Sololla ama sintiringapajca shujtajcunata ayudai ¿Bibliapica imatataj yachachin?

Muyundij allpapi achca gentecunami sololla, amigocunapish illaj sintirincuna. Huaquin doctorcunaca shujtajcunata ayudashpa alli sintirinatami nincuna.

• “Minishtij gentecunata ayudashpaca allimi sintirishun. Shinallataj mana ñucanchijlla sintirishunchu, shujtajcunamantapish mana caruyashunchu” (Institutos Nacionales de la Salud de Estados Unidos).

Bibliapica shujtajcunata ima shina ayudanatapishmi ricuchin. Chaita pajtachishpaca ama ñucanchijlla sintirichunmi ayudanga.

Caitami rurai tucungui

Shujtajcunaman cui. Cambaj imalla charishcacunahuan shujtajcunata ayudai. Por ejemplo, shujtajcunahuan pasangapaj tiempota llujchi. Can imalla charishcacunahuan ayudajpica shujtajcunaca achcatami agradicingacuna. Shinallataj alli amigocunatapishmi japingui.

• Lucas 6:38-pica: “Shujtajcunaman cushpa catichij, paicunapish cancunamanca cungami” ninmi.

Shujtajcunata ayudai. Llaquilla cajcunata ima shina ayudanata mashcai. Por ejemplo, paicunata intindishcata ricuchingapajca cꞌuyaihuan uyai. Mana cashpaca paicunapaj causai jahualla cachun ima pudishcahuan ayudai.

• Proverbios 17:17-pica: “Alli apanacuj runaca paihuan apanacujtaca, tucui causaipimi cꞌuyan” ninmi.

Alli amigocunata charingapaj imata rurana cashcata yachangapajca “Tucuicunahuan alli apanacungapaj” temata liyi.