Noviembre

Ancianocunaca congregacionmanta llujshichishcacunata Jehová Dios shina cꞌuyaihuan tratangapajmi esforzarincuna. Por ejemplo, ¿israelitacuna paimanta caruyajpica Jehová Diosca imatataj rurarca? Paica israelitacunaraj arrepintirishpa paipajman tigrarichunca mana shuyarcachu. Ashtahuanpish paicuna manaraj arrepintirijpimi Jehová Diosca paicunapajman cꞌuchuyarca. Oseaspaj huarmi juchata ruracujpipish Jehová Diosca paita perdonachunmi Oseastaca mandarca. Chashnami Jehová Diosca cꞌuyaj, llaquij cashcata ricuchirca (Oseas 3:1; Malaquías 3:7). Ancianocunapish paicunapaj juchacunamanta mana arrepintirijcuna Jehová Diospajman tigrachunmi munancuna. Chaimantami congregacionmanta llujshichishcacuna Diospaj puebloman cutin tigrachunca mana deganamanta jarcaicunata churancuna. Jesusca: ‘Chingarishca churi yayapaj huasiman tigrajpica yayaca paita tupanamanmi callpashpa rirca. Ña tupashpaca cꞌuyaihuanmi paitaca ugllashpa mucharca’ nircami (Lucas 15:20). Yayaca paipaj churita chashna chasquingapajca pai perdonta mañachunca mana shuyarcachu. Ashtahuanpish cꞌuyaj yaya cashcamantami pairaj paipajman cꞌuchuyarca. w24.08 pág. 28 párrs. 7, 8

Cai punllapaj versopi nishca shinaca ñucanchijcuna alli yachaita cuchun Diosta mañajpica paica “mana mitsashpa, mana rimashpami” alli yachaita cun. Ashtahuanpish Yayitu Diosca alli yachaita mashcashpa catichunmi ñucanchijtaca animan (Proverbios 2:​1-6). Ñucanchijpish Jehová Dios shinami ñucanchij imalla yachashcataca shujtajcunaman yachachina canchij (Salmo 32:8). ¿Ñucanchij imalla yachashcataca ima shinataj shujtajcunaman yachachi tucunchij? Por ejemplo, mushuj publicadorcunamanmi ima shina huillanata yachachi tucunchij. Anciano huauquicunapish pacienciahuanmi siervo ministerialcunaman, shujtaj huauquicunamanpish congregacionpi ima shina ayudanata yachachina can. Construccionmanta yachajcunapish shujtajcunamanmi Tandanacuna Huasicunata ima shina shayachinata, ima shina cuidanata yachachina can. w24.09 págs. 28, 29 párrs. 11, 12

Anciano cangapajca ‘mana juchachipajmi’ cana cangui. ¿Chaica imatataj nisha nin? Can alli comportarijta ricushpaca huauqui panicunaca imatapish mana yangamanta juchachingacunachu (1 Timoteo 3:2). Shinallataj “canllapi caj gentecunapurapica alli nishcami” cana cangui. Maipica gentecunaca cambaj crishcacunamantami yangamanta juchachingacuna. Pero can alli causacujta ricushpa, can alli comportarijta ricushpami imata mana juchachi tucungacuna (Daniel 6:​4, 5). Chaimanta: “¿Congregación ucupipish, canllapi caj gentecunapaj ñaupajpipish alli comportarij cashcatachu ricuchicuni?” nishpa tapuri. ‘Allita ruranata cꞌuyajmi’ cana cangui. ¿Chaitaca ima shinataj ricuchi tucungui? Shujtajcunapaj alli ruraicunata ricushpami felicitana cangui (Tito 1:8). Pi imata mana mañajpipish shujtajcunapajmi allita rurana cangui. ¿Imamantataj “allita ruranata cꞌuyaj” cana cangui? Chashnami huauqui panicunata ayudacushpa, cambaj asignacioncunata pajtachicushpaca cushilla sintiringui (1 Pedro 5:​1-3). Shujtajcunata ayudangapaj achca sacrificiocunata rurana cashpapish cushillami sintiringui (Hechos 20:35). w24.11 págs. 20, 21 párrs. 3-5

Siervo ministerialcunaca congregación ucupica sinchitami trabajancuna. Apóstol Pabloca paicunataca achcatami valorarca. Paica Filipos llajtapi causaj Jesusta catijcunaman quillcashpaca ancianocunatapish, siervo ministerialcunatapishmi saludarca (Filipenses 1:1). Joven huauquicunapish, mayor huauquicunapish siervo ministerial shina sirvishpaca cushillami sintirincuna. Por ejemplo, huauqui Devantaca 18 huatacunata charijpimi siervo ministerial cachun nombrarcacuna. Cutin huauqui Luistaca 50 huatacuna yallita charijpimi siervo ministerial cachun nombrarcacuna. Huauqui Luisca: “Huauqui panicunaca ñucata cꞌuyashcatami ricuchishcacuna. Cunanca ñucapish paicunata sirvishpa cꞌuyaita ricuchishcamantami cushilla sintirini” nircami. Achca siervo ministerialcunami chashnallataj sintirincuna. Huauquicuna, ¿ña bautizarishca cashpaca siervo ministerial casha ninguichijchu? w24.11 pág. 14 párrs. 1-3

Mandaj Ezequiasca 39 huatacunata charishpaca ungushpami yallitaj ancha tucurca. Jehová Diosca Isaiasta cachashpami chai ungüihuan huañuna cashcata Ezequiasman huillarca (2 Reyes 20:1). Chaita uyashpaca Ezequiasca mana jahuallatami huacai callarirca. Chaimi Yaya Dios paita ayudachun rogarishpa mañarca. Ezequiasca huacashpa, rogarishpa Yayitu Diosta mañajpica paica uyarcami. Chaimi achcata llaquirirca. Shinallataj Ezequiasman caita nichunmi Isaiasta cacharca: “Can mañashcataca uyashcanimi, cambaj huiquitapish ricushcanimi. Chaimantami cantaca sanoyachigrini” nircami. Shinashpaca Yayitu Diosca ashtahuan huatacunata causachunmi Ezequiasta saquirca. Asiriocunapish Jerusalenta ama llaquichichunmi ayudarca. Chashnami Yayitu Diosca cꞌuyaj, llaquij cashcata ricuchirca (2 Reyes 20:​4-6). ¿Millai ungüita charishpaca imatataj rurana canchij? Huacashpami Yayitu Diosman ima shina sintirishcata huillana canchij. Bibliapi nishca shinaca Jehová Diosca yallitaj cꞌuyaj, tucuipi cushichij Yayami can. Paica “tucui ñucanchij llaquicunapimi cushichin” (2 Corintios 1:​3, 4). w24.12 pág. 24 párrs. 15-17

Huañushcacuna causarijpi paicunata cutin chasquinaca alajami canga. Shinallataj Jehová Diosmanta, pai imalla rurashcacunamanta yachashpami catishun (Salmo 104:24; Isaías 11:9). Paraisopica ima juchataca ña mana rurashunchu. Chaimantami Jehová Dios ñucanchijta perdonachunca ña mana mañashun. Paraisopi causana oportunidadtaca mana chingachisha ninchijchu. Chaimantami juchata rurashpa ashacamalla cushicunataca mana agllana canchij (Hebreos 11:25). Jehová Diosta sirvingapajca huaquin cosascunatami huashaman saquishcanchij. Pero Paraisopi causacujpica Jehová Dios tucui imalla nishcacunami pajtaringa. Chaitaca manataj cungarinachu canchij. Jehová Dios ñucanchijcunamanta huañuchun paipaj Churita cushcamantami tucui chai bendicioncunata chasquishun. w25.01 pág. 29 párr. 12

Hebreos libropica Jehovapi sinchi feta charijcunamantami yachachin. Por ejemplo, Moisés sinchi feta charishcatami nin (Hebreos 3:​2-5; 11:​23-25). Jehová Diosca israelitacuna chaquishca pambapi ama huañuchunca micunatapish, yacutapishmi curca (Éxodo 15:​22-25; Salmo 78:​23-25). Egiptomanta shuj huata llujshishca qꞌuipaca Jehová Diosca israelitacunamanca aichatami cusha nirca. Pero Moisesca sinchi feta charishpapish Dios nishcata crinaca sinchimi carca. Paica: “¿Cai achca millón gentecunaman carangapajca maipitaj aichaca tiyanga?” nishpami tapurirca. Chaimi Jehová Diosca paitaca: “¿Manachu Jehová Diospaj maquica chaita rurai tucunga? ¿Manachu ñuca nishcata pajtachi tucunata cringui?” nishpa tapurca (Números 11:​21-23). Jehová Diosca paipaj poderhuanmi tucuita rurai tucun. w25.03 pág. 26 párrs. 1, 2

Jesusca: “Ñuca tigramuna punllacunaca Noepaj punllacuna shinami canga” nircami. Pero chaita nishpaca ¿Jesusca pai tigramuna punllacuna Noepaj punllacuna shina tucuipi chashnallataj canatachu nisha nirca? Mana. Bibliaca chaitaca mana yachachinchu. Por ejemplo, Jesusca ‘Jehová Diosca arcapaj pungucunata huichcashpaca shamuj punllacunapi ima tucunatami ricuchirca’ mana nircachu (Mateo 24:​37-39). Jehová Dios ima tucugrishcata huillajpica Noeca arcata rurashpami sinchi feta charishcata ricuchirca (Hebreos 11:7; 1 Pedro 3:20). Chashna layallatajmi Diospaj Gobiernomanta alli huillaicunata uyashpaca gentecunaca paicunapaj ruraicunahuan feta charishcata ricuchina can (Hechos 3:​17-20). Pedroca: “Noeca cashcata ruranamanta huillajmi carca” nircami. Cunan punllacunapica ñucanchijpish muyundij Allpapi tucui gentecunaman huillangapajmi esforzarinchij. Pero mashnata esforzarishpapish Armagedón shamungacama tucui gentecunamanca mana huillai tucushunchu. w24.05 págs. 9, 10 párrs. 3-5

Jehová Diospaj amigocunata cꞌuyaihuan, respetohuanmi tratana canchij (Romanos 12:10). ¿Chaitaca ima shinataj rurai tucunchij? Salmo 15:​4-pi nishca shinaca Jehová Diospaj carpa huasipi cajcunaca ‘imata ari nishcata paicunapaj mana alli cajpipish chaitatajmi pajtachina can’. Ñucanchij ari nishcacunata mana pajtachishpaca shujtajcunatami llaquichishun (Mateo 5:37). Por ejemplo, cusa huarmicunaca cazaracushpa paicuna ari nishcatami pajtachina can. Shinallataj Jehová Diosca yaya mamacuna paicunapaj huahuacunaman ima nishcata pajtachichunmi munan. Caipi ricushca shinaca Jehová Diosta, ñucanchij projimotapish cꞌuyashcamantami ñucanchij nishcacunata pajtachingapaj esforzarina canchij. Shinallataj Jehová Diospaj amigocunata alli ningapajca puzachijcuna, cujcunami cana canchij (Romanos 12:13). Huauqui panicunata ñucanchijhuan pasachun invitashpaca paicunapaj alli amigocunami tucushun. Jehová Diospajmanpish ashtahuanmi cꞌuchuyashun. Ashtahuancarin Jehová Dios shina cꞌuyajcuna, puzachijcuna cashcatami ricuchishun. w24.06 pág. 12 párrs. 15, 16

Jehová Diosca ima verdad cashcataca humildecunamanmi yachachin (Mateo 11:25). Diosmanta yachai callarishpaca mana jatun tucushpami shujtajcuna ñucanchijta ayudachun saquircanchij (Hechos 8:​30, 31). Shinapish mana cuidadota charishpaca jatunmi tucushun. Pero jatun tucushpaca ñucanchij yuyashcacuna Bibliapi nishcacunahuan, Diospaj organización cushca instruccioncunahuan igual cashcatami yuyai callarishun. ¿Humildecuna cashpa catingapajca imatataj rurana canchij? Jehová Diospaj ñaupajpi uchillacuna shina ricurishcatami yuyarina canchij (Salmo 8:​3, 4). Shinallataj Jehová Diostami humilde shunguhuan paimanta yachashpa catingapaj ayudachun mañana canchij. Chaita rurajpimi Jehová Diosca ñucanchij yuyaicuna paipaj yuyaicunata yalli cashcata ama yuyachun ayudanga. Shinallataj Bibliata liyicushpaca Jehová Dios imamanta mana jatun tucushca cachun munashcata, ashtahuanpish imamanta humildecuna cachun munashcatami ricuna canchij. Jatun asignacioncunata chasquishpapish ama jatun tucungapajmi esforzarishpa catina canchij. w24.07 pág. 10 párrs. 8, 9

1919 huatapica Jesusca predicacionta organizachun, huauqui panicunaman yachachichunca huaquin ungidocunatami agllarca (Lucas 12:42). Jehová Dios Cuerpo Gobernante huauquicuna cai trabajota alli pajtachichun ayudacushcataca allimi yachanchij (Isaías 65:​13, 14). Mana organizados cashpaca Jesús mingashca obrataca mana pajtachi tucunchijmanchu (Mateo 28:​19, 20). Por ejemplo, cada congregacionmi huillangapajca territoriota charin. Pero cada congregación huillangapaj territoriocunata mana charishpaca maipish cachunmi huillanchijman. Tal vez shujtaj congregacioncuna huillashca lugarcunallapitajmi cada rato huillacunchijman. Pero shujtaj ladocunapica mana nunca huillachinmanchu. ¿Congregacioncunapi orden tiyashcamantaca shujtaj beneficiocunapish tiyanchu? Ima shinami Jesusca cai Allpapi cashpaca paipaj discipulocuna ordenpi huillachun ayudarca, chashnallatajmi cunan punllacunapica Diospaj pueblo ordenpi huillachun ayudacun. w24.04 págs. 8, 9 párrs. 2-4

Adán Evapaj punta churi Cainca paicuna layallatajmi juchayuj carca. Bibliapi nishca shinaca paipaj ruraicunaca millaimi carca (1 Juan 3:12). Chaimantachari Caín shuj ofrendata cujpica Jehová Diosca mana chasquirca. Jehová Dios paipaj ofrendata mana chasquijpica Cainca paipaj yuyaita cambianapaj randica achcata pꞌiñarishpami yallitaj llaquilla sintirirca (Génesis 4:​3-7). Chaita ricushpaca Yayitu Diosca cꞌuyaihuanmi Caintaca: ‘Allita rurajpica cantaca bendiciashami. Pero pꞌiñarinata mana saquishpaca mana alli ruraicunapimi urmangui’ nirca. Shinapish Cainca Yaya Diostaca mana uyasha nircachu. Paipaj juchacunamanta arrepintirichun Jehová Dios paita ayudachunpish mana saquircachu. Pero ¿Caín paita mana uyajta ricushpaca Jehová Diosca juchata rurajcunata ayudanatachu saquirca? Mana. w24.08 pág. 10 párr. 8

Moisesca israelitacunamanca shamuj punllacunapi sumaj causaita charigrishcatami yuyachirca. Paicunaca Jehová Dios bendiciajpimi pai cusha nishca allpapica achca tiempota causana carcacuna. Chai allpamanta parlashpaca Moisesca: ‘Cancuna manapish shayachishca jatun alli pueblocunatami japinguichij. Huasicunapish cancuna mana jundachishca alli charinacunahuan jundatami japinguichij. Tanquecunatapish manapish cancuna allashpa rurashcacunatami japinguichij. Olivos yuracunatapish, uva chagracunatapishmi japinguichij’ nircami (Deuteronomio 6:​10, 11). Moisesca israelitacunataca chai sumaj allpapi causashpa catingapajca Jehová Diospaj mandamientocunata cazuchunmi mandarca. Paicunataca: “Causaitami agllana canguichij” nircami. Chaipajca Jehová Diosta uyashpa paimanta ama caruyachunmi animarca (Deuteronomio 30:20). Chashnapish israelitacunaca Jehová Diostaca mana cazurcacunachu. Chaimantami tiempohuanca Diosca asiriocuna, babiloniocuna israelitacunata paicunapaj allpamanta prezuta shina apachun saquirca (2 Reyes 17:​6-8, 13, 14; 2 Crónicas 36:​15-17, 20). w24.11 pág. 9 párrs. 5, 6

Maijan gentecunaca: “Quishpiringapajca Jesuspi crina, pai quishpichij cashcata crinallami minishtirin” nishpami yuyancuna (Juan 6:29). Pero Jesusta catijcunapish maijancunaca Jesuspi crishpapish qꞌuipaca paitami saquishpa rircacuna. ¿Paicunaca imamantataj chaitaca rurarcacuna? ¿Jesús carashca gentecunaca la mayoriaca imamantataj paita catisha nircacuna? Paicunaca milagrocunata rurashpa paicunata jambichun, carachun, paicuna munashcallata yachachichun munashcamantami paitaca catircacuna. Pero Jesusca paita alli catijcuna ima shina cana cashcatami nirca. Paica cai Allpamanca gentecuna minishtishcallata cungapajca mana shamushcachu carca. Ashtahuanpish paita alli catijcunaca tucui pai yachachishcacunatami alli chasquina carcacuna. Shinallataj tucui pai mandashcacunatami cazuna carcacuna (Juan 5:40). w24.12 pág. 12 párrs. 12, 13

¿Jehová Diosta sirvij cusacunaca paicunapaj huarmicunata ama maltratashpa catingapajca imatataj rurana can? Jesuspaj ejemplotami catina can. Jesusca paita catijcunataca siempremi cꞌuyaihuan trataj carca. Cusacunaca chaitami rurana can. Cunanca Jesús paita catijcunahuan ima shina parlanacuj cashcata, ima shina trataj cashcata ricushun. Jesusca paita catijcunataca cꞌuyaihuan, respetohuanmi tratarca. Jesusca paita catijcunataca ñucataca cazunatajmi canguichij nishpaca mana manchachircachu. Ashtahuanpish mana jatun tucushpami paicunataca ayudarca (Juan 13:​12-17). Shinallataj Jesusca paita catijcunataca: “Ñucamanta yachaichij. Ñucaca mana utca pꞌiñarij, manso shungumi cani. Ñucami cancunataca samachisha” nircami (Mateo 11:​28-30). ¿Manso shungu cajcunaca manchaita charishcamantachu chashna cancuna? Mana. Ashtahuanpish sinchicuna cashcamantami paicunaca jarcarinata yachancuna, alli yuyashpami imatapish rurancuna. w25.01 pág. 10 párrs. 10, 11

Cai pachapaj ruraicuna tucurimucushcamantami minishtirishca cosascunata charinaca mana jahualla canga. Mana alli gobiernocuna tiyashcamanta, guerracunamanta, terremotocunamanta, jatun acapanacunamanta, millai ungüicuna tiyashcamantapish trabajo illaj, maipi causana illajchari saquirishun. Pero ¿cai llaquicunata apashpapish Jehovapi confiashcataca ima shinataj ricuchishun? Shina laya llaquicunata apacushpaca ima shina sintirishcatami Jehová Diosmanca tucuita parlana canchij. Shinallataj alli decisioncunata agllangapaj, ama yalli preocuparingapaj, charishcacunallahuan cushicungapajpishmi alli yuyaita cuchun Jehová Diosta mañana canchij (Lucas 12:​29-31; 1 Timoteo 6:​7, 8). Ashtahuancarin imata ruranata yachangapajpish ñucanchij publicacioncunapimi alli consejocunata mashcana canchij. Achcacunataca jw.org paginapi tiyaj videocuna, yachaicunami ayudashca. w25.03 págs. 28, 29 párrs. 10, 11

Jehová Diosca mana judío caj gentecuna paita adorai tucuchunmi decidirca. Chaipimi apóstol Pedrotaca mana judío caj Cornelio shuti runaman huillachun nirca. Cornelioca Diosta sirvi callarij mana judío cajcunapuramantami carca. Shinapish judiocunaca mana judiocunahuanca mana alli apanacujcunachu carca. Chaimantami Pedropajpish Dios nishcata pajtachinaca sinchi cashcanga. Pero Jehovapaj munai maijan cashcata yachashpami paipaj yuyaita cambiarca. Cornelio paita visitanaman richun mañajpica Pedroca mana dudashpami paipaj huasiman rishpa Corneliomanpish, paipaj familiamanpish Diosmanta yachachirca. Qꞌuipacarin paicuna bautizarircacuna (Hechos 10:29; 10:​21-23, 34, 35, 44-48). Huaquin huatacuna qꞌuipaca apóstol Pedroca cashna nishpami consejarca: “Tucuicuna shuj shinalla yuyaichij” nircami (1 Pedro 3:8). Tucui testigo de Jehovacunaca shuj shinalla yuyangapajca Jehová Dios shinami yuyana canchij. Chaipajca Diospaj Shimitami yachana canchij. w25.03 págs. 9, 10 párrs. 7, 8

Gentecunaca Jehová Diosmanta ashtahuan ashtahuan caruyashcamantami pai shina yuyanata saquishcacuna (Proverbios 17:15). Chaimantami ima alli cashcata, ima mana alli cashcata cuentata cungapaj esforzarishpa catina canchij. Chashnami Diospaj enemigocunaca paimantaca mana caruyachi tucungacuna. Apóstol Pabloca hebreo huauqui panicunataca sinchiyarishpa ñaupajman catichunmi animarca. Ñucanchijpish chaitami rurana canchij. Chaipajca Diosmanta ashtahuan yachangapaj, pai yuyashca shina yuyangapajmi esforzarishpa catina canchij. Jehová Diosman mingarishpa, bautizarishca qꞌuipapish chaitami rurana canchij. Tucuicunami Jehová Diosta asha huatacunata o achca huatacunata sirvicushpapish punllanta Bibliata liyina canchij (Salmo 1:2). Chashnami apóstol Pablo nishca shina sinchi feta charishun (Hebreos 11:​1, 6). w24.09 pág. 10 párrs. 7, 8

Jehová Dios causaj cashcata yuyarishpaca paita tucuipi cazunaca jahuallami canga. Josepi yuyashun. Paica Jehová Dios causaj Dios cashcatami seguro carca. Chaimantami paita juchapi urmachisha nijpipish paica mana urmarca (Génesis 39:9). Ñucanchijpish Jehová Dios causaj Dios cashcata seguros cangapajca paita mañangapaj, paipaj Shimita liyingapajmi tiempota surcuna canchij. Chashnami paimanca ashtahuan cꞌuchuyashpa catishun. José shina Jehová Diospaj alli amigocuna cashpaca tentacioncuna ricurijpipish chaicunapica mana urmashunchu. Jehová Dios causaj cashcata cungarijcunaca ratitomi paimanta caruyancuna. Israelitacunaca chaquishca pambapi puricushpaca chaitami rurarcacuna. Paicunaca Jehová Dios tiyashcatami yacharcacuna. Shinapish paicuna imalla minishtishcata Jehová Dios cui tucushcatami dudai callarircacuna (Éxodo 17:​2, 7). Chai qꞌuipaca paicunaca Jehová Diospaj contrami tucurcacuna. Ñucanchijcunaca paicuna shinaca mana cashun ninchijchu (Hebreos 3:12). w24.06 pág. 24 párrs. 14, 15

Tucuri punllacunapi causacushcamantami achca llaquicunahuan chꞌimbapuracunchij. Chaimantami huaquinpica huacashun. Yayitu Diosca ñucanchijcuna huacajpica ima shina sintirishcata allimi intindin. Jatun llaquicunahuan chꞌimbapuracushpaca ima shina sintirishcataca tucuita paiman huillashunchij. Ñucanchijta cꞌuyaj huauqui panicunamantapish ama caruyashunchij. Ashtahuanpish animota japingapajca Bibliapi nishcacunata yuyarishunchij. Tucuringacama ahuantashpaca sumaj bendicioncunatami chasquishun. Ñallami Yayitu Diosca tucui ñucanchij huiquicunata pꞌichanga (Apocalipsis 21:4). Paraisopica yallitaj cushilla cashcallamantami huacashun. w24.12 pág. 20 párr. 3; pág. 25 párr. 19

Jehová Diosca paimanta huillachunmi munan. Chaimantami testigo de Jehovacuna canchij (Isaías 43:​10, 11). Pero ¿mana manchashpa huillachunca Jehová Diosca ima shinataj ayudan? Chuscu yuyaicunata ricushun. Puntapica, alli huillaicunata huillacujpica Jesusmi ñucanchijtaca ayudan (Mateo 28:​18-20). Ishquipica, Jehová Diosca ñucanchijta ayudachunca angelcunatami churashca (Apocalipsis 14:6). Quimsapica, Jehová Diosca espíritu santota cushpami imallata yachashcata yuyarichun ayudan (Juan 14:​25, 26). Y chuscupica, Jehová Diosca ñucanchijta ayudachunca huauqui panicunatami cushca. Jehová Diospaj ayudahuan, huauqui panicunapaj ayudahuanmi mana manchashpa huillai tucushun. ¿Huasin huasin huillacushpa casi pihuan mana parlashcamantachu desanimaringui? Cashna sintirishpaca “¿gentecunaca maipishi canga?” nishpa yuyai. ¿Paicunaca trabajopichu canga? ¿Feriamanchu rishcanga? (Hechos 16:13). Chashna cajpica chai gentecunaman ima shina huillanata yuyai (Efesios 5:​15, 16). w24.04 pág. 17 párrs. 10, 11

Cusacuna, anciano cangapaj esforzaricushpaca cancunapaj familia shujtajcunapaj ñaupajpi alli ejemplo cachunmi ayudana canguichij. ‘Familiata alli pushajcunaca’ cꞌuyaj, responsable cashcatami ricuchina canguichij. Familiahuan tandalla Diosta adoranataca mana saquinachu canguichij. Paicuna tandanacuicunaman richun, huillanaman llujshichunmi ayudana canguichij. Anciano casha nij yayacuna, “cazuj huahuacunata, alli comportarij huahuacunatami” charina canguichij (1 Timoteo 3:4). Paicunataca cꞌuyaihuanmi yachachina canguichij. Huahuacunaca pugllanata, asinatami munancuna. Chashna cajpipish alli cazuj cachun, respetuoso cachun, alli comportarichunmi yachachina canguichij. Shinallataj Jehová Dioshuan alli amigo tucuchun, Bibliapi yachachishca shina causachun, Jehová Diosman mingarishpa bautizarichunpishmi ayudana canguichij. w24.11 pág. 22 párrs. 10, 11

Predicangapaj esforzarishpaca Jehová Dios ñucanchijta tucuipi ayudacushcatami cuentata cushun. Chashnami paipica ashtahuan confiashun (1 Corintios 3:9). Shinallataj Conmemoración punllacunapaj liyina versocunatapishmi liyina canchij. Liyina versocunaca Diospaj Shimita punllanta yachashunchij folletopi, Tandanacuipi yachana pꞌangapimi ricurin. Munashpaca chai versocunamantami ashtahuan investigai tucunchij. Jehová Diosca can rurai valishcataca shujtajcunapaj ruraicunahuanca mana comparanchu. Ashtahuanpish paipaj Churita cushcamanta shungupi can agradecido cashcata ricushpaca paica cushillami sintirin (1 Samuel 16:7; Marcos 12:​41-44). Jesús huañushcamantami Jehová Diosca ñucanchij juchacunata perdonai tucun. Shinallataj paipaj alli amigocunami cai tucunchij. Ashtahuancarin shamuj punllacunapi huiñai huiñaita causana oportunidadtami charishun. Jehová Diosca cꞌuyaj cashcamantami chai sumaj bendicioncunata ñucanchijman cushca. Chaimanta paita agradicinataca ama saquishunchij (1 Juan 4:19). Jesustapish ñucanchijta cꞌuyashcamanta paipaj causaita cushcamantaca agradicishpa catishunchij. w25.01 pág. 31 párrs. 16-18

Jehová Diosta sirvinata agllashcamanta llaquilla sintirishpaca, ¿imatataj rurana cangui? Salmo 73-ta quillcaj runapimi yuyana cangui. Paica Diosta mana sirvijcuna ungüicuna illaj, llaquicuna illaj, tranquilo causacushcatami ricurca. Shinallataj chai gentecuna achca cullquita charishcatami ricurca (Salmo 73:​3-5, 12). Chaita ricushpami paica: ‘Jehová Diosta sirvingapaj tucui ñuca imalla rurashcaca imapaj mana sirvinchu’ nishpa yuyarca. Salmistaca punllantami chashna llaquilla sintirij carca (Salmo 73:​13, 14). ¿Pero ama chashna sintirishpa catingapajca imatataj rurarca? Salmota quillcaj runaca Jehová Diospaj huasimanmi rirca (Salmo 73:​16-18). Chaipi cashpami paica tranquilo yuyai tucurca. Chashnami maijan gentecuna cushilla laya causashpapish shamuj punllacunapi llaquicunata charinata cuentata curca. Shinallataj paica Jehová Diosta sirvina tucuimanta yalli valishca cashcata intindishpami tranquilo sintirirca. Chaimantami Jehová Diostaca tucui shunguhuan cutin sirvisha nirca (Salmo 73:​23-28). w24.10 pág. 27 párrs. 11, 12

Jehová Diosca paipaj testigocuna cachunmi ñucanchijcunataca agllashca (Isaías 43:​10-12). Huaquin huatacuna huashamanca Cuerpo Gobernante huauquicunaca: “Testigo de Jehovacuna nishca shutita apanaca ima bendiciontapish yalli valishcami can” nishpami shuj cartata cacharcacuna. Cai ejemplopi yuyashun. Ñucanchijta yangamanta juchachishpa juicioman apajpica ñucanchijcuna ima mana allita mana rurashcata testificachunca shuj testigotami minishtinchijman. Pero ñucanchij testigo cachunca ¿pitataj agllanchijman? Ñucanchijcuna alli rijsishca amigotami agllanchijman. Shinallataj ñucanchijmanta imalla nishcacuna cierto cashcata tucuicuna crichunca allita rurashpa causaj testigotami agllanchijman ¿nachu? ¿Caimantaca imatataj yachanchij? Jehová Diosca ñucanchijta alli rijsishcamantami tucui shunguhuan ñucanchijpi confian. Chaimantami pailla alli Dios cashcata huillachunca ñucanchijta agllashca. Testigo de Jehovacuna cashcamantaca ñucanchijcunaca cushillami sintirinchij. Ashtahuanpish Jehová Diosmanta Diablo nishca llullacuna mana cierto cashcatami gentecunaman yachachinchij. Chashnami Diospaj shutita rijsichinchij. Ashtahuantajca testigo de Jehovacuna cashcatami ricuchinchij (Romanos 10:​13-15). w24.05 pág. 18 párr. 13

Jesusca shujtajcunata sirvishpami yallitaj cushilla sintirij carca. Jesusca Diosmanta yachachishpami gentecunata ayudarca. Shinapish shujtaj ruraicunata rurashpapishmi ayudarca. Jesusca milagrocunata rurashpami gentecunaman cararca. Shinallataj paita catijcuna chai micunata gentecunaman carachunpishmi mañarca (Marcos 6:41). Chashna rurashpami Jesusca paita catijcunamanca shujtajcunata sirvina importante cashcata yachachirca. Gentecunaca ‘huijsa pajtata micushpa cushillami sintirircacuna’ (Marcos 6:42). Chaimantami Jesusta catijcunaca Jesushuan igual trabajashcamanta cushilla sintirircacuna. Jesusca mana chai cutinllachu gentecunamanta sustarishcata ricuchirca. Ashtahuanpish paipaj tucui causaipimi gentecunataca sirvirca (Mateo 4:23). Jesusca shujtajcunaman yachachishpa, paicuna imalla minishtishcacunata cushpaca cushillami sintirirca. w24.11 pág. 16 párrs. 10, 11

Cai “tucuri punllacunapica” llaquicunaca ashtahuan ashtahuanmi mirashpa catimun. Chaimantami caishuj chaishuj ayudanacungapajca ashtahuan oportunidadcunata charishun. Shinallataj huauqui panicunapaj miticuna rumi shina cangapajca paicunatami animana canchij. Jehová Diosmanta ama caruyachunpishmi ayudana canchij. Por ejemplo, Salón del Reinoman shamujcunataca allimi chasquina canchij. Chashnami tucuicuna congregacionpi tranquilo sintirichun, cꞌuyaita ricuchichun ayudashun. Huauqui panicuna congregacionpi tucuicuna cꞌuyaita ricuchinacujta ricushpaca tranquilosmi sintirishun. Huauqui panicuna jatun llaquicunahuan chꞌimbapuracujpimi ancianocunaca miticuna rumi shina cashcata ricuchina can. Por ejemplo, terremotocuna, acapanacuna tiyajpi o shuj emergenciamanta hospitalman rina cajpica ancianocunaca ratomi huauqui panicunata ayudana can. Shinallataj Bibliapi nishcacunata yuyachishpami tranquilo sintirichun ayudai tucuncuna. Shuj anciano cꞌuyaj, intindij, uyaj cajpica huauqui panicunaca confianzahuanmi paipaj ayudata mashcangacuna. Shinallataj anciano huauquicuna cꞌuyaita ricuchijpimi huauqui panicunaca valishca cashcata yachangacuna. Ashtahuanpish ancianocuna Bibliahuan ima consejota cujpipish chaitaca cushillami pajtachingacuna (1 Tesalonicenses 2:​7, 8, 11). w24.06 págs. 29, 30 párrs. 12, 13

Jehová Diosca tucui poderta charishpapish paipaj Churi llaquinaita huañuchunca mana jarcarcachu. Pero ¿paipaj Churi huañujta ricushpaca ima shinataj sintirirca? Caipi yuyashun. Ñucanchijcunaca Jehová Diosman rijchaj rurashcami canchij. Chaimantami shujtajcuna sufricujta ricushpaca achcata llaquirinchij. Bibliapi nishca shinaca huaquin gentecuna Jehová Dios mandashcata mana cazujpica paica achcatami llaquirirca (Salmo 78:​40, 41). ¿Jehová Diosca paipaj Churita achcata llaquichicujta, huañuchicujta ricushpaca ima shinataj sintirirca? Paica achcatami llaquirirca. Ñucanchij familiacuna, amigocunaca ñucanchijtaca achcatami cꞌuyancuna. Pero Jehová Diosca paicunatapish yallimi ñucanchijtaca cꞌuyan (Romanos 8:​32, 38, 39). Shinallataj ñucanchijca achcatami cꞌuyarinchij. Pero Yayitu Jehová Diosca chaitapish yallimi ñucanchijtaca cꞌuyan. Caipi yuyai. ¿Canca huiñai huiñaita causanata munanguichu? Jehová Diosca can huiñai huiñaita causachunca ashtahuanmi munan. Shinallataj ¿cambaj juchacuna perdonashca cachunchu munangui? Yayitu Jehová Diosca chaitaca ashtahuanmi munan. Paica tucuipi paita cazuchun, paipi feta charichunmi munan. Chaita rurashpami paipaj Churita cushcamanta agradicishcata ricuchishun. Caipi ricushca shinaca Jehová Diosca paipaj Churi ñucanchijmanta huañuchun cushpaca ñucanchijta achcata cꞌuyashcatami ricuchirca (Eclesiastés 3:11). w25.01 págs. 22, 23 párrs. 8, 9

Maipica ñucanchij ricushcallata, uyashcallata, yuyashcallata catishpami imatapish decidinchij. Chashna decidijpica ñucanchij ricushcacunapi, uyashcacunapi, yuyashcacunapimi pandarinchij. Ashtahuanpish Diospaj munaitapish, paipaj consejocunatapish mana catishunchu (Eclesiastés 11:9; Mateo 24:​37-39). Dios ñucanchijta pushachun saquishpaca pai munashca shinami imatapish decidishun. Diospaj consejocunata catishpaca cunan punllacunapipish tranquilo, cushillami causashun. Shamuj punllacunapicarin huiñai causaitami charishun (Salmo 16:​8, 9; Isaías 48:​17, 18; 2 Corintios 4:18). Cashna nishpa tapuri: “¿Ñuca imallata ricushcallata, yuyashcallata catishpachu decidini? o ¿Jehová Diospi, pai mandashcacunapi confiashpachu imatapish decidini?”. w25.03 pág. 21 párrs. 3, 4

Ñucanchij huauqui panicunahuan tandalla Jehová Diosta cushilla sirvicushcamantami paraisopi ña causacushca shina sintirinchij. Pero chashna causashpa catingapaj, shinallataj shujtaj gentecunapish Jehová Diospaj puebloman yaicuchunca ¿imatataj rurana canchij? Jehová Diospaj ejemplotami catina canchij. Paica paita sirvichunca pitapish mana obliganchu. Ashtahuanpish cꞌuyaihuanmi paita sirvisha nijcunataca paipaj puebloman pushamun (Jeremías 31:3; Juan 6:44). Alli shungu gentecunaca Jehová Dios yallitaj llaquij, cꞌuyaj cashcata cuentata cushpaca paitami sirvisha ningacuna. Ñucanchijpish cꞌuyajcuna, llaquijcuna cangapajca ¿imatataj rurana canchij? Huauqui panicunaman shungumanta cꞌuyaita ricuchijpimi shujtaj gentecunapish Diospaj puebloman yaicusha ningacuna. Corintopi congregacionman punta cutin rijcunaca huauqui panicuna paicunapura cꞌuyaita ricuchijcuna cashcatami ricurcacuna. Chaimi paicunaca: “Diosca cancunahuantajmari cashca” nircacuna (1 Corintios 14:​24, 25; Zacarías 8:23). Ñucanchijpish cai punllapaj versopaj consejota cazujpica shujtaj gentecunapish Diosmantami yachanata munangacuna. w24.04 págs. 23, 24 párrs. 16, 17