Jehová Diosta alli sirvij angelcuna shina cashunchij

1, 2. a) ¿Angelcunahuanca imapitaj chꞌicancuna canchij? b) ¿Angelcunahuanca imapitaj igualcuna canchij?

DIOSPAJ pueblopi cashcamantaca shuj jatun cꞌuyaj familiapi cashca shinami sintirinchij. Cai jatun familia ucupica muyundij allpapi caj huauqui panicunami can. Shinallataj jahua pachapi caj angelcunapishmi can (Daniel 7:​9, 10). Angelcunamanta parlashpaca paicunahuan imapi chꞌicancuna cashcatachari yuyanchij. Por ejemplo, Jehová Diosca gentecunata manaraj rurashpami paicunataca rurarca (Job 38:​4, 7). Shinallataj angelcunaca ñucanchijta yallimi poderta charincuna. Angelcunaca jucha illajcuna, ñucanchijta yalli cashcata rurajcunapishmi can. Pero ñucanchijcunaca juchayujcunami canchij (Lucas 9:26).

² ¿Angelcunahuan chꞌicancuna cashpapish imapitaj igualcuna canchij? Por ejemplo, angelcunapish, ñucanchijpish Jehová Dios charishca cualidadcunatami ricuchi tucunchij. Shinallataj Jehová Diosta sirvinata o mana sirvinatami agllai tucunchij. Angelcunapish, ñucanchijpish shuticunatami charinchij. Ashtahuanpish paicunapish, ñucanchijpish Diospaj organizacionpica chꞌican chꞌican trabajocunatami ruranchij. Shinallataj angelcuna shinami ñucanchijpish Jehová Diosta sirvina munaita charinchij (1 Pedro 1:12).

3. ¿Jehová Diosta alli sirvij angelcunamantaca imallatataj yachai tucunchij?

³ Caipi ricushca shinaca achca cosascunapimi angelcuna shina canchij. Chaimantami paicunamanta yachana canchij. Cai yachaipica angelcuna shina humildecuna, shujtajcunata cꞌuyajcuna, llaquicunata ahuantajcuna, congregacionpi mapa ruraicuna ama tiyachun sinchita trabajajcuna cana cashcatami yachashun.

ANGELCUNACA HUMILDECUNAMI CAN

4. a) ¿Angelcunaca humildecuna cashcataca ima shinataj ricuchincuna? b) ¿Angelcunaca imamantataj humildecuna can? (Salmo 89:7).

⁴ Jehová Diosta alli sirvij angelcunaca humildecunami can. Paicunaca achca experienciata charishpapish, poderyujcuna, yachaisapacuna cashpapish Jehová Dios imalla mandashcacunatami cazuncuna (Salmo 103:20). Shinallataj paicunaca mana jatun tucushpami Jehová Dios paicunaman imalla mingashcata pajtachincuna. Achca poderta charishpapish mana jatun tucuncunachu. Paicunapaj shuticunata pi mana yachajpipish paicunaca cushillami Jehová Diospajta rurancuna (Génesis 32:​24, 29; 2 Reyes 19:35).a Jehová Diosta jatunyachinapaj randi paicunata adorachunpish mana saquincunachu. ¿Angelcunaca imamantataj mana jatun tucushcacuna can? Paicunaca Jehová Diosta cꞌuyashcamanta, respetashcamantami mana jatun tucuncuna (Salmo 89:​7-ta liyipai).

5. ¿Apóstol Juanman ricurij angelca humilde cashcataca ima shinataj ricuchirca? (Fotomantapish parlapai).

⁵ Angelcuna humildecuna cashcata Bibliapi ricushun. Más o menos huata 96-pica shuj angelca muscuipi shinami mancharina cosascunata apóstol Juanman ricuchirca. Chai ángel ima shuti cashcataca mana yachanchijchu (Apocalipsis 1:1). ¿Juanca chai mancharina cosascunata ricushpaca imatataj rurarca? Paica chai angelta adorangapajmi paipaj ñaupajpi cungurirca. Shinapish chai angelca chai ratomi: “¿Imata ruracungui? ¡Ama chaita ruraichu! Ñucapish can shinallataj, Jesusmanta huillaj cambaj huauquicuna shinallataj shuj sirvijllami cani. ¡Diosllata adorai!” nirca (Apocalipsis 19:10). Chaita nishpami chai angelca humilde cashcata ricuchirca. Paica paita adorachunca mana munarcachu. Chaipaj randica Jehová Diosta adorachunmi Juantaca animarca. Shinallataj chai angelca Juanta yalli cashcataca mana yuyarcachu. Paica huaranga huaranga huatacunatami Jehová Diosta sirvicurca. Apóstol Juantapish yallimi poderoso carca. Chashnapish paica humildemi carca. Chaimi Juantaca: ‘Ñucapish can shinallatajmi esclavo cani’ nirca. Shinallataj chai angelca Juanta corregina cashpapish mana sinchitachu rimarca. Ashtahuanpish cꞌuyaihuanmi Juantaca corregirca. Seguramente paica apóstol Juan mancharishca cashcamanta chaita rurashcatami cuentata cushcanga.

6. ¿Angelcuna shinaca imatataj rurana canchij?

⁶ ¿Angelcuna shina humildecuna cashcataca ima shinataj ricuchinchij? Ima asignacioncunata chasquishpapish mana jatun tucushpami chaicunataca pajtachina canchij. Ñucanchijlla chai asignacioncunata alli pajtachi tucushcatapish mana yuyanachu canchij (1 Corintios 4:7). Shinallataj Diosta achca huatacunata sirvishcamanta o huaquin asignacioncunata charishcamanta shujtajcunata yalli cashcataca mana yuyanachu canchij. Ashtahuan asignacioncunata chasquishpaca ashtahuan humilde cashcatami ricuchina canchij (Lucas 9:48). Shinallataj angelcuna shinami shujtajcunata yalli cashcata ricuchinapaj randica mana jatun tucushpa paicunataca sirvina canchij.

7. ¿Pita corregina cashpaca humildecuna cashcataca ima shinataj ricuchishun?

⁷ Huauqui panicunata o ñucanchij huahuacunata corregina cashpaca humildadtami ricuchina canchij. Sinchita corregina cashpapish apóstol Juanman ricurij angelpaj ejemplotami catina canchij. Chaipajca alli sintichishpa, cꞌuyaihuanmi aconsejana canchij. Shujtajcunata yalli cashcata mana yuyashpaca respetohuanmi Bibliapi nishcacunata yuyachishun (Colosenses 4:6).

ANGELCUNACA GENTECUNATAMI CꞌUYANCUNA

8. a) ¿Lucas 15:​10-pica imatataj yachachin? b) ¿Angelcunaca predicacionpica ima shinataj ayudancuna? (Página 1-pi tiyaj fotomantapish parlapai).

⁸ Angelcunaca gentecunata cꞌuyashcamantami paicunamantaca preocuparincuna. Por ejemplo, juchata rurajcuna paicunapaj juchacunamanta arrepintirishpa Jehová Diospajman tigrajpica angelcunaca achcatami cushicuncuna. Shinallataj gentecuna Jehová Diosta sirvingapaj paicunapaj causaipi cambiocunata rurajpica angelcunaca cushillami sintirincuna (Lucas 15:​10-ta liyipai). Angelcunaca predicacionpipishmi ayudancuna (Apocalipsis 14:6). Paicunaca mana directamente huillajcuna cashpapish Diosmanta yachana munaita charijcunapajmanmi ñucanchijta apai tucuncuna. Shinapish angelcuna piman huillachun ñucanchijman yuyaita cushcataca mana ni tucunchijchu. Jehová Diosca gentecunata o ñucanchijcunata ayudangapajca mana angelcunallatachu utilizan. Huaquinpica paipaj espíritu santota cushpapishmi ayudan (Hechos 16:​6, 7). Pero Jehová Diosca gentecunata ayudachunca achca cutincunami angelcunataca utilizan. Chaimantami predicacushpaca angelcunapish ñucanchijta ayudacushcatami seguros cana canchij. (“Jehová Diosmi paicunapaj mañaicunata cutichirca” nishca recuadrota ricui).b

9. ¿Angelcuna shina gentecunata cꞌuyashcataca ima shinataj ricuchinchij?

⁹ ¿Angelcuna shina gentecunata cꞌuyashcata ricuchingapajca imatataj rurana canchij? Por ejemplo, congregacionmanta llujshichishca shuj huauqui o pani cutin Diospaj puebloman tigrashcata huillajpica angelcuna shinami cushilla sintirina canchij. Shinallataj chai huauquita, chai panitaca cꞌuyaihuanmi cutin chasquina canchij. Paicunata cꞌuyashcatapishmi nina canchij (Lucas 15:​4-7; 2 Corintios 2:​6-8). Shinallataj angelcuna shinami tucui shunguhuan huillashpa catingapaj esforzarina canchij (Eclesiastés 11:6). Ima shinami angelcunaca predicacionpi ñucanchijta ayudancuna, chashnallatajmi ñucanchijcunapish huauqui panicunata ayudana canchij. Por ejemplo, mushuj publicadorcunahuan, yuyajlla, ungushca huauqui panicunahuanpishmi predicai tucunchij.

10. ¿Pani Saramantaca imatataj yachanchij?

¹⁰ ¿Ñucanchij causaipi cambiocuna tiyashcamanta ñaupa shina ña mana rurai tucushpaca imatataj rurai tucunchij? Cambiocuna tiyajpipish predicacionpi angelcunata ima shina ayudashpa catinatami yuyana canchij. India llajtapi causaj pani Saraca 20 huatacunatami precursora shina sirvicurca.c Shinapish millai ungüi japishcamantami paica camallamantapish ña mana jatari tucurca. Chaimi paica yallitaj llaquilla sintirirca. Shinapish huauqui panicuna ayudashcamanta, Bibliata estudiashpa catishcamantami paica asha asha cutin animota japirca. Pero huillashpa catingapaj imata ruranatami yuyarca. Camamanta mana jatari tucushcamantami paica cartitacunataca mana quillcai tucurca. Chaimi paica telefonopi cayashpa huillai callarirca. Paica paipaj ñaupa revisitacunatami cayaj carca. Y chai gentecunaca shujtaj gentecunapish Bibliamanta yachasha nishcatami paiman huillajcuna carca. Chaimantami ashalla quillacunapi paica 70 gentecunaman Bibliamanta ña yachachicurca. Achca gentecuna cashcamantami paica huaquin estudiantecunataca shujtaj huauqui panicunaman mingarca. Cai panihuan Bibliata estudiacujcunamantaca achcacunami tandanacuicunaman ri callarircacuna. Pani Sara predicacionpi paicunata ayudacushcata ricushpaca angelcunaca seguramente cushillami sintirishcangacuna.

ANGELCUNACA LLAQUICUNATAMI AHUANTASHPA CATINCUNA

11. ¿Diosta sirvij angelcunamantaca imatataj yachanchij?

¹¹ Jehová Diosta alli sirvij angelcunaca huaranga huaranga huatacunatami llaquicunata ahuantashpa caticushcacuna. Por ejemplo, paicunaca Satanaspish, achca millai angelcunapish Jehová Diospaj contracuna tucushpa paita ña mana sirvisha nishcatami ricurcacuna (Génesis 3:1; 6:​1, 2; Judas 6). Shinallataj Bibliapi nishca shinaca shuj alli angelca shuj millai angelhuanmi achca punllacunata macanacurca (Daniel 10:13). Angelcunaca ñaupa punllacunamantapacha cunan punllacunacama ashalla gentecuna Jehová Diosta sirvinata agllashcatapishmi ricushcacuna. Shinapish paicunaca Jehová Diostaca cushillami sirvishpa catincuna. Paicunaca Yayitu Dios ñalla tucui millai ruraicunata tucuchigrishcata yachashcamantami tranquilo sintirincuna.

12. ¿Llaquicunata ahuantangapajca imatataj rurana canchij?

¹² ¿Angelcuna shina llaquicunata ahuantangapajca imatataj rurana canchij? Ñucanchijpish maipica shujtajcuna millaita rurajtami ricushun. Mana cashpaca catirashpami ñucanchijta llaquichingacuna. Pero Jehová Dios pai agllashca tiempopi tucui chai llaquicunata tucuchinatami seguros canchij. Chaimantami alli angelcuna shina ‘allita ruranataca manataj saquina canchij’ (Gálatas 6:9). Yayitu Jehová Diosca ñucanchijtaca ayudasha ninmi (1 Corintios 10:13). Chaimanta espíritu santota cushpa ayudachun mañashunchij. Chashnami llaquicunataca mana pꞌiñarishpa, cushilla ahuantashun (Gálatas 5:22; Colosenses 1:11). Shinallataj Diosta sirvishcamanta catirashpa llaquichijpica Jehová Diospimi confiana canchij. Chashnami manchaitaca mana charishun. Yayitu Diosmi ñucanchij cꞌuchullapi cashcamanta fuerzasta cushpa ayudanga (Hebreos 13:6).

ANGELCUNACA CONGREGACIONPI MAPA RURAICUNA AMA TIYACHUNMI AYUDANCUNA

13. ¿Jehová Diosca angelcunamanca ima trabajotataj mingashca? (Mateo 13:​47-49).

¹³ Cai tucuri punllacunapica Jehová Diosca angelcunamanca shuj jatun trabajotami mingashca (Mateo 13:​47-49-ta liyipai). Huaranga huaranga gentecunami alli huillaicunata uyana oportunidadta charishcacuna. Chai qꞌuipaca cambiocunata rurashpa Diosta sirvinata o mana sirvinatami agllashcacuna. Angelcunaca millaita rurajcunataca cashcata rurajcunamantami chꞌicanyachincuna. Chashnami paicunaca congregacionpi mapa ruraicuna ama tiyachun ayudancuna. Pero chaica congregacionmanta caruyashcacuna Diospaj puebloman ña mana cutin tigramui tucushcataca mana nisha ninchu. Shinallataj angelcuna cuidacushcamanta congregacionpi problemacuna nunca mana tiyanataca mana yuyanachu canchij. Pero huaquin problemacuna tiyajpipish congregacionpi mapa ruraicuna ama tiyachun angelcuna tucui shunguhuan trabajacushcatami seguros cana canchij.

14, 15. ¿Congregacionpi mapa ruraicuna ama tiyachunca ima shinataj angelcuna shina ayudai tucunchij? (Fotocunamantapish parlapai).

¹⁴ ¿Congregacionpi mapa ruraicuna ama tiyachunca ima shinataj angelcuna shina ayudai tucunchij? Chaipajca Jehová Diosmanta ama caruyangapajmi esforzarina canchij. Shinallataj alli amigocunata charingapaj, Diosmanta caruyachij ruraicunapi ama urmangapajmi esforzarina canchij (Salmo 101:3). Shinallataj huauqui panicuna Jehová Diosmanta ama caruyachunpishmi ayudai tucunchij. Por ejemplo, ¿maijan huauqui o pani jatun juchapi urmashcata yachaj chayashpaca imatataj rurana canchij? Chai huauquita, panita cꞌuyashcamantami ancianocunahuan parlachun animana canchij. Pero ancianocunahuan mana parlasha nijpica ñucanchijllatajmi chai huauqui o pani juchapi urmashcata ancianocunaman huillana canchij. Chai huauqui panica espiritualmente mana sinchi cashcamantami juchapi urmarca. Chaimantami paica ancianocuna paita ayudachun minishtin (Santiago 5:​14, 15).

¹⁵ Huaquin huauqui panicunataca jatun juchacunata rurashcamantami congregacionmanta llujshichincuna. Chashna tucujpica paicunahuan apanacunatami saquina canchij (1 Corintios 5:​9-13).d Paicunahuan apanacunata saquishpaca congregacionpi mapa ruraicuna ama tiyachunmi ayudashun. Shinallataj congregacionmanta llujshichishcacunahuan apanacunata saquishpaca paicunata cꞌuyashcatami ricuchinchij. ¿Imamanta? Chaita rurajpica shungumanta arrepintirichunmi paicunataca ayudashun. Paicuna cutin congregacionman tigrajpica Jehová Diospish, angelcunapish ñucanchijpish achcatami cushicushun (Lucas 15:7).

16. ¿Angelcunapaj ejemplota catishcataca ima shinataj ricuchisha ningui?

¹⁶ Angelcunamanta yachashcamanta, paicunahuan shuj shinalla trabajashcamantaca cushillami sintirinchij. Paicuna shina mana jatun tucushcacuna, cꞌuyajcuna, llaquicunata ahuantajcuna cangapajmi esforzarina canchij. Shinallataj congregacionpi mapa ruraicuna ama tiyachunpishmi ayudana canchij. Jehová Diosta alli sirvij angelcunapaj ejemplota catishpaca ñucanchijpish huiñai huiñaitami Jehová Diospaj familia ucupi cashun.