcamantaca cusa ima mana allita rurajpica paipaj huarmica achcatami llaquiringa. Cusaca paipaj huarmita cꞌuyashpaca pornografiataca mana ricunachu can. Ashtahuanpish ratomi mapa cosascunamanta caruyana can (Salmo 119:37). Shinallataj paicunapaj huarmicunata cꞌuyaj cusacunaca Job shinami mana alli munaicunahuan shujtaj huarmita ama ricungapaj shuj ari ninacuita rurana can (Job 31:1). w25.01 págs. 10, 11 párrs. 12, 13

Shujtajcuna ñucanchijta de verdad perdonashcata yachanaca maipica sinchimi can. Jehová Diosca gentecuna shinaca mana perdonanchu. Chaimantami Salmota quillcaj runaca: “Canca ñucanchij juchacunataca de verdadmi perdonashcangui” nirca (Salmo 130:​4, NWT). Caipi ricushca shinaca Yayitu Diosllami shungumanta perdonan. Chaimantami ‘de verdad perdonanata’ yachangapajca paimanta yachana canchij. Ñaupa Testamentota quillcajcunaca Jehová Dios perdonaj cashcata parlangapajllami huaquinpica shuj palabrata utilizarcacuna. Pero gentecunapaj perdonmanta parlangapajca chai palabrataca mana utilizarcacunachu. Jehová Diosca pita perdonashpaca tucui paipaj juchacunata borraj shinami cutin paihuan alli apanacuchun saquin. Yayitu Diosca shungumantami tucui juchacunata perdonan. Chaica alajami can. w25.02 pág. 8 párrs. 1-3

Jehová Diospish, Jesuspish, alli huillaicunata huillachunmi mandashca. Chaimantami Diosmanta huillacujpi gentecuna mana uyasha nijpica mana desanimarina canchij. Ashtahuanpish ñucanchijman mingashcata pajtachicushcamanta, Jehová Diospaj shunguta cushichicushcamantami cushilla sintirina canchij (Proverbios 27:11). Huauqui panicuna gentecunaman Bibliamanta yachachijpipish cushillami sintirinchij. ¿Imamanta? Caitaca “Huillaj” revistapica shuj alaja ejemplota churashpami yachachirca. Huillana obraca chingarishca huahuata mashcacushca shinami can. Huahuata taringapajca achca gentecunami chꞌican chꞌican ladocunapi ordenpi mashcashpa rin. Huahua ricurijpica huahuata tarij runallaca mana cushicunchu. Ashtahuanpish tucuicunami cushicuncuna. ¿Caimantaca imatataj yachanchij? Alli shungu gentecunata taringapajca tucuicunami shuj shinalla ordenpi trabajanchij. Pero maijan huauqui o pani alli shunguta charij gentecunata tarijpica tucuicunami cushicunchij. Tandanacuicunaman ri callarijpicarin ashtahuanmi cushicunchij. w24.04 pág. 18 párrs. 13, 14

Jehová Diospaj nishcacuna shamuj punllacunapi ima shina pajtarijtaca tucuicunami ricunata munanchij. Shinallataj jatun llaqui punllacuna manaraj callarijpi Jehová Diospaj ayudahuan achca gentecuna paipajman cꞌuchuyachunmi munanchij. Jatun llaqui punllacunaca achcata mancharina punllacunami canga. Pero chai punllacunapi huaquin gentecuna Diablopaj ruraicunata ladoman saquishpa, ñucanchijhuan Jehová Diosta adoranata tal vez decidinata yachashpaca cushillami sintirinchij. Diospaj punlla shamungacamaca ¿imatataj rurana canchij? Cai tucuri punllacunapica Jehová Diosca ñucanchijcunamanca shuj sumaj trabajotami mingashca. Paica tucui muyundij Allpapi Diospaj Gobiernomanta alli huillaicunata huillachunmi munan. Ashtahuanpish Diablopaj millai ruraicuna ñalla tucurina cashcatapishmi gentecunamanca huillana canchij. Ñucanchijca alli huillaicunata, gentecunata, ashtahuantajca Jehová Diosta, paipaj shutitapish achcatami cꞌuyanchij. Chaimanta, Jehová Dios “ama huillaichij” ningacama tucui shunguhuan huillashpa catishunchij. w24.05 pág. 19 párrs. 14-16

Jesusca huañunapaj ashalla horascuna faltajpica Pedromanpish, caishuj apostolcunamanpishmi humilde canata yachachirca. Jesusca micucushcamanta ñapish jatarishpami paipaj jahua churanata ladoman churashpa, shuj toallata japishpa, bateapi yacuta churashpa paita catijcunapaj chaquicunata maillai callarirca. Chaita ricushpami apostolcunaca mancharishca saquirishcangacuna (Juan 13:​4, 5). ¿Chaita rurangapajca Jesusca mashna tiempotashi demorashcanga? Achcata demorashpapish 12 apostolcunapaj chaquicunatami maillarca. Paita traicionagrij Judaspaj chaquicunatapishmi maillarca. Chaita rurashpaca Jesusca humilde cashcatami ricuchirca. Chai huashaca paita catijcunataca: “¿Cancunapaj chaquicunata imamanta maillashcataca intindinguichijchu? Cancunaca ñucataca Yachachij, Amito ninguichijmi. Chashna nishpaca allitami ninguichij, ñucaca chaillatajmi cani. Ñucaca cancunapaj Amo, Yachachij cashpapish cancunapaj chaquicunatami maillashcani. Chashnallatajmi cancunapish caishuj chaishuj chaquicunata maillanacuna canguichij” nishpami pacienciahuan intindichirca (Juan 13:​12-14). w25.03 págs. 10, 11 párrs. 9-11

Cai millai mundopi causacushcamantami Jehová Diospaj cꞌuchullapi canaca maipica sinchi can. Achca gentecunaca Jehová Dios tiyashcata mana crishcamantami paicuna munashca shina causancuna. Chai gentecunaca sumaj causaita charishca shinami ricurincuna. Paicunata ricushpaca ñucanchijpish tal vez paicuna shinami yuyai callarishun. Jehová Dios tiyashcataca manachari crinata saquishun. Pero ñucanchijta ayudai tucushcata o mana ayudai tucushcatami dudai callarishun. Salmo 73-ta quillcaj runami chashna sintirirca. Paica achca gentecuna Jehová Diospaj mandashcacunata ladoman saquishpa cushilla causacushcatami ricurca. Chaimi paica “¿Jehová Diosta sirvinaca valishcachu canga?” nishpa dudai callarirca (Salmo 73:​11-13). ¿Salmota quillcaj runaca ama dudangapajca imatataj rurarca? Paica Jehová Diosta cungarijcunahuan ima tucugrishcatami yuyarca (Salmo 73:​18, 19, 27). Shinallataj Jehová Diosta sirvishcamanta ima bendicioncunata chasquishcatami yuyarirca. Ñucanchijpish Jehová Diosta sirvishcamanta ima bendicioncunallata chasquishcatami yuyarina canchij. w24.06 págs. 24, 25 párrs. 16, 17

Ñaupa punllacunapica maijan israelitacunaca cullquita mañachishpapish huahua cullqui jahuami mañachijcuna carca. Shinallataj huaquin juezcunaca shujtajcuna ima mana allita mana rurashca cajpipish paicunata llaquichingaraicullami cullquita japijcuna carca. Jehová Diosca chaicunata rurajcunataca manataj ricunayachinchu (Ezequiel 22:12). Cullqui solopi yuyacushcata yachangapajca cashna nishpami tapurina canchij: “¿Siemprechu cullquillapi, ashtahuan cosascunata randinallapi yuyani? ¿Pi ñucaman cullquita mañachijpica ‘paica mana minishtingachu’ nishpachu mana utca pagani? ¿Cullquita charishcallamantachu shujtajcunata yalli cashcata yuyani? ¿Shujtajcunaman cuj canaca ñucapajca sinchichu can? ¿Cullquita charij tucui huauqui panicuna ashtahuan charinallapi yuyajcuna cashcatachu yuyani? ¿Pobrecunata ladoman saquishpa charijcunallahuanchu apanacunata munani?”. Cullqui yuyailla mana causajpica Jehová Diosca para siempremi paipaj carpa huasipi cachun saquinga. w24.06 págs. 12, 13 párrs. 17, 18

Tentacioncunapi ama urmangapajca tucuicunami alli munaicunata, alli yuyaicunata charingapaj esforzarina canchij. Shinallataj millai ruraicunata millanachishpa alli ruraicunata ruranatami yachana canchij (Amós 5:15). Chaita rurashpaca siempremi allita ruranata munashun. Shinallataj juchaman apaj ruraicunamantapishmi caruyashun. Diospajta ruranapimi ocuparina canchij. Reunioncunaman ringapaj, predicacionmanpish llujshingapaj esforzarishpaca Diospaj ñaupajpi alli ricurinata munashun (Mateo 28:​19, 20; Hebreos 10:​24, 25). Bibliatapishmi estudiana canchij. Imalla liyishcapipishmi yuyana canchij. Chaita rurashpami allicunata ruranata munashun, millai ruraicunatapishmi pꞌiñashun (Josué 1:8; Salmo 1:​2, 3; 119:97). Jesús nishcatapishmi yuyarina canchij. Paica: “Juchapi ama urmangapajca Diosta mañaraichij” nircami (Mateo 26:41). Shinami Yayitu Diospaj ayudata chasquishpa paipaj shunguta cushichishun (Santiago 4:8). w24.07 págs. 17, 18 párrs. 14-16

Shujtajcunaman yachachijcunaca Jehová Diospaj ejemplota catishpami yachachina can. Jehová Diosca mana mitsashpami tucuita yachachin. Ñucanchijpish mana mitsashpami tucui ñucanchij imalla yachashcata mushujcunaman yachachina canchij. “Tucuita yachachishpaca ñuca trabajotami quichunga” nishpaca mana yuyanachu canchij. Shinallataj maijancunaca, “ñucataca pi mana yachachircachu” nishpami shujtajcunataca mana yachachisha nin. Pero Yayitu Diosca chaita rurachunca mana munanchu. Ashtahuanpish ñucanchij tucui imalla yachashcata shujtajcunaman cushilla yachachingapajmi esforzarina canchij (1 Tesalonicenses 2:8). Chashna yachachishcamantami paicunapish “shujtajcunata yachachingapaj allichirishca cangacuna” (2 Timoteo 2:​1, 2). Shinallataj shujtajcunaman ñucanchij imalla yachashcata yachachishcamantami paicunapish, ñucanchijpish alli yachaita japishun. Ashtahuancarin cushillami causashun. w24.09 pág. 29 párrs. 12, 13

Can imata mana tanto ruranata yachashpaca mana yallitaj sustarinachu cangui. Canca alli cualidadcunata charishcamantami congregacionpica achcata ayudai tucungui. Chaimantami Diosta mañashpa 1 Corintios 12:​12-30-pi ima nishcata liyi tucungui. Apóstol Pablo nishca shinaca canpish shujtaj huauqui panicuna shinallatajmi congregacionpi ayudangapajca valishca cangui. Jehová Diosta sirvishpa catingapaj, huauqui panicunata ayudashpa catingapaj esforzari. Quiquin chashna esforzaricujta ricushpaca ancianocunaca can rurai tucushca trabajota rurachunmi minganga (Romanos 12:​4-8). Tucuicunami Jehová Diospajman cꞌuchuyangapaj esforzarinchij. Shujtajcunata ayudashpami cushilla sintirinchij. Shinallataj ñucanchij causaihuanmi Diosta alli sirvijcuna cashcatapish ricuchinchij. Canpish siervo ministerial cangapaj ñachari achca cualidadcunata charingui. w24.11 págs. 16, 17 párrs. 12, 13

Anaca achca llaquicunata charishcamantami huacaj carca. Paipaj cusaca Peniná huarmihuanpishmi cazarashca carca. Chai huarmica Anata achcata pꞌiñashcamantami paitaca mana alli trataj carca. Shinallataj Anaca huahuacunataca mana chari pudijchu carca. Pero Peniná huarmica huahuacunatami charirca (1 Samuel 1:​1, 2). Chaimantami Peninaca Anamanta burlarij carca. Anaca llaquilla sintirishcamantami cꞌuyaillata huacashpalla pasaj carca. Imatapish mana micujchu carca (1 Samuel 1:​6, 7, 10). ¿Anaca tranquila sintiringapajca imatataj rurarca? Paica Diospaj huasimanmi rirca. Anaca, ‘cambajta ruraj ñuca llaquihuan cajta ricuhuayari’ nishpami Yaya Diosta rogarishpa mañarca (1 Samuel 1:11). Yaya Diosca Ana mañashcatami uyarca. Chaimi Anaca huahuacunata chari tucurca (1 Samuel 1:​19, 20; 2:21). w24.12 pág. 21 párrs. 5-7

Jesusca paipaj causaita cushpami gentecunamanta sustarij cashcata ricuchirca. Pero ashtahuantajca Jesusca paita catijcunamantami sustarij carca (Juan 13:1). Jesusca cai Allpapi achca llaquicunata apana cashcata, llaquinaita huañuna cashcatami yacharca. Shinapish paiman mingashcataca mana pajtachina cashcallamantachu pajtachirca. Ashtahuanpish tucui shunguhuanmi Diosmanta huillangapaj, yachachingapaj, gentecunata ayudangapaj esforzarirca. Ñalla huañugrishpapish paita catijcunapaj chaquicunatami maillarca, paicunatami sinchiyachirca, sumaj yuyaicunatapishmi yachachirca (Juan 13:​12-15). Jatun caspipi huañucushpapish paipaj cꞌuchullapi caj shuhuaj runatami: “Paraisopimi cangui” nishpa animarca. Shinallataj paipaj mamata cuidachunmi Juanman mingarca (Lucas 23:​42, 43; Juan 19:​26, 27). Caipi ricushca shinaca Jesusca gentecunata ayudashpa, paipaj causaita cushpami cꞌuyaj cashcata ricuchirca. w25.01 pág. 23 párr. 11

Jehová Dios ñucanchij juchacunata perdonajpi ñucanchijcuna ima shina sintirishcata intindichingapajca Bibliaca shuj chꞌimbapuraitami churan. Tucuicuna juchayujcuna cashcamantami juchapaj esclavocuna shina canchij. Pero Jehová Dios ñucanchijta perdonashcamantami juchapaj cadenacunamanta cacharichishca canchij (Romanos 6:​17, 18; Apocalipsis 1:5). Shuj esclavo cacharichishca cashpaca achcatami cushicun. Ñucanchijpish Jehová Dios ñucanchij juchacunata perdonashcamantami achcata cushicunchij. Jehová Diosca paipaj Churita cushcamantami shuj millai ungüimanta shina ñucanchijcunataca jambishca. Chaimantami juchacunata rurashca cashpapish cutin Jehová Diospaj alli amigocuna cai tucunchij (1 Pedro 2:24). Shuj runa millai ungüimanta alli tucushpaca yallitaj cushillami sintirin. Ñucanchijpish Jehová Dios perdonajpica achcatami cushicunchij. w25.02 pág. 13 párrs. 16, 17

Talento cullquimanta chꞌimbapuraipica Jesusca ishqui esclavocuna paicunapaj amota alli sirvishcata, pero shuj esclavo paita mana alli sirvishcatami nirca (Mateo 25:​14-30). Amota alli sirvij ishqui esclavocunaca Jehová Diosta alli sirvij ungidocunatami ricuchin. Jesusca paihuan cushicuchunmi paicunata invitan. Chaimi paicunaca jahua pachapi causangapaj punta causarijcuna can (Mateo 25:​21, 23; Apocalipsis 20:5b). Pero, ¿ungidocunaca qꞌuilla esclavomantaca imatataj yachai tucuncuna? Paicunaca sinchitami trabajana can. Talento cullquimanta chꞌimbapuraipi, shinallataj chunga solteracunamanta chꞌimbapuraipica Jesusca ungidocuna qꞌuillacuna tucugrishcataca mana nicurcachu. Ashtahuanpish Jehová Diosta tucui shunguhuan mana sirvijpi ima tucunatami nicurca. Paicunaca Dios ‘agllashcacunapurapi cangapajmi ashtahuan esforzarishpa catina’ can. Chaita rurashpallami jahua pacha Gobiernoman yaicungacuna. w24.09 pág. 23 párr. 10; págs. 23, 24 párrs. 12, 13

Tucuicunami familiata mantiningapaj shuj trabajota charishun ninchij (Eclesiastés 7:12; 1 Timoteo 5:8). Chaimantami shuj trabajota mashcacushpaca mashna cullquita ministishcapi yuyana canchij. Shinapish mana chaillata ricushpachu decidina canchij. Shuj trabajota mashcacushpaca Jehová imata rurachun munashcapi, paipajman cꞌuchuyana cashcapimi yuyana canchij. Chaipajca cashna nishpami tapurina canchij: “¿Trabajopica Jehová mana munashcata rurachunchu ninga? ¿Trabajomantaca predicanata, reunioncunaman rinata, Bibliata yachanatachu saquisha? ¿Ñuca familiatachu achca tiempota saquishpa risha?” (Proverbios 6:​16-19). Caicunata pajtachingapaj jarcagrijta ricushpaca chai trabajotaca mana chasquinachu cangui. Trabajota manaraj japishpapish Jehová Dios tucuipi cuidanatami confiana cangui (Mateo 6:33; Hebreos 13:5). w25.03 pág. 21 párrs. 5, 6

Yayitu Diosca tucui huauqui panicunataca achcatami valoran. Ñucanchijpish paicunata valorangapajmi esforzarina canchij. Chaimantami paicunapaj pandarishcacunallata ricunapaj randica paicunapaj alli ruraicunata ricuna canchij. Ashtahuanpish huauqui panicuna paraisopi jucha illajcuna tucujpica imapipish ña mana pandarinatami yuyarina canchij. Shinallataj ima llaquicuna, problemacuna tiyajpica chaicunata cꞌuyaihuan allichingapajmi esforzarina canchij. Cai punllapaj versopi nishcacunata pajtachijpica shujtaj gentecunapish alli causasha nishpami Diospaj puebloman yaicungacuna. Jehová Diosta sirvicushcamantami paraíso ña causacushca shina sintirinchij. Jehová Dios paita chashna sirvichun ayudashcamantaca achcatami agradicinchij. Shujtaj gentecunapish cushilla, tranquilo, sumajta causasha nishpaca Diospaj pueblomanmi yaicuna can. Ashtahuanpish Diospaj pueblomanta ama llujshingapajmi esforzarina canchij. ¿Imamanta? Diabloca Diosmanta caruyachunmi ñucanchijtaca pandachisha nin (1 Pedro 5:8; Apocalipsis 12:9). Chaimanta Diablo ñucanchijta pandachichunca ama saquishunchij. Ashtahuanpish ñucanchij huauqui panicunahuan paraisopi shina causashpa catingapaj tucui shunguhuan esforzarishpa catishunchij. w24.04 págs. 24, 25 párrs. 18, 19

Yaya mamacunaca paicunapaj huahuacuna Jehová Diosta sirvina munaita charichunmi yachachina can. Bibliata liyina, tandanacuicunaman rina, predicacionman llujshina tucuimanta yalli valishca cashcatami yachachina can. Pero yaya mamacunarajmi chaicunataca rurana can. Chaicunata mana rurajpica huahuacunaca paicunapaj yaya mama Jehová Diosta sirvijcuna cashcallamantami paitaca sirvinata munangacuna. Qꞌuipacarin Jehová Diostaca mana tucui shunguhuanchu sirvingacuna. Cutin maijancunaca Jehová Diosta sirvinatami saquingacuna. Maijanpish Jehová Diosta sirvinata saquishca cajpica, ¿Jehová Diosca paitaca ña manachu chasquinga? Paipaj juchacunamanta arrepintirijpimi Yayitu Diosca paitaca cutin chasquinga. Pero chaita rurangapajca paica mana jatun tucushpami ancianocuna paita ayudachun saquina can (Santiago 5:14). Chaita rurana mana jahualla cajpipish esforzarinami can. Jehová Dioshuan alli apanacunami tucuimanta yalli valishca can. w24.07 pág. 25 párrs. 18, 19

¿Noviocunaca Diospaj ñaupajpi chuya, limpio ricuringapajca imatataj rurana can? Noviocunaca ashtahuan rijsinacushpa catijpica cꞌuyaipish ashtahuanmi mirashpa catinga. Shinallataj ishquindijmantami ashtahuan munaringacuna. Pero mapa ruraicunapi ama urmangapajmi cuidadota charina can. Mapa ruraicunapi ama urmangapajca mapa cosascunamantaca mana parlanacunachu can. Shinallataj paicunallaca mana saquirinachu can. Achca tragotapish mana ubyanachu can (Efesios 5:3). ¿Imamantataj chai ruraicunamantaca caruyana can? Chaicunata rurajpica aicha munaicunaca ashtahuanmi jataringa. Chaimantami chai munaicunamanta jarcarinaca ashtahuan sinchi canga. Chai mapa ruraicunapi ama urmangapajca noviocunaca Diospaj mandashcacunata cazungapaj imallata ruranatami parlanacuna can (Proverbios 22:3). Noviocunaca ashtahuan rijsinacushpa catishpaca tal vez paicunapura cꞌuyaita ricuchinatami munangacuna. Pero mapa ruraicunapi ama urmangapajmi cuidadota charina can. Aicha munaicuna yallitaj mirachun saquishpaca cambaj novio o novia alli cusa o huarmi cai tucushcata cuentata cunaca ashtahuan sinchimi canga (El Cantar de los Cantares 1:2; 2:6). Shinallataj jarcarinata mana yachashpaca noviocunaca jatun juchacunapimi urmai tucuncuna (Proverbios 6:27). Chaimantami noviocunaca noviocuna tucushca horasmanta Bibliapi nishcacunata yuyaipi charishpa paicunapura cꞌuyaita ima shina ricuchinata parlanacuna can (1 Tesalonicenses 4:​3-7). w24.05 pág. 29 párrs. 10, 11

Huauqui panicuna llaqui horaspi ñucanchijpi confiai tucushcata yachachunmi munanchij (Proverbios 17:17). ¿Pero confianalla cangapajca imatataj rurana canchij? Chaipajca Jehová Diospaj ejemplotami catina canchij. Por ejemplo, ñucanchij nishcacunata pajtachingapaj, tucuipi puntuales cangapajpishmi esforzarina canchij. Confianalla caj ancianocunaca congregacionpica achcatami ayudai tucuncuna. Por ejemplo, congregacionpi tiyaj grupocunata pushaj ancianocunaca huauqui panicuna paicunapi confiachunmi esforzarina can. Chashna rurajpimi huauqui panicunaca imapi ayudachun minishtishpaca mana manchashpa paicunataca cayangacuna. Shinallataj anciano huauquicuna huauqui panicunata shungumanta ayudajpica paicunaca Jehová Diospaj valishca cashcatami yachangacuna. Ashtahuanpish ancianocunaca paicuna yuyashca shina ima consejota cunapaj randica Bibliapi, shinallataj Diospaj organización cushca publicacioncunapi tiyaj consejocunata yuyachishpami aconsejana can. Chaita rurajpimi huauqui panicunaca paicunapi ashtahuan confiangacuna. Ashtahuancarin ancianocunaca huauqui panicuna paicunaman imata parlashcataca mana shujtajcunaman parlashpa purinachu can. Paicunapaj nishcacunatapish pajtachingapajmi esforzarina can. w24.06 págs. 30, 31 párrs. 14, 15

Jehová Dios tucui ñucanchij llaquicunata cunan punllacunapi tucuchinataca mana shuyanchijchu. Chashnapish llaquicunata ahuantashpa catichun ñucanchijta ayudanatami seguros canchij (Salmo 41:3). Por ejemplo, Yayitu Dios espíritu santota cujpimi ñaupajman catingapaj fuerzata japinchij. Shinallataj Yayitu Diosca sabiduría, entendimientota cushpami tranquilo sintirichun ayudan (Proverbios 18:14; Filipenses 4:13). Ashtahuancarin Yayitu Diosca ñalla tucui ungüicunata tucuchinata yuyachishpami ñucanchijta cushichin (Isaías 33:24). Jehová Diosca ñucanchijcuna llaquicunahuan chꞌimbapuracujpi animarichunmi Bibliata quillcachirca (Romanos 15:4). Por ejemplo, Africapi causaj shuj panica cáncer ungüita charishcamantami dimastij huacaj carca. Paica: “Isaías 26:​3-pi nishcata yuyarishpami animarij carcani. Chaipi nishca shinaca, Jehová Diosca chai llaquicunata chꞌimbapurachunmi ayudan” nircami. ¿Canpish jatun llaquicunahuan chꞌimbapuracushpaca ima versota yuyarishpataj animarishcangui? w24.12 págs. 24, 25 párrs. 17, 18

Ancianocunapish congregacionmanta llujshichishcacunata chashna tratangapajmi esforzarina can. Paicunaca Jehová Diospaj ovejitacuna “paipaj puebloman tigrachunmi” munancuna (Lucas 15:​22-24, 32). Congregacionmanta llujshichishcacuna Diospaj puebloman tigrajpica jahua pachapica angelcunapish, cai Allpapi Diosta sirvijcunapishmi achcata cushicunchij (Lucas 15:7). Jehová Diosca paicunapaj juchacunamanta mana arrepintirijcunapaj millai ruraicunataca manataj ricunayachinchu. Shinapish Jehová Diosca paicunataca mana shitashcatachu saquin. Ashtahuanpish paipajman tigrachunmi munan. Profeta Oseasca Jehová Dios shungumanta arrepintirijcunata ima shina ricuj cashcatami quillcarca. Jehová Diosca: “Cancuna cꞌariyashcataca ñucami alliyachisha. Mana cꞌuyaipajtami cꞌuyasha. Ñuca pꞌiñarinaca, paicunamantaca anchunmi” nircami (Oseas 14:4). Shinashpaca ancianocunaca congregacionmanta llujshichishcacuna arrepintirishca cashcata cuentata cungapajmi esforzarina can. Congregacionmanta llujshichishcacunapish Jehová Diospajman tigrangapajmi esforzarina can. w24.08 pág. 28 párrs. 8, 9

Shujtajcunata ayudangapajca maipica ñucanchij tiempota, fuerzata, cullquitami utilizashun. Pero paicunata ayudangapaj sinchita esforzarijpipish maijancunaca manachari agradicingacuna. ¿Chashna pasajpica ama llaquilla sintiringapajca imatataj rurana canchij? Shujtajcuna mana agradicijpipish paicunata ayudashcamantami cushilla sintirina canchij (Hechos 20:35). ¿Pero chashna sintiringapajca imatataj yuyarina canchij? Shujtajcunata ayudashpaca Jehová Diospaj ejemplota caticushcata yuyari. Paica gentecuna agradicijpipish o mana agradicijpipish tucuicunamanmi allicunata cun (Mateo 5:​43-48). Jehová Diosca: ‘Imatapish japinaraicullaca ama ayudaichijchu. Chashna rurashpami jatun bendicioncunata chasquinguichij’ ninmi (Lucas 6:35). Shinashpaca shujtajcuna mana agradicijpipish mana llaquirinachu canchij. Ashtahuanpish shujtajcunata cushilla ayudashcamanta Jehová Dios ñucanchijta bendicianatami yuyarina canchij (Proverbios 19:17; 2 Corintios 9:7). w24.09 págs. 29, 30 párrs. 14-16