Hawkalla rimanapaq

DISCURSO qoqkunaqa manchapakunkum discurso qonankupaq lloqsispaqa, astawanraqmi sapa kuti mana qospankuqa. Chaynallataqmi predicananpaq lloqsiqpas predicayta qallarispanqa manchapakunman. Diosmanta willakunanpaq kamachikuyta chaskispanmi Jeremias nirqa: ‘Ancha warmaraqmi kallani. Manaraq rimaypas yachaqmi kallani’, nispa (Jer. 1:5, 6). Paytam Jehova Dios yanaparqa, qamtapas yanapasunkim. Tiempopa risqanman hinaqa hawkañam rimanki.

Hawkalla rimaqqa sutillatam qawachin imayna sayasqanpi, imamanta yachachisqanman hinataqmi makinwan yanapachikuspan clarota riman.

Kay yachachikuypi nisqanman hina mana rimaspaykipas atiwaqmi chayna rimaytaqa. ¿Imaynata? Imanasqa manchapakusqanchikta chaynataq mana hawkalla rimasqanchikta qawarikuspam. Chayqa kanman imayna tarikusqanchikman hinam.

Imapas ruranayki sasa kaptinqa allin qespinantach munanki ichaqa preocupasqapaschá tarikunki. Chaymi cerebronchik cuerponchikta kamachin adrenalina nisqa hormonata yawarninchikman kacharinanpaq. Hinaptinmi corazonninchik pakpakyayta otaq pumpumyayta qallaykuptin pisipasqa hina rimachwan, sudachwan chaynataqmi makinchikpas moqonchikpas katkatatanman otaq econchikpas hukman uyarikunman. Chaykuna pasawaptinchikmi rupapakuyta qallaykunchik. Chayna tarikuspaqa sasachakuchwanmi ganaswan rimananchikpaq.

¿Imata ruraspam hawkalla rimachwan? Yaqa llapanchikmi manchapakuspa rimanchik. Ichaqa hawkalla rimanapaqmi controlakuyta yachana. ¿Imaynata?

Allinta preparakuspam. Rimanaykipaq kaqta tiempowan preparakuy. Imamanta yachachinaykipaq kaqta allinta entiendey. Chaymantañataq akllay yachachinaykipaq kaqkunata hinaspa reparay uyarisuqnikikuna imakuna yachasqanpi hinaspa tanteay imapi yanapay munasqaykita, chaykunam yanapasunki mayqen yachachikuykunata akllanaykipaq. Sasachakuspaykiqa achka kutikamaña discurso qoqta tapukuy rimanaykipaq kaqta preparakuypi yanapasunaykipaq. Chaynata preparakusqaykim yanapasunki hawkalla rimanaykipaq.

Discursoykita imayna qallarinaykipaq kaqpi reparay. Rimayta qallarispaqa yaqapaschá manchapakuywan rimanki ichaqa rimasqaykiman hinam hawkaña rimanki.

Predicanaykipaq preparakuspaqa kay yachachikuypi yachasqanchikman hina ruray. Imayna sonqoyoq runakunapi reparay ama imamanta yachachinaykipaq kaqkunallapichu. Ima nispa rimayta qallarinaykipaq piensay. Mana manchapakuspa predicaqkunawanpas yanapachikuy.

Piensawaqpaschá leespalla yachachispaqa hawkalla rimanaykipaq kasqanta. Ichaqa astawanpaschá rimanaykipaq manchapakunki. Rimanankupaq kaqtam wakinqa achkata qellqanku, wakinñataqmi pisillata. Ichaqa manam papelpi qellqasqayki kaqkunachu hawkayachisunkiqa aswanqa uyarisuqnikikunata yanapanaykipaq hina preparakusqaykim.

Rimanaykipaq kaqta kallpawan leespam. Chaynata ruraspaykim sonqoykimanta rimayta yachanki. Mana sasachakuspa rimanaykipaqmi practicasqaykiqa yanapasunki. Chaytaqa rurawaqmi huñunakuypipas kachkawaq hina tiyaspapas otaq sayaspapas.

Diosta mañakuspam. ¿Uyarisunkimanchu mañakusqaykita? ‘Diospi confiakuspam yachanchik paypa munasqanman hina mañakuptinchikqa uyariwasqanchikta’ (1 Juan 5:14). Diosta hatunchanaykipaq hinaspa Palabranmanta yachachinaykipaq mañakuptikiqa payqa yanapasunkim. Chayna yanapasqa kasqaykimanta mana iskayrayasqaykim yanapasunki munayninta ruranaykipaq. Chaymantapas mana manchapakuspa rimanaykipaqmi yanapasunki kuyakuq, kusisqa, hawkalla, llampu sonqolla hinaspa imapipas controlakuq kanaykipaq kallpanchakusqaykiqa (Gal. 5:22, 23).

Experienciata hapispam. Predicanaykipaq otaq huñunakuypi rimarinaykipaq astawan kallpanchakuspaqa hawkañam rimanki. Discursota qosqaykiman hinam otaq demostracionta rurasqaykiman hinam manaña manchapakuspa rimanki. ¿Munawaqchu hukkunapa qayllanpi rimayta? Discursota qonanpaq otaq demostracionta rurananpaq kaq iñiqmasinchik mana hamuptinqa rantinpi ruranaykipaq listolla kay.

Kay tawa consejokunaman hina ruraynikiqa allinmi, mana manchapakuspa rimanaykipaqtaqmi yanapasunki qatiqninpi kaq yachachikuykunapas. Imawan sasachakusqaykimanta cuentata qokuspaqa atinkim hawkalla rimanaykipaq controlakuyta. Nervioso kasqanchiktam qawachichwan rupapakusqanchikwan otaq imayna rimasqanchikwanpas.

Imayna tarikusqanchikqa sutillam qawakun. Imayna sayasqaykipas tiyasqaykipas otaq makikiwan yanapachikuspa rimasqaykipas qawachinmi hawkalla otaq manchapakuq kasqaykita. Makikipi puntata reparay. Manchapakusqaykitam qawachin makikita qepaman churasqayki, sapa lawnikiman churasqayki, atrilpi hapipakusqayki, bolsilloykiman hinapayasqayki, sacoykipa botonninta hapipayasqayki, uyaykitawan senqaykita llapchapayasqayki, lentesnikita, relojnikita, lapiznikita, anilloykita, preparakusqayki papelta hapipayasqayki otaq mana tupasqanpi makikiwan yanapachikuspa rimasqaykipas.

Manchapakusqaykitataqmi qawachiwaq chakikita kuyukachachispa, sayasqaykipi mana kuyurispa, hombroykita mana hoqarispa, simikita toqaynikiwan sapa kuti nuyuchispa otaq toqaynikita sapa kuti millpuspa chaynataq pisipasqa hina rimaspapas.

Kallpanchakuspaykiqa atiwaqmi chaykuna atipayta. Chaypaqqa sapakamapim reparanayki hinaspam imapas sasachasusqaykita imayna atipanaykipaq tanteanayki. Kay yachachikuykunaman hina ruraspaykiqa manchapakusqaykitam atipanki.

Imayna rimasqanchikpim sutilla uyarikun. Manchapakuq kasqaykiqa sutillam uyarikun qaparichkaq hina otaq katkatatastin hina rimasqaykipi. Wakinpiqa ichapas oqonayasunkiman otaq utqayllamanñapas rimawaq. Hinalla kallpanchakuy chay sasachasuqnikikunata atipanaykipaq.

Discursota manaraq qochkaspayki kallpanchakuy hawkalla kanaykipaq hinaspa mana manchapakunaykipaq achka kutikama respiray. Imayna tarikusqaykipi piensanaykimantaqa uyarisuqnikikunata imayna yanapanaykipaq preparakusqaykipi piensay. Manaraq rimayta qallarichkaspa uyarisuqnikikunata qawariy hinaspa pitapas astawan qawarispa rimariy ichaqa allillamanta hinaspa imamanta yachachinaykipaq kasqanman hina kusikuywan.

Ama hukmanyaychu. Manchapakusqaykita atipanaykipaqqa hinalla kallpanchakuy. Unay wataña discursaqkunapas wakinqa manchapakunkum hukkunapa qayllanpi rimayta. Ichaqa kallpanchakunkum chayna tarikusqankuta atipanankupaq. Hukaqninmi nirqa: “Manchapakuniraqmi ichaqa kallpanchakunim chayna tarikusqayta mana musyachikunaypaq”, nispa.

Manchapakusqaykita controlanaykipaq kallpanchakuptikiqa uyarisuqnikikunam piensanqaku hawkalla rimasqaykita. Nervioso tarikuptikipas manam musyanqakuchu.

Manchapakuspa rimaspanchikqa rupapakuytam qallaykuchwan, chaymi wakinpiqa panta-pantata rimachwan. Chaynata mana rimanaykipaqmi ganaswan rimanayki.

Manam discursota qonaykikamachu otaq demostracionta ruranaykikamachu suyanayki kay consejokunata servichikunaykipaqqa. Sapa punchaw kallpanchakuy hawkalla hinaspa ganaswan allinta rimanaykipaq. Chayna rurasqaykim yanapasunki discursota qospa, demostracionta ruraspa otaq predicaspapas mana manchapakuspa rimanaykipaq.