Diospa llaqtanpi punta apaqkunapa cartan

Diosmanta willakuq kuyasqayku iñiqmasillayku:

Piensarisun Olivos muqupi sayaq apostolkunamanta huknin kasqanchikta. Ñawpaqninchikpi Jesus rikuriykuspan manaraq hanaq pachaman pasakuchkaspa niwanchikman: “Atiyninwan Dios yanapasuptikichikmi ñuqamanta willakunkichik Jerusalenpi, enteron Judeapi, Samariapi chaynataq kay pachapa cantonkama”, nispa (Hech. 1:8). ¿Ima niwachwantaq chaynata niwaptinchik?

Ichapas enterollan kay pachapi willakunapaq niwaptinchikqa nichwan: “¿Imaynataq aslla kachkaspaykuqa ‘kay pachapa cantonkama’ willakuytaqa atisaqku?”, nispa. Jesus wañukunanpaq huk tutallaña faltachkaptin ima nisqantapaschá yuyarichwan, paymi nirqa: “Sirvienteqa manam patronninmantaqa aswan maschu. Ñuqata ñakarichiwaspankuqa qamkunatapas ñakarichisunkichikmi, rimasqaykunata kasukuspankuqa qamkunapa rimasqaykichiktapas kasukunqakutaqmi. Ñuqapa sutiyraykum tukuy chaykunataqa ruwasunkichik, paykunaqa manam riqsinkuchu kachamuwaqniytaqa”, nispa (Juan 15:20, 21). Chayna nisqanta yuyarispaqa ichapas piensachwan: “¿Imaynatataq chiqniwaspanchik harkawachkaptinchikqa willakuyta atisun?”, nispa.

Kunanpas chaynatapaschá piensachwan. Jehova Diospa testigon kasqanchikraykum “kay pachapa cantonkama” hinaspa “llapallan nacionpi runakunaman” lliwta willakunanchik (Mat. 28:19, 20). Chaynaqa, ¿imaynatam willakuyta atichwan sasachakuykuna kachkaptinqa?

Hechos libropim willawanchik apostolkuna hinaspa chay tiempopi iñiqkuna Dios yanapaptin willakusqankumanta. Kay librom yanapawasun Jesuspa qatiqninkunata imakuna pasasqanmanta yachanapaq hinaspa Diosmanta willakuyninku tukuy hinastinman apurawman chayasqanwan imayna tarikusqankumanta yachanapaq. Yachasuntaqmi ñawpaq tiempopi iñiqkuna kunan tiempopi iñiqkunawan imakunapi yaqa chaynalla kasqanchikmantapas. Manam Diosmanta willakusqallanchikpichu yaqa chaynallaqa kanchik, aswanqa imayna organizasqa kasqanchikpiwanmi. Chaykunamanta yachaymi yanapawasun ñawpaq tiempopi hina kunan tiempopas Jehova Diosqa serviqninkunata yanapawasqanchikmanta mana iskayrayanapaq.

Diosninchiktam mañakuchkaniku kay librota estudiaspa paypi astawan hapipakunaykichikpaq. Jehova Diosqariki chuya espiritunwanmi yanapawasun munayninta ruwanapaq. Munanikutaqmi kay libroqa Diospa gobiernonmanta ‘lliwta willakunapaq’ hinaspa salvakunankupaq achka runakunata yachachinaykichikpaq yanapasunaykichiktapas (Hech. 28:23; 1 Tim. 4:16).