1 Samuel
3 Samuelqa warmachallaraqmi Jehova Diosta yupaycharqa+ Eliywan kuska. Chay punchawkunapiqa manañam anchatachu Jehova Diosqa runankunataqa rimapayaq, manañataqmi anchatachu musquyninkupipas* rikuriq.+
2 Huk tutam Eliyqa camanpi puñuchkarqa. Paypaqa ñawinpas manañam allintañachu rikukurqa.+ 3 Diospa carpanpi achkipas+ hinallaraqmi ratachkarqa, Samuelñataqmi Jehova Diospa carpanpi* puñuchkarqaña.+ Chaypim Diospa baulninpas karqa. 4 Chay tutam Samuelta Jehova Dios rimapayarqa, chaymi Samuelñataq nirqa: “¿Imata taytáy?”, nispa. 5 Hinaspanmi Samuelqa Eliypa kasqanman kallpaspan nirqa: “Taytáy, ¿imapaqtaq qayamuwarqanki?”, nispa. Eliyñataqmi nirqa: “Manam ñuqaqa qayamurqaykichu, kutispayki puñukamuy”, nispa. Chaymi Samuelqa kutispan puñukurqa. 6 Kaqmantam Jehova Diosqa Samuelta qayarqa: “¡Samuel!”, nispa. Hinaptinmi Samuelqa Eliypa kasqanman rispan nirqa: “Taytáy, ¿imapaqtaq qayamuwarqanki?”, nispa. Eliyñataqmi nirqa: “Manam ñuqaqa qayamurqaykichu, kutispayki puñukamuy”, nispa. 7 Samuelqa manam allintaraqchu Jehova Diostaqa riqsirqa, manataqmi Jehova Diospas chay punchawkamaqa rimapayarqaraqchu.+ 8 Jehova Diosqa kimsa kaq kutipipas kaqmantam qayarqa: “¡Samuel!”, nispa. Hinaptinmi Samuelqa kaqmanta Eliypa kasqanman rispan nirqa: “Taytáy, ¿imapaqtaq qayamuwarqanki?”, nispa.
Chayraqmi Eliyqa cuentata qukururqa Samueltaqa Jehova Dios rimapayasqanta. 9 Chaymi Eliyqa Samuelta nirqa: “Kutispayki puñukamuy, kaqmanta qayamusuptikiqa ninkim: ‘Niykuway Jehova Diosnilláy, uyarichkaykim’”, nispa. Hinaptinmi Samuelqa kutispan kaqmanta puñuykurqa.
10 Chaymi Jehova Diosqa kaqllamanta Samuelta qayarqa: “¡Samuel, Samuel!”, nispa. Hinaptinmi Samuelñataq nirqa: “Niykuway taytáy, uyarichkaykim”, nispa. 11 Chaymi Jehova Diosqa Samuelta nirqa: “Israel runakunam qawanqaku llumpay manchakuypaq ruwasqayta, haykam uyariqqa manam imanakuytapas atinqachu.+ 12 Chay punchawpim Eliyta imam nisqayman hina aylluntinta ruwasaq.+ 13 Chaymi Eliyman willanayki ayllunta wiñaypaq qipanchanaymanta. Payqa ñam yachanña imanasqa chayta ruwanaymantaqa.+ Qipanchasaqqa ñuqata churinkuna ñakawachkaptinpas+ mana anyasqanraykum.+ 14 Chayraykum Eliytaqa nirqani kikintapas hinaspa aylluntapas huchankumantaqa mana pampachanaymanta, nirqanim imataña quwaptinkupas mana pampachanaymanta”, nispa.+
15 Chaymantam Samuelqa puñuykurqa. Achikyaqtañataqmi Jehova Diospa carpanpa punkunkunata kicharqa. Samuelqa manchakurqam Diospa nisqanta Eliyman willaytaqa. 16 Eliyñataqmi Samuelta qayaspan nirqa: “¡Churilláy Samuel!”, nispa. Samuelñataqmi nirqa: “¿Imata taytáy?”, nispa. 17 Hinaptinmi Eliy nirqa: “¿Imatataq Dios nisurqanki? Ama imatapas pakawaspaykiyá willaykuway, manachayqa Diosyá castigasunki”, nispa. 18 Chaymi Samuelqa mana imatapas pakaspa imam kaqta willarqa. Chaymi Eliyñataq nirqa: “Jehova Diosmi rimapayasurqankiqa, tantiasqanman hinayá ruwachun”, nispa.
19 Samueltaqa wiñasqanman hinam Jehova Diosqa hinalla yanaparqa.+ Chaymantapas Samuelpa tukuy ima nisqantaqa Diosqa cumplirqam. 20 Dan llaqtamanta Beer-seba llaqtakama yachaq* Israel runakunam yacharurqaku Samuelta willakuqnin* kananpaq Jehova Dios akllarusqanta. 21 Sapa kutim Jehova Diosqa Samuelman Silo llaqtapi rikuriq. Chaypim Jehova Diosqa Samuelwan riqsichikurqa, rimapayaspanmi Jehova Diosqa riqsichikurqa.+