¿Angelcunaca ñucanchijta ayudai tucunchu?

Kennethpish Filomenapish Curazao pueblopimi causancuna. Paicunaca shuj domingo chishitami shuj cusandij huarmindij Bibliamanta yachacujcunata visitanaman rircacuna.

Kennethca: “Ñucanchij paicunapaj huasiman chayashpaca pungupish huichcashca, carropish mana huasipi cashcatami ricurcanchij. Chaimantami Bibliamanta yachacuj huarmita telefonopi cayarcani” ninmi.

Chai huarmi telefonopi cutichishpaca ñuca cusaca trabajacunmi nircami. Shinapish Kennethpish Filomenapish paipaj huasi chꞌimba ladopi cajta ricushpaca punguta pascashpami yaicuchirca.

Paicunaca chai huarmita ricushpaca huacacushcatami cuentata curcacuna. Yachai callaringapaj Kenneth mañajpica chai huarmica cutin huacai callarirca. Chaimantami paicunaca cꞌuyaihuan imamantataj huacacungui nishpa tapurcacuna.

Chai huarmica: “Ñucallataj huañuringapajmi ñuca cusaman shuj papelpi cayacama nishpa quillcacurcani. Kenneth cayajpimi huañunamanta quishpirircani. Ñucaca depresión ungüitami charini” nircami. Chaimantami paicunaca chai huarmita cushichingapaj Bibliapaj huaquin versocunata leyishpa animarcacuna.

Kennethca: “Chai llaquilla huarmita ayudachun Jehová Diosa ayudashcamantami paita pagui nircanchij. Diosmi paipaj angelcunahuan o paipaj espíritu santohuan telefonopi cayachun ñucanchijta animarca” ninmi.

¿Kennethtapish Filomenatapish Dios paipaj angelcunahuan o paipaj espíritu santohuan ayudashcata crinachu canchij?, o ¿chai huarmi huañugrishca horaspi Kenneth cayashcata shinallachu ricuna canchij?

Dios chai huarmita ima shina ayudashcataca mana yachanchijchu. Pero Diosca paipaj angelcunahuanmi gentecunaca paita rijsichun, paita sirvichun ayudaj cashcata yachanchij. Bibliapica, Jehová Diosca Etiopía llajtamanta runaman paimanta yachachichunmi Felipeman shuj angelta cachashpa ayudarca ninmi (Hechos 8:26-31).

Achca religioncunaca angelcuna tiyashcatami yachachin. Huaquin angelcunaca Diospaj munaita rurashpa o gentecunata cuidashpami ayudancuna nishpami yachachin. Achca gentecunaca angelcuna tiyashpapish paicunapaj causaipi ayudashcatami crincuna. Cutin shujtaj gentecunaca angelcuna tiyashcataca mana crincunachu.

¿Angelcunaca tiyanchu? Chashna cajpica, ¿Bibliaca imatataj angelcunamanta yachachin? ¿Pitaj paicunata rurarca? ¿Ñucanchijta ayudai tucunchu? Cai tapuicunata yachangapajca huaquin yuyaicunata ricushun.