1 Samuel
2 Chaymantam Anaqa Diosta mañakurqa:
“Jehova Dioslláy, qamraykum sunquypi kusisqa kachkani,+
Jehova Dioslláy, kallpa quwaqniymi kanki.
Yanapawasqaykiraykum kusisqa kachkani,
mana manchakuspaymi upallachisaq chiqniwaqniykunatapas.
2 Jehova Dioslláy, manam pipas qam hina chuyaqa kanchu.
Manamá qam hinaqa hukqa kanchu.+
Qaqa hinamá Diosniyqa.+
3 Amayá hatuntukuspaqa pipas rimachunchu.
Amayá alabakuspaqa pipas rimachunchu,
Jehova Diosninchikqa lliwtam yachan,+
hinaspapas runakunapa imam ruwasqantam allintapuni yachan.
4 Payqa kallpasapakunapa flechantam pakipakurun,
mana kallpayuqkunamanñataqmi kallpata quykun.+
5 Saksanankukama mikuqkunam mikuyta tarinankupaq kunanqa llamkananku,
yarqaymanta kaqkunañataqmi kunanqa saksasqaña.+
Mana wachakuq warmim qanchis wawayuqña,+
wawasapa warmiñataqmi sapallanña rikurirun.
6 Jehova Diosmi wañuchiqpas chaynataq kawsachiqpas.
Paymi wañusqakunapa kasqanman* uraykachiqpas chaynataq chaymanta hurqumuqpas.+
7 Jehova Diosmi wakchayachiqpas chaynataq apuyachiqpas.+
Paymi pinqayman churaqpas chaynataq hatunchaqpas.+
8 Diosmi mana pipa qawarisqan kaqkunata wakchayaymanta hatarichin
hinaspa wischusqa kasqanmanta kutichimun,+
chaynapi kamachiqkunawan kuskata tiyachiptin
ancha riqsisqa kananpaq.
Jehova Diospam kay allpa pachaqa,+
paymi takyachiqpas.
9 Diosqa payman sunqu kaqkunatam waqaychaykun,+
mana allin runakunatam ichaqa wañuchispan upallachin.+
Runaqa manam kikinpa kallpallanwanqa chiqniqninkuna wañuchiytaqa atinmanchu.+
10 Jehova Diosqa chiqniqninkunataqa chinkarachinqam*,+
rayokunatapas paykunapa hawanmanmi tuqyachimunqa.+
Jehova Diosqa kay pachapa juezninmi.+
11 Chaymantam Elcanaqa Rama llaqtapi wasinman kutikurqa*. Warmachan Samueltañataqmi sacerdote Eliyman saqiykurqa Jehova Diospa carpanpi yanapakunanpaq.+
12 Eliypa churinkunaqa mana allin runakunam karqaku,+ Jehova Diostaqa manam kasukuqkuchu. 13 Sacerdote kasqankurayku tupaqninkuta chaskikunankumantaqa,+ hukkaqnin yanapaqninkutam kamachiqku Diospaq apamusqanku animalpa aychanta timpuchichkaptinku hatun trinchiwan 14 mankamanta hurqumunanpaq. Hinaptinmi chay trinchiwan hurqumusqan aychataqa Eliypa churinkunaman quq. Chaynatam ruwaqku Israel runakuna sapa kuti Silo llaqtaman animalta apaptinku. 15 Chaymantapas wiranta Diospaq manaraq kañachkaptinkum+ sacerdotepa yanapaqninqa animalta apamuq runakunata niq: “Sacerdotepaq kankapunaypaqyá aychata quway. Payqa manam munanqachu yanusqa aychataqa, chawallatam munan”, nispa. 16 Animalta apamuqkunañataqmi niqku: “Wirantaraqyá puntataqa kañaruchunku,+ chaymantañachiki munasqaykita apakunki”, nispa. Hinaptinmi sacerdotepa yanapaqninqa niq: “Manam, kunallanmi quwanayki. Manachayqa qichurusqaykim”, nispa. 17 Chayta ruwaspankum chay yanapaqkunaqa Jehova Diospa qayllanpi llumpayta huchallikurqaku.+ Paykunaqa Jehova Diospaq apamusqankutam mana kaqpaqta hina hapiqku.
18 Samuelqa warmachallaraq kaspanpas Jehova Diospa carpanpim llamkarqa+ linomanta pachayuq*.+ 19 Samuelpa mamanqa sapa watam qusanpiwan Silo llaqtaman riqku Diospaq animalta nakapunankupaq, apaqtaqmi warmachanpaq ruwasqan pachatapas.+ 20 Eliyñataqmi Elcanata hinaspa warmin Anata nirqa: “Jehova Diosman warmaykichikta qusqaykichikraykuyá huk wawatawan Jehova Dios qusunkichik”, nispa.+ Chaymantam paykunaqa wasinkuman kutikurqaku. 21 Jehova Dios yanapaptinmi Anaqa kaqmanta wiksayakururqa.+ Chaymi kimsa qari wawankunaraq karqa. Karqataqmi iskay warmi wawankunapas. Wawan Samuelñataqmi Jehova Diospa carpanpi wiñarqa.+
22 Eliyqa yuyaqñam karqa, chaywanpas yacharqam Israel runakunata churinkuna tukuy ima ruwasqanta.+ Yacharqataqmi carpaman yaykunapi llamkaq warmikunawan puñukusqankutapas.+ 23 Chaymi Eliyqa churinkunata niq: “¿Imanasqamá kay mana allintaqa ruwankichik? Qamkunamantam mana allinkunata lliw runakuna willawan. 24 Churillaykuna, amañayá kay mana allinkunataqa ruwaychikchu. Jehova Diospa runankuna qamkunamanta tukuyta rimasqankuqa manam allinchu. 25 Pipas runamasinpaq pantaruptinqa ichapas hukkaqnin runa mañakunman pantaq runata Jehova Dios pampachaykunanpaq. Ichaqa pipas Jehova Diospaq huchallikuruptinqa,+ ¿piñataq chay huchallikuq runapaq mañakunman?”, nispa. Chayna kaptinpas churinkunaqa manam taytantaqa kasurqakuchu. Jehova Diosqa paykunata wañurachinanpaqmi tantiarurqaña.+ 26 Samuelmi ichaqa wiñasqanman hina Jehova Diospa hinaspa runakunapa kuyasqan karqa.+
27 Diosmi hukkaqnin runanta kamachirqa Eliyman kaynata nimunanpaq: “Jehova Diosmi nisunki: ‘¿Manachu ñuqaqa ñawpaq abueloykiman hinaspa ayllunkunaman riqsichikurqani Egipto nacionta kamachiqpa* ñakarichisqan kachkaptinku?+ 28 Israelpa miraynin llapallan ayllukunamantam ñawpaq abueloykita akllarqani sacerdote kananpaq.+ Paytam akllarqani animalkunata kañapuwananpaq,+ inciensota* quntichipuwananpaq hinaspa mandilwan hinakuspa qayllaypi llamkananpaq. Chayraykum payta hinaspa mirayninkunata nirqani runakunapa kañasqanku animalmanta tupaqninku aychata mikunankupaq.+ 29 ¿Imanasqamá qamkunaqa mana kaqpaq hapinkichik carpaypi kañapuwasqankutaqa?+ ¿Imanasqataq ñuqamantapas astawanqa kuyanki churikikunata? ¿Imanasqataq runaykunapa apamusqan animalkunamanta allinllanta mikuspa puqukuchkankichik?+
30 Israelpa yupaychasqan ñuqa Jehova Diosmi nini: “Ñuqam nirqani aylluyki hinaspa ñawpaq abueloykipa ayllunkuna ñuqapaq llamkanankupaq”, nispa.+ Kunanmi ichaqa ñuqa Jehova Dios nini: “Manam kunanqa chaynañachu kanqa. Ñuqaqa pim hatunchawaqniytam hatunchasaq,+ chiqniwaqniy runakunatañataqmi chiqnisaq”, nispa. 31 Hamuchkanmi punchaw qampatawan aylluykipa munayniyuq kasqaykichikta chinkachinaypaq. Aylluykikunaqa manam mayqanninpas machuyanankamaqa kawsanqachu.+ 32 Israel runakuna sumaqta kawsakuptinkum qamñataq chiqnisuqniki runakunallataña kay carpaypi qawanki.+ Manam mayqan aylluykipas machuyanankamaqa kawsanqachu. 33 Altarniypi* hinalla llamkaq miraynikim waqachispa ñakarichisunki. Chaywanpas yaqa llapallan miraynikikunaqa espadawanmi wañuchisqa kanqaku.+ 34 Churiki Hofniwan Fineasmi huk punchawllapi wañunqaku, chaynapim yachanki mana llullakusqayta.+ 35 Chaymantam kasukuq runata akllasaq, payqa sacerdotem kanqa.+ Paymi munasqayman hina kawsakunqa, hinaspapas akllasqay runatam kasukunqa. Paypa mirayninkunam sacerdotekuna kanqaku. 36 Puchuq miraynikikunam sacerdotekunapa qayllanman hamunqaku, hinaspam qunqurakuykuspanku mañakunqaku llamkaytawan mikuyta. Paytam ninqaku: “Yanapaqniki kanallaypaqpas llamkaytayá quykullaway, chaynapi imallatapas mikuykunaypaq”’”, nispa.+