CALLARI YUYAIMANTA | ANGELCUNACA ¿TIYANCHU? ¿ÑUCANCHIJTA AYUDANCHU?
¿Angelcunaca ima shinataj ñucanchijta ayudai tucun?
Diosta sirvij angelcunaca gentecunatami ayudanata munancuna. Shinallataj Diospaj munai pajtarichunmi ayudancuna. Jehová Dios cai Allpata rurajpica ‘Diospaj churicunapish tucuicunami cushicurcacuna’ (Job 38:4, 7). Angelcunapish shamuj punllacunapi Dios imata ruragrishcata huillaj profeciacunatami intindisha nishcacuna (1 Pedro 1:11, 12).
Bibliapica Diosca paipaj munaita pajtachingapajmi angelcunahuan paita sirvijcunata cuidashca ninmi (Salmo 34:7). Por ejemplo:
Sodoma, Gomorra llajtacunata Dios tucuchicujpica angelcunami Lot runata paipaj familiandij ama huañuchun chaimanta llujshichishpa ayudarca (Génesis 19:1, 15-26).
Sadrac, Mesac, Abed-nego jovencunataca Babilonia llajtapimi nina lunyacuj hornopi shitarcacuna. Shinapish ‘Diosmi paipaj angelta cachashpa paicunata quishpichirca’ (Daniel 3:19-28).
Danieltaca leoncunapaj jutcupimi shitarca. Paica: ‘Taita Diosca leoncuna ñucata ama micuchunmi paipaj angelta cachashpa leoncunapaj shimita huichcarca’ nircami (Daniel 6:16, 22).
Angelcunaca achca huatacunatami Diosta sirvijcunata ayudacushca.
ANGELCUNACA JESUSTA PUNTA CATIJCUNATAMI AYUDARCACUNA
Ñaupa punllacunapi Diospaj munai pajtarichun ayudata minishtijpica, angelcunaca Jesusta punta catijcuna Diospaj munaita pajtachichunmi ayudarcacuna. Paicuna ima shina ayudashcata ricushun:
Apostolcuna carcelpi cajpica shuj angelmi pungucunata pascashpa paicunata llujshichirca. Qꞌuipaca: ‘Richij, Taita Diospaj huasipi huillaichij’ nircami (Hechos 5:17-21).
Felipetaca shuj angelmi: ‘Jatari, Jerusalenmanta Gaza puebloman rina shitashca pamba ñanman rishpa, Etiopía llajtamanta eunuco runaman huillagri’ nishpami mandarca. Chai runaca Diosta adorangapajmi Jerusalenman rishca carca (Hechos 8:26-33).
Shujtaj llajtamanta Diosta mana rijsij gentecunapish paita rijsishpa sirvichunmi munarca. Chaimantami Roma llajtamanta Cornelio runamanca shuj ángel muscuipi shina ricurishpaca apóstol Pedrota cambaj huasiman invitai nirca (Hechos 10:3-5).
Apóstol Pedrota carcelpi churajpica shuj ángel ñapish ricurishpami carcelmanta llujshichirca (Hechos 12:1-11).
¿ANGELCUNACA IMA SHINATAJ ÑUCANCHIJTA AYUDAI TUCUN?
Ñaupa punllacunapi shina angelcunapaj ayudahuan Diosca milagrocunata rurashpa gentecunata ayudacushcataca mana ricushcanchijchu. Shinapish Jesusca cunan punllacunapica “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai qꞌuipami cai shina causaica tucuringa” nircami (Mateo 24:14). ¿Tucui llajtacunapi huillangapajca angelcuna ayudacushcata yacharcanguichu?
Angelcunaca muyundij Allpapi alli huillaicunata huillachunmi ayudacuncuna.
Apocalipsis libropica muyundij llajtapi gentecuna Diosta rijsichun, cai Allpapi imata ruragrishcata yachachun angelcuna ayudacushcatami ricuchin. Apóstol Juanca: “Chai qꞌuipaca, chaupi cielota shujtaj ángel volacujtami ricurcani. Paica allpapi causajcunamanca, tucui llajtacunaman, chꞌican chꞌican aillucunaman, chꞌican chꞌican rimaicunaman, tucui pueblocunamanpish huiñaipaj alli huillaita huillanapaj charicujtami ricurcani. Chai angelca: ‘¡Diosta manchaichij, paitaca jatunmari cangui nichij. Imalla rurashcata Dios ricuchishpa llaquichinaca, ñamari chayamushca. Chaimanta cielota, allpa pachata, mama cucha yacuta, llujshicuj yacucunatapish rurajta adoraichij!’ nishpami, sinchita caparirca” nircami (Apocalipsis 14:6, 7). Cunan punllapi angelcuna ima shina ayudacushcata achcacuna parlashcamantami, paicunaca muyundij Allpapi huillangapaj ayudacushcata yachanchij. Ashtahuanpish shuj runa Diosmanta caruyashpa qꞌuipaman arrepintirishpa tigrajpica angelcunaca achcatami cushicuncuna (Lucas 15:10).
¿Diosmanta huillana tiempo ña tucurijpica angelcunaca imatashi ruranga? Jesusca Jatun Mandajcunatapish Jatun Mandajmi can. Paimi angelcunahuan ‘Diospaj jatun punllapi’ macanacunga. Chai macanacuitaca Armagedón nishpami shutichin (Apocalipsis 16:14-16; 19:14-16). ‘Jesusmanta alli huillaita mana cazujcunataca’ paillataj llaquichijpimi angelcunaca Diospaj munai pajtarichun ayudangacuna (2 Tesalonicenses 1:7, 8).
Shinashpaca angelcuna quiquinta ayudasha nishcataca ama cungarichu. Paicunaca Diosta sirvijcunamantaca achcatami preocuparin. Diosca gentecunata cuidangapaj, sinchiyachingapajca paipaj angelcunata cachashpami ayudashcata ricushcanchij (Hebreos 1:14).
Testigo de Jehovacunami muyundij Allpapi alli huillaicunata huillacuncuna. Causangapajca cada unomi alli huillaicunata chasquishpa uyana canchij. Diospaj angelcuna quiquinta ayudachun munashpaca, testigo de Jehovacunami cushicushpa paicunamanta ashtahuan yachachishpa ayudanga.