1 Samuel
4 Samuelqa Diospa nisqantam Israel runakunaman willaq.
Chay punchawkunapim Israel runakunaqa Filistea runakunawan peleaq rirqaku. Chaymi Israel runakunaqa Ebenezer lawpi samarurqaku, Filistea runakunañataqmi Afec llaqtapi. 2 Hinaptinmi Filistea runakunaqa Israel runakunawan peleanankupaq ñawpaqninkupi churakururqaku. Chay peleasqankupim Israel runakunaqa achka wañururqaku. Filistea soldadokunam 4.000 Israel soldadokunata wañurachirqaku. 3 Chay peleasqankumanta samasqankuman ayqikuq Israel soldadokuna chayaruptinkum punta apaqkuna nirqaku: “¿Imanasqataq Jehova Diosqa saqiruwanchik Filistea runakuna wañuchiwananchiktaqa?+ Paykunapa makinmanta libraykuwananchikpaqyá Silo llaqtata rispa Jehova Diospa baulninta* apamusunchik”, nispa.+ 4 Hinaptinmi Silo llaqtaman runakunata kacharqaku Jehova Diospa baulninta apamunankupaq. Diosqa querubin angelkunapa hawanpi* tiyaqmi+ hinaspa angelkunata kamachiqmi. Diospa baulninta apaptinkum Eliypa churin Hofni hinaspa Fineas+ qatirqa.
5 Jehova Diospa baulninta samasqankuman chayarachiptinkum Israel runakunaqa llapallanku qaparirqaku allpapas katkatatanankama. 6 Qaparisqankuta uyariruspankum Filistea runakunaqa ninakurqaku: “¿Imanasqataq Hebreo kastakunaqa chaynatañaqa qaparichkanku?”, nispa. Jehova Diospa baulninta apamusqankuta yacharuspankum 7 Filistea runakunaqa mancharikurqaku. Nirqakum: “¡Israel runakunapa Diosninkum samasqankuman chayaramun!”, nispa.+ Nirqakutaqmi: “¡Imapiraq kunanqa rikukunchik! ¡Manam Diosninkuqa haykapipas peleaqqa hamurqachu! 8 ¡Imallapiraq kunanqa rikukunchik! ¿Pitaq librawasun atiyniyuq Diosninkupa makinmanta? Chay Diosninkum Egipto runakunatapas chunniqpi tukuy imawan ñakarichispan castigarqa.+ 9 Chayna kaptinpas Filistea runakuna, amayá manchakusunchu, qarinchakuspayá peleasunchik. Manachayqa Hebreo kasta runakunapa sirvientenmi kasun, imaynam ñuqanchikpa sirvientenchik kasqankuman hina.+ Chaynaqa, ¡qarinchakuspayá peleasunchik!”, nispa. 10 Chaymi Filistea runakunaqa peleaspanku Israel runakunata wañurachirqaku,+ hinaptinmi wakinqa wasinkuman ayqikurqaku. Chay peleasqankupim achkallay-achka soldadokuna wañururqaku. Israel runakunamantam wañururqa 30.000 soldadokuna. 11 Chaymantapas, Filistea runakunaqa apakurqakutaqmi Diospa baulnintapas. Wañurachirqakutaqmi Eliypa churin Hofnitawan Fineastapas.+
12 Benjamin ayllumanta runam peleasqankumanta ayqikuspan chay punchawlla Silo llaqtaman chayarurqa, chayarurqaqa llikipasqallaña pachayuqmi hinaspa allpallaña umayuqmi.+ 13 Chay runa llaqtaman chayaruptinqa Eliyqa ñanpa waqtanpim sillapi tiyachkarqa. Payqa llumpay llakisqam Diospa baulninta suyachkarqa.+ Chay ayqikamuq runam llaqtaman chayaruspan runakunaman imam pasakusqanta willakurqa, hinaptinmi llapallanku qaparispa waqarqaku. 14 Waqasqankuta uyarispanmi Eliyqa tapukurqa: “¿Imanasqataq chaynataña waqachkanku?”, nispa. Hinaptinmi chay ayqikamuq runaqa Eliyman willaq rirqa. 15 Eliyqa 98 watanpiñam karqa, manaña rikukuspanpas qawaspanmi suyachkarqa.+ 16 Hinaptinmi chay ayqikamuq runaqa Eliyman willarqa: “¡Ñuqam peleasqaykumanta ayqikamuq runa kachkani! Kunallanmi chayaramuni”, nispa. Chayta uyariykuspanmi Eliyqa nirqa: “Taytáy, ¿imam pasarun?”, nispa. 17 Hinaptinmi chay ayqikamuq runañataq willarqa: “Israelpa miraynin ayllunchikkunatam Filistea runakuna achkallay-achkata wañurachinku,+ chaymi wakinqa ayqikurunku. Churiki Hofnitawan Fineastapas wañurachinkum,+ apakunkutaqmi Diospa baulnintapas”, nispa.+
18 Diospa baulninta apakusqankumanta willaykuptinmi Eliyqa punkupi tiyasqanmanta qipaman wichiykurqa, hinaptinmi kunkan qiwikuruptin wañururqa. Payqa llumpay yuyaqña kaspanpas puqusqam karqa. 40 watam Israel runakunapa jueznin karqa. 19 Churin Fineaspa warminmi wiksayuq kaspa unqukunanpaqña kachkarqa. Chaymi Diospa baulninta Filistea runakuna apakusqankumanta, suedron hinaspa qusan wañukusqanmanta yacharuptin wachakunanpaq nanaynin hapiruptin unqukururqa. 20 Wañuy patanpiña kachkaptinmi yanapaqnin warmikuna nirqaku: “Ama llakikuychu, qari wawatam wachakurunki”, nispa. Paymi ichaqa mana imatapas nirqachu. 21 Wawantam Icabodwan* suticharqa.+ Chaynataqa suticharqa “Israel runakunam pinqaypi qiparun” nisqanraykum.+ Chaynataqa nirqa Diospa baulninta apakusqankurayku chaynataq suedron hinaspa qusan wañukusqanraykum.+ 22 Nirqam: “Israel runakunam pinqaypi qiparun Diospa baulninta Filistea runakuna apakusqankurayku”, nispa.+