Ama sololla sintiringapajca amigocunata mashcai | Bibliami ayudai tucun
Huata 2023-pica ungüicunamanta huaquin estudiajcunaca muyundij allpapi achca gentecuna sololla sintirishcatami huillarcacuna. ¿Ama sololla sintiringapajca imatataj rurana canchij?
“Sololla sintirishpa, shujtajcunamanta caruyashpaca ñucanchij saludtami llaquipi churashun. Shinapish chaita mishangapajmi shujtajcunahuan ashtahuan alli apanacungapaj esforzarina canchij” (Vivek Murthy, director general de salud pública de Estados Unidos).a
Huaquincunaca achcacunahuan cashpapish solollami sintirincuna. Imamantapish sololla sintirishpaca Bibliapaj consejocunatami catina canchij. Shinallataj cambaj amigocunahuanmi ashtahuan apanacungapaj esforzarina canchij.
Bibliapaj consejocunami canta ayudai tucun
Shujtajcunahuan alli parlanacunata yachai. Caica can ima shina sintirishcallata parlanataca mana nisha ninchu. Ashtahuanpish shujtajcunata uyanatapishmi nisha nin. Shujtajcunamanta preocuparishpaca paicunahuanmi ashtahuan alli apanacungui.
Filipenses 2:4-pica: “Quiquinlla alli canataca ama mashcaichijchu. Ashtahuanpish shujtajcunapaj alli canatapish mashcaichij” ninmi.
Ashtahuan amigocunata charingapaj esforzari. Mana jovencunallata, mana canhuan huiñai amigocunallatachu mashcana cangui. Ashtahuanpish yuyajcunahuan, jovencunahuan, shujtaj llajtamanta cajcunahuan, tucuicunahuanmi apanacuna cangui.
2 Corintios 6:13-pica: “Pungucunata pascaj shina cancunapaj shungutapish pascaichij” ninmi.
Alli amigocunata charingapaj imata rurana cashcata ashtahuan yachangapajca “Cómo saciar la sed de amistad” nishca yachaita ricui.
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community (La epidemia de la soledad y el aislamiento: Informe del director de salud pública de Estados Unidos sobre los beneficios de las conecciones sociales y la comunidad), 2023.