¿Cambaj causaitaca imataj controlan?
Achca gentecunaca ñucanchij causaitaca suerte o destino controlaj cashcatami crincuna. Chaimantami paicunaca alli causanata yuyashpa paicuna crishca laya chꞌican chꞌican cosascunata rurancuna.
ACHCACUNACA CAICUNAPIMI CRINCUNA
ASTROLOGIAPIMI CRINCUNA. Achcacunaca: “Gentecuna huacharishca punllapi estrellacuna ima ordenpi cashcata yachashpami ñucanchij causai ima laya cana cashcataca yachai tucunchij” nishpami yuyancuna. Chaimantami paicuna huacharishca punllapaj signocunata liyincuna. Chaita liyishpami huaquin problemacunamanta quishpirishpa alli causanata yuyancuna.
BRUJOCUNAPIMI CRINCUNA. Maijancunaca alli causangapaj, imata ruranata yachangapajca brujocunata tapuna cashcatami crincuna. Shinallataj cai gentecunaca brujocunapaj consejocunata catishpami chaitataj pajtachincuna.
HUAÑUSHCACUNATA ADORANAPIMI CRINCUNA. Shujtajcunaca paicunata cuidachun, bendiciachunca huañushcacunata, chꞌican chꞌican dioscunatami adorana canchij nishpami yuyancuna. Por ejemplo Vietnam llajtapi causaj Vana shuti huarmica: “Huañushcacunata adorashpaca cunan punllacunapish, shamuj punllacunapish ñuca huahuacunahuan cushilla causanatami yuyarcani” ninmi.
CUTIN HUACHARINAPIMI CRINCUNA. Achcacunaca huañushcahuan shujtaj causaipi cutin huacharinapimi crincuna. Chashnami paicunaca huañushpapish mana nunca tucurinapi yuyancuna. Paicunaca ima alli o mana alli pasajpica ñaupa tiempopi imallata rurashcamantami chashnaca tucun nishpa yuyancuna.
Achcacunaca caicuna mana cierto cashcata yachashpapish barajacunata, paicuna huacharishca punllapaj signocunatami liyincuna, o tabla ouija® nishcapimi pugllancuna. Mana cashpaca maquitami liyichincuna. Shamuj punllacunapi imallata tucuna cashcata yachashunpishcari nishpami chaicunata rurancuna.
¿IMATAJ TUCUSHCA?
¿Caipi crijcunaca cunanpish, shamuj punllacunapish allitachu causangacuna?
Vietnam llajtapi causaj Hào shuti cꞌarihuan ima tucushcata ricushun. Paica astrologiapi, feng shui nishcapi, huañushcacunata adoranapimi crirca. Pero ¿chaicunapi crinaca ayudarcachu? Paica: “Ñuca negociopica cullquillatami pirdircani. Achcatami dibiyarcani. Familiahuanpish achca problemacunatami charircani. Dimastij llaquillami sintirircani” ninmi.
Taiwán llajtamanta Qiuming shuti runaca astrologiapi, cutin huacharinapi, destinopi, feng shui nishcapi, huañushcata adoranapimi crirca. Pero chai crishcacuna ima laya cashcatami alli ricui callarirca. Paica: “Cai crishcacuna, cai costumbrecunaca mana intindinalla cashcata, ashtahuanpish gentecunata confundichishcatami cuentata curcani. Astrologiapish siempremi pandarin. Shinallataj cutin huacharinapi crinamanta parlashpapish ¿si ñucanchij ñaupa causaipi ima rurashcata mana yuyarishpaca mushuj causaipi cambiangapaj, mejorashpa catingapajca ima shinataj yachashun?” ninmi.
“Cai crishcacuna, cai costumbrecunaca mana intindinalla cashcata, ashtahuanpish gentecunata confundichishcatami cuentata curcani” (QIUMING, TAIWÁN)
Haopish Qiumingpish achca gentecunapish destinopi, estrellacunapi, huañushcacunata adoranapi, cutin huacharinapi crinaca shamuj punllacunapi ima tucunata yachangapaj mana ayudaj cashcatami cuentata cushcacuna. Shinapish ¿shamuj punllacunapi alli causangapajca manachu imatapish rurai tucunchij?
Achca gentecunaca shamuj punllacunapi alli causangapajca shuj titulota charina, charij canami minishtirin nincunami. ¿Pero chaita rurajcunaca caicunata charishca huashapish ima shinataj sintirishcacuna?
a Cai yachaipica huaquin shuticunatami cambiashcanchij.
b Cai shimicunaca Gálatas 6:7-pimi ricurin. Shuj proverbio orientalpish casi chai yuyaillatatajmi nin. Chaipica: “Meloncunata tarpushpaca, meloncunallatatajmi cosechangui. Habascunata tarpushpaca, habascunallatatajmi cosechangui” ninmi.