¿SHUJTAJCUNATA AMA PꞌIÑANGAPAJCA IMATATAJ RURANA CANCHIJ?
2 | Ama tigra llaquichichu
Bibliapica cashnami nin:
‘Cancunata pi llaquichijpipish, ama chashnallataj llaquichinguichijchu. Cancuna tucuicunahuan alli cai tucushpaca, tucuicunahuan sumajta causaichij. Ñuca cꞌuyashcacuna, cancunata llaquichijcunataca cancunallatajca ama llaquichishun nichijchu. Cashnami quillcashca tiyacun: “Ñucami llaquichisha, ñucami paicuna japina cashcataca cusha” ninmi Jatun Diosca’ (ROMANOS 12:17-19).
¿Imatataj nisha nin?
Pi ñucanchijta llaquichijpica coleranchijmi. Pero Yaya Diosca pita tigra llaquichichunca mana munanchu. Yaya Diosca mana alli ruraicunatami tucuchisha nin. Chaimantami paipi shuyashpa catichun ñucanchijta animan (Salmo 37:7, 10).
Caita rurai:
Ñucanchijta llaquichishca shinallataj llaquichishpaca shujtajcunata pꞌiñanaca ashtahuanmi tiyashpa catinga. Chaimanta pipish canta llaquichijpi o dañota rurajpica ama chashnallataj tigra llaquichingui. Pꞌiñarinapaj randica tranquilo cangapaj esforzari. Imatapish chaipi saqui (Proverbios 19:11). Maipica pi llaquichijpica chaitaca shujtajcunamanmi huillana cangui. Por ejemplo, quiquinta shuhuajpi o yallitaj maltratajpica policiacunaman o shujtaj autoridadcunaman huillanachari tucunga.
Shujtajcunata tigra llaquichishpaca ñucanchijllatajmi llaquicunata charishun
Pero ¿chai problemata allichina sinchi ricurijpica o chai problemata allichingapaj ña tucuita rurashca cashpaca imatataj ashtahuan rurai tucungui? Tucui can pudishcata rurashca cashpapish ama tigra llaquichinguichu. Tigra llaquichijpica ashtahuan llaquicunami tiyanga. Chaimanta shujtajcunata pꞌiñanata saqui. Dios problemacunata allichinapi confiai. Salmo 37:3-5-pica cashnami nin: “Paillapi shunguta churai. Paica imatapish can munashcata rurangami”.