¿SHUJTAJCUNATA AMA PꞋIÑANGAPAJCA IMATATAJ RURANA CANCHIJ?

1 | Ñahuita ricushpalla ama juzgai

Bibliapica cashnami nin:

“Pi cashpapish Taita Diospaj ñaupajpica tucuicuna chai shinallataj cashcatami cunantajca yachani. Maijan llajtapi causaj cashpapish Taita Diosta manchashpa allita rurajtami Taita Diosca alli nin” (HECHOS 10:34, 35).

¿Imatataj nisha nin?

Ñucanchij maimanta cajpipish, ima razamanta cajpipish Jehováa Diosca ñahuita ricushpallaca mana juzganchu. Ashtahuanpish paica ñucanchijcuna imata yuyashcata, imata sintishcatami ricun. Bibliapica: “Runaca paipaj ñahuipi ricurishcallatami ricun. Ashtahuanpish Mandaj Diosca shungutamari ricun” ninmi (1 Samuel 16:7).

Caita rurai:

Shujtajcunapaj shunguta mana ricui tucushpapish Jehová Dios shinami mana ñahuita ricushpalla tucuicunata igual tratana canchij. Pita rijsishpapish paipaj razamanta o paipaj grupomanta ama juzgashunchij. Ashtahuanpish cada uno ima shina cashcata rijsingapaj esforzarishunchij. Shujtaj razamanta o shujtaj llajtamanta cajcunata mana allita ricunata yachashpaca Yaya Diostami chashna ama yuyangapaj fuerzata cuchun mañana canchij (Salmo 139:23, 24). Yaya Diosca cantaca ayudangatajmi (1 Pedro 3:12).

a Diospaj shutica Jehovami can (Salmo 83:18, NWT).

‘Blanco runahuanca mana nunca tandanacushcachu carcani. Cunanca mundo enteromanta huauqui panicunahuanca shuj familia shinami canchij’ (TITUS)

Experiencia: TITUS

Shujtajcunata pꞌiñanatami saquirca

Titusca yana gentecunahuan blancocunahuan ama tandanacuchun leycuna tiyashcamantami achcata pꞌiñarij carca. Chaimantami pai yuyashca shina pꞌiñaj gentecunahuan tandanacuj carca. Paica: “Ñucanchijca maijan hotelpi, restaurantepi o shujtaj lugarpi yana gentecunata mana ricunayachij gentecuna tiyashcata yachashpaca paicunahuan macanacusha nishpami chai lugarcunaman rij carcanchij” ninmi. Titusca shujtajcunata achcata pꞌiñashcamantami macanacushpalla causaj carca. Paica: “Shuj runahuan o shuj huarmihuan imapi mana de acuerdo cashpaca chai ratomi ñucaca paita macaj carcani” ninmi.

Titusca testigo de Jehovacunahuan Bibliata estudiai callarishpaca paipaj causaipica cambiocunatami rurai callarirca. Bibliata liyinaca paitaca achcatami ayudarca. Bibliapi shamuj punllacunapi ‘huañuipish, huacaipish, llaquipish, nanaipish ña mana ashtahuan tiyanata’ yachashpami paipaj shungupi achcata contentarirca (Apocalipsis 21:3, 4).

Callaripica Tituspajca shujtajcunata pꞌiñanata saquinaca sinchimi carca. Paica: “Ñuca yuyaita cambiana, mana alli ruraicunata saquinapish mana jahuallachu carca” ninmi. Pero Hechos 10:34, 35-pi Dios mana ñahuita ricushpalla juzgashcata yachanami paitaca achcata ayudarca.

¿Qꞌuipaca imataj pasarca? Titusca: “Testigo de Jehovacunaca maijan razamanta, maijan llajtamanta cashpapish caishujmanta chaishujmanta cꞌuyanacujtami ricurcani. Chaimi paicunaca Diosta alli adorajcuna cashcata intindircani. Manaraj bautizarijpica shuj blanco Testigomi ñucataca paipaj huasipi micuchun invitarca. Blanco runahuanca mana nunca tandanacushcachu carcani. Micungallapajpish mana nunca rijchu carcani. Chaica shuj muscui shinami carca. Cunanca mundo enteromanta huauqui panicunahuanca shuj familia shinami canchij” ninmi.