72 KAQ WILLAKUY
Rey Ezequiasta Dios yanapasqanmanta
¿YACHANKICHU imanasqataq kay runaqa Jehová Diosta mañakuchkan? ¿Imanasqataq Diospa Altarninpa qayllanpi chay cartakunata churarun? Chay runaqa Ezequiasmi. Payqa sur law Juda nacionpi iskay ayllukunapa reyninmi. Ichaqa llumpay sasachakuypim rikurirun. ¿Imanasqa?
Asiria nacionpa tropankunaqa norte lawpi 10 ayllukunata puchukarachinkuña. Mana allin runakuna kaptinku Jehová Diosqa manam yanaparqachu paykunata puchukachichkaptinku. Chaymanta Asiria nacionpa tropankuna hamurqaku Juda nacionpa contranpi peleanankupaq.
Asiria nacionpa reyninmi cartakunata Ezequiasman apachimurqa. Chay cartakunatam dibujopi qawasqaykiman hina rey Ezequiasqa Diospa qayllanpi churarun. Chay cartakunapim Jehová Diosta insultarqa hinaspa Ezequiastapas mana peleaspa Asiria nacionpi reypa makinpi churakunanpaq nirqa. Chaymi Ezequiasqa kaynata mañakurqa: ‘Jehová Dioslláy, qamlla Dios kasqaykita kay pachapi llapallan nacionkuna yachanankupaqyá rey Senaqueribmanta salvaykullawayku’, nispa. Jehová Diosqa ¿uyarinmanchu mañakusqanta?
Ezequiasqa allin ruraq reymi karqa. Manam Israel nacionpi 10 ayllukunapa mana allin ruraq reyninkuna hinachu nitaq mana allin ruraq taytan Acaz hinachuqaya. Payqa Jehová Diospa llapa ima nisqantam kasukullarqa. Chaymi mañakuyta tukuruptillanmi willakuq Isaiasqa Jehová Diospa nisqanta willarqa, kaynata: ‘Asiria nacion reyqa kay llaqtamanqa manam yaykumunqachu. Flechankunataqa manam flechanqachu. Allpapa murallanpa qepanmanqa manam asuykunqakuchu’ nispa.
Qaway chay uray pata dibujota. ¿Yachankichu pikunataq chay wañusqa soldadokunaqa? Asiria nacionpa soldadonkunam. Jehová Diosmi angelninta kachamurqa hinaptinmi chay tutallam 185.000 soldadokunata wañurachirqa. Chaymi Asiria nacionpa reyninqa llaqtanman kutikurqa.
Chaynapim Juda nacionqa salvakurqa hinaptinmi chay watakunapiqa hawkalla kawsakurqaku. Rey Ezequias wañurusqan qepataqa churin Manasesña paypa rantinpi rey karqa. Manasespas chaymanta churin Amonpas mana allin reykunam karqaku. Chaymi mana allin rurayllaña Juda nacionpiqa huntarurqa. Chaymanta rey Amonta serviqninkuna wañurachiptinku churin Josiastaña paypa rantinpi Juda nacionpi rey kananpaq churarurqaku.