1 Cronicas
19 Chaymanta qipatam Ammon runakunapa kamachiqnin Naas wañukurqa, hinaptinmi churinña kamachirqa.+ 2 Chaymi David nirqa: “Hanuntaqa kuyakuywanmi imaña kaptinpas+ yanapasaq taytan Naas yanapawasqanman hina”, nispa. Chaymi Davidqa runankunata Hanunman kacharqa taytan wañukusqanmanta sunqunta tiyaykachimunankupaq. Davidpa runankuna Ammon runakunapa+ allpanman chayaruptinkum 3 kamachiq Hanuntaqa yanapaqninkuna nirqaku: “Davidqa manam taytaykita kuyaspan sunquykita tiyaykachinanpaqchu runankunataqa kachamurqa. Paykunaqa hamurqaku wañurachisunaykipaq llaqtata qawaqmi”, nispa. 4 Chaymi Hanunqa Davidpa kachasqan runakunapa barbanta qatqarurqa*,+ pachankutapas siki patankamam kuchururqa. Hinaspanmi kachaykurqa kutikunankupaq. 5 Chay runakunaqa pinqakuyllawanñam karqaku. Chay ruwasqankuta willaykuptinkum Davidqa runankunawan willachimurqa: “Barbaykichik wiñanankamayá Jerico llaqtapi+ qipakamuychik, chaymantañayá kutimuychik”, nispa.
6 Davidmi Ammon runakunata chiqnirurqa runankunata pinqaypi churasqanrayku. Chiqnisqanta yacharuspankum Hanun runakunawan Ammon runakunaqa 34.200 kilo* qullqiwan huñuchimurqaku carretakunatawan caballopi silladakunata. Chaykunataqa huñuchimurqa Mesopotamia*, Aram-maaca hinaspa Zoba nacionkunamantam.+ 7 Huñuchimurqakum 32.000 carretakunata. Maaca llaqtamantañataqmi huñuchimurqaku kamachiqtawan runankunata. Paykunam hamuruspanku carpankuta sayarachirqaku Medeba lawpi.+ Ammon runakunañataqmi llaqtankumanta lluqsispanku huñunakururqaku peleanankupaq.
8 Chayta yacharuspanmi Davidqa Joabta+ kacharqa lliw soldadontinta, rirqataqmi aswan kallpasapa soldadokunapas.+ 9 Ammon runakunaqa llaqtapa punkunpim churakururqaku peleanankupaq, hamuq kamachiqkunañataqmi huklaw pampapi karqaku.
10 Joabñataqmi ñawpaqninpi hinaspa qipanpi soldadokunallata qawaykuspan allin peleaq soldadokunata akllarqa, hinaspanmi churarurqa Siria soldadokunawan peleanankupaq.+ 11 Wakin soldadokunatañataqmi wawqin Abisaiman+ saqiykurqa Ammon runakunawan peleanankupaq. 12 Hinaspam Joabqa Abisaita nirqa: “Siria soldadokunawan+ peleayta manaña atiptiyqa yanapawaqniymi hamunki. Ammon soldadokunawan manaña peleayta atiptikiñataqmi yanapaqniki hamusaq. 13 Qarinchakuspayá mana manchakuspa+ peleasunchik llaqtanchikrayku hinaspa Diospa quwasqanchik llaqtakunarayku. Jehova Diosmi tantiasqanta ruwanqa”, nispa.
14 Chaymantam Joabqa soldadonkunapiwan asuykurqaku Siria soldadokunawan peleanankupaq, hinaptinmi paykunaqa lluptikururqaku.+ 15 Chayna lluptikusqankutam Ammon soldadokuna rikururqaku, hinaspankum Abisaimanta lluptikuspanku llaqtaman yaykururqaku. Chaymantam Joabqa Jerusalenman kutirqa.
16 Israel soldadokuna mancharachisqanta qawaykuspankum Siria soldadokunaqa Eufrates mayu lawpi yachaq* Siria runakunata qayarachirqaku.+ Paykunapa kamachiqninkum karqa Sofac, payqa karqa Hadadezerpa soldadonkunapa jefenmi.+
17 Chayta Davidman willaykuptinkum chaylla huñurachirqa Israelpi llapallan soldadokunata. Paykunaqa Jordan mayuta chimpaspankum peleanankupaq churakururqaku. Davidqa runankunapiwanmi Siria soldadokunawan peleanankupaq kinrayninpaman churakururqaku.+ 18 Chaymantam Siria soldadokunaqa Israel soldadokunamanta ayqikurqaku. Davidmi wañurachirqa 7.000 carretayuq soldadokunatawan chakillawan riq 40.000 soldadokunata. Wañurachirqataqmi soldadokunapa kamachiqnin Sofactapas. 19 Chay runakunata Israel runakuna wañurachisqanta qawaykuspankum+ Hadadezerpa runankunaqa Davidwan rimarqaku hawkaña kawsakunankupaq, hinaspankum runankunaña karqaku.+ Siria runakunaqa manañam Ammon runakunataqa yanapayta munarqakuñachu.