CALLARI YUYAIMANTA | ANGELCUNACA ¿TIYANCHU? ¿ÑUCANCHIJTA AYUDANCHU?
¿Bibliaca imatataj angelcunamanta yachachin?
¿Angelcunamanta Biblia imata yachachishcata yachanata munanguichu? Por ejemplo, ¿paicunaca picunataj can?, ¿pitaj rurarca?, ¿imatataj rurancuna? Cai tapuicunataca Bibliapimi yachai tucungui (2 Timoteo 3:16). Paicunamanta Biblia imata yachachishcata ricushun.
Diosca shuj espiritumi can. Angelcunapish Dios laya espiritucunami can. Paicunaca “mana aichayuj, mana tulluyujchu” can. Chaimantami paicunataca mana ricui tucunchij. Diosta sirvij angelcunaca jahua pachapimi causan. Paicunaca ‘Yaya Diostami huiñaita ñahui ñahui ricucuncuna’ (Lucas 24:39; Mateo 18:10, El Nuevo Testamento Quichua, Nueva Versión Internacional, 1999; Juan 4:24).
Huaquinpica cai Allpapi Diospaj munaita pajtachingapajmi angelcunaca gentecuna shina tucushca. Paicunaman mingashcata pajtachishpaca espiritucuna tucushpami cutin jahua pachaman tigrancuna (Jueces 6:11-23; 13:15-20).
Angelcunaca cꞌaricuna tucushpami ricurishcacuna. Paicunamantaca Bibliapica cꞌaricuna laya cashcatami parlan. Shinapish paicunaca mana gentecuna shina cꞌaricuna o huarmicuna canchu. Paicunaca mana cazaranchu, huahuacunatapish mana charinchu. Cai Allpapipish nunca mana huacharishcacunachu. Angelcunataca Diosmi rurarca, chaimantami Bibliapica paicunataca “Diospaj huahuacuna” nin (Job 1:6; Salmo 148:2, 5).
Bibliapica ‘gentecunapaj rimaicuna, angelcunapaj rimaicunami’ tiyan ninmi. Chaimantami angelcunapish paicunapuraca paicuna rimashca shimipi parlanacushcata yachanchij. Dios gentecunahuan parlanacungapajca angelcunami ayudashca. Shinapish gentecuna paicunata adorachun, mañachunpish Diosca mana munanchu (1 Corintios 13:1; Apocalipsis 22:8, 9).
Bibliapica angelcunaca “yallitaj huaranga huarangacunami” tiyan ninmi. Mil millones yallicunami canga (Daniel 7:10; Apocalipsis 5:11).
Angelcunaca gentecunatapish yalli achca fuerzayuj, yuyaisapacunami can. Paicunaca yallitaj utcami vulancuna. Paicuna ima shina yallitaj utca vulajcuna cashcataca mana intindi tucunchijchu (Salmo 103:20; Daniel 9:20-23).
Paicunaca ñucanchijta yalli fuerzasapa, yuyaisapa cashpapish mana tucuita rurai tucuncunachu, mana tucuita yachai tucuncunachu (Mateo 24:36; 1 Pedro 1:12).
Diosca angelcunata rurashpaca mana tucuicunata igual rurashcachu. Cada unomi chꞌican chꞌican can. Dios paicunataca pai shina cꞌuyaj, llaquijcuna cachunmi rurashca. Paicunapish ñucanchij layami allita o mana allita agllai tucuncuna. Chaimantami huaquincunaca Diosta mana cazunata agllarcacuna (Judas 6).