“Rispayá yachachimuychik qatiqniykunaña kanankupaq”

1-6. Willarimuy imaynata hinaspa maykunapi testigokuna willakusqankumanta.

JEHOVA DIOSPA testigon Ghana nacionmanta Rebeca sutiyuq warmam escuelanpi Diosmanta willakuq. Payqa mochilanpim apaq bibliamanta qillqanchikkunata, chaynapi Diosmanta recreopi willakunanpaq. Payqa bibliamantam achka estudiaqmasinkunaman yachachirqa.

² Africa lawpi Madagascar sutiyuq llaqtapi yachaq precursor warmi-qari iñiqmasinchikkunañataqmi karu llaqtachaman riqku llumpa-llumpay rupaypi yaqa tukuy punchaw, chaypim achka runakunaman Diosmanta yachachiqku.

³ Paraguay nacionpi iñiqmasinchikkunapas 15 nacionmanta testigokunapiwanmi 12 runata apaq hatun barcota ruwarurqaku, chaywan Paraguay hinaspa Parana mayukunapa patanpi yachaq runakunaman chayaspanku Diosmanta willanankupaq.

⁴ Llumpayta chirinan Alaska lawpipas iñiqmasinchikkunaqa Diosmanta willakunankupaqmi anchata kallpanchakurqaku. Rupay tiempo chayaramuptinmi achka turistakuna chayman chayanku. Chaymi iñiqmasinchikkunaqa barcokunapa sayananman rinku, hinaspankum carretachakunapi tukuy rikchaq qillqanchikkunata achka idiomapi churanku. Chaylawpi kaq aleutiana, atabascana, chimesiana hinaspa coluchana runakunamanqa avionllawanmi chayaqku Diosmanta willakunankupaq.

⁵ Estados Unidospi kaq Larry sutiyuq iñiqmasinchikñataqmi yuyaqkunapa yachanan wasipi yacharqa. Accidente pasarusqanrayku silla de ruedapi kaspanpas anchatam kallpanchakurqa chay wasipi kaqkunaman Diospa gobiernonmanta willakunanpaq. Willakuqtaqmi hamuq tiempopiqa kaqmanta purinanmantapas (Is. 35:5, 6).

⁶ Myanmar nacionpi achka testigokunam Mandalay llaqtamanta norte lawpi llaqtaman barcopi kimsa punchaw rirqaku hatun huñunakuyman. Paykunam viajaqmasinkuman Diosmanta willakunankupaq achka qillqanchikkunata aparqaku. Barco sayaptin pasajerokuna bajaptinmi iñiqmasinchikkunapas bajaykuspanku chaypi kaq runakunaman qillqanchikkunata quqku. Kaqmanta qispiykuptinku huk pasajerokunaña qispisqankuraykum paykunamanpas Diosmanta willakuqku.

7. ¿Imaynakunatam Jehova Diospa testigonkuna willakunku hinaspa imanasqa?

⁷ Chay iñiqkuna hinam Jehova Diospa testigonkunaqa ‘Diospa gobiernonmanta lliwta willakuchkanku’ enteron allpa pachapi (Hech. 28:23). Willakunkum wasin-wasinpas, callekunapipas, cartakunawanpas utaq telefonowanpas. Carrowan viajaspankupas, parquekunapi purispankupas utaq llamkayninkupi samarispankupas hinallam willakunku. Arí, maypiña willakuspankupas llapankum munanku Diospa gobiernonmanta lliw runakuna yachanankuta (Mat. 10:11).

8, 9. (1) ¿Imanasqataq Diosmanta enteron allpa pachapi willakusqanchikqa admirakuypaq? (2) ¿Imatam nichwan imaña-haykaña kaptinpas hinalla willakusqanchikrayku? ¿Imamantam chaypaqqa yachananchik?

⁸ ¿Qampas 235 masnin nacionkunapi willakuq wara-waranqantin iñiqmasinchikkuna hinachu Diosmanta willakuchkanki? Chaynata ruwaspaykiqa enteron allpa pachapi Diospa gobiernonmanta willakuypim yanapakuchkanki. Runakuna harkakuptinkupas, chiqniwaptinchikpas utaq ima sasachakuyña kaptinpas llapallan nacionpi runakunamanmi hinalla willakuchkanchik Diospa gobiernonmanta yachanankupaq. ¡Chaytaqa atinchik Dios yanapawaptillanchikmi!

⁹ Imaña-haykaña kaptinpas Diosmanta hinalla willakusqanchikraykum nichwan: “¿Imanasqataq mana pipas nitaq diablopas willakusqanchiktaqa tukurachiyta atinchu?”, nispa. Chaymanta yachanapaqqa Jesuspa yachachisqanman hina apostolkuna hinaspa qatiqninkuna ima ruwasqankumantam yachananchik, ñuqanchikqa paykunapa ruway qallarisqallankutam ruwachkanchik.

Unay watapaq hinaspa achka nacionkunapi willakunapaq kamachikuy

10. ¿Imatam Jesus ruwarqa tukuy tiemponwan hinaspa tukuy kallpanwan, chaywanpas imatam yacharqa?

¹⁰ Señorninchik Jesucristopas Diosmantam willakurqa tukuy sunqunwan hinaspa tukuy tiemponwan. Kikinmi nirqa: “Diospa gobiernonmanta sumaq willakuytaqa willakunaymi, chaypaqmi ñuqataqa kachamuwarqa”, nispa (Luc. 4:43). Jesusqa nirqam Diospa gobiernonmanta willakuy ‘llapallan nacionkunaman’ chayananmanta, ichaqa yacharqam sapallanqa chay ruwayta mana tukunanmanta (Mar. 13:10). Chaynaqa, ¿pikunam llapallan nacionkunapi willakunanku karqa hinaspa imaynata?

11. ¿Imatam Jesusqa qatiqninkunata kamachirqa? ¿Imata kachamunanpaqmi nirqa?

¹¹ Jesusqa kawsariramuspanmi qatiqninkunata kamachirqa: “Llapallan nacionpi runakunaman rispayá yachachimuychik qatiqniykunaña kanankupaq, hinaspayá bautizamuychik hanaq pacha taytapa, churipa hinaspa chuya espiritupa sutinpi. Yachachimuychikyá tukuy ima kamachisqaykunata kasukunankupaq. Sapa punchawmi ñuqaqa qamkunawan kasaq kay tiempopa tukupayninkama”, nispa (Mat. 28:19, 20). “Qamkunawan kasaq” nispanqa rimachkarqa Diosmanta willakuyninkupi hinaspa Jesuspa qatiqnin kanankupaq runakunata yachachiyninkupi yanapananmantam. Chaymantapas Jesusqa nirqañam runakunapa chiqnisqan kanankumanta, chaymi Jesus yanapaykunanta necesitarqaku (Mat. 24:9). Hanaq pachaman manaraq kutikuchkaspanpas qatiqninkunatam nirqa chuya espirituta kachamuptin kallpanchasqa kanankumanta, chaynapi “kay pachapa cantonkama” paymanta willakunankupaq (Hech. 1:8).

12. ¿Ima tapukuykunapim yuyaymanananchik? ¿Imanasqataq chay tapukuykunamanta yachayninchikqa ancha allin?

¹² Chaynaqa, ¿ima nichwantaq apostolkunamanta hinaspa Jesuspa wakin qatiqninkunamanta? ¿Kasukurqakuchu Jesuspa kamachisqanta? ¿Lliwman willakunankupaqchu kallpanchakurqaku aslla kachkaspankupas chaynataq chiqnispanku maqapachkaptinkupas? ¿Jehova Diosqa yanaparqachu chuya espiritunwanpas chaynataq angelninkunawanpas? Chaykunamantaqa Hechos libropim willawanchik, chaymanta yachayninchikqa ancha allinpunim. ¿Imanasqa? Runakunaman willakunapaq Jesuspa kamachisqanqa kay tiempopa tukupayninkamam willakusqa kanan karqa, kay tiempopa tukupayninpi kawsasqanchikraykum ñuqanchikpas hinalla willakunanchik, chayraykum Hechos libropi nisqanmantaqa yachananchik.

Hechos libro imakunamanta willawasqanchik

13, 14. (1) ¿Pitaq qillqarqa Hechos librota, imaynatataq yacharqa qillqananpaq kaqkunata? (2) ¿Imakunamantam Hechos libro willawanchik?

¹³ ¿Pitaq Hechos librota qillqarqa? Qillqaqpa sutin mana rikuriptinpas imata nispan qillqayta qallarisqanwanmi yachanchik Lucas qillqasqanmanta (Luc. 1:1-4; Hech. 1:1, 2). Ñawpaq tiempomantaraqmi mana iskayrayankuchu Hechos librota kuyasqa doctor Lucas qillqasqanmantaqa (Col. 4:14). Kay libroqa willawanchik yaqa 28 watapuni imakuna pasakusqanmantam. Chayqa karqa 33 watapi hanaq pachaman Jesus ripukusqanmanta 61 watapi Roma nacionpi Pablo carcelasqa kasqan tiempokamam. Lucasqa qillqasqanpiqa manam kikin chaypi kasqantaqa sutillatachu willawanchik. Chaywanpas, “yanapaykuwayku” utaq “rinaykupaq kallpanchakurqaniku” nispa qillqasqanwanmi yachanchik achka kutipi chaypi kasqanta (Hech. 16:8-10; 20:5; 27:1). Kaykunamanta sumaqta willawasqanchikraykum nichwan Pablota, Bernabeyta, Felipeta hinaspa hukkunatapas tapukuspan qillqasqanmanta.

¹⁴ ¿Imakunamantam Hechos libropi Lucas willawanchik? Jesuspa qatiqninkunapa rimasqankumantawan tukuy ima ruwasqankumantam. Willawanchikmi ‘mana ancha educacionniyuq chaynataq mana riqsisqa runakuna’ kasqankuta runakuna niptinkupas qarikunapas warmikunapas Diosmanta willakunankupaq admirakuypaq kaqkunata ruwasqankumanta (Hech. 4:13). Arí, Hechos libroqa willawanchik Jesuspa qatiqninkuna imayna qallarisqankumantam hinaspa imayna achkayasqankumantam. Willawanchiktaqmi maykunapi hinaspa imaynata mana manchakuspanku Diosmanta willakusqankumantapas (Hech. 4:31; 5:42). Chaynataq Diosmanta hinalla willakunankupaq chuya espiritu imayna yanapasqanmantapas (Hech. 8:29, 39, 40; 13:1-3; 16:6; 18:24, 25). Chaymantapas Hechos libropiqa ninmi Diospa gobiernonpi Jesus kamachiptin Diospa sutin chuyanchasqa kananmanta. Willawanchiktaqmi maynataña harkakuptinkupas Diosmanta willakuy tukuy lawkunaman chayasqanmanta (Hech. 8:12; 19:8; 28:30, 31).

15. ¿Imakunapim yanapawasun Hechos libromanta yachasqanchikqa?

¹⁵ ¿Imakunapim yanapawasun Hechos libromanta yachasqanchikqa? Jesuspa qatiqninkunamanta yachaymi yanapawasunchik Jehova Diospi astawan hapipakunapaq. Chaymantapas, mana manchakuspa willakusqankum hinaspa allin iñiyniyuq kasqankum yanapawasun qatipakunapaq. Paykunata qatipakuspaqa atisunmi “rispayá yachachimuychik, qatiqniykunaña kanankupaq” nispa Jesuspa kamachiwasqanchik kasukuyta. Kay librom yanapawasun Hechos libromanta imam kaqta yachananchikpaq.

Bibliamanta astawan yachanapaqmi yanapawanchik

16. ¿Imakunapaqmi kay libro yanapawasun?

¹⁶ Kay librom yanapawasun 1) Diospa gobiernonmanta runakunaman willakunapaq hinaspa yachachinapaq chuya espiritunwan Dios yanapawasqanchikmanta mana iskayrayanapaq, 2) Jesuspa tiemponpi Diosta serviqkunata qatipakuspa ñuqanchikpas Diosmanta astawan willakunapaq hinaspa 3) Jehova Diospa llaqtanta chaynataq Diosmanta willakuypi yanapawaqninchik iñiqmasinchikkunata valoranapaq.

17, 18. ¿Imayna ruwasqam kachkan kay libro? ¿Imakunam yanapawasun Hechos libromanta astawan yachanapaq?

¹⁷ ¿Imayna ruwasqam kachkan kay libroqa? Pusaqman rakisqam kachkan, sapakamam willakuchkan Hechos libropa hukkaqnin partenmanta. Manam sapa versiculomantachu willawanchik, aswanqa imakuna pasakusqan imayna yanapawananchikmantam yachachiwanchik. Sapa yachachikuypa qallariyninpim willawanchik imakuna yachananchikmanta. Willawanchiktaqmi ima textokunamanta kasqantapas.

¹⁸ Hechos libromanta allinta yachananchikpaqqa kachkantaqmi kay libropiqa sumaq dibujokunapas, chaykunam yanapawasun imakuna pasakusqanpi piensarinapaq. Kachkantaqmi sapaq yachachikuykunapas, chaykunaqa kanmanmi Diospa serviqninkunamanta, sitiokunamanta, imakuna pasakusqanmanta chaynataq Hechos libropi willakusqan runakunamantapas.

19. ¿Imayna kasqanchiktam sapakama qawarikunanchik?

¹⁹ Kay librom yanapawasun Diosta serviyninchikpi imayna kasqanchikta qawakunapaq. Chayllaraq utaq unay wataña testigo kaspanchikpas piensarinanchikmi vidanchikpi imapaq astawan kallpanchakusqanchikpi hinaspa runamasinchikkunaman yachachiypi imayna kasqanchikpi (2 Cor. 13:5). Sapakamam nikunanchik: “¿Tukupay tiempopiña kasqanchikraykuchu Diosmanta willakunaypaq kallpanchakuchkani, icha manañachu? (1 Cor. 7:29-31). ¿Hinallachu willakuni tukuy sunquywan hinaspa kusisqa? (1 Tes. 1:5, 6). ¿Tiempochakunichu Diosmanta astawan willakunaypaq?”, nispa (Col. 3:23).

20, 21. ¿Imanasqataq kunanqa astawanraq Diosmanta willakunanchik? ¿Imapaqmi hinalla kallpanchakunanchik?

²⁰ Amayá haykapipas Diosmanta willakuytaqa saqisunchu. Diospa piñakuynin punchaw kayllapiña kasqanraykum hinaspa runakunapa vidan peligropi kasqanraykum kunanqa astawanraq willakunanchik. Manam yachanchikchu willakusqanchikta hayka uyarinankutaqa. Ichaqa hinallam runamasinchikta yanapananchik Diospa piñakuynin punchaw manaraq chayamuchkaptin (Hech. 13:48; 1 Tim. 4:16).

²¹ Chaynaqa, apostolkunapa tiemponpi tukuy sunqunkuwan Diosmanta willakuqkunatam qatipakunanchik. Kay librota allinta estudiasqanchikmi yanapawasun tukuy sunquwan hinaspa mana manchakuspa Diosmanta willakunapaq. Kallpanchawasuntaqmi mana saqiykuspa ‘Diospa gobiernonmanta lliwta’ willakunapaqpas (Hech. 28:23).