¿Mushuj pachapi causangapajca imatataj rurana canchij?

Ñaupa yachaicunapica Yaya Diosca ñalla tucui llaquicunata, mana alli gentecunata tucuchina cashcatami yacharcanchij. ¿Imamantataj chaita crinchij? Diospaj Shimi Bibliaca caitami nin:

‘Cai pachaca chingaricunmi’ (1 JUAN 2:17).

Shinapish huaquin gentecunaca quishpiringami. Cai versollatajmi cashna nin:

“Diospaj munaita rurajca, huiñaitami causanga”.

Shinashpaca quishpiringapajca Diostami cazuna canchij. Pero paita cazungapajca paitarajmi rijsina canchij.

QUISHPIRINGAPAJCA DIOSTA RIJSISHUNCHIJ

Jesusca: “Huiñai causaita charinaca cashnami: Diostajca canlla cashcata rijsinami” nircami (Juan 17:3, QC, 1989). Cai pacha tucurijpi quishpiringapaj, huiñai causaita charingapajca Yaya Diosta rijsinatami minishtinchij. Pero Dios tiyashcata yachashpalla, paimanta huaquin yuyaicunata yachashpallaca mana saquirinachu canchij. Ashtahuanpish paipaj alli amigocunami cana canchij. Caipi yuyashun: Shuj amigohuan ashtahuan alli apanacusha nishpaca paihuan tiempota pasanatami minishtinchij. Dioshuanpish chashnallatajmi can. Chaimanta Diospaj amigo tucungapaj, paihuan alli apanacushpa catingapaj Biblia imata yachachishcata ricushun.

BIBLIATA PUNLLANTA LIYISHUNCHIJ

Causashpa catingapajca tucui punllacunami micuna canchij. Pero Jesusca: “Runaca mana tandallahuan causangachu. Ashtahuanpish Taita Diospaj shimimanta llujshishca shimicunahuanmi causanga” nircami (Mateo 4:4).

Dios nishca shimicunataca Bibliapimi tarinchij. Bibliata estudiashpami Yaya Dios ñaupa punllacunapi imata rurashcata, cunan punllacunapi imata ruracushcata, shamuj punllacunapi imata ruragrishcata yachai tucunchij.

YAYA DIOS ÑUCANCHIJTA AYUDACHUN MAÑASHUNCHIJ

Maipica mana alli ruraicunata saquinaca sinchichari ricurin. Pero ¿Diosta cazunata munashpaca imatataj rurai tucungui? Chaipajca Yaya Diostami alli rijsina cangui.

Sakura shuti huarmihuan ima pasashcata ricushun. Paica huainayashpami causaj carca. Pero Bibliata estudiai callarishpaca, “huainayanataca ama yuyaichijllapishchu” nishpa Dios mandashcatami yachaj chayarca (1 Corintios 6:18, QC, 1989). Sakura shuti huarmica Yaya Dios ayudachun mañashpami paipaj causaita cambiarca. Pero cunancamami tentacioncunapi ama urmangapaj esforzarishpa catina can. Paica: “Mapa yuyaicuna ñuca yuyaiman shamujpica Yaya Diostaca tucui shunguhuanmi mañani. Chaitaca mana ñuca fuerzallahuanchu saqui tucuni. Yaya Diosta mañashcamantami paipajman ashtahuan cꞌuchuyashcani” ninmi. Sakura huarmi shinami achca millones gentecunapish Yaya Diosta rijsicuncuna. Pai fuerzasta cushpa ayudajpimi paicunapaj causaipi cambiocunata rurashpa Dios munashca shina causacuncuna (Filipenses 4:13, NWT ).

Yaya Diosta ashtahuan rijsishpa catijpica paipish ñucanchijtaca ashtahuan rijsishpami catinga. Chashnami paipaj alli amigocuna tucushun (Gálatas 4:9; Salmo 25:14). Shinallataj cai pacha tucurijpica quishpirishpami Dios cusha nishca mushuj pachapi causai tucushun. ¿Pero chaipica ima shina causaishi canga? Catij yachaipimi chaita ricushun.