“Cunanllataj pita sirvinata agllaichij”

1. ¿Cushilla causangapajca imatataj rurana canchij? (Isaías 48:​17, 18).

JEHOVÁ DIOSCA ñucanchijta achcata cꞌuyashcamantami yuyaisapa, yachajcuna cachun, cushilla causachunpish ñucanchijtaca rurashca (Eclesiastés 3:​12, 13). Chashna rurashca cashpapish ima alli cashcata, ima mana alli cashcata Jehová Dios ñucanchijman yachachichunmi minishtinchij (Eclesiastés 8:9; Jeremías 10:23). Chaimantami de veras cushilla causangapajca Jehová Diosta tucuipi cazushpa, paillata sirvishpa causana canchij (Isaías 48:​17, 18-ta liyipai).

2. a) ¿Diabloca imatataj crichisha nin? b) ¿Diablo llullaj cashcata ricuchingapajca Jehová Diosca imatataj rurarca?

² Diabloca Jehová Diosta ladoman saquishpa, ñucanchij munashcacunallata rurashpa cushilla causai tucushcatami crichisha nin (Génesis 3:​4, 5). Diablo llullacushcata ricuchingapajca Jehová Diosca gentecuna paicunapaj munashcallata rurashpa causachun, mandajcunata charichunpishmi saquishca. Runacunallataj mandacushcamantami muyundij Allpapica achca llaquicunata charinchij. Cutin Bibliapica Diosta sirvij achca cꞌaricunamanta, huarmicunamantami parlan. Paicunaca Diosta sirvishcamantami cushilla causarcacuna. Jesuspishmi tucuicunamanta yallica Diosta sirvishpa cushilla causarca. Cai yachaipica Diosta sirvinata imamanta Jesús agllashcatami yachashun. Qꞌuipaca imamanta Jehová Diosllata adorana cashcatami yachashun. Chai huashaca ñucanchijcuna imamanta Jehová Diosta sirvinata agllashcatami yuyarishun.

¿JESUSCA IMAMANTATAJ JEHOVÁ DIOSTA SIRVINATA AGLLARCA?

3. a) ¿Diabloca Jesús paita adorachunca imatataj cusha nirca? b) ¿Jesusca pita sirvinatataj agllarca?

³ Cai Allpapi cashpaca Jesusca Jehová Diosta sirvinatami agllarca. Jesús bautizarishca qꞌuipallaca Diabloca cai pachapi tiyaj tucui gobiernocunata ricuchishpami Jesustaca: “Shuj cutinlla ñucata adorajpica tucui caicunatami canman cusha” nirca. Chaimi Jesusca: “¡Anchui caimanta Satanás! Quillcachishcapica: ‘Jehová Diosta adorangui, paillata sirvingui’ ninmi” nirca (Mateo 4:​8-10). ¿Jesusca imamantataj Jehová Diosta sirvinata agllarca? Chaita ricushun.

4, 5. ¿Jesusca imamantataj Diosta sirvinata agllarca?

⁴ Jesusca Jehová Diosta tucui shunguhuan cꞌuyashcamantami paita siempre sirvinata agllarca (Juan 14:31). Shinallataj Jehová Dios tucuita ruraj, tucuicunamanta yalli cꞌuyaj cashcata yachashcamantami paita sirvinata agllarca (Juan 8:​28, 29; Apocalipsis 4:11). Por ejemplo, Jesusca Jehová Dios causaita cuj, generoso, confianalla, mana llullata nij, pai tucui charishcacunata Jehová Dios cushcatapishmi alli yachan (Salmo 33:4; 36:9; Santiago 1:17; Juan 1:14).Cutin millai Diablo gentecunata huañuiman apashcata, llulla, mitsa, shujtajcunapaj charishcacunata munaj cashcataca Jesusca allimi yachan (Juan 8:44). Chaimantami Jesusca Diablo munashca shina Jehová Diosta ladoman saquinapaj randica Jehová Diosllata adoranata agllarca (Filipenses 2:​5-8).

⁵ Ashtahuanpish Jesusca Yayitu Jehová Diospaj shutita jatunyachisha nishcamanta, Diablopaj culpamanta tiyashca tucui llaquicunata anchuchisha nishcamantami Jehová Diosllata sirvinata agllarca (Hebreos 12:2).

¿IMAMANTATAJ JEHOVA DIOSLLATA ADORANA CANCHIJ?

6, 7. a) ¿Achca gentecunaca imamantataj Diosta mana sirvincuna? b) ¿Imamantataj Jehová Diosllata adorana canchij?

⁶ Cunan punllacunapica achca gentecunaca Diosta sirvinataca mana agllancunachu. ¿Imamanta? Jehová Dios ñucanchijta cꞌuyaj, cuidaj, tucuita cuj cashcata mana yachashcamanta. Atenas llajtapi causaj gentecunapish Diostaca mana rijsijcunachu carca. Pero apóstol Pabloca paicunamanmi Diosmanta yachachirca (Hechos 17:​19, 20, 30, 34).

⁷ Apóstol Pabloca Yayitu Dios tucui gentecunaman causaita, samaita, tucui imatapish cuj cashcatami yachachirca. Shinallataj shuj runallamanta tucui laya gentecunata rurashcatami yachachirca. Yayitu Dios ñucanchijta ruraj cashcamantami paillata adorana canchij (Hechos 17:​25, 26, 28).

8. ¿Jehová Diosca imata rurachuntaj mana obligan?

⁸ Jehová Diosca tucuita ruraj, tucuita Mandaj cashpapish paita sirvichunca pita mana obliganchu. Chaipaj randica tucui laya gentecuna paita cꞌuyashcamanta sirvichunmi munan. Chashnami paicunaca Diospaj amigos cashcamantaca huiñai huiñaicama cushilla causangacuna (1 Timoteo 2:​3, 4). ¿Tucui laya gentecuna paita cꞌuyachunca Jehová Diosca imatataj rurashca? Pai tiyashcata, cꞌuyaj cashcatapish ricuchunca cai Allpapi mai sumaj cosascuna tiyashcatami rurashca. Shinallataj paita sirvijcunataca congregacioncunapi tandalla paita sirvichunmi churashca. Paicunata cuidachunca cꞌuyaj, cuidaj ancianocunatapishmi churashca (Hechos 20:28). Ashtahuancarin tandanacuicunapica paimantami yachachin, shujtajcunaman paimanta yachachichunpishmi alli yachachin. Chashna yachachishca qꞌuipaca gentecunata ayudangapaj imallata ruragrishcata yachachichunmi paita sirvijcunata tucui ladocunaman cachan (Mateo 10:​11-13; 28:​19, 20).

9. ¿Jehová Diosca tucui gentecunaman cꞌuyashcataca ima shinataj ricuchin?

⁹ Achca huaranga huaranga gentecunaca Diospi mana crishpami paicuna munashca shina causashcacuna. Chaita rurajpipish Jehová Diosca dimás alli cashcamantami paicuna causashpa catichun, cushilla causachunpish tucuita cushca (Mateo 5:​44, 45; Hechos 14:​16, 17). Chaimantami chai gentecunaca cazarashpa huahuacunata chari tucuncuna, amigocunatapish, shuj trabajitotapishmi chari tucuncuna (Salmo 127:3; Eclesiastés 2:24). Chashnami Jehová Diosca tucui gentecunata cꞌuyashcata ricuchin (Éxodo 34:6). Cunanca ñucanchijcunapi yuyashunchij. ¿Imamantataj Jehová Diosta sirvinata agllashcanchij? ¿Chaita agllashcamantaca paica ima shinataj bendiciacun? Chaimantami yachagrinchij.

¿IMAMANTATAJ JEHOVÁ DIOSTA SIRVINATA AGLLARCANCHIJ?

10. a) ¿Tucuimanta yallica imamantataj Jehová Diosta sirvinchij? (Mateo 22:37). b) ¿Jehová Diosca canhuanpish paciente cashcataca ima shinataj ricuchishca? (Salmo 103:​13, 14).

¹⁰ Ñucanchijpish Jesús shinallatajmi tucuimanta yalli Jehová Diosta cꞌuyashcamanta paita sirvinata agllarcanchij (Mateo 22:​37-ta liyipai). ¿Imamantataj Diostaca cꞌuyanchij? Pai cꞌuyaj, alli, paciente cashcata yachashcamantami cꞌuyanchij. Caita yuyari. Israelitacuna Diosta mana cazujpipish paica paicunataca: “Millai causaita saquishpa cutirichigari” nishpami cutin cutin rogarca (Jeremías 18:11). Chai shinallatajmi ñucanchijcuna pandarijpipish Jehová Diosca paciente cashcata ricuchin. Ñucanchijcuna juchayujcuna cashcatami yuyarin (Salmo 103:​13, 14-ta liyipai). ¿Jehová Dios llaquij, paciente cashcata ricushpaca imatataj rurasha ningui? ¿Nachu paita huiñai huiñaicama sirvinata munangui?

11. ¿Imacunamantataj Diosta sirvishun ninchij?

¹¹ Shinallataj Jehová Dios tucuita ruraj, dimás cꞌuyaj cashcata yachashcamantami paita sirvishun ninchij (Mateo 4:10). Ashtahuanpish Diospaj shutita jatunyachisha nishcamanta, Diablo llulla cashcata ricuchisha nishcamanta, Jehová Diosta cushichisha nishcamantami paita sirvishun ninchij. Cunanmantapacha Diosta sirvishpaca huiñai huiñaita paita sirvina oportunidadtami charishun (Juan 17:3).

12, 13. ¿Pani Janemanta, pani Pamelamantaca imatataj yachashcanchij?

¹² Uchillamantapachami Jehová Diosta tucui shunguhuan cꞌuyai tucunchij. Chai cꞌuyaica tiempo pasajpipish manataj tucuringachu. Caita intindingapajca pani Jane, paipaj ñaña Pamela ima tucushcata ricushun.a Pani Jane 11 huatacunata charishpa, cutin paipaj ñaña Pamela 10 huatacunata charishpaca tandallami Bibliamanta yachai callarircacuna. Paicunapaj yaya mamaca Bibliamanta mana yachasha nishpapish Testigocunahuan Bibliamanta yachachunmi paicunamanca permisota curca. Shinapish paicunapaj yaya mamaca: “Bibliamantami yachai tucunguichij. Pero tucui fin de semanacunami ñucanchijhuan iglesiaman rina canguichij” nircacunami. Pani Janeca: “Ñuca uchillaraj cajpi Testigocuna Bibliamanta yachachishcamantami escuelapica drogarinamanta, huainayanamanta caruyai tucurcani” ninmi.

¹³ Ña jovencuna tucushpaca ishquindijmi publicadora tucurcacuna. Huaquin huatacuna qꞌuipacarin precursoracunami tucurcacuna. Precursoracuna cashpapish paicunapaj mayorlla yaya mamatami cuidarcacuna. Pani Janeca: “2 Timoteo 2:​19-pi nishca shinaca ‘Jehová Diosca paipaj cajcunataca rijsinmi’. Chaimantami ñucanchij causaipi Jehová Dios ñucanchijta manataj saquishpa ima shina cuidashcata ricushcanchij” ninmi. Cai experienciapi ricushca shinaca Jehová Diosca paita cꞌuyashcamanta sirvijcunataca nunca mana saquinchu.

14. ¿Diospaj shutita difindingapajca imatataj rurana canchij? (Fotocunamantapish parlapai).

¹⁴ Ñucanchijcunaca Jehová Diospaj shutitami difindisha, jatunyachisha ninchij. Caipi yuyai. Canca shuj alli amigotachari charingui. Paica cꞌuyaj, generoso, canta alli rijsijmi can. Pero maijanca cambaj amigo millai cashcata, llulla cashcatami ninga. ¿Chaita uyashpaca imatataj rurangui? De seguro paitami difindingui. Chashnallatajmi huaquincunaca Jehová Diosmanta mana allicunata ningacuna. Chaita uyashpaca tucui ñucanchij rurai tucushcahuanmi paita difindina canchij (Salmo 34:1; Isaías 43:10). ¿Ima shina? Jehová Dios ima shina cashcatami tucuicunaman huillana canchij. Shinallataj Dios munashca shina allita rurashpami causana canchij. Chashnami Jehová Diosllata tucui shunguhuan adorasha nishcata ricuchishun.

15. ¿Pabloca paipaj causaipi cambiocunata rurashcamantaca ima bendicioncunatataj chasquirca? (Filipenses 3:​7, 8).

¹⁵ Jehová Diosta cushichisha nishpa, paita ashtahuan sirvisha nishpami ñucanchij causaipi cambiocunata rurangapaj listos canchij. Apóstol Pablopaj ejemplota ricushun. Paica Jesusta catisha nishpa, Diosta sirvisha nishpami paipaj comunapi autoridadta charinata, rijsishca canata saquirca (Gálatas 1:14). Diosta sirvinata agllashcamantami paica cushilla causarca. Jahua pachapi Jesushuan mandangapajpish agllashcami carca. Chaimantami apóstol Pabloca Diosta sirvinata agllashcamantaca mana nunca arrepintirirca. Ñucanchijpish Diosta sirvinata agllashcamantaca mana nunca arrepintirinachu canchij (Filipenses 3:​7, 8-ta liyipai).

16. ¿Juliapaj causaimantaca imatataj yachai tucunchij? (Fotocunamantapish parlapai).

¹⁶ Tucuimanta yalli Jehová Diosta punta lugarpi churashpaca cunan punllapipish, shamuj punllacunapipish achca bendicioncunatami charishun. Caita intindingapajca Juliapaj causaimanta yachashun. Paica uchilla cashpaca paipaj iglesiapaj coropimi cantaj carca. Paica sumajtami cantaj carca. Chaimi ashtahuan alli cantanata yachangapaj ayudata chasquirca. Huaquin huatacuna qꞌuipaca paica rijsishca cantajmi tucurca. Teatrocunapipish, shujtaj sumaj lugarcunapipish achca gentecunapaj ñaupajpimi cantaj carca. Qꞌuipacarin universidadpi alli cantanata yachashpami catirca. Chaipi estudiacushpaca shuj compañeroca Diosmantami paiman huillarca, Diospaj shuti Jehová cashcatapishmi nirca. Chaimi Juliaca semanapica ishqui cutin Testigocunahuan Bibliamanta yachai callarirca. Tiempo qꞌuipaca paipaj cantana profesionta saquishpami Diospajta ruranata punta lugarpi churanata decidirca. Juliaca: “Chaita decidinaca mana facilchu carca. Achcacunaca: ‘¿Maitataj cambaj cantana profesionta saquinguiyari? Canca alli cantajmi cangui’ nircacunami. Chashna nijpipish ñucaca tucuimanta yalli Diosta sirvinatami agllarcani” ninmi. ¿Chashna decidishca 30 huatacuna qꞌuipaca Juliaca ima shinataj sintirin? Paica: “Diosta sirvinata agllashcamantami achca cushilla causashcani. Shamuj punllacunapicarin Jehová Diosca ñuca shuyacushcatapish yallimi bendicianga” ninmi (Salmo 145:16).

JEHOVÁ DIOSTA SIRVISHPA CATI

17. a) ¿Ashalla tiempo tiyashcamanta gentecunaca imatataj utca rurana can? b) ¿Diosta sirvijcunapish imatataj ahuantashpa catina can?

¹⁷ Cai millai mundo tucuringapajca ashalla tiempomi faltan. Apóstol Pabloca: “‘Ashalla tiempopimi’ ‘shamugrijca chayamunga, paica mana uniyangachu’” nircami (Hebreos 10:37). Ashalla tiempo tiyashcamantami gentecunaca Diosta sirvinata utca agllana can (1 Corintios 7:29). Cutin Diosta sirvijcunaca ashalla tiempo tiyajta yachashpami llaquicunata ahuantashpa catina canchij.

18. ¿Imata ruranatataj mana shaicurina canchij?

¹⁸ Jesusca gentecunataca paita tucui vida catichunmi animarca (Mateo 16:24). Chaimantami Jehová Diosta achca huatacunata sirvishpapish paita sirvinataca mana shaicurina canchij. Diosta sirvina maipica mana jahualla cajpipish cunanmantapachami paita sirvishcamanta achca bendicioncunata charishcanchij ¿nachu? (Salmo 35:27).

19. ¿Yin shuti huauquimantaca imatataj yachai tucunchij?

¹⁹ ¿Jovencuna, imatataj yuyanguichij? ¿Diosta sirvishcamantaca ciertochu cushilla causai tucunguichij? Yin shuti jovenca cashnami nin: “Ñucaca tandanacuicunaman rishpa, huillanaman llujshishpapish mana cushillachu sintirij carcani. Pero shujtaj jovencunaca fiestacunaman rishpa, enamoradacunata charishpa, mana alli videojuegocunata pugllashpami cushilla laya ricurircacuna. Chaita ricushpaca ñucapish paicuna shinami causasha nircani. Chaimi Jehová Diosta sirvishpapish pacalla mana allicunata rurai callarircani. Chaicunata ruracui ratoca cushillami sintirij carcani. Pero chai cushicuica ashacamallami carca. Qꞌuipaca shungu ucupica dimás llaquillami sintirij carcani. Chashna sintirishcamantami Bibliapi yachashcacunata cutin yuyai callarircani. Chaicunata pajtachishpa de veras cushilla causanata intindishpami Jehová Diosta tucui shunguhuan sirvinata agllarcani. Chaimantami Jehová Diosca ñuca tucui mañashcacunata cutichishpa de veras cushilla causachun ayudashca” ninmi.

20. ¿Josué shina mana dudashpa imatataj rurana canchij?

²⁰ Shuj salmota quillcaj runaca Jehová Diosmanca cashnami cantarca: “Maijanpish quiquin agllashcaca cushichishcami. Quiquin pushamushcaca cushichishcami. Quiquinpaj huasi canllacunapi causachunmi pushamushcangui” nircami (Salmo 65:4). Chaimanta ñucanchijpish Josué shina mana dudashpa nishunchij: “Ñucapish, ñuca familiapish tucuicunami Jehová Diosta sirvishun” (Josué 24:15).