Leeqkunapa tapukuyninkuna
Bibliam willawanchik ‘Jeserpa libronmanta’ hinaspa ‘Tayta Diospa guerrankunamanta willakuq libromanta’ (Jos. 10:13; Num. 21:14). Ichaqa kay librokunataqa manam tarinchikchu Bibliapi kaq wakin librokunata hinaqa. ¿Chinkarunmanchu karqa kay librokunaqa?
Kay librokunaqa manamá Diospa yuyaychasqan chinkasqa librokunachu. Bibliata qellqaq runakunaqa, manam kay librokunallamantachu rimarqaku aswanmi achkamanta. Wakinmi Bibliapi kaq librokuna kanku, ichaqa chay librokunapa sutintam kunan tiempopi runakunaqa manaña reqsinkuñachu. Qawasunchik 1 Cronicas 29:29 nisqanta, chaypim riman: ‘Samuelwan [“Samuel el vidente”, NM ] sutichasqa libromanta’, ‘Diosmanta willakuq Natanpa qellqasqan libromanta’ chaynataq ‘Diosmanta willakuq Gadpa qellqasqan libromantapas’. Kayna sutiyoq kay kimsa librokunaqa yaqapaschá kanku 1 kaq hinaspa 2 kaq Samuel librokuna, otaq Jueces libropas.
Wakinpiñataqmi Biblia qellqaqkunaqa rimanku, Bibliapi kaq librokunapa sutinman rikchakuq huk qellqakunamanta. Kaykunam kanmanku: ‘Juda nacion reykunapa vidanmanta willakuq libro’, ‘Juda nacionpi hinaspa Israel nacionpi reykunapa vidanmanta willakuq libro’, ‘Israel nacionpi reykunamanta willakuq libro’ hinaspa ‘Juda nacionniyoq reykunapa chaynataq Israel nacionniyoq reykunapa vidanmanta willakuq libropas’. Kay tawa qellqakunapa sutinkuna; 1 kaq hinaspa 2 kaq Reyes librokunapa sutinman rikchakuptinpas, manam Diospa qellqachisqanchu (1 Rey. 14:29; 2 Cro. 16:11; 20:34; 27:7). Yaqapaschá chay qellqakunaqa karqaña, Esdras hinaspa profeta Jeremias Bibliapi kaq libronkuta qellqachkaptinku.
Chaymantapas Bibliata qellqaqkunam wakinpiqa chay tiemponkupi kaq sapaq qellqakunata servichikurqaku. Qawasunchik Ester 10:2 nisqanta, chaypim riman: ‘Media hinaspa Persia nacionniyoq reykunapa vidanmanta willakuq libromanta’. Chaynallataqmi Lucaspas nirqa ‘qallariyninmanta sumaqta yachaykuspan’ libronta qellqasqanmanta, arí yaqapaschá chay tiemponpi kaq sapaq qellqakunata servichikurqa Jesuspa abuelonkuna pikuna kasqanmanta allinta yachananpaq (Luc. 1:3; 3:23-38). Lucaspa qellqasqan libroqa Diospa qellqachisqanmi, chaymi chay tiempopi sapaq qellqakunata servichikuspan qellqaptinpas, hinallam ñoqanchikpaqqa ancha valorniyoq.
Hinaptinqa, qallariynin tapukuypi kay iskay librokunaqa manam Diospa qellqachisqan librokunachu karqa. Chayraykum Jehová Diosqa mana waqaycharqachu. Bibliamanta estudioso runakunam kay iskay librokunamanta ninku, Israel runakunapa enemigonkunawan peleasqankumanta rimaq takikuna kasqanmanta (2 Sam. 1:17-27). Chaymantapas Bibliamanta rimaq huk librom nin ichapas karqa “ñawpaq Israel nacionpi reqsisqa takiqkunapa waqaychasqa sumaq takinkuna”, nispa. Jehová Diosmanta willakuq serviqninkunapas sapaq librokunatam qellqarqaku Dios mana yuyaychachkaptinpas, chaymi ‘allinta yachachiwananchikpaq, faltanchikkunata qawachiwananchikpaq’ Bibliapiqa mana rikurinchu (2 Tim. 3:16; 2 Cro. 9:29; 12:15; 13:22).
Biblia qellqaqkuna chay librokunamanta rimaptin otaq servichikuptinkupas manam nichwanchu Diospa palabranmi nispaqa. Ichaqa seguromá kachwan kapuwasqanchik Diospa ‘palabranpiqa’ lliw qellqachisqan librokuna kasqanmanta, kayqa “wiña-wiñaypaqmi” takyanqa (Isa. 40:8). Chaynaqa, Jehová Diospa qellqachispan waqaychasqan 66 kaq Bibliapi librokunallatam necesitanchik, chaynapi “tukuy allinkunata rurananchikpaq” (2 Tim. 3:16, 17).